الحضن الدافي

Part 8

#الحضن_الدافي

الحلقة :: 8 ::

دادا: بنيتي .. تبي نقرالك قصة ؟؟
ورد: باه
دادا: كان يامكان بنية عسولة زيك .. بس ادير في شطانة هلبا ..
دادا قاعدة تقرا في القصة .. وانا نعست وبدت نسمع في صوتها كأنها في بير .. يعني سكرات النوم .. خداني النوم ومعاش نعرف شن باقية القصة :(
<<<<<<<<<<<<<<<
قصي يتحدث ::
اول ماخشيت للحوش لقيت أمي تسكر في باب دار ورد وزين .. وانا قايم زين في غمري راقد ..
أمي: هاته عليك خللي نحطه في فراشه
قصي: اوكي .. ءء ورد رقدت ؟؟
أمي: ايه :)
قصي: تمام يمة انا بندوش ونرقد .. تصبحي ع خير
أمي: وانت من اهل الخير :)
تاني يوم الصبح فقت ع عياط ورد .. خيرها تبكي ع الصبح !! .. فتحت الباب تلاقيني هيا وشادة المشط وخاشة لدراها تبكي .. وعيوني مدغدشات شفت امي واقفة قدامي
قصي: خيرها تبكي هادي !!
أمي: ماعرفتش نمشطلها شعرها .. تبيه ضفرة ع الجنب وتسريحة ياوليدي والله مانقدرها
قصي: اييييح عاد .. قوللها قصي بيطلع ره
أمي: يصبرني ربي وخلاص
صليت الصبح .. وبدلت حوايجي .. وانا طالع لقيت زين كيف نايض يحك في عيونه
قصي: صباح زينو :)
زين: آبي آمشي معاك بيبااا
قصي: ايه حااااضر .. خللي نرفع الهبلة هادي ونمشو لصطيف
زين: اوووووكي <3
كملت طريقي .. خشيت للمطبخ لقيت أمي موتيتلي قهوتي .. وبعدين خشت المشفشفة ورد .. طبعا شعرها ناعم هلبا لين أمي ماقدرتش تساويهولها ... منظرها يضحك بس ماقدرتش نضحك .. خلي نفنص فيها شويا باش تخاف وماتبداش تنق وتقول شعري شعري ..
ورد: قصي
قصي: تعرفي كيف فرحت ماتكلمتنيش
ورد: تو نسكت هآآ
خدت كاشيك وكلت الزبادي يللي قدامها .. وحسيتها مضايقة .. عيونها ذابلات .. بس مانبيش نعطيها وجه
قصي: انا نراجي فيك البرا
وانا كيف نضت من الكرسي .. تعيط بصوت عالي لين قريب طحت .. شبحتلها لقيتها تبكي بجديات والدموع أنهار .. تي خيرها هادي !!؟؟ .. ياتشكي ياتبكي
قصي: خيرك !!
ورد: ماما ماديرليش هكي .. تمشطلي في شعري ومانطلعش من الحوش الا وشعري مساوي .. من لما سافرت ياقصي وانا نمشي للمدرسة وشعري مفتوح .. نبي ماما تروح انا
وجعتني البنت .. خشيت لدراها لقيت ع الشكماجة مشط .. وتوكات حمر .. خديتهم وجيتها ..
قصي: خلاص اسكتي هي .. انا خادم عند مزين قبل تو بنديرلك تسريحة ماصارتش
ورد: ههههههههه بجديات !!
قصي: توا نبي منك حاجة وحدة بس اوعديني اديريها
ورد: شن هيا !!
قصي: تسكتي بس .. شن رايك !!
ورد: باه
خديت المشط ومديت نشدمن هنا ونرخي من هنا .. زعميتها تسريحة بس مشت امورها .. درتلها توكات وضفرة غريبة الاطوار .. قصدي المهم تمشي امورها .. خشت عليا أمي يللي كانت تبدل لزين وقعدت تضحك
أمي: هدا شنو نهار حرش هههههه
فنصت فيها ..قصي: شن رايك فيها ؟؟
أمي: تهبل .. رضيتي ست ورد توا !!
