الحضن الدافي

Part 27

#الحضن_الدافي

الحلقة :: 27 ::

ركبت السيارة ومشينا لحوش عمي .. وطووول الطريق هما يبلو ويعجنو في سيرة تأخير البنات في الطلعة .. ومن هما صغيرات يتأخرو والسبب مجهول لوقتنا الحالي ..
>>>>>>>>>>>>>>
جواد يتحدث ::
مقعمز في مكتبي وكالعادة هالايام مافيش شغل هلبااا .. ندور بالكرسي بين الروشن والمكتب .. قطع هالفراغ رنة تليفوني .. رقم غريب !!
جواد: آلو السلام عليكم :)
مها: وعليكم السلام كيف الحال استاذ جواد
جواد: الحمد لله .. مني معاي ؟؟
مها: انا ابلة ورد زمان .. مها نسيتني !!
جواد: آآآه اهلين اهلين .. سامحيني غير التليفون مغيره والرقم ضاع مع الاول
مها: معذوور استاذ .. كيف حال ورد وزين ؟؟
جواد: الحمد لله .. عال العال :)
مها: حابة اليوم انزورهم لو مافيهاش مانع :)
جواد: والله شن بنقولك متغديين عند خوي
مها: آآه .. اوكي معليشي يوم تاني ان شا الله
جواد: ان شا الله .. ح نكلمك انا اوكي !!
مها: ان شا الله .. يلا سلامات
جواد: سلامات
طق طق طق
جواد: تفضل
خشت السكرتيرة نهلة .. ومدتلي ظرف وطلعت .. فتحت الظرف .. وقريت الكلام المكتوب وكانت هادي الفاصلة في حياتي .. كيف ؟؟.. وعلاش ؟؟.. وامتى ؟؟.. مافهمتش .. وقفت مصدووم وعلامات وجهي انقلبت للرهبة من القادم .. عفجت الورقة ونزلت نجري للمدير ::
فتحت الباب من غير استئذان لقيت معاه موظف معانا ..
جواد: ممكن تفهمني يامدير شن هدا ؟؟؟
المدير: وصلاتك !!
جواد: ايه تقدر تفهمني شن معناااااه الكلام هدا ؟؟
الموظف: ءء انا نستاذن حضرة المدير ..
المدير: تفضل
استقبلني ببروود تااام .. وماقامش حتي عينه فيا .. بالعكس يهز في الكرسي يمين ويسااار ومخليني عايش الصدمة والاستغراب في نفس الوقت بروحي .
المدير: ماكنتش نتوقع هالشي يطلع منك يااستاذ جواد
جواد: وانت مصدق هالكلام؟
المدير: لا .. لين يحولوك ع النيابة ونتحقق بنفسي .. وبعدين خيرك معصب هكي ؟... لو واثق من نفسك ماكانش هالشي يأثر فيك
جواد: تي كيف مايأثرش فيا .. انا واثق من نفسي ولاني وااثق من الشي هدا مستحيل انديره جيتك لهنا نبي نفهم منك من متهمني ؟؟
المدير: آآآه الدوة مش معاي .. امشي للادارة المالية وهيا تفهمك
جواد: لحظة لحظة .. انا مش مستعد نخسر سمعتي بسبب شي انتم اساسا مش متاكدين منه .. وانا اصلا اخلاقي ماتسمحليش ندير هالشي .. فهمت علياااا !!
لوحت الظرف لوطة وطلعت من مكتبه .. شي مستفز وين يلعبو بسمعتك في الشغل ويقابلوك ببرود .. خشيت لمكتبي .. خديت شنطة اللاب توب متاعي وطلعت .. ماكنتش نشوف في شي تاني غير الجاي شن مخبيلي .. حلو والا شين !! .. آآآآخ الصبر
>>>>>>>>>>>>>>>>>>>>>>
قصي يتحدث ::
خوي الياس تزوج من سنة ونص تقريبا وعنده حتي وليد وسماه محمد ع اسم بوي .. وانا مازلت ماتزوجت ميس الحوش عائق الوحيد في زواجي .. مازلت ماكملته .. رزان ماشا الله عليها بنت أصول .. كل يوم تنزل لأمي وتعاونها في الحوش وع الغدي .. وماكانتش تسمع لامها لما تنكر فيها علينا ..
