الحضن الدافي

Part 39

#الحضن_الدافي

الحلقة :: 39 ::

>>>>>>>>>>>>>>>>>
كنت نغسل في المعايين .. سمعت صوت باب الحوش انفتح .. تكلمت بصوت عالي ( هادي انتي خالتو !! )
ميس: ايه انا
خشتلي للمطبخ باستني ع خدي .. ابتسمت .. ومع الابتسامة استغراب بسيط .. عبت طاسة مية وجبدت كرسي من طاولة الاكل وقعمزت ..
ميس: عندي ليك موضوع مهم ولازم تفهميه
تلفتلها بكل سذاجة : بخصوص مني !!
ميس: يخصك انتي طبعا
رديت لمعاييني : آوكي نكمل ونهدرزو فيه
ميس: سيبي من ايدك وقعمزي ضروري نكلمك فيه توا
سيبت الماعيين ومسحت ايديا .. جبدت كرسي وقعمزت
ورد: ان شا الله خير !!
ميس: اسمعيني ورد .. كل بنت لما تكبر لازم يخش عليها شي جديد .. يعني .. زي انا وأمك وكل الأمهات في العالم
ورد: وضحيلي أكثر .. شن قصدك ؟؟
ميس: أوكي .. البنت لما تبدا صغيرة تلعب مع بامبلتها ع اساس ماما صح ولاه !!
ورد: ايه صح :\
ميس: تمام .. وكيف بتولي ماما ؟؟
ورد: :\
ميس: هههههه مازال مافهمتيني صح ولاه !!
ورد: ايه صح
ميس: يوم الخميس جايين ناس بيخطبوك .. زي ماقصي خطبني .. يعني الخطبة هادي تسمحلك تتعرفي ع شريك حياتك عن قرب وبرضا أهلك وقدام كل الناس
ورد: يخطبوني ؟؟؟
ميس: ايه .. تعرفي عليه وشوفيه ولو ماعجبكش انكنسلو الموضوع تمام !!
ورد: بس انا مانبيش
ميس: كيف حبيبتي ماتبيش ؟؟ .. قلتلك انا كل بنت حلمها تكون أم .. وانتي جاتك الفرصة تنخطبي وانتي صغيرة وتتزوجي وتكبري مع صغارك
وقفت ومشيت جيهة البلكونة المطلة ع الجنان .. لحقتني خالتو وحطت ايديها ع كتافي
ميس: انا قلتلك ماتجبريش روحك عليه .. بس لو ارتحتيله ابدي حياتك معاه .. بس لازم ورد تعرفي ان هالشخص مناسبك فعلا .. مش توافقي بس لأن أول شاب تشوفيه يتقدملك ويحبك !!
ورد: وبابا !!
ميس: بابا اصلا يللي جاب الموضوع .. هوا قال لعمك وقصي .. وبوك موافق عليه بس الراي الأول والأخير ليك انتي .. شوفيه وبعدين اعطينا رايك
ورد: بس مانبيش نتزوج انا .. نبي نقعد مع زينو لين يكبر
ميس: زينو كلنا معاه .. وبعدين حبيبتي مش السنة الجاية بتتزوجي انتي .. مازاااال العمر قدامك .. وانتي توا 16 السنة صغنطوطة قاعدة ... هوا الولد شاريك
ورد: بيجوني وبابا مش جنبي !!
ميس: حبيبتي معاش تفكري في الموضوع من الجيهة هادي .. فكري بروحك توا .. قعمزي مع روحك وشوفي شن المواصفات يللي تبيها في شريك حياتك .. وبابا أول مايتم الموضوع ع خير نرفعك تزوريه تمام !!
