....كانت هاذيك الجملة الأخيرة لي تقالت تعتبر قنبلة موقوتة في حد ذاتها ...جورية توسعو عينيها ودورت ليها مصدومة دورت شافت اذا كاش واحد سمعها وقفلتلها فمها بخوف وتوتر....لمياء من عالمها الوردي رجعت لعالم الواقع ....محستش بروحها كي قالت هاذيك الهدرة ....
".....نتي هبلتي تهدري هدرة كيما هادي هنايا في وسط الدار....ربي يهديك ...اسكتي ...كي نرجعو احكيلي ..."
"...جورية والله محسيت بروحي ..اسمحيلي ...مديريش عليا راني نخرط برك ...."
شافت فيها بنص عين و قعدو مع لمة النساء لي كانو يحكيو و يضحكو ...عندهم مدة مشافوش بعضاهم ...خصوصا من ورا المشكل لي كان ...نطقت نور الهدى وهي هازة ملعقة من الكسكس لي كان محطوط ...
"....فردوس وعلاه ساكتة ؟....واش حوالك مع الخطيب والعرس وين راكم واصلين ...."
شافت فيها فردوس لي كانت شاردة ...تبسمت ليها بهدوء ....
"....حمد الله أ مرت عمي ...كلشي مليح ..."
...هزتلها رأسها بشوية موافقتها وضحكت ...
"....هههههه لوكان نتبعوها أ جميلة بنتك منديو منها حرف واحد ... "
...هزت رأسها جميلة وبادتلها الضحكة ...
"...تعرفيها بلا ما نقولك...يا ختي انا وختها لي رانا نوجدو ...هي والله ما علابالها تقول انا لي رايحة نتزوج ....وزيد مع خطبة جورية كلشي تخربطلي مزية جيتي تعاونيني في الحلوى ....مزاللني قداه من نوع نديروه ..."
"...هيه نعاون ختي على العين والراس ..ربي يهنينهم نشاله والذرية الصالحة ...."
"...لعقوبة للمياء أ مرت عمي ...كي اليوم نسمعو خبر فرحها ..."
...كان صوت هند لي كانت مشاركة معاهم الحديث بفضول....كملو كلشي وراحو للمطبخ وين فرشو في الأرض ودارو جلسة نساء وبداو ...الرجال كانو تغذاو وخرجو و البنات ومريم بداو يغسلو في الماعن ....الكبارات بداو مع الحلوى التقليدية.... جمعة عائلية نسائية متخلاش من الضحك و التمنشير ....حتى فردوس وكانت معاهم بابتسامات خفيفة ترميها مرة على مرة.....والفو طبعها ويعرفوها شحال عميقة التفكير مع أنه الاغلبية تع العايلة ميحملوهاش و يعتبروها متكبرة بزاف ومدايرة فيها حاجة كبيرة .....لكن المقربين والفو طبعها هذا وقدرو يتقبلوها ...هي تاني لي جاز عليها مش قليل ....
....حكمت يدها بزربة وتسرسبت بيناتهم ...راحو لبيتها لفوق ونطقت جورية بفضول
"...درك تفرغي واش قلتي كامل ....هيا ...في بالك نسيت واش قلتي قبيل ...."
"...يا بنتي نتمسخر برك مديريش عليا ...تأمني كلشي نتيا ...."
...شافت معاها بنص عين وهزت رأسها تع أمنتك ...
".....أنا كلشي نقولهولك وهاذي مخبيتها عليا اصلا ماهيش حاجة صعيبة اي وحدة تكبر تبدأ تعشق نتي برك طولتي شوية ههههههه انا عشر سنين عجبني ولد عمتي سليم ....."
أنت تقرأ
للعشق هم جهلاء ......
Short Storyرواية : للعشق هم جهلاء ....باللهجة الجزائرية .....بقلمي أسيل ...هو من أراد الأنوثة الطاغية....العاطفة والاغراء و تلبية رغباته ...ولم يكن يخجل من أن يطلب من قدره فتاة مغرية تجعله ثملا بدون كحول ...هل هذا عيب ...؟..على الأقل هو صريح مع ذاته ...هو شهو...
