الحضن الدافي

Part 46

#الحضن_الدافي

الحلقة :: 46 ::

ايييح علينا مش ناقص تصرفات صغار انا .. خليتها ترقد وترتاح .. وانا طلعت لدار ورد فتحت عليها الباب ومن غير مانشوف ان كانت نايضة اولا بس كان الواضح انها مارقدتش .. وخشيت لداري .. رقدت والصباح رباح :)
>>>>>>>>>>>>>>>>>
آي صباح يابابا يللي تحكي عليه وبنتك مارقدت الليل .. حاسة بجسمي كله متكسر .. حتى مشحاسة بالوقت يمشي ويجي .. حدني صليت وفي كل صلاة دعيت لربي يهدي سري ويطلعلي من الورطة يللي حطيت روحي فيها .. طول الليل وانا مقعمزة ع الروشن نتفرج ع المطر ونبكي .. لما بابا فتح عليا تمنيته خش وسلم عليا وهدرز وحكيتله كل شي صار معاي .. بس يللي في بالي طلع بعيد .. سلم أمري لله .. سمعت صوت الاذان يللي رد ليا الروح .. نضت وقفت ع المرآية لقيت عيوني حمر متورمات .. راسي ثقيل من كثر البكي .. مسحت الدمعات يللي ع خدي .. لما شفت روحي في المرآية شفت قصي وحكاياتي معاه .. بديت في البكي .. تعوذت من الشيطان الرجيم .. وهزيت راسي بعدت كل الاوهام يللي وردتني وصلتني للي انا فيه .. فتحت باب داري بهدوء .. ومشيت بخطوات بسيطة للمطبخ شربت مية .. وكيف بنحط الطاسة ع الرخامة طاحت مني وانكسرت .. انفتحو عيوني ع وسعهم اكيد بابا بيفيق وبيضربني :( .. طبست بنضم يللي تكسر جرحتني مرشة وانفتحت ايدي فتح بسيط بس دم كثيف .. وبالفعل بابا ناض وجاني يجري هوا وخالتو مها جت تغمرتني لما شافت الدم .. شدت ايدي وحطتلي راسي ع صدرها .. وقعدت تسمي عليا
مها: حبيبتي شن صارلك ؟؟
بصوت يرتعش من الخوف وعيوني معلقات في بابا يللي عيونه مازالو ع ايدي : بنشرب طاحت مني الطاسة وانكسرت
مها: خلاص انكسر الشر تو نضم انا بري داوي ايدك ** شبحتلها وابتسمت .. ردت عليا الابتسامة بعدين شبحت لبابا وفنصت ** خودها جواد
بابا شبحلي بنظرات أحر من امس .. وقال بصوت مخيف: تعالي -_-
مشيت وراه .. وعارفة خالتو مها تبي تساوي الامور بيني وبين بابا بس عارفة مازال مضايق مني ومستحيل يرضا عليا بهالبساطة .. كانت ايدي تصب الدم وواقفة قدام الحمام .. جاب الاسعافات الاولية وقعمز ع كرسي في وسط الحوش .. جيت وراه قعمزت جنبه .. شد ايدي ومسحها بقطنة وبخ عليا دواء ولفها .. وعيوني معلقات عليه خاطري نحضنه ونبكي ع كتفه .. بدت الدنيا تضوا شوي شوي وياريت وجهك يابابا يضويلي شوي وتسمحلي نقولك كلماتي ..
بابا: خلاص كملت ** ناض وقف شديته من ايده بتمسك وقوة وخوف ونفس الوقت حب ** .. شن في ؟
ورد: بابا انا نحبك :(
بابا: لو كنتي بنتي الصح راك مادرتي فيا هكي ** وعيونه القدام مايبيش يشبحلي **
شديت ايده بايدي المجروحة وبديت نبوس فيها ونقوله: سامحني بالله عليك سامحني
دفني بايده ومشي خلاني نبكي .. جتني خالتو مها تغمرتني وبديت نبكي عليها ..
