الحضن الدافي

Part 36

#الحضن_الدافي

الحلقة :: 36 ::

.. يااارب كون في عوني <3
قصي مش ناسيلك كذبتك عليا وجاي يوم بنراجع معاك كل الحسابات :(
>>>>>>>>>>>>>>>>
رفعني قصي للمة البنات في حوش ندى صاحبتي .. لقيت 4 بنات جايين قبلي .. قعمزت ع طرف الصالون في الاخير وكنت لابسة بلوزة كمها دانتيل حاير لونها ابيض فيها وردة صغيرة ع الجنب مخيطة خياطة لونها بنفسجي .. لبست معاها قونة بنفسجي مع صندلي ابيض وخليت شعري مفتوح وضفرت خصلاتي القداميات وشديتهم من التالي بتوكة كحلة
في البداية كان جونا حلو وهدرزة وضحك .. بالشويا بالشويا بدينا نتعمقو في تفاصيل بعض
رؤى: حي عليا يابنات ماكلمتش احمد اليوم :(
جوري: ومن احمد هذا يارؤى ؟؟
رؤى: هدا حبيبي التاني ههههههه
جوري: مش كنتي تكلمي في حاتم والا مش عارفة شن اسمه؟؟؟
رؤى: هداكا طلع يضحك عليا ومش متاع زواج اصلا
جوري: ههههههه ع اساس هدا متاع زواج هههههههه
رؤى: طبعا ياحبيبتي .. بدخ وناس مستريحة امتى مايبي يخطب يهب طووول مش زي هداكا عبيط ويلف يمين ويسار وبعدين اصلا حالتهم المادية بكل صعب يتزوج العامين الجايات
جوري: وانتي تبيت تزوجي قصدك !!
رؤى: طبعاااا ماما وبابا بيعطوني
جوري: وقرايتك ؟؟!!!
رؤى: حبيبتي تزوجي وارتاحي الشهادة غير شقاء زااااايد
رؤى كانت تتكلم بثقة كبيرة ومافيش قدها .. عمرها 16 السنة وتفكر في الزواج !! .. ولا مش هكي مصاحبة اكتر من واحد ..ممكن يكون النصيب عند واحد منهم .. أما جوري فكانت نابغة وتحب القراية وقدام عيونها النظارات ..ومااعتقدش تفكر في الزواج لين يوصل عمرها 30 ممكن !! .. وبين جوري ورؤى كانت ميسم مقعمزةوشادة تليفونها ممكن تقلب في صفحات الفيس لانها مدمنة انترنت .. وكانت ع يساري زميلتي في نفس الفصل واسمها حنين ويقولولها نونة <3 لانها دلوعة هلبااا ومن عيلة مرتاحة ماديا وديما في الجديد وبطرحاتها واناقتها يللي فاقت الحدود ..
( رؤى لابسة بلوزة مشماشية ربع كم مع سروال جينز ازرق وقايمة شعرها ذيل حصان وكان طوله لكتفها .. عيونها ع البني وشعرها كذلك .. سمرا شوي بس حليوة <3 )
( جوري لابسة قفطان بسيط لونها بيج وفي وردات صغيرات ع الاحمر ولابسة كارونة لونها حمرا وفيها وردة ع الجنب .. عيونها عسليات وشعرها قصدلي وبيضا والنظارات زايدينها سماحة )
( ندى لابسة شورت تحت الركبة لونه سماوي ولابسة تيشرت ربع كم لونه ابيض وعليه ميكي ومدايرة شعرها ظفرة وطوله لنص ظهرها .. نقشها نقش هنود وعندها نقرة زين ع اليمين صديقتي الحبوبة <3 )
( حنين لابسة شورت برمودا تحت الركبة بشوي لونه اسود ولابسة معاه بلوزة كاروهات ابيض واسود وفاتحة شعرها يللي كانت قصته من التالي قصير وخصلاتها يللي قدام طوال ومدايراته ع الجنب كله ..عيونها خضر وشعرها عسلي ناعم وبيضا .. هادي دلوعة شلتنا <3 )
تعرفت عليهم عن طريق ندى صح صحبتنا مش قوية .. بس ندى ماتصاحب الشينات خُلُقاً ..
