الحضن الدافي

Part 29

#الحضن_الدافي

الحلقة :: 29 ::

قصي تأثر .. ودمعته في عينه .. وواضح من صوته ع وشك البكاء ( حاضر ياعمي )
رجعت لفراشي .. وبدت دموعي تنزل كأنها مطر غزير .. حرقت خدي .. جاني راشد وطبطب ع كتفي بهدوء ( وسع بالك ياخوي .. مش هكي تنحل .. قوي روحك وخلي ايمانك بالله قوي )
مسحت دموعي بقوة .. وتلفتت لقيتها يشوفلي بحزن النظرة يللي نكره حد يشبحلي بيها .. بعدت ايده من ع كتفي ووقفت بتعصب ( مافيا شي خليني في حالي )
بس اأصر راشد وقعمز ع فراشي .. وسحبني من ايدي وقعمزت .. قمت عيوني فووق .. نحاول مانزلش دمعة قدامه ..
راشد: شن يللي صار جديد !!
جواد: آآآه .. لان ماصار شي جديد انا بكيت
راشد: آها .. مافيش اخبار ع اتبات برائتك ؟؟
جواد: مش عارف
راشد: آها .. صار شي لبنتك ؟؟
جواد: مش عارف
راشد: شن يللي عرفته من زيارة قريبك ؟؟
جواد: ولا حاجة .. بس احساسي يقول في شي .. حسيت من ربكة قصي .. في حاجة صدقني ياراشد في حاجة دسوها عليا .. ان شا الله غير مش في بنتي بس آآآآخ
>>>>>>>>>>>>>>>>>>>>
قصي يتحدث ::
ايه في بنتك ياعمي .. قبل الزيارة بساعتين .. كنت مقعمز انا وأمي في الكوجينا .. كيف كملنا غدانا ونضت نغسل في ايدي .. وأمي اضم في الماعيين .. سألتني ( ماصار شي في موضوع عمك ؟؟ )
قصي: لا والله .. ميس امس كلمتها قالتلي قاعدة نحقق مع كل الاطراف وان شا الله اسبوع او اقل تكمل هالقضية ع خير .. وربك يستر
أمي: ان شا الله .. يااااسرنا خللي الواحد يفرح شويا ونفرحو بيكم انتم الزوز
تلفتلها .. ( مش وقته هدا )
أمي: امالا امتى وقته .. ترا قوووول !! .. عمك هدا مايجيش وراه غير المشاكل .. ورطتنا معاه في هالبنت والولد يللي معاد عرفت كيف نتصرف معاهم .. كبرو وطلباتهم كبرت معاهم
قصي: خيرك يمة هكي تقولي ؟؟؟
أمي: خلااااص فديت ياولدي .. كل مانبي نفرح بيك عمك ينط ويعفس فينا .. فهمني بس بالك يبيها ميس !!
قصي: شن هالكلام يايمة .. تو كان يبيها بيخش ع خاطرها للحبس وينحرم من شوفة صغاره ؟؟
أمي: آآآآآآآه وخلااااص .. حتى زي بوووك .. مافيش من واقف معاي انا
قصي: غير فهميني بس .. في شن تبيني نوقف معاك يمة ؟؟
أمي: بنزوجك .. انا نبي نفرح بيك بالك تبيني نراجي 15 السنة لين عمك يشرف ويطلع من الحبس
قصي: قلتلك قالت ميس لو اعترف واحد من الاطراف بس ح يطلع خلال الاسبوع الجاي .. علاش تفاولي ب 15 السنة !!؟؟؟
أمي: آووووووف .. هوا ينحبس ويمرمدنا معاه .. جوااااااد مش ح يطلع من الحبس .. المشكلة يللي هوا فيها كبيرررة والفلوووس يللي خنبهم رقم كبير .. تبيها بالساهل يطلع منها .. خيرك انت !!
