الحضن الدافي

Part 31

#الحضن_الدافي

الحلقة :: 31 ::

جواد يتحدث ::
( ورد يابنتي مانقدرش نوصفلك حجم احتياجي ليك .. ولا نقدر نوصف شوقي ليك انتي وخوك .. ربي مايحرمني منكم .. انتم خليتوني نحب الحياة بعد ماكرهتها في غياب امكم .. بنتي ورد نتمنى تسامحيني الذنب مش ذنبي والله .. كل الامور تمشي عكس ماكنت راسمها .. بس باذن الله ح يتصلح كل شي ونرجع ونحققو العيشة يللي كلنا نتمنوها .. وح نخلصك من العذاب قريبا ان شا الله .. يابنتي ماتيأسيش .. الفرج من عند ربي قريب .. ممكن قعدتي في الحبس علمتني هلبا حاجات .. ونبهتني ع هلبا حاجات .. ورد يابنتي انتي الكبيرة ومسلمك مسؤولية خوك زين .. ربي يحميكم .. ونعيش لين نحقق كل ماتبوه مع بعض .. ربي يوفقك ويعينك يابنتي .)
تنهدت وحمدت ربي ع كل حال .. ح يجي يوم ونرتاح من همومك ياقلبي .. اتكيت ع فراشي .. وغمضت عيوني نحاول نرقد .. صوته قطع نوبة نعاسي ..
راشد: شني اليوم رايق وجوك متغير ؟؟
عدلت تقعميزتي : ايه الحمد لله .. بعد سنة كاملة غياب شفت بنتي :)
راشد: ايه وشن اخبارها؟؟
جواد: الحمد لله .. بس البنت فاقدتني هلباااا وغيابي أثر فيها
راشد: مكان الاب صعب يتعوض .. فكرتني بصغاري .. قداش ليا مستاحش لمتنا مع بعض والضحك والهدرزة .. تصدق ندمت ع كل يوم بعدته عليهم .. وندمت ع كل لحظة عصبت عليهم :(
طبطبت ع كتفه .. وابتسمتله : ح ترجع اللمة .. وترجع الضحكة ع وجه كل شخص مضايق ..خللي ايمانك بالله قوي ياخوي :)
راشد: وين بالله ؟؟.. حكموعليا بالاعدام ياجواد .. يعني ايامي معدودة
جواد: بالاعدااااااااااااااام !!!!!!
راشد: ايه ايه .. ماقلتلكش مانبيش نزيد نضايقك .. ان شا الله انت بتطلع وعندك أمل كبييير تطلع .. اما انا مستحييييييييل نطلع حتي يوم بس
جواد: انا لله وانا اليه راجعون :(
>>>>>>>>>>>>>>>>>>>
قصي يتحدث ::
حركات ميس غريبة ومخوفتني .. معقولة تفكر تخونني لان تأخرت في العرس !! .. ليها اسبوع مافتحتليش موضوع عمي !! .. كنت مقعمز في الجنان وحاط ايدي ع خد ونفكر.. لين قطع عليا صوت التليفون .. نغمة مصطفى ..
قصي: آها بوصطيف
مصطفى: تي وين !!
قصي: مقعمز في الجنان ..شن تبي !!
مصطفى: جايك في موضوع
قصي: تعالا .. افتح الباب وخش
مصطفى: تمام .. 5 دقايق بس
زي ما قال وصل في الموعد المحدد .. فتح الباب بالشويا وخطف عيونه وين لقاني مقعمز ع الجلسة الخاريجية .. خش بالشويا وأشرللي ( مافي حد ) .. هزيت راسي بالنفي .. وقعمز في الكرسي يللي مقابلني .. حط تليفونه وتنهد
قصي: خير !!
مصطفى: انا طحت في حفرة ومايقدر حد يطلعني منها ياقصي
قصي: شن في !!
مصطفى قدم راسه وحط عيونه لوطة وبعدين شبحلي : خنت مرام
انصدمت وقفت : كيف كيف !!
مصطفى شبحلي: قعمز ياراجل ونفهمك
قصي: قول قول
مصطفى: الفترة الاخيرة حاس روحي مش طايق مرام .. بدت هلبااا تتمشكل معاي ع موضوع العرس والزواج .. وتعرف انت الدوة قديمة .. وكل مانكلمها في لسانها غير انت مقصر معاي وانت ماتحبنيش وانت ماتبيش تتزوجني وفي بالك وحدة غيرك وبلا بلا بلا بلا .. تعبتني ياقصي .. بديت نمل منها ونقصت مكالماتي معاها .. وبديت نتهرب منها لما تقوللي تعالا نبي نشوفك .. معاش البنت يللي كنت نتمناها
قصي: هدا كله بسببي يامصطفى .. ليش قاعد تستنى فيا ؟؟.. المفروض تزوجت وخلاص
مصطفى: آآآآآخ ياقصي .. انت مالكش علاقة بالموضوع .. هيا هيا تنق هلباااا
قصي: ايه وبعدين شن صار !!؟؟
مصطفى: هداك اليوم مشيت لــ.............
( قصي ماما فاطمة تبيك )
تلفتت لقيت زين واقف .. شبحت لمصطفى لقيته يشبح لزين ومبتسم
قصي: قوللها تو نجي هي
شبحلي مصطفى: تعرف بيطلع طررررررف ولاه !! يموتو فيه البنات كلهم ههههههه
قصي: هههههههههه عنده مستقبل صار
مصطفى: مستقبل اقوى مني ومنك .. تي انا كان شبحتلي بنت قريب نمشي نسالها شن فيا عاجبك ههههههههه
قصي: ههههههههه طالع لولد عمه .. تي بالله انت لمن بتطلع !!
مصطفى: لا ع اساس .. الاخ الواثق من جمالوو .. خليني ساكت خير مانحكي قصة خولة هههه
قصي: انت حيوااااااااان مانسيتاش الموضوع بكل .. فاتت عليه سنين وسنين وقاعد داسه
مصطفى: طبعااا .. تبيني نذكرك فيها هههههههههههه
زين: احكيهالي يابو صطيف
قصي: تو مش قلتلك قول لامي جاي !!
زين: قلتلها وجيت سمعت مصطفى بيحكي قصة خولة ههههههه
مصطفى: هدا ولد عمك يللي تشوف فيه راهو كان قبل ....