حنين: يابنات لو نجحتو شن طلبتو تكون هديتكم !!
ندى: ايه صح نحنا شهادة اعدادية ولازم ماتكون هدية عليها القيمة
رؤى: بالنسبة ليا بيجوني تلات هدايا ههههههه
جوري: وحدة من حاتم وحدة من احمد ووحدة من بابا ** تعلق ع رؤى **
رؤى: عينك .. وحدة من ماما وبابا والتانية من خوي يللي يقرا البرا والتالتة من حبيبي ونور عيني حمودي
حنين: مملة انتي الصراحة ** مع نظرات كلها قرف **
رؤى: ماقالك حد عيشي يللي انا عايشاته والله
ندى: هييي خلاص وانتم ديما زي الفار والقطوس آوووووف
حنين: قصدك توم وجيري -_-
ندى: يللي هوا .. جوري شن طلبتي هديتك ؟؟
جوري: طلبت نمشي للمكتبة نشري روايات وقصص وكتب طبعا
حنين: قراية .. قراية .. قراية .. ماتمليييييش ** مع نفخات ملل **
جوري: وانتي شن هديتك ياست الحسن والجمال ؟؟
حنين: بابي بيسفرني باريس عاصمة الاناقة والجمال طبعااا ** وتلعب بخصلات شعرها بكل دلع **
جوري: وانتي ياندى؟؟
ندى: ههههههههههه بيضمو عليا الحوش طبعا هههههههههه
ضحكنا كلنا .. احلام ندى كانت ابسط من البساطة نفسها .. كل حلمها ترتاح من قضية الحوش بس.. ارتبكت لما وجهولي السؤال .. والوان وجهي تخلطت .. ومع نظراتهم زادت وترتني
ندى: حبيباتي هادي ماتفكروش فيها .. عندها ولد عم تطلب لبن العصفور يجيبهولها
رؤى: مافيش ولاد عم هكي -_-
ندى: طيح سعدك ماتعرفيش قصي هدا علاش !!
جوري: من قصي ؟؟
ندى: ولد عمها يللي قاعدة عندهم ورد وخوها .. لما مشيتلها ماخلا ماجاب وحط
جوري: معقولة ؟؟؟
ندى: معقووولين .. تصدقو كامل والكمال لله
رؤى: حلو !!!!!
ندى: طبعاااا.. يقول للقمر انزل وانا ناخد مكانك
كانو يتكلمو ع ولد عمي .. ندى توصف فيه بالتفصيل وانا ساكتة وماعطيتني فرصة نتكلم ونحكي بلساني
حنين: بالمختصر المفيد شن هديتك طلبتيها ياورد من ولد عمك ؟؟
ورد: انا .. ** كنت نبلع في ريقي بين كلمة وكلمة ** .. ماطلبت شي
حنين: انتي عطيتينا كلمات متقاطعة واحني يللي نرتبو ؟؟؟
جوري: نونة بالشويا عليها البنية مش واخدة علينا مازال
ندى: احكيلهم ياهبلة شن طلبتي من ولد عمك !!
نخصتني ع جنبي .. معاش قدرت نهرب من الموضوع
جوري: ياودي ماتحكيلناش .. قوليلنا بس بوك وين علاش ولد عمك يللي مهتم بكل شي ليك !!
ندى: بوها مسافر قداش ليه
حنين: الله !! .. وين مسافر ؟؟
كنت نشبح لكل وحدة فيهم كانت كل نظراتهم جريئة ومالاحظوش ارتباكي ..
