يا رقيقه الحُسن و يا دقيقة الاوصاف يا كُل مُصطلحات الجمال والإذهال ياغيمتي

١٣

مشى واه فيصل بدون لا يقول شي بس يضحك من خرشة فارس وطلعو لعند الرجال الي خلصو متعشين توهم وناظر نهار الي واقف عند الباب والواضح انه يكلم وعنده أوس ،تقدم لهم وناظر اوس :شفيه
هز راسه بمعنى ما ادري :مادري ،بس الي جو ذولا ترا ما راحوا للحين موجودين والواضح انهم ناوينها شر
هز راسه وتلفت يشوفهم بعيونه واضحين ما تخفو ورجع انظاره لـ اوس :طلبت احد انت حول البيت من الشرطة
هز راسه بايه وهو يناظر المكان واخوه الي واقف عند باب الشارع :طلبت بس هالغبي ذا اقول له لا تطلع الا لما يوصلون وما يسمع كلامي مو هامينه ذولا
هز راسه باسى مشى يتجه له ونطق :طيب على الاقل ادخل يومك هاذا توك عاقد عليها والحين طالع تودي نفسك للموت!
لف يناظره بنظره وحيده:فارس متى جيت؟
انتبه لتنهيدة فارس ونطق:لا تخاف ما بيسوون شي
فارس:طيب ادخل الرجال يبونك جاملهم طيب
ناظر السياره الي متوجهة لهم وعرف وش بيصير وركض لفارس وهو ينطق ومن شاف اخوه طلع يطلع سلاحه هو صرخ :فارس اركض
طلع اوس يوجه سلاحه صوبهم ولانهم اطلقو رصاصتهم بس ما جات على احد كانت بالجدار وابعدو مسرعين لان أوس اطلق على سيارتهم وبنفس الوقت وصلت الشرطه ولحقو السياره الهاربه
ناظرهم ينزل يده من ابتعدو وركض لـ اخوه يمسكه من قام هو وفارس:جاكم شي
هز راسه فارس ب لا وهو يناظر نهار ولف من طلع راكان وفيصل والباقين يسألون وجاوبهم أوس :ما فيه شي ما حصل الا الخير
ولأن عبدالرحمن عارف شغل عياله هز راسه رغم خوفه :الحمدلله انتم طيبين هاذا المهم ، تقدم راكان لـ نهار :جاك شي ،هز راسه نهار ب لا وهو يناظر فارس ونطق راكان الي يناظر المكان:من جماعة سالم صح؟
هز راسه :ما خلصنا منهم باقي وعلى راسهم واحد اسمه عصام هو الي مرسلهم لي ومرسل لي رساله وقت كنت داخل فيها تهديد بس ما فتحتها بس الرقم مجهول
ناظر فيه راكان :وش عرفك انه عصام انت متأكد ولا مجرد تخمين
فارس:هو نفسه الي حولت ملفه علي
هز راسه ومسح شنبه يمسك اعصابه:لو كان هو ما بخليه وبيدخل السجن زي ما دخلت سالم
هز راسه فارس يناظر فيه:وش لك فيهم نهار اتركهم ما ودك تدخل بمشاكل انت بغنى عنها
هز راسه يناظر ابوه و ابو المزن الي صار عمه الحين داخلين وما بقي الا هم الأربعة وقف أوس من جاه واحد من الضباط يدق له تحيه ونطق:استرح ..،وش صار؟
الضابط:السيارة يا طويل العمر فيها ثلاث اشخاص و لوحة السيارة مزوره وما قدرنا نمسكهم لانهم دخلو بين الزحام وخفنا يصير حادث وتراجعنا
هز راسه ونطق وهو يناظر راكان:فيه كميرات هنا صح؟
هز راسه بايه وابتسم أوس:حلو ، شوفو شغلكم طلعهم لي من تحت الارض هالثلاث ،انا شويات وجايكم المركز
مشو يدخلون وناظر جواله نهار يشوف رساله المجهول الي وصلته وقت كان داخل وعاقد حجاجه يدري ورا هالرسالة رساله ثانيه بشكل مخفي ،انتبه لأشعار منها وابتسم يرد عليها"وينك؟"
ردت عليه وهي تشوفه قدامها بس هو ما يشوفها "انا اشوفك قدامي ،انا برا"
رفع راسه يدورها وابتسم يمشي لجهتها من لمح فستانها،كانت لافه تعدل شعرها الي خربه الهواء وشهقت ترف يدها تغطي فمها لانها عرفته وخافت احد يسمع ناظرت ابتسامته من ضحك :بسم الله عليك، خوفتك؟
هزت راسها بالنفي تعدل وقفتها وهو لا زال حاضن خصرها نزل انظاره لشفايفها وبعدها رقبتها لثواني طويله وهي ناظرت عيونه وتنزلها على شنبه ابتسم ينطق بغرور:عاجبك شنبي؟
صدت بعيونها لانها شبه توقعت وش بيصير لو بتقول ايه او حتى لا قالت لا
ابتسم :تصدين بعيونك وانتي تدرين بكل الحالتين انك ما بتقدرين تهربين مني
ناظرت عيونه ثواني :بس ما بتسويها هنا انا اعرف
ضحك يحضنها ويقبل عنقها ونطق وهو منزل راسه:وين خجلك الي كان داخل ؟
ماردت عليه وابتعد هو شوي يناظر يدها :توجعك؟ متى فكيتها ما طولت
هزت راسها:امس فكيتها والدكتور قال لازم انتبه لها زين