قطعت عليه قبل مايقول الكارتة : ضم فمك يافرخ وخللي السر المكنون بيني وبينك
مصطفى: تي غير خليني نحكي للولد يتعلم ههههههههههه
قصي: اوووووس خلاااااااص
زين: هيا يامصطفى احكيلي
قصي: زين برا لامي امشييييي
مصطفى: بلا عار ياقصي شن فيها كان حكيناها ؟؟
قصي: آووووووف .. أمي شرينتلي خللي نشوفها .. مصطفى ماتقولش اوكي !
هز راسه مصطفى بالايجاب
ومشيت لأمي .. اعطتني ليستا طلبات .. خديتها وحطيتها في جيبي .. وخشيت لداري بدلت تيشرتي وطلعت لقيت ورد واقفة قدام دارها .. جيت وقفت عليها
قصي: تبي حاجة !!
ورد: ايه في الورقة تلقاه :)
خديت الورقة وحطيتها في جيبي .. وابتسمت ومشيت خطوات بسيطة
ورد: ءءء قصي .. شكرا هلباااا
قصي: هههههه معاش تشكري خوك ياهبلة
ورد: :)
طلعت للجنان لقيت زين ومصطفى صايخين بالضحك وهادي علامة ان زين عرف كل شي ع موضوعي انا وخولة .. قرنت حواجبي وتلفتت لمصطفى ( هي هوينا بنطلع انا ره )
زين: بتمشي لخولة هههههههههههههههه
قصي: زيييييييييييين >_<
زين: ههههههههههه
مصطفى شد فمه بايده وقال: هي نتلاقو ياخوخة ههههههه
قصي: تااااافه عارفك
زين: قصي ترفعني معاك !!
قصي: ايه بشررررط
زين: آووووف شنو !!
قصي: معاش ت ج ي ب س ي ر ة خ و ل ة .. شن قلت !!
زين: باهي بااااااهي
طبست ع مستواه وقلت : تؤتؤتؤ .. مش هكي كلام الشطااار .. الشااااطر يقووول حااااااااضر
زين: تبي اذلني يعني ع خاطر طلعة !!
وقفت وحذفت مفتاحي فوق وتلقيته وقلتله : آوكي براحتك .. ماتبي شي !!
زين: خلاااص خلاااص
وشدني من ايدي ويهز فيا .. تلفتله ونفخت: آووووف شني يازين !!
زين: حاضر معاش نجيب سيرتها
قصي: شااااطر .. هي تعالا معاي
مشي معاي .. وركبنا السيارة وبعدين تلفتلي : هي تزوجت !!
قصي: من هيا ؟؟
زين: خولة :)
قصي: زييييييييييييييين شن قلناااااااااااا!!!!!!1
زين: هههههههه خلاص سكتت
حط ايده ع فمه وكاتم ضحكته .. كملت طريقي وكل ماينحي ايده نفص فيه يردها .. لين وصلنا للمحل خدينا يللي نبوه .. وخشيت المكتبة جبت لورد يللي تبيه .. وين بنركب للسيارة تلفتت .. حسيت روحي لمحت ميس .. لكن لما شفت السيارة زبطت انها مش هيا .. ركبت قاللي زين( مني !! )
قصي: حسيت روحي تلمحت وحدة نعرفها بس طلعت مش هيا
زين: آآآآآآه عرفتها
قصي: والله ومني ياصقر ؟؟
زين: خوووووووووولة هههههههههههههههه
خبطته ع راسه ومازال يضحك .. قرنت حواجبي وقلتله : خلاص زين انت هكي بتولي مش راجل مالاخير
انصدم .. وشبحلي وقرب راسه جيهتي ومفنص: باهي كيف نولي راجل زيك وزي بابا !!
ضحكت ع الجنب ضحكة انتصار : لما تعطي كلمة معاش توخر فيها هادي اولاً .. تانياً ماتكذبش ع حد مهما كان السبب .. أما ثالثاً ورابعاً خليهم في وقتهم تمام !!
اسند راسه ع كرسي السيارة وتنهد: هدا كله باش نولي راجل ؟؟
قمت كتافي بمعني ( ممكن ) .. وشبحتله ومرة مرة نحول عيوني للطريق: امالا كيف ؟.. تحسابها ساهلة ؟؟
زين: باهي ويللي يسيب صغاره ومعاش يسأل عليهم ؟؟؟
انصدمت من سؤاله .. ارتبكت معاش عرفت نجاوبه
زين: خيرك سكتت ؟؟
قصي: شي
زين: قلتلك واللي مايسألش ع صغاره ؟؟
قصي: شن قصدك ؟؟
حولت عيوني من عليه باش مانخليشي يحس بدقات قلبي وارتباكي من سؤاله
زين: بابا .. آآآآه .. كنت ديما نحلم نكون زي بابا بس توا خلانا انا وورد بروحنا .. تعرف ياقصي بنقولك سر وماتقولاش لحد
فنصت عيوني خفت من اللي بيقوله ..
زين: نحس في روحي كرهته ..
قصي: لالالا شن هالكلام ** شديت ع المكابح بالقوة وشبحتله .. وبعدين كملت طريقي **
زين: باهي تقدر تجاوبني وتقوللي علاش خلانا ؟؟؟؟؟
قصي: قصة كبيرة عليك يازين
زين: سافر !!!!
وقفت ع الاشارة الحمرا .. وخديت كينكس ومسحت عرق يللي من رهبتي من سؤاله نزل ع جبيني بشكل مش طبيعي وتوتر اكثر ..
تلفت للمرش .. وعاود سؤاله مرة تانية ( بابا سافر يعني ؟؟ )
قصي: حاجة زي هكي
زين شبحلي مرة تانية : علاش ماتبيش تقوللي الحق ؟؟.. مش الراجل مايكذبش ؟؟
قصي: آووووف تو لما بوك يجي اسأله اوكي !!
