يا رقيقه الحُسن و يا دقيقة الاوصاف يا كُل مُصطلحات الجمال والإذهال ياغيمتي

٢٥

هزت راسها وركضت تحضنها فرح وترف وازهار ،ضحكت هديل :انا مبسوطه حالياً لانه بتجي غروب وبيجي ولد حور الي للحين مو راضيه تعلمنا وش جنسه
حور :احسن خليني اذا ولدت كذا تتفاجؤون احسن
وهج :ان شاءالله كلكم تجيبون بنات..
،
اخذت نفس عميق ولفت تشوف شكلها لأخر مره بالمرآيا وابتسمت تناظر شكلها :يحصل له وحده زي جمالي بس
ضحكت ترجع شعرها ورا اذنها يطغي غرورها واخذت جوالها تنزل تحت تشوف خواتها الي كاشخين كشخه بسيطة بس عشانها مع انهم ما عزمو احد بس بيعقدون وتطلع معه شوي وترجع وفيه خالاتها الثنتين معهم ،ابتسمت من زغرطت خالتها الصغيرة وخالتها الثانيه تبكي نزلت توقف قدامهم ونطقت :خالتي تكفين ما ودي ابكي ويخرب برستيجي
هزت راسها ما تقدر توقف دموعها وتقدمت لها تحضنها:ما اقدر يا امي انتي اشوفك كاني اشوف اخيتي قدامي
تقدمت مرام لها تمسكها:حنا وش قلنا خاله تو مو انتي بنفسك قلتي لا تبكون والحين انتي بكيتي!
ابتسمت تمسح دموعها وتقدمت وهج:ابوي يقول خليها تجي المجلس
هزت راسها تزفر بتوتر ومشت للمجلس تفتح الباب وتشوف ابوها ولمعت عيونها من شافت عيونه محمره أثر بكائه تقدمت تحضن وجهه بكفوفها :سعود القلب؟
ضحك يحضنها ودها يدخلها داخل ضلوعه هاذي احن بناته عليه واقربهم له :وقعي علشان ابارك لك
ضحكت تنزل دموعها ومده لها ووقعت يمسك راسها ويقبله :مبروك يا عين ابوك ،مبروك يا اجمل عروس بعيوني الف الف مبروك عقد قرانك
شدت على بشته تبكي وررفعت عيونها تشوف خواتها حولها وحاضنينها هي وابوها
سعود ابتعد يمسح دموعه بشماغه :انا بروح للرجال خليك بالمجلس يجيك الحين فارس..زوجك، اومئت بالايجاب وطلع سعود من عندهم يجون خالاتها لها
دخل المجلس يشوف فارس الي مع خاله وعيال خاله ،نادا عليه وتقدم له فارس يسمع مباركته ونطق بعدها سعود :تعالي معي تشوفها
هز راسه يمشي معه وهو شاد على يده بتوتر اخيرا بتتهنى عينه فيها اخيرا بعد مده طويله صارت حلاله،فتح الباب يدخله سعود وابتسم من شافها بفستانها واقفه وتعدل شعرها لابسه نفس اول مره شافها وقت ملكة نهار والمزن "ازرق"وشعرها قصرته زيادة ابتسم يسمع تسكيره الباب عرف ان سعود تركهم لوحدهم وتنحنح تلتف هي عليه ونطق ويدينه خلف ظهره:يا أعذب من الأمنيات يا عالم من الأغنيات يا اجمل الشعر البديع من اخره لين اوله
ابتسمت تنزل راسها وترجع شعرها ورا اذنها وتقدم يقبل جبينها:مبروك لنا
رفعت نظراتها له :مبروك
فارس:سرقتي قلبي بالازرق اول مره وبتسرقينه مره ثانيه!؟
ناظرت فستانها ما تتذكر:متى شفتني لابسه ازرق؟
ضحك يقبل خدها:نسيتي؟ ملكة نهار والمزن!