ناظر عيونها لثواني طويله يحب يتأمل عيونها ،عرف انها فكتها علشان اليوم كان بيتكلم وبيقول ليه بس سكت ما وده اهم شي هي مرتاحه ، ناظرت فيه لثواني ونطقت وهي تدري انه ما انتبه لجواله الي يرن وجالس يتامل فيها ،تنحنحت :نهار
نهار :سمي
ابتسمت:تسلم ،جوالك
هز راسه وهو يطلع جواله من جيبه ولا زالت يده الأخرى محاوطه خصرها ،طلع جواله يشوف الاتصال من امه و رد عليها :سمي يالشيخه
ابتسمت تسمع كلامه مع امه وابتعدت عنه شوي تشوف نظراته تسألها "وين رايحه "وابتسمت هي تقرب منه وترفع رجلينها رغم انها عليها كعب وباست خده بهدوء و رقه تهمس له :مع السلامه
ابتسم من ركضت تبعد عنه وابعد الجوال عن اذنه يصمته وهو يناظرها وينطق بصوت عالي :استودعتك الله
ابتسمت يبتسم قلبها قبل ثغرها هي سمعته ودخلت داخل تتجه للمرايا تعدل نفسها وفستانها التفتت من دخلت رند وابتسمت لها تشوف رند الي بدون تعابير وجه ومشت تطلع بهدوء راجعه لهم
رجع جواله لاذنه :سمي يا امي وش بغيتي
خلص كلامه مع امه ورجع لعند الرجل يشوفهم طالعين والواضح انه خلص اليوم رفع يده يأشر لفارس ومشى يودع عمه سيف والعيال ويطلع وفارس وراه :بغيت شي يالعريس
ضحك وهز راسه:ماشي القصيم الفجر ودك تخاويني ولا عندم اشغال
هز راسه :ما عندي شي بس كم يوم بتجلس
نهار:يمكن ثلاث ايام واحتمال تزود
فارس:ليش رايح انت اصلاً
مشى ومعه فارس يبعدون عن الباب :شغل ماني مطول بس اخلصه وارجع بتجي معي؟
ابتسم وهز راسه:اجي ليه ما اجي بس بنروح على سيارة ولا طيران
هز راسه :لا بسيارتي
ابتسم وحط يده على كتف نهار :تم
ناظر اهله ونطق وهو يسلم على راكان الي جاء:توصون شي ؟
هزو روسهم ب لا ،راكان:سلامتك يالنسيب
ضحك نهار ونطق:تصبحون على خير ،مشى متجه لسيارته وركبها يلف لامه المبتسمه ونطق :توني ادري ان ابتسامتك حلوه
ضحكت هديل وكشرت ثريا:يا شينك نهار
ضحك وقرب يبوس راسها :اسف يالشيخه ،شرايك بعروستي بس ،قالها وغمز وهو مبتسم و ابتسمت هديل الي منهبله عليهم :نهار تجنن البنت صح اني اعرفها من اول بس والله اليوم غير حبيتها زود حتى حور انهبلت عندها وصارت معها علطول تقول صرنا سلفات
ضحكت ثريا:عسل البنت عسل
ابتسمت وقربت تصير بين امها وبينه:ما شفت وقت دخلت امي وهي ماسكه بيدها يهبلوننن صح رند،التفتت لها وشافتها مو لمها بجوالها وهزت راسها ترجع تناظره ،نهار :زوجة نهار مع الشيخه ثريا اكيد بيطلعون حلوين
ضربت كتفه ثريا :مسرع حبيتها بس ما الومك البنت تنحب
ناظر امه ثواني :لو اقولك اني من اول ما شفتها وقت كنا ببيت عمي حبيتها وش تقولين
رفعت انظارها رند تناظره يكلم امه واستغربت انه متى جات بيتهم اصلا وثواني وفهمت يمكن انه قابلها برا ،كتمت صرختها هديل :نهار لو تشوفها بعد ما طلعت من عندك ولبسنها طرحه صغيره ومع الكيكه ما تتحمل
ابتسم يتخيل شكلها ورفع يده لقلبه يعض شفته:وريني ايها تكفين
ضحكت تهز راسها:معليش كم تدفع و اوريك ؟
لف يناظرها ونطق :زوجتي وريني بس لا يكثر
رجعت لمحلها تهز راسها :ما بوريك
ضحكت ثريا عليهم رغم استغرابها من هدوء رند الغريب وابتسمت من وقف عند البيت ونزلو وناظر امه يمسك يدها ويدخلون سوا :ام نهار تراني ماشي الفجر
ناظرته وهي تنزل عباتها :وين يا امي ما امداك راجع
باس راسها:رايح اخلص كم شغلة وراجع وبيروح معي فارس
ناظرته ثواني يضيق خلقها ما ودها يبعد وهو توه ما كمل يوم وهو عاقد قرانه والحين بيسافر ولا تدري متى بيرجع :زين بس لا تطول وبلغ البنت لا تخليها ما تعلمها
هز راسه بايه ومشى يصعد لغرفته متجاهل هديل و رند الي جالسين بالصالة فوق وسكر باب غرفته ،رفع يده يفتح ازرار ثوبه وينزل شماغه وبعدها نزل ثوبه واخذ من الدولاب شورت يلبسه وجلس على السرير يبتسم علطول من جات بباله وضحك يهز راسه يهمس لنفسه:كيف بتروح وتخليها نهار ،كيف
ضحك يسخر من نفسه من شاف رسايل فارس:لا بعد ماخذ معاك شين الحلايا بدال رقيقة الحسن
ضحك يرد على فارس ويطلع من محادثته يروح لرقمها علطول وابتسم وهو يكتب:مزوني صاحيه؟