زين: هدا كان جي اصلا :(
قصي: ان شا الله
تنهدت .. وحمدت يللي معاش ركز ع الموضوع .. قلبي نخصني وغمضت عيوني شويا وسرحت بخيالي شويا .. زعما عمي لما بيرجع ع يعوض غيابه الطويل عليهم ؟؟.. هل ح يقدر ينقذهم من روتيني الحالي ؟؟ .. هل يقدر يحسن صورته ليهم ؟؟.. قطع تفكيري كلاكس السيارات يللي صدعولي راسي تقول رافعين ثلج .. كملت طريقي لين وصلت للحوش .. نوضت زين بعد ماخداته نومة .. ونزلته .. بس قاللي ( قصي انا بنرقد مش قادر نمشي )
قصي: هههههه تبيني نقيمك زي الصغار ؟؟
زين: ايه
قصي: حاااااضر هههههه
قمته في غمري .. ومشيت بالشويا باش مايفيقش .. وفتحت الباب .. وطقيت ع الدار طلعتلي ورد .. استغربت
ورد: خيره زين ؟؟؟
قصي: حولي شويا راقد ماتخافيش
حولت من قدامي وقامت اليرغان من سريره ..وقالتلي : حطه هنا :)
قصي: اوكي
كيف طبست بنحطه ع سريره .. تعلق في رقبتي وقال: قصي ماتخليناش زي بابا
انقلبت ملامحي للحزينة .. وبوسته ع جبينه وقلتله: ماتخافش زينووو
حولته يديه بالشويا وغطيته .. تلفتت لقيت ورد وراي ودموعها في عيونها
وشوشتلها : ماتبكيش .. خوك تو ينوض
هزت راسها بالايجاب .. وآشرتلها تطلع وراي .. طلعنا وسكرنا الباب بالشويا
قصي: جبتلك كل شي تبيه :)
ورد: شكرا :)
قصي: قلتلك معاش تشكريني
ورد شدت في ايدي : قصي خيره زين ؟؟
قصي: ءء شي بيرقد بس
ورد: تفكر بابا ولاه ؟؟
قصي: علاش هوا كل مايتفكر بوك يرقد متلا !!
ورد: ايه
قصي: لا حول ولا قوة الا بالله .. ردي بالك تقوليله اوكي وردتي !!
ورد: مش ح نقوله .. مانبيش نوجعه زي ماتوجعت انا زمان ع ماما :(
قصي: الله يرحمها .. ءء ورد جعااااان عادي اديرللي نص !!
ورد: حاضر
قصي: يحضرلك الخير :)
قعدت مع زين اسبوع كامل .. نطلعه معاي .. نرفعه للملاهي .. حتي للقهوة رفعته .. مافيش مكان الا وهوا معاي .. خليته صديقي المقرب .. حتي مصطفى كان مرة مرة يطلع معانا .. وهكي مرت الايام بسرعة .. موضوع عمي لتوا مانحلش ..
وبوي بدي في بني الشقة فوق منا لورد وزين .. ع حسب ماقال ( ورد كبرت ولازم ماتقعد معانا .. خليها تستقر فوق وح نمرو عليها كل يوم وكل وجبة نبعتولها ) .. وانا مش مطمن للموضوع بكل ..
>>>>>>>>>>>>>>
جواد يتحدث ::
كل مامرت عليا الايام تصعب حياتي اكثر وتتعقد مشكلتي اكثر واكثر .. نمسى ونصحى ع صورتهم .. وفي بالي ايناس .. راشد حكمو عليه بالاعدام .. بعد شهرين تقريبا بينفذوه في الميدان وقدام الكل .. لانه قضيته سياسية خطيرة ولا يمكن التنازل عنها .. الايام يللي فاتو كلها تقربت منه وتعلقت بيه .. صح الظروف ماكانتش تسمح لصحبتهم ادوم سنين وسنين .. ولا كان المكان المناسب لتعارفنا .. بس الحياة توريك من يللي يبيعك ومن يشريك !! .. يللي برا باعوني ومعاد سألو عليا .. قصي غاب عليا ممكن ظروفه .. وممكن قاعد يدور ع حل لطلوعي من هنا !! .. وراشد رغم انه عارف انه موته كل يوم يتقرب اكتر واكتر الّا انه وقف معاي .. اول مانبكي نبكي ع كتفه .. واول مانضحك نضحك في وجهه .. واول مانتضايق نحكيله .. واول مانفرح يفرحلي .. أعز منه حتي البرا مالقيت .. صحابي يللي البرا كلهم هجروني .. بس مش مشكلة .. الصاحب في الشدة يبان .. آآآآآه .. ميس وينها ؟؟.. حتي هيا غيابها طوووول وطوووول عليا .. طلبت من الشرطة يعطوني تليفون ولو 5 دقايق .. وافقو بعد ماشاااط ريقي .. وهما رافعيني للغرفة شفت الساعة لقيتها 6 الفجر .. قمت تليفوني وضربت رقم ميس ..
جواد: آلووو
ميس: نعم من معاي !!
كان واضح من صوتها راقدة
جواد: انا جواد
ميس: جوااااااد !!
جواد: ايه غير بنقولك طمنيني ع صغاري بالله عليك
ميس: ءء ايه الحمد لله .. من وين تتكلم ؟؟
جواد: كيف ءءء والحمد لله .؟؟.. ميس شن في؟؟
ميس: انا قاعدة نفكرلك في حل والله
جواد: ايه واااااضح ليكم شهر عليا
ميس: باهي شن بندير مشكلتك كبيرة ره
جواد: مانبي شي غير اطمنيني ع صغاري
ميس: االحمد لله امورهم تمام امس كنت عندهم
جواد: ان شا الله خير .. هي معاش نقدر انطول سلام
ميس: سلام
آووووووووووووف .. هكي ارتحت .. بس راحة مش مكتملة حاستها تكذب عليا في نبرة في صوتها مش مريحتني .. رجعت لزنزانة وفي بالي مليوووون سؤااااااااااال .. اتكيت ع فراشي وتمنيت ياخدني النوم .. قلبت يمين يسار يمين يسار ومافيش فايدة .. شن الحل !!
>>>>>>>>>>>>>>>>>
قصي يتحدث ::
انخلعت من تليفوني يرن الفجر .. قمته لقيتها ميس .. شن تبي مني !!.. قعمزت ع سريري وحكيت عيوني وقلت : آلووو
ميس: الحقني ياقصي الحق
قصي: تي خيرك شن في؟؟؟؟؟
ميس: جواد اتصل عليا من نص ساعة فاتت ويسأل ع صغاره
قصي: ايه باه
ميس: ماقلتلاش ع موضوع الشقة
قصي: ايه باه
ميس: شن هالبروووود يللي عندك ياقصي خيرك ؟؟!!