تلفتت ليها وحضنتها .. ( تمام ) قلتلها بهمس وبعدم ثقة بللي يصير .. يعني معقولة بيخطبو بنية في تالتة اعدادي !! .. انا اصلا مانعرفش انطييب .. نتوكل ع ربي ماداما بابا موافق هوا أدرى بمصلحتي <3 <3
بعدتعن حضنها وسألتها بكل شفافية : شن اسمه !!؟؟
ميس: آآممم تقريبا غسان
ورد: آها .. خالتو تسمحيلي نروح اليوم لحوشنا ؟؟
ميس: ايه اكيد حبيبتي ح نوصلك للحوش العشية ان شا الله
ماكنتش مقتنعة اقتناع تام بالموضوع .. في الليل فتحت لاب توب قصي لقيت ندى متصلة .. خشيتلها ع الشات ممكن تفيدني بشي وتريحني :(
ورد>> السلام عليكم
ندى>> حي ورد .. وعليكم السلام .. وين كنتي غاطسة ؟
ورد>> كنت في حوش جدو
ندى>> استاحشتك يافرخة
ورد>> انا اكتر
ندى>> راجي نتصل بيك فيديو
ورد>> آوكي
اتصلت بيا فيديو .. كنت لابسة بيجامتي الوردية وعليها تويتي الأصفر .. وقايمة شعري كعكة <3
ندى: شن في !! .. شكلك مضايقة ؟؟
ورد: ايه .. يوم الخميس جايين ناس بيخطبوني
ندى: الخميس .. قصدك بعد غدوا !!!!؟؟؟؟
ورد: ايه بعد غدوا .. مضايقة ياندى مش عارفة شن بندير ؟؟
ندى: تي يراجو لين النتيجة تطلع باش تبدا الفرحة فرحتين هههههههه
ورد: تتسهوكي ؟؟
ندى: آسفة .. بس استغربت
ورد: حتى انا زيك ويللي قاهرني قصي وعمي ودادا موافقين ولا كأن شي غريب بيصير
ندى: وخالتك !!
ورد: خالتو مادابيها تتفكى مني باش قصي يقعدلها
ندى: علاش قبل وين بيمشي هالقصي يللي مهبلكم ومهبلني معاكم ؟؟!
ورد: آآآآآخ الايام يللي فاتو صارت حاجات خليها في سرك
ندى: شن صار احكي !!
وحكيتلها يللي صار بالتفصيل الممل .. وكانت تتألم لوجعي .. وبعدين سكتت وبدت دموعي تنزل
ندى: خلاص وردتي معاش تبكي
ورد: قهرتني ياندى .. ضربتني وهزبتني بسبب اوهام ادور في راسها ماليهاش اساس
ندى: آهو جي بيخطبك يللي احسن من قصي بمليون مرة
ورد: لالا مافيش من احسن منه .. قصي صعب نلقى شخص يحافظ عليا زي ماهوا حافظ عليا .. مستحيل في شاب زيه في هالدنيا كلها
ندى: سألتك قبل مرة وتوا بنرد نسألك .. ونتمنى تجاوبيني بصراحة لان جوابك هوا يللي بيحسم قرارك يوم الخميس
ورد: شنو !!
ندى: تحبيه قصي انتي ؟؟
سكتت .. وسرحت شويا .. تعرفو وين مشيت ؟؟ .. مشيت ليوم دفينة ماما .. لما لقاني نبكي وشادة صورة ماما في حضني .. تغمرني ودموعي مسحتهم في لبسته .. وكتبنا رسايلنا لأغلى الناس عندنا .. مشيت ليوم لقطتنا صدقات مع بعض وحطيناها في الجامع ودعينا لماما .. مشيت ليوم نبكي لقاني في الحديقة سكتني ورضاني بمشية للملاهي .. وودعنا طيف ماما غادي .. مشيت ليوم رفعنا للبحر ولعبنا بالرملة وكانت ابتسامته تعتبر الشمس يللي تشرق عليا كل صبح .. مشيت ليوم عرفت بابا محبوس ورقدوني في المشفى وقعد معاي لين نعست وخداني النوم .. والصبح فتحت عيوني لقيته .. مشيت ليوم بعت العابي لصحباتي .. مشيت ليوم بيانه وين قاللي ( انا ح نقعد نحبك وبنتزوج خالتك يللي تحبك ونجيبو صغار يحبوك اكتر واكتر ومستحيل تقعدي بروحك .. كل ماتبيني تلقيني ) .. مشيت ليوم جتني صاحبتي كيف ماقصر معاي بشي .. تردد كلماته ع وذني كل مانشوفه :::