انتظر ثواني و دقايق مرت لين ردت برد بسيط "صاحيه "حس بـ بروده الرد بس توقع انها يمكن يكون عندها احد وكتب لها يرد"اذا عندك احد اطلعي من عندهم وسولفي معي"ضحكت وهي تكتب له"ما عندي احد حاليا بس بعد شوي بيصير عندي احد"ابتسم من غير شعور وناظر ردها "البنات بيحللون اليوم و بيحاولون يطلعون مني كلام عن الي صار اليوم وقت كنا فالمجلس"
نهار:"وانتي بتجلسين معهم وبتعلمينهم؟"
ردت عليه وهي تشوف ازهار داخله"لا ،بس اعرف بيسحبون مني الكلام وبعلمهم بعدين عندي ازهار وترف يعرفون كيف يطلعون الكلام من تحت الارض"
ضحك هو مبسوط انها تسولف له ،المزن"يعني ما يمديني اتحفظ بس بحاول اقلب الطاوله عليهم وانسيهم شوي بس"
ضحك يتذكر وقت كانو عند البحر وهربت هي بدون لا تتكلم"انا تتهربين مني بس ترف و ازهار لا ما تقدرين عليهم يعني "
اخفت ابتسامتها تشوف ازهار الي مو لمها بجوالها وهزت راسها ترد"ايه "
هز راسه ما يصدقها "نشوف الحين كيف بتهربين بس خليها بعد ما ارجع على خير"
ضحكت لثواني "وين ؟، اقصد وين رايح؟"
نهار"رايح كم يوم ويمكن تطول للقصيم اخلص شغلي و راجع"
ردت عليه بسرعه ما تدري ليه حست ما تبي يروح"لوحدك؟"
ابتسم يكتب من جات بباله فكره"لا ،بس اذا ودك تروحين معي اكنسل الي بيخاويني واخذك انتي "
ابتسم تهز راسها تدعي انه يشوفها"لا ما ابي ، روح لحالك احسن"
ضحك تخيل شكلها انها خجلت اكيد وموسعه عيونها تبين خضارها "ودي انا بس مو هالمره لاني احتمال مطول الجايات اكثر ونكون انا وانتي بدون احد ثاني"
"بس الحين بقول لك تصبحين على خير يا حلوه الصبح ماشي انا وتراني بمر بيتكم علشان بسلم عليك ابيك صاحيه"
"نهار انا للحين ما نمت كيف تبيني اقوم الصباح لك"
"تصرفي ابي اشوفك قبل امشي"ارسل لها يشوفها طلعت من المحادثه وضحك يتوقع انها زعلت يمكن ومد يده يسكر النور ويدخل بنومه بعد يوم طويل متعب وممتع بالنسبه له ..
«بيت سيف»
اجتمعو كلهم عندها بغرفتها ازهار وفرح و ترف و وهج  ،جلست على الارض وتربعت تناظر المزن :ايه يالله غردي يا حبي
ناظرتها المزن لثواني ونطقت من نظراتها:ايش يعني تناظريني كذا تكلمي يالله
المزن نزلت على الارض وتربعت نفس جلست ترف بالضبط واخذت كوب القهوة تشرب منها بدون لا تتكلم وتناظر فيهم وتحس بخجل مو طبيعي من تذكرت ،ازهار:طيب تخجلين ليه ،مو حنا كلنا بنات هنا
رفعت يدها تغطي وجهها:خلاااص ،بعدين ايش اللقافة الي جاتكم فجأة
صفقت ترف تضحك من فرحتها وناظرو فيها البنات مستغربين ونطقت وهي حاطه يدها على فمها تناظر المزن:سواها؟؟
وسعت عيونها المزن مصدومه ونطقت فرح بصدمه تشرق بالقهوة:مسرع
ضربتها ازهار تهز راسها بالنفي:خـيـر لا يروح بالكم بعيد ،ما تقصد
هزت راسها ترف تناظر المزن الي واضح انها عصبت عليها ونطقت:اسفه والله اني طيرت نيرهم بس اقصد ..،سكتت ما كملت كلامها من نطقت المزن بسرعه:ترف خلاص لاتجيبين العيد زياده ،بعدين ما صار شي لانه طول الوقت كان عندنا ابوي وابوه واهله دخلو بعد لا تفكرون ويروح بالكم بعيد
ناظرت وهج ملامح المزن ونطقت :بس يوم طلعتي لنا شكلك وخجلك يوضح شي ثاني
ما ردت تاخذ من الحلا وتاكل وناظرت فرح الي تدور فلم ونطقت توجه كلامها لترف :تحالولين تسحبين مني كلام بس انا بسالك،من قابلتي يوم رحتي تجيبين جوالك من المجلس؟هاه مين
سكتت تناظرهم وضحكت ازهار تغمز لها :والله وعرفت تقلبها عليك ،يالله جاوبي عليها الحين
ناظرت وهج اختها ونطقت:ترف
هزت راسها تغمض عيونها لثواني طويله ،فرح :انا سمعت صوت فيصل ،هو؟
هزت راسها بسرعه تنفي وتنهدت تنزل راسها :خصوصيات لو سمحتو ،بعدين مو فيصل ما كان فيه احد
رفعت انظارها وتقبلت انظارها مع ازهار والمزن وهزت راسها مره ثانيه تغطي وجهها وتنطق بخفوت:اخو ازهار
صرخت ازهار تضحك ومدت يدها فرح تكتمها وهي تضحك :اص لا تقومينهم
رمت عليها المخده ترف وضحكت المزن تغمز لها وتناظر وهج:شافك بالأزرق؟،هزت راسها ترف وابتسمت ازهار تضحك وتناظرها :بيحب الازرق زياده اخوي
هزت راسها المزن تعض اصابعها:وشعرها القصير ..،خلاص فارس طاح ومحد سمى عليه
ضحكت وهج بعدم تصديق: لو سمحتو لحظه احتاج استوعب !
