الحضن الدافي

Part 22

#الحضن_الدافي

الحلقة :: 22 ::

#ورد .. #زين .. #أنتما_فرحتي_ودمعتي
طلعة عمي مني حسستني بالراحة .. وهكي انا بريت ذمتي مع ميس المغصوبة عليا .. وفــاتت الليلة بنومة مريحة وضمير مرتاااح <3 ..
تاني يوم الصبح :: كالعادة .. وصلت ورد وزين ومشيت لشغلي .. وكانت الابتسامة من الشق للشق .. وتميت شغلي روحت بيهم للمطعم اللبناني غديتهم احلى غدي .. كانو فرحانين معاي ..
ورد: بابا بنووض نغسل ايديا
زين: نمشي معاك
جواد: ارفعيه وردي بالك عليه اوكي !!
ورد: حاااضر
رن تليفوني وكان صاحبي وليد
جواد: اهلا اهلا تي وينك يامان ؟؟
وليد: هههه آهو في الدنيا ... وينك انت ؟؟
جواد: طالع بالصغار نغدي فيهم
وليد: تزوجت امالا !!
جواد: لا والله .. موضوع سكرته
وليد: له له علاااش ؟؟
جواد: شن علاش . قلتلك انا من قبل مانبيش نتزوج ولاه ؟
وليد: هكي انت الخاسر ره .. يكبرو صغارك وتقعد بروحك
جواد: المهم يكبرو ونتهنى عليهم
وليد: راسك مسكر
جواد: ايه ... ماتكونش شطاني وتوسوسلي -_-
وليد: هههههه تمام .. بنجيك في الليل كان فيها كيف
جواد: ايه تفضل الحوش حوشك
وليد: تمام هي سلام
شن يبي مني بعد هالفترة الطويلة .. حطيت تليفوني ع جنب وتنهدت .. ريت بنت جايتني من بعيد .. وتبتسم .. فنصت عيوني وعدلت تقعميزتي مش ناقص عاهات انا -_-
البنت: مرحبا
جواد: مرحبتين !!
البنت: انت جواد ولاه !!
جواد: ايه ان شا الله تفضلي
البنت: بالله كيف حال ايناس ؟؟.. ليا هلبا عليها تصدق تليفونها مقفل :(
جواد: ءءء ايناس عطاتك عمرها
البنت: كيف كيف !!
جواد: توفت ليها قريب سنة ع وفاتها :(
البنت جبدت الكرسي وانهدت عليه وحطت ايديها ع راسها وقعدت تبكي .. معاش عرفت انا نتصرف .. غير قعدت نراقب في الصغار مرات يجو ويشوفو المنظر هدا !
البنت: قداش كانت طيبة .. انا كنت مسافرة ليا 5 سنين معاش ريتها وين روحت اول وحدة اتصلت بيها الحق استاحشتها ... ربي يرحمها ان شا الله :(
جواد: الله غالب .. الله يرحمها
البنت: كيف ماتت ؟؟
جواد: مرضت وتوفاها الأجل
البنت: ياناري عليها .. بنسألك سمت بنتها ورد ولاه !!
ورد: نعم !!
تلفتنا الزوز لقينا ورد واقفة وشادة في ايدها خوها وتشبحلنا مستغربة .. تغمرتها البنت وقعدت تبكي .. معاش عرفت نتصرف .. المفروض ماتبكيش أقلها تحترم مشاعر الصغار . وعقلهم اللي مش مستوعب المنظر ..
ورد: شن في؟؟
جواد: ماافي شي يابنتي ماتشغليش بالك
رختها شويا البنت وقعدت تشبحلها
البنت: انتي اسمك ورد !!
ورد: ايه
البنت شدت ايد زين .. وتلفتتلها ( ومن هدا ؟ )
ورد: خوي زين
البنت: ياروحي تيتمو .. حرام والله صغار مازالو
جواد: ءءء معليشي يااخت .. الصغار !!
زين شبحلها مستغرب !!
البنت: وانت زين قداش عمرك ؟؟
زين: 5 سنين
البنت: ياروحي .. يعرفها أمه ؟؟
وهنا كانت الصدمة مرسومة ع وجه زين .. صدمة قوية .. طفل شن يفهم في الدنيا .. بس كلمة ( أمه ) خلاته يكبر مية سنة القدام .. دموعه نزلو .. ونظراته مرة عند ورد ومرة عندي .. ويرمش في عيونه لما يشوف البنت يللي قدامه ..