قصي: لا ورد عاقلة ومش متاع مشاكل غير انتي يمة ربي يهديك هههه
أمي: حي عليكم عطلتو ره .. وين شنطتك ورد !!
ورد: تو نجيبها هي :)
قصي: هاك هاك المشط
مشت تجري ورد بتجيب شنطتها والفرحة مش سايعتها بالتسريحة .. انا في حياتي مامشطت شعري .. اليوم درتلها تسريحة ماتفهمو شي .. صح شاب وطااايش مع مرتبة الشرف .. لكن نفهم في التسريحات .. وأهم شي رسمت الضحكة في وجه ورد الملاك <3
أمي: والله مقطعتلي قلبي البنية .. مانعرفش شن صار مع اماليها لتوا :(
قصي: انا اليوم بنمشي نحوله الفلوس كان حصلت كيف .. ءءء هي جت ورد .. ماتبي شي يمة !!
ورد: ماما فاطمة ماتبي شي !!
شبحتلها انا ومستغرب في كلمتها ( ماما فاطمة ) ..
ورد: دادا امس قالتلي اعتبريني ماما لين تجي الماما :)
قصي: آها تمام ... هي سلام
طلعت انا وورد .. الي المدرسة بسلام ان شا الله ..
قصي: خيرها شنطتك منفوخة هكي !!
ورد: ءءء كتاباتي كلهم
قصي: جيل توا كتاباتكم اكبر منكم هههههه
ورد: :)
>>>>>>>>>>>>>
جواد يتحدث ::
تقريبا نسيتونا .. غيابنا طول عليكم ..
انا وايناس في معاناة متشددة .. لا عرفت نصرف باش ناكل لا عرفت نشد فلوسي شويا باش نلقى مانعالج .. سكنا عند واحد ليبي مقيم في الاردن ودار فينا الخير .. الايجار مانقدرش نخلصه .. وكل شي طبعا ع حسابي مافيش شي تكلفت بيه الدولة .. توا هكي احني قريب نسكرو سبوع في الاردن .. ايناس كانت مضايقة هلبااا من قعدتها في الشقة .. بين الناس الغرباء .. وماقدرتش تنسجم مع مرته .. لانها 24 ساعة وهيا تدوي بالخير يللي عند راجلها في الاردن وفي ليبيا .. وكيف هما يعتبرو في السفر اسهل حاجة في الحياة .. بينما احني نشوفو فيها بعيدة وصعبة .. ولان مافيش حل قلتها تصبر وتتحمل وهيا ازمة وتمر .. نراجي في قصي يديرلي حل باش ندفع تكاليف العلاج .. مابيتش نضاييقه ولا نقلقه باتصالاتي .. خليته هوا يتصل ويطمني .. أما بالنسبة لورد وزين فــ انا وايناس مش قادرين نصبرو ع فراقهم .. بس هادي الايام وماأختارت .. في العشية طلعت انا وايناس نتمشو في جردينة قريبة من حوشنا ..