مقعمز في الصالون لان معاش زي قبل نطلع ونخش في الحوش براحتي .. لان رزان عندنا ..
شاد تليفوني ونتفرج ع الصور القديمة .. مرت صورة .. انا وورد وزين لما كانو صغار .. ركزت فيها الله الايام قداش ماتجري بسرعة .. فاتت قريب سنتين ع الصورة .. وقاعد نتفكر تفاصيل هداك اليوم .. تقول فاتت ساعتين .. شويا وطق الباب
ورد: ممكن نخش قصي؟؟
قصي: ايه تفضلي ورد
ورد: مضايقة انا :(
قصي: علاش شن في؟؟
ورد: عادي نحكيلك ؟؟
قصي: ههههه ايه احكيلي هي
قعمزت مقابلتني .. وبدت تحكي شن يللي مضايقها .. كنت مركز ع كل كلمة قالتها وكل حركة بايدها دارتها .. مازالت زي ماهيا الطفولة تحويها .. والطهارة .. والبراءة متجسدة فيها ..
ورد: ديما بروحي انا .. ماما فاطمة معاها رزان تهدرز ومعاش دورتني .. وزين البرا يلعب مع صغار شارعكم .. وبابا ديما ديما مشغول .. والياس يللي نحبه توا بدي يحب ولده اكتر مني .. وحتى مشيت بنسلم عليه ماشافنيش لانه كان يلعب في حمودي .. انا وياك قعدنا بروحنا قصي .. مافيش من يلعب معاي ولا حد يهدرز معاي .. ولا حد يقريني .. ولا حد يعلمني .. ولا حد يدهور بيا .. ياريت ماما قاعدة حية .. راهو مادورت حد انا :(
قصي: هههههه بتبكي ورد ؟؟
ورد: لالا كبرت معاش نبكي انا
قصي: شوفي وخيتي .. انا مازال نحبك ونبي نلعب معاك ونسايرك وشن تبي قوليلي اندير انا وياك .. شن رايك !!
ورد: بجدياااااااااااااااات :\
قصي: ايه والله .. حتى كان تزوجت بنتزوج خالتك يللي تحبك .. ونبد انا وياها نحبوك انتي .. وحتي لما يولي عندي صغار انتي تحبيهم وتلعبيهم معاك صح ولاه !!
ورد: يعني ماتخلينيش بروحي !!
قصي: ههههه لالا اصلا انتي مش بروحك .. كلنا معاك وكلنا ليك .. شن تبي بس ادللي علينا اوكي !
ورد: باهي شن رايك نلعبو شطرنج !!
قصي: تقدريني !!
ورد: اكيد
قصي: لالا مستحييييل .. انا اذكى منك هههههه
ورد: لالاتو نمشي نجيبه ونجيك :)
قصي: تمام
حتى كبرت ماكبرتش عليا .. قاعد نشوف فيها الصغيرة البكاية .. يللي تحب تنكد عليا .. ومستحيل نقدر نستغنى عن دوشتها .. أما زين .. لما كبر ماشاف شي من امه .. فأكيد عنده الحياة هادي هيا الطبيعية .. ومش ح يتغير عليه شي .. كبر هكي .. مرة عندنا مرة مع بوه .. بس يقدر يعيش بروحه ويتأقلم مع أي حياة جديدة تخش عليه .. مش زي ورد الحساسة يللي كل مواصفات الانوثة فيها :)
لعبت انا وياها شطرنج وبالقصد خليتها تفوزني نبي بس نشوف ضحكتها وبسمتها يللي تحكي مأساة طفلة يتيمة .. شويا ورن تليفوني .. المتصل ( عمي جواد <3 )
قصي: مرحباااا ياعم وينك ؟؟
جواد: آلو قصي انا في ورطة وورطة كبيرة ياقصي ..
