الحضن الدافي

Part 24

#الحضن_الدافي

الحلقة :: 24 ::

وهكي كانت أمي تلعبلي باعصابي :(
>>>>>>>>>>>>>>>
اليوم هوا بيان خالتي وولد عمي قصي <3 .. مشيت معاها للمزين ولبستني قفطان احمر طويل ولبستني تاج فضي صغير .. ودارتلي المزينة تسريحة صغيرة .. ومشينا فرحانين .. طبعا زين قعد مع بابا وقصي ..
في سيارة جدو مروح بخالتو من المزين .. تلفتت لخالتي ( ماما .. ساويلي شعري )
خالتو شبحتلي وقامت كابها من ع وجهها .. اذكرت ان ماما ليها سنة ونص بعيدة عليا .. اذكرت ماما مش معاي اليوم .. يللي هوا احلا يوم عند خالتو ..
جدو: ميس بنتي ساويلها شعرها
ميس: حاضر .. تعالي ورد
ساوتلي شعري .. وانا نشبح القدام .. دموعي ماقدرتش نشدهم .. تفكرت ماما ( مرة كنا مقعمزين في الجنان .. خشيت لبست قفطاني الاحمر يللي لابساته توا .. وقتها كيف شرتهولي ماما جديد .. طلعت وريتهولها
ماما: حي حبيبتي ورد دسيه
ورد: ماما خليني نلعب بيه عادي !!
ماما: باهي حافظي عليه .. باش تلبسيه في عرس خالتو هههههه
ورد: امتى هوا عرسها ؟؟
ماما: آممممم امتى ماربي يكتب .. ردي بالك تلبزيه باهي !!
ورد: حاااااضر .. محلاااااه عجبني
ماما: عارفاتك تحبي قفاطين الاميرات
ورد: قصدك انا توا زي الاميرة ؟؟
ماما: انتي اميرتي اصلا .. محلاها بنتي ياربي <3
تغمرتني وباستني .. بعدها مشيت نلعب بقفطاني .. ومن هداك اليوم مالبستاش ولا لعبت بيه .. قعد في الدولاب جديد .. لبسته توا في بيان خالتو .. )
سكتت شويا مانبيش نخرب ع خالتي فرحتها بعدين تقعد تبكي معاي .. وصلنا لحوش جدو .. آآآه ياريت ماما حية وجت تغمرتني حتى انا .. ديما تقوللي انتي الأميرة .. كل عرس او مناسبة ..
جاني زين يجري .. تغمرني
زين: وين مشيتي مع خالتو ؟؟
ورد: مشيت للمزين شوف شعري هههههه
زين: حي تباني كبيرة تقول عروسة
ورد: هههههه وين بابا ؟؟
زين: حطني عند اميما ومشي
ورد: وين مشي :\ ؟؟
زين: بيجيك قصي .. هي تعالي نلعبو
ورد: لالا مانقدرش نلعب بقفطاني الجديد .. برا العب بروحك
زين: اهو حتى انا لبستي جديدة وبنلعب :\
ورد: انت ولد اما انا بنية
زين: ورد العبي معاي :(
ورد: آووووف زين برا العب بروحك
زين: العبي معاي والله نحرش بابا
ورد: مانبيش نلعب خلااااص .. ديما وانا نلعب
وتلفتت التالي ومشيت .. عفس ع قفطاني وقال ( هآآآ )
تلفتت لقيته ملبز .. ( علااااااااااااش هكي !! )
زين: هكي انتي ماتبيش تلعبي معاي
ورد: ايه مانبيش وهآآآ
ضربته ع ايده .. جي يجري شحني من شعري وخربلي تسريحتي .. وتعاركنا !!
أول مرة انا وزين نتعاركو .. هوا كبر وايده ولت واعرة .. نرد عليه في ضرباته ونبكي .. جت اميما حزتنا من بعض .. وكل واحد واخد حصته وزيادة من التاني :(
اميما: انا نبي نفهم شن جاكم ؟؟.. استعديتو ؟؟
ورد: هوا ضربني
زين: كداااابة يااميما هي بدت الاولة
ورد: حي ع الكدب .. شوفي اميما هآآ عفسلي ع قفطاني
اميما شدت زين وقاماته سكتاته لانه قعد يبكي .. وانا زعلت .. هوا الغالط وهوا يللي يرضو فيه
اميما: علاااش ياورد خوك لين وجهه مولي احمر من الخباش >_<
ورد: اصلا انتم ديما هكي تحبو زين اكتر مني .. هوا يضرب وانتم تسكتو فيه .. كلكم ماتحبونيش تحبو غير زين يللي ديما مداير شطانة :(