قصي: انتي شن قلتيله ؟؟
ميس: شن بنقوله يعني .. الحمد لله حالهم وامورهم تمام
قصي: انتي كذبتي طبعا
ميس: كيف شن تبيني نقوله حالتهم نفسية زيرووو وصغار عايشين بروحهم ؟؟
قصي: لا طبعا .. لكن احسبي قداش ليك معاش زورتيهم صغار اختك ياهانم
ميس: آووووف ياقصي انت تعاتب فيا توا ؟؟
قصي: آآآه لا .. انتي متغيرة هلباااا
ميس: انا متغيرة ؟؟.. ءءء علاش شن حسيت ؟؟.. قصدي ياقصي ... انا ... مانعرفش انت علاش هكي تحس ديما ؟؟؟
قصي: خلينا من الموضوع هدا كله بديتي تعجني وتبلي .. المهممم شن صار في موضوع عمي ؟؟
ميس: انا قاعدة لتوا ماحصلتش دليل براءته
قصي: ماحصلتيش والا معاش اهتميتي بيه ؟؟؟؟؟
ميس: آوووووف ياقصي .. انت خيرك اليوم ؟؟.. تعبانة والله نبي نرقد
قصي: اسف ااااااااسف .. خلاص بنخليك براحتك يامحامية ميس
ميس: خيررررك تتكلم بالاسلوووب هدا ؟؟؟
قصي: اسمعي ميس مالاخير .. انا بندور ع محامي غيرك اوكي !!
ميس: اوكي براحتك .. سلام
سكرت عليا الخط .. مش مهم ... وااااضح من ربكتها في شي وداساته عليا .. مش مهم .. المهم موضوع عمي يللي كنسلاته من راسها بكل .. تنهدت .. وليت رقدت .. ماحسيتش بالوقت .. لما فتحت عيوني نبهتني شقشقة العصافير .. تلفت جنبي ع تليفوني لقيتها الساعة 9:00 .. انتفضت من سريري .. خشيت للحمام * حشاكم * توضيت وصليت الصبح وطلعت للكوجينا مالقيت فيها حد .. وليت لداري بدلت وخديت مفاتيحي وطلعت .. كيف فتحت باب الحوش قابلني الياس كيف مروح من الصحراء ..
الياس: صباح الخير
قصي: صباح النور
الياس ينحي في كندرته ويشبحلي : خيرك مستعجل !!
قصي: ايه والله ماحسيتش بروحي لين رن المنبه التاني تصدق
وقعدت نلبس في السبيدرو وهوا يراقب في حركاتي : حجزت وبنسافرو انا ورزان
قصي: ايه والمطلوب يعني !!
الياس: قصدي ياقصي بنقعد سنة غادي يعني مش مقرر تتزوج ؟؟!!
قصي: لالا .. هي سلامات
خديت شنطة اللابتوب وطلعت نجري .. ولعت السيارة ومشيت .. يللي يشوفني يسألني السؤال المعتاد ( امتى بتتزوج ؟؟ ) .. شفت الساعة يللي في السيارة لقيتها 10:00 .. آووووووف تأخرت هلباااا .. شويا ورن نقالي .. وكان زميلي في العمل واسمه طارق ...
قصي: جاي في الطريق والله خدتني نومة
طارق: ايه ياقصي هدا تاني اجتماع ماتحضراااااش
قصي: تي باهي ياطارق انت زابط الطريق
طارق: وانا زابطك لما تغطس في النووووم
قصي: تماااااااااااام بااي باي
اول ماوصلت العمل .. وقفت ع الريسبشن وقعت .. وكيف بنخش لمكتبي انفتح الباب بقوة تلفتت لقيت المدير واقف .. يبست في مكاني معاش عرفت نتصرف .. شبحتله .. وزمطت ريقي بخوف .. لقيت حواجبه مقرونات .. كيف تكلمت : انــا.. آس.. آسف ع تأخيري
المدير: سيد قصي هذا تاني اجتماع يفوتك
قصي: أنا كنت بنقولك بس......
قطع عليا وقعمز ع كرسي وخدي من مكتبي بيرو وبدي يحرك فيه وكله غضب .. بس حركته استفزازية اكثر .. وانا قعدت واااقف في مكاني
المدير: شن العقاب يللي خاطرك فيه ؟؟
عيوني تعلقو فيه ومعاش عرفت نرد .. لساني ارتبط .. والحروف هربت .. والكلام تبخر
المدير: انا عندي ليك عقاب آي اجتماع يصير تاني اسمك مش ح يكون من حاضرينه تمام !! .. وعاد من غير لفت نظر يللي بتحصلها .. وانت في شن خاطرك تاني ؟؟
استجمعت قواي بعد العقاب يللي سمعته بيعطيني سمعة اطيب من يللي انا عليها .. تنفست بعمق .. خديت شهيق وزفير .. وتكلمت باندفاع
قصي: انا نمر بظروف صعبة .. لو حاب نقدملك استقالتي برضاي ماعنديش مشكلة .. الطريقة يللي استعملتها انت فيها نوع من الملل وتبيني بارادتي نقدم استقالتي .. ف بنختصر عليك الوقت بعد 10 دقايق باذن الله تكون استقالتي فوق مكتبك :)
رفع كتافه شوي .. وضحك ضحكة استفزازية .. وقام حاجب ونزل حاجب : براحتك .. آمممم يلا مانعطلش عليك .. نلتقي
وقف مد ايده بيسلم .. شبحت لايده وبعدين شبحتله ورديت: سلام
طلع وسكر وراه الباب .. وانا انهديت ع الكرسي .. وتنهدت .. وين بنحصل عمل ؟؟.. تي هدا ماحصلته لين ريقي شاااااط .. لا المشكلة مش هنا .. المشكلة فيا انا .. تآخرت اكتر من مرة .. ودوامي مرات نطلع منه بكري .. ظروفي هيا يللي تحكمت فيا والله .. مسحت ع وجهي واستغفرت ربي .. وقمت تليفوني بنتصل بميس .. لقيتها انتظار .. عاودت مرة تانية ردت عليا ( اهلا حبوبي )
قصي: اهلين ميس .. شن جوك ؟؟
ميس: تمام والله الحمد لله
قصي: مع من كنتي انتظار ؟؟
ميس: مع صاحبتي ليلى <3
قصي: آها .. باهي انا انطردت من عملي
ميس: له له له علااااااش !!
