الحضن الدافي

Part 17

#الحضن_الدافي

الحلقة :: 17 ::

روحت وانا مادرتش آي اعتبار لكلامها .. بصراحة .. مش اول مرة نسمعه .. قصي .. خوي .. فاطمة .. وصاحبي .. الكل يشجع ع الزواج .. الا قلبي رافض يدخل غير ايناس .. وعقلي رافض يفكر في غيرها .. حوشي !! .. مانقدرش اندخل غيرها .. مانقدرش حتى نتخايل هاللقطة تصير :(
يوم الجمعـــة رفعت صغاري للملاهي .. لعبو لين دهشو .. ماخليت ماخديتلهم من غزل بنات .. وفشار .. قعمزت ع كرسي .. طلعت تليفوني وقعدت نتفرج ع صوري انا وايناس في الاردن .. ومن بين الصور اذكرت موقف .. وين قعدنا نتمشو وهدرزنا ع هلبا حاجات .. طفولتنا .. شبابنا .. أول ماجتنا ورد حبيبتي <3 .. ولما جانا زينو الغالي <3 .. وين جت البنية ومشت :( .. بكت هلبااا.. وجعتها هلبااا .. قالتلي ( مهما كان هادي بنتي وكبدي .. تعبت عليها وفرحانة بيها زي مافرحت بيها .. ياريتها قعدت معانا )
جواد: بس حبيبتي هذا قدر .. ولازم تؤمني بيه :)
ايناس: آآآآه ونعم بالله :(
فعلا مؤمنة بالقضاء والقدر .. بس كانت طول هديك الفترة متأثرة بوفاة بنتها ..
جواد: تو بتوقف ع باب الجنة وتنادي باسمك وتقول ( مش ح نخش الا بماما )
ابتسمت .. وفيسع ماغابت الابتسامة .. واتكت ع كرسي الهزاز الموجود في دارنا ..
ايناس: ياريت الدنيا تمشي زي مانبو نحنا :(
جواد: كان هدا راهو ماسمهاش دنيا .. ادعي لربي يحفظنا لبعض <3
ايناس: ان شاء الله بس بندعي لربي يجعل يومي قبل يومك جواد .. انا مانقدر نعيش من غيرك
قدمت راسها ليا وانا مقعمز مقابلها ع السرير .. شدتلي ايديا .. ماقدرتش نشوف لعويناتها الحزينات .. بوست ايدها
جواد: انا يللي نبي نموت قبلك .. هالوجه الحلو مانقدرش نصبح من غيره .. ترا وريني ضحكتك الحلوة :)
ايناس: هههههه .. خللي انوض نشوف ورد وزين
جواد: ءء نوسة .. نوضيهم خللي نتعشو البرا
ايناس: بجد !!!؟؟؟
جواد: ايه والله .. هي تلقوني نراجي في السيارة
غمضت عيوني وطلعت من ذكرياتي .. بابتسامة عفوية .. شفت يميني لقيت ورد شادة زين وتقنع فيه باللعبة .. نضت من مكاني ومشيتلهم ..
جواد: ورد .. خيركم !!
ورد: زين من امبكري يبكي .. ومايبيش يلعب
زين: بابا .. نبي ماما !!
وهذا السؤال يللي مش متوقعه .. مانبيش نسمعه منه .. سكتت ماقدرتش نرد ..
( يامينتي شكلها امه متوفية )
تلفتت لقيتها مرآ .. بنظرة استعطاف لولدي .. عصبت .. وتقارنو حواجبي .. وكان لقيت نفيتها من وجه الارض .. هذا قدرهم .. بدل من تساعدو الاطفال يجتازو المرحلة الصعبة يللي هما فيها .. تزيدو فيهم بنظراتك اللا محدودة .. بنظرات العطف والاستلطاف .. مش ضروري تحسسي الطفل بإنه ناقص .. مش ضروري اصلا يحس بآن كل الاطفال احسن منه .. آو يحس بالحرمان من نعمة الأم .. شديت زين وورد .. وكملت طريقي للسيارة
زين: بابا :(
جواد: نعم يازين
زين: نبي ماما
جواد: تو تجي .. سافرت بتعطل علينا شويا اوكي !!
زين: الجنة بعيدة !
جواد: من قالك ماما في الجنة ؟؟
زين: ورد
شبحت لورد .. نظرة تهديد .. ممكن لو سأل حد يجاوبه شن هيا الجنة .. ونقعد انا نحل في عقد نفسية في الولد .. بدل من نصلح يللي فات .. ونعوض يللي ضاع .. وبدل مانعالج جرح قديم .. نعالج جرح جديد مش ح يبرا لين يكبر وينسى -_-
ورد: بابا وين ماشيين ؟؟
جواد: كلمني عمو وقاللنا تعالو تعشو عندي
ورد: هييييييي بنمشو لماما فاطمة يازين .. استاحشتها <3
زين: :)