ضحكو البنات على تعابير وهج المصدومه ونطقت المزن تهمس بصوت مسموع:وازيدك مو بس هاليوم كم يوم تصادفه بالشركه وتتهاوش معها ويوم كنت بالمستشفى اغمى عليها بحضنه بعد
شهقت وهج تناظر اختها :ما اصدق
ما تكلمت ولا نطقت بحرف واحد من كميه الاحراج الي تحس فيها ومن نظرات البنات لها ..
«قبل االفجر ،عند نهار»
طلع من غرفته ومعه شنطته نزل مسرع وطلع يشغل سيارته ويركب شنطته ويرتب اغراضه بالسيارة،سكرها بعد ما خلص تقريباً وسمع صوت الاذان :حق ،الله اكبر
مشى يدخل داخل ويتوضأ ولف يشوف ابوه الي مر بيطلع للمسجد واخذ المنشفه بنشف يدينه ووجهه وطلع خلف ابوه يمشي للمسجد، دخل بعد ما نزع جزماته عند الباب "تكرمون"ودخل يصلي ركعتين وخلص وهو يسم الاقامه وصف يصلي بجانب ابوه اول ما كبر الامام يبداء الصلاة ، جلس يقرأ ورده ويحس بوجود ابوه الي ما طلع من المسجد يقرأ قران ،قام بعد ما خلص وتقدم ينحني يبوس راس ابوه ويهمس له:انا ماشي الحين بمر امي وبروح لفارس نروح سوا
هز راسه عبدالرحمن ونطق:سلم على زوجتك لا تنساها وانا ابوك
هز راسه بزين وباس راسه مره ثانيه:ابشر ،توصي شي
هز راسه ب لا ومشى يطلع نهار من المسجد واتجه للبيت ،دخل شاف امه صاحية وجالسه على سجادتها ابتسم يتقدم لها وينحني يبوس راسها ويجلس بجانبها:تقبل الله منك يمه
ابتسمت له :آمين اجمعين يا رب
ناظر يدها الي فيها السبحة وابتسم يمسك يدها ويبوسها :توصيني على شي ؟ماشي الحين
ناظرته لثواني وهزت راسها:ما ابي الا سلامتك وانتبه لنفسك زين واتصل علي لا وصلت لاتنسى وتخليني اخاف عليك
ضحك لان نبرتها جات زي التهديد :ابشري من عيوني ،شي ثاني؟
ابتسمت له تناظر فيه ونطقت بعد ما تنهدت:كنت بقولك تروح تسلم على اختك بس تذكرت ان رند عندها بس كلم عليها اذا وصلت زين يا امي
هز راسه وقام وباس راسها:يالله اجل ودعناكم الله
نزلت راسها بدون ما تتكلم تودعه وتحصنه بقلبها تشوفه طالع ..
ركب سيارته والتفت يدور سلك شاحن ،عقد حاجبه من شاف شي على المرتبه مد يده ياخذه ونطق مستغرب:سلسال!
جا بينزل بس رجع يسكر بابه من انتبه لأوس داخل وصفر يناديه:أوس
انتبه له ومشى متجه له من اشر له بمعنى "تعال":بغيت شي؟
هز راسه نهار:توك راجع من دوامك؟
هز راسه بايه:وتعبان فيني النوم اخلص علي
ابتسم بخفيف ومد له السلسال:شوف هاذا عطه امي شكله يا لها ولا لهديل اسألها
هز راسه بزين بدون لا يتكلم واخذه منه وسكت نهار حاس بتعب اخوه وارهاقه وشافه دخل جوا البيت بدون ولا كلمه وشغل سيارته يطلع من اسوار بيتهم ويتجه لفارس ..