اميما: حي ع ورد .. امتى زعلنا وسكتناه قولي هآآآ
ورد: ديمااااااا من لما ماما مشت :(
اميما: عيب الكلام اهوا .. يلا خشي الداخل
ورد: نبي نروح :(
اميما: امشي خشي بلا دوة فاضية
ورد: :(
زعلت وخشيت نجري لدار خالتو .. بنحكيلها القصة .. لقيت صحباتها جنبها يعدلولها في مكياجها ..
ميس: ورد حبيبتي خيرك زعلانة ؟؟
ورد: هدا زين .............
ماكملتش كلامي .. قصت عليا وحدة من صحباتها ( قيمي راسك ياميس فددتيني )
ميس: هههههه هآآآ
ومعاش ردت عليا خالتي .. قعمزت ع سرير ماما .. كانت مقابلتني مراية .. شفت شكلي لقيت شعري محوس .. بالشويا بالشويا .. ساويتها بس مازال محوس .. تلفتت يميني لقيت صورة ماما وهيا صغيرة .. قمتها .. قابلتها للمراية .. الله !! .. رفعت الصورة لخالتو
ورد: خالتو ميس .. شوفي
ميس: رديها ورد في مكانها هي باش ننزلو
ورد: ماما تشبهلي ولاه ؟؟
ميس: اكيييد .. تشبهلك هلبااااااا
ورد: هههههه
ميس: هي ردي الصورة وانزلي معاي
رديت الصورة في مكانها .. ونزلت معاها للصالة ,, كان في زحمة ناس .. احبابهم واصحابهم .. قعمزت ع كرسي جنب اميما .. وكل مرآ تسلم عليا لازم تقوللي ( ياروحي هادي بنت المرحومة .. زي النسمة تشبه لامها )
مايحسابووش هالكلمة تأثر فيا :(
في الليل .. كنت راقدة ع سرير ماما .. تلفتت لجيهة خالتو لقيتها راقدة من التعب .. نضت بالشويا خديت مذكرة ماما يللي في رف دولابها .. وطلعت لوسط الحوش .. كان الجو هادئي وكلهم راقدين .. فتحت اول صفحة وقعدت نتهجى شن مكتوب فيها بالشويا .. وصلت لصفحة مكتوب فيها ( الي صديقتي ورد ) .. نحسابها عليا انا .. تهجيت الكلام يللي مكتوب فيها وكان ::
( الي صديقتي ورد .. كم اشتاق لكي وانتي بعيدة عني .. كم أحن الي كل لحظة معكي .. كم كنتي فعلا الصديقة المثالية .. أخدتكي الدنيا مني فلم استطع اختطاف تلك الساعة لكي نبقى سويا للابد .. لم استطع ان اكون معكي في تلك العتمة .. في سكون المقابر .. لم استطع حتى زيارتك لأخبركي كم من شوق لكي جعلني اذرف الدموع .. لم تجف وجنتي الى الان .. ياليتكي معي .. ياليتكي معي .. أحبك بأصدق الكلمات .. بأوفى المعاني .. فارقتي الحياة ورحلتي .. سكنتي مكان أفضل من مكاني .. رحلت روحك الي خالقها .. رحلت كل حروف الصداقة معك .. فارقتي الحياة وتركتيني فيها وحدي .. من لي سواكي .. ولمن سأحكي خوضي في تجارب الحياة .. ولمن سأحكي يومي .. ومع من سأكون في مسيرة دراستي .. ومن سيمسك يداي اذا وقعت .. ومن سينقذني من أخطائي .. ومن سيمسح دمعي ان بكيت .. ومن سيرسم ضحكتي الصافية بعد الان .. ومن سيسأل عني ان مرضت بعدكي يارفيقة .. وع صوت من سأصحو .. لازال الى الان صوتك يرن في أذني .. ولازالت شهقات ضحكتك أسمعها .. ولازلتو أنا حزينة الي الأن منذ فراقك .. ولازالت دموعي معلنة الحداد .. ولازالت صورتك في مخيلتي .. ولازلتي معي أينما ذهبت .. ولازلت اذكرك في كل مجمع .. منذ دخولك لحياتي الي الآن .. لم تكوني سوى النسمة علي .. لم تكوني سوى الورد العاطر كأسمك .. لم تكوني سوى القلب الصادق .. لم تكونى سوى صديقتي الصدوقة .. ولن ترحلي .. ولكي آراك كل وقت وحين .. اسمك سيكون اسم طفلتي الصغيرة التي لم أنجبها بعد .. أتمنى من الله ان يجمعني بكي في الجنة .. أتمنى ان تكوني سعيدة الان .. مكانتك مع العليين .. آميــــن .. سأراكي في حلمي .. وحين موتي .. سأراكي في الجنة بعون الله .. صديقتك التي لازالت الحياة تعانقها .. ايناس <3 )
