الحضن الدافي

Part 4

#الحضن_الدافي

الحلقة :: 4 ::

ماما متكية جنبنا ومتغمرة زين .. وانا نحاول نقرا قصة نتهجا بالشويا ..
ورد: ماما !!
قعمزت جنبها ومديتلها القصة
ورد: اقريهالي :)
ماما: من عيوني .. هدا ياستي كان يامكان في قديم الزمان في بنية حلوة هكي زي ورد .. بعتتها امها لحناها تسكن ورا الغابة ورفعت معاها سلة فيها تفاح ... البنية قعدت تلعب يمين ويسااار .. وتلقط ورد وتلعب فرحانة وفجآة :o
خش علينا بابا سكتت ماما وشبحتله .. تنهد بابا وقعمز ع الصالون .. شبحلنا بالواحد ..
بابا: جعاااااان :(
ماما: ههههههه واااضح من منظرك .. تو انوض انديرلك عشي ترا حولي شويا ورد
ورد: حاضر
زين: ماما بنني :(
ماما: اوكي شويا ندير ممي لبابا ونجيك اوكي :)
زين: :)
ناضت ماما للمطبخ ولحقها بابا .. قعدت مع زين نلعبو <3
>>>>>>>>>>>>>>
جواد يتحدث ::
لحقتها في المطبخ نبي نقنعها بفكرة السفر .. حطت الطاوة ع النار وصبت شويا زيت وانا وقفت ع البار نتأمل فيها .. وكان خاطري نحضنها وماتفارقنيش .. نبيها تقعد معاي ديما .. نبي نربي صغاري معاها .. ورد وزين .. مانقدرش بروحي نتحمل مسؤوليتهم .. ايناس البنت يللي حبيتها في مراهقتي .. الله كانت احلا الايام معاها .. لا علاقة ولا سو كان حبنا من بعيد لبعيد .. كان حوش جدها جيرانا .. ولما تزوره كنت نعكس في الشارع لين تروح .. ابتسامتها ماتغيبش :) .. انسانة صبورة ع كل شي صار معاي .. وافقت تعيش معاي العيشة المتدنئة .. وافقت تكون زوجتي وشريكة حياتي .. مافيش من اطيب منها .. مافيش من أحن عليا منها .. حتي معاملتها مع صغارها تخلي فيا ندعي طول الوقت تبقى ليا .. وتبقى معاي .. تتحرك وتجول في الكوجينا وانا عيوني تابتات عليها .. مافيش وحدة سكنت قلبي غيرها .. مافيش وحدة لفتتلي انتباهي غيرها .. مافيش اصلا وحدة تقدر تاخد مكانها ..
ايناس: هههههههه في شن تفكر ؟؟!!
جواد: فيك :)
ايناس: معاش تفكر هلباااا يللي كاتبه ربي بيصير :)
جواد: انا عارف .. وواثق انه الله يبيلنا الخير <3
ايناس: اكيد طبعا .. جوجو تبي نحطلك شي تاني ؟؟
جواد: آمممم .. نبيك تقعمزي تاكلي معاي :)
ايناس: اوكي .. خللي نشوف زين رقد والا مازال
جواد: نراجي فيك .. والله ماني حاط لقمة في فمي لين تجي :)
ايناس: هههههه
قدمتلي وشدت خدودي ..وضحكت ومشت .. هادي الضحكة يللي نبيها ديما ياربي تقعد معاي .. هادي يللي نبي نشوفها كل يوم وكل ليلة .. يااارب ماتحرمنيش منها ولا تباعدها عليا .. يااارب شوف ليا ولصغارها والله مانقدرو نعيشو من غيرها .. صعبة ياربي هادي رفيقة عمري يللي عمرها ماشكت من شي :( .. يارب انت عالم بالحال <3
ايناس: هههههههههه حتي ورد لقيتها راقدة
جبدت كرسي وقعمزت ع الطاولة معاي ..
جواد: ههههه ماتكبرش بكل البنت هادي :)
ايناس: صغيرة شن كبر بيها .. تصدق عيد ميلادها الاسبوع الجاي :)
ضاعت ابتسامتي لما قالت الكلمة هادي .. لاني حاجز موعد السفرة بعد غدوا .. وصعب نروح الاسبوع الجاي باش نفرح بنتي الصغيرة بعيد ميلادها التاسع ..
ايناس كأنها حست بشي .. شدت ايدي وركزت عيونها ع عيوني :\
ايناس: خيرك حبيبي ؟؟
جواد: ءءءء لا شي :)
ايناس: عرفت في شن تفكر
جواد: :(
ايناس: خلاااص موافقة نسافر ونتعالج :)
جواد: متأكدة !!!!
ايناس: ايه متأكدة