فجأة سمعت صوت مرش تكسر قدام باب الكوجينا .. فزعت وطلعت نجري .. لقيت ورد مغمي عليها وطايح منها الوشاح .. وشعرها ممدود جنبها وع خدها دمعة .. وكانت رافعة صفرة طواسي المية وطاحت منها وانكسرت .. ممكن من هول ماسمعت .. أمي طلعت وراي .. عيطت .. وجت رزان معاها الياس وبوي .. أما زين واقف ع باب دار المعيشة ويبكي .. استوعبت الموقف .. وقمتها في غمري وطلعت بيها جري للسيارة ..
( راجيني بنمشي معاك )
قصي: بعدين يمة بعدين الحقي .. خللي نلحق ع البنت
طلعت نجري بيها للمستشفى .. وخليت العيلة كلها توتي في روحها بتلحقني .. لما وصلت بيها .. قمتها في غمري وبديت نعيط ع الممرضات .. نعتوني ع غرفة .. حطيتها ع السرير .. وجي الدكتور يجري ..
( لو سمحت اطلع برا .. ح طمنوك عليها ان شا الله )
طلعت وقعدت نراجي البرا .. جت أمي تجري ومعاها بوي
بوي: شن صار معاها ؟؟
قصي: مانعرفش .. ركبولها التغدية .. وان شا الله خير :(
بوي: خيرها هيا ؟؟.. شن صارللها ؟؟
قصي: أسال أمي >_<
بوي: شن يللي صاير يافاطمة ؟؟
أمي: آآآآه مانحسابهاش ورا الباب .. تكلمت ع بوها شورها سمعتني :(
بوي: شورها صار ؟؟.. تي أهي في جرايرك البنت مغمي عليها .. أمانة هادي راااهي أمانة
أمي: باهي معاش تعيط خلااااص .. قدام الناس بلا حشايم
بوي: آووووووف
قصي: خلوكم معاها وطمنوني عليها بنلحق الزيارة لعمي اوكي !!
مشيت وخليتهم الزوز متعصبين وواصلت طريقي للزيارة .. وهذا يللي صار .. لما طلعت من الزيارة اتصلت بميس
ميس: اهلا قصي كيف حالك !!
قصي: اهلين ميس .. انا الحمد لله شن صار في موضوع عمي !!
ميس: والله ياقصي ماحصلت آي شي يساعدني ..خيرك مضايق انت !!
قصي: ع عمي ياميس ع عمي .. والله عيييت من التفكير :(
ميس: معاش تشغل بالك .. ماتخوفنيش عليك قصي عاااد
قصي: عادي عادي مادورنيش
ميس: بحداك دووشة وين انت !!
قصي: كنت عند عمي .. وتوا مقعمز قدام الحبس مضاااايق للمليووون
ميس: الله غالب شن بنديرو هي :(
قصي: ايه حق بنقولك ورد في المستشفى
ميس: خيرهااااااااا !!
قصي: اغمى عليها .. سمعت ببوها
ميس: لا حول ولا قوة الا بالله .. هي سكر خللي نمشيلها
قصي: اوكي
سكرت من ميس .. ونطيت لسيارتي .. ولعتها ومشيت للقهوة .. لفيت بين الطاولات لقيت مصطفى يراجي فيا .. سحبت الكرسي وقعمزت .. طفى دخانه وشبحلي
مصطفي: خيرك ياولد .. ضعفت .. ومشياااان هلبااا .. وعيونك حمر .. شن كنت تبكي ؟؟
قصي: آآآآآخ يامصطفى كان تعرف قداش رافع من هم صاحبك :(
مصطفى: هات نرفع معاك
قصي: ع نفس الموضوعين .. عمي وميس :(
مصطفى: لا حول ولا قوة الا بالله .. ربي يهدي سرك ان شا الله اكتر من هكي مش ح نقولك .. والله لو بايدي كنت طلعته عمك اليوم قبل غدوا .. ونزوجك ع طوووول لميس يللي راجيتها سنين .. ولا نشوووفك هموم ومضايق .. وكل أمرك لله هوا الوحيد يللي يقدر يعاونك
قصي: ونعم بالله .. وشن جوك انت ومرام ؟؟
(مرام خطيبة مصطفى .. قاعد يراجي في قصي باش ينزفو مع بعض .. هادي خطتهم منذ الطفولة )
مصطفى: ماشي الحمد لله .. قاعدة كل يوم تنق تبي تتزوج .. اختي وصاحبتي انخطبو بعدي وتزوجو قبلي وبلا وبلا وبلا .. خوودلك من دوة البنات التافهة
قصي: هههه باهي تزوجها من شادك ؟؟
مصطفى: قلتلك انا .. انا وياااك بننزفو مع بعض .. تبي والا لا !!