مرت خوي نعرفها انسانة كويسة وباهية فينا .. طول ماكنت عزابي .. كانت تجينا اتشكل وتحطلي في الحلو .. في حاجات ماكانتش امي تعرفها .. لانها مرآ كبيرة في العمر الله يرحمها .. وكانت ماتقصرش في حق آمي نهائيا .. لما تعبت الفترة الاخيرة ورقدت في المستشفى باتت معاها فاطمة .. وحلفت مايعانيها حد غيرها .. ولين توفت آمي فرحانة بيها وتزازي بيها .. رغم ان عندي خوات بس كانو مهملات في حق الوالدين .. ممكن نتيجة دلع بوي ليهم الزايد .. لما كانو يغلطو كان يعاقب في أمي مش فيهم .. وهكذا كانت قصتي عند الصغر
ولهذا لما كبرت ودرت عيلة .. من الاول اتفقت مع نوسة .. لما صغاري يغلطو نوقفو صف واحد ونورهم الغلط .. ولما يفكرو بيديرو الصح نشجعوهم ونشدو ع ايديهم .. وهكي تكون العيلة الراقية .. بس خسارة انا ح نكمل هالمشوار بروحي .. ( بروحي ) آآآآآآه مازال الكل يردد ويكرر ( تزوج وماتقعد بروحك ) .. بس آنا حاليا مرتاح وعايش مع صغاري زي مانبي واحسن .. ( مازلت صغير ) كلمة ديما تزن في وذني .. صح صغير .. وصح عمري 36 سنة .. يللي بعمري توا كيف تزوج .. بس وين درت صغار معاش صغير .. وليت صاحب مسؤولية .. صاحب عيلة .. وصغار .. ابتسمت .. مافيش داعي نفكر في روحي .. ليش البنت لما يموت راجلها تفني عمرها وجمالها في تربية صغارها .. ولما الراجل تموت مرته ع طووول يهاب الحياة بروحه ويستخسر في صغاره عمره ووقته !!
ح نكون نوعا ما مميز .. ومش ح نتزوج .. ح نراجي لين ورد وزين يكبرو .. وبعدها ح نجيب شغالة لروحي باش تعانيني .. مانبيش صغاري يقلقو مني .. ولا نبي انتعبهم .. آهم شي عندي راحتهم .. وانا قاعد نفكر ونفكر ..تلفتت لقيت ورد ع الكرسي يللي جنبي راقدة .. وين ركزت في ملامحها اكتر حسيتها تشبه لأمها هلبااا .. سبحان الخالق ( ايناس وهيا صغيرة ) .. تلفتت لقيت زين يتفرج من الروشن ..
جواد: زين شن ادير !!
زين: بابا .. جعااان
جواد: ههههههه حااااضر احلا شاورما لعيونك زينو من عندي غيركم انا
وبهكي كتبت أول خطوة في دربي ( أفني عمراً من أجل أطفالي )
وصلت لحوش خوي درت كلاكس .. نوضت ورد .. وزين نزلته تلفت ع طول لحوش المقابل
جواد: من ادور ؟؟
زين: ديمة كانت تلعب معاي زمان :)
جواد: هههههه زمان صار .. باهي شن رايك تمشي اتناديها توا ؟؟
زين: هيييي شكرا بابا
مشي يجري لحوش جيران خوي وطق الباب .. طلعتله ديمة وجابهالي
جواد: هادي ديمة ؟؟
زين: ايه :)
جواد: خشو العبو في الجنان هي
ديمة: عادي يروح معاي نلعبو ؟؟
جواد: آممممم باه .. ماديرش شطانة زين اوكي !!
زين: آوووووكي بابي <3
وهادي الفرحة يللي نبي نشوفها ع وجه صغاري العمر كله :)
جواد: ورد وين ماشية ؟؟
ورد: لقص بنعطيه الشاروما متاعي شبعت
جواد: ههههههههه
ورد وقصي زي الفار والقطوس بس في نفس الوقت مايستغنوش ع بعض .. طقيت الباب فتحلي قصي
قصي: آوووو عمي .. حي جيتي يامشفشة ؟؟
ورد: هاك
جواد: مافيش اسلوب ارقى ههههههه
قصي: منورة بنية عمي .. خش خش عمي .. يمة عمي وصغاره جونا
طلعتلي فاطمة تهلل وتسهل بيا ..
خشيت قعمزت في الصالة .. وجابت العالة حطتها
جواد: هههههه هكي بترجعينا لايام أمي الله يرحمها
فاطمة: بنبدا نديرها كل جمعة .. وعاد انتم تكونو حاضرين
جواد: بارك الله فيك .. امالا وين خوي !!
قصي: مشي مشوار مش بعيد تو يجي
جواد: وانت شن مقعدك في الحوش !!
قصي: ههههههههه اسال امي
جواد: خيره ؟؟
فاطمة: بيتزوج شكله ياجواد ههههه .. تعرفه قصي مصلحي ههه
جواد: حق ياقصي هههههه
فاطمة: وين زين !!
جواد: عند ديمة جارتكم
فاطمة: هههههه اكيد استاحشاته قداش ليه عاد ماجانا
وهدرزنا .. سهرنا .. وكانت آحلا سهرة من أيام المرحومة .. وفاتت الليلة ع خير .. وين جيت بنروح .. وقفتلي فاطمة ( قعمز شوي بنهدرز معاك في موضوع )
جواد: تفضلي
خوي: جواد .. قعادك بروحك مش حل ليك ولا لصغارك
جواد: انا مرتاح هكي
فاطمة: باهي حلي انا ممكن يفرحك
جواد: شن هوا !!
فاطمة: تزوج ميس اخت ايناس
جواد: :o

#Dudu