#عشك_الملا_غربال_ج٢
القسم ٢ من #البارت_الأخير
الناس كامت تمدح بمقبلات المطعم وصارت تنطلب حتى بالديلفري
والضغط زاد على شاه كمت استخطيها وحدها تشتغل
حاولت اجيب وياها وحدها ماقبلت ورفضت نهائياً
ف امها صارت تساعدها
وخصوصا مرات الفجر تراسلني اذا تضيف مقبلات جديدة او لا
يعني تبقى ماتنام للصبح وهي تشتغل وتگلي وتگطع وتحمس
قررت ازيد راتبها ..
دزيت فوك راتبها زياده
واطيتهن الابوها
يوم ثاني وانه كاعد بالمكتب طب عليه ابو شاه ويعتذر :- والله بويه ماتقبل ذني تكول ماريد زياده اني دااسوي واجبي
الملا :- لا ابو شاه هاي مني الها هي تتعب هواي وكل الموظفين انطيهم حتى انته
ابو شاه :- والله عمي ماقبلت تفضل
ابتسمت شكد نفسها عزيزة
طلع ابوها وراسلتها :- ليش مااخذتيهن
ردت بسرعه :- ميصير استاذ مو حقي ان شاءالله من تنطيني غير شغل زيدهم على كل الشغل
الملا :- بارك الله بيج
عفت التلفون على صفحه
فجاة وانا كاعد خابرتلي حلاوه وهي تبجي وتصيح بالتلفون : الحك عليه همام اختنكككك الله يخليييييك
بسرعه اخذت التلفون والسويج وركضت للسياره دست دوس ورحت للبيت
شفتها بالكراج كاعده وشايله همام وبنتي تبجي والحجيه اصلي على محمد وتهدي بيها
شلته وركضت بي للمستشفى صار ازرك
تلكونه الطوارئ شالوا الطفل وركضوا بي يسعفونه
بقيت واكف وادعي وقلق يخوف شكله ازرك اباوعلهم
شكو ركبته وحطوله جهاز تنفس
اجه الدكتور جر نفس وذبه:- لحكت عليه
بقلق :- شبي دكتور طمني
الدكتور :- الطفل عنده ضمور رباعي ، يحتاج ابره وسعرها جداً غالي
توترت ومسحت كصتي :- شكد يعني
الدكتور :- مليارين. ومامتوفره فقط بالامارات اذا ضربها يرجع طبيعي وي العلاج الفيزيائي
عكدت حاجبي ومسحت العرگ الي بكصتي :- ماشي دكتور ، اكتبلنه الارسال
خابرت الهيثم :- راح اسحب فلوس من البنك وهيج وهيج السالفه
ماكال شي
رحت بنفس الوقت جهزتهن واخذت الكارت
رجعت للبيت حجيتلهم السالفه كلها
وقررنا نسافر ...
صارت تبجي وحاضنته وهي تبجي
بس مااستخطيتها ابد ، اهمالها شايفه بعيني ..
جهزنه روحنه للسفر وطلعنه للامارات ورحنه يوم ثاني للمستشفى
والجو تغير ع الطفل فجاة و ارتفعت حرارته واحنه بالمستشفى
ومايقبلون ينطونه الابرة اذا عنده مضاعفات
لازم حرارته ماترتفع ووضعه طبيعي
بس كل مابي يزيد
سحبو منه دم وماكو مالكوله وريد اخر شي سحبو من اصبع رجله
بقينه ننتظر وخلو بغرفه خاصه وتحت المراقبه والحراره عبرت الاربعين حاروا بي الدكاتره والممرضين
اخر شي طلع الدكتور واحنه كاعدين محتارين وخايفين ومابيدنا غير الدعاء وانا مخلي بث مباشر بالتلفون من كربلاء وادعي
فزينه عليه وركضناله شفت الممرضين دخلوا وره الدكتور
طلع وهو يفرك بيده :- العمر الكم ، فقدنا المريض ..
