الحضن الدافي

Part 18

#الحضن_الدافي

الحلقة :: 18 ::

فاطمة: باهي حلي انا ممكن يفرحك
جواد: شن هوا !!
فاطمة: تزوج ميس اخت ايناس
جواد: :o
خوي: خيرك انصدمت ؟؟ .. البنت مخطوبة والا حاجة ؟؟
جواد: لا مش قصة مخطوبة بس ......
قصي: تي كيف يابوي ؟.. شن هالكلام ؟؟.. علاش تظلمو في البنت تتزوج باش تربي صغار اختها .. بأما منطق ماشيين .. البنت من حقها تتزوج شاب زيها زيه وتعيش حياتها وتبداها من الصفرمعاه .. مش يتزوجها لمصلحته هوا الشخصية ومصلحة صغاره وهيا تندفن ؟؟.. ماتوقعتكمش تفكرو هكي انا بكل .. ولا عمرها حتى خطرت في بالي -_-
طلع قصي من الصالة .. مافهمتش ليش انفعل بالطريقة هادي .. هوا كلامه صح .. بس كان يقدر يهدى ويستوعب شن كنت نبي نقول !! .. الا اذا كان حاط موضوع ميس في باله .. من غير ولا كلمة انسحبت من الجلسة وطلعت .. تمنيت انلحق عليه قصي وهوا طالع بالسيارة .. بس خسارة .. سبقني .. ( تبداها من الصفر معاه ) .. و ( شاب زيه زيها ) .. لو كانت البنت ماتهمه ماكانش قال هالجملتين .. وزادها بالثالثة يللي جرحتني نوعا ما ( مصلحته الشخصية ) هوا اكثر شخص عارف ان عمري ماسبقت مصلحتي .. وعمري مابنيت سعادتي ع تعاسة غيري .. ومن هنا سكرته الموضوع بالنسبة ليا ..
أما بالنسبة لنسيبي ( بو ايناس ) .. جاني في ليلة من الليالي وطق بابي .. دخلته وناديت ع الصغار هدرزو عليه شوي مابين جبتله الشاهي وتشكيلة حلويات جاهزة طبعا ..
نسيبي اسمه ( سعيد )
سعيد: كيف حالك ياولدي ؟؟
جواد: الحمد لله كيف حالك ياعمي انت والعويلة !!
سعيد: والله الحمد لله .. انا طالبك في موضوع
جواد: تفضل انت تآمر :)
سعيد: مايآمر عليك ظالم .. موضوعي هوا يخصك انت والصغار
جواد: بالله ماتعرضش عليا موضوع الزواج لان من توفت ايناس وانا مسكرله بابه ومش حاب نفتحه
سعيد: وليش !!
جواد: مانبيش نظلم صغاري بزوجة أب .. وانا هكي مرتاح صدقني ياعمي .. أقل شي صغاري ماحد يدخل فيهم ولا حد مدخل في تربيتهم غيري .. ولاهي بيهم .. و 99 % من وقتي ليهم :)
سعيد: عارفك ياولدي .. وباش ماتظلمهمش ولا تخلي حد غريب يدخل فيهم انا جايك في موضوع
جواد: تفضل
>>>>>>>>>>>>>>>
قصي يتحدث ::
حاس بالدنيا كلها سكرت ابوابها عليا .. اول شركة ماقبلتني ولا التانية .. وحاس بعمي مازال يخطط ويفكر في زواجه من ميس .. باهي وانا !! .. كل موضوع نبدا فيه يفشل .. العلة فيا والا فيهم زعما !! .. اعوذ بالله من الشيطان الرجيم .. استعوذت من الشيطان وتوكلت لحوش عمي ..
لقيت عمي مقعمز قدام الحوش ويدخن ..
قصي: آوووووو عمي
عمي: اهلين قصي انزل
قصي: والله جيت بنطق فيك انت والصغار وعندي مشوار الحق
عمي: الصغار رفعهم جدهم
قصي: علاش شن في؟؟
عمي: قال مادامه خميس خليهم يباتو للسبت
قصي: آها .. سجلته زين في الروضة ؟؟
عمي: ايه سجلته .. تي غير خش بدل من مدت راسك من السيارة هكي !!
قصي: هههههههه مرة الجاية ان شا الله هي سلامات
نضحك .. ونكابر .. بس في قلبي هم كبير مايعلم بيه غير ربي .. روحت للحوش وكنت مضايق حتي السلام ماقلتها .. وجه عمي كأنه يقول ( بنعزمك ع فاتحتي غدوا ) مادابيا مانبيش نسمعها ابداً .. مش مستعد للصدمة هادي .. البنت الوحيدة يللي خشت خاطري .. حاليا شاغلة بال عمي .. آآآآخ يارب كون معاي .. ويللي فيه الخير ياربي جيبه :(
>>>>>>>>>
لما روحت مع جدو .. زين رقد .. وانا قعدت مع اميمة تحكيلي في حكايات ..
