الحضن الدافي

Part 20

#الحضن_الدافي

الحلقة :: 20 ::

كذاب .. قصي كذب عليا ولأول مرة .. ضحكته فيها كذب واصطناااع .. مش هدا قصي يللي نعرفه .. حاس في شي مضايقه .. ومن طريقة كلامه واااضح يبيها البنت حلاله .. بس هيا موافقة عليا ؟؟.. هكي خلتني بين نارين .. نار قصي ونارها هيا ؟؟.. خللي نروح للصغار والصباح رباح :)
مع الشمس المشرقة يولد يوم ملئ بالسعادة الروحانية ::
وصلت ورد للمدرسة .. زين للروضة .. ووجهي ع الشركة .. حسيت اليوم ح يكون مميز .. في شي مريحني ..
>>>>>>>>>>>>>>>>
قصي يتحدث ::
الامور بالشوي بدت تتصلح لأني غضيت النظر ع موضوع ميس وبديت نجري ع خدمتي وبس .. واليوم طالع بكري مانبيش نتأخر ع دوامي من اول يوم .. حاط ايدي اليسار ع فمي ونفكر .. ومية سؤال يدور في راسي بشأن الخدمة مش لشي تاني .. ونفس الوقت نفكر في موضوع الياس .. رجع للصحراء وخلاني حاير كيف نقدر نراضيه ؟؟.. انتبهت لشي ع الطريق .. بنت تأشر بايدها للسيارات ع الرصيف .. وجنبها سيارتها الباين انها وقفت منها .. يامحاسن الصدف .. ميس !! .. درست السيارة ع اليمين ونزلتلها .. كانت مرتبكة .. وحايسة مع بعضها ..
قصي: ان شا الله خير
ميس: ءءء قصي كيف حالك ؟
من غير مانشوفلها ولا نركز في ملامحها المتوترة ..
قصي: الحمد لله .. ءءءء هادي العجلة ولاه !!
ميس: ايه .. وراي دوام والله تأخرت عليه بسببها .. :(
قصي: مش مشكلة .. محلولة ان شا الله
وليت لسيارتي طلعت اللوازم لتغيير عجلة السيارة .. اثنيت ركابي وقعدت هيا واقفة قريب مني ..
ميس: شكرا قصي بجد
قصي: مازلت ماكملتها انا
ميس: انت الوحيد يللي وقفتلي .. لو كانت بنت متبرجة راهو كلهم وقفولها .. مجتمع معاق
قصي: الله غالب .. وبعدين انا وقفتلك مش لانك بنت .. لانك ح تكوني مرت عمي مستقبليا
قمت راسي وحطيت عيني في عينها .. لاحظتها ارتبكت وواطت راسها .. وقعدت تحرك في ايديها بتوتر
ميس: ءءء
قصي: يلا الف مبروك
ميس: الله يبارك فيك .. ءءء كملت !!
قصي: لا شكلها بتعطلك اكتر
ميس: آووووف اليوم عندي جلسة راهو المرآ تراجي فيا :(
قصي: جلسة شنو ؟؟
لاحظت سؤالي غبي شوي .. اصلا شن ليا علاقة بمواضيعها وشغلها !!
ميس: قضية طلاق .. راجلها مداير فيها الويل يضرب ويهين وقاللها ماني مطلقك لين نبهدلك في المحاكم و.......
قصي: خودي مفتاح سيارتي وبري لحقي عليها وانا نكمل نروحلك بيها لحوش راجلك اوكي !!
ميس: راجلي !!
مديتلها المفتاح .. خدت مني المفتاح مستغربة .. ومشت لسيارتي .. وانا فتحت الكوفينو متاع سيارتي باش نرجع الحاجات مش مستحقها .. نسمع فيها تقول ( هكي الواحد يسوق سيارة زي هادي ولا بلاش . .. الله كيا ياااارب ارزقني بزيها .. وزيادة لونها اسود .. وعالية <3 ... اول معاش ليا لما نشري زيها ) وشادة ستيرسو وتهدرز وتشوف للمراية .. وتحرك يمين يسار .. حركات اطفال -_-
سكرت الكوفينو وضحكت بلا صوت .. وليت لسيارتها .. بهدلتني .. شكلها عنايدية وهبلة زي صاحبتها ..