هزت راسها:اه بالمجلس يالنسونجي
ضحك يحاوط خصرها:الحين صرت نسونجي!،مكانك انتي الي جيتيني
ناظرته تبين غرورها:يحصلك وحده زيي اصلاً
ضحك يهز راسه يحبها كذا يحب غرورها هاذا وطول لسانها :صادقه يحصل لي
مسكت طرف بشته وابتسمت تناظره تدري بحركاتها ذي وش يصير له تنطق :لبسني الخاتم
ابتعد ياخذ العلبه ونطق وهو يقرب منها :نلبسها ونطلع ؟
ترف:وين ؟نطلع؟
فارس:باخذك البيت خلاص صرتي زوجتي
ترف شهقت:لا
تقدم يمسك كفها ويرفعه :وش لا خلاص صرتي زوجتي وحلالي
هزت راسها بالنفي تسحب يدها:ما اتفقنا كذا بعدين حددنا الزواج ومو بعيد
هز راسه :مو بعيد بس بننتظر شهر كامل و اسبوع علشان تكون صاحبتك راجعه وتحضر الزواج
ترف تخصرت:احمد ربك اني وافقت تكون الملكه اليوم ولا كان اجلتهـ...،سكتها يقبل ثغرها ويشد على خصرها يرتوي عقب ضماه طول هالوقت وينجح يسكتها،شدت على بشته تغمض عيونها وتبادله بعد ثواني تستوعب الي يصير ،فصل قبلتهم يسند جبينه على جبينها ياخذ نفس وابتسم بهدوء من حضنته هي وتشد على بشته :ترف عمري
نزل انظاره عليها يسمع سكوتها ومسح على شعرها ينطق:ترف !،ابوي ناظريني
ابتعدت بعد ثواني وهو لازال محاوط ظهرها ورفع يده الثانيه يبعد شعرها عن وجهها:تدرين اني بجيبهم من مكانهم علشان بس اخذك حلالي
نزلت راسها تخفي ابتسامتها ورفع يده لفكها يرفع وجهها وابتسم يحس بخجلها ورفع كفها من جديد يلبسها دبلتها واخذت هي دبلته ومدت يدها لكفه تلبسه واخذ كفها يرفعه ويقبله ويحضنها من جديد..
،
«إندونيسيا-بالي العاشرة مساءً»
خرجت من الغرفة تتوجه للصالة ما تحصله ومشت للشرفه تشوفه واقف والواضح يكلم ابتسمت تتقدم وتحضنه من الخلف تسمعه يكلم ،نهار:الله يوفقك يا اخوي واعذرني اني ما جيت معك
ميلت راسها تناظره وتعقد حجاجه ما تفهم وتسمعه يكمل لي لف عليها وابعد جواله لثواني وقبل ثغرها تبتسم وابتعد هو ينطق :صباح الخير
المزن :صباح النور
رجع جواله لاذنه :الله يوفقك ابو عزيز وابشر بالهدية والله يبني بيتك
شهقت تغطي فمها كانت تحسبه قفل المكالمه و التفت عليها نهار يشوفها رجعت داخل وتقدم يقفل باب البلكونه بينه وبينها وابتسمت بخفه له ومشت تجلس تحس بورطتها ،ابتسم يعطيها ظهره يكمل مكالمته وزفرت تأخذ جوالها تشوف رسايل ترف لها وتصوير خواتها ليومهم البسيط الي عاشوه عشان اختهم ومسحت دمعتها من نزلت ودخلت على الواتساب تدخل على رقم ترف وتضغط الفويس تسجل لها :مبروك يا روح اختك و يا عساه عقد الدهر يا حبيبة الفارس مبروك يا عيوني ،صح كان ودي احضر معك بس امر الله اني ما احضر وان شاءالله احضر بزواجك وازفك يا أجمل عروس..