اميمة: وردتي حبوبتي جيبيلي امية ترا
ورد: حااااضر
نضت بنجيب امية لاميمة سمعت جدو يكلم في خالتو .. كان مقعمز ع كرسي قدام باب حوشهم .. وخالتو واقفة شادة صفرة عشي جدو
قدمت بالشويا لين وصلت ورى الباب ..
جدو: قعمزي بنتي نبيك في موضوع
ميس: نعم بوي !!
جدو: بما انك كملتي قرايتك .. والحمد لله تخرجتي بامتياز حاب نفتحلك موضوع .. يخص جواد وصغاره
ميس: قصدك تبيني نتزوجه صح !!
جدو: عليك نووور
ميس: بجديات تتكلم بوي ؟؟
جدو: خير من تاخده برانية ونقعدو نفكرو في الصغار صح ولاه !!
ميس: :(
جدو: فكري ع مهلك يابنتي وامتى ماتبي اعطيني البشارة تمام !!
ميس: البشارة !! .. متوقع بنوافق ؟؟
جدو: مصير ورد وزين حاليا بين يديك
ناضج دو من مكانه وخلا خالتو واقفة بصمت .. انا هربت نجري للمطبخ .. خش جدو عليا ( شن اديري مارقدتيش ؟؟ )
ورد: ءءءء توابنرقد
جدو: باهي تصبحي ع خير يابنتي
ورد: وانت من اهلو :)
طلع جدو .. وخشت خالتو ميس مضايقة حسيتها .. شبحتلها وطلعت نجري لدارنا سكرت الباب وتغمرت زين وقعدت نبكي ( مانبيش حد ياخد مكان ماما .. مانبيش يصيرلي زي ريمي والا سالي .. ) لين خداني النوم وانا جنبه وحاضناته ..
>>>>>>>>>>>>>
جواد يتحدث ::
طول هاليومين وانا نفكر في عمي وكلامه يللي قالهولي .. خايف نقدم بخطواتي ونفس ماقال قصي نظلم البنت .. آآآآآه كيف بيكون الحل !! .. يارب مضي هالايام ع خير ..
( بابا .. بابا .. جعان )
تلفتت لقيت زين واقف وراي وينخص فيا ع كتفي ..
جواد: حاااضر يابابا شن تبيت اكل هي !!
زين: آي شي :)
جواد: حاااضر
مشيت حطيتله ماياكل .. بريوش بالعسل ومق كاكاو .. ودرت لروحي قهوة ..قعمزت مقابله ع الطاولة .. وانا نفكر شن بيكبره زين ! .. وشن بيكبر ورد معاه ؟؟.. وكان تغمض عيني بكري بكري .. لمن بنخليهم صغاري !! .. فكرت مرارا وتكرارا .. وكان الاحسن آني نخضع لأمر الواقع ونتزوج ميس :(
بس ميس مازالت صغيرة .. وممكن حتى تراجي في حبيب القلب يخطبها .. ليش نخرب عليها .. وفجآة رن تليفوني ..
رقم غير معروف ..
جواد: السلام عليكم
ميس: وعليكم السلام .. كيف حالك جواد ؟؟
جواد: من معاي لو سمحتي !!
ميس: انا ميس
جواد: اهلا ميس كيف حالك ؟؟
ميس: الحمد لله .. جواد نبيك تفضالي غدوا ضروري نبيك في موضوع
جواد: اوكي حاضر .. بعد مانروح بالصغار من المدرسة نمر عليكم ان شا الله
ميس: لالالالا مانبيكش تجينا للحوش
جواد: آها .. مافهمتش !!
ميس: نتلاقو في آي مكان خارج حوشنا
جواد: امتى تفضي انتي ؟؟
ميس: انا دوامي يتم الساعة 2 الظهر
جواد: تمام .. مع الساعة 2 ونص نكون غادي اوكي !!
ميس: اوكي .. هي سلملي ع الصغار
جواد: يوصل ان شا الله
سكرت ميس وانا مستغرب .. موضوع شنو يللي تبيني فيه !! .. في احساس بداخلي يقوللي انها ح ترفضك .. وح تختلق ستين عذر باش يجي الرفض مني .. ان شا الله خير وخلاص
في اليوم التاني ::
مع الساعة 2:00 ظهرا كنت قدام مقر عمل ميس .. اتصلت بيها سكرت عليا .. خشيت للكافي المقابل وقعمزت نشرب في قهوة .. بعتلها مسج ( تلقيني في الكافي يللي قدامكم )
ربع ساعة وجت .. شفتها تتلفت يمين يسار ادور فيا .. وقفت أشرتلها بايدي جتني طوول .. حطت نقالها ومفتاح سيارتها ونظارتها وجبدت الكرسي وقعمزت وهيا داهشة
ميس: اسفة ع التأخير
جواد: ولا يهمك .. شن تحبي تشربي ؟؟
ميس: آمممم نسكافي صادة لو سمحت :)
جواد: اوكي ..