وضاع شغلي .. ودوامي .. ومعاشي .. وكل شي من اول يوم -_-
بعد ماكملت منها .. ركبت وطلعت بيها .. كانت معلقة مداليا عليها اسم الله .. ابتسمت .. رغم انها مش ح تكون ليا .. بس مش نقدر ننسى عفويتها معاي وتصرفاتها .. ولاني قادر ننساها اصلا .. فجاءة رن نقالي .. المتصل ( خالة ورد ) .. نذكرها وتجي في موعدها ..
قصي: آلوو
ميس: مرحبا قصي .. آسفة ع الازعاج بس معليشي تجيني قدام كافي ( ... )
قصي: وليش ؟؟!!
ميس: باش تسلمني سيارتي وتاخد سيارتك
قصي: قصدي كملت جلسة الطلاق ؟؟!!
ميس: تغيب كالعادة باش يشحورها زيادة
قصي: آها .. دقايق ونكون عندك
ميس: تمام .. يلا سلامات
قصي: سلام :\
>>>>>>>>>>>>>>>>>
كنت في المدرسة نلعب مع البنات .. جت وقفت عليا جنى .. نفضت ايديا من الرملة .. وقفت بنسلم عليها ..
جنى: ورد
ورد: نعم !!
جنى: سامحيني معاش نعاودها بالله عليك ارجعي صاحبتي زي زمان
حطت ايديها ع وجهها وقعدت تبكي .. ضحكت عليها .. وقفت بكاء وشبحتلي !!
جنى: علاش تضحكي عليا باه :(
ورد: اصلا انا صاحبتك :)
جنى: يعني سامحتيني !!
ورد: هههههه بس اوعديني نقعدو ديما صحبات !!
جنى: هييييي ايه ايه
تغمرنا بعض .. ولينا نلعبو مع بعض ..
وفي المرواح نراجي في بابا يجيني .. جتني الابلة مها
مها: وردتي .. خيرك تعبانة !!
ورد: ايه .. آووووف كل يوم نراجي في بابا 10 ساعات
مها: هههههه 10 مرة وحدة !!
ورد: لين نتعب .. ونمل ونقلق .. نروح للحوش جعانة ومرات ناكلو من المطعم لين كرهتها ماكلة برا :(
مها: آمممممم تبي وحدة زي ماما !!
ورد: مافيش وحدة زي ماما
مها: -_-
ورد: بابا بيتزوج خالتي :( .. وخالتي صغيرة وتسوق وديما تطلع مش زي ماما ديما معانا :(
مها: آها .. مني قالك بياخد خالتو !!
ورد: سمعت جدو قال لخالتو بابا يبي ياخدها باش تولي أمنا :(
مها: باهي علاش ماتبيهاش انتي !!
ورد: مانبيش وحدة تجي مكان ماما .. نخاف يصيرلي زي سندريلا تلزنا من حوشنا :(
مها: هههههه سندريلا كذبة مش حق
ورد: ماما قالتلي زمان في ناس لما امهم ماتت بوهم تزوج وعذبتهم .. ياربي نبيها ماما انا
مها: ماهو في نساوين طيبات وحلوات وتحبيهم زيني انا ولاه !!
ورد: :\
مها: ههههههه آهو بابا جي بريله هي ردي بالك اتزعليه اوكي !!
ورد: حاااضر :)
ركبت السيارة وبوست بابا ع خده .. واتكيت ع الروشن
بابا: خيرك ورد !!
ورد: نبي ماما
بابا: تو نشوفوها في الجنة ان شا الله
ورد: بابا
بابا: نعم !!
ورد: مانبيش حد يجي مكان ماما
بابا: كيف ترا !!