قصي: السبب هوا حضرتك
ميس: كيف يعني ؟؟
قصي: لما كلمتيني الفجر قعدت نفكر شويا فيك وبعدها خدتني نومة حتي المنبه والله مافقت بيه
ميس: هههههههههه وهدا علاش طردوووك ؟؟
قصي: ابرد ماعندك اسوء ماعندك .. المهم مش اول مرة هادي نتأخر فيها
ميس: ياساتر .. قصيوة ماتشغلش بالك ح نساعدك باش نكملو الحوش تمام !!
قصي: تو تحسابيني نشكيلك نبيك تساعديني متلا !!
ميس: لا مش هكي .. بس مش انا بنكون زوجتك المستقبلية اكيد واجب عليا نساعدك
قصي: لا ياحلوة انتي .. اتصلت بيك مضايق ونبي نفضفض بس
ميس: هههههه عجبتني منك ياحلوة هادي !! .. بالله انا حلوة ؟
قصي: احلا ماشافت عيني والله
ميس: المهم لازم ادور ع عمل من توا ماضيعش وقت
قصي: وهدذا يللي بيصير .. شن عندك انتي اليوم ؟؟
ميس: انا توا في مكتبي نراجع في الاوراق ماعندي شي بعدها
قصي: تمام نتلاقو !!
ميس: كيف ؟
قصي: شن كيف ؟؟.. نبي نتلاقى معاك قداش لينا معاش تلاقينا
ميس: مش وقته قصي الجو اهوا .. فتناها مرحلة المراهقة
قصي: يعني كان نبي نتلاقى مع خطيبتي نطلع مراهق ؟؟
ميس: قصي .. بتخليني نخدم توا والا كيف ؟؟
قصي: تمام اخدمي ياميس .. سلامات
سكرت عليها الخط .. تعصبت منها لين خلاص .. شفت الساعة لقيتها 12 وربع .. كتبت ورقة استقالتي ومشيت .. طقيت الباب وخشيت لمكتب المدير .. لقيت زميلي طارق .. ابتسمتله وحطيت ورقتي ع المكتب ( هادي استقالتي .. بالاذن ) وكيف بنطلع شدني من ذراعي طارق
طارق: بتسيب شغلك ليش ؟؟
شبحت للمدير وشبحتله .. فكيت ايده بالشويا من ع ذراعي .. وطلعت
>>>>>>>>>>>>>>>>
فتحت مذكرتي البيضا ومكتوب فيها اسمي بالخط الذهبي ( ورد ) .. بابا جابهالي من الاردن .. وبديت نكتب فيها قصتي مع وفاة ماما .. وسجن بابا .. ومسؤولية زين .. سمعت صوت باب الحوش انفتح .. لبست وشاحي وطلعت .. لقيته قصي .. وكان باين ع وجهه تعبان ومرهق .. طلعت .. وقفت قدامه
ورد: الحمد لله ع السلامة
طبس ينحي في كندرته : الله يسلمك .. شني اليوم عندنا !!
ورد: ههههه قعدت بروحي قلت ننزل خير
قام عيونه فيا: امالا وين زين ؟؟
ورد: طلع مع عمي وماما فاطمة
باستغراب: شن في ؟؟
ورد: ارتفعتله الحرارة مشو بيعاينوه
قصي: والياس ورزان وين ؟؟
ورد: ممكن طلعو بيشرو حاجات للسفر
قصي: وخلوك بروحك .؟؟
ورد: ايه
قصي: آآآآه باهي شن غدانا جعاااان لين خلااااص
ورد: تقريبا مكرونة صالصة
قصي: تقدري تحطيلي ؟؟
ورد: ان شا الله
قدمت خطوات صغيرة وبعدين وليتله : قصي فيك حاجة ؟؟
قصي: حطيلي غداي وتو نحكيلك
ورد: تمام
كانت المكرونة واتية سخنتها في الميكرويف وحطيت فوقها الصالصة والجبنة .. وكاس عصير .. وكينكس .. وشوكة .. واكيد بيستحق امية وسلاطة .. وقمت الصفرة بالشويا .. رفعتهاله في الصالة .. متلوح ع الصالون وحط ايده ع عيونه .. اول مرة نشوفه بهالحالة .. حطيت الصفرة ع الطاولة وشبحتله : قصي شن في؟؟.. خوفتني ؟؟
قصي: مافي شي والله
ورد: متآكد !!
قصي: قصدي الموضوع ماليشي علاقة ببوك ابداااا
ورد: آآه ريحتني
بعدين استوعبت ان ممكن يضايق من شي يخصه هوا مش شرط يكون لحد من اسرتي .. قعمزت ع الكرسي مقابله .. وحطيت ايديا ع ركابي وسند عليهم راسي وكفوفي ع خدودي ..
ورد: مرات ترتاح لو حكيتلي شن مضايقك في الشغل ؟؟؟
قصي: ههههههه
قام كاس العصير شرب نصه
ورد: انت متوتر
قصي: شن عرفك يابنت انتي ؟
ورد: من طريقة شربك للعصير ههههه
قصي: لا عادية ماتركزيش
ورد: خالتو ميس مضايقاتك ؟؟
قصي: هئ غير نحصل وقت معاها واضايق لين تعيا كانك عليا
ورد: علاش ؟؟.. تعاركتو ؟
قصي: لالالا بعيد السو احني هكي ومانهدرزوش كيف وين نتعاركو امالا !!
ورد: باهي احكيلي !!
حط الشوكة من ايده .. وشبحلي .. بعدين رجع قامه وقاللي ( موضوع يخص الشغل )
ورد: وانت وين خشيت وعدتني تحكيلي
قصي: انا وعدتك ياورد؟
ورد: حاجة زي هكي
قصي: والله موضوع مازال كبير عليك
نضت من مكاني .. عدلت وشاحي .. وجيت بنطلع وقفني بكلامه
قصي: وين ماشية ؟؟
ورد: بنركب لشقتنا بنرقد مابين ماجي زين
قصي: وعلاش ماترقديش هنا في دارك القديمة
ورد: لا غادي اريح .. مع السلامة
طلعت من الصالون وخشيت لداري القديمة خديت مذكرتي .. وركبت للشقة .. لقيتها دافية وهادية ومريحة اكثر من لوطة .. هوى حوش عمي بدي يخنقني .. معاش مرتاحة فيه .. رغم ان عمي شايلني ع كفوف الراحة .. بس ماما فاطمة متغيرة معاي .. بدت تعامل فيا زي البرانية عليها .. كانت شقتنا عبارة عن :: اول ماتخشي من الباب ع يمينك صالون بسيط متكون من كرسي فردي وكرسي مزدوج .. وع يسارك المطبخ مكشوف فيه طاولة اكل بكرسين وثلاجة صغيرة .. وغاز صغير .. تقدمي خطوات بسيطة في داري وجنبها دار زين ومقابلهم الحمام .. وتمت الشقة ههههه
كان في الصالون روشن وااااسع وكبير مطل ع جنان حوش عمي والباب الخارجي يعني حتي الشارع نشوفه .. مغطي بستار غليط لونه بني .. والصالون ع البيج وفيه طاولة صغيرة لوح وفرشة خلفيتها ع بني وفيها دواير صغيرات بيج .. وداري ودار زين نفسها يللي في حوشنا جابوهم هنا ..