أشرت ع القرسون وجاني ( لو سمحت نسكافي صادة ) شبحتلها ( تاكلي كيكة ؟؟ )
ميس: آمم ههه مافيش مشكلة :)
جواد: اوكي .. وتنين كيكة :)
القرسون: آي نوع تفضلو !!
ميس:مارس كيك :)
جواد: آوكي زيها :)
رغم آني مانفضلش الحلو ولا نعرف نوع الكيكة يللي طلباته كيف .. بس يلا من باب المجاملة ههه
تلفت لقيتها مبتسمة بس ابتسامة خوف .. عجيبة .. قمت قهوتي وشربت شويا ورديته ..
جواد: ميس !
كانت متلفتة لجيهة النافذة الكبيرة يللي في الكافي .. كلها مرش ..
ميس: نعم ؟
جواد: جبتيني هنا لموضوع ؟؟
ميس: ءءء ايه صح
جواد: شن موضوعك ؟؟
ميس: الايام هادي ياجواد مش قادرة نرقد ولا نرتاح في نهاري .. مضايقة .. والشي يللي مضايقني هدا الموضوع
جواد: ان شا الله خير
( تفضلو :) )
حطت القرسون مق النسكافي .. وصواني الكيكة .. ومشي
جواد: آها
ميس: ايه .. بوي فتحلي موضوع الزواج
جواد: آها :\
ميس: نقصد اني نتزوجك ع شان ورد وزين
جواد: شوفي ميس قبل ماتكملي كلامك .. حاب نقولك كلمتين ولازم تفهميهم مزبوط تمام !!
ميس: اكيد تفضل
جواد: فكرة انك تتزوجيني باش تكوني مربية لصغاري .. انسيها .. انا نبيك تفكري في موضوع زواجي منك بطريقة تانية الطف .. يعني فكري انك ح تكوني زودة جواد وتاخدي حقك كــ زوجة مني .. قبل لتكوني حاضنة لصغاري .. مانبيكش تكوني ضحية .. يعني تفكري تربي الصغار قبل ماتفكري في نفسك
ميس: بس انا ....
جواد: لحظة .. لو عندك موضوع في بالك متوقف ع رفضي للفكرة .. ماعندكش مشكلة انا ح نساعدك ونرفض
ميس: بس انا ياجواد :(
جواد: آها .. تفضلي !!
ميس: موافقة عليك .. موافقة نتزوجك
جواد: مافهمتش ؟؟
ميس: آآآه انا موافقة نتزوجك .. مش لسبب تاني .. لاني فعلا راغبة في الزواج منك
جواد: كيف !! .. يعني مش استعطاف في صغاري ؟؟... يعني مش ع خاطر صغاري ؟؟
ميس: لا ابدا
جواد: انتي متأكدة !!
ميس: ايه
جواد: زيدي فكري ميس
ميس: فكرت هلباااا .. وقلت لازم نخبرك ومانتأخر عليك
جواد: :\
ميس: ماتستغربش .. انا بنتزوجك لانك جواد .. مش لانك راجل اختي يللي توفت الله يرحمها .. ومش لان صغار اختي باش مايقعدوش تحت رحمة وحدة برانية عليهم :)
جواد: لحظة بس ميس .. لازم الكلام اهوا يكون طالع من قلبك .. مانبيكش تخبي عليا رفضك باش مانحسش بتأنيب ضمير .. انتي هكي تعذبي في روحك
ميس: جواد .. انت ماتبيش نتزوجو ؟؟
جواد: لا مش هكي .. انا مانبيش نظلمك .. مانبيكش تكذبي عليا في موضوع اهوا
ميس: خلاص اطمن .. انا موافقة من قلبي .. بس ع شرط :)
جواد: آها .. تفضلي :\
ميس: مانبيش لا عرس ولا دوشة ولا شي .. نبي فاتحة ونروح معاك وبس
جواد: لو كنتي فعلا موافقة عليا لكوني جواد زي ماقلتي راهو درتي عرس زي ماتحبي
ميس: لا مش هكي فكرت انا .. مانبيش الناس يستحلو لحمي ويحكو عليا ويقولو فرحت يللي ماتت اختها باش تتزوج جواد يللي كنت بنت تحلم بيه:)
كان استغرابي مسيطر ع كل تفكيري .. حطيت ع جبيني وقعدت نحرك فيها يمين يسار .. مش مستوعب يللي قاعد نسمع فيه .. معقولة ميس موافقة تتزوجني ؟؟.. انا قبل مانجيها كنت مستعد لآي صدمة تواجهني منها .. الا انها تقولي موافقة !! .. هادي يللي مش مستعدلها بتاتاً .. تنهدت بالقوة .. كان خاطري نرتاح بعد التنهيدة هادي .. ومعاش نحس بتأنيب ضمير اتجاهها .. لانها موافقة عليا من قلبها .. شبحتلها .. لقيتها منسجمة تاكل في الكيكة .. هل فعلا هي مازالت طفلة وتفكيرها مازال مانضج ؟؟.. هل فعلا ح تكون مش قد كلامها؟؟.. هل عفويتها خلتها تقول كلام مش راضية عليه ؟؟.. 25 سنة تقريبا كافي انها تفكر صح .. معاش عرفت شن نرد عليها ؟؟.. شفت تليفوني لقيتها الساعة 3:00 ..
