....الكسكس يتفور ...والريحة مالية الكوزينة والدار ..كانو بداو يديرو في القصايع باش يصدقو على خروج ابنهم من الحبس ...وهذاك لي كان ....لالة زهرة وقفت على كلشي باش يخرج بالتاويل والحطة لي ما تليق غير بيهم ...كانت في الكوزينة تزين في القصعات البنية الخشبية وتحط طراف اللحم الكبار فوق الطعام هذاك ....والخضرة لي تزين بيها ...طلعت راسها وتشوف فلي كاين ....كانو معاها زوج من عرايسها....مرت الولد الثاني حفصة ومرت الثالث جهينة ....كل واحدة تزوق من جيهتها وتعدل....حتى خلصو كلشي وبعتو للرجال باش يخرجو ويحطو في الوليمة لي دارها راجلها... راضي ....مسحت يدها وخلات الكناين يغسلو الماعن ...وهي خرجت تبدل وتريح شوية ....طلعت في الدروج لي رايحين لجيهة بيتها لمحت مرتضى قاعد يتكيف و يطل على النساء لي تحت ...كانت منهم مرت ولدها الصغير زكريا ....ماريا ...لي كانت تعدل في المخاد تع الصالة ...معجبهاش التصرف تاعو ...ولدها تغير بزاف وفي كل نهار قاعدة تلاحظ هاذ الشيء ...هدات روحها شوية وقربت منه بهدوء ...دور ليها وتبسم ورجع عينيه وين يشوف حتى نطقت ...
"...راك مليح ..رقادك تعدل ؟..."
نفخ الدخان من فمه ، هزلها راسو ...
"...هيه معلياش...رقدت البارح شوية ...مش كيما مالف ..."
تنهدت و حطت يدها على ظهرو وحاولت تستعطفو شوية ....
"...مكش حاب تخطب شفتك مزدتش حكيت على الموضوع ...؟.."
لاحظت تكشيرتو ...
"..باباك راهو مصر على الموضوع وانت عارف ....لازم نحددو موعد اليوم مع عمك ومرته باش نتقدمو الخطبة...."
"....علاه هادي الزربة كاملة ....حابين تزوجوني هكذا طول ....بلاك مش رايحة تعجبني ...."
"...معندكش خيار ...هاذي المرة باباك راح يكون عندو تصرف خلاف معاك راك وليت تعرفو ....وكشما يصرالو راح يلصق في رقبتك انت دير في بالك مليح هاد الهدرة .....اليوم راح تجي جميلة ونهدر معاها ...."
هز عينيه فيه ونطق بصوت فضولي ...
"...بنتها جاية ؟..."
تبسمت معاه..
"...لكان تحكي على فردوس فلا ...متحضرش المناسبات.....عندها فترة طويلة متجيش غير للضرورة .....مع الوقت راك تعرفها...."
هز حاجبو باستغراب مش عاجبو واش سمع ....
"..علاه هاذ التعقيد كامل ..."
"...حكاية طويلة من الأحسن هي لي تحكيهالك لانو تخصها.....هيا اهبط و حبس ما تشوف في النساء لي غراب عليك مرتضى ...عيب تشوف في حرمة راجل خلاف ..."
دارلها بيدو ورجع لبيتو يبدل عليه باش يهبط.....هدرتها خلاتو يدخل في حيط ...حاسهم مخبيين عليه حاجة ...ومش عارف واشنو هي ....شغل مش داخلتلو هاذ التزويجة في مخو مليح ...وحسهم حطوه تحت الأمر الواقع .....هبط لتحت وين الرجال قاعد باباه يعرفهم عليه ....كاين لي يعرفوه وكاين لي لالا ...تغذاو كامل ويهدرو في مواضيع مختلفة ...حكايات رجال ...هو مكانش مهتم ...ولاحظ عليهم كيفاه يهدرو غير بالدين قال الله و قال الرسول صلى الله عليه ....بلا ما يحس قعد يقارن رجال الحبس ورجال قريته.....فرق بين السماء والأرض.....الحبس عموما عالم خلاف ....عالم غريب ....عالم مش عادي ....يبان قدامهم كأننه هاذيك البقعة السوداء في نص الحيط الأبيض....حاول يتجاهل هاديك المشاعر الي جاتو ...طلع عينيه في عمه عبد الله لي راح يكون اب مرته المستقبلية......لقاه هو تاني يشوف فيه بحيرة ربما اكثر منه ....اومأ براسو ليه .....حتى نطق باباه كاسر الهدوء ...
أنت تقرأ
للعشق هم جهلاء ......
Short Storyرواية : للعشق هم جهلاء ....باللهجة الجزائرية .....بقلمي أسيل ...هو من أراد الأنوثة الطاغية....العاطفة والاغراء و تلبية رغباته ...ولم يكن يخجل من أن يطلب من قدره فتاة مغرية تجعله ثملا بدون كحول ...هل هذا عيب ...؟..على الأقل هو صريح مع ذاته ...هو شهو...