وقفت مصدووم وين سمعت كلامه .. ورد واقفة ونفس علامات وجهي عليها .. لما استوعبت انها جنبي بديت نضحك ونحاول نطمنها بضحكتي الصفرا .. بس مازالت ورد مستغربة فيا
جواد: تي نقولك كارثة ع شني تضحك بس !!
قصي: ءء ورد .. ايه تمام خليها تبات معانا الليلة شن رايك ؟؟
جواد: أها جنبك هيا .. خلاص نراجي فيك تجيني تمام !!
قصي: تمام .. هي سلام
سكرت تليفوني ورديته في الجيب .. وجيت بنطلع من الصالة وقفتني ورد بسؤالها المعتاد ( صاير شي لبابا ؟ )
قصي: ههههه لالا انتي ديما مخلوعة
ورد: بس قلبي يقول في حاجة ؟؟
وقفت مقابلها وحطيت ايديا ع كتافها ( ورد وخيتي بري شوفي زين شن يدير .. وانا ماشي للولاد راك تنسي تقولي لأمي اوكي .. سلامات )
>>>>>>>>>>>>>>>>>>>>
رجيت بابا يجي يروح بينا بس ماجاش .. حاسة قلبي مقبوض .. طلعت للبلكونة والدنيا ظلام .. خديت نفس عميق وقمت راسي شفت القمر تذكرت ماما تحب تناديني بقمري وأميرتي <3 .. آآآآه ياماما كان تعرفي شن يللي صار معانا في غيابك .. جدو معاش دورنا .. وخالتو لاهية في عرسها مع قصي .. قبل كنتي تقوليلي كل ماخاطرك في حاجة وانا مهناش قولي لخالتو تجيبهالك .. بس كل مانكلم خالتو توزعني وتقول عندي شغل .. ءء قصي يراجي فيا وهكدا .. كبرت يااماما وحبك كبر معاي .. حزني ع فراقي كبر اكتر واكتر معاي .. من غيرك ح يوريني الحياة .. من غيرك ح يساويلي طرحتي في عرسي .. من غيرك ح يهديني في عيد ميلادي .. ومن غيرك ح يطبطب عليا وين نبكي .. باهي لما ندير صغار لمن بيقولو ( اميما ) .. آآآه ياماما الحياة صعبة .. والاصعب وين يخلينا بابا ويلهى في شغله .. حسيت بايد انحطت ع كتفي .. عيطت ( مني ؟؟ ) وغمضت عيوني بايديا
رزان: شن اديري البرا بروحك ؟؟
نحيت ايديا من ع وجهي لقيتها رزان واقفة ولابسة روبها الشتوي .. وحاطة وشاح ع راسها
ورد: شي كساد
رزان: تعالي اركبي معاي لحوشي .. الياس رقد
ورد: حمودي راقد ؟؟
رزان شدت ايدي ودخلتني .. وقعمزتني ع سريري .. وقعمزت جنبي
رزان: ورد خيرك ديما حزينة ؟؟
ورد: شي اذكرت ماما بس
رزان: امممم حتى انا تصدقي
ورد: اذكرتي امك ؟؟
رزان: ههههه لا اذكرت امك انتي
ورد: هدا علاش ماجاكش نوم ؟؟
رزان: ايه فتحت الروشن لقيتك واقفة في البلكونة قلت ننزل نهدرز عليك شويا
ورد: صحيتي :)
وقفت رزان قدامي وبعدين قعمزت ع ركابها .. وحطت ايديها ع ركابي .. وابتسمت
رزان: حبيبتي .. يللي مشي مشي واللي مات الله يرحمه مشي لمكان احسن من مكانا .. بس لازم تستمر الحياة .. لازم ماتكوني قوية وتفوتيه المشاكل كلها مع نفسك
ورد: بس بابا .....