** دموعك معاش نبي نشوفهم .. انتي ياورد ضحكتك تسوا الدنيا ومافيها **
** وين الدنيا كلها توقف ضدك انا معاك **
** نتمنى ياوردتي تقعدي ببرائتك وطهارتك وعفويتك عمرك كله وماتوسخك الدنيا بشي **
** وردتي أحلا بنية .. تسمع الكلام .. وماتكذبش .. وتمشي ع الطريق الصح **
** انا برايي تلبسي الحجاب يزيدك نور ع نور .. كبرتي وليتي حلوة ..والحاجة الغالية ديما تتغطى **
** اصلا عارفك شاطرة وبتجيبها الاولة ع المدرسة .. تو ع خاطر جبتي 0\12 تبكي !! **
** أنا اقرب الناس عندي .. انتي .. تعرفي علاش !! .. لان لما نحكيلك ع حاجة تفسيرها بحسن نية لانك ملاك <3 **
** طيبة قلبك .. حسن خلقك .. اسلوبك .. ضحكتك .. هيا يللي تخللي الناس كلها تدمنك مش العيون الزرق ولا الشعر الاصفر يلفتو النظر .. المضمون خير من المنظور **
** انتي كبرتي .. والكبير ديما يتصرف بعقله .. معاش تضربي زين ..لا .. فهميه واعيه باش يكون رفيقك العمر كله ومايجافيك **
** هنا الشباب هكي .. تقدري تقولي تافهين .. لما نفكرو ننسو موضوع نلجؤ للدخان .. بس لما سمعتك كيف تدعي لربي .. استحقرت روحي **
** لا انتي شينة مش حلوة .. بس لما تشبحيلي وعيونك يلمعو .. نضعف ونلبيلك طلباتك ههههههه .. ياستي انتي حلوة معاش تشبحيلي هكي **
ضحكت .. وين اذكرت هالموقف .. أول ماكبرت ديما نحس في روحي شينة وكل البنات احلا مني .. قصي كان يساير فيا ..
ندى: هبلة وحق ربي .. نكلم فيك ليا ساعة ع شني تضحكي ؟؟
ورد: ايه نحبه <3
انصدمت ندى وقعدت تشبحلي والصدمة واضحة في عيونها
ندى: شن قلتي !!
ورد: ايه والله نحبه .. سكري ندى نحس في روحي تاعبة وبنرقد
ندى: أوكي :\
سكرت اللاب توب وخشيت لفراشي .. رقدت وحلمت بأسعد حلم حلمته في حياتي <3
جي يوم الخميس .. نضت مع الساعة 9:00 .. ضميت الشقة وبعدين دوشت .. وجبت المشط وقعمزت نمشط في شعري .. سمعت صوت رجالة البرا .. استغربت قمت ستارة الروشن الكبير .. وبان عليا حبيبي والغالي ع قلبي .. انسان ليا سنين وسنين ماشفتااش .. قام عيونه فوق وابتسملي
(( بابا <3 <3 ))
بصوت عالي .. ونزلت نجري .. الدروج ماحسيتش بطوله ..
>>>>>>>>>>>>>>>>
قصي يتحدث ::
لما سمعت الدوشة البرا .. وسمعت عيطة ورد بكلمة ( بابا ) .. هزني قلبي وقال ان عمي البرا يراجي في استقبالي .. طلعت من الصالة .. بوي فتح باب الحوش لاستقبال أعز شخص عندي <3 .. تلفتت وراي نلقى ورد تهب بشعرها القصدلي الناعم الطويل .. ولابسة بلوزة سماوية وسروال جينز .. تجري في الهواء من كثر شوقها لبوها .. هبت ريح سرعتها قدامي .. حضنت بوها بقوة .. ودموع وضحكات تخلطت المشاعر في لحظتها .. كانت صورة ورد قدامي أشبه بالملاك <3 .. ابتسمت .. مرت قدامي كل لحظاتها الطفولية معاي <3
>>>>>>>>>>>>>>>>
حضنته بابا ولفيت بيه في مكانه .. #حضن_دافي .. حضن غاب وطال غيابه واليوم مرده ليا <3 .. شديته بقوة .. تمنيت نوصل لضلوعه ومعاش نبي نطلع منهم ...
>>>>>>>>>>>>
قصي يتحدث ::
أثر فيا الحضن .. دموعي نزلت بلا رادة .. اقشعر جسدي من المنظر المحزن والمفرح في نفس الوقت ,, مانعرفش كيف ح يكون حضني ليه ؟ .. ولا نعرف كيف كانت ردة فعلي لسماع صوته ؟؟ .. عمي <3 ,,انسان غاب عليا .. جي في وقته المناسب <3
>>>>>>>>>>>
بكيت ع كتفه .. ومانقدر نوصف شعوري لحظتها .. حروفي وكلماتي ماتكفيش :( .. بابا حبيبي رجعلي اخيرآآ
قلتها بصوووت عالي وانا في حضنه ( بابا رجعلي حبيبي وأخيرآآآ <3 )
ضحك بصوت عالي معاي واستمر في معانقتي .. بعدين نزلني شوي ومسحلي دموعي
بابا: من اليوم يابنتي معاش نبي نشوفهم دموعك خلاص رجعلتك ومش ح نغيب عليك في الجديد
ورد: فرحتني بجد يابابا .. والله استاحشتك ومانقدرش نوصف فرحتي بيك اليوم !!