ورد: مش ح يسامحني ياخالتو :(
مها: لا حبيبتي بيسامحك غير هوا قاعد زعلان شويا منك
شديته بقوة وحسيت بوجع في ايدي بهمس قلت ( آآآي )
مها: خيرك حبيبتي موجوعة ؟؟ ** بعدتني شوي عن حضنها ومسحتلي دموعي **.. خليني نرفعك لفراشك ترتاحي شوي
ورد: وبابا ؟؟
مها شدت خصلات شعري وقامتهم من ع وجهي وقالت: بابا راضي عليك صدقيني أمس قاللي هكي .. ورد حبيبتي هدا بوك والبو مستحيل يقسا ع بنته الا لمصلحتها .. ارجعي ورد يللي يعرفها هوا وح تشوفيه كيف ح يتغير معاك للاحسن
ورد: باهي قوليلي شن اندير ؟؟
مها: آمممم نحكيلك قصة صارت معاي .. زمان لما كنت بعمرك ماكنتش حابة الحجاب وبوي كان واااعر مش واااعر بس مايحبش الغلط .. في يوم من الايام هوا طلع وانا كنت نبي نلعب مع صحباتي في الشارع وهوا حارمني بحكم أني كبرت وخايف عليا المهم مشطت شعري وشديته ذيل حصان وطلعت نجري وانا طالعة لقيته قاعد قدام الحوش مع جارنا ويعطيني كف قدامهم كلهم وشدني من شعري وماخلا مادار فيا .. امي وبوي قعدو قريب اسبوع مايكلموش فيا .. قاللي كان بتطلعي توا بلا حجاب بري اصلا لا بنتي ولا نعرفك .. ومن هداكا اليوم اقتنعت بأنه الاب يقسا باش يعلمنا الصح ولما نكبرو نتفادوه .. وآهو ليومنا هذا الحمد لله بحجابي وشكرت بويل انه عطاني كف وعاقبني كان مادارللي هكي يمكن نتمادى ونضيع اكثر واكثر .. هدا بابا وقعد قريب اسبوع ع خاطر طلعت بلا حجاب للشارع يابالك انتي قلتي كلمات حب لولد عمك ههههههه
ضحكت من قلبي .. وبعدين شبحتلها ببراءة وقلت: ماحبيتيش قبل بابا ؟؟
مها: ههههه .. ماعرفتش الحب الا لما شفت البابا
ورد: باهي آهو انتي تحديتي الكل ع خاطره .. وانا مانقدرش نتحدا بابا بس ع خاطر قصي :(
مها: هههههه من قالك تحديت ؟؟ .. لا حبيبتي هذا نصيب وربي كاتبه كنت كل يوم ندعي بس ماتجرأتش في يوم نطلع عن شور أهلي .. ولما جي بوك خطبني بوي فرح بيه وحبه وماكانش من نوع يللي لا ماتتزوجيش أرمل :)
ورد: آها .. بس مرة لما اتصلت بيك قعدتي تسألي فيا ع بابا
مها: هههههه مانعرفش شن صار في هديكا اللحظة <3
ورد: هههههه انتي وبابا مناسبين لبعض هلبااا ربي يهنيكم <3
مها: وانتي ح تلقي شخص يناسبك بس توكلي ع ربي وادعي يختارلك انسان يحبك ويحترمك ويقدّرك ويصونك <3
ورد: ان شا الله :(
مها: توا بري صلي وارتاحي وانا ح نفهمه بوك كل شي اوكي !!
ورد: اوكي :)
بعد مارسمت ع وجهي الابتسامة .. وقفت وقدمت خطوات بسيطة بعدين رجعت حضنتها وهمستلها ( شكرا خالتو مها ربي مايحرمني منك )
ابتسمتلي .. ومشيت لداري .. في طريقي تلفتت لدار بابا وبعدين تلفتت لخالتو مها يللي مازالت مقعمزة ع الصالون .. غمضت عيونها مع ابتسامة وملامح تفائلية .. خشيت لداري
>>>>>>>>>>>>>>>
جواد يتحدث ::
لحظات ورد مع مها كنت متابعها .. وحسيت بحنية مها ع بنتي رغم انها مش بنتها .. وحسيت بقساوة ميس ع بنتي رغم انها خالتها .. أخت امها .. لما ورد ناضت لدارها خشيت لداري بسرعة باش ماتحسش بيا ونفس الوقت نبي نعاقبها ع غلطتها .. صليت الفجر .. وقعمزت نراجي في مها تخش .. بس تأخرت ..نبي نفتحلها الموضوع ونهدرز معاها .. دورتها في الحوش ومازال الصالة بس ماخشيتلهاش .. اول ماوقفت قدام الباب سمعت صوتها .. سمعت همساتها تدعي لربي وتقول (( يارب حنن قلب جواد ع بنته .. يارب حبب جواد فيا .. انت عارف انا نحبه اكثر من روحي وحبيته قبل مانتزوجه وزدت حبيته بعد ماتزوجته وشفت كيف يعامل في صغاره .. يارب ماتخليني نضعف يوم ونغلط في ورد والا زين حرام انظلمو والدنيا خدت منهم أمهم .. يارب نبي نعوضهم عليها ,, واحفظهم ..وارزقهم الوقت الطيب .. وفقهم .. وعطيهم مايتمنو .. آمين يارب العالمين ))
قامت الصلاية .. انا فتحت الباب وخشيت ( ربي يقبل دعواتك )
انخلعت .. تلفتت وقالتلي : من امتى انت هنا ؟؟
جواد: ضوت الدنيا وانا نستنى في حضرتك تشرفي
مها: والله ماحسيت بحاجة .. شاغلتني ورد
جواد: ابلتها وتعرف طبعها من وهيا صغيرة ههههه
قعمزت ع الجلسة وانا نضحك .. بس هيا مصمتة ومادارتش آي ردة فعل
جواد: مها .. فيك حاجة !!
