الحضن الدافي

Part 45

#الحضن_الدافي

الحلقة :: 45 ::

مها: نسألك سؤال قبل !!
ورد: تفضلي :\
مها: ليش من البداية عاملتيني كويس واستقبلتيني فرحانة رغم اني زوجة بوك !
سكتت شويا وخديت لحظة هدوء بيني وبين افكاري .. ابتسمتلها : لانك تستاهلي <3
مها: ماخفتيش مني ؟؟
ورد: هئه .. ماخفتش :(
مها: ورد .. شن رايك تصارحيني انتي توا !!
ورد: بشني ؟؟
مها: بللي في خاطرك
ورد: انا صح محتاجة نفضفض لحد .. بس صدقيني خالتو مها لما يجي وقتها ح نلجألك انتي الاولة
مها: علاش مش وقتها ؟؟ .. فهميني شن يللي مضايقك ؟؟
ورد: ممكن يكون فقدان ماما أثر في نفسيتي هلباااا من كنت صغيرة مش قادرة نوثق في حد .. وبعدها بابا لما حبسووه حسيت روحي بنكرهه والحمد لله ربي كشف المستور قدام عيوني باش رجعت وثقت في بابا من جديد .. وبين غياب ماما وغياب بابا غابت عني صاحبتي القريبة جنى .. كانت الايد الوحيدة الممدودة لينا طوول فترة غياب الناس الغالية عليا هي ايد قصي .. هوا المنقذ الوحيد ليا في كل أزمة صعيبة تمر عليا .. ** تلفتلها وابتسمت ** .. خالتي مها .. شن يللي خلاك تفكري في بابا رغم انه متزوج وعنده صغار ؟؟
مها: انا حبيته بوك من اول يوم شفته فيه .. حبيت معاملته ليك .. وكلامه .. اسلوبه .. نظراته .. خوفه الكبير عليك من ابسط الاشياء في الدنيا .. والقلب ياورد لما يحب مايختارش :)
(( القلب ياورد لما يحب مايختارش ))
طول الليل كانت هالجملة ترن في وذني .. حسيت بروحي ماشية في الطريق الصح مع قصي .. زي ما خالتي مها حبت بابا وصبرت عليه لين تزوجها ورضت بأنه متزوج وبصغاره .. حتى انا ح نصبر ع قصي لين يحبني ويتزوجني .. حتي لو كان خاطب ميس .. اكيد ح تمر الايام ويحبني انا :)
قمت تليفوني وفتحت ع رقم قصي .. بعتله رسالة (( القلب لما يحب مايختارش )) .. سكرت قفل التليفون واتكيت ع مخدتي وبيها جذبتني افكار ماقبل النوم .. توهمت حاجات مستحيل تصير .. بس متفائلة هلباا برسالتي لقصي ممكن تغير من رايه شوي .. خذاني النوم لأحلامه <3
كان يوم جمعة ::
نضت الصبح ع صوت بابا يتكلم بالتليفون بصوت عالي ويضحك فرحان .. تكسلت وشفت من الروشن لقيت زين يسقي في الغرسات .. فتحته وناديت عليه (( زينووو صباحك ورد وفل ))
زين: صباح النور ورد .. باهي يللي نضتي جعاااان راني
ورد: هوا انت ديما جعان ؟؟ .. ههههههه هي خش نفطرو
فتحت باب داري وخشيت للكوجينا صبحت ع خالتو مها .. سالتها ( بابا مني يكلم ع الصبح ؟؟ )
مها كانت تنظف في الدواليب .. تمسح وترد في الماعيين : يكلم في ولد عمك قصي :)
ورد: قصي ؟؟ .. علاش ؟؟
مها: مش عارفة .. بري توضي وصلي وتعالي نفطرو
ورد: اوكي
بعد ماصليت .. خشيت للكوجينا لقيت بابا مقعمز ع الطاولة ومعاه زين وخالتو مها .. سحبت كرسي وقعمزت ..