ورد: مسافر لــ..... مسافر للكويت .. ايه الكويت
حنين: الكويت !! .. شن يدير غادي ؟؟
ندى: آوووووف نونة اسئلتك هلباااا .. هدية ورد احسن مني ومنكم كلكم
حنين: مااعتقدش
ندى: لا اعتقدي .. لان ورد محور اهتمام الكل .. عمها ومرت عمها وولاد عمها الزوز وخوها وخالتها يللي في ايطاليا وجدها وحناها .. وماغير عاد بوها يللي قريب يروح ان شا الله .. يعني بالمختصر دلوعة العيلة كلها
حنين: بس علاش مرتبكة وماتبيش تحكي ؟؟ .. خايفة ع روحك من العين؟
ندى: ايه اكيد .. قلتلك انا ولد عمها بين يديها .. يراجي فيها تكبر وبيتزوجها ههههه
رؤى: آووووف قريب نحسدك عليه :(
ندى فتحت الآيباد وماداته للبنات ..
ندى: شوفو صورته .. وموتو بالقهرة هههههههه
شفت ملامح البنات كلهم كانو متفاجآت وعيونهم عليا وع صورة حسيت بيهم يقارنو بينا .. بنظراتهم هادي حسيت بالغيرة فكيت منهم الآيباد وكنت فعلا مضايقة وقرنت حواجبي
ورد: زودتيها ندى .. سكريه وغيري الموضوع
حسيتها خافت من نظرتها ليا خدت الآيباد مني وسكراته .. لحظة صمت سادت بين الكل .. وكسرت هالصمت رؤى وين قالت ( عندك خوت !! )
ورد: عندي زين بس
رؤى: اكبر منك !!
ورد: لا اصغر مني :)
رؤى: الله !! .. سعدودك
ابتسمت .. رديت عليها بنفس سؤالها ( وانتي عندك خوت ؟؟ )
رؤى: عندي اتنين اكبر بيشيبووووني .. واحد يشد والتاني يرخي
ورد: كيف !!
رؤى: مدايرين عليا توكة .. كل مانغلط واحد ياخد مني تليفوني قريب نمووووت منهم
ندى: طبعا ياورد رؤى نقطة ضعفها تليفونها والشركات يللي وراها
رؤى: كخخخخخ بايخة
ابتسمت وشبحت لجوري ونفس السؤال
جوري: عندي واحد اكبر مني وتنين اصغر مني .. زوز ولاد وبنت
ورد: البنت اصغر منك !!
جوري: لا اختي جيهان اكبر مني وخوتي عبدو وعاصم اصغر مني
رؤى: والله حتى انتي مرتاحة تصدقي !!
جوري: هههههه اختي جيهان يللي مريحتني وجاية ع مزاجي الباقي ديما بعراكنا ومشاكلنا
ورد: وانتي حنين !!
حنين: انا اصغر وحدة .. وعندي خو واحد كبير ويقرا البرا .. وعند اختي متزوجة وعايشة في تركيا واخت اكبر مني بسنتين وزي الفار والقطوس انا وياها
ندى فكت التليفون من ميسم وحذفاته ع طرف الصالون من جيهة اليمين
ميسم: خيرنا عاد !!
ندى: يكون عندك علم 10 مواضيع تنفتح وتتسكر وانتي وكأنك مش معانا ... فهميني علاش متعبة روحك وجاية !!
ميسم: شن تبو هآآ تكلمنا
ندى: ورد كانت تتعرف ع قروبي ياحبيبة
ميسم: اسمي ميسم وعمري 15 السنة اكتر شي نحبه هوا النت والنت والنت ونكره حاجة اسمها قراية و....
ندى خبطتها ع راسها بالخفيف : كانت تسأل فيهم ع افراد عيلتهم !
ميسم: آآآآه تمام .. انا اكبر وحدة وعندي معاذ ومراد ومهاب اصغر مني
ورد: آها تشرفنا
ميسم: خلاص رديلي التليفون :(
ندى: لا مافيش .. لحظة بس بنشوف الباب
ناضت ندى وطلعت من الجلسة وانا قعدت بيناتهم
رؤى: قوليلي ورد قداش عمره ولد عمك !!