قصي: ههههههههه معناها اقعد راجي ..
فجآءة رن تليفوني .. بوي المتصل ( قصي انت وين !! )
قصي: مع مصطفى .. شن صار مع ورد ؟؟
بوي: صارللها انهيار عصبي .. وقال الدكتور تحتاج راحة مركزة لانها صغيرة في العمر
قصي: لا حول ولا قوة الا بالله .. باهي مني معاها توا ؟؟
بوي: ميس جت وقالت بنبات معاها .. المهم جيبلها حاجات حلوة خللي تاكلهم اوكي !!
قصي: ان شا الله .. هي مروح توا انا
بوي: انا روحت بأمك .. ماشي بنساير زين خليناه مع رزان
قصي: اوكي سلام
سكرت هاتفي ورديته ع الطاولة .. شبحلي مصطفى وقال ( ها شن حالها ؟؟ )
قصي: صارللها انهيار عصبي .. مازالت صغيرة .. المهم بوصطيف ماشيلها للمستشفي بنرفعلها حاجات اوكي !!
مصطفى: تمام .. طمنا عليها بالله
قصي: ان شا الله .. هي سلامات
مصطفى: بحفظ الله
توكلت ع ربي .. وركبت سيارتي .. ع أول محل مواد غذائية وقفت وخديتلها كل شي تحبه ( كيندر .. سنكرس .. برنقلز .. ومارشميلو .. ومكسرات .. وبسكويت صوابع مالح .. عصير اناناس .. زبادي فروالة .. آه نسيت حتي حليب ) .. وتوكلت للمستشفى .. طقيت ع باب طقتين .. وفتحت بالشويا ( تسمحولي نخش يابنات !! )
سمعت صوت ميس ( ايه تفضل قصي )
خشيت لقيتها مقعمزة جنب ورد ع السرير .. وورد حاطة راسها ع خالتها .. وقاعدة تبكي .. ومرة مرة تشهق .. حطيت الكيسة ع الكمادينو .. وقعمزت ع طرف السرير من الاسفل .. وحطيت ايدي ع رجلها
قصي: كيف حالك ورد توا ؟؟.. ان شا الله احسن
ورد: امتى بيرجع بابا قصي ؟؟
قصي: ورد توا مش وقته الموضوع .. خلينا فيك .. قوليلي شن تحسي ؟؟
ورد: مانحس بشي لين يرجعلي بابا :(
قصي: ايه ايه .. اصلا بيرجع لما انتي تبدي كووويسة .. امتى تصحي تلقيه قدامك
ناضت وقفت ع السرير .. لين انخلعت انا وميس
ورد: هآآ .. شوف انا وليت كووويسة .. هآآ شوف ..هآآه
قعدت تلمس في راسها وايديها .. غمضت عيوني .. تأثرت بموقفها .. بس ميس هدتها ولت لفراشها .. تغمرت خالتها وقعدت تبكي ..