«بيت سيف »
صحت من نومها تحس بإرهاق بكامل جسدها كش جسمها من البرد ولفت تناظر ازهار نايمه عندها ما راحت لغرفتها حتى فرح قامت من على السرير ولمت نفسها بيدينها واتجهت للحمام "تكرمون"تغسل وجهها بعد ما طلعت تبي تصحصح ،مشت لدولابها تطلع شال وتلمه عليها واخذت جوالها تطلع من غرفتها تنزل تحت وانتبهت لوجود ابوها بالصاله وعنده عمتها ،مشت باتجاههم تسمعهم يتكلمون بس ما تعرف عن ايش ،انتبهت لها دلال تناظرها :صباح الخير
ابتسمت ترد عليها بهدوء:صباح النور عميمه ،امي وين؟
ناظرها لثواني سيف ونطق يتفحص ملامحها:فيك شي ؟تعبانه ؟
هزت راسها ومشت تجلس بجانبه و رفع يده لجبينها يتحسس حرارتها :مافيك شي راسك مو حار ، بس ليه وجهك اصفر ولابسه شال ،بردانه يا ابوي؟
هزت راسها بايه:قمت من نومي بردانه واحس بإرهاق والبنات نايمين بغرفتي ومشغلين التكييف
دلال :الله يصلحهم تكييف بهالبرد
هزت راسها:مو برد باليل كان حر وشغلناه
ناظرها لثواني سيف ونطق بعدها:امك تحصلينها بغرفتها خوذي منها مسكن علشان تتنشطين شوي ،ولا تداومين اليوم
هزت راسها وقامت تتجه لامها وهي تسمع صوت ابوها يلي يتكلم مع فارس و راكان الي توهم داخلين
فتحت الباب بشويش وناظرت امها الي جالسه على سريرها والواضح انها بترجع تنام :صاحيه لطوفه؟
ابتسمت تتعدل :تعالي يا مزوني تعالي
دخلت الغرفه وسكرت الباب واتجهت لامه وهي معبسه ملامحها وجلست على السرير تحط راسها بحضن امها:بنيتك تحس بإرهاق وبرد رغم دفء الجو ، عندك مسكن؟،رفعت نظرها لامها وابتسمت لطيفه تبوس جبينها :عندي بس لازم تاكلين لك شي اول
ابتسمت تهز راسها :معليك بفطر بس بعد ما اكل مسكن لاني ما فيني حيل اقوم اسوي شي اكله
لطيفه:لا تقومين قولي لـ ساندي تصلح لك شي وكوليه
هزت راسها بزين ورفعت راسها لطيفه تناظر راكان الي دخل وهو مبتسم :توقعتك نايمه وش جايبك هنا ؟
ناظرته لثواني ونطقت لطيفه:غرفة امها وشو الي وش جايبك راكان؟
ابتسم وتقدم يبوس راس امه ويجلس:ماهو قصدي بس توقعتها بغرفتها وقلت لساندي تروح تناديها اذا هي صاحيه
قامت تعدل جلستها :ليش تبي شي؟
هز راسه بالنفي:مهو انا زوجك يبي
ناظرته تتوقعه يمزح وضحكت لطيفه تناظرها :امي للحين ما استوعبتي ،ناظرت امها لثواني وكملت لطيفه:يقولك زوجك برا يا مزون
هزت راسها بالنفي هي نست امس وقت قال لها انه بيجي يودعها قبل يروح:كيف؟،ماما كيف بطلع له وانا كذا وتعبانه ووجهي اصفر
ضحك راكان يمسك وجهها بيده:مافيك شي كنك القمر
هزت راسها بتكرار :لا لا ما اقدر قول له نايمه
هز راسه :ما يمديك للاسف ابو قال له انك صاحيه وانك عند امي علشان كذا جيت هنا علطول
ناظرت امها تحس تبي تبكي ما تبي تطلع له كذا وضربت راكان الي يضحك وقام وهو يقول لها:عجلي الولد بيمشي وراه شغل
ناظرتها لطيفه :قومي له شكلك مافيه شي كامله والكامل الله
ناظرت امه تقوس شفتها وقامت من قومتها امها :ترى بيجي ابوك الحين قومي لا تأخرين الولد
المزن بعبوس:ايش يعني وانا توني جيتك واقولك تعبانه والحين تقولين روحي له
ضحكت لطيفه تغمز لها:روحي ،اذا شفتي حبيبك تطيبين طلعت وهي تناظر امها ومشت تشوف نفسها قدام المرايا ومشت تبي تصعد لغرفتها بس وقفها صوت ابوها الي نادها:مزون ،وينك أبطيتي عليها الولد جاي يشوفك
نزلت وهي تعدل شالها عليها:كنت بجي وسبقتني انت،ابتسمت بغباء تناظر ابوها من تقدم يمسك يدها ويمشي معها :الولد بيسافر كم يوم علشان شغله وراجع سلمي عليه انتي واذا بتجلسون فالملحق الخارجي اجلسو ما لمكم احد بس لا تطولين عليه زين وانا ابوك
هزت راسها بالزين وهي ودها تختفي الحين ولا تقابله بالشكل هاذا حست بحراره جسمها ترتفع من طلعت خلف ابوها تشوفه واقف عند الباب وما عنده احد ناظرت ابوها الي نطق اول ما قربت هي :انا ماشي ودعتك الله وانتبه لنفسك ولفارس امه توصيك عليه
ابتسم يهز راسه:ابشر من عيوني يا عمي
ابتسم يلقيهم ظهره ويطلع من البيت والتفت نهار للمزن الي واقفه بعيد عنه شوي وصاده :يعني ما ودك تسلمين عليي؟
لفت تناظر فيه لثواني:فيه احد يجي يسلم الصبح والناس توها ما صحت
كتم ضحكته حس انها معصبه بس مو عليه على ابوها واخوانها الي خلوها تطلع واختفو بعدها ،ناظرها ونطق :طيب مافي سلام لنا !؟
قربت تسلم عليه وحضنها هو بدوره وباس راسها ابتعد عنها شوي وهو لا زال حاضنها يتأمل ملامحها وعيونها وما يمل ابد لو يجلس طول عمره يتاملها ما بيمل ،ناظرته لثواني :بتمشي الحين؟
