الحضن الدافي

Part 30

#الحضن_الدافي

الحلقة :: 30 ::

سكرت من ميس .. وطلعت من داري .. مالقيتش ورد .. سألت عليها قالولي في الجنان تلعب .. استغربت .. ورد من نوعها الحزين .. صعب تنسى مشاكلها بهالسهولة وتطلع تلعب .. طلعت لقيتها تبكي تحت الشجرة .. وشادة مذكرتها تكتب .. قعمزت جنبها .. وخديت راسها ع صدري .. في هديك الفترة كانت ورد تتحشم مني .. تتحجب .. وتحاول ماتقابلنيش هلبا .. بس لما عرفت بوها محبوس .. حسيتها تتقرب مني .. وديما ع لسانها ( انت تشبه لبابا هلبا) .. لما حضنتها ارتاحت .. تمسكت فيا بالقوة وقعدت تبكي .. بكي يقطع القلب .. بكي يأثر في قلب المتحجر .. بكي طفل يأس من حياته رغم صغر سنه .. بكي خلا عيوني تدمع .. خليتها تاخد راحتها في بكاها .. بعد ماهدت شويا بعدت عليا .. ومسحت دموعها بسرعة .. خدودها حمر .. وتحشمت ( آسفة قصي )
قصي: ع شني بس !!
ورد: انا ديما انكد عليك وانضايق فيك :(
قصي: هههههه من شني تبكي انتي !!
ورد: حاسة روحي ضعيفة هلباااا ياقصي .. وزين في رقبتي .. ماما ماتت وعمره 4 سنين .. وبابا محبوس وعمره 9 سنين .. مازال صغير ع الحالة هادي :(
قصي: ماتخافيش زين في رقبتي انا مش انتي .. ماتخافيش عليه معاي هوا :)
ورد: لالا .. ياسرك انت تعبنااك هلبااا.. ديما وانت في مشاكلنا .. توا اتزوج وارتاح
استغربت في كلامها .. حكيت جبهتي شويا وتلفتلها ( من قالك نبي نتزوج ؟؟ )
ورد: ماما فاطمة تبي تفرح بيك ... وتراجي في هاليوم بالدقيقة والتانية .. وانا ماتخافش عليا .. عمي قال بنديرلكم شقة صغيرة فوق تقعدي فيها انتي وخوك
قصي: علاااااش !! .. قصدي علاش ماتقعدوووش في حوووشنا ؟؟
ورد: اسسس نقص صوتك .. قلتلهم مش ح نقوله قصي
قصي: كيف صغار بتقعدو بروحكم ؟؟
ورد: المهم انت تتزوج وترتاح .. وبابا بندعيله ليل نهار يطلع من الحبس ان شا الله .. مظلوووووم بابا والله مظلووووم
تنهدت وليت قعمزت جنبها .. وحطيت ايدي ع كتفها ( ايه مظلووووم انتي ادعيله بس )
ورد: باه .. وامتى بترفعني ليه ؟؟
قصي: الخميس ان شا الله .. بنزوره تو نرفعك معاي اوكي !!
ورد: بجديااااااااات !