ورد: الله اعلم
واطيت عيوني نبيها تفهم وتغير الموضوع بس هيا استمرت وخدت مني كل المعلومات
رؤى: قصدك عايشة فوق منهم !!
حنين: آوووووف يارؤى انتي واسئلتك الغبية يعني شن بتستفيدي الولد يبيها هيا سوا خديتي معلومات والا لا مش ح تحصليه ياروحي انتي افهمي عليا
رؤى: وانتي شن دخلك ياستي !!
حنين: مملة -_-
ميسم: ورد مديلي تليفوني :(
ورد: بس حلفتني ندى مانشداش
نقزت رؤى ع التليفون وهربت بيه وقعدو رؤى وميسم يجرو ورا بعض .. وانا وحنين وجوري نضحكو .. بعد ربع ساعة تقريبا خشت ندى وفتحت باب الصالة ع وسعه .. وخشو خواتها الزوز وحدة شايلة في ايدها تورتة والتانية صفرة عصير .. وبعدين مشت ندى تجري وجابت شمعات وولاعة
رؤى: عيد ميلاد مني الليلة !!
ندى: اسكتي تو تحجي
ولعت الشمعات وطفت اختها الضي وسكرت الباب وقعدو يغنو
[ Happy birth day to you ]
ندى: طفي شمعاتك حبيبتي :)
طفيت الشمعات لان لقيت عيونها عليا .. وهما مبتسمات معاها .. خواتها ولعو الضي وطلعو
وانا نحاول نترجم حركاتهم في بالي .. وبخو عليا كلهم بخاخ ثلجي .. مدتلي ندى صندوق هدية وانا مازلت مش مستوعبة
رؤى: خلاص ياهبلة فكيها دراما اليوم عيد ميلادك
فتحت عيوني ع كبرهم ووقفت مصدومة .. ع طول تغمرت ندى ودمعاتي نزلو .. بعدتني عليها شويا وقالت ( بطول عمرك حبيبتي <3 )
ورد: شكرا شكرا شكرا بجد ندو .. مانقدرش نوصفلك فرحتي بالموقف يللي درتيه ربي يخليك ليا ان شا الله <3
جوري: واحني يللي مخططين معاها !!
تلفتلها وبوستها بوستين لانها كانت واقفة جنبي
ورد: شكرا جوري ربي يوفقك وتنجحي الاولة ع المدرسة كلها
جوري: حي احلا أمنية سمعتها ربي يوفقك حتي انتي :)
حنين مدتلي هدية مع بوستين وقالتلي ( هادو هديتين هدية بأني تعرفت ع احلا بنوتة كيوت وناعمة زيني والتانية لان عيد ميلادك .. بطول عمرك ياألبي <3 )
خديت منها الهدية وابتسمتلها .. : شكرا نونة ياأرقى بنية شفتها في حياتي <3
ميسم: هيييي .. هيييي .. واحني شني ان شا الله !!