مها: لالا .. انا بنخش نرتاح بما ان عطلة ومافيش قراية
كيف بتطلع وقفت شديتها من ايدها : امس واليوم تتهربي مني ؟؟.. شن في!
مها: لا مافي شي .. ممكن امبارح مارقدتش باهي :(
جواد: اسمعي انا مانحبش وحدة تتجاهلني وتعاملني هكي وخاصة انها مرتي .. فـ تكلمي بالحسنة شن فيك ؟؟
مها: انا عارفة من اول ماتزوجتك انك تزوجتني ع خاطر صغارك .. وفهمتني في الخطبة اني نعوضهم غياب الام .. بس عمرك ماقلتلي ان متزوجني نخدمهم ونكون شغالتهم :(
جواد: ومن قال الكلام هدا ؟؟
مها: انت امس قلت لورد انا متزوجها ع خاطرك باش تريحك .. فك ايدي جواد انا ح نكون زي مانت طالب .. لاني نحبك وزي ماوعدت نفسي قبل لما نوصلك ح نكون زوجتك المثالية .. ح نوفي بوعدي
فكت ايدها .. ومشت .. ماكانتش عارفة ان امس كنت بنصارحها بحبي ليها .. كنت بنصارحها انها عوضتني غياب ايناس .. عبت الفجوة الفارغة فيا .. بس يللي صار كان قوي لما شفت رقم ورد ع شاشة قصي تشتتو افكاري .. وضاع مني كلامي ..
طول اليوم كانت تعامل فيا كآني سيدها وهيا الخادمة تحتي .. وماحصلتش معاها فرصة للنقاش لانها تتهرب مني .. زين كان يحل في واجبه قعمزت نساعد فيه .. آما ورد في دارها وماطلعتش منها .. جابت مها شوية حلويات ومعاهم طاسة كاكاو لزين .. قعمزت مقابلتنا
مها: ماشا الله كبرت وليت في الاعدادية :)
زين: ايه حتى انا مش مصدق روحي هههههه
جواد: ايه ريتيه يانوسة ولاّ راجل
الصدمة يللي ع وجه زين تدل ع الاشتياق والعيون تعبو دموع .. وصدمة مها كانت غيرة .. وصدمتي انا بأني صدمتهم كانت كبيرة وصعب نستحملها .. بنحاول نصلح يللي قلته
جواد: هههههه مها خيرك ماترديش عليا ؟؟
زين: انت قلت نوسة ولاه ؟؟
جواد: انا قلت نوسة ؟؟ .. هههههه وذانك خربو يازين خليني نديرلك كشف
مها: ايه زينو ممكن تخايلت امك بس .. هي حبيبي اشرب كاكاو سخون يدفيك خللي نجيب كتابك العربي ونسمع عليك النشيد اوكي !!
ابتسم زين : اوكي :)
نضت من جنب زين .. خشيت لداره لقيته ادور في كتابه وتبكي .. سحبتها من ايدها وحضنتها .. اول ماحضنتها تمسكت فيا وبدت تبكي بصوت مكتوم مبحوح .. نمسح ع شعرها بالشوي
جواد: انا آسف مها .. حقك عليا ظلمتك معاي هلبا في الاول تجاهلت لاني ماقدرتش نتحمل قربك نتخايل نفسي نخون في ايناس .. وبعدين جرحتك بكلمتي الغير مقصودة .. وعارف توا نار الغيرة في قلبك مهما كان انا زوجك ومن حقك تغاري عليا .. بس ماتغاريش من وحدة توفت ومش ح ترجع اوكي !!