وقفت فرحانة وتنقز .. وبعدين تغمرتني بقوة ( شكرا قصي بجد شكرا )
وخشت تجري .. وسيبت مذكرتها ملوحة جنبي .. قمت المذكرة ع اساس تاخدها بس باعدت عليا .. جت عيني ع وراقيها وجاني الفضول نعرف تفاصيل ماتكتب هالصغيرة .. فتحت اول ورقة
( استاحشتك ياماما .. انا اليوم دوشت لزين ولعبته هوا وديمة .. امتى بتجي تشوفينا كبرنا ولينا حلوين زيك )
الورقة التانية
( طلعنا عمي اليوم للبحر وكان محلااااه .. انتي زماااان تحبي البحر .. وكنتي تقوليلي ياخد في الحاجات الشينة منا ويعطينا الحاجة الحلوة .. انا قعمزت ع الشط وكتبت اسمك .. وصورته بتليفون عمي .. لما تروحي تو نوريهالك )
بعدين قلبت مجموعة ورق .. وجت عيني ع ورقة مكتوب فيها كلام مميز ع اللي قبله
( قصي .. ولد عمي الصغير .. انا نحبه لان ديما يجيبلي في الحلويات يللي نحبها .. ولما ماما توفت هوا قعد معاي وخلاني نكتب لماما رسايل وهوا عارف انها مستحيل ترجع وتقراهم .. وقف معاي لما الابلة عاقبتني ع خاطر بعت العابي .. وديما يساير فيا انا وزين .. حتي بابا ديما يشكر فيه .. هوا صح يعصب فيا ومرات يضحك عليا .. بس انا نحبه هلبااااااا .. قصي زي بابا وكآنه خوي الكبير مستحيل يخليني في يوم مضايقة من غير مايراضيني .. مستحيل يمشي لصحابه ويخليني مكسدة بروحي .. سعدودها خالتو بتتزوجه وبتجيب صغار حلوين زيه .. وطيبين .. انا نحبه قصي .. ولما يكون عنده صغار ح نعاملهم زي ماكان يعامل فيا .. ربي يخليك ليا .. من ورد )
ابتسمت لكلامها الطفولي البرئي .. قصي بابا وخوي <3 .. وربي يخليك ليا .. حتي انتي ياورد ربي يبعتلك الايام الحلوة .. ولما تكبري يجيك نصيب يللي تتمنيه ياااارب .. كيف بنسكر المذكرة .. طاحت مني وانفتحت ع اخر ورقة .. يللي كانت ورد تكتب فيها
( بابا استاحشتك يابابا .. علاش مشيت وخليتنا ؟؟ .. انا امس عرفت بانك محبوس ع خاطر فلووس .. بابا انا مانبيش فلوس ولا نبي حوش ولا نبي شي .. نبيك انت ديما معانا .. تحضني وتلعبني .. وترفعنا لكل مكان نحبوووه .. ياااسر جنى سافرت وخلتني .. بتخليني حتى انت يابابا .. حرااام عليك زين بيكبر وانت بعيد عليه .. روحلنا بسرعة يابابا .. انت من غيرك نخااااف منها الدنيا .. شوف في غيابك شن دارت فيا .. خالتو معاش عدلت علينا بدي همها كله قصي .. وماما فاطمة قلقت منا بدت تكشخ علينا واطلع فينا في الجنان .. وعمي بدي يمل من دوشة زين كان لعب والا قعد يبكي مستاحشك ف يكشخ عليه .. والياس لاهي في ولده ومرته .. والحوش ولا ضيق علينا .. حتى عمي قال بيبنيلنا فوق ويخلينا بروحنا .. روح يابابا خللي نمشو لحوشنا ونعيشو بروحنا .. حتى اميما وجدو معاش جونا .. يابابا انا نبيك ديما معانا معاش نبي شي يفرقنا.. كلهم معاش متحملينا وعندهم الحق .. وقصي مسكين يجري من مكان لمكان باش يطلعك من الحبس .. بابا انا كرهتها العيشة هادي .. يااااارب رجعلنا بابا بالسلامة .. نبو نعيشو عيلة وحدة .. نبي نفرح بيك زي البنات .. نبي نعطيك صحيفتي تشوفها وتوقعها انت مش عمي .. نبيك تغنيلي بصوتك هههه لين نرقد .. نبيك تقرالي قصة وتعلمني كيف نكتب قصة .. نبيك ترفعنا للملاهي وتلعبنا .. نبيك زي ماقلتلي زمان بدخل زين للفروسية .. نبي نكبر قدام عيونك انا وزين .. نبيك تفرح بشهادتي الاعدادية العام الجاي .. يابابا انا والله نخااااف نقعد بروووحي ونربي زين بروووحي مانعرفش .. انا ح ندعي ربي تحضر حفل تخرجي من الشهادة .. يااااارب بابا يطلع اليوم قبل غدوا .. ماعنديش غيرك ياربي انا نحبه هلبااا بابا .. نبي نفرح معاهم بس ... ورد )
أثر فيا في كلامها هلبااا .. وعرفت ان أمي وبوي وجعوها بكلامهم .. سكرت المذكرة ونضت بنعطيهالها .. جتني تجري .. ( قصي ريت مذكرتي ؟؟ )
قمت ايدي فوووق وشاد المذكرة ( قصدك هادي !! )
ورد: ايه هيا .. اعطيهالي :)
قصي: آممممم بشرط واحد بس
ورد: شن هوا ؟؟
قصي: شديني شن رايك !!
