الحضن الدافي

Part 26

#الحضن_الدافي

الحلقة :: 26 ::

سجلت رقمي .. وطلعت لشغلي .. وهكي سكرت موضوع الهدية لورد بطريقة ح تحبها ومش ح تعرف سرها :)
روحت ورد فرحانة وتحكيلي شن قالتلها الابلة مها وكنت فرحان لفرحتها .. وبنفس الوقت كانت تسأل فيا ( كيف عرفت الابلة مها ان هديتي انكسرت ؟؟ ) .. بس كنت نجاوبها بابتسامة خلفها الحب يكمن .. كبرت ورد وكان عمرها 12 السنة .. وكل ماتكبر تحلو اكثر .. بس كانت عندها مشاكل هلبااا مع نفسها .. كانت ديما خايفة من اللي حواليها .. ماتوثق في حد .. ح نحكيلكم قبلها بسنة شن صار ؟؟
جنى الصديقة الوحيدة لورد .. بوها كان تاجر كبير .. وكانت هيا بنته المدللة والصغيرة .. قرر انه يسافر وينضمن حياته في الخارج .. ويستقر غادي .. طبعا بنتي ورد تأثرت هلباا بغياب صديقتها الغالية جنى .. وقعدت فترة بنتي محبوسة في دارها تبكي كل يوم وتقوللي ( وين كنت صغيرة ماما خلتني .. وتوا صاحبتي سافرت وخلتني .. بابا انا كرهت حياتي ) .. وكلمة كرهت حياتي .. مازالت صغيرة عليها .. حاولت معاها هلبا تكون صحبات جدد بس من دون فايدة .. فاتت الايام متعبة هلبااا عليا وعليها .. ممكن عليا اكثر نحاول نكون امها واختها وصديقتها وبوها في نفس الوقت .. تعبت نفسيا .. مشكلتها بنتي يللي يوقف معاها حتى لو موقف واحد تتعلق بيه .. وتكون وفية ليه حتي بعد الغياب .. كنت نعطي فيها ايميلي باش تواصل مع جنى .. مازالت صغيرة ع عالم النت ومانبيهاش تخشله الا وأنا معاها نعلمها .. كنت بعيد هلبااا ع العالم الخارجي .. يعني نشتغل ونروح باش نوفر لصغاري الحياة يللي يبوها .. معاش تواصلت مع اصحابي الا ع الهاتف .. وخوي وصغاره معاش ركزت هلباا ع اخبارهم .. بس تقريبا قصي يجهز لعرسه .. عمي ع مرور سنتين معاملته هيا هيا .. حتي فهمته ومشيت بنصالخه كان اسلوبه جاف معاي .. خلونا نرجعو لورد صغيرتي .. كبرت والعذاب في جرتها .. كل مانقوللها تعرفي ع بنت جديدة تقولي ( يابابا مافيش حد يحبني .. كلهم يكرهوني مايبيني حد :( )
كانت عقدتها ( يكرهوني ) .. يعني ماعنداش ثقة بنفسها وبما تملك من اسلوب واخلاق تخللي الناس تحبها .. من كثر خوفها لين ضاعت الثقة .. من كثر الاوهام يللي تخطر في بالها ديما لين فقدت السعادة .. الصداقة صعبة يابنتي .. وانتي وجنى صداقة ع مر 7 سنين .. من الروضة مع بعض .. صعب تتخلصي من عقدة بعادها عليك ..
زين :) .. كبر وكان انسان غير مبالي .. ولازم مانعلمه كيف يتخلص من آي شي سلبي فيه .. عمره توا 9 سنوات .. وعكس ورد .. مكون صداقات هلبااا .. في الشارع .. في الحوش .. وجيران حتى حوش عمه .. يعني وين مايمشي يلاقي صديق .. شخصيته قوية في هادي زيني ههههه <3 .. اجتماعي .. بس غير طموح .. مايحب شي ليه علاقة بالعلم .. يعني اندف فيه ع القراية دفان .. ماكانش زي ورد مجتهدة ومتفوقة .. وديما في قائمة الاوائل .. بس كان محترف في الكورة .. ممكن بداية لاعب محترف ع المستوى العالمي .. ربي يوفقه وين مايحب .. وكل مانجبدله سيرة اخته ونقوله العب معاها سايرها .. اطلع انت وياها .. حتى لو كان صغير لازم يحمل مسؤولية الحوش معاي .. .. كان يتلاهى هلبااا .. ولما نوصيه ع شي ينساه .. بس بالشويا بالشويا ح نبدا نعتمد عليه في حاجات الحوش ..
انا ؟؟.. حالتي مايعلم بيها الا ربي .. حاليا غاب عليا خيال ايناس لاني كنت ملتهي بمواضيع زين وورد يللي ماتم .. والحمد لله ع كل حال :)
>>>>>>>>>>>>>>>>>>
حسيت باحساس ماما وقت فقدت صديقتها الغالية ورد .. بس انا ممكن ترجع صاحبتي السنة هادي او يللي بعدها .. بس صاحبة ماما مستحيل ترجع .. ولا أصلا توا ماما تقدر ترجعلي :(
في يوم من الايام مشيت لمدرستي .. قعمزت في مقعدي الاول كالعادة .. طلعت كتاباتي ونراجي في استاذ الرياضيات يخش .. كانت زميلة ديما تقعمز جنبي بس في الاستراحة تمشي لصديقاتها .. جتني الزميلة واسمها ( ندى ) .. قعمزت جنبي وطلعت كتاباتها وشبحتلي .. وابتسمت
ندى: صباح الخير