وكانت ملصقة صورة ليها هيا وصاحبتها ورد <3 ع جنب .. معناها ماما سمتني ع اسم صاحبتها يللي توفت .. ومشت لربي .. سمعت صوت جاي جيهتي سكرت المذكرة بسرعة ونضت لبدت ورى الكرسي .. لقيته جدوو ..
جدو: اطلعي ياورد .. مافيش غيرك ينوض في الليل ويهدرز بروحه ههههه
طلعت بالشويا .. قربت جيهته وقعمزت جنبه .. حط ايده ع شعري وسألتني مستغرب ( شن كنتي اديري وخيره عيونك معبيات دموع يابنتي )
ورد: استاحشت ماما :(
جدو: هييي يابنتي هادي الدنيا .. توا هيا محتاجاتك ياورد
ورد: كيف نساعدها ؟؟
جدو: ادعيلها ديما .. وكان خاطرك تقوليلها حاجة صلي وبعد الصلاة احكيلها شن تبي تحكيلها اكيد ح تسمعك .. سلم بنتي معاش تبكي .. راهو البكي مايدير شي .. وخييك زين ردي بالك عليه وحافظي ع الامانة يللي امك خلتهالك باهي !!
ورد: حاااضر :(
جدو: هي نوضي تعوذي من الشيطان وارقدي والصبح نمشو لمحل عمك مسعود ع رجلينا باهي !!
ورد: بجدياااات !! :)
جدو: اايه والله نمشو ناخدو بضاعة الفطور
ورد: شكرا جدو .. تصبح ع خير
تغمرته وبوسته ع خده .. وخشيت لسريري .. بعدين تفكرت مذكرة ماما .. مشيت نجري شافني جدو
جدو: هههه شن قلنا عاد ؟؟
ورد: لالا نسيت مذكرة مامي بس :)
جدو: باهي <3
>>>>>>>>>>>>>>>
قصي يتحدث ::
مع الساعة 9:00 في الصبح .. خشيت ع أمي في الكوجينا لقيتها اضم ..
أمي: حول غادي خللي نمسح الارضية لو سمحت يعني -_-
طلعت .. وقفت ع عتبة الكوجينا ..
قصي: اسمعي يمة .. ءءء
أمي: تبي رقمها !!
قصي: لا عندي
أمي: امالا شن تبي ع الصبح .. جيتك اهيا وقعدتك في الحوش معناها تبي حاجة
قصي: ههههههه نبيك تستاذني منها عادي نتصل بيها وهكي !!
أمي: ماشا الله ع ولدي المتأدب .. باهي شن تبيت اني !!
قصي: امتى بتكلميها ؟؟
أمي: صبر ياربي
قامت المنشفة .. وخدت فوطة وملمع وبدت تمسح في الطاولة
أمي: رد البساط مابين ماكملت الطاولة
قصي: اوكي -_-
أمي: امتى مانفضى تو نلهى بيك انت ومواضيعك يللي ماتمش
قصي: شكراا هههه .. ءءء مافيش فطور ؟؟
أمي: لا حول ولا قوة الا بالله .. انت ياتاكل ياتميعد بس -_-
قصي: ماعنديش وظيفة بكل -_-
أمي: هههههههه ايه .. حق وين الياس ؟؟
قصي: يميعد مع رزان ههههه
أمي: ع الصبح .. ربي يعفينا من هالجيل
قصي: :)
>>>>>>>>>>>>>>>>>
جواد يتحدث ::
الحوش مهبي .. زين وورد عند جدهم .. لما يغيبو عليا الحوش يفضى .. ويضياق عليا .. ونذكر كل لحظة مع امهم .. ايناس والله الى الان ماغبتي عليا .. ربي مايغيب عليا صغاري ان شا الله .. فتحت روشن وسط الحوش .. الشمس غايبة علينا ليها هلبااا .. اول مافتحت الروشن تلفتت للطاولة لقيتها كلها غبرة .. مني بينظفها ورد صغيرة ؟؟ .. وانا ماعنديش آي خبرة في التنظيف .. قررت بنجيب شغالة ادير دورة ع الحوش كله .. رن تليفوني والمتصل رقم غير معروف ..
جواد: آلووو
المتصل: .........................

#Dudu