قصي: خلاااص ورد معاش تزيدينا ع مابينا .. فكري معانا كيف بيطلع بابا من الحبس ويجيكم
ورد: انت كذذبت عليااااااااااااا .. قلتلي بوووك بيجيك يروووووح بيك .. انا كرهتك ياقصي مانحبكش .. معااااااااااااااااش نحبك خلاااااص .. كلكم تكرهووووووووني .. اطلعو كلكم براااااااا مانبي حد .. نبي مااااااااماااااااااا وبابااااااااااا وزينووووووو بالله عليكم خلااااااص ياااااااااااااربي راني صغيرة يااااااااااربي مانبيش حد من عيلتي يبعد علياااااااااا .. ماااااااامااااااااااااااا ردوووووووهالي ... انتم ماتحبووووونيش والله ماتحبووووووووني
قعدت خالتها تهدي فيها .. وهيا تبعد فيها وتبكي .. وانا حاولت نهديها بس تدخلت ممرضة وطلعتنا .. وخليناها مع الممرضة .. وجعتني كلمتها وين قالت ( انت كذبت عليا ) كان تعرفي ياورد انا علاش كذبت عليك بس .. والله لمصلحتك مانبي يللي صار معاك توا يصير .. بس الله غالب ياوردتي الله غالب .. ميس قعمزت ع كرسي قدام الغرفة وانهارت بالبكي .. وانا استندت ع حيط .. وحبست دموعي .. انا هنا الراجل ولازم نوقف معاهم .. لازم مانحكم هالموقف .. قعمزت ع ركابي قدامها .. وكان حاطة ايديها ع ركباها وراسها بين ايديها .. ودموعها نزلت ع الارض .. بصبعي السبابة .. قمتلها راسها فوق ..
قصي: خلااااص بطلي بكي ميسووو .. انتي توا لازم تكوني قوية .. مسؤولية ورد ومصير جواد بين ايديك ياميس وسعي بالك ياميس مش هكي تنحل الامور
ميس: نعرف .. نعرف ياقصي بس ورد في رقبتي .. هادي ريحة المرحومة ودعتني وين قالت ردولي ماما .. والله وااااعرة ياقصي البنت تتعذب ومش بايديا نديرلها شي .. آآآخ قلبي معاد متحمل حاجة زيادة .. امتى بس ترتاح هالعيلة وتفرح امتى بس
قصي: اللي عند ربي مش بعيد .. شوي شوي وترجع الحياة لما كانت في السابق
ميس: ترجع الحياة مش ماترجعش .. بس هل الميت يعيش ؟؟
قصي: لا طبعا
ميس: والغائب يعود ؟؟
قصي: ايييياااح ياميس خيرك ؟.. نجيك يمين تجيني يسار .. وانا نقووول ورد لمن طالعة تنق هلباااا !!
ميس: ههه ضحكتني ومش في بال الضحك انا توا
قصي: ايوااااه هي ميوستي انا .. هي خلينا نطمنو ع ورد وبعدها بنروح انا
ميس: لا خليك معانا
وشدت في ايدي لما وقفت .. تنهدت .. قداش ماكنت محتاج للمسة هادي تهون عليا شويا
قصي: وين خليك معانا اهيا ؟؟
ميس: قصدي مستاحشاتك بجد .. خاطري نهدرز معاك وتهون عليا شوي .. والله ماوتانا الوقت وهدرزنا :(
قصي: هههه وورد مع من بتقعد ؟؟
ميس: اقعد معانا ونسهرو ومنا نتفرجو ع فيلم هكي حلو
قصي: اوكي :)
>>>>>>>>>>>>>>>>>
قعمزت خالتو جنبي ع السرير .. وقصي ع الكرسي .. انا مضايقة وهما يضحكو بيغيرولي جوي بس انا مش رايقة بكل .. فتحو ع فيلم في ام بي سي 3 .. وحطولي تشيبس وفوشار وحاجات حلوة .. ارتحت شويا وبديت نهدرز معاهم ونضحك .. بس كل مانتفكر بابا .. نضايق ..ونزعل ..