ورد: شكلك فرحان اليوم بابا شن في؟؟
زين تلفتلي ويضحك: قصي حدد عرسه الشهر الجاي ان شا الله :)
فنصت عيوني .. مش مستوعبة حجم الصدمة يللي انا فيها توا ؟؟
ورد: بس نحنا في فصل الشتاء .. كيف هكي؟؟
بابا: هوا مش مداير عرس كبير .. كله كله يوم عزومة وهيا بدير حفلة
ورد: وانا قراية ؟؟
بابا: شاورني في الموعد والحفلة ح تكون الجمعة اطمني
ورد: والعزومة ؟؟
باابا: الخميس :)
كان بابا منغمس في الفطور .. يجاوب فيا كلمة وقص .. ماعطانيش التفاصيل بوضوح اكثر .. يعني قصي بيتزوج خلااص ؟؟ .. وانا شن بيصير فيا !! .. قعدت نلعب بطاسة الشاهي في ايدي .. لين تبزع منه شويا وحرقني ( آآآآي )
زين: هههه تستاهلي من امبكري تلعبي بيه
ورد: آووووف
نضت غسلت ايدي وطلعت من المطبخ .. نسمع في بابا يعارك في زين ع كلمته .. بس كلمتك يابابا كانت أحر من كلمته .. قصي بيتزوج ؟؟ .. وبنتك ياجواد .. راني نحبه يابابا .. ياريت نقدر نقولك هالكلام .. اكيد بابا مش ح يرضى بنته تتعذب ويوقف يشبحلها .. سكرت باب داري وبديت نبكي ونبكي ونبكي .. لين سمعت طقات الباب توقعت زين يللي يطق .. بس كانت خالتو مها ..فتحت الباب بالشويا وقعمزت جنبي ع السرير .. مسحت دموعي بكمي مانبيهاش تشوفني نبكي .. لانها بتسالني عدة اسئلة !ّ!
مها: قلتلك امبارح قوليلي شن يللي مضايقك ؟؟ .. بس تهربتي منه السؤال
شبحتلها باستغراب : شن قصدك ؟؟
مها: شوفي ورد انا في يوم من الايام كنت بعمرك .. وتصرفت تصرفات نادمة عليها توا
مسكت اعصابي شوي بس كانت مستفزة ..
مها: علاش تبكي ؟؟
حطت ايدها ع خدي ومسحت بقايا دمعة
ورد: اذكرت ماما :(
مها: صعب لما تتذكري ميت بعيد عليك والاصعب لما تشوفي الحي وماتقدريش توصليله
قمت عيوني فيها وانا ساكتة ..
مها: من حركاتك ع الفطور ومن نرفزتك توا .. ومن صوتك العالي ع زين امبكري واااضح بانك اضايقتي لموضوع قصي
ورد: لالالالالالالا ** بديت نرعش ونحرك في يديا يمين ويسار بمعنى لا وراسي كدلك **
شدتلي ايديا بهدوء .. ومسحت ع شعري : مافيش داعي ادسي اكثر من هكي .. بس بنقولك كلمة .. اعتبريني امك توا اوك !! .. قصي ياحبيبتي مش مناسب ليك
شبكت ايديا بعصبية .. اما هيا باست ع جبيني وطلعت وسكرت وراها الباب .. فتحت تليفوني وقريت المسج يللي امبارح باعتاته باش تكون ردة فعلك ياقصي حلوة .. بس كانت ردة فعل قاسية وباردة المشاعر .. مافيش حد في هالدنيا مأيدني ع حبك .. حتى انت معارضني :(
في لحظة ضعف ممكن تصير لآي بنت مع حبيبها يللي مستحيل توصله .. جي صبعي الابهام ع الاتصال .. اتصلت بيه .. شويا وسمعت همساته .. صوته يللي باين عليه التعب والارهاق
ورد: قصي علاش درت فيا هكي ؟؟
قصي: ورد قلتلك الف مرة لا هبال
ورد: انت تضربني وتراضيني بعدين ؟؟ .. علاش عذبتني علاااش درت هكي معاااي .. لدرجة هادي تكرهني ؟؟ .. باهي ماسألتش روحك شن يللي خلاها تحبني ؟؟ .. قصي انت الذنب في كل شي .. انت يللي خليتني نتعلق بيك باش في نص الطريق ترخيني .. حسبي الله ونعم الوكيل فيك انا مش مسامحاتك
قصي: لما تكبري تو تعرفي علاش درت انا هكي ؟؟
ورد: باهي قوللي من توا علاااش انا كبرت وبديت نفهم
قصي: لاني فعلا انا نحبك ..حب آخوي .. بس حبك ليا ياورد غلط في غلط .. انتي صغيرة وانا كبير عليك .. بيني وبينك 17 السنة وممكن اكثر مانبيكش اضيعي احلا سنين عمرك معاي .. مانبيكش لما تكوني شابة وحابة تعيشي حياتك زي جيلك انا نحرمك .. بس لاني كبير عليك فهمتي ياورد .. بامكاني نخلي حبك في قلبي يكبر بس انا لما نحب لازم نحكّم عقلي في الحب هذا هل هوا سليم والا لا ؟؟ .. فهمتي عليا !