ورد: صباح النور :)
ندى: تعرفي اليوم يوم شني ؟؟
ورد: يوم شني ؟؟
ندى: يوم الأم <3
وين قالتها غم قلبي .. وحسيت بغيمة سودة عليا انا بس في الفصل كله .. ونزلت مني دمعات خفيفة .. ممكن تعودت حتى العين ع دموعي .. ردت شبحتلي ندى من جديد وعلامات الاستغراب ع وجهها
ندى: خيرك ؟؟
ورد: انا ماما توفت ليها سنين .. من كنت صغيرة :(
ندى: آآآه .. انا اسفة مش قصدي
ورد: لا عادي .. ( تلفتت القدام لقيت الاستاذ جاي فرحت لانه بيطلعني من الاسئلة المعتادة كيف ماتت ؟؟.. ومع من عايشة توا ؟.. وقداش عمرك لما امك ماتت ؟؟ )
ورد: الاستاذ جاي :)
ندى: آها :\
بعد تم الدوام .. طلعت للساحة بنراجي زين لين يكمل دوامه في المدرسة يللي جنبي .. شفت البنات كل وحدة شادة فلوسها وتعد .. هل تسدها حق هدية لامها اليوم ؟.. والا بتزيد تاخد من بوها شوي ؟؟ .. أما أنا جمعت كل دعواتي ليها .. ودعيتلك ياماما .. دعيت نكون معاك في الجنة مع حبيبنا محمد صلى الله عليه وسلم ..
( هيااا انا كملت بسرعة -_- )
قمت راسي لقيت زين واقف عليا .. ابتسمت وشديت في ايده وروحنا للحوش ع رجلينا .. كبرنا وبابا بدي يعتمد علينا .. نروحو بروحنا .. ونقعدو في الحوش بروحنا .. وكان جعنا ناكلو بروحنا .. كنت نحاول نكون الأم لزين .. وبقدر المستطاع نساعده في حل واجباته .. ونعوضه ع فقدان الأم .. انا لما كنت بعمره نحس بنفس الشي .. بس الفرق انا شفت ماما قدام عيوني تموت وماقدرتش نديرللها شي .. بس هوا للآن كان يعتقد ان ماما سافرت .. مافتحش سيرة ماما بكل لان مش فاهم معنى الأم .. مش فاهم معنى #حضن_الأم .. فاهم الحنان والأمان كله عند البابا .. وصلنا قدام باب الحوش لقينا ولدعمي قصي :\
زين مشاله يجري .. وحتى انا نفس الشي .. قصي يعنيلي شي كبير .. ومستحيل نكبر عليه .. مشيت سلمت عليه
قصي: وينك يامشفشفة انتي وخوك معاش شفناك
زين: ههههههه صدق فيك يامشفشفة
ورد: مبردك انت وياه .. وين ماما فاطمة ماجتش ؟؟
قصي: لالا .. شن رايكم تروحو تتغدو عندنا؟؟
ورد: مانعرفش .. ماقلناش لبابا
زين: بابا مش ح يقول لا .. ع الاقل ناكلو حاجة مليحة اليوم شن رايك ورد ؟؟
قصي: هههههههههه ماتعرفش اطيب ورد قصدك ؟
زين: لا لكن تتعلم فينا هههههههه
ورد: خزززي مش ديما تقوللي احسن وحدة اطيب ورد ؟؟
زين: نخاف تزعلي ومايصيرش من الماكلة بكل ههههههه
قصي: هي اركبو :)
ورد: لالا مانقدرش لين بابا يجي ونعطيه علم
قصي: تو نكلمه في الطريق :)
ورد: مانيش ماشية لين تكلمه وتسمعني صوته يقول باهي :)
قصي: لا حول ولا قوة الا بالله .. وين صغيرة نعانو من بكاك وتوا من كساحة راسك
ورد: -_-
خليت قصي يتصل ببابا وانا فتحت باب الحوش وحطيت شنطتي وشنطة زين .. وليت لقصي
قصي: تمام ههههه .. هيا قالت .. راجي نفتح المايك تسمعك هآآ
فتح المايك قدامي وسمعت صوت بابا يقول ( بري انتي وخوك ياورد لحوش عمك تو نجيكم غادي تمام بنتي !! )
ورد: تمام بابا مع السلامة :)
سكر الاتصال قصي وشبحلي ..
قصي: في مازال حاجة تانية ياآنسة ورد !!
ورد: لا :) .. هي زينووو
كيف ركبو السيارة تفكرت اني قاعدة بملابس المدرسة انا وزين
ورد: راجي راجي نبدلو حوايجنا انزل زين
زين: آوووووووووووف
قصي: ماتعطلوووش هيا عاد
نزل .. وفتحت الحوش وخشينا كل واحد لداره يبدل في حوايجه .. وبما أني تحجبت لبست بلوزة لونها كريمي مع سروال عنابي .. ووشاح عنابي ولبست شنطتي الصغيرة لونها وردية مع سبيدرو االوردي وطلعت نجري .. لقيت زين وقصي في السيارة قالقين
قصي: باهي اللي شرفتي .. عمرك 12 وهكي امالا توصلي ل 20 كيف !!
زين: ديما بابا يقوللها معاش تعطلي .. تقعد لين تخلط الالوان وتقيس هادي وتنحي هادي أووووف قلقت
ورد: شن تبوني نطلع امبهدلة .. عيب عاد :)
قصي: حوش عمك هدا يامتأنقة ههههههه
ركبت السيارة ومشينا لحوش عمي .. وطووول الطريق هما يبلو ويعجنو في سيرة تأخير البنات في الطلعة .. ومن هما صغيرات يتأخرو والسبب مجهول لوقتنا الحالي ..

#Dudu