ايناس: جواد امتى بنروحو قلقت :(
جواد: هانت هانت :)
ايناس: شوف شوف
تلفتت لقيت واحد مع صغاره واقفين ومرته تصور فيهم .. غمضتلها عيونها بايديا
جواد: انا جبتك هنا باش توسعي خاطرك مش تبدي تقوليلي شوف وشوف
ايناس: اشبح ورد توا شن مدايرة هيا وزين .. ماتحبش قصي هيا هههههه راهو مفددها
جواد: هههههههه صح يتبيرد عليها .. لكن والله مايخليها تحتاج حاجة نعرفهم انا
ايناس: اكيد .. حتي فاطمة ماشا الله عليها ماتقصرش
جواد: انتي معاش تفكري في شي .. وكل شي يمشي تمام اوكي :)
ايناس: اوكي .. هي خللي نروحو
جواد: نزيدو ساعة تانية
شديت في ايدها .. حسستها بالامان .. والراحة .. وفي قلبي مليون غصة وغصة .. نبيها ترتاح .. ونبيها تروح معاي ايدي في ايدها ورجلي ع رجلها .. يارب كون معانا <3
فــــات اسبـــوع ::
يللي صار معاي انه قصي بعتلي نص المبلغ .. باش قدرت نحجز لمرتي موعد للعملية .. ماكانتش مرتاحة للموضوع .. بس لازم نحسسها بالراحة مانبيهاش تخاف :(
>>>>>>>>>>>>>>>>
قصي يتحدث ::
جي يوم الاثنين .. ويللي بعده بيكون عيد ميلاد ورد .. فكرت في هدية لورد .. نشريلها بمبلة آممممم لا لا وجهها من وجه امومة بكل .. باهي شني نشريلها سيارة آييييح هيا بنت ياقصي خيرك .. باهي احسن حل نشريلها دب هيا تحب الدببة هلبااا ..نشريهولها كبير اكبر منها ويقعد ذكرى بيني وبينها .. آييييه وين تكبر تعطيه لصغارها وتقوللهم هدا عمكم قصي هههههه ويقعد يتوارث من جيل لجيل .. افكارك ياكرافت .. خلاص هكي قررت تمام ^_^
خشت عليا أمي مخلوعة
قصي: خيرك يمة شن في؟؟
أمي: ياحليلي ورد جابت استدعاء ولي أمر
قصي: شنوووووو !!؟؟؟؟
وقفت مصدوم ..
قصي: علاش استدعاء شن مدايرة ؟؟
أمي: اناوين نعرف .. نبي نمشيلهم غدوا وخلاص .. والا نقول لبوك ؟!!
قصي: لا ماتقوليلاش .. تو نرفعك انا غدوا :\
أمي: ياربي ماتطلعش مدايرة فالطة والله مانعرف نتصرف مش صغاري المشكلة
قصي: شن قولتيلها انتي !!
أمي: ماقلتلها شي .. جيت بنشوف الحل معاك
قصي: تمام تو غدوا نرفعك .. خللي نمشي لعماتي نوصلهم خبر عمي بالك يساعدوني
أمي: ان شا الله خير وخلاص
ركبت سيارتي ومشيت جري لحوش عمتي الكبيرة بالاول .. طبعا بوي وبعدين عماتي الزوز .. ولمية و سلوى واخر العنقود عمي جواد .. اول شي لعمتي لمية :(
لمية: منوووو
طقيت الباب وردت عليا .. ( انا قصي ياعمتي )
فتحتلي الباب ..
لمية: تفضل تفضل .. وين امك وبوك امالا !!
قصي: امي مع صغار عمي قعدت .. وبوي عنده سهرة مع جماعته
لمية: آمممم .. خش
خشيت وقعمزت ع الصالون ..
لمية: تشرب قهوة !!
قصي: لا صحيتي .. انا جايك في موضوع صغير وبنروح
قعمزت جنبي مخلوعة : شن في؟؟
قصي: عمي جواد محتاج فلوس لعلاج مرته
لمية: آممممم ربي يرزقه
قصي: كيف يعني ربي يرزقه !!
لمية: هههه بالله قداش عمرك !
قصي: عمتي .. فوتيه التلقيح توا وقوليلي بتساعديه والا لا !!
لمية: نساعده هوا عادي .. بس لايناس نوووو نوووو ومستحييييل
قصي: ليش !!
لمية: لان المخلوقة هادي نكرهها في الدم .. تزوجها غصبا عنا ولاه !!؟؟ خللي يحصل فيها بروحه .. كان تزوج بنت خالي المزيونة هاديكا راهو مش هكي حاله -_-
قصي: قصدي هدا مكتوب من ربي .. مرات حتي لو تزوج بنت خاله تمرض !!