وقفت ع الروشن شويا .. تفرجت ع حركة الناس في الشارع .. وبعدين اتكيت ع كرسي وفتحت التلفزيون ع سبيستون .. وماحسيتش بروحي لين خطفني النوم عنده .. فقت ع طقة باب الشقة نحسابه زين .. حطيت وشاحي ع راسي بسرعة وقفت ورا الباب
ورد: مني !!
انا قصي افتحي
فتحت الباب بالشويا وين تاكدت منه .. فتحته كله .. استغربت من جيته
قصي: اتصلت بيا امي وقالتلي ان صاحبتك ندى جاية هنا .. حافظة رقمها ؟؟
ورد: لا مخزناته في مذكرتي
قصي: خشي جيبيها
خشيت لداري نجري .. فتحت القجر وطلعت مذكرة الملاحظات صغيرة وطلعت بيها لقصي لقيته مقعمز ع الصالون .. مديتهاله .. ضرب الرقم ..واعطاني نتكلم
ورد: الو ندى
ندى: مني ؟؟
ورد: انا ورد ياغبو
ندى: اهلا .. اسمعي انا جاياتك اوكي
ورد: تشرفينا .. تعرفي النعتة ؟؟
ندى: لالا .. في حد كبير جنبك؟
ورد: ايه ولد عمي
ندى:خلاص بنعطي لبابا يكلمه ويوصفله الطريق اوكي
ورد: تمام
سكرت السماعة بايدي وقلتله: قصي عادي تكلم بو صاحبتي تقوله ع حوشنا وين ؟
هز راسه بمعنى باهي .. مديتله التليفون وتفاهمو .. بعدها طلع قصي من الشقة .. قعدت واقفة ع الباب .. نزل درجتين بعدين تلفتلي ( في شي ناقصك ؟ )
ورد: آمممم اصلا ماعندي شي هنا ههههه
قصي: تمام ح نجيبلك شيبس وكل شي للاطفال هههههههه
ورد: قصدك انا طفلة :(
قصي: هههههه هي نتلاقو .. واستمتعي بوقتك مع الطفلة يللي جاياتك اوكي !!
ورد: شكرا قصي :)
تلفت القدام بعدين شبحلي : شن قلتلك ع كلمة شكرا اهيا !!
ورد: هههههه آسفة
قصي: هي خشي وصاحبتك تو نركبهالك لهنا اوكي !!
ورد: تمام ..شكــ,,,,,,
قصي قطع عليا: وااااااااااااك منك
ضحكت بالشويا .. وبعدين خشيت سكرت الباب .. وبخيت معطر للحوش .. وماما علمتني زمان لما يجينا الضيف نوتي الصفر باش لما يجينا مانتعبوووش الا في غسل الماعيين .. وتيت صفرة العصير ..وصفرة بنحط فيها مقات الكاكاو .. بعدين خشيت لبست قونة لونها وردي وبلوزة بيضا رقبتها مرصعة بالخرز الوردي .. وفتحت شعري ومشطته وقمت خصلاتي بفيوكة بيضا ..ولبست جرابات لون ابيض شفاف .. بخيت برفان لما جبنا ديارنا للشقة جبت معاي برفان متاع ماما .. ريحته حلوة وعمري ماشميته الا ع ماما .. عدلت لبستي وطلعت قعمزت ع الصالون نهز في رجليا نراجي في صاحبتي ندوو <3
تقريبا ربع ساعة وطق الباب .. نضت فتحت لقيته زين .. آوووف شن جابه هذا ؟؟ .. حي نسيت انه مريض
ورد: زين كيف حالك ؟؟
زين: الحمد لله .. بنخش نرقد
شديته بايديا : لالالالالا صاحبتي جاية خلينا براحتنا
زين: انا بنرقد في داري :(
ورد: انزل لوطة ارقد في دارنا الاولة
زين: آوووف ياورد مش ح نضايقكم ره
ورد: بالله عليك زينووو
ع وقفة قصي ومعاه صاحبتي ندى .. لبدت ورا الباب وقلت: تفضلي ندى
خشت ندى وهيا تشبحلي مستغربة .. قعدت نكلم في قصي من ورا الباب ..
ورد: قصي بالله عليك خود زين معاك
زين: تي بنرقد مانبيش نضايقكم والله
تكلمت ندى بالشويا: خليه يخش قاعد صغيرون
وانا نهز في راسي بمعنى لالالا
قصي: خلاص تو نرفعه معاي .. هي زينووو نمشو لمصطفى وخللي البنات شن بنديرو بيهم احنى رجالة ههههه
زين: باه -_-
بعدو من ع الباب معاش سمعت صوتهم .. عرفت انهم نزلو .. سكرت الباب وتغمرت ندى بالقوة
ورد: استاحشتك
ندى: هههههه ياهبلة اليوم سبت ليك يوم بس ماريتينيش ههههه
ورد: حتى يوم عندي تقول سنة .. غير خشي قعمزي
قعمزنا ع الصالون ..
ندى: شن رايك في لبستي ؟؟
لبستها كانت عبارة عن سروال واسع لونه اسود وبلوزة شيفون كمها ناقص لونها بيج .. ولابسة وشاح لونه اسود وكندرتها سودا وشنطتها صغيرة بيج ..
