عـروسُ الـبَلّْـطـجـي 🔞 [مـكـتـمـلـة]

PART 17 🔞

"عـروسُ الـبَلّْـطـجـي" 🔞

شـمـس و سـيـمـونـا 🎶

البُنُّ فِي عَيْنَيْكِ يَغْلِبُ قَهْوَتِـي ، ‏لاَ تَحْرِمِينِي لَذَّةَ الفِنْجَـانِ، ‏عَرَبِيَّةٌ تِلْكَ العُيُونُ أَلِيمَـةٌ ،جَمَعَتْ مَذَاقَ البُنِّ وَالهَذَيَـانِ.

•منتصف الليل ، لبيبان تسدت ، و الرزاق وقفت* ، و لعباد نعست...بقى غا هو كيف لبومة فايق..
جالس فالكوزينة ، كيشرب فقهتوا لمعطره ، و كيقلب فشلا وراق بين يديه ، سمح الحس ، دور راسوا نص دورة ، لقى مو ، عقد حواجبو ونطق بصوت خافت.

عباس : ما نعستيش ؟

لالة جميعة: لا ، [شدات فراسها] واقيله الطانسيو* طالع ليا تاني ، من إينا وقت وأنا غا كنتگلب فبلاصتي ، وحلف داك النعاس لا جاني ، نزلت نشوف واحد دانون مسوس ، نحك فيه شي خيارة ولا شي ثومة ، لعل وعسى يحن علينا الله و يبرد هاد العافيه لي نايضة ليا فگنتي .

عباس [بنبرة قلقة] : يا كما نديك للمستعجلات تعلقي شي سيروم ولا شي حاجة!

لالة جميعة : لا أوليدي لا ، شوية و يفوتني لحال .

عباس [ناض وقف] : جلسي بعدا [قرب لتلاجة حلها] دوك لوراق ديال الكركدية فين هوما هـ [لقاهم] ها هوما.

جبد لقريعة ديال الزاج لي كاوا فيها لوريقات مجففين ، هز كاس ، حط فيه الجهد جوج صباع ، كب عليهم شوية ديال لما الطايب لي كان شايط فالمقراش* ، ومدو ليها.

عباس : راه قلت ليك جلسي [خلاها حتى جلست و مدو ليها] صبري عليها واحد الشوية بين ما تطلق و تدفى ، ديك الساعة نزلي عليها و ݣرݣفيها فدقه باش ما تحسي لا بمرورة لا والو.

لالة جميعة [تبسمات] : سير أوليدي [خداتو من عندوا] أنا بغيت ليك مجالب الدنيا ، تحش و تجيب حتى لبين يديك ، غا أنا بعدا راه رضاتي مغطيك و مفرشك أحبيبي.

بادلها الإبتسامة ، باس ليها كتفها ، جمع وراقوا ، لبس سبادريتو ونطق.

عباس : غادي نضرب لجديدة مع الشباب ، الصباح يلقاني هنا إلى ساليت بكري ، ولا سولت سلطانة ، قولي ليها ما غاديش يتعطل بزاف.

لالة جميعة [عقدت حواجبها] : الله يا وليدي على الجديدة ، كوراه الطريق مقطوعة مع هاد لخيورات تبارك الله ديال الشتا.

عباس [بنبرة هادئة] : واحد الأخ ، شهراين و هو محفي لينا لگدام ولد لحرام من فعلوا ، شدوه تما ، و خاصنا نمشوا باش نشوفوا الدنيا كيدايره ، و منها نيت نجيبوه معانا هنا ، يلاه نبرد فيه سهر الليالي و تمارتها شوية.

لالة جميعة: لاواه أوليدي لاواه ، رحم الناس يجيب ليك الله من يرحمك و يرحم ذرتيك من بعدك.

عباس : كون تعرفيه ما داير من زبايل و فضايح ، گاااع ما تذكري لمحنه على فمك أمي ، و لي مرضني فصحتي [جبد واحد التصويرة من بين لوارق وراها ليها] دابا هادا ، تقولي  قاتل شلا ناس بالغدر ، مطيب شي أو واكلوا، أو شي قالك دايروا فالگدرات بحال لخليع.