ورد: ومن قالك انا نبي نتزوج شاب صغير .. انا لما حبيتك ياقصي وحق ربي كل شي بنيته معاك بروحي مافكرتش في عمرك ولا عمري .. قصي بالله عليك
قصي: خلاااص ورد قلنا الحب هذا بدايته غلط كيف تبيه ينتهي صح ؟؟ .. ردي بالك ع روحك وردتي <3
طووووط طووووط طووووط
سكر عليا الاتصال .. حذفت التليفون بكل ماأوتيت من قوة .. شديت مخدتي وبديت نبكي .. خذلتني .. اعذار وهمية اللي اخترعها باش يبعد عني .. انا نحبه ومستعدة نضحي بكل شي في هالدنيا .. حتى عمري .. المهم نكون معاه :(
>>>>>>>>>>>>>>>>
قصي يتحدث ::
اضايقت هلباا بعد مكالمة ورد .. حاس روحي خاين ثقة عمي فيا .. لما خلاها معاي كان متوقع اني نكون الاب ليها .. والاخ المثالي .. مش حبيبها او حلم حياتها .. كله منك ياميس جرحتي وردتي وخليتيها تتعلق بوهم ماليشي اساس .. بسبب غيرتك المجنونة خليتيها ترسم احلام فوق احلامها الباهتة .. وردتي حاس بيك .. وعارفك مضايقة .. وعارفك تعتقدي اني ضيعتك .. بس والله الذنب ماهو ذنبي .. ذنب خالتك .. مشكلة البنات لما يحبو ينعمى عقلهم .. معاد يعرفو يتصرفو .. غيرتهم تعميهم ع كل الكون .. ميس انعمى ع قلبها وحاسباتك ع شي ماليشي واقع بسبب غيرتها عليا انا .. وانتي ياورد انعمى ع عقلك بسبب خالتك واوهامها فكرتي توصليلي قبل مافكرتي في نفسك ممكن تتعذبي .. ممكن تزيدي تتعلقي بوهم .. قصي واخد كل تفكيرك .. قصي احتل قلبك .. قصي سيطر ع كل مشاعرك واحاسيسك .. وراضية بالعذاب معاه !! .. قصي ياورد وهم مستحيل يكون وااقعك :(
مرّت الايام بسرعة ::
كانت ورد كل يوم تتصل بيا وانا مانردش او نسكر هاتفي او نسكر عليها .. ميس فرحانة لانها واخيرا بتوصلني ومافكرتش بالوجع يللي سبباته لورد .. اما انا كنت حاير فيك ياحوااء .. مستعدة تتخلي عن حياتك من أجل آدم .. أنانية انتي في حبك <3 .. في يوم رن هاتفي وكان المتصل عمي جواد .. خبرني انه قريب من شغلي يبي يتلاقى معاي .. قعمزنا في كافي الشركة وخشينا في المواضيع ؟؟
>>>>>>>>>>>>>>>>>>>
جواد يتحدث ::
جواد: ايه وشن خديت الاثاث كامل ؟؟
قصي: لا خديت الأوليات بس .. دار نوم ومطبخ ودار معيشة والباقي كل فترة بنضيف شي ان شا الله
جواد: نبي نفهم بس شن يللي خلاك تتزوج واديره عرس مستعجل هكي؟؟
قصي: هههههه خطرتلي الفكرة ولقيت ميس مأيدتني :)
جواد: ياسيدي ربي يهنيكم ان شا الله
قصي: ان شا الله .. ءء خللي انوض نجيبلك شي تاكله
جواد: جيبلي بريوش بالله
قصي: هههههه تمام
ناض قصي .. وانا شديت تليفوني واتصلت بمها ..
