مع انتهاء كل قصة كنت بكتبها كان بيبقي عندي كلام أقوله سواء عن خطط كنت حابة القصص تمشي عليها وغيرتها وأنا بكتب أو مجرد تعليقات عن الشخصيات اللي فيها بس مع انتهاء بارك وباركر حاسة إني معنديش حاجة أقولها ... دي أول قصة مشيت فيها كل حاجة حسب الخطة ، مغيرتش أي حاجة كنت مخططالها من البداية ودي حاجة فرحتني لأني وصلت ف الآخر للنتيجة اللي كنت عايزاها وعملت كل اللي أنا عاوزاه من غير ما أحط اعتبار لأي تعليق سلبي ، قبل كدة كنت بفكر إنه لازم يكون عندي تحفظات في كتابة الشخصيات عشان القراء مياخدوش عنها انطباع سيء لأن في الغالب محدش كان بيوصله وجهة نظري ككاتبة وازاي أنا بشوف شخصياتي من منظور محدش بيشوفه غيري ( مثال : شخصية يوسُب من العيون عليها ) هو يعتبر أكتر شخصية كتبتها مُساء فهمها كشخصية سيئة وإنه وغد ( مع إن من منظوري هو مش كدة خالص ) بس خلينا نقول إن القراء بيتحمسوا مع الشخصية الرئيسية لكن اللي بيكتب بيكون عارف دواخل كل شخصية في صميمها
في القصة هنا أنا مخفتش أخلي الشخصيات ترتكب أفعال ساذجة حتي الشخصيتين الرئيسيتين لأن في الآخر الشخصيات دي مش ملائكة، هما بشر وبيغلطوا ومش معني إنهم عندهم جوانب حلوة كتير إنهم ميكونش عندهم جوانب سلبية لأنهم أكيد مروا بحاجات كانت السبب وحتي لو ده مكنش مبرر فمعظمهم صميمهم الجيد بيخليهم يدركوا أخطاءهم ويتجاوزوها وكمان هما في بداية حياتهم .. ومثلًا شخصية زي هيون سوك محدش عارف إيه ممكن يحصله في المستقبل يمكن يكون أحسن أو أسوأ متنسوش إن القصة بتنتهي بالنسبة لكم مع آخر فصل بتقرأوه منها لكن بالنسبة للعالم اللي بتدور فيه القصة الشخصيات دي لسه عايشة وفي تغيرات كتير هتحصلها
كنت قرأت جملة وقفتني شوية وهي دي اللي خلتني أبطل التحفظ اللي كان عندي كانت بتقول
"There is no such thing as bad people. We're all just people who sometimes do bad things."
— Colleen Hoover
وده معناه إن فعل سيء واحد أو حتي شوية أفعال الشخصية بتعملها ميقدرش يمحي كون إنها تقدر تكفر عنه وتبدأ من جديد ( من غير ما يتم الحكم عليها أو إدانتها ودي حاجة مهمة )
عشان كدة في المجتمع الخيالي متحاكموش الشخصية لأنها ملهاش ذنب غير إني كتبتها ، وفي الحقيقة ( رغم إن في ناس أوغاد فعلًا أنا مش بنكر ) لكن لو كان الشخص اللي قدامك انت متعرفش عنه كتير وصدر منه موقف مش لذيذ حاول متحكمش عليه طالما إنك متعرفش ظروفه ومفاتيحه
وبس كمان حاجة حابة أقولها واتقالتلي أكتر من مرة قبل كدة وهنا بأحب أعترف بيها بعد ما كنت بنكرها.. أنا فعلًا بكتب عن حياتي ورسايل بكتشفها كإنسانة فبحب أنقلها من خلال اللي بكتبه والشخصيات أوقات كتير بيكون فيها شبه مني زي الحاجات المفضلة أو طباع عندهم ودي حاجة أنا مكنتش مدركاها بس طلع دي قوة العقل الباطن أعتقد :)
خلونا نتخطي كاميرا عشان كنت بكتبها for trivia
