عـروسُ الـبَلّْـطـجـي 🔞 [مـكـتـمـلـة]

PART 66 🔞

عـروسُ الـبَلّْـطـجـي" 🔞

شـمـس و سـيـمـونـا 🎶

البُنُّ فِي عَيْنَيْكِ يَغْلِبُ قَهْوَتِـي ، ‏لاَ تَحْرِمِينِي لَذَّةَ الفِنْجَـانِ، ‏عَرَبِيَّةٌ تِلْكَ العُيُونُ أَلِيمَـةٌ ،جَمَعَتْ مَذَاقَ البُنِّ وَالهَذَيَـانِ".

"قد مَرَّ بي ألَمٌ، فأشفقَ قائلًا: يَكفيهِ ما فيهِ من الآلامِ"

•خرجات تبعاتو هي وختها بالحفا ، حلف لا وقف ليهم ، مرجانة شدات فيه أو زاوݣات حتى شبعات ، رماها حتى طاحت على قاعها ، طلع لطوموبيلتو أو تحرك من تما بلا ما يهزهم معاه...لحݣوا عليه بديالهم...لقاوه دخل لدار...سمعوا صوت لالة جميعة كتغوت من عند لعتبه أو مجيد كيحاول يهدأ فيها.

لالة جميعة [وهي كتضرب فجنابها] : وااا ميمتي وليييدي كيجمع فحوايجو باغي يخوي عليا الدار ميّ.

مرجانة [وهي شاده فتحت كرشها لي ضرها] : أش واقع أخالتي ؟

مجيد [أشار ليها لعباس لي كان واقف قدام الماريو كيزيد يجمع فحوايجو كاملين] : قالك غادي يمشي لواحد الدار أخرى.

مرجانة : واش دار جدكم لقديمة ؟

خلاتهم داويين أو مشات قربات لعندو ، بلعات ريقها ونطقات بصوت خافت.

سلطانة [بصوت باكي] : فـ فـ فين غـ غـ غادي أ عباس ؟ [شافتو ما جاوبهاش وهي تمد يدها لدراعو ، دوراتو بزز لعندها وهي تضيف بعدما نزلو دموعها] على الأقل غير خـ خـ خليني نشرح ليك ، أو ديك الساعة دير لي بـ بـ بغيتي.

عباس [ببرودة بلا ما يشوف فوجهها] : جمعي يدك ، أو بلا ما تخليني نمد يدي عليك ، أو نغلط فيك.

لالة جميعة [وهي كتمسح فدموعها] : إيه أوليدي إيه ، سدو عليكم أو تفاهموا حتى تتسامحو ، راه إلى مشيتي أو خليتي هنا وراك غادي نسخط عليك.

عباس [دفع سلطانة بعدها عليه أو نطق بحدة وهو مخرج فيهم كاملين عينيه] : فااااش غادي ندوي معاها أمي فاااش!!! [أشار بصبعو لمرتو] دخلنا عليك بالله واش هادي ديال المفاهمة ؟ واش هاد السيدة لي حاملة أو مخبية عليا أو مخلياني حتى شديت الطريق عاد مشات قتلات داكشي لي فكرشها غنقدر أنا نكمل معاها حياتي أو نأمنها على داري ؟ [هز صاكو] إلى غيري غيّقد ، أنا لا ، أنا ما غاديش نقدر.

سلطانة [حسات بسخفة وهي تجلس على طرف الناموسية] : آش كترون أ عباس ، [حطات يديها على كرشها] مالك درتيني قتلوا و هو باقي فكرشي ، راني غير كنت تالفة ، وما تنساش راه حتى نتا ما كنتيش باغي ، [عضعضت شفايفها] داكشي علاش قلت نحيدو بلا ما تسيق لخبار ، قبل ما نصدقوا باغينو.

عباس [بنبرة ساخرة] : تبرير فاشل والله [شاف بنص عين] كنتي غتحيديه باش يجيك الطلاق مني ساهل ياكي! [سكت لثواني وأضاف] بغيتي براتك ؟ غا قوليها ، من غدا تشديها ، ما بقى عندي ما ندير بوحدة بحالك فداري.

لالة جميعة [وهي كتندب فحنوكها] : أويلي يااا وليدي ولا تقووولها [ترمات ليه على دراعو] بنت خالتك أو مريتك حاااملة تطلقها! [باست ليه يدو] أنا راااضية عليك اميمتي إلى ما مسحها فيا ، راه والله ومشيتي حتى درتيها أو خرجتي من الدار و فرقتي بنت ختي ، غا لا باقي شفتي وجهي عكر ليا ، أو قول راه العبدية ولدت فمي غا لخلا.

نطقات بلي عندها أو خرجات ، عارفة راسها آش ساوية أو عارفة ولدها ما كيطيحش بكلامها ، زيدت مجيد أو مرجانة قدامها ، و خلات الأزواج بوحدهم...عباس خبط صاكو فالأرض أو برد برجلو حرو فيه ، دار ليها باش يكمل بيها الساعة بانت ليه حاطه يدها على فمها كتبكي أو هو يدير بناقص ، خاف من ذنوب تيلادها ، ما قتلتو العملية ، يقتلوه جنونو.... شاف حتى شاف أو تم خارج.

فطريقو لبرا ، لقى غيثة نازلة فدروج بشوية عليها ، غا شافتو تبدل فيها اللون.

عباس [وهو كيطلع فيها أو يهبط] : صحيتي!

غيثة [وعينيها فالأرض] : شـ شـ شوية أخويا.

عباس [حرك راسو بالإيجاب] : غا صحي مزيان أو صحصحي البطله ، [أضاف ببرودة] من غدا غنبدا نقلب أو نشوف ليك شي حد يديك عليا من هنا ،سوا كان ولد الناس ولا ولد لـ'حاب...المهم يهنيني من تبرهيشك الخاوي و يقطع فمك النفس باش تحسي بحق نعمة داركم ، حيت لي فيهم لغدر بحالك ، [رفع صوتوا باش يوصل للي لمحها مخشية لتواليت كتتقيا] ما يستاهلو غا شماكرية أو' ـوامل.