ورد: حلوة عجبتني
ندى: هادي امس خالو شراهالي هههههه
ورد: ربي يخليهولك .. ءءء نحي وشاحك بنجيبلك عصير
ندى: ماداما بروحنا خللي نعاونك
ابتسمت ونضنا مع بعض للمطبخ ..طلعت عصير من الثلاجة وصبيته .. وهيا تجول بعيونها ع الحوش .. بعدين ضحكت
تلفتلها : شن يضحك فيك ؟؟
ندى: سعدودك
ورد: ع شني ؟؟
قمت الصفرة وقلتلها تعالي نقعمزو
قعمزنا .. وخدت كاس العصير وشربت شويا وتلفتتلي : بروحك قاعدة ..والله جوووو
ورد: جووو !!!؟؟؟
ندى: ايه والله مافيش حد يقولك ديري وماديريش .. ارفعي حطي .. امشي وتعالي .. قصدي حررررررررررة حرة
ورد: انتي هكي تحبي ؟؟
ندى مدت ايديها ع الصالون : ايه والله ** بعدين رجعت ايديها وخدت كاس وشربت شويا ** تعرفي انا مش عمري 14 السنة ومش مخليني في راحتي .. نحس في الحوش كله ع راسي
ورد: هههههه بس في من معاونك ولاه !!
ندى: آمممم .. انا ياستي عندي زوز خوت كبار واحد متزوج والتاني قاعد .. وعندي تلات خوات بنتين اكبر مني وبنت صغيرونة عمرها 7 سنين
ورد: آهااااا .. ربي يخليهملك
ندى: وانتي وين خواتك ؟؟
ورد: ماعنديش .. انا عندي خو واحد بس
ندى: آها .. بس والله حياتك حلوة
وقفت وفتحت شعرها وقعدت ادووور بين المطبخ والصالون .. وانا نشبحلها ونضحك
ندى: قصدي انا مالاخير خاطري نعيش عيشتك برووووحي مافي حد يحكم فيا
كنت نشرب في العصيروشرقت .. جت تجري خبطتني شويا ع ظهري وقالتلي : صحة شن صارلك ؟؟
حطيت الكاس وشبحتلها : بس حياتي مش احلا من حياتك ياندوو
قعمزت جنبي وقعدت تشبحلي .. دمعو عيوني ع طوول
ورد: انا نتمنى حد يحكم فيا ويقوللي ديري وماديريش .. انا نتمنى حد يقوللي اقعدي ماتطلعيش .. نتمنى لمة حلوة مع عيلتي ..ونتمنى ناخد راي حد منهم في مواضيعي وقراراتي .. ونتمنى عيلتي تكون كبيرة زي عيلتك .. ياريت عندي خوات وخوت يونسوني .. الله ياندووو قداش نتمنى ماماوبابا ع راسي .. راضية والله رااااضية نقعد في الحوش عمري كله مانطلع ... مانبي شي من الدنيا غير وجودهم معاي
حطيت ايديا ع وجهي وقعدت نبكي .. قعدت ندى اطبطب عليا وعيونها فيهم الدموع .. بعدين قربتني لحضنها .. وقعدت تمسح ع ظهري ..
ندى: آسفة حبيبتي دودي .. انا والله مانقصد باهي انتي بوك وينه ؟؟
انصدمت ومعاش عرفت شن نرد عليها .. حولت من حضنها ومسحت دموعي بالقوة .. وقمت الصفرة وقلتلها: فكينا مانبيش دموووع .. خللي نحط الحليب ع النار ونديرو كاكاو
ندى: اوكي .. ءءء ورد وين الريمووت ؟؟
وانا في المطبخ عليت صوتي شويا : تلقيه ع المكتبة
ندى: اوكي
خدت ريموت وغيرت .. وحطت ع قناة مانعرفهاش .. بس تقريبا فيها مسلسل
حطيت بكرج الحليب .. وسمعت طقة باب خفيفة .. صوت قصي ( وردتي حاجاتك قدام الباب .. تبي شي كلميني اوكي )
بعد شوي فتحت الباب ولفيت عيوني قدام الباب مالقيتاش .. دخلت الاكياس وعيطت ع ندى
ورد: شوووووووووووووفي قصي شن جابلنا !!
جتني تجري وتفتش في الاكياس معاي
ندى: حي جاب شيبس يللي نحبها
ورد: ههههههه خللي نديرو الكاكاو ونحطو كل الحاجات اهيا ونهدرزوونتفرجو
ندى: تمام .. نبي نجي نعاونك بس مسلسلي بدي :(
ورد: انتي تتفرجي ع مسلسلات ؟؟
ندى: ايه
ورد: بس عيب .. للكبااااار مش لينا هادم
ندى: ههههههههههه ضحكتيني .. انا نتابع فيه مع خواتي
ورد: ههههه هبلة .. غيري ع سبيستون فكينا منهم هادم
ندى: وااااك ياورد ماتعقديش الامووور
ورد: ماتجيش ياندى .. لان .......
وقطع عليا صوت الحليب فااااااج ع الغاز
مشيت نجري ونعيط ( لالالالالا يااااربي ) .. لحقتني ندى وقعدت تضحك عليا وانا ننفخ وقريب نبكي ..
ندى: خلاص آهو نعاونك ههههههههههه زي البيبي كيف تبكي
ورد: آووووف مبردك ياندى انا وين وانتي وين :(
ندى: هاتي عليك نمسحه
ورد: آوكي
خديت درت صابون وامية ومديتلها منشفة .. وبدت هيا تمسح في الغاز وانا نغسل في الماعيين ..
ندى: ءءء ورد .. هدا مني يللي جي امبكري مع زين ؟؟
ورد: ولد عمي
ندى: خاااطب ؟؟؟
ورد: ههههههههه خالتو خطيبته
ندى: سعدودها الله
سمعتها بس حاولت نكذب وذاني : شن قلتي ؟؟!!
ندى: شي شي تو كان نقولك بتطلعي شيخة
جيت جنبها وفي ايدي ليفة الماعيين .. لبزتها ع خدها
ندى: آآآآآآه ياكلبة خززززززي
ورد: ههههههههههههه منظرك يضحك
قعدت تجري في جرتي وانا نهرب منها .. وقعدنا نضحكوو هلبااااا ..