قصي: ورد شن ماتبيش تعزمينا ؟؟
ورد: ههههه تفضلو
قصي: مديلي ترا ميس
ميس: تفضل هآآ
قصي: حق ورد تفكرتي شن درتي فيا وانتي صغيرة هههههههه
ورد: ههههههههه لما طيحتك في الجدولة ؟؟
قصي: ايه ولما خلعتيني في الحوش بروحنا هههههه اييييه هلبااااا
ورد: ايه وقتها زين صغير وقاعد يتعلم مني هههههههه
قصي: هههههههههههه تعرفي ياميس هللي تشوفي فيها القدام خدت حصتها مني وزيادة .. ماخلت مادارتلي من ضرب وهرب ولعب وشطااانة مادراها زين توا ههههه
ميس: هههههههههه طالعة لخالتها .. وزينوو مازال صغير عاااد
قصي: لا عااد الشطانة لمولاها ههههههه مايقدر حد يورتها .. وكان انتي زيها معناها مابعدي وخلاااص
ميس: ههههههه
رن تليفون خالتو .. طلعاته من شنطتها ( دقيقة نستاذن )
وطلعت من الغرفة بترد ع الهاتف .. شبحت لقصي .. تبعها بعيونه .. بعدين شبحلي ( ورد )
ورد: نعم !!
قصي: ءءء بنطلع بنطمن ع زين اوكي !! .. غدوا الصبح تلقيني قدامك اوكي
ورد: خليك معانا
قصي: ماتجيش ياورد .. وين تبيني نرقد ترا قولي !!
ورد: نعرفش .. باهي ماتعطلش علينا غدوا اوكي !!
قصي: ان شا الله وانتي عاد حافظي ع روحك باش تصحي اوكي!!
ورد: ان شاالله حاااضر :)
قصي: تصبحي ع خير
ورد: وانت من اهل الخير
>>>>>>>>>>>>>
قصي يتحدث ::
طلعت من الغرفة .. لقيت ميس بعيدة شوي وعاطية بالقفى ومنسجمة في الحكي .. ومرة مرة تضحك بهمس .. استغربت حركاتها .. قدمت شوي وسمعتها تقول ( مبردك .. ماتجيش الدوة هادي توا .. بعدين بعدين .. تي يااااااااااااسر ورد خليتها بروحها .. هههههه .. تمام بايات )
تلفتت .. لقتني واقف نراقب فيها .. ارتبكت وقالت ( من امتى انت هنا ؟ )
قصي: من لما ضحكتي .. ع العموم انا مروح توا .. غدوا نجي ناخد ورد اوكي !!
قدمت خطوات القدام .. انتبهت لصوتها من جديد يناديني
تلفتت : نعم !!
ميس: تصبح ع خير
قصي: وانتي من اهل الخير .. سلام
ركبت سيارتي .. وفي بالي الفين سؤال .. مع مني كانت تتكلم ميس ؟؟.. وشن هيا الدوة يللي ماتجيش توا ؟؟ .. آوووووف .. باهي علاش انا ماواجهتهاااااش ؟؟؟... الصبر ياربي
روحت الحوش .. تلقتني أمي بسؤالها المعتاد ( وين كنت ؟؟ )
قصي: عند ورد
أمي: مش قعدت معاها خالتها ؟؟
قصي قعدت شويا معاهم وروحت
أمي: قصي ياولدي معاش اتعب روحك
قصي: ان شا الله .. ماتبيش تسألي ع ورد ؟؟
أمي: كيف حالها ؟؟
قصي: يمة شن في بينك وبين ورد .. قوليلي !!
أمي: ههههه شن بيكون بيني وبين فرخة !!
قصي: فرخة ؟؟ .. علاش كارهتيها بس ؟؟
أمي: مش كارهتها .. لكن هيا سبب تعبكم في هالحياة ياولدي
قصي: وهيا شن ذنبها ؟؟.. هيا يللي قتلت امها ؟؟..والا هيا يللي دخلت بوها للحبس ؟؟.. يمة تربحي بلا كلام فارغ مافيشي منطقية
أمي: باهي باه .. غير خش توا وانت واقف ع الباب ليك ساعة
قصي: تمام .. انا خاش بنرتاح والصبح بنروح بورد تمام !!