جواد: اهلا مها شن الجو ؟؟
مها: اهلين جواد الحمد لله .. خيرك عطلت ع الغداء ؟
جواد: روحتي بالصغار قبل ؟؟
مها: ايه من امبكري .. قصدك متغدي برا ؟؟
جواد: لالا بنجيب قصي وبنتغدا انا وياه شن رايك ؟؟
مها: ايه عادي يتفضل ع سلامته
جواد: تمام . كنت بنقولك ,,,,
قطع عليا صوت تليفون قصي يرن .. شاد بيميني تليفوني ع وذني .. قدمت للطاولة وشديت بيساري تليفون قصي .. فتحو عيوني ع وسعهم .. قريت الرقم 4 مرات .. وكان مازال يرن .. سكرت ع مها من هول صدمتي .. مكتوب ع الرقم ( وردتي ) .. والرقم هوا رقم بنتي ؟ .. ايه مااستغربتش في الاسم لانه من زمان يقوللها وردتي .. بس الاستغراب لما وصلني مسج منها (( رد قصي انا محتاجاتك بالله عليك )) .. شن يللي خلا بنتي تحتاج قصي ؟؟ .. شن في بالها يدور توا وتحتاج قصي فيه ؟؟ .. الاتصال الثاني فتحت الخط .. سمعت صوتها .. ورد ايه ورد .. والكلام يللي قالاته كان صدمة كبيرة بالنسبة ليا .. تصورو اكبر من صدمتي لما تهموني بالاختلاس ..
( قصي خلاص انا نحبك معاش نقدر نصبر عليك بالله عليك افهمني فوتها ميس مانتحملش نشوفك مع غيري وعرسك الخميس بالله عليك افهمني وحبني زي مانحبك .. قصي .. رد عليا .. انصدمت صح .. لكن انا نحبك نحبك ونمووووت فيك )
سكرت عليها الخط .. وقفت بكل غضب .. جي قصي وشاد صحن البريوش .. حطه فوق الطاولة وقاللي : عمي .. ان شا الله خير !!
شبحتله بنظرة غضب .. حذفت تليفونه ع الطاولة وطلعت من القهوة بسرعة .. ركبت سيارتي ومشيت
>>>>>>>>>>>>>>
قصي يتحدث ::
لما عمي طلع .. لحقته بس لقيته طلع بسيارته .. شفت في تليفوني يللي في ايدي .. استغربت شن يللي وخده فيه ؟ .. بعدين اذكرت اتصالات ورد .. زعما شاف اسمها زعل مني ؟؟ .. فتحت قفل تليفوني لقيت مسج منها والآيفون مسجاته ع المرئي معناها قري مسجها .. خشيت للمكالمات لقيته راد عليها والمكالمة مدتها تلات دقايق .. الشيييت .. شن يللي قالاته لبوها؟؟.. شن يللي رده عليها بوها ؟؟.. آووووف سببت مشاكل بينها وبين بوها .. ركبت سيارتي وطلعت نجري لحوش عمي ..نلحقه قبل ماتصير كارثة في البنت لا سمح الله ..