جواد: آوووووف نسيت الصغار
ميس: هههههههه .. برالهم اجري وراك تنسى فكر في اللي قلتلك عليه :)
جواد: ان شا الله .. نستاذن
انتفضت نجري للسيارة .. ابتسامتها حرقتني من الداخل .. كلامها زاد وترني .. طوول الطريق وانا نفكر .. صدمتني .. قطع افكاري يللي اداخلت في بعضها .. رنة تليفوني وكانت ( الابلة مها )
جواد: السلام عليكم .. سامحيني ياابلة انا جاي في الطريق صارللي موضوع اخرني بس
مها: ولا يهمك استاذ جواد .. انا مازلت معاها بنتك
جواد: بارك الله فيك .. 10 دقايق ونكون عندها
مها: اوكي في الانتظار .. سلام
آآآآآه .. ان شا الله تتصل بيا ميس وتقوللي ( انسى يللي قلتهولك كنت غايبة ع الوعي ) .. صعب صعب .. بعد وفاة ايناس نتزوج اختها ؟؟.. انا مش قادر نتخايلها .. كيف هيا قدرت توافق ؟؟.. طلع قلب الانثى اقوى من قلب الرجل .. والا الظروف يللي خلتها تقوي قلبها ؟؟..
( بيب .. بيب )
ورد: بابا جي
نزلت من السيارة .. وعطيت التحية للابلة مها يللي عمري ماننسى وقفتها مع بنتي .. خديت منها الشنطة وحطيتها في الكوفينو ..
جواد: شكرا .. سامحينا ع التأخير
مها: ولا يهمك استاذ
جواد: ءءء تفضلي نوصلك لفم حوشكم :)
مها: والله ادير فيا خير .. عارف ظهر والشوارع خالية الحق تخووف
جواد: ههه اوكي تفضلي
ورد: هيييي ابلة مها بتروح معاي :)
جواد: ههههه
ركبت الابلة مها .. وانا كملت طريقي ..
جواد: عفوا وين حوشكم بالزبط ؟
مها: كمل في الطويل .. لنهاية الطريق خود يسارك تلقى باب حوش لونه اسود هدا لينا :)
جواد: تمام
ورد: ابلة مها روحي معانا للحوش ديرلنا غدانا ؟؟
انا سكتت .. مش حنقول حرف لان معاها حق .. كل مانروح بيهم من المدرسة نتأخر عليهم قريب ساعتين باش نواتيلهم صفرة
مها: هههههه آهو بابا تو يديرلكم غدي قنين
جواد: ياابلة والله قد مانديرللهم مش عاجبهم
ورد: مش زي ماكلة مامي :(
جواد: الله غالب
مها: في شن خاطرك انتي ياورد تاكلي غداك ؟؟
ورد: خاطري في محشي <3
مها: ههههه خلاص غدوا غداكم عليا .. تمام !!
جواد: قوليلها شكرا هي
ورد: شكرا ياابلة بارك الله فيك :)
مها: ههههه سلمها ياربي .. آهو استاذ جواد الحوش
جواد: تمام .. تفضلي
نزلت الابلة مها .. وشفت لورد طوول
جواد: معقولة تقوليلها روحي طيبلها مش عيب يللي درتيه ؟؟
ورد: آآه يابابا كل مانروحو لين ياخدني النوم باش نتغدا .. نجوووع هلبا والله خاطري في محشي وانت ماتعرفش اديره :(
جواد: الصبر -_-
خطمت ع قهوة وخديت منها تلاتة باكوات بيتزا .. وعصير فرش فراولة زي مايحبو الصغار وروحنا .. هما ياكلو وانا مش قادر نحط لقمة في فمي .. لان تفكيري في كلام ميس سكر نيتي .. لعند رن التليفون

#Dudu