البنت: حي ياروحي بيبكي :(
زين: ماما سافرت
ورد حطت ايديها ع وجهها وقعدت تبكي .. وانا لا اراديا خديت الصغار من ايديهم وطلعت بيهم . . خليتها العديمة الاحساس واقفة تشبحلي ومستغربة .. انتي مستاحشة صاحبتك يللي توفت ماعلينا بكيتي عليها .. بس ليش تهدمي يللي بنيته من سنة فاتت .. ليش تخلي زين يبكي بعبرته ومش فاهم شن يعني أم .. أول ماوعي ع الدنيا في باله أمه مسافرة .. ليش اذكري في ورد بعد ماقاربت ع النسيان.. أول مش نسيان بحد ذاته بس تعود ع فراقها .. من رحلة بسيطة ومفرحة .. انقلبت دموع واحزان وذكريات غير متوقعة .. روحت بيهم في حالة .. لا عرفت نواسي ورد ولا زين .. مهما درت مش ح نقدر نعوضهم فراق أمهم .. بس مش ح نستسلم .. درتلهم فوشار .. فتحتلهم فيلم اطفال .. مافي شي سكتهم وهداهم .. وهكي طحت ع اول كرسي في الحوش وقعدت نبكي .. ايه ماتسغربوش قعدت نبكي .. والراجل امتى يبكي !! ... لما االحمل عليه يفوق الجبال .. قعدت نبكي بشكل جنوني .. بس من غير مانعصب ونكسر ... هكي عاودتني مرتي حبيبتي يللي فاقدها انا توا .. عودتني لما نضايق نمسك اعصابي .. نفجرهم ع هيئة دموع .. أو دعاء وتضرع لله .. ولا نتعصب ع الناس والا آي شي ملموس في هالدنيا .. حطيت ايديا ع عيوني .. تعرفو شن يللي يقهر !! .. لما تشوف صغارك قدامك متحطمين ومتكسرين .. دموعهم ماجفت .. وفقدان أمهم كل يوم يزيد يتداخل في حياتهم اكثر واكثر .. وانت عااااجز .. مش بايدك ادير شي .. مش قادر تعالجهم .. ولا تواسيهم .. لان وبكل تأكيد هذا الشي بايدك .. هذا قضاء الله وقدره .. لما دموعي انسكبو ع خدودي .. لما الغصة طلعت ع هيئة آهات صوتية .. لما العجز يطلع اسوء مافيك .. لما الضيق يخليك في اسوء حالاتك .. حسيت بايدين ناعمات ع خدودي .. وحسيت بحضن صغير ضم راسي لصدره .. حسيت بخصلات شعر دغدغتني في خشمي .. قمت راسي بالشوي لقيت زين واقف ع كرسي وحاضن راسي بكل طفولة .. وورد تمسح في دموعي بايدها الصغيرات .. ودمعاتها معلقات ع الجفن .. تخيلو اللقطة انا مقعمز وساند راسي ع صدر زين وورد حاضتني راسها ع صدري بعد مامسحت دموعي .. ابتسمت وفي عيني مليون دمعة .. ايناس توفت وحضنها الدافي استفقدته.. وانا حاليا فرحان لأني لقيت #الحضن_الدافي بين صغاري الزوز .. ورد وزين ..
زين: خلاااص بابا سكتت هآآ
ورد: بابا انا نحبك معاش تبكي باهي !!
فتحت ايديا ع طولهم وضميتهم التنين لصدري هكي ممكن نحسسهم بالأمان .. يقولو فيها ( الأم حضنها حنان والأب حضنه أمان ) ..
في اللحظة هادي واختلطتت المشاعر .. ممكن نسو علاش يبكو !! .. او ممكن يتناسو ؟؟.. المهم نطلعهم من الدوامة يللي هما فيها حاليا .. يرتاح ضميري .. ونرتاح نفسيا ..