ورد: كيف ؟؟
طلعت نجري .. وقعدت اندور ع الجنان .. في البداية ضحكت بعدين لحقتني تجري وراي .. ضحكنا وفرغنا الحزن يللي فينا احني الاتنين .. قريب ساعتين واحني ع هالحال .. انا نجري وهيا تجري .. مافيش حد فينا دهش .. تعب .. بالعكس .. كنا نجرو فرحانين .. واخيرآآ شفت الضحكة ع وجهك ياوردتي <3
فاآآآتت الايــــام :: وجي يوم الخميس ::
>>>>>>>>>>>>>>>>
نضت الصبح مع الساعة 7:00 وتيت روحي للمدرسة .. لبست حوايجي وطلعت لقيت عمي يراجي فيا البرا .. ركبت انا وزين ومشينا للمدرسة .. قعمزت في مقعدي ونفكر كيف ولّا شكل بابا زعما بعد الحبس !! .. بنتلاقى انا وبابا اخيرآ .. زعما كيف بيقابلني ؟؟ .. يااارب يكون بخير وصحة وعافية مانبي شي غير هدا .. ابتسمت بعد تفكير حصتين كاملات .. انتبهت عليا الابلة وقالتلي ( ضحكينا معاك ياورد ) .. استوعبت للقطة يللي درتها .. تلفتت يمين يسار لقيت الفصل كله يشبحلي .. عدلت تقعميزتي وقلتلها ( ولا حاجة )
الابلة: انتي ماكنتيش معانا لما نشرح ولاه !!
ورد: نعم !!
الابلة: آها .. معناها ماكنتيش معانا .. ترا نوضي ارسميلي رسمة القلب
ورد: القلب ؟؟؟؟؟؟؟؟
في جنبي صاحبتي واسمها ندى نخصتني ع جنبي وقالت ( ياغبو هادي حصة العلوم وانتي سارحة من امبكري )
وشوشتلها ( باهي شن الحل ؟؟ )
( اطلعي توا ومرة مرة اشبحيلي ح نسميلك اوكي !! )
( تمام .. شكرااا ندووو )
الابلة: شني مطوووولة ياورد ؟؟
ورد: لااا نساوي في وشاحي بس .. آهو نضت .. وين الخطاط !!
خديت الخطاط .. ورسمت بالشويا ومرة مرة نشوف لندى يللي كانت جنبي في المقعد التاني وتسميلي .. وهكي رسمت رسمة شبيهة القلب .. بس مش القلب نفسه
الابلة: هدا شنو ان شا الله !!
ورد: ءءء هدا القلب ياابلة :)
الابلة: هدا القلب والا ولد عمه !! .. انتي جاية هنا تضحكي عليا ؟؟
ورد: حشاااك .. علاش شن درت انا !!
الابلة: خليك واقفة نكمل الحصة وننزل انا وياك للمديرة تتفاهم معاك
ورد: آآآه حااااضر :(
شبحت لندى صاحبتي اكتر متآثرة معاي .. وملامح وجهها الحزينة اتبتتلي انها الصديقة الحقيقة .. تفرح لفرحك .. وتبكي معاك .. تمت الحصة ونزلو كلهم للاستراحة الا انا نزلت للمديرة .. اول مافتحت الباب .. لقيت قصي مقعمز في الادارة .. فرحت من كل قلبي بآنه انقذني من الموقف البايخ يللي انا فيه .. جيت سلمت عليه .. ووقفت جنبي ابلة العلوم وقالت ( هادي الطالبة ديما في الحصة سارحة .. وماهيش مواضبة في دراستها )
قصي: ءء عفوا ياابلة انتي قصدك ورد !!
