عـروسُ الـبَلّْـطـجـي 🔞 [مـكـتـمـلـة]

PART 25 🔞

عـروسُ الـبَلّْـطـجـي" 🔞

شـمـس و سـيـمـونـا 🎶

البُنُّ فِي عَيْنَيْكِ يَغْلِبُ قَهْوَتِـي ، ‏لاَ تَحْرِمِينِي لَذَّةَ الفِنْجَـانِ، ‏عَرَبِيَّةٌ تِلْكَ العُيُونُ أَلِيمَـةٌ ،جَمَعَتْ مَذَاقَ البُنِّ وَالهَذَيَـانِ

•طالعة و شاده فالحيط ، الدروج ما فيهمش الضو ، كل شوية كتقول صافي غنطيح ، الظلام خلعها ، و زاد كمل عليها الصمت الرهيب لي كان فوسط السطح...ما بان ليها والو ، بلعات ريقها بصعوبة ، هزات راسها لسما لعل وعسى تبان ليها الݣمره و تعاونها ، الساعة عاد حلا ليها تتخبى بين لغيوم و نجوم ، تلفات على لبيت فين جا ، يلاه بغات تنطق ، وهي تسمع صوت إحتكاك الصبع مع لبريكه...الصوت جا من وراها ، دارت لناحية المصدر ، وهي تلقاه واقف عند السور لقصير ، مشاو عينيها لعينيه لحمرين ، دوزات بيديها على وجهها و زادت قربت لعندوا.

عباس [ببرودة] : لاش طلعتي؟

سلطانة [صوت تݣرݣير لحمام فوق الشجر نوض فيها الرعب]: يـ يـ يلاه ننزلوا ، الظلاك بزاف هـ هـ هنا.

عباس [طفى لبكريه و شعل الضو ديال السطح] : ها الضو ، يلاه سيري نزلي ، [رجع عينيه لقداموا] شوية و نتبعك.

حركات ليه راسها بالإيجاب ، دارت باش تنزل ، وهي تشم ريحة الدم ، عقدات حواجبها ونطقات بإشمئزاز بعدما حطات يدها على نيفها.

سلطانة : منين جات ريحة الدم ؟

زفر بضيق ، هز يدو ، أو حطها ليها بين عينيها ، علا حاجبوا فيها ونطق بنبرة هادئة.

عباس : جرحت يدي مع الحيط ، [شافها رجعات اللور ، وهو يجمع يدو ، و خباها فجيبو] غا دمي ، [ضغط على فكوا] و دمي نقي ، ما فيه لا hepatite c[داء الكبد أو بوصفير] لا VIH .

سلطانة [قلبات عينيها] : وأنا آش عرفني ؟ [تنهدات] إلى بردتي يلاه تنزل ، مك مخلوعة هي و ختك عليك.

عباس : واحد الشوية ، [سكت لثواني وأضاف] غالباً غادي نمشي نخرج.

سلطانة [بفضول]: للخدمة ؟[شافتوا سكت وهي تمد يدها لدراعوا ، حركاتوا و أضافت] سولتك جاوبني ، فين غادي خارج ، [ضيقات عينيها فيه] و مع من و عند من ؟

نفض دراعوا من يدها ، طرطق عنقوا المتشنج ببطئ ، وتم نازل ، خرجات عينيها ودارت تابعاه فالدورج كتنگر.

سلطانة : واش كتتجاهلني بلعاني باش نلصق فيك! والله لا كانت ليك ، راه أنا ماشي فضولية بزاف ، غا بغيت نعرف فين غادي باش حتى لا سولتني مك عليك نلقى باش نجاوبها وصافي ، أما أنا مـ...

لالة جميعة [قاطعتها بنبرة قلقه وهي كتتفحص بعينيها فولدها] : ياك والو باس أوليدي ؟

عباس [تبسم ونطق بنبرة هادئة] : لباس أمي لباس [هز سبرديلتو دارها فرجلوا] شوية و نرجع.

لالة جميعة [حولات عينيها لسلطانة لي كانت باغيه تاكلوا بعينيها] : مالكي أبنيتي ؟

سلطانة [خنزرت فيها] : بعدي من ساحتي أ جميعة حتى نتي [ضربت ليه فكتفوا حتى طاح على قاعوا للأرض بحكم أنه أصلا كان محني و ما واقفش على الصح] حيد حتى نتا.

تبع ليها العين حتى دخلات لبيتها و زدحات بابو بالجهد ، ناض وقف ، طبطب لمو على حنكها ونطق بصوت خافت.

عباس : حاس بالخنقه [حط يدو على تفاحة آدم ، عزلها بصباعوا وأضاف وعينيه كيلعموا] مقجوج حتى لهنا ، نتنفس مزيان و نرجع ، غير ما تتسناينش واخا ؟

حركات ليها راسها لي ثقال عليها بالأعصاب حتى هي، و خلاتو يخرج كيف بغى ، حضات روحتوا ، و رجعت للكوزينة تشوف لعشا لي فالأخير ما كلاه ليها حد...عيات فيهم ولا واحد سمع ليها ولا دار بريها ، كلكمت الخبز فالطبق ، غطات الطاجين لي دارتو غا بالخضره بلا لحم ولا دجاج ، زيرات الروبينيات و البوطه ، كفات الماعن ، طفات الضواو ، ومشات لبيتها تنعس.

• الساعة تشير إلى الثانية فجرا ...لا صوت يعلو على الساروت لي كيدور فالباب،  حل بشوية باش ما يفيقش لي ناعسين ، حيد السبرديلة و تقاشر ، حطهم فبلاصتهم و مشا لبيتوا ، دخل وسدو ، شعل الضو حتى شافها مجبده ناعسة فوق الناموسية و رجع طفاه ، جبد تيليفونو و لبريكه ، رماهم حدا التلفازة ، و طلع لبلاصتوا ، عطاها بظهروا ، تكور على راسوا بحال التيلاد [الجنين] غمض عينيه ، ونعس.

هو نعس وهي فاقت ، دارت لعندوا بشوية ، نغزتوا فگفاه ،تأكدت بلي غرق فالنعاس ، وهي تنوض ، لبسات فرجليها ، أو دازت لعند راسوا ، تحنات على ركابيها ، مدات يديها ليديه ، شعلات الضو ديال تيليفونونها بعدما جبدتوا من صدرها فين مخبياه...قلبتهم ، وهي تلقى الدم كارم عند كل مفصل مجروح و جلدوا مگلع ، تگلع ليها لخاطر حتى هي ، طولات فيهم الشوفة ، دورات عينيها لناحيه الماريو وناضت ليه حلتوا ، جبدات واحد البكيه تاعها ديال les lingettes ، رجعت لعندوا ، سرحات ليه صباعوا وبدات كتمسح ليه بيهم غير بشوية مخافة انه ينوض ليها...سالات ، ردات ما جبدت لبلاصتوا ، رجعات يديه لتحت لغطا ، سهات وهي كتحاول تحفر حروفوا فراسها ، تبسمات بلا ما ترد لبال ، دوزات بلسانها على شفايفها ، ونطقات بصوت خافت.

سلطانة : تيتيز مع راساتك الحلوف [تنهدت بعدما حسات بالهرّ [الدغدغة] فكرشها] والله إلى جميعة والدة الزين حـ.. [خرجات عينيها ، صرفقات حنكها حتى داخت ، بلعات ريقها وأضافت وهي راجعة لبلاصتها بالزربة] حماقيتي أ سلطانة حمااااقيتي الكلبه.