فرحتني كلمتها .. جبدت الكرسي وجيتها نجري .. وقفت وشبحتلي ومعاها ضحكتها يللي تجنن .. قمتها في غمري وقعدت اندور بيها وانا فرحان واخيرا استاجبت لفكرتي .. واخيرا حبيبتي بتتعالج وترجعلي زي الاول واحسن <3
ايناس: هههههههه ياسر يامهبول تو الصغار ينوضو
جواد: من لما تزوجتك وانا مهبول بيك يابنت <3
نزلتها .. خدت نفس عميق وقالتلي مع نظرة براءة: دوختني :(
جواد: تستاهلي ماقالك حد فرحيني هههههههه
ايناس رجعت ع الكرسي .. وخدت خبزة غمست في الهريسة وكلتها .. وانا كنت نراقب فيها من يومها كانت تحب الحار .. تاكل هريسة وفلفل واي شي حااار .. بس انا عكسها .. الهريسة مش من اولياتي ع الصفرة .. قعمزت مقابلها
جواد: ماتبيش تبطليها الحركة هادي ؟؟
ايناس والماكلة قاعدة في فمها: اي حركة ياقلبي ؟؟
جواد: الهريسة .. حارة عليك :(
ايناس: ههههههههه بس عشقي هادي
جواد: آممممم ..نوسة
ايناس: هممم ( وهيا مستمرة في الماكلة )
جواد: خلينا غدوا نطلعو نشرو حاجات للسفرة :)
ايناس: علاش .. هوا امتي احني مسافرين ؟؟
جواد: يوم الخميس :)
ايناس سيبت الماكلة وشبحت مصدومة
ايناس: علاش مستعجل؟؟
جواد: ماتعارضيش وراس عيوني .. خللي نمشو ونتطمن عليك :(
ايناس: ههههههه انخلعت .. خلاص نمشو .. بس بشرط
جواد:اشرطي يللي تبيه وانا حاضر
ايناس: حبايبي وين بنخليهم لما بنسافر ؟؟
جواد: عند خوي واااضحة يعني :)
ايناس: امممم بالك يتقلو عليها .. تعرف ان فاطمة قداش ليها ع الصغار .. قصي والياس كبار مازال زعما تتفكر كيفية تعامل مع الاطفال ههههههههههه
جواد: هيا كبرت صح .. بس قصي والياس مايقصروش معاهم .. من ناحية هادي اطمني :)
ايناس: ان شا الله :)
>>>>>>>>>>>>>>>>
يوم الاربعاء في الليل .. بابا وماما رفعونا لحوش عمي .. انا مستغربة علاش الصاكوات هادم ..ولأول مرة بنباتو في حوش عمي !!؟؟
كنت شادة في ايد ماما .. هزيتها شويا وشبحتلها ..نزلت عيونها ليا
ماما: نعم ورد؟
ورد: علاش بتخلينا هنا ؟؟
ماما قعمزت ع ركابها قدامي .. وكانت دادا تمسح ع راسي ومبتسمة ..
ماما شبحت لدادا وشبحتلي بعدين: بنسافر مع بابا .. تو نجيبلكم هدايا والعاب من غادي .. وانتم كلموني كل يوم وقولولي شن تبو .. واللي خاطركم فيه :)
ورد: علاش بتسافري؟؟
ماما: ءءء .. بابا .. عنده ءء شغل :)
ورد: وانتي علاش بتمشي معاه وبتخلينا بروحنا ؟؟
ماما: حبيبتي <3
تغمرتني ماما .. انا مش فاهمة شي ليش بتخلينا هنا ؟؟.. وبنبات مع قصي البارد مانحباش انا :(
قعدت تبكي ماما .. حولت من ع كتفها وشبحتلها ..
ورد: علاش تبكي ؟؟
ماما مسحت دموعها: ماهو اول مرة بنخليكم بروحكم :(
ورد: باهي ماتخليناش هنا.. خودينا معاك :(
دادا: حبيبتي ورد شوفي زين خش الداخل ومابكاش زيك
حطيت ايديا ع وجهي وقعدت نبكي .. ماما قعدت تمسح ع شعري وتهدي فيا
ورد: مانبيكش تمشي ماما بالله عليك :(
تغمرتها بالقوة لين طاحت التالي ..وقعدت نبكي .. مانبيهاش تمشي .. مانبيهاش تبعد .. ماعنديش غيرها في الدنيا .. نحبها ماما <3
ماما: ورد خلاص ماما بالله عليك :(
ورد: ماما انا نحبك ♥
ماما: حتي انا نحبك .. شوفي زين مايبكيش راجل ماشا الله عليه .. انتي كبيرة عاد نبيك تردي بالك عليه لين نروح مش تبكي .. دودي ياعمري انتي .. امسحي دموعك مشناك وانتي تبكي :(
ورد: ماتمشيش انا مش ح نبكي والله والله :(
ماما: ورد خلااااص عاد بسلتيها >_<
كشخت عليا ودفتني من عليها بالشويا ووقفت .. مدت لدادا الشنطة .. وطلعت للجنان .. انا قعدت نبكي .. علاش ماما كشخت عليا انا مانبيهاش تمشي وهيا ماحستش بيا ودفتني من عليها :(