الابلة: ايه ورد .. وانت من تكون !!
قصي: انا ولد عمها
الابلة: والله !! .. انا نبي نعرف وين اماليها ليش مايركزولها ع قرايتها ؟؟
ورد: ماما الله يرحمها
الابلة: آوووووف
تنهدت الابلة وقعمزت مقابلة قصي .. والمديرة شبحتلي بكل حزن وقالت :: شن يللي شاغل بالك اليوم ياورد ؟؟
كيف بنتكلم قص عليا قصي وقال :: سامحوها .. اخر مرة ياورد ولاه !!
ورد: ايه ايه
الابلة: ماشي ماشي .. بس ع خاطرك جيتك هنا وتعبناك انا هالبنت مطلعتلي الشيب .. كل مانقول اهي بتعقل تزيد تهبل .. ولا مش هكي بس عندها اللامبالة بشكل مش طبيعي .. سامحني استاذ قصي بس لازم ماتهتمو بيها .. راهي التربية قبل التعليم .. السلام عليكم
طلعت الابلة وخلت دمعاتي ع الجفون تستنى حد يقوللي كلمة وبننفجر :(
روح بيا قصي باش نبدل حوايجي ونتجهز لزيارة بابا .. لبست بلوزة سودا للركبة وسروال اسود ووشاح اسود .. وخديت شنطتي حطيت فيها شويا حاجات بنستعملها .. وركبت السيارة وتسقدنا .. طووول الطريق نفكر في كلام الابلة .. ونفكر في بابا .. وزين يللي خليته غافل ع كل شي في المدرسة مازال .. وصلنا اسوار السجن .. تعلقو عيوني للسور العاااالي .. وكنت نشوفله بصدمة
ورد: قصي ليش سورهم عااالي هلبا !!
قصي: باش مايفكر حد يهرب
ورد: وفي شوك ع السور من حديد باش يللي يحاول يهرب ينجرح وينصاب صح !!
قصي: صح .. شني نخشو ؟؟
نزلت عيوني لووطة .. وغمضت عيوني بقوووة كآني نجهز لمنظر بابا يللي توا بنشوفه .. خايفة عليه من الضعف والهموم يللي مجاوراته في السجن .. خطيت خطواتي منه واثقة ان بابا مظلوم .. ومنه خايفة من كلام الناس علينا .. خلاني قصي في الانتظار وخش للمكتب مانعرفش السبب ,.. قعدت البرا نراجي ونشبح يمين يسار خايفة من الشرطة يللي كل مرة خاشيين بواحد ويضربو فيه ويدفو فيه .. بعدين لقيت مرآ تبكي وتخبط ع وجهها .. لصقت في الحيط وقعدت نراقب فيها .. وقف عليها راجلها وقعد يهدي فيها .. وهيا قاعدة تبكي وتصيح .. ( بيعدموووه راشد خلاااااص بيعدموووووووووه .. صغاري بنربيهم بروحي آآآآآآآآخ بعد هالسنين كلها نراجي انا وولاده بيقتلووووه .. باهي علاااااش )
**خلااااص معاااش تبكي وكلي ربي وقولي حسبي الله ونعم الوكيل فيهم
( حسبي الله ونعم الوكيل فيهم .. ربي ياخد فيهم الحق .. حسبي الله )
**معاش تبكي قلتلك خلاااص تعذبي في روحك خللي نروحو للصغار وماتحسسيهم بشي
( اكيد توا مش ح يحسو بشي بس لما يكبرو ح يفقدو بوهم يااااارب ياااارب .... )
وحطت ايديها ع وجهها وقعدت تبكي بحرقة .. بس في كلماتها وجع ناااض عليا .. فكرني بشي مهم في حياتي وفقدته .. في الاول ماما الله يرحمها .. وبابا !!! .. لو بابا بيعــ ..... لالالا بعيد السو .. معاش تفكري هكي ياورد بوك ح يطلع ويعيش معاكم خلااااص نحي هالافكار السودة من راسك .. حطيت ايديا ع راسي وعصرت عليه بقوة .. تمنيت مع هالعصرة تنزاااح كل افكاري الوهمية المخيفة .. يللي بتعذبني عمري كله .. قمت راسي واستنجدت ربي يللي مافيش خير منه .. ودعيت في سري ونجواي يحميلي بابا ويحفظه ويرجعلنا سالم معافي :) .. غمضت عيوني بقوة طلع قصي ..