رزان: بابا عنده شغل .. ولا مايخدم باش يوفرلك كل شي انتي تبيه .. وآهو انتي معانا مرتاحة ولاه !!
ورد: ايه اكيد .. بس نحب نقعد في حوشنا
رزان: علاااش ؟؟
ورد: لاني نرتاح فيه .. ونحس ان مافي حد يكرهني .. ونحب نقعد بروحي
رزان: بروحك !!
شبحتلي مستغربة .. وكيف بتتكلم طق باب داري .. لبست وشاحها
وقفت فتحت الباب لقيته زين
ورد: خيرك زين شن في؟
زين: بنرقد معاك .. ماباش يجيني النوم
ورد: اوكي خش
وقفت رزان ( خلاص حبيبتي توا نخليكم ترقدو وغدوا نهدرزو اوكي !! )
ورد: ان شا الله .. تصبحي ع خير
طلعت رزان .. سكرت الباب تلفتت لقيت زين راقد في فراشي وواخده النوم .. جبدت مخدتي وخديت بطانية ورقدت لوطة .. وانا مازال تفكيري في ماما يدووور ويدووور .. الحياة مش ح تستمر صح ماداما ماما مش معاي :(
نضت تاني يوم الصبح بكري .. طلعت من داري لقيت ماما فاطمة راقدة .. خشيت للكوجينا وبديت انضم في الماعيين وتيت الفطور .. سمعت صوت حد جاي قريب من الكوجينا .. لقيته قصي .. لبدت تحت الطاولة .. وغمضت عيوني ( قصي بالله عليك اطلع انا مش لابسة وشاحي )
قصي: هههههه اوكي .. كبرتي وبديتي تتحشمي الحمد لله ههههه
طلع قصي وخشيت نجري لداري لبست وشاحي .. وليت للكوجينا لقيته مولع ع الشاهي
ورد: صباح الخير
قصي: صباح النور
بعدين جي بيطلع من الطوجينا وقفته بكلماتي ( بابا وين ؟؟ )
لاحظت ارتباكه وتلفتلي وقال : انا امس مشيتله وبالك اليوم يجي يروح بيكم مانعرفش
ورد: بس من لما كبرت بابا مايخليش فيا نبات عندكم .. اشمعنا المرة هادي !! .. قصي في حاجة ؟؟
قصي: ماتبديش زي الصغار تنقي .. يكمل شغله يجي يروح بيك .. انا في الصالة -_-
ورد: آووووف
حسيته يكدب عليا .. بس مانبيش نكتر عليه .. وليت للفطور وحطيت طواسي .. وطفيت ع الشاهي خشت عليا رزان
رزان: حي ورد اليوم الفطور من تحت يدياتك هههههه
ورد: ايه .. شن رايك فيه ؟؟
وقفت رزان ع الطاولة وقعدت تلف بعيونها ع الاكل وبعدين قالتلي : آمممم شكله يسفه جعت خلاص :)
ورد: نمشي انوض ماما فاطمة ونجي
رزان: اوكي خللي اندير قهوة
ابتسمت .. وكملت طريقي لماما فاطمة .. طقيت الباب بالشويا مافتحتليش .. قويت الطقة شويا .. بس مافتحتلي .. فتحت الباب بالشويا لقيتها قاعدة في سريرها .. خشيت بالشويا وقعمزت جنبها وحطيت ايدي عليها ( ماما فاطمة نوضي وتيت الفطور اليوم :) )
فاقت بيا .. تلفتتلي وحطيت ايدها ع رجلي ( سلمها ياربي بس والله حاسة راسي يوجع فيا مانقدرش انووض افطري انتي ورزان )
ورد: لا بنجيبلك الفطور لعندك اوكي !!