طلعت دادا لحقتها .. انا خشيت الداخل للمربوعة لقيت بابا وعمي والياس شاد زين يلعب فيه ...
بابا: اهيا ورد الشطورة بتعس ع خوها
قعمزت جنب زين وانا زعلانة .. نبيهمش يمشو .. نخاف نقعد بروحي .. مني بيغطينا في الليل .. ومن بيوتيلي فطوري .. ومن يسقدني للمدرسة .. ومن يلبسني حوايجي .. ومن بيمشطتلي شعري .. ومن .. ومن .. ومن .. هلبا اسئلة نبي ماما بس تجاوبني ؟
بابا حبيبي تقدر تجاوبني انت ؟؟
الياس: ورد خيرك ؟؟
ورد: شي :(
عمي: الياس نقول قول لامك تحط العشي :)
الياس: اوكي :)
>>>>>>>>>>
تعشينا ..وفرشتلي دادا في غرفة الضيوف انا وزين .. زين صغير مايعرفش شن صاير ؟.. غرق في النوم .. وانا قعدت نايضة في فراشي .. نفكر في ماما وبابا يللي روحو لحوشنا .. ومن الصبح بيسافرو :(
>>>>>>>>>
جواد يتحدث ::
من روحنا وهيا ايناس شادتها بكي .. ماسكتتش بكل .. طول طريق وهيا شادة دسكة ورد وزين .. عندها الحق صغارها واول مرة تفارقهم .. قعمزت ع حاشية السرير .. وهيا تنحي في وشاحها الاسود يللي مبين ملامحها الحزينة اكتر .. حطت ايديها وسندت بيهم راسها .. وكملت بكاها
جواد: آوووف ايناس خلاااص
ايناس تلفتتلي: انت ماشفتش ورد كيف تتجدا فيا .. والله تقطع القلب .
جواد: هيا كلها كلها 3 شهور ونروحو .. ماتخافيش :)
ايناس: وكان نموت !!
جواد: بعيد السو عليك حبيبتي علاش الكلام هدا ؟؟
وقفت وجيت وراها .. حطيت راسها ع جسمي وطبطبت عليها .. وكنت خايف اكتر منها .. بس هيا مازالت تبكي .. لا عارف نواسي روحي ولا نواسيها ..
قمتلها راسها ..وحطت عيونها فيا .. كانت فيهم لمعة تخلي نحارب العالم كله ع خاطرها .. تخليني ممكن نتراجع عن قراري في اللحظة هادي باش مانشوفهاش .. تخليني ممكن نعطيها روحي .. تخليني نكره الصغار .. بسبب بنتي يللي توفت من اول ماولدت .. وخلت عمري كله ينزف معاها مرتي حبيبتي .. نفسيتها تعبت من اللحظة هديكا .. انا السبب ايناس سامحيني :(
جواد: خلاص مانحبكش تبكي :(
ايناس: بس هادم صغاري .. والله بنتي يللي ماتت تمنيت ننقدها نعطيها روحي تعيش بيها وانا يللي نموت :(
كنت خايف ياايناس انك انتي وياها تموتو .. كنت خايف من اول ماحملتي بيها .. حدرتنا الدكتورة .. بس مافيش وذن سمعت تحذيرها .. كنت خايف ياايناس نخسركم الزوز .. كنت خايف .. بس توا خايف اكتر .. توا بنموووت خوف عليكي .. يارب ♥
غمضت عيوني وحاولت تسنشق هوا نظيف .. بس حاس الهواء يللي حواليا ملوث .. حاس روحي مخنوووق ونبي نمووت ولا نشوف دموعها قدامي ومش قادر ندير شي .. مسحت ع شعرها الناعم الطويل .. وطلعت من الدار .. مانقدرش يانوسة نشوفك ضعيفة مهزوزة قدامي .. حسي بيا بالله عليك .. يارب يارب ماعنديش غيرك يساعدني :(
>>>>>>>>>>>>>>>>>
#الصبح كان مميز وشين .. كنت نتمنى ماما اللي تنوضني
ورد: ماما :)
دادا اضايقت شويا وشبحتلي .. انا يللي اضايقت اكتر منها ..
ورد: نحسابك ماما :(
دادا: هي نوضي ورد بالشويا من غير ماتنوضي زين باهي !!
ورد: ماجتش ماما ؟؟
دادا: تو تجي .. هي بسرعة خشي للحمام وصلي الصبح والحقيني للمطبخ وتي معاي الفطور :)
ورد: بجديات !!
دادا: ايه انتي كبرتي .. تو بنعلمك حتي الاكلات ♥
ورد: هيييييييي
دادا حطت صبعها ع فمها وتفنص : اسسس خوك تو ينوض هي ماتعطليش عليا :)

#Dudu