رفعت عيونها على نهار الي دخل واخذت منديل تمسح دموعها وناظرها ينطق:لسى ما بدلتي
ناظر عيونها وتقدم لها بخوف يمسك وجهها بكفوفه بحنيه: افاا وش له هالدموع لا يكون مني؟
هزت راسها بالنفي :لا ما يجيني منك شي يا حبيبي
حضن راسها ينطق:اجل من وين دامها مو مني
المزن ابتسمت تمسح وجهها:كلمت ترف وما تحملت وبكيت كله من هرموناتي
ضحك يمسح على بطنها :مو مخليتنا الشيطانه بس تبكين امك انتي
ضحكت المزن ورفعت عيونها عليه من قام يمد ايده لها ونطق:قومي بدلي علشان نخرج تغيريرن جو
مسكت كفه تقوم معه ودخلت تغير ملابسها
فتحت الدولاب تطلع ملابسها الي قررت تلبسها اليوم وميل راسه من شاف لبسها :مو يقولون احلا من العقد لاباسه ،انا اقول احلا من اللبس لباسه انتي الي بتحلينه مو هو
ضحكت تغطي وجهها بخجل وطلع هو يتركها على راحتها تبدل ودخلت الحمام تبدل وتخرج بعد ما تخلص وترتب شعرها وطلعت بفستانها له تشوفه جاهز بلبسه الي يناسب البحر شورت وتيشيرت وابتسمت ترفع جوالها تصوره والتفت عليها من حس فيها واتسع ثغره يناظرها يتامل جمالها الي ما يشبع منه وفستانها الابيض وعليه رسمات زهور تمثل رقتها ،نهار:نكنسل العشاء؟واجلس أتأملك ما بمل والله
ضحكت تهز راسها بالنفي ومشت للمرايا ووقف خلفها هو ورفعت جوالها تصور معه تصور اسعد لحظاتهم سوا..
،
«الخُبر -بيت سعود »
وقفت تلبس عباتها لانها بتخرج معه وابتسمت من تقدمت خالتها توصيها:ترف تراني اعرفك زين لا تجننين الولد من الحين اركدي شوي زين امي
ضحكت تهز راسها وتقدمت تقبل خد خالتها:حبيبتي خالتي هو اصلاً مايت عند هبالي الي انتي تنبهيني منه
مرام :الله يخلف عليكم بس
خالتهم الصغيره:انتبهي لنفسك زين
رنا:ترف تدلعي اشوي عليه لا تطلع شخصيتك القويه
ناظرتها ترف بصدمه ونطقت خالتها :الله يوفقكم يا امي واستانسي ما عليك منهم خليك على طبيعتك بس لا تجننين الولد
ضحكت ترف ترفع يدها تودعهم وتطلع له وتتجه للسيارة تركبها تكون يمينه وابتسم يلف لها وهو يشغل السياره:تو ما تتبارك السيارة وتزين
ابتسمت بوسع ثغرها تنطق :الله يسلمك ويخليك
مد يده يمسك كفها وناظرت يده لثواني وصدت ما تدري ليه صايها الخجل الحين وهو مو من طبعها ،مسك كفها وهو يدري انها بتسحبها بس انصدم من شدت على كفه كانها تلغي كل ضنونه الداخليه يبتسم ويمشي بها للمطعم الي حجز فيه لهم الاثنين
مد يده للمسجل يشغل اغنية لانها ما تتكلم ويبي يلطف الجو شوي وبدا يدندن معها ولفت تناظره تحس بالمشاعر تجاهه تفيض ،ابتسمت تكسر صمتها وتغني معه ولف عليه يضحك ما توقع منها رفع كفها لثغره يقبله مطولاً
،
«إندونيسيا بالي »
مشى يطلع معها يمشون يد بيد ورفع جواله يصور المكان من وقفو ولف يشوفها منحنيه تقطف الور وابتسم يرفع جواله يصورها بعدسته ما يدري مين الورد بالضبط
مشت تتقدم له وبيدها باقة ورد تنطق:شرايك نهار؟
سكت يناظرها تناظر الورد وتلمسه باصابعها ونطق من رفعت انظارها له تستغرب سكوته:حلو مثلك
ضحكت تنزل راسها وتنطق بهمس:الحلو انت
توسعت عيونه يناظرها وابتسم يدخلها تحت ذراعه ويمشي معها للمطعم ،جلست تشوفه يطلب لهم الاكل بعد ما اختارت وش تبي هي وانتظرت الاكل يجي ،ابتسمت تتأمل الناس الي يرقصون بالمطعم ويصفقون سندت ظهرها على الكرسي تتنهد وتناظرهم وتبتسم وتصفق معهم وانتبهت لـ نهار الي يناظرها ويصورها،غطت وجهها بكفينها بخجل :نهار!