ورد: خلاااااص وقفي دهشت
ندى: انتي البادية
وخدت صبت عليا شيشة المية كلها .. بديت نعيط .. قعدت تضحك بشكل فظيع .. معاش وقفت ع الضحك .. تعصبت وعيطت عليها ( علاااااااش هكي بليتيلي حوايجي >_< )
ندى: تستاهلي شوفي خدي لتوا صابوووون
ورد: بس شكلك يضحك هههههه
ندى: كخخخخ وانتي شكلك يضحك اكثررررر
ورد: خلاااص خلينا نقعمزو تعبت
ندى: حي .. عندكم رووشن كبير .. عادي نشوف
ورد: ايه عادي
مشيت جبت صفرة الكاكاو وحطيت شيبس وشكلاطة وكيكات وفوشار .. قعمزت ع الصالون وغيرت ع قناة سبيستون .. تلفتلها
ورد: ماتبيش تاكلي !!
ندى: المنظر من هنا مش عادي
ورد: ايه هدا قصي دارهولي
ندى: الله .. ماشا الله عليه قصي هدا ** وجت قعمزت جنبي ** تعرفي ياورد خيالي مشي بعييييد هلبااا
ورد: ايه لانك عايشة مع الكبار ههههههه
ندى: ايه صح انا خواتي كبار نحس في روحي كبرت قبل وقتي .. في تفكيري وفي الضمان وفي التطييب حتي .. تصدقي المفروض انا ماندير شي يعني عندي اكبر مني .. بس ماما هكي ماتعرفش من نوصلو الاعدادي تعلمنا كل شي
ورد: ايه ياريت ماما حية وعلمتني كل شي .. ** تنهدت وسندت ظهري ع الكنبة ** تصدقي انا كل شي تعلمته بروحي
ندى: مش كنتي مع مرت عمك؟؟
ورد: آممم .. مرت عمي ماقصرتش معاي بكل لما كنت صغيرة .. بس من لما بابا ** بعدين استوعبت شن بنقول سكتت **
ندى شبحتلي : ايه كملي .. خيرك؟؟
ورد: قصدي من لما كبرت تغيرت عليا مافهمتش علاااش ؟
ندى: خايفاااتك تخطفي ولدها منها ههههههههههه
حولت عيوني للسقف .. وتنهدت .. ياااريت جت ع الموضوع هدا كنت صارحتها بأن قصي نحبه لان حنون زي بابا .. شبحتلها لقيتها مازالت تضحك .. عدلت تقعميزتي وقلتلها: تصدقي شكلني بنمرض لو قعدت ع حوايجي المبلولات .. نمشي نبدل ونجيك اوكي !!
ندى: تمام
خشيت للدار بدلت حوايجي ..ولبست سروال رمادي ولبست بلوزتي البنفسجية وجففت شعري بالفوطة .. وقمت شعري ذيل حصان وطلعت .. لقيتها تضحك
ورد: خيرك تضحكي ياهبلة ؟؟
وقعمزت جنبها
ندى: قاعدة بيبي تتفرجي ع الرسومات هههههههههه
ورد: اسكتي اسكتي .. انتي زي ماقلتي كبرتي قبل وقتك
ندى: ايه تصدقي كبرت هلباااا .. حقااا قوليلي شن صار في واجب العلوم كتبتيه ؟؟
ورد: لا .. نجيبه نكتبوه مع بعض ؟؟
ندى: بري روحي اكتبيه بروحك اناكتبته من امس ** حطت حبة فوشار في فمها وشبحتلي ** .. شن عندك ماتصنعي لتوا ماكتبتيشي ؟؟
ورد: هلباااااااااا حاجات
ندى: آها .. تي شن هلبااا وانتي اكل ومرعى وقلة صنعة
ورد: هههههههه ياامثال ** خديت مق الكاكاو وشربته في مرة ** .. شن رايك في الكاكاو ؟؟
ندى: تو ع اساس انتي درتيه .. تي هوا بودرة في حكة سخني الحليب وحطي كاشيكين وتم
ورد: آووووف مبردك .. ماتعرفيش تجاملي
ندى: اسمعي خليني ولو شويا نحط ع المسلسل
ورد: لااااااااا .. آمممم شن رايك نلعبو بنك الحظ ؟؟
ندى: الله تعرفي تلعبيها ؟؟
ورد: يب يب
>>>>>>>>>>>>>>>>>
قصي يتحدث ::
كنت متكي وفاتح التلفزيون ومش معاه بكل .. انتبهت ان زين مش معاي .. خشيت لامي في الكوجينا
قصي: وين زين ؟؟
امي: نحسابه معاك
قصي: لالا .. مش بعيد ركب للبنات
طلعت من الكوجينا بعدين تفكرت حاجة وليتلها
قصي: ءء يمة ماتبيش تمشي للبنات فوق ؟؟
أمي: نكمل يللي في ايدي بس
قصي: شن اديري ؟؟
أمي: نوتي في عشي للبنات
قصي: آها نعاونك في حاجة ؟؟
أمي: ايه ياريت تقرضلي السلاطة بس
قصي: تمام ..نشوف زين قبل ونجي
أمي: باه ماتعطلش وقت عليهم
طلعت من الكوجينا .. وفتحت باب الحوش الخلفي مقابله دروج الدور التاني .. لقيته مقعمز ع اول درجتين من فوق .. ركبت بالشويا .. لقيته حاط مرافقه ع ركابه وخدوده سايحات ع ايديه الصغيرات .. حزين ومضايق .. جيت قعمزت جنبه .. قام عيونه فيا ورجع ع نفس وضعيته
قصي: خيرك مقعمز بروحك ؟؟
زين: يلعبو وجوهم مليح ياريتني بنت زيهم
قصي: هههههههه انت راجل خيرك عاد ؟
زين: اسمع هآآآآ كيف تضحك ورد ..صوتها واصل لنهاية الشارع
قصي: آمممم .. تو انت كل يوم تطلع معاي ونمشو لمصطفى وكل مكان وعمرها ماتكلمت وقالت ارفعوني معاكم وتوا لما جتها صاحبتها انت تبكي زي الصغار هههههه
زين: بس ورد عندي كل شي
استغربت من كلامه .. سكتت وراجيته يكمل كلامه
زين: اول مافتحت عيوني لقيتها الاخت الحنونة يللي تحبني وعمرها ماغارت مني .. ولما ماما توفت الله يرحمها هيا كانت أمي .. ولما بابا خلانا هيا كانت بوي .. انا نغاااااار من أي حد يكون قريب منها.. بس عمري ماح نغار منها .. آوووووف منها ندى
قصي: هههههههه نوض نوض بلا دراما خللي نمشو نعاونو أمي في عشي البنات
زين: آووووووووووف