>>>>>>>>>>>>>
قصي يتحدث ::
كنت مقعمز نقلب في صفحات ع الفيس من الفراغ يللي صايبني .. مقابل التلفزيون بوي يتفرج ع اخبار البلاد وشن صاير فيها .. شويا وخشت أمي جايبة شاهي أخضر لبوي وقهوة ليا أنا .. عدلت تقعميزتي .. سكر الصوت بوي وشرب شوي من طاسته وتلفت لأمي
بوي: جواد الغي موضوع ميس بكل
شرقت بالقهوة .. وقعدت نكح .. ناضت أمي تجري جابتلي مية .. شربتها في مرة وحدة .. وحاولت نتصرف طبيعي باش مايحسوش بشي
أمي: كيف قلت ؟؟
بوي: جواد اتصل امبكري وقاللي الغيته موضوع ميس .. شوره ماتفاهمش معاها
أمي: كيف ماتفاهمش معاها وهيا البنت تبيه ؟
قصي: ومن قالك تبيه ؟؟
انتخصت .. ولقيت شبحاتهم تحرق ليا .. تقوللي ( شن دخلك انت ؟؟ ) . سكتت واحتفظت بماء وجهي .. وخرت شويا وشربت قهوتي ونسمعلهم بتركيز . .. ومانبيش نبينلهم شي .. كملو كلامهم
أمي: انا واجعيني الصغار بس
بوي: تو يتعودو شن بديرله سكر راسه
أمي: باهي كان خلاهم عندي والله نقيمهم
بوي: مااعتقدش يوافق ... كيف تبيه يخلي صغاره عندنا لما يروح الحوش بيفضا عليه وخايف يرجع لحالته الاولة وتتأزم معاه
أمي: لا حول ولا قوة الا بالله
بوي: الله غالب .. والخيرة فيما اختارها الله
أمي: وسمعت بالياس المنجوه ولاه !!
بوي: ههههه خيره ؟
أمي: بيخطب رزان
بوي: بنت لمية !!
أمي: في غيرها ؟؟
بوي: انا الايام هادي نتلقى غير في المصايب .. شن خطر عليه بس ؟؟
أمي: يبيها شن بديرله حتى هوا هي :(
بوي: وقصي خيره مسكت ؟؟
سمعت اسمي .. قمت راسي .. لاحظت أمي تحركلي في حواجبها وتغمز .. مافهمت المغزى !!
قصي: ههههههه هي نشوف وجهكم ع خير .. مصطفى امبكري يراجي
بوي: هدا فاش فالح صدقت فيك ورد
أمي: ههههههههه مش عارفة امتى بيكبر ؟؟
قصي: ههههههه سلامات
طلعت بطاستي .. استنشقت عبق الحياة من جديد .. ورجعتلي الفرحة من جديد .. وابتسامتي المشرقة طلت من جديد .. روح جديدة ونفس جديد .. وأخيرآ ياميس رجعتي حلمي المتجدد .. رجعتي نسمتي وهواي .. ورجعتي الضحكة لحياتي .. ورجعتي طريقي البعيدة .. ونفكر .. ونحلل .. ونخطط ..كيف بس ح نوصلك !! .. ومش ح يبعدني عنك شي تاني .. من اليــــــــــوم ياميس <3
ع طول مشيت لحوش عمي .. مانعرفش ليش فكرت نمشيله ؟؟.. بس السيارة رفعت غادي .. ايه ايه اكيد السيارة مش قلبي !!
وقفت ع باب الخارجي لقيته مردود .. فتحته بالشويا لقيت ورد مقعمزة ع عتبة الباب وقدامها قفص العصافير ( نوسة ... جادو ) ع امها وبوها سمتهم .. سلمت عليها .. لقيت القفص فاضي .. استغربت شبحتلها .. لقيتها تضحك
قصي: ءءء وين نوسة وجادو ؟؟
ورد: طاااااااااروووو
قصي: طارو !! .. مافهمتش !!
ورد: اليوم ابلتي قالتلي وين تحبسي آي حيوان يوم القيامة يحبسك ويعذبك
قصي: ابه باه وينهم توا هما ؟؟
ورد: تي قلتلك طارو
قصي: طارو طارو !!