ورد: سمعت جدو يسأل في خالتو قاللها مصير صغار اختك بين ايديك
بابا: كيف كيف !!!
ورد: انا خفت نقولك تقولي تخشي في مواضيع كبار .. انا مانبيش نولي زي سندريلا يابابا
بابا: سندريلا !!!
ورد: ايه رسوم حلوة .. امها ماتت وتزوج بوها وحدة شريرة وبدت تضرب فيها حتي انا كانك يابابا تزوجت بتضربني وبتلزني من الحوش :( .. ووو....
>>>>>>>>>>>>.
جواد يتحدث ::
لما قالتلي ورد كلمة ( مصير صغار اختك ) .. حسيت فعلا ميس بتتزوجني وموافقة بسبب كلام بوها ليها .. وربط مصير صغاري بموافقتها :( .. مانعرفش شن حكت وشن قاعدة تقول ورد وع من تحكي اصلا .. يللي يهمني قرار ميس .. يللي خداته بالضغط .. وصلت ورد لحوشنا .. ومشيت لحوش نساباتي .. طقيت الباب عمي سعيد فتحلي الباب
سعيد: اهلا وليدي تفضل .. وين الصغار
جواد: في الحوش
سعيد: خيرهم ماجوش معاك ؟؟
جواد: عمي .. انت غصبت ميس انها تتزوجني !!
سعيد: كيف كيف !!
جواد: بالله عليك قوللي .. ساومتها في صغاري !!
سعيد: ياولدي مش هكي الكلام ره
كنا واقفين الزوز .. ومافيش واحد قدم خطوات زيادة .. كان الشرار طالع من راسي فوووق .. ومش قادر حتي نتنفس والا اناقش بزيادة ..
جواد: انا جاي نبي نسمع كلمة وحدة بس
سعيد: انا ميس شاورتها في الموضوع وهيا وافقت
جواد: انت حطيتها في الأمر الواقع .. قلتلها مصير صغار اختك بين ايديك ولاه !!
سعيد: هيا قالتلك !!
جواد: معناها في منها الدوة ولاه ؟
سعيد: كان لازم نقوللها هكي
جواد: ماكانش ضروري .. اصلا انا نقدر نربي صغاري بروحي مش شرط يكون معاي شريك .. وصغاري مانبيش حد يتجمل عليهم غدوا بعد ماتغمض عيني
سعيد: جواد .. هدوما صغار بنتي .. احفادي .. مانقدرش نخليهم للبرانية
جواد: ولا انا نقدر نخليهم ليك تتصرف من نفسك .. تضغط ع بنتك تتزوجني باش ترضي نفسك .. ويرتاح ضميرك ؟؟.. عمي .. صغاري انا المسؤول عليهم .. ميس مش مجبرة تتحمل وتتعذب والذنب مش ذنبها .. صغاري هدا قدرهم .. يعيشو بلا أم ومستحيل نخلي آي حد يدخل فيهم .. انا قادر نعيشهم الواقع هدا ونقدر نكون كل شي بالنسبة ليهم .. وانا قد المسؤولية .. ومعليشي ياعمي لما تروح ميس قوللها هالكلام .. هي نستاذن
وعطيته بظهري وطالع لسيارتي ..وقفني بكلماته
سعيد: مش ح تقدر .. لانك راجل وصعب تاخد دور الأم .. زيد فكر ياولدي
غمضت عيوني .. وضغطت ع صدري .. وتنهدت .. وكملت طريقي .. ركبت سيارتي وموضوع ميس من نفسي سكرته .. تاريته البنت مش حباً فيا ولا رغبة في الزواج مني .. بس ضغط بوها عليها .. وربط كلمتها بمصير صغار اختها الغالية .. قمت تليفوني بنبعتلها مسج .. مانعرفش شن يللي خلاني نتراجع في اللحظة الاخيرة .. حذفت التليفون في الكرسي يللي جنبي .. وحطيت ايدي ع جبيني وقعدت نحك فيه .. ومش قادر نسيطر ع تفكيري .. كلمة ورد كانت في وقتها .. لو ماقالتليش كنت ح نقرا فاتحتي الاسبوع الجاي .. رن تليفوني والمتصلة كانت ( الابلة مها )
جواد: السلام عليكم
مها: كيف حالك استاذ جواد؟؟
جواد: الحمد لله
مها: اسفة ازعجتك باينتك راقد
جواد: لا والله بس تاعب شوي .. ان شا الله خير !!