>>>>>>>>>>>>>>>
رد عليا الحمد لله .. توا هكي اكيد بيفكر فيا وبيتراجع عن قراره مع ميس .. سكرت قفل تليفوني واتكيت ع سريري .. سمعت طقات الدار وخشت عليا خالتو مها
مها: ورد حبيبتي تجي تساعديني
ورد: ايه حااااضر ** كنت فرحانة ** .. في شن تبيني نساعدك ؟؟
مها: كلمني بوك من دقايق وقاللي انه مع قصي وبيجو يتغدو هنا
كتت نساوي في شعري لما كملت كلامها .. بابا مع قصي .. انصدمت وجسمي بدي يرعش مع بعضه .. مايكونش بابا يللي رد عليا ؟؟
مها: بوك كان بيقوللي حاجة فجآءة سكر ان شا الله خير .. غير هيا استعجلي مانبوش نعطلو عليهم
جمدت في مكاني لما سمعت صوت تقربيعة الباب وصوت بابا يعيط ويقول ( وررررررد .. ورررررررررررد )
خالتو مها تلفتت .. خش بابا لداري وانا جامدة في مكاني .. كان في عيونه لهيب نااار الغضب .. شبحت لخالتو مها وشبحتله .. بدون استعداد .. عطاني كف طحت لوطة .. ( آآآآآآآآآآآي ) جت خالتو مها طول وشدتني وشبحت لبابا
مها: خيرك مع البنت شن في؟؟
شبحلها بغضب وشدها من ذراعها وقاللها : اطلعي برااااااااا
طلعت من غير ماتنطق ولا كلمة .. شبحت لبابا وعيوني يدمعو : علاش ضربتني؟؟
بابا: انتي عارفة علاش ؟؟.. ماديريش روحك ملايكة قدامي واطيتي راسي قدام ولد خوي ياواطية
بدي يضرب فيا وانا نصييح من الوجع .. جسمي كله يوجع فيا .. جسمي كله يشكي من ضرباته ليا .. بعدين قامني بقوة وحذفني ع سريري .. خشت خالتو مها تجري وشداته
مها: خلاااااص ياجوااااد فهمني شن فيكم ؟؟ .. خيرها شن دارت ؟؟
جواد: اطلعي ماتتدخليش .. البنت بنتي وحر بللي انديره فيها >_<
مها شدت ايده وبعداته عليا : باهي بالتفاهم ينحل كل شي عيب يللي ادير فيه
شدها بقوة ودفها بعيد .. قامني من شعري وانا نبكي ونتوجع
جواد: تشوفي فيها اهيا .. واخدها ع خاطرك ياكلبة .. تزوجت باش تريحك من كل شي ونعوضك يللي ضاع منك زماااان .. بس انتي شفتي شن درتي ؟؟
خالتو مها انسحبت من داري وطلعت والدمعة في عينها
حذفني من جديد وانهد حيله في سريري .. حط ايديه ع وجهه ومرافقه ع ركابه وقعد يبكي ..كنت نتألم لما باابا يبكي .. ومانبيش حد يضايقه ويبكيه واليوم انا يللي خليته يبكي
سحبت روحي لين وصلت فيه حطيت ايدي ع كتفه: سامحني بابا بالله عليك
نحالي ايدي بقوة وقال: وانا نقول علاش كل مانقول لقصي تعالا عندي يرفض
غمضت عيوني بآلم وحسرة .. رجعت نبكي بصوت مبحوح تلفتلي وقاللي: لو كان تبكي دم ماني مسامحك ياورد ع اللي درتيه فيا .. واطيتي راسي قدامهم كلهم .. بنتي يللي فنيت عمري كله باش نفرحها ونربيها احسن تربية .. بنتي الامانة من المرحومة ايناس هيا يللي واطت راسي ووجعتني .. لا انا ولا امك ياورد مسامحينك
وقف بيطلع .. لحقته نجري وشديت ايده وانا نبكي: بالله عليك يابابا ماديريش فيا هكي بالله عليك
سحب ايده مني وطبس عليا: هاتي تليفونك انتي مش قد الثقة يللي عطيتهالك
عطيته تليفوني طلع وسكر عليا الدار بالمفتاح .. ماوجعني شي قد ماوجعتني كلمتك يابابا ( لا انا ولا امك ياورد مسامحينك ) .. تغمرت مخدتي ورجعت نبكي .. كل شي في جسمي يوجعني .. بس يللي حرقلي قلبي كلامك يابابا .. انا بنتك يابابا :(