ورد: هههههه ايه طارو خيرك تشبحلي هكي ؟؟
قصي: انا نبي نفهم بس لما طلقتيهم وين عقلك ؟؟.. ياعبيطة هادم شريتهملك زينة ياهبلة
ورد: انت تحب من يحبسك زينة ؟؟؟ .. يوم القيامة ربي يحطك في الحبس والعصفورات يضحكو عليك
قصي: الصبر ياربي ... تي دافع عليهم دم قلبي .. تحندبت ايامي باش حصلتلك 122 دينار
ورد: هآآآآآ .. تحسابه ريشه ذهب امالا ؟؟
قصي: ياعبيطة .. هذا كنااااااري وحق الواحد بس 61 وانتي توا طيرتيه ... ياريتني متت قبل مانسمعك
ورد: :\
قصي: آآآآخ ياربي .. الحق مش فيك الحق في خوي الياس قدااااش فاااضي لما وصاني عليهم
ورد: عادي توا هما احرار وين مايبو يمشو
قصي: وانا ؟؟؟!! .. بعد هالكارثة وين بنمشي ؟؟
ورد: ياقصي انت تبي ربي يعذبك ؟
خبطت ع جبهتي بقوة كف ايدي .. مع تغميضة عيون حااارة
قصي: تي وينها ابلتك اهيا اللي قالتلك هكي ؟؟
ورد: علااااش ؟؟.. ياقصي..
قصي: ورااااس امك يااااسر معاش تتكلمي . انا الغالط اصلا -_-
ورد: تبي اناديلك بابا ؟؟
قصي: كان مش عيب الواحد يقوله يردهملي ( قلتها بهمس )
ورد: تكلم فيا ؟؟
قصي: لا قلتلك ناديهولي ماتسمعيش ؟؟
ورد: باه .. هاك القفص معاش نبيه
قصي: بري لوحيه شن تبيني ندير بيه متلا .. نحبس الياس فيه ؟؟
ورد: ههههههههه
قصي: لا هوا والله يبيها .. آآآآخ راسي بيتكسر بنمووووت جلطتني البنت هادي
ورد: باااااااااااااباااااااااااا
تصيح وتنادي ع بوها واقفة قريب من وذني
قصي: وااااااااااااك ماسد فليساتي مشووو هباااء ماسد بتطرشيلي وذني ؟؟
ورد: ههههههههه
طلع عمي وسلمت عليه .. حسيته مضايق ..
قصي: خير عمي في حاجة ؟؟
جواد: ورد شوفي زين ماتخليشي بروحه
ورد: حاضر
مشت خشت ورد للحوش .. وان اوياه قعدنا نتمشو في الجنان
قصي: شن في؟
جواد: حااااس روحي مش قد هالحمل ياقصي .. تعبت هلباااا
قصي: قصدك علي ....
جواد: ايه ورد وزين .. ماقدرتش نقيمهم .. حاس روحي عاجز .. مخنوووووق مضاااااايق
قصي: ع الزواج تحكي ؟؟
قلتها من هنا وعصرت قلبي من هنا .. انا مستعد اضحي بآي شي في دنيتي غالي عليا .. المهم عمي يرتاااح مانبيش نشوف الشحوب ع وجهه
جواد: انا وين وانت وين ؟؟.. طلعت مش فاهمني ياقصي :(
قصي: قصدي لما تقول مش قد الحمل .. يعني تبي تتزوج ولاه !!
جواد: مش قادر نتقبل وحدة غير ايناس الموضوع اهوا سكرته ولغيته من بالي نهائيا خلااااص
قصي: يعني يللي سمعته صح !
جواد: شن سمعت ؟؟
قصي: لغيت فكرة الزواج من ميس
جواد: ايه
قصي: اضايقت هلباااا وين سمعت . .. الحق الخالة الاقرب للصغار تاخد دور الام
جواد: تكدب عليهم كلهم الا انا قصي
وسعو عيوني وين قال الكلمة هادي .. حسيت بيه عارف كل شي يدور في قلبي .. وفاهم معاناتي ومأساتي وين فكر يتزوجها .. وجهي فاضحني ؟؟... والا تصرفاتي ؟؟.. والا نظرات عيوني الذابلات ؟؟
جواد: ايه وين مشيت ؟؟
قصي: ءءء لا شي .. شن رايك نرفعو ورد وزين للملاهي ؟؟
جواد: ايه عادي وفي الطريق نهدرزو هههههههه
قصي: ايه ناديهم

#Dudu