لمية: قصي .. انا قلت يللي عندي وانتهينا
وقفت .. وانا فهمت .. تعتبر لزة من نوع محترم .. قمت تليفوني .. صدقت فيها أمي ..
جت بتلحقني ( خليك نعرف الطريق )
لمية: بالسلامة
طلعت وقربعت الباب .. في بالي مليووون سؤال وسؤال .. خوها وماتبيش تنقذه في ازمته هادي لسبب قديم وفات عليه الفايت .. ومات .. وردمنااااه .. ممكن ردمه عمي وبوي بس .. بس عماتي مسكرين روسهم عليها .. المشكلة بنت خاله ماتزوجت لتوا .. يتمنو ايناس تموت وياخدوهاله ... وجهي لعمتي سلوى بالك نلقى في قلبها الرحمة بخوها والا شوية عاطفة .. مش معهود عليها .. طقيت الباب وانا ندعي ان شا الله ماتردنيش زي عمتي لمية بس :(
سلوى: خش قصي
قصي: ءءءء شكلك مش فاضية !!
سلوى: عندي زبونات في المزين .. عادي عادي انت اهم منهم
حكيتلها كل يللي صار .. بس واضح من شكلها مش متقبلة الموضوع
سلوى: والله ياوليد خوي مامعاي قرش الحق .. ونتحشم من عمك الهادي ماسد دارللي المزين بنزيد نقولها اعطيني فلوس باش تتعالج مرت خوي :( .. صعبة والله
قصي: آها
سلوى: ماتزعلش مني .. كان خاطري نساعدكم بس الله غالب :(
قصي: اوكي تصبحي ع خير
طلعت من حوشها مقهوور .. كان بإمكانها تبيع المزين ومعداته باش تساعد خوها .. هدا كان عندها رغبة لو 1% تساعده .. بس الباين الفكرة ماخشتش دماغها .. ح نخليكم ياعماتي للوقت يعلمكم .. ح نخلي الايام تندمكم ع كل شي درتوه .. روحت للحوش وأجر اذيال الخيبة .. تلقتني أمي .. والله ماعارف شن قالت وشن تقول .. خشيت لداري سكرت الباب والضي ورقدت .. نخلي الصبح يتحكم بللي يصير :(
تاني يوم الصبح .. نضت بدلت وركبت سيارتي نراجي في ورد كالعادة .. طلعت هيا وأمي .. مضايقة وفي عيونها حسرة وحزن ودمعة :(
وصلنا ع المدرسة وهيا خايفة .. من ردة فعلنا .. لحد الان ماقلنالها شي ولا درنالها شي نبو نفهمو من المديرة .. خشينا واستقبلتنا المديرة بكل صدر رحب وقعمزتنا بتهليل وتسهيل ..
المديرة: شرفتو ونورتو المدرسة .. انتي أم ورد !!ا
أمي: لا نا مرت عمها .. وهدا ولدي .. الحق اماليها مسافرين وقاعدة معانا
المديرة: آها
خليت المديرة تتعرف ع تفاصيل حياة ورد معانا .. وانا نجول بعيوني ع اللوحات .. من ضمن هاللوحات لقيت اسم ورد ع وحدة منهم .. وقفت وقعدت نتفرج عليها عبارة عن أم وأب ولد وبنت .. يعني راسمة عيلتها وع كل شخص كاتبة فوقها الاسم ( ماما .. بابا .. ورد .. زين ) ..
المديرة: هادي ورد راسمتها ..ولهدا السبب جبتكم
وليت قعمزت ع الكرسي ..
قصي: شن السبب !!
المديرة: في حاجة صايرة لماليها !!
قصي: كيف يعني مافهمتش ؟؟
المديرة: للاسف ورد طلعت .....

#Dudu