انا يللي وجعتك وظلمتك بفعل مراهق ماكنتش بعقلي لما درت هالشي .. خلاص يابابا والله نوعدك معاد نغلط .. بس سامحني يابابا .. سامحيني ياماما .. بكيتك يابابا .. وماخليتك ترتاحي ياماما في قبرك .. بدال مانفرحكم .. وجعتكم .. بدال مانرفع روسكم .. واطيتهم .. نصحوني كلهم نبعد ع قصي .. خسرتهم كلهم وخسرت قصي .. خسرت ثقة بابا .. وخسرت بابا نفسه .. وخسرت ماما .. وكل شي كان معوضني في هالدنيا
>>>>>>>>>>>>>>>
جواد يتحدث ::
جسمي كله فشل .. مش من ضرب ورد .. لالا .. ورد كانت مجرد فشة غل بس .. مارديتش وجعي منها .. ولا بردت ع قلبي مازال .. جسمي فشل لاني ماكنتش نتوقع في يوم من الايام ننحط في هالموقف .. خشيت لداري تلوحت ع سريري .. لو كنتي معاي ياايناس بس :(
خشت مها بهدوء للدار .. وقعمزت ع طرف السرير .. وقالت بهمس
مها: تبي تتغدا ؟؟
رديت عليها بصوت مش طايق آي حد : لا
مها: اوكي نخليك ترتاح
طلعت وسكرت وراها الباب .. كنت نحاول نرقد باش نسهى ع الواقع شوي ونرتاح من الوجع .. بس كل ماتغفى عيني يفيقني الموقف يللي صار منذ ساعة .. سمعت طقات باب خفيفة .. قمت روحي وقعمزت .. خش زين
زين: قصي البرا يابابا يبيك ضروري
جواد: آوكي دخله للمربوعة
طلع زين .. قمت بتكاسل وفشل من سريري وطلعت للمربوعة .. او ماخشيت وقف قصي ..
آشرتله بايدي قعمز .. قعمزت ع الصالون .. هوا قعمز مقابلني
قصي: عمي يللي صار ,,,,,,
قصيت عليه: يللي صار هوا اني ماعرفتش نربي ورد وخلاص
قصي: لالالا والله ماهكي بس البنت صارو معاها هلبااا مواقف خلوها تتصرف التصرفات هادي
جواد: مافيش داعي تبرر
>>>>>>>>>>>>>>
قصي يتحدث ::
كنت لازم نوقف مع ورد في محنتها .. هيا محتاجتني توا ولازم ماننسى الدنيا كلها ع خاطرها .. زي ماهيا باعت الدنيا كلها وكانت وفية ليا .. ووقفت معاي وقت محنتي القديمة .. مستعد انضحي بميس وكل أهليتي المهم ورد تتحسن علاقتها مع بوها <3
قصي: لالا .. البنت صغيرة وزي ماقلتلك في غيابك ورد ضعفت ولت انسانة تانية .. كل ماتكبر كل ماتضعف شخصيتها اكثر واكثر .. انا مانعرفش شن قالتلك بس والله اابنت مادارت شي غلط .. هكي برائتها قالتلها ديري .. كلمي قصي وبوحي عن مشاعرك الوهمية
جواد: انت قلتها وهمية .. طووول هالفترة كانت ورد تتصل بيك وتبي تبعدك عن ميس ** عدل تقعميزته وشبحلي شبحة عمري ماننساها ** .. وهيا سبب في استعجال بعرسك .. وهيا السبب في قطع علاقتك معانا صح ولاه ؟؟
قصي: كنت لازم ندير هكي كــ عقاب ليها بس
جواد: ماكانتش تفهم ان هذا عقاب
قصي: لانها مازالت ع براءة ونظافة ياعمي .. والله البنت مافي من أطهر منها .. الذنب مش ذنب ورد .. ** سكتت شوي بتحسر وقمت عيوني فيه ** ذنب ميس ياعمي