أمي: تمام -_-
خشيت لداري .. فتحت دولابي .. طاحت ورقة منه .. طبست ..وفتحتها .. من هول المكتوب قعمزت ع سريري .. ( قصي انا نحبك اكتر واحد .. معاش عندي حد في الدنيا غيرك بالله عليك طمني ع بابا خااايفة عليه هلباااا ..خايفة نكلمك تعصب عليا .. حطلي الرسالة في داري .. انا ورد )
طبقت الورقة حطيتها تحت مخدتي .. بدلت حوايجي ورقدت ......
>>>>>>>>>>>>>>>>>..
الصبح نضت .. مالقيتش جنبي خالتو.. خشيت للحمام ( حشاكم ) توضيت وصليت الصبح ,, ودعيت في صلاتي ان بابا يكون بخير ويطلع من الحبس بسرعة .. وليت ع سريري قعمزت نراجي في خالتو والا قصي يجوني نبي نطلع مليت منها المستشفى .. شويا وخش عليا قصي بعد ماسمحتله يخش .. خش جايبلي فطور .. حطه ع الكمادينو .. قعد يلف براسه .. عرفته يدور في خالتو
ورد: نضت مالقيتهاش :(
قصي: وين مشت وخلاتك بروحك ؟؟
ورد: مانعرفش
قصي: اوكي .. خليك شويا ونجيك مش ح نعطل .. ءءءء افطري ووتي روحك بنروحو
ورد: حااااضر
فتحت الكيسة وطلعت منها البريوش والفروبي .. وبديت نفطر .. بعد ماكملت مازال ماجي قصي .. وقفت ع الروشن .. لقيته واقف هوا وياها في جردينة المستشفى .. آوووووف مايملوووش .. انا ملييييت .. ماعنديش تليفون كيف بنكلمهم !!
راجيتهم قريب ساعة .. بعدين خش عليا قصي وخدي شنطتي وروحنا .. طووول الطريق ساكتين .. خشيت لحوش عمي لقيت زين جي تغمرني وقعدنا نبكو .. بعدين سلمت ع رزان وحمودي والياس وعمي .. ودورت ماما فاطمة من بينهم مالقيتهاش .. سألت عليها قالولي في المطبخ توتي في الغدي .. خشيتلها .. سلمت عليها وبوست ع ايدها
ورد: سامحيني ماما فاطمة تعبتك معاي :(
ماما فاطمة: لا عادي .. المهم انتي صحتك تمام !!
ورد: ايه الحمد لله .. علاش ماقلتليش ع بابا !!
ماما فاطمة: شن بنقولك بوك محبووووس متلا !!
دمعو عيوني وين سمعت كلمتها .. قعدت نشبحلها ماعبرتنيش بكل .. كملت توتي الغدي وقالتلي ( هي تعالي تغدي )
ورد: كولو انا شبعانة :(
ماما فاطمة: تعالي ياورد بلا دلع
ورد: حاااضر
مشيت غسلت ايديا وقعمزت معاهم .. وقعدو يهدرزو ويضحكو وانا في عاااالم تاني .. خايفة نقول لزين .. هوا قاعد صغير ماتجيش نقوله .. آمممم .. احسن شي انووض نصلي وندعي لربي .. ( الحمد لله )
زين: ماكليتيش هلبااا ياورد!!
ورد: شبعانة الحمد لله
قصي: تي قعمزي بديتي تتدلعي هلبااا يابنت
ورد: باه
قعمزت ع خاطر قصي .. مانقدرش نرفضله طلب لانه ديما يوقف معاي ويساعدني في كل شي .. بعد ماكملو غداهم نضت ضميت الماعيين مع رزان وماما فاطمة .. خشيت للصالة لقيت عمي متكي ..والياس يلعب في حمودي
ورد: الياس .. قصي وينه ؟؟
الياس: ممكن في داره مانعرفش .. كغاااا كغااا
كان يلعب في ولده حتي الشبح ماشبحلي .. مشيت لدار قصي .. طقيت الباب
مني ؟؟
انا ورد
خشي ورد :)
خشيت لقيته مقعمز ع سريره ..
قصي: خيرك في حاجة ؟؟
ورد: عادي نزور بابا ؟؟
قصي: والله !!