ضحكت وتغمرتها مع بوستين : بس لو تسيبي تليفونك نتعرف عليك اكتر :)
ميسم: هههههه هادي هديتي 
خديت منها الكيسة .. وجتني رؤى عيدت عليا ومدتلي الكيسة
رؤى: كان تعطيني ولد عمك معاد نبي منك حاجة ههههههه
ضربتها ع كتفها بالخفيف : خزي عليك
رؤى: هههههههه
لقيتهم كلهم حواليا .. ابتسمت بصدق وصفاء من القلب
ورد: بجد فرحتوني ياأحلا صحبات تعرفت عليهم .. بجد بجد انا تشرفت بمعرفتكم كلكم .. ونبي نشكر ندى بزيادة لانها عرفتني عليكم .. وربي يخليكم ليا ان شا الله .. آآآه .. قداش ليا معاش فرحت هكي .. بجد مشكوراااات وربي يحفظكم ونقعدو صحبات العمر كله <3 <3
رؤى: وانتهى خطاب الرئيس هههههههههه
ضحكنا كلنا عليها .. حطيت الهدايا ع جنب وكيف قعمزت ع كرسي .. وقفو كلهم مع بعض وكل وحدة طلعت من تحت الصالون بخاخ ثلجي وبدو يبخو فيا وانا نهرب منهم وهما يلحقو فيا .. بعد قريب نص ساعة واحني نلعبو .. قالت ندى ( يااااسر ياعيلات هيا ناكلو جعت راني )
قعمزنا وقصت ندى التورتة ومدتلنا ورؤى وزعت العصير .. وكلينا وكنا فرحانات .. وخاصة انا الفرحة مش سايعتني <3 .. وجابولنا العشاء .. تعشينا والضحكات تعلا وتعلا .. وميسم مامستش تليفونها لين رنو عليها وروحت .. وكل مرة وحدة يرنو عليها وتروح .. الا انا قعدت مع ندى .
ورد: بجديات فرحتيني ندو حبيبتي .. بس نبي نحاسبك ع موضوع
ندى: ايه ايه عارفة ع موضوع قصي ولاه !!
ورد: طبعا .. كيف تجبدي الموضوع بالطريقة هادي !!
خبطتني ع كتفي : ماتعقديش الامور وااااضح كل شي
ورد: شن هوا الواضح فهميني !!
ندى: قصي يحبك <3
ورد: ايه يحبني لاني زي اخته ياهبلة
ندى: امهئه
ورد: شن معناها ضحكتك هادي !!!
ندى: بالله عليك بالله عليك .. بالعقل الاهتمام هدا كله بتلقاه اخته !!
ورد: ايه لانه ماعنداش اخت هدا علاش هكي يعاملني
ندى: لا طبعا
ورد: شن هوا يللي لا بس فهميني ؟؟!!
ندى: انا عندي خوت وعمرهم وحياتهم ماسايروني هكي
ورد: آووووف خلاص اسكتي
وتلفتت القدام .. شدت ايدي بايد اليمين والايد اليسار لفتتلي راسي ليها
ندى: حطي عينك في عيني
ورد: هآآآ
ندى: تحبيه صح !!
ارتبكت ونزلت عيوني ع طول
ندى: هآآ ريتي تحبيه انتي :)
ورد: ايه نحبه لانه زي خوي
ندى: بس سؤال بس
ورد: هآآ
ندى: تحبي زين زي ماتحبي قصي !!
ورد: ايه طبعا
ندى: ياودي انا لو ولد عمي هكي والله مانخليه يضيع بين ايديا
ورد: بس هوا خاطب .. خاااااطب .. وزيادة خالتوووو
ندى: مش قلتيلي مرة انه بين قصي وخالتك مشاكل !!
ورد: وااااك ندمتيني اني حكيتلك
ندى: المهم توا سيوره قصي بيفسخ الخطبة من خالتك
ورد: مايهمنيش
ندى: براحتك
تلفتت ندى القدام .. وهيا تحاول تشد ضحكتها
ورد: اضحكي اضحكي فاهمة عليك
انفلقت ضحك لين دموعها نزلو .. بس ماعرفتش السبب .. وانا تفكيري طول هداكا الوقت ماشي جاي .. لين رن تليفون ماما فاطمة كان عندي .. الاسم ( ميس ) .. شبحت لندى وقلتلها ( هدرزنا عليها آهي تتصل )
ندى: مش قلتي مسافرة !!؟؟
تفكرت انها مسافرة .. ومن لما سافرت معاش كلمتنا .. شكلها رجعت من سفرتها
ندى: ردي عليها ياهبلة خيرك سارحة !!
قمت تليفوني ورديت ( آلو خالتو )

#Dudu