هز راسه يناظرها ويناظر ثغرها الي نطق توه يسأله :بروح الحين
هزت راسها بزين وانتبهت من صوت فارس الي ينادي عليه ورفعت نفسها توقف على طرف رجولها وتبوس خده برقتها وما طولت تبتعد :توصل بالسلامة انتبه لنفسك
ابتسم هو تخدر كله من بوستها والحين يوم عدلت شالها بانت له جزء من جسمها العلوي وانحنى لها بهدوء ما يقدر يتحمل يقبلها وينزل لعنقها الي مغريه ،توترت لانهم برا تخاف احد يجي من اخوانها ورفعت يدها لصدره تشد عليه على تيشيرته :نـ نهار
ابتعد عنها وناظر عيونها حس بخوفها و توترها وابتسم يبوس جبينها وهو يسمع صوت فارس:جايك ..،ناظر عيونها لثواني بعدها ركز على ملامح وجهها :تعبانة انتي؟
هزت راسها بـ لا رغم إرهاقها الحين وتشد على نفسها لا تطيح تحس بالبرد رغم وقوفها برا وبوجود الشمس الا انها بردانه شدت على الشال الي عليها ورفعت نظرها له ،نهار :توصيني شي؟
هزت راسها بـ لا ونطقت بهدوء:انتبه على نفسك
تقدم يحضنها :من عيوني ،وانتي لا تهملين نفسك وارتاحي زين مزوني
ابتسمت تهز راسها بأيه وناظرها لثواني وهو ماسك كفها وابتسم من شاف الخاتم ينطق:ما حلى الا عليك انشهد
ابتسمت وخجلت لانه رفع كفها يبوسه وبعد ثواني تركه وهو يناظر عيونها وطلع بعد ما ودعها وهي ظلت واقفه لثواني طويلة ومبتسمه ومشت مسرعه من سمعت اصوات العيال جايين ودخلت للداخل ما حصلت لا امها ولا عمتها موجودين وتنهدت براحه ومشت للمطبخ تشوف وجود ساندي وجلست على الكرسي تنطق :ساندي سوي لي اي اكل علشان اكل مسكن
ابتسمت ساندي تهز راسها وتبداء تصلح لها وطلعت هي من المطبخ تصعد لغرفتها تشوف البنات لا زالو نايمين وناظرت جوالها تشوف رساله من ترف"صباح الخير زيتونه "وبعدها رسالة "بتداومين اليوم؟"ما عرفت من صاحب الرسالة بس شافتها وما ردت بس ردت على ترف وسكرت جوالها ومشت تتجه للحمام "تكرمون "تاخذ لها شور سريع..
«مكان اخر »
لف أنظاره للرجل الي امامه يكتم غضبه قد ما يقدر لانه استفزه بشكل ما يتحمله ضرب الطاولة يوقف كلامه:اسكت!
ناظره بخوف يسكت ،يسمع كلامه لسكرتيره :خذه خله يفارق عني ولا اتشوفه عيني
هز راسه يمشي ينفذ كلامه ،فتح جواله يشوف محادثته معاها ،شاف انها قراتها بس ما ردت عليه ابتسم علي جنب يهز راسه ويسكر جواله يرميه بعيد عنه :نشوف وضعنا معاك الحين
قام وعدل ثوبه يطلع من مكتبه ويطلع برا بيته ويشغل سيارته يركبها ويحرك طالع من بيته :بشوف وين ولدك يا سالم يكمل الي انت ما كملته..
«عند المزن»
جلست بعد ما طلعت من الشور ونشفت شعرها وتلبست ،اخذت جوالها ترسل لترف:موجوده فالشركة، بجيك الحين
للت تناظر ازهار الي صحت من منبه فرح وهزت راسها:الي حاطه المنبه ما قامت وذي قامت ،تنهدت ونادت عليها:فرح ،فروحة قومي عندك دوام يالله
تأففت تغطي عيونها وناظرت ازهار ونطقت بصوت مليان نوم:كم الساعه
ناظرتها ازهار بنص عين دليل انها ما صحت زين ترفع اكتافها بعدم معرفها ،عدلت جلستها فرح وناظرت المزن الي تلبس عباتها:كم الساعة
المزن ناظرتها من المرايا وهي تعدل حجابها:بتصير ثمان الصبح وانتي ما قمتي
شهقت تفز من السرير واخذت جوالها بسرعة تطلع من غرفة المزن تتجه لغرفتها ،ضحكت عليها المزن وناظرت ازهار الي رجعت تنام ورمت عليها المخده:ازهار قومي ما عندك دوام انتي
هزت راسها تغطي وجهها باللحاف وطلعت المزن تسكر النور والباب خلفها ونزلت وما حصلت احد تطلع من البيت تركب سيارتها وتحرك للشركة ،ركنت سيارتها بعد ما وصلت ونزلت وهي تضبط حجابها ومشت تدخل داخل الشركه ودخلت معها ترف الي مستعجله ،ضحكت عليها تمسكها :بشويش ليش مستعجله كذا
ناظرتها :زيتونه تكفين بعدين ارد على سوالك
هزت راسها تناظرها:طيب ليش متأخره مو عادتك
ناظرت المزن لثواني وابتسمت المزن تتركها:خلاص روحي بس بعد ما تخلصين تعالي لي لا تروحين مكان
هزت راسها بأيه ومشت باستعجال وهي تتأفف قامت من النوم مروقه وما كانت تبي تروح بدري لان ما عندها شي لين جاها اتصال من السكرتيره تبلغها عن وجود اجتماع مهم حطوه اليوم ولازم تحظر ولا بينسحب منها المشروع ،وقفت عند الباب واخذت نفس تعدل شكلها وحجابها :يالله،بسم الله
مدت يدها تفتح الباب وتدخل تمثل الثبات ناظرت فهشام الي بينهم وصدت عنه تسمع اسألتهم ،ترف:متى حددتو الاجتماع بدون ما تبلغوني والمشروع مشروعي؟
