عـروسُ الـبَلّْـطـجـي 🔞 [مـكـتـمـلـة]

PART 27 🔞

عـروسُ الـبَلّْـطـجـي" 🔞

شـمـس و سـيـمـونـا 🎶

البُنُّ فِي عَيْنَيْكِ يَغْلِبُ قَهْوَتِـي ، ‏لاَ تَحْرِمِينِي لَذَّةَ الفِنْجَـانِ، ‏عَرَبِيَّةٌ تِلْكَ العُيُونُ أَلِيمَـةٌ ،جَمَعَتْ مَذَاقَ البُنِّ وَالهَذَيَـانِ"

•لحلاوي تستفوا فسطوله ، لحنة تدگات و تغربلات ، الخضرا و ديسير تقادوا فشي صنادق كبار ، الفاكيه تدست هي و لفانيد ، اللحم تحيد من لڤريكو باش يصبح مرخوف....دازت بعينيها قبل يديها على كولشي ، قلبت هادي وديك ، طمنت قلبها ، عاد مشات شافت لحوايج و حطات ليهم لعشا غا تم فالكوزينة حداها.

لالة جميعة [وهي كتقطع ليهم فالخبز] : خوكم فين ؟

جلال : واقف برا ، كيدوي فالتيليفون ، قلت ليه جي تاكل ، قال ليا باغي يبات مخفف.

غيثة: لي سمعوا كيقول مخفف يقول حنا دايرين  لمبخر و لمجمر ، راه غا طاجين بـ بطاطا حلوة ولبصلة معسله ، ما هو بسطيلة ، ما هو دجاج محمر.

لالة جميعة [ضربتها ضربه خفيفه على يدها الممدوده لوسط الطاجين] : إوا جمعي يدك عندك ، ولا ما عجبتش طيابي ، وما رضيتيش بلي كاين أو موجود ، نوضي سيري أبنيتي تخدمي أو ولي نتي كولي فالزنقه عاد عݣبي لدار [تنهدت] نتوما بنات ليوم ، ولا فيكم شي بخ وشي شيكي ، ما كانش فالحكام ديال هادي شحال ، يغفل عليكم أخيتي الواحد شوية ، يلقاكم واهلي درتوا الجوانح و طرتوا فالسما.

سلطانة [و فمها عامر] : نتوما الشارفات ، داكشي فاش فالحيين ، غا فالمعيور و لمعاطيه و حشيان الهدره للبنات الصغار ، ما عندكم حتى جريه تقضوها ، من غير "دارو بنات ليوم" "تركوا بنات ليوم" ، حُݣّل ربي فيكم ، غا كبرتوا ونتوما تتشكرفوا و تتمسخوا الله إحد الباس.

لالة جميعة [بصوت خافت وهي مخنزره فيها] : الباس واكلك من فوقك لتحتك الهايشه [ضربت على لخاتم لي فصبعها ، ضيقات عينيها وأضافت بعدما تبشرت حروفها] واا هانتي ليك ألاله على لخاتم.

سلطانة [بلعات ما تعقد فحلقها من ماكله ، خبات يدها تحت لميده ، ونطقات بتعثلم بعدما تزنگت] : حـ حـ حاضيه غا لـ لـ لحضيات أ جميعة.

لالة جميعة [ضحكت بصوت مرتفع] : هااا خيي على الناس و لخواتم و لحشمه خّٓيّْتْ ،الراجل سولتوا قلب وجهوا وصار يحنحن ، و لالة الزينه حمارت أو ولات كي بلعمان...[غمزتها] يا هو طيحك يا نتي لي طيحتيه.

سلطانة [بنرفزة بعدما وحلت ليها وناضت كيف الرعدة وقفت] : الله يطيح ليك السنان قولي آمين ، مـ....

قاطعتها دخول عباس لي كان باقي شاد تيليفونو بين يديه أو لابس لباس لخروج.

عباس [ببرودة وعينيه على سلطانة] : آش كاين ، مالكي كتغوتي بالجهد تاني ؟