في رابطتنا كنت عاوزة أوصل حبي لأخواتي عشان كدة كتبت عن علاقة زاك وكلوي
في العيون عليها كنت عاوزة أوصل إن مهما مريت بمصاعب وكانت كل الناس ضدك وبتحاول تحارب نجاحك إنك تقدر تكمل لأن الفكرة في ال core strength بتاعتك انت وده اللي كانت ليندسي بتعمله ( بصراحة بعتبرها أكتر شخصية قوية كتبتها وكمان معظم الشخصيات في القصة دي كان عندهم قوة كبيرة ) ، وإنك لما تمر بمرحلة ضعف لازم تقف وتبص علي إنجازاتك والصعوبات اللي عديت بيها في الماضي عشان توصل للي انت فيه لأن ده هو اللي هيديك دفعة تكمل ، بمعني إننا منبصش تحت رجلينا أو للموقف الحالي بس لكن لازم نبص للرحلة بحالها
في بنفسج كنت بمر بفترة صعبة نفسيًا بعد ما العالم وقف بسبب كورونا تقريبًا من أول ما الدراسة وقفت لحد السنة الدراسية اللي بعدها ما بدأت مكنتش بخرج من البيت فحبيت أكتب حاجة مبهجة وخفيفة ومبسوطة إني قدرت أعمل ده لأن في تعليقات كتير بتجيلي عنها لحد دلوقتي إنها بتغير مودهم لما بيقرأوها
وأخيرًا هنا في بارك وباركر ، لو تفتكروا في تعريف الشخصيات كتبت إن في جُمَل ألهمتني أبدأ الكتابة بجانب ده ، السنة اللي فاتت في كليتي كانت حياتي صعبة شوية بسبب كتر المواد وكانت أول سنة عيادات، كنت بشوف كل الناس بتجري حواليا بينما أنا مش بتحرك وكنت حاسة إن دول هما ال cool kids أو الرائعين وإن أنا فعلًا مهما عملت أو هعمل هفضل on the outside always looking in ، وعمري ما هكون زيهم ، فكتبت القصة دي وأنا بتمني أكون منهم زي ما سونغهون كان بيتمني يكون شخص رائع ، واتعلمت بجد وحقيقي أنا دلوقتي مؤمنة من جوايا إنك تلاقي سلامك النفسي وتكتشف وتيرة نمو خاصة بيك انت وتكون في حالك أكتر ما تقارن نفسك بغيرك وتقدر إنجازاتك الصغيرة قبل الكبيرة ده بيخليك شخص رائع في عيون نفسك وفجأة اللي حواليك هيشوفوك كدة بس علي النقيض في حياتي ڤيجا مكانتش عارفة إنها ڤيجا بالنسبة لي وإنها الشخص اللي خد بإيدي أوقات كتير لأنها طول عمرها بتسلط الضوء علي جوانبي الحلوة
تصفيق حار هنا للجندي المجهول nora03_
وأخيرًا بقا عشان كدة طولت حابة أقول إني هكتب sequel فاللي حبوا القصة دي يتابعوا بقا لكن مش هبدأ دلوقتي عشان عندي امتحانات ومذاكرة كتير، ممكن في نص السنة إن شاء الله وحاساها هتبقي لطيفة فمتحمسة للكتابة
https://vm.tiktok.com/ZM6YfYFFd/
عارفة إن اللينك مش هيفتح هنا بس حاولوا تشوفوا الفيديو، حابة إن دي آخر صورة لسونغهون تكون في ذهنكم + هنزله ع ال board بتاعتي يمكن تقدروا تفتحوه من هناك
اللي حابب يقول أي حاجة ليا يتفضل + شكرًا لدعم القصة طول الوقت 🤍
أنت تقرأ
Park & Parker || بارك وباركر
Roman pour Adolescentsرأيتُ كيفَ بهَتَتْ ابتسامتُها المشرقة فجأة وتغيَّرَ مِزاج صوتِها لمَّا قالتْ "عندما توقفتَ عن التزلُّج ، أنت لا تعلم لكن ذلك آلَم قلبي للغاية "