سحبت روحها من حضني وقالت : هيا مش ح ترجع بس انت مازلت تحبها ومش قادر تتقبلني مهما درت .. خليني جواد نخدمك انت وصغارك ماتعاملنيش معاملة مرتك اوكي !!
جواد: علاش انتي مش مرتي ؟؟
مها: هئه .. مرتك لما تحبها ومعاش تنادي الا اسمها .. كل بنت ياجواد قدامك تكون طيبة وبريئة وحنونة وناعمة وهلبا حاجات حلوة بس اول ماتغار تنقلب للبوة ماتعرف للطيبة مكان
كيف بتمشي شديتها بالقوة من ايدها: قاعد ماكملتش كلامي ماتمشيش
نزلو دموعها وقالت: آآي حاضر
رخيت ايدها وقلتلها: انتي من الاول عارفة انا نحب ايناس وهيا كانت حبي الاول والاخير .. صعب في يوم وليلة نحبك يامها افهمي عليا !!
مها: بس هيا مش يوم وليلة .. ليها سنين غاااايبة ياجواد ولازلت لتوا مش متقبل حد غيرها .. ح نخليلك الوقت براحتك لما تحبني اكيد تلقاني نراجي فيك
جواد: يعني لما نموت انا انتي تتزوجي غيري وتحبيه ؟؟
مها حطت ايدها ع فمها : لالالا بعيد السو خلاااص بلاش منها سيرة النكد .. يجعل يومي قبل يومك
جواد: للدرجة هادي ؟؟
مها: واكثر ياجواد .. مستعدة نتحمل كل شي ع خاطرك وتكون انت في النهاية ليا بس <3
ابتسمت .. ومسحت دمعتها بكفي : ربي يخليك ليا ياطيوبة انتي :)
مها: ويخليك ليا ولصغارك .. هي تعالا زين اكيد يراجي فينا :)
>>>>>>>>>>>>>>>>>
كانت المطر تصب بغزارة .. وبابا وخالتو مها وزين نسمع في ضحكتهم لداري .. ظلمت الدنيا والمطر قاعدة تصب .. سحبت روحي من داري للمطبخ .. من غير مايحسو بيا .. فتحت باب المطبخ وطلعت
>>>>>>>>>>>>>>>>>>
جواد يتحدث ::
بعد كلامها زادت كبرت في عيني بنت الأصل .. كمل زين قرايته وبيمشي يغسل سنونه .. قعدت انا وياها بروحنا ..
جواد: شن كان تفكيرك لما طلعتي من غير حجاب ؟؟
مها: ههههههههههههه ان شا الله كنت تسمع فينا ؟؟
جواد: غير قولي قولي .. مشفشفة لمن تبي توري شعرك بس ههههه
مها: مش قصة نوري شعري بس بنات جيراني وقتها كلهم مش متحجبات
جواد: واللي يطيح في البير انطيحو زيه ؟؟
مها: ههههه مش بالزبط بعد الكف مشيت ع الخط المستقيم
جواد: تستاهلي بوك راجل وامك رباية هههههه
مها: هههههه قعدو اسبوع مايكلمووش فيا تصدق :(
جواد: هههه آهو كبرتي ونسيتي :)
مها: وورد ؟؟ .. امتى بتراضيها ؟؟
جواد: مازال مافكرتش :\
( بااااباااا .. ورد مش في دارها )
لما سمعنا كلمة زين نضنا نجرو وندورو في الحوش .. فجآءة نادت مها ( جوااااد باب المطبخ مفتوح )
مشيت نجري للباب والخوف ع بنتي رافعني مش رجليا :(
شويا ممن انارة الحديقة بينت ورد تحت المطر .. مبلولة كلها مع بعضها وتبكي .. بتطلع مها شديتها( خودي زين توندخلها انا )
طلعت نجري ...