ماما فاطمة : لا صحيتي حبيبة .. والله ماعندي نية
ورد: لا لازم تاكلي كووويس باش تصحي ماما هكي زمان تقولي لما نمرض
ماما فاطمة: باهي جيبي هي ع خاطرك بس
>>>>>>>>>>>>>>>>>>
جواد يتحدث ::
حولوني ع النيابة العامة .. بس كل الأدلة ضدي وتقول ( جواد اختلس فلوس الشركة ) .. والله مظلوم .. مافيش مايتبت .. حتي من رفاقي في الشغل كذبو الموضوع بس مافيش ادلة تبت عليهم النيابة ع أني برئي من التهمة .. حبسوني وليا يومين .. جاني قصي وطمني ع صغاري .. بس نبي نشوفهم .. نبي نشم ريحتهم .. نبي نسمعهم يحكولي شن صاير معاهم.. انا عارف زين مش ح يهنيها ورد لانه راسه كاسح .. ومايسمعش الكلمة .. هذا القدر ومااختار ..
في هاليومين كنت نقعمز بروحي ولا كلمت حد ولا كلمني حد .. وميس بارك الله فيها مش مخليتني بروحي .. تخدم ليل نهار باش تبت برائتي .. بس كيف بتتبتها ؟؟!! .. توقيعتي ع كل الشيكات !!
كنت مقعمز ع سريري وفي ايدي صورة ورد وزين نتأمل فيهم .. ونفكر فيهم .. فجأة سمعت صوت دوشة وعياطات في الزنزانة .. وقفت .. ولما ريتهم عالقين في بعض .. وليت لسريري قعمزت .. وماهمني في حد .. ماكنو ولا هدوا لا لما خشو الحراس وحزو بينهم بطلقتين في الهواء .. وماهزني شي .. وليت للصورة من جديد .. بعد حوالي ساعة من العركة .. جي واحد وقف ع راسي
( غريبة ماجيتش وحزيت معانا ؟؟ )
جواد: وعلاش بنحز ؟؟.. شن علاقتي بيهم ؟؟
( آها .. من جيهة عندك الحق .. ومن جيهة تانية ماعندكش حق الصراحة )
جواد: ترا فهمني بالشويا ..
وعدلت تقعميزتي .. وشبحتله شبحة استغراب !!
( يعني عندك الحق انك تريح راسك ومالك ومالهم .. وماعندكش حق لانك لما بدير مشكلة لو صدف يعني مش ح تلقى من يحز عليك )
جواد: هههههههه ماتخافش انا مش متاع مشاكل ابداااا
( شن السبب دخولك اهنا امالا !! )
صدمني سؤاله .. حسيت بحجم المصيبة يللي انا فيها .. انقشعت ابتسامتي ورجعت التالي وحطيت ايدي ورا راسي .. وتنهدت :(
( ان شا الله خير !! )
قمت عيوني للسقف وبعدين رجعتهم ليه .. ورديت السؤال بسؤال
جواد: شن سبب يللي مخليك هنا !!
( اييياااااه انا مشكلتي كبييييرة ... تبيني نحكيلك هههههه )
جواد: نسمعلك
( قبل كل شي ماتعرفتش بيك !! )
جواد: جواد :)
( وانا اسمي راشد .. انا ياسيدي ليا 10 سنين هنا .. يرفعو ويجيبو فيا .. طبعا قضيتي كبيرة .. قضية سياسية ولتوا ماطلعتش منها .. ياسيدي من الاخر لقو عندي مناشير تدعو للتظاهر ومن هكي لهكي .. حاولت نهرب اكتر من مرة بس كل مرة تخيب وماتصيب معاي .. وبعد ماحصلت فرصة بنهرب شدوني في المطار ههههه .. شر البلية مايضحك )
جواد: ربي يفرج عليك ان شا الله .. القضايا السياسية مافيش من اخطر منها .. وين نسمع مصايب الناس تهون مصيبتك .. انا تهموني باختلاس اموال الشركة :(
راشد: ....

#Dudu