الفصل 38
قبل سنوات عده (الماضي) :
كان قاعد ومغطي وجــهه بإيده ..بتعـــب شديد .
صار له أســابيع ما يجي لجمعة أهل أمه اللي تكون كل يوم خميـــس .
لكن أضطر إنه يجي بعد عتـــب شديد من أمــه وجدته وخــواله ...ومن الزيــــن .
الزين اللي ما يقدر يرد لها أي طلب .
يحــس بإرهاق , قاعد يشتغــل أربع وعشــرين ساعه بجــد واجتهاد عشان يحافظ على سمعـة كــراجه اللي بدى يلاقي نجاح أكثــر سنه عن سنه.
الأرباح بدى تهـــل عليــه لكن مو بالقـوه اللي يبيـــها , يحتاج لجهـــد أكبــر , وعمــل أكثـــر .
عمره 27 إذا ما قدر يحقق الأرباح اللي يبيـــها هالسنـــه بيتعــب وايد واحتمال يتـرك حلمه ..ويروح للحكــومه والعمل فيها ..وهذا الشي اللي ما يبيــه .
كان قاعد يفكــر وبقـــوه بكراجه ..
وينــتظر الغدا اللي ما قدر يلحـــق عليه .
لما شــــــــم ريحــة الأكــــــــــــــل .
تنهـــــــــــــد , يحــس بعصافير بطنــه قاعده تغـــرد .
صــوتها الناعم وصل له " صقـــر "
رفـــع راســـه بســــــــــــــرعه .
وشافها واقفه قربه .. كان ويهها أحمر وبقوه من الحرج , وشايله صينيه أثقل منها تقريباً ..وهذا خلاه يقـــوم من مكــانه بســرعه ..
ويشـــيلها من إيدها , ويحطــها على الطاوله ..
نزل راسه لها عشان يقدر يشوفها , جمالها كان قمه بالبراءه , من زمان ما شافها .
وخــر ويهه عنها , وقال " تسلميـــن "
شال غترته عن راســه , ولقى إيدها تنتظــره عشان تستلمها منــه ..إلتقـــت عيـــنهم للحظـــه حسها ساعات ..سلمها إياها ..وصــــــــــد لما حس بعمره.
حرام اللي قاعد يســــــــويه ؟
أهو الأكبر بينهم ..أهو اللي لازم يحط حدود وأكبــر من اللي اهو حاطها .
اهو قاعد يحاول .. بس ..صعب لما مشاعر الإنسان تكون ضده !
قعــد بتأفف , واهو متعكــر المزاج أكثر ,وبدى يجفــس أكمامه وقال بعدم أهتمام" ليش كلفتي على عمــرج ..جان قلتي للخــدم "
ما انتظــر جواب ..ولا اهي تبرعت بإجابه .
خذت دولكة الماي , وصبت له بالكلاس .
بعد ما انتهت , ظلت واقفه عند راسه ..
ما كان يبيها توقف عند راسه , أفكاره مشغوله , وتعبان , والنفسيه زفـــــت , واهو متأكد إنها بتعتــب عليه ..واهو ما يبي يسـمع شي , لكن هالجانب قاعد يتصارع مع جانب أخر اللي يبيها موجوده معاه .
إضافه إلى إنه مشاعره تجاهها واصله لمرحله أهو ما توقع إنها بتوصــل له تجاه أي من البشــر بحياته , ما يضمن إنه ما يكشـــف تعلقه فيها بأي لحـظه .
يبي كل شي بينه وبينها بالحــــــــلال .
وهالتفكيــــــــر عكـر مزاجه أكثـر كلما شافها ما يفكــر إلا بالزواج منها ..
بس لازم ما يفكر بهالشي إلا بعد ما يأسس روحــه عدل , إهي طول عمرها بنعمــه , مو معقـول أهو يطلعها من حياة كل أوامرها فيها مطاعه إلي حياة لا اهو بيكون موجود ولا طلباتها راح تلبى براحه .
كانت زيــنه تشوفه ياكــل بشوق مفتت قلبها .
صار لها فتــره عنه , شغله اللي بدت تتعلم تكرهه لأنه يشغله عنها , وما يسمح لها إنها تشوفه مثل ما اهي تبي , قاعد يخليه غايب عنهم .
عيونها كانت قاعده تلتهمه , تعابيره , ملامحه ..حركاته سكناته .
ما مرت بحياتها لحظه ما حبته فيها .
وقالت بيأس " أنا .....ومنيره فاقدينك "
اللي يهمها إهي نفسها !
لأنه منيــره مرتاحه , صقـر يتصـل عليها كل يوم , وبعض المرات ياخذها يتغدى برا , أما اهي فمحــرومه من هالأشياء , إهي بس اللي تتصل أما أهو فيتعــذر بالعمــل , والطلعه شي مستحــيل إنها تطلع معاه !
تدري إنه هذا حمايه منه لها ..لكن إهي إنسانه لها مشاعر .
تحاول انها تخفي هالمشاعر لكن في بعض المرات مهما حاولت فإهي تفلت .
وقف صقر عن الأكل ..للحظه .
وكمـــل بعدها ياكل ..
وخذا الماي وشــرب وبعديــن قال بجديه " منيــره عارفه إني مشغــول "
غمــر عيونها حــــــــزن وشـــوق .
قالت بصــوت هامس " و انا ؟؟ "
وانا بعـــد مشتاق ..
بس ما يقدر يعلن عن هالشي , النخــوه ,والرجـــوله يمنعونه عن أنه يعلن لها عن مشاعره إلا بعد ما تكون زوجتــه .
وهذا خلاه يقـول بصرامه " زيـــن لا نكــمل هالحوار , أي أحد بيسمعنا بيفـهم الموضوع خطأ , وسمعتــج إنتي بتـــروح فيها " وإلتقت عيــونهم وقال " وأنا حريص على هالسمعه "