>>>>>>>>>>>>>>
غسلت ذنوبي وخطايا بمية المطر .. اول ماوقفت تحتها بدت دموعي تنزل معاها ومر عليا شريط حياتي كله .. كنت نرعش صح .. بس ماكنتش صقعانة .. المية يللي تنزل عليا دافية .. بايدي الملفوفة نمسح في دموعي وترجع تنزل .. حسيت ربي رحمني من تعذيب نفسي في الدار بروحي .. ربي قدّرلي يللي صار باش نفيق من غيبوبتي الخاطئة .. ظلمت نفسي وربي عفاها .. عذبت نفسي وربي شفاها .. تحت المطر عجز لساني عن وصف شعوري هديك اللحظة .. كل غلطة درتها في حياتي اذكرتها .. دعيت لربي دعوات نابعة من قلب برئي طاهر .. من قلب صغير مجروح .. من قلب مظلوم والدنيا ظلماته .. وقف بابا جنبي وشدني ع طول بيدخلني .. مسكت روحي وبعدت عليه
ورد: مانبيييش نخش خليني نبي نموووت يابابا ولا تقعد بعيد عليا مرة تانية
حضني بقوة : انا مسامحك بس خشي تمرضي يابنتي
ورد: انا آسفة يابابا :(
ماقدرتش نقاوم حبي ليك يابابا .. ماقدرتش ننسى عطفك وحنانك عليا .. مانبيش نخوفك عليا اكثر من هكي .. قامني في حضنه ودخلني الداخل .. تلقتني خالتو مها بالمنشفة قعمزتني جنب الدفاية نرعش ونبكي .. وبابا يحاول يهديني ومقعمز جنبي .. آما زين فوق راسه مليون اشارة استفهام ؟؟
خالتو مها خدت زين وطلعت وسكرت الباب وراها .. قمت عيوني في بابا لقيت فيه نظرة الحب والعطف والشوق .. والخوف .. والحنية .. كل المعاني الحلوة في عيونه .. من غير ابتسامته الصادقة .. نحيت الفوطة ونقزت في حضنه زي الطفل الصغير التائه ولقي امه آخيرا .. حضنته بشدة .. تمنيت توقف ساعات الدنيا كلها وانا في حضنه <3 .. تمسك فيا وقعدت نبكي وهوا يهدي فيا بلطف
بابا: خلاص يابنتي انا اسف ع اللي درته كله . سامحيني
ورد: انت يابابا سامحني .. فداك الدنيا كلها .. وجودك هوا الأغلا في حياتي
ابتسم وشد خدودي : وانا مستعد نحارب الدنيا كلها ولا نشوف دموعك مرة تانية
حضنته من جديد : سامحني بابا <3
بابا: اوعديني معاش ادسي عليا شي .. انا يابنتي من خوفي عليك مش اكثر
مسحت دموعي في كمي المبلول : ايه عارفة .. وعد مني ح ننسى قصي وكل شي صار غلط معاي ونرفع راسك في الجديد اوكي !!
بابا: انتي عمرك كله رافعتيلي راسي ماتلومنيش ع كلامي وقتها لاني كنت بجد متعصب وماتحملتش حجم المصيبة يللي طاحت ع راسي .. يابنتي قصي عرسه الخميس الجاي معاش تتهوري واضيعي سمعتك ع خاطر انسان مش مفكر فيك اصلا .. شوفي حياتك .. واقري وتعلمي وارجعي ورد الاولة يللي نعرفها .. قصي مجرد أخ لا غير هكي احسبيه
تلاشت ابتسامتي .. بس انا وعدته وح نكون قد وعدي : حاضر المهم ترضا عليا انت و ** سكتت شويا وتنهدت ** ماما الله يرحمها :(
بابا: راضيين عليك .. هي وين بوسة بابا ؟؟
تغمرته وكانت لحظة المنتظرة .. اللحظة يللي اتنين يصارحو بعض في غلطهم يللي غلطوه في بعض .. بابا انت سندي .. انت حبي .. انت أميري .. وانت تاج راسي .. وحبيبي .. وعزوتي مستحيل نفرط فيك مرة تانية ..
