#عشك الملا ٨
#عشك_الملا
ورده الشيخ محمد
لاتنسون التصويت
ضلام والدنيا تخنك ..جثه تعبانه بلا روح وبلا معين يكلها كومي ..اي نعم جثه تعبانه مابيها حيل تكول اخ ..ياهو الاجه دفرها برجله مشمأز من وجودها
اصعب شي بالدنيا من تكون غريب بين اهلك وناسك, عايش يتيم منبوذ واحد يذبك ع الثاني !
وانت مثل السعفه اليابسه والمسحوكه ومتفتته
تفيد للحرك حتى تصير رماد ويطيرها الهوى وتنسي!
ومايبقالها بس اثر السواد الخلفه الحرك
هذا انا
انا المنبوذ والمحروم والمخذول
انا الفتح عينه ع الكتل والضرب والاهانه
انا الي اصيح يمه ويوصلني صدى صوتي ويكلي ماعندك ام
انا الي لو حطيت اللكمه بحلكي اتحاسب عليها
انا الي لو نمت انام بالتراب واتغطه بهدومي تعبان من الدنيا واهلها
انا الكبر قبل عمره
انا الشيب راسي وبعدني صغير
انا المكتوله روحي وانا اشوف نفسي ثكيل ع بيت ابوي
انا الانتجي ع الحايط والحايط يوكع من ثكل همي !
ليش ويَ روحك حَرب ؟
تِرسم العثره بـِ طريقك وين ما صَحلك دَرب
اييي ليش?
صار اسمي غربال
غربال الغربلهم بدون سبب!
بويةة ترا انا روحي غربلتني وتيهتني وضيعتني ..
لا شايف ابو
ولا شايف ام
ولا شايف ظهر يسندني!
كبرت وانا بحضن الحجيه
وكل ظني هي امي, وهي ابوي, اسالها :- يمه ابوي. وين ?
ـ ابوك مسافر يمه
ـ اريدن اروح يمه عبن الدنيا تكتل يمه وعلي تكتل
ـ لا يمه لاتحتاج احد بس ربك هاي دنيانه لو دكت رجلها ع البني ادم المظلوم والماله والي تطحن ظلوعه طحن بس ربك يوكفلك ويكسر ظهر الدنيا
ـ زين يمه انا ليش كلها تكرهني جا انا شمسوي?
ـ مامسوي شي يمه يغارون منك عبنك حليو وابيضاني والعالم تحبك يمه
ـ يمه جا اذا هيج انا اذا صرت اسود يحبوني?
ـ انت حلو يمه والله يحبك واكفلك ويسندك لاتخليلك سند غير ربك يمه
ـ يمه بردان
ـ تعال بحضن امك وليدي
رحت وانا طفل وخاتل بضلوعها شارد من البرد الكسر ضلوعي
بسبب عمتي نهى
ماخلتني ادخل للبيت عبن جنت مطين والعب بالماي والطين مال المطر وخلتني واكف بالباب لان جانت منظفه البيت
ـ يمه
ـ ها يمه شني مانمت
ـ لا يمه احجيلي عن ابوي
ـ ابوك راح للجنه
ـ ليش ماخذني وياه جا انا مو ابنه?
ـ يريدك تسندني وتداريني وتصيرلي عون وكت العوز