قام عيونه فيا بيركز ع كلامي .. وانا استمريت: في يوم ميلادها في الليل كانت معزومة عند صحباتها ودارولها حفلة وهدايا وجو .. المهم وقتها ميس روحت من ايطاليا .. جت لحوشنا واتصلت بورد وهددتها لازم تروح توا والا بيصر كلام تاني .. خافت ورد واتصلت بيا روحت بيها ومعاي زين .. لقينا ميس مدرسة سيارتها قدام حوشنا .. خدتها وروحت بيها لحوشهم وقتها عمي سعيد ومرته في الجبل .. وحبستها في الحوش .. هيا حكت لصاحبتها ع اللي صار وصاحبتها قالتلي .. ومنها عرفت ان ميس كانت غايرة من ورد لما نحكيلها عليها وتوهمت بان ممكن ورد تاخدني منها .. فلهذا عاقبتها عقاب قاسي .. وانا طبعا مش في ايدي ناخدها من ميس بحكم انها خالتها وامي منعتني .. وبعدين ماعنديش علم بللي صار لين بعدها بفترة طوويلة بعد حتى ماورحتو لحوشكم .. وقتها علاقتي مع ميس كانت متزعزعة .. ولما جي غسان بيخطب ورد اكثر المؤيدين للموضوع كانت ميس وتبي تتخلص منها بآي شكل من الاشكال .. هذا يللي خلا ورد تتوهم وتعيش الوهم وتحبني من الاوهام يللي زرعتها ميس فيها
عمي يشبحلي ومع كل كلمة نقولها ينصدم اكثر .. مسح ع وجهه وقال: هذا كله في غيابي صار ؟؟
قصي: ايه .. وماقدرتش نقولك خفت تفهم الموضوع بالعكس .. وآهو صار شي ماكنتش حاسبله حساب
عمي: رغم هدا كله ورد لازم تتعاقب .. مش آي واحد يجي يقوللها كلمة تصدقها .. آآآآه .. ماكنتش متوقع في يوم من الايام ح ننحط في موثق مزري زي هدا :(
قصي: ماتكبرش الموضوع ياعمي وخودها مني .. بنتك ورد عمرها كله رافعة راسك .. وصدقني لو تقعمز معاها وتصارحك ح تكتشف حجم برائتها قداش كبير .. البنت عفوية وطيووبة وحنينة .. تصدق ياعمي .. مرة صغرت بيا الدنيا وتعبت هلبااا .. هيا وقفت معاي ورتني قداش الدنيا صغيرة وماتستاهلش الحزن عليها .. وماتستاهلش اصلا نعطوها اكبرمن حجمها
شديت في ايد عمي بشدة وابتسمت : خليك واثق فيها .. واحمد ربي ع نعمة ورد :)
طبطبت شويا ع كتفه وطلعت .. روحت
>>>>>>>>>>>>
جواد يتحدث ::
لما روح قصي .. تنهدت واتكيت ع الصالون حسيت بحجم غيابي ع صغاري .. حسيت بوقتهم يللي ضااع ويحاولو يعوضو الناس يللي انحرمو منه .. حسيت بقسوتي ع ورد .. بس لازم نعاقبها .. في الليل فتحت باب داري بالشويا خفت تكون مها راقدة وتفيق بيا .. بس وين خشيت لداري سمعت شقهات بكاء مكتومة .. قمت عيوني وفتحت ضي الدار .. لقيت مها مقعمزة ع السرير .. قامت عيونها فيا
جواد: مها !!
قربت للسرير وقعمزت جنبها: خيرك تبكي ؟؟
مها: وجعتني ورد :(
جواد: كلكم جايين معاها .. باهي ماوجعتكمش انا كيف نربي ونكبر في الاخير تخذلني ؟؟
مها: بس هيا صغيرة والصغير يغلط .. والكبير لازم يوعيه مش يعاقبه ويغلط احرف منه
مسحت دموعها وقفت بعد مانفخت ( آووووف ) .. نحت الروب الشتوي وحطاته ع جنب وقامت الورغان وخشت تحته .. ماهانش عليا نخليها ترقد بدموعها .. قمت عليها الورغان وقلتلها: خلاص تونمشي نفتح عليها الباب .. شن تبيت اني هي ؟؟
جبدت مني الورغان وقالت: بسسس !!
ضحكت وقلتلها: ايه وشن تاني تبي هي ؟؟
مها: مانبي شي جواد .. تصبح ع خير
ايييح علينا مش ناقص تصرفات صغار انا .. خليتها ترقد وترتاح .. وانا طلعت لدار ورد فتحت عليها الباب ومن غير مانشوف ان كانت نايضة اولا بس كان الواضح انها مارقدتش .. وخشيت لداري .. رقدت والصباح رباح :)

#Dudu