بابا: عارف يابنتي .. انا فرحاااان اكتر منك
ورد: رجعتلي الحمد لله ياااارب <3
بابا: ومش ح نغيب ولا ح نبعد ياروح البابا انتي <3
حضني في الجديد .. بعدين انتبه لوقفة قصي قريب منا
قصي: الحمد لله ع سلامتك ياعمي
بابا: الله يسلمك قصي
شبحلي وابتسم .. رديت نفس الابتسامة وغصت في حضنه ومانبي حد يفيقني ويقوللي حلم .. ابدا رجوع بابا حقيقة
ورد: حقيقة والحمد لله <3
ابتسم قصي لكلمتي وشبح لبابا
بابا: هههههه وين زينو امالا !!
فتحت عيوني ع وسعهم وين اذكرت زين .. لفيت بعيوني يمين ويسار مالقيتاش .. بس وين رديت راسي ع اليمين كانت في مرآية للمدخل .. وشفت وجهي الفرحان .. وشفت شعري بلا حجاب .. لطمت خدي ع الخفيف ورخيت يد بابا وركبت نجري .. وان شا الله قصي ماركزش بس :(
>>>>>>>>>>>>>>>>>>>>>>>
جواد يتحدث ::
مانعرفش شن يللي خلا ورد تركب ممكن خبرت زين بعودتي ليهم .. لان بعدها ب 10 دقايق نزل زين وشبحلي .. نظرات لوم وعتاب .. فتحت ايديا وسمحتله يجي لحضني لاني مستاحشه موووت .. ليا فوق 5 سنين ماشفتاش غير صورة .. بس قرن حواجبه عليا وكشّر .. عطاني بظهره ورجع ركب وخلاني فاتح ايديا ليه .. حسيت بايد انحطت ع كتفي
قصي: اعطيه وقته تو يتفاهم الوضع بالشويا مازال صغير ماتلومش عليه
جواد: آها .. امالا وين بوك !!
قصي: طلع برا لوليد صاحبك .. تفضل للصالة
خشينا مع بعض للصالة .. اتكىت ع الكرسي وتنهدت بكل راحة
قصي: احكيلي كيف قدرت تطلع !!
جواد: الموضوع تبسط ع يد وليد صاحبي
قصي: كيف صار ؟؟
عدلت تقعميزتي وشبحتله : كشفو الحقيقة والمجرم الحقيقي يللي مفروض يتحاسب بدلي .. يللي هوا مختار زميلي في الشركة زوّر توقيعاتي ع شيكات ومستندات كله باش يطلعني من الشركة ويوصل لمأربه ويكون المدير العام .. هونا خليتهاله واسعة وعريضة
قصي: تخليت عن شغلك يعني ؟؟
جواد: حتى بعد ماطلعت الحقيقة مستحيل نرجع نخدم فيها .. نظرات الموظفين معاي تحطم نفسيتي
قصي: بس المفروض تمشي وراسك فوووق بعد ماعرفو مختار ع حقيقته
جواد: صعب .. صعب نتقبل المدير يللي أهانني وطردني وتزويره لكلامه هوا يللي وصلني هالمواصيل .. وخلاني نبعد ع صغاري طول هالسنين .. مافي شي ياقصي يعوضني ولا يعوض صغاري السنين يللي غبتها .. فــ صفحة الماضي كلها طويتها وفضلت نعيش واقع جديد بعيد عن الماضي المرعب والمتأزم .. وبعدين نبي نعوض ورد وزين مهما كلفني الموضوع .. من اليوم حياتي ليهم وبس <3
قصي: آها تمام .. نفهم انك رافض موضوع غسان صح ولاه !!
جواد: لا طبعا .. صاحبي وليد جميله كبير عليا وخوه عاجباته بنتي مانقدرش نرده .. و خللي يجو ونتعرفو وبعدين ساااهل .. كلم بوك يدخله وليد خللي نضيفووه

#Dudu