تحسنت علاقتي مع بابا .. ورجعنا لحياتنا الحلوة من جديد .. جي يوم الخميس كنت نجهز في روحي لعرس خالتو .. خالتو مها دارتلي تسريحة بسيطة .. وشريت قفطان شتوي لونه رمادي ومعاه بوت عالي شوي لونه اسود .. اكسسورات ع الفضي .. وخالتو مها لبست قفطان كاتفة لونه احمر ديزاين الحوتة كمه حاير دارت تسريحة الكعكة ورفعت قصتها شوي .. اكسسوراتها ع الذهبي ومعاه كندرة كعب ذهبية .. خليتها تحط لمساتها الاخيرة .. وخشيت للصالة اتصلت بندى
ورد: حاسة روحي خايفة تعالي معاي بالله عليك
ندى: ياهبلة بنقوللهم ماشية لعرس خالة صاحبتي ؟؟
ورد: وشن فيها ؟؟
ندى: بالله عليك بري روحي ترا .. وقت تتضايقي اتصلي بيا
ورد: بنشوف قصي بالبدلة يزف في غيري :(
ندى: وهذا كنتي عارفتيه بيصير من الاول
ورد: ايه عارفة .. آآآآه .. خلاص بري خالتو مها تنادي فيا
ندى: ردي بالك ع روحك حبيبتي :)
ورد: ان شا الله .. سلام
سكرت الاتصال وتوكلنا للصالة .. كان قلبي يدق بشكل مش طبيعي .. نراجي فيه بالثانية والدقيقة يخش ونشوفه حتى لو مع غيري .. المهم كنت محتاجة لشوفته .. طبعا زين وبابا مشو لحوش عمي .. آول ماخش قصي .. ءء قصدي خشوا لثنين نضت نصفق بحرارة .. كنت متلهفة لشوفته .. لعيونه .. للحيته .. لسموريته .. لطوله .. لعرضه .. لكل شي فيه .. لين شدتني خالتو مها وقعمزتني
مها: خيرك حبيبتي تصفقي وتبكي شن صار ؟؟
ورد: لا شي ** مسحت دموعي ** خوي وزفوه ماتحملتش هادي عيون الفرح
هزت راسها بالايجاب وعارفتها مش مصدقتني .. وقف هوا وياهاا ع الكوشة يصورو .. وجت عيني في عينه .. نظرة عتاب .. ولوم .. ونفس الشي حب <3 .. ماخليتش مشاعري تتحكم فيا .. عدلت وشاحي ومشيت للحمام .. اول ماشفت روحي في المرآية بديت نبكي .. صورته بالبدلة الرسمية حركتلي قلبي بالمشاعر يللي فيه .. حركت كل ذرة حب فيا ليه .. غسلت وجهي وانا طالعة من الحمام لقيته ع الباب هوا وماما فاطمة توصي فيه (( ربي يخليك ياوليدي وربي يهنيك ))
شبحتلها وخشيت كنت نتمنى نكون انا صاحبة النصيب وتكوني ياماما فاطمة اللآي .. بس هذا قضاء الله وقدره .. رجعت للطاولة ونحيت وشاحي وعبايتي
مها: خيرك نضتي ؟؟
ورد: مضايقة شوي :(
مها: خلاص نوضي خلينا نباركو لخالتك
ورد: آوكي
نضنا للكوشة .. تغمرتني خالتو ميس .. باركتلها
ورد: وهادي خالتو مها بتباركلك
شبحتلها من فوق للوطة ..ومدت طراف صوابعها سلمت عليها
مها: الف مبروك وربي يهنيك
ميس: سلمك -_-
حسيت بالاهانة خالتو مها .. نزلت من الكوشة وانا شبحت لخالتو وقلتلها: علاش هكي تتصرفي معاها ؟؟
ميس: ماحبيتهاش .. وانتي معاش تهزي راسك هلبا وتضحكيلها تركب فوقك ره
ورد: آووووف
نزلت وخليتها في اوهامها المعتادة .. حتي وانتي بالابيض قلبك اسود .. خالتو مها حساسة بس تكابر .. تم الفرح ع خير .. اكيد قصي توا مع ميس .. ياريتني كنت مكانها بس :(
>>>>>>>>>>>>>>>>
قصي يتحدث ::
الجثة كانت معاها بس العقل عندك ياورد وخاصة نظرة الحزن يللي شفتها فيك .. ظلمتك ياأختي .. وعذبتك معاي نتمنى تسامحيني .. كنت مقعمز ع كنبة في حوشي وحاط ايدي ع راسي
جتني ميس : خيرك قصي ؟؟
قصي: حاس روحي بنمرض .. البدلة خفيفة والجو اليوم مصقع
ميس: هييي امالا شن نقول انا فيلو وحوسة
قصي: ايه خلاص بدلي وتغطي كووويس
ميس: يعني نرقد ؟؟
قصي: ايه والله ناااعس وفاااشل غدوا نهدرزو
نضت وخليتها مصدومة فيا مش قصدي نجرحها بس فعلا عقلي مع ورد وشن صاير معاها توا هل تبكي ؟؟ .. والا متآلمة وساكتة ؟؟ .. طلعت للجنان وقمت تليفوني وبنتصل بيها ..
طووووط ... طوووووط

#Dudu