راقصي الهوس فجورا

الجزء الأول

⚜️ࢪَاقِــصِـي الهَــــوَس فُــجُـوࢪَا⚜️

••عِـــــــشْقٌ ذَمِيـــــــــمْ••

‏✎𝐒𝐡𝐞 𝐖𝐨𝐥𝐟 ✦𝐖𝐢𝐣𝐨𝐮 ✦𝐈𝐦𝐲

‏𝐏𝐚𝐫𝐭乂1

...‏Samedi soir
سامدي سوار في ارض الشيطان ،الارض المحرمة لي يباح فيها الممنوع و الشهوات و ملذات النفس الامارة بالسوء ،جوج كلمات مختاصرين بزاف ديال المعاني كل واحد وكيفاش كتدوز عنده ديك الليلة بالضبط، كاين لي يتسناها كجرعة ادمان ،بحال شي بلية دقت شوكتها فيه ،وكاين لي كانت ليه ملجأ يطاسي فيه هارب من الهم والمشاكل.

من هينيكن ميتين و ستين ريال، للماحيا 150 درهم، لجاك دانيال 1000 درهم، وصولاً لفودكا كلاسيك جوج د المليون ,المهم في الأخير كلشي كيسكر كيدوخ و يغيب، كي المرفح كي لي على قد الحال ،نتيجة واحدة كلشي كيجيب الكاو بغض النظر عن الفلوس..

فكازا المدينة التي لا تنام و بالضبط فأشهر بار فيها، ولي كان مسمى عليه « Le CasArt Bar » تقييمه خمس النجوم لي كتبين طبقة رواده و النيڤو ديالهم ،كان داخل بقامته العالية وضخامته لابس كلشي كحل ،كان داير يده فجيبه بإهمال واليد لاخرا شاد بيها كارو بين صباعه السبابة والابهام بطريقة غير معتادة ،هو و صاحبه لي كان اصر عليه يجيو يقصرو فهاد البار.

ترمات عليهم العيون و بالخصوص هو لي كان غير مبالي مكانش كيكلف راسه حتى يشوف فشي حد ،عكس صاحبه لي ملي دخل مع الباب و هو كيسلم، شي كيعيط ليه من هنا شي كيجي عنده من لهيه .

البار من الداخل كان مختلف كليا على الخارج دياله ،كان كيستاهل كل نجمة فتقييمه كان فخم بطريقة خيالية...

بركو فوحدة من الطبالي لي فالأمام ، و نطق صاحبه و هو هاز يديه كيشير لوحدة من السيرفورات باش تجي لعنده : كيف جاك الكوان؟

لا رد منه شاف فيه لقاه شاعل كارو وشاده بين صباعه كيتكيف كان مبلي كيكمي كثر ما كيهدر ، نغزه صاحبه بكوعه باش يشوف فيه :" وا مصطفى كنهدر معاك "

فهاد اللحظة وقفت عليهم السيرفورة ،بإبتسامة تخـ طف القلب،مدت يديها لصاحبه كتسلم :و فين عدنان غبرتي علينا ،حتى قلنا صافي بدلتينا..

كانت بنت شهيبة وطويلة و ملامحها كيجذبو، كانت رشيقة وقوامها متناسق كونها عارضة الازياء خارجة من مجلة .

عدنان وهو شاد يدها بين يده:على انا نقدر نخلي هاد الزين و نمشي لبلاصة خرا؟ مالي تسطيت؟

السيرفورة بتاسمت ليه و عينيها على مصطفى لي مكانش مسوق ليهم، كأنه فعالم غير عالمهم،عطات لعدنان اشارة بحاجبها كتسوله عليه،هتد الأخير لي حرك ليها صبعه بمعنى انه ماشي ديال اللعب و من الأحسن تحيدو من بالها...