ناظرها احد الموظفين:قبل ساعه بس قلنا لسكرتيرتك ما قالت لك؟،قالها بشكل يستفزها وتعرف انه يقصدها وابتسمت بسخرية منه:لو ما قالت لي كان ما جيت ولا اكتمل اجتماعكم
شخص اخر:ايه بس لازم نتناقش بهالمشروع وحنا نقول نفضل انك تتركينه للشخص المناسب لانك.. ،حطت يدها على الطاولة تناظر فيه:لاني ايش؟جاوبني ،لاني ايش؟
ناظرها وجا بينطق بس سكت من ضربت الطاوله :لاني بنت! ولا لاني احسن منكم كلكم وخايفين ينجح هالمشروع وينزل مستواكم انتم ؟
نزل راسه يبتسم هشام منها ويسمع همسات الموجودين وناظر للموظف الي نطق اول واحد يستفزها:لا تشوفين نفسك علينا وتسرقين مننا المشاريع والبيوت الي تجي علشان ابوك مدير تنفيذي هنا
ضحكت بسخريه منه :اي سرقه ،حبيبي صحصح !انا بشغلي وبتعبي اكسب المشروع وصاحبه تجي انت تحاسبني ليه؟
ما تكلم يسكت وكلهم سكتو وماهي الا ثواني قامو من دخل سيف و سعود وخلفهم كانت المزن واقفه عند الباب ومكتفه يدينها تناظرهم
ناظرهم سيف وهو شبه معصب لانهم مسوين اجتماع بدون اذنه وعلى مشروع هو بنفسه سلمه ترف لانه يعرف شغلها ويعرف انهم سوو هالاجتماع علشان يستفزونها ويخلونها تنسحب وتترك هالمشروع لهم :انتهى الاجتماع الي اصلاً ما ابتداء
ضحكت المزن تنزل راسها بعد ما شافت نظراتهم الي تعبر عن حقدهم وغبنتهم وناظرت ابوها بفخر تهمس :حي عينه ابو مزون
مشى سعود لبنته يمسك يدها وناظرهم بحده وخافو منه يطلعون من الغرفه وما سلمو من نظرات باقي الموظفين لهم
ابتسم هشام الواقف يناظرها:خلصي هالمشروع وجايك مشروع ثاني مطلوبه بالاسم
ناظرت فيه ترف لثواني هي ما تكرهه ولا تعاديه ،ناظرت ابوها وهز راسه:تتأكدين مني انا ما سمعتيه وش يقول والله وكبرت بنتي وصارت معروفه
ضحكت تحضن ابوها بدون كلام وناظرتها المزن ومشت قريب لهم تناظر هشام الي لا زال واقف
حس بنظراتها بس ما ناظرها ابد ورفع راسه يشوف سيف وآخذ اغراضه:توصي شي عمي انا ماشي
ناظره سيف ونطق:لا معليش على الي صار
هز راسه ينطق:ما صار شي
ابتسم سيف له ومشى يطلع هشام من الغرفة وينزل تحت للمواقف ناظر رقمها امس مرسل لها ولا فتحتها تنهد بتعب يركب سيارته ويحرك من المكآن
«بالداخل »
كانت بمكتب ترف وتناظر من الشباك تسمع كلام ترف مع الفريق حقها بس ما تعيهم تناظر للفراغ تفكر باشياء كثير ومن ضمنها هو ابتسمت تصد عنهم تخفي بسمتها من طرى عليها صباح اليوم كيف كانت تعبانه ومرهقه اول ما صحت وكانت رافضه تطلع له من جا رغم انه مبلغها بالامس انه بيجي ويشوفها قبل يروح ،اتسع مبسمها من تذكرت جملة امها "اذا شفتي حبيبك تطيبين "،همست لنفسها:صدقة لطوف
كانت تعبانه وبعد ما طلعت له وسلمت عليه وودعها بشكل تحبه وحنون هي علطول صعدت غرفتها تبدل وتستعد لدوامها رغم انها ما كانت بتداوم وابوها قايل لها لا تداوم بس هي تحس بنشاط ولا حبت تجلس بالبيت رفعت جوالها من جاتها رسالة وناظرت اسمه تبتسم لا شعوريا وتفتحها تشوفه يسألها اذا هي بخير او لا لنه قبل لا يروح ما تطمن عليها ويحس بوجهها مصفر وتعبان ،ردت عليه وهي لا زالت مبتسمة "انا بخير"، "وصلت؟"
جاها رده بعد ثواني طويلة "باقي لنا شوي"، "متأكدة انك بخير؟وجهك مو مطمني الصبح "،رفعت عيونها تناظر ترف الي مشغولة هي وفريقها ومشت تطلع من مكتبها تتجه لمكتبها تدخل وتسكر الباب "بخير مو مصدقني يعني!"
ابتسمت من جاها رده الي ما توقعته وانصدمت وخجلت بنفس الوقت "ما بتاكد لين اشوف وجهك صوريه لي ،مقدر اكلمك معي فارس"،ترددت وارسلت له "لا"بس كالعادة اصر عليها لانه ما بيرتاح وقال لها اذا ما ارسلت بيتأكد من راكان ولا فيصل ،وبعد ثواني طويلة من ترددها صورت وجههز بعد ما دورت اضاءة زينة وقفت عند الشباك تدخل اشعة الشمس وصورت وجهها وارسلته له تكتب تحتها "تأكدت بحذفها ترا بسرعة "
ضحك نهار عليها توقع انها تخجل الحين وابتسم يشوف وجهها ويتامله وحفظها عنده يناظر عيونها الي سطعت مع نور الشمس توضح اكثر واتسع مبسمه اكثر من شاف انها حذفت الصورة "كذا تطمنت بس ليه تحذفينها خليها اتاملها واصحى عليها بدال وجه الي عندي"،تدري انه يستعبط عليها وما ردت عليه بالرد الي يبيه "اترك عنك الاستعباط وركز بطريقك نهار "،ضحك من قلبه هو يتخيل صوتها كيف تكلمه ويتخيل شكلها هز راسه يرفع انظاره للطريق ثواني ويرجع يكتب لها"من عيونه يا ام المحاجر الخضر"
حط لها قلب اخضر وسكر جواله يناظر فارس الي عليه سمعاته ومعه ايباده واضح انه على وشك ينهي مكالمته ..