ورد: والله مستاحشاته وانت الوحيد يللي بتساعدني بالله عليك ماتقولش لااا بالله عليك
قصي: بالشويااا عليك وردتي .. انتي صغيرة ماتجيش نرفعك للحبس
ورد: ع خاطري بالله عليك
قصي: آآآه .. خلاص خليني نفكر ونرد عليك اوكي !!
ورد: امتى بترد عليا ؟؟
قصي: مانعرفش .. ورد قوليلي انتي تخافي مني بجديات !!
ورد: انااااا !!
>>>>>>>>>>>>>>>>
قصي يتحدث ::
ردة فعلها صدمتني .. ورد مهما كبرت ماكبرتش عليا .. باستني ع راسي وقالت ( انا نخاف من بابا لاني نحبه .. ونخاف منك لاني نحبك )
الله ع براءتها هالبنت غمتني غماااان .. ( كل مانشوفك .. نشوف فيك بابا يللي خداته مني الايام .. كل ماتتعصب زي بابا .. كل ماتحن عليا تفكرني ببابا .. ) .. مسحت دمعتي يللي نزلت عفوية مني .. ع اتصال ميس فقت من احلامي ..
قصي: آلو ميس شن الجو ؟؟
ميس: قصي .. وينك اليوم !!
قصي: هههههه امبكري كنت معاك ماشبعتيش مني !!
ميس: هههههه انا تحشمت
قصي: قولي والله !!
ميس: كيف حالها ورد توا !!
قصي: غيرتي الموضوع .. ههههه .. تمام كيف ناضت من جنبي
ميس: شن كانت تبي !!
قصي: قالتلي نحبك ههههه
ميس: بجديات قصي !!
قصي: ايه والله .. تبي تزور بوها .. فيها كيف زعما !!
ميس: قصي البنت اهيا بدت تخوووف فيا ره
قصي: انتي بجديات والا تستهبلي !!
ميس: لا والله بجديات
قصي: تي البنت صغيرة .. صغيرررررة .. عمرها 12 ره بلا عاااار يابنت خيرلك ره
ميس: والصغير يكبر
قصي: وهبالك يزيد ولاه !! .. ههههههههه غير قوليلي عادي تزور بوها !!
ميس: تو نشوف كان سمحولي تو اندخلها انا
قصي: لا وعلاش انتي ادخليها يعني !!
ميس: وعلاش انت تبي ادخلها لبوها !!
قصي: يعني انتي تغاري من طفلة انا ماتبينيش نغار من راااااجل !! .. ترا فهميهالي اهيا !!
ميس: باهي باه خلاااص انت والا انا كله سوا .. المهم اليوم عندي عيد ميلاد صاحبتي بنمشيلها وبعدين بنجي نزور ورد نطمن عليها اوكي !!
قصي: تمام .. ماتعطليش عليا ياسموحتي اوكي !!
ميس: هههههه قلت ورد انا !!
قصي: ورد خير مني ؟؟
ميس: ههههههههههه تي بنت هاااادي صغيرة ره بلا عاااااااار
قصي: ههههههه صقع عليك ترديها لكن
ميس: هي طير .. أمي تبيني نرفعها معاي لورد ره
قصي: ايه مرحبتين بيها .. لكن كيف بترفعيها لعيد ميلاد صاحبتك !!
ميس: مانعرفش .. تو نشوفلها حل .. هي سلامات
قصي: هييي يابنت .. تقول تكلمي في بوك .. قوليلي كلمة حلوة
ميس: قصييييي .. نتحشم
قصي: ههههههههه تمام .. هما 4 سنين زيديهم هالسنة وزيدي في جفافك يابنتي هههه
ميس: تمام ههههههه باي سموحي
قصي: باي
سكرت من ميس .. وطلعت من داري .. مالقيتش ورد .. سألت عليها قالولي في الجنان تلعب .. استغربت .. ورد من نوعها الحزين .. صعب تنسى مشاكلها بهالسهولة وتطلع تلعب .. طلعت لقيتها !!

#Dudu