عـروسُ الـبَلّْـطـجـي 🔞 [مـكـتـمـلـة]

PART 50 🔞

عـروسُ الـبَلّْـطـجـي" 🔞

شـمـس و سـيـمـونـا 🎶

البُنُّ فِي عَيْنَيْكِ يَغْلِبُ قَهْوَتِـي ، ‏لاَ تَحْرِمِينِي لَذَّةَ الفِنْجَـانِ، ‏عَرَبِيَّةٌ تِلْكَ العُيُونُ أَلِيمَـةٌ ،جَمَعَتْ مَذَاقَ البُنِّ وَالهَذَيَـانِ"

•ما حطوا لغدا حتى للعصر... ما رجعوش بكري ، دازو تقداو لي خاصهم لدار عاد رجعوا بحالهم...عباس غير حطهم عند لباب ومشا لخدمتوا ، غيثة ما كلاتش معاهم ، كتوجد لواحد لكونكور غتدوزوا مع الصباح... سلطانة نقبات غير شوية وناضت لدوش دوشات... دارت بحالتها ، صاوبت شعرها أو عطرت ذاتها أو رطباتها ، قادت ظفارها ولبسات بيجامه فالأببض حتى لركبه خفيفه... هزات تيليفونها لي كانت نسات فالدوار ... لقات سارة مصونيه عليها ، الساعة ما عندهاش الرصيد باش تصوني...دارتو تحت لمخده أو شعلات التلفازة تتفرج...لالة جميعة بقات جالسة بوحدها... غسلات دوك لميعنات ، و سيقات أو عجنت شوية ديال لمسمن أو خلاتو فميكه يرتاح... يلاه حطات قاعها فالصالون ترتاح وهي تسمع صوت الدقان فالباب...طلات من السرجم وهي تلقى ولدها مجيد...شافتوا وهي تعقدهم... خرجات حلات عليه ونطقات.

لالة جميعة [وهي كتطلع وتهبط فيه] : آش كاين تاني ؟ لاش جاي ؟

مجيد [بنبرة هادئة] : نرجع منين جيت أمي ؟ [وراها صاكو لي فيدو] راني رجعت لعندكم فـ...

لالة جميعة [قاطعتوا بحده] : عندنا الضيق أوليدي ، وأنا ما نگدش نجمع جوح عريسات فدار وحده ، غا سير شوف فين تدي مراتك أو سير لشي موضع خر.

مجيد: ولكن راني وليت غا ديال راسي [سكت للحظة وأضاف] دفعت لطلاق أمي.

لالة جميعة [خرجات عينيها] : حلف بالله!!

مجيد [جبد واحد الورقه من جيبو او مدها ليها] : نهار 20 عندي أول جلسه...و زايدون راه ما بقاش عندي الجهد لي نكذب بيه عليك أمي...[حنا راسوا للأرض] ماشي مشكل ، بلاصتي فدارك عمرات [تم داير] خليتك على خير أ....

لالة جميعة [شدات ليه فدراعوا أو تمات مدخلهاه] : أزييييد من لهدره لخاااوية زيييد [تبسمات] حشومة تمشي تسكن وحدك أوليدي كي الزوفري أو داركم فيها شلا تواسع حشومة.

گلعت ليه صاكو أو دخلتوا لصالون بركتوا ، مشات للكوزينة تجري ، جابت التعامر ديال أتاي و عيطت على سلطانة لي سمعت صوت غواتها وهي تنوض قافزة بعدما كانت عينها داتها.

سلطانة [وهي داخله كتنگر] : الله إخليها قاعيده فيـ...[شافت مجيد وهي تسكت ، تبسمات وأضافت بعدما مدات ليه يدها] أهلا بسي لمجيد.

مجيد [بادلها الإبتسامة و سلام] : كيدايره أ سلطانة.

سلطانة [جلسات قداموا] : بخير ونتا ؟[دورات عينيها لناحيه جميعة لي كانت كتشوف فولدها و تضحك] آش كنتي كتديري فالكوزينة أ جميعة ؟

لالة جميعة [تفكرت لعجينة] : يا ويلي راني عاجنه شوية ديال لمسمن ، كوراه ترخات بزاف لعجينة.

سلطانة [ناضت وقفات] : ياك غير ملوي ؟

لالة جميعة [علات حاجبها]: علاه كتعرفي ليه ؟

سلطانة : آش هاد لحگره أجميعة ، راني ماجاياش من القمر ، [اضافت بصوت خافت] لملوي سهل من لمربع ، هاداك كيخرجوا ليا فيه الودنين.

لالة جميعة [جلسات] : إيه أبنيتي سيري ، ديري لي عجبك راه كولشي فوق لپوطاجي' .

حركات راسها بالإيجاب ومشات للكوزينة ، وخلات خالتها كتبحث مع ولدها و تقول ما بحث .

لالة جميعة [بفضول] : علاش فرقتي ديك لقـ...[غيرتها] مراتك أوليدي! يا كما هي لي جرات عليه ؟

مجيد [تبسم] : علاش غتجري عليا يا مي الله إهديك! [تنهد] قنعت منها حتى تگهمت ، الحاجه لمتبوعه وبلا رضات الوالدين راه عمر ربي ما كيسخر فيها...غا الصداع و المشاكيل و لمرض ، اللهم الطلاق ، وأصلا أنا ما بقيتش بغيتها [رجع راسوا اللور] لغشى لي كان على عيني راه ليوم تحيد وصافي.

لالة جميعة [وهي كتدور فراسها] : سالا سحروها و تقاداو مجامرها ليهوديه ، كنت عارفاها شاداك أوليدي غا بزز [هزات يديها لسما] إوا غا لا نتي أذيتينا، سيري الله إبيتها معاك.

مجيد [حط راسوا على رجلين مو و تسرح فوق السداري] : ما تذكريهاش أمي ، نسايها عافاك.

الحاصول لالة جميعة دارت لخاطر لولدها أو سكتات... سلطانة فالكوزينة للمسمن خبزات ،او غيثه نزلات عندها أو حطات حداها أتاي...دارت ملويات كبار ، بالزربه زربات عليهم ، حطو لميده ، قادوها أو داروا عليها ، يلاه راجعوا أتاي وهو يتحل لباب ، قالوا غا عباس ، الساعة طلات عليهم مرجانة لي طرگها بعدما صونات عليه أو طلباتوا معاه... جاو عينيها الذابلين فعينين مجيد لي بالدهشه ناض وقف نطقات.

مرجانة [بصوت خافت] : مجيد!

'لَو كانَ قَلبي مَعي ما اِختَرتُ غَيرُكُمُ
وَلا رَضيتُ سِواكُم في الهَوى بَدَلا
لَكِنَّهُ راغِبٌ في مَن يُعَذِّبُهُ
فَلَيسَ يَقبَلُ لا لَوماً وَلا عَذَلا"

#يتبع