نزل يدخل الشركه ويصعد لفوق ابتسم باصطناع يناظر الموظف ومسكه بيسأله:حبيبي تعرف وين احصل المهندسة المزن سيف؟
لفّ يأشر على المكتب الي بالزاوية:هذا هو ،بس يمكن ما تكون موجودة لان حسب علمي هي باجازة مرضية
هز راسه بزين ونطق:مشكور ما قصرت ،اختفت ابتسامته اول ما بتعد الموظف وهمس بينه وبين نفسه :نجرب حظنا ونشوف موجوده او لا، مشى يتقدم لمكتبها ويطق الباب بهدوء ويدخل اول ما سمح له بالدخول وهو يبتسم :حضرة المهندسة!
رفعت راسها تناظر فيه تبتسم له وتحاول تتذكر:انت ..،عاصم مدري ع..،سكتت لنه نطق اسمه :عصام يوسف
ضحكت تقوم من تقدم لها :عصام اهلا فيك شرفتنا
مد يده يبي يصافحها بس هي رجعت يدينها لورا وضحك ينزل راسه ويرفع يده يرجعها:صح نسيت انك ما تصافحين رجال غريبين
هزت راسها تجلس وهي تناظره مستغربه وجوده:تفضل
جلس على الكرسي يناظر المكتب حقها ويستكشفه بنظراته ،لف لها من تنحنحت تنطق:عصام اسمك قلت ؟،هز راسه وهي كانها استفزته بنبرتها وسوالها ،وكملت المزن:تشرفت ،بغيت شي ولا فيه شي ما عجبك من الشغل رغم انه متكامل ماشاءالله ما ينقصه شي!
ابتسم يهز راسه:لا ما جيتك علشان الشغل الي بيننا
عقدت حجاجها باستغراب تنزل نظرها لجوالها وترفعها له:اجل!؟
ابتسم يتعدل بجلسته ويناظرها :جاي عشانك انتي ،ناظر استغرابها وكمل كلامه:يقولون إنك ماخذه اجازة
مرَضيه ،الحمدلله على سلامتك وما تشوفين شر
هزت راسها تستغرب منه كلامه وطريقته بالكلام:الله يسلمك
ناظر جوالها الي ما وقفت الاشعارت تجيه وانتبه للخاتم الي باصبعها : مخطوبة؟
ناظرته لثواني عاقدة حاجبها تستغرب سواله ونزل انظاره على يدها واشر عليها :خاتمك !
نزلت انظارها ليدها وتفهمه وابتسمت تهز راسها بأيه تشوف ابتسامته وتعابير وجهه المستفزة بالنسبه لها ،تنهد يسند ظهره ويحط رجل على الثانيه :حسافة طافنا القطار اجل !؟
هي للحين ساكته تسمع بس ما تسولف معه وانتبه لها :عموماً مبروك الخطوبه
هزت راسها هي الحين بدت تتنرفز منه جاي بوقت دوامها ويسولف وهي مو فاضيه له :انت قلت تبي شي قول وخلص لو سمحت عندي شغل
عدل جلسته وابتسم:اعذريني ما كان قصدي اعطلك عن اشغالك
هزت راسها :مو مشكله بس قول وش تبي
ناظرها لثواني طويله يفكر :تعرفين هشام سالم صح؟،ما اتوقع انك ما تعرفينه لنه له مجال هنا واكيد انتي وهو خصوم بعض
المزن:اعرفه بس من بعيد وصح اننا ننافس بعض بس كل واحد بحاله
هز راسه :اكيد رقمه عندك عطيني اياه
حست بنبرته كانه يأمرها مو يطلبه منها وهزت راسها تلف للابتوبها تشتغل عليه:ما عندي رقمه
ضحك ينزل راسه:لا مو كذا يا المزن مو كذا يا بنت سيف
ناظرت فيه بطرف عينها وسهجته وحست فيه يوقف وارتاحت لثواني تحسبه بيطلع وشهقت من لف الكرسي يحاصرها فيه دفته عنها تقوم من على الكرسي وتناظر فيه بحدة:لا تتجراء وتقرب مني مره ثانيه كذا
ضحك ينزل راسه ويرفع يدينه:حشى حقك علي وأسف
اخذت جوالها من رن وترد عليه وهي تناظره ورجع يجلس مكانه:هلا
راكان وهو يناظر أوس الي معه :وينك ما تردين
لفت وجهها تهمس له:مشغولة مع زبون ينرفز
راكان:اسمعيني الحين زين ،تعرفين الي اشتغلتي فقصره ورممتيه من اول وجديد
هزت راسها:ايه قصدك عصام
هز راسه يدعي انها تشوفه :اي هو
ضحكت :هو الي عندي الحين جاي يسولف وانا مالي خلق
شد اعصابه يمسك نفسه:اطلعي مزون واتركيه  تراه من اتباع سالم الـ***
سكتت مصدومه تناظره لثواني وصدت بارتباك تسكر من راكان ..
سكرت من المكالمه بعد ما انتهت وناظرته تاخذ اغراضها وتطلع
-
عطوها حقها ✨
ومبارك عليكم الشهر 🌙✨🤍