قصي: ليا ساعة انادي فيك وانتي شي .. شن في !!
قمت عيوني فيه وبعد للمرآ .. وقلتله ( راجلها بيعدموه مسكينة )
قصي: معاش تركزي ع آي شي يصير قدامك تمام .. هي تعالي بوك يراجي فينا
ابتمست .. ابتسامة خوف .. هزيت راسي ونثرت كل تخيلاتي .. وكملت دربي .. خشينا لغرفة مظلمة فيها ضي بسيط جاي من شق الباب .. قعمزت ع كرسي ونرعش مع بعضي ومتلهفة لشوفة بابا <3 .. بعد ب 10 دقايق .. خش بابا .. وقفت من الشوق .. لا من الصدمة .. بابا علاش هكي ولّا!! .. شن يللي صار وخلاك ضعيف وشين يابابا ؟؟.. كنت رافعة ايديا بنحضنه .. بس نزلت بالشويا .. ومع ايديا نزلو دموعي .. شبحتله بكل حزن .. ونفس النظرة في عيونه .. مانتفكرش شن وضعه قصي جنبي .. بس اكيد مصدوم حتي هوا .. ع طول نقزت في حضنه وقعدت نبكي ونبكي ونبكي .. وبكلمات متقطعة ( بابا انا نحبك ) .. ( بابا استاحشتك ) .. ( بابا نخاف بروحي يابابا ) .. ( بااااباااا ) .. وهوا حضني بقوة .. لين حسيت بروحي خشيت بين ضلوعه .. حسيت بحنانه .. حسيت بالامان .. وحسيت بالدفء .. حسيت بحضن بابا يللي فاقداته ليا سنة بطولها وعرضها .. وايامها وساعاتها .. دقائقها وثوانيها .. بكل شي حلو ومر فيها .. ايديا ورا رقبته وزدت تعلقت بيه .. وزادو دموعي بللو سوريته .. ودموعي يللي كل ماتنزل ع كتفه تحرقه اكتر .. بعدت راسي من عليه شويا وقلتله ( ب...بــ .. بابا )
بابا: ياعيون بابا انتي .. ورد كيف حالك يابنتي ؟؟
ورد: تاعبة هلبا .. يابابا انا مانقدرش نعيش بلاك يابابا
نزلني من حضنه شويا وليت شديت في رقبته وانا نبكي .. ومافي شي ريحني غير حضنك يابابا ..
قصي: خلااص ورد .. هي هدرزي ع بوك شويا راهو الوقت يجري وتخافي يطلعونا
نزلت ومسحت دموعي بقوة وقلت: كل شي نبي نقوله .. انا نحبك وزين يراجي فيك يابابا
بابا: هههه قعمزي واحكيلي شن مدايرة مع حوش عمك ؟؟
شبحت لقصي ورديت عيوني لبابا: الحمد لله
بابا: قصي معليشي .. خلينا بروحنا
قصي: تمام
طلع قصي .. وحطيت ايديا ع وجهي وقعدت نبكي .. حولي ايديا وقاللي : شن في يابنتي تكلمي ؟؟
ورد: انا مستاحشاتك هلبا
بابا: انا اكتر يابنتي والله .. تعرفي انا قداش مستاحشك ؟؟
ورد: قداش ؟؟
بابا: آمممم قد البحر كله
قعمزوربع قدامي .. ع طول قعمزت مقابلاته
بابا: ايه علاش لابسة اسود ؟؟
ورد: اصلا من يوم خشيت للحبس وانا لبسي اسود
بابا: فكرتيني بأمك .. حتى هيا تحب الاسود ع خاطر رواية الاسود يليق بك هههههه
ورد: هئه .. انا مانحباااش ونتمنى نلبس الوان .. بس بعد فراقك انت وماما معاش في بنة للحياة .. مافيش غير الاسود يعبر عن حالتي
بابا: والله كبرتي يابنتي والهم ماباش يسيبك
ورد: امتى بتطلع ؟؟
بابا: آمممم والله مانعرف .. كيف حال زين وقرايته ؟؟
ورد: الحمد لله .. بابا نطلب منك طلب !!
