#عشك_الملا_غربال....بارت٤٦
لاتنسون التصويت ومتابعة الحساب والتعليق على كل فقرة ❤️
ورده الشيخ محمد
شگد شربنه وجوههم
بس ماروينه
وهيَ هيچ الصورة صورة
شما بچينه ..
#حلاوة
هي رسائل مكتوبه، مُجرد حروف انكتبت ، ليش جاي اسمعها ؟ ..
ليش احسها سچاجين نبتت بصدري ؟
بلحظتها شفت الرسالة ومارديت
بلحظتها ابتعدت عن التلفون وخليت التلفون على
صفحه بهدوء ورحت الجربايتي غطيت راسي
وصرت ابچي خَنگ ...
چنتّ ابچي فقط
هسه كمت ابچي واخاف..
اصعب شعور من تواجه مشاعر البچي والخوف
بوقت واحد..
الامان الجنت اشوفه بيك
اليوم بهالاوامر چمدت اطرافي خوف منك
وختلت بفراشي ولحافي وحضنت مخدتي بدل حضنك..
( اتزوجج متعه...) .. بلحظتها عرفت وحسيت وشعرت بالكلمه من تتحول سَچين وتجرح...
رفعت راسي واباوع للسگف
بيتنا هادئ بس ينسمع صياحه بالگلب ، وصوت الساعه يدگ براسي ...
وجهي احسه تنگع بدمع عيوني ،
ماعدنا احد والكل تخلى عننا
محد دك بابنه ومحد كال شبيكم اله شخص واحد مابطل وهو يسأل علينه..
معقوله كل هذا حتى يتقرب مني كـ زواج مؤقت
ويهيني ويستغل عدم وجود ابويه بهالطريقة ؟!!
معقوله يريد ينتقم مني لان عفته
هزيت راسي بالرفض.. لا.. ممعقوله ياربي !
هو يخاف الله
مايسويها
هو حنون مايجرح..
لزمت تلفوني واتصلت ، انسد الخط
رجعت اتصلت اكثر من مره .. انسد الخط ووصلني مسج
على الواتساب ..
بكل براءه وخوف كتبتله بدون مااهتم للمسج :-
- يمك ماحس بأهانه النفسي ، ويمك ماحس نفسي قويه ، الوحيد اليمك اضعف وابجي ، ماافهم نفسي بكد ماانتَ تفهمني بس والله ادري بيك تدري بيه مخربطه ، رتبني
- مختصر كلامج شنو؟
سكتت وعيوني ضلت تحركني:- گلـــبـي يكلي مو انته الي جاي تكتب ، اعرفك حنون علينه وحنون حتى على اعدائك ماجاي احس انته التجرحني واتأذيني بهالطريقه عادي هسه اتصل عليك اريد اتأكد ؟
اتأخر بالرد ودز:- مفارغلج
- بس ثواني ومااطول والله ، گلـــبـي انكسر ومهضومه
- كتلج مفارغلج شنو هالملحه ؟!
- زين بس بصمه دزلي واحجيلي الي كلته ، اترجاك ماريد يخيب ظني بيك ، يجوز اني چنتّ بمرحلة تعب وحجيت الي حجيته وتصرفت الي تصرفته بس بعدني احبك والله
- هههههه حبيش بابا ، نهايه كلامج شنو محتاجه فلوس ؟
بقيت اباوع للمحادثه ودموعي تجري
اكثر ، حرگة خدي بحرارتها:- محتاجه فلوس ؟