مها: حابة نفتحلك موضوع وعارفة مالياش علاقة بس بنوضحلك وجهة نظر ورد لموضوع زواجك
جواد: انا لغيته نهائيا .. ومش حاب نفتحه من جديد
مها: يعني ماصارلكش تتزوج خالتها ؟؟
جواد: لا
مها: آها شن السبب ؟؟
جواد: عفوا !!
مها: ءءء اسفة .. يللي فيه الخير يجيبه ربي .. نستاذنك توا سلام
سكرت منها وتكيت راسي ع كرسي .. وغمضت عيوني وسرحت بخيالي .. وكان النعاس مسيطر عليا .. ومانعرفش كيف .. ولقيت روحي في أحلامي .. والنوم غلبني
>>>>>>>>>>>
قصي يتحدث ::
اول ماخشيت للكافي ..دورت يمين يسار .. لقيتها مقعمزة وقدامها مق .. مع مفتاح سيارتي وتليفونها وكان في قدامها ظرف ابيض
قعمزت مقابلها
ميس: كيف زبطتني؟؟
من غير مانركز عليها ( عادي )
ميس: تفضل
مدتلي الظرف ( شن هدا ؟ )
ميس: حق مساعدتك ليا اليوم ... الحق مشكوووور هلباااا لولاك راهوماقدرت نلحق ع جلستي
قصي: مافهمتش حق شنو ؟؟
ميس: افتح وشوف
فتحت الظرف لقيت في فلوووس .. مانعرفش القيمة .. سكرت الظرف ورديته قدامها
ميس: :\
قصي: لما ساعدتك .. مجرد فاعل خير وبس .. يعني لو كانت بنت غيرك نفس الشي ح نوقفلها .. هادي اولا .. تانيا انتي ح تكوني من العيلة .. وح تصادفك هلبااا مواقف معاي ومع اهلي .. فــ مااعتقدش كل ماندير معاك خير بتخلصيني .. تالت شي مستحيل نرضى ناخد قرش ع شي زي هدا .. وع فكرة ماحبيتهاش منك نهائيا .. تفضلي مفتاح سيارتك
خديت من قدامها مفتاح سيارتي وكيف بنووض رن تليفونها ..
ميس: آلو جواد كيف حالك ؟؟
مانعرفش شن يللي خلاني نتراجع .. وقفت وانا نسمع شن بتقول وعلاش اتصل بيها عمي .. وشن يبي ؟؟.. مليوون سؤال حول الاتصال هدا بس .. قعدت صامت في مكاني ماقدرتش نقدم ولو نص خطوة ..
ميس: بالشويا عليا .. والله مافهمت ولا كلمة من اللي قلته ؟
شكله الموضوع خطير بيناتهم .. ليش ندخل بين تنين .. ونحشر نفسي في شي مايعنيني .. انسحبت من نفسي .. وخليتها تتكلم براحتها اكتر .. ركبت سيارتي ..راكبني فضول نعرف شن قالتله وشن قاللها ؟؟.. وشن هوا الموضوع الاساسي ؟؟.. كيف بنطلع .. شفت ميس طالعة تجري من الكافي وركبت سيارتها .. وع طوول طلعت ماراجتهاش لين تسخن ؟؟.. ان شا الله خير !! .. لو كلمت عمي ح يقول عليا حشري ولو كلمتها هيا ح ترسم صورة الخفة فيا .. طلعت بسيارتي واتجهت لحوشنا

#Dudu