بابا: آها قولي ..
فتحت شنطتي وطلعت مذكرة وبيرو ..ومديتهوله
بابا: شني !!
ورد: تكتبلي رسايل وانت في الحبس ولما تطلع توريني شن كتبتلي اوكي !!
بابا: تمام ياعيوني انتي
عطاني بوسة ع جبيني وحط المذكرة والبيرو في جيبه .. وخداني في حضنه من جديد .. تنهدت .. ارتحت .. هذا #الحضن_الدافي .. حبيبي يابابا <3
>>>>>>>>>>>>>>>
جواد يتحدث ::
حسيت بأنفاسها في رقبتي .. حسيت قداش هيا موجوعة من فراقي .. حسيت بحضنها الصغير .. العيون تلاقو والقلوب حكت مع بعضها .. من حضنها عرفت شن صاير معاها .. من هموم .. ومشاكل .. من نظرتها لقصي اكتشفت انه صاير معاها موضوع في حوش خوي .. حطيت ايديا ورا راسي وتنهدت .. محتاجك ياايناس توا .. محتاج وقفتك معاي .. آآآآخ .. ياريتك معاي توا .. حضنك يعوضني ع كل شي مر ذوقته في حياتي .. بس شن بنقول!! .. قضاء الله وقدره .. الله يرحمك ويجمعني بيك في الجنة ياروحي انتي <3 .. فتحت عيوني .. خطرت في بالي مذكرة ورد .. ابتسمت لبراءة بنتي وعفويتها .. نفس طباع امها تحب الكتابة <3
<<<<<<<<<<<
كنت فرحانة لاني شفت بابا .. ومضايقة لان بابا ضعف ومضايق ووجهه شااحب .. خشيت لداري لقيت يزن راقد .. مسحت ع شعره فاق بيا
زين: وين كنتي ؟؟
ورد: كنت ... مع قصي شريت شويا حاجات ناقصيني :)
زين: وينهم الحاجات ؟؟
قعمز ع السرير ويحك في عيونه ..
ورد: ءءء في المطبخ .. كتبت واجبك ؟؟
زين: لا نبيك تشرحيلي درس رياضيات .. بس عطلتي هلبا عليا
ورد: آمممم مش مشكلة .. طلع كراساتك ونعلمك شن رايك !!
زين: آوكي
ناض من السرير ومشي جيهة الدولاب .. بعدين رجع خطوتين التالي وشبحلي ( معاش تطلعي من غيري ورد اوكي !! )
ابتسمت .. وهزيت راسي بالايجاب .. مع غمزة عين .. ضحك وجاب كراساته .. وبدينا في الدرس
>>>>>>>>>>>>>>
علي عيني لما تؤمــرني .. قلبــي يلبي قبـــل العيـــن
مُنَــى قلــبي لو ترضا عني .. وادعيـــلك ربي يازيــن
بدعيـــلك ربي يعينـــك .. بدعيـــلك من الخيــر يزيـــدك .. يابــيي ياضــي العيــن
من قبـــل الدنيـــا ماأشوفـــك .. قلبــك بالحب مدفينــي
كلمـــاتي كلــها وحروفـــك .. لو احكيــــها مابتكفـــيني
<<<<<<<<<<<<<<<
جواد يتحدث ::
( ورد يابنتي ...