ضحك يعتدل بجلسته من قدمو لهم العشاء وسكر جواله يحطه على الطاولة:خجلك هاذا لازم نحصل له حل مع اني احبه بس برضو
سمت بالله تاخذ الشوكه وتبتدي تاكل وابتسم هو بعد ما اكل لقمته:عافيه عليك
المزن:يعافيك حبيبي
رفعت راسها تشوف الناس قامت ترقص مع ازواجها من اشتغلت الاغنيه ومسحت ثغرها بعد ما خلصت من طبقها ،تقدم النادل ياخذ الاطباق الي خلصو منها ونزل اطباق الحلا الي طلبوها ،لفت على نهار تبتسم من سمعت عزف القيتار ابتسم لها وحطت يدها على دقنها تتامل المشهد الرومنسي امامهم رفعت ناظريها له من وقف امامها ومد يده شهقت تغطي ثغرها:تدعيني للرقص؟
هز راسه :ودك؟
هزت راسها تمسك كفه وتقوم وحاوطت ذراعه خصرها وبدا يتمايل معها على أنغام الغيتار ومد يده تلف تبتعد وهي لازالت ماسكه كفه ولفّها تدور مره اخرا وحضنها يصير ظهرها ملاصق صدره ابتسمت تحس بالسعاده معاه وهي تتمايل معه ،غمضت عيونها من حسته يدفن وجهه بعنقها ويقبله ،وقفت من توقف العزف والناس بدت ترجع وهمست له:نهار !
همهم لها وابتسمت تبتعد:خلصت العزف يا المحامي
دفع جانب خده بالسانه من الداخل ينطق:ليتهم طولو شوي
ضحكت تتجه للطاولة تاخذ جوالها وتقدم هو خلفها ياخذ اغراضه وينطق:نمشي يا حضرة المهندسة؟
هزت راسها ومدت يدها تمسك كفه وتمشي معه خارجه من المطعم يتمشون بالخارج عند الشاطئ اغمضت عيونها تاخذ نفس ويلفحها الهواء وتسمع امواج البحر ومسكت كفينه من حاوطها من الخلف ابتسمت تنطق:اصوات الامواج مريحه
نهار:ماهي مثل امواج بحر الخُبر
ضحكت تهز راسها :صح
قبلت خده وابتسم يتأملها بعيونه الناعسه..
،
صحت من النوم من صوت المنبه قامت من على السرير تتجه للحمام "تكرمون "تغسل وتغير ملابسها وبعد نص ساعة نزلت تفطر وماحصلت احد بالبيت استغربت ونادت على العاملة تسالها ،هديل:سارا وين ماما ثريا وبابا؟
سارا:فالمستشفى من الفجر
عقدت حجاجها توقف :ليه بابا فيه شي؟امي؟
هزت راسها:لا بس مدام حور فيها ولادة
اخذت جوالها تشوف اتصال امها واتصال من أوس ورجعت تتصل عليهم بس ما يرد احد وقفت تلبس حجابها وخذت اغراضها ومشت تطلع تدور السواق وتنادي عليه ومن جاء نطقت:المستشفى بسرعة عند حور
هز راسه يعرف المستشفى لانه هو الي موديهم الفجر وركب سيارته بعد ما ركبت وطلع من اساوار القصر للمستشفى،تنهدت تاخذ جوالها وترسل لراكان انها ما بتداوم وبتروح المستشفى عند حور وسكرت جوالها وترجع تتصل على امها مره اخرى ونطقت اول ما ردت :هلا امي ،كيفها حور
ثريا:طيبة توها طالعه بيودونها غرفتها
ابتسمت براحه :وش جابت؟
ثريا ابتسمت وهي تناظر اديب الي بحضنها نايم:توام ولد وبنت يهبلون بسم الله عليهم
ضحكت هديل:الحمدلله على سلامتها وعلى سلامة عيالهم
ثريا:وينك انتي الحين؟
هديل:جايتكم انا
هزت راسها ثرايا:زين يا امي اذا وصلتي دقي علي
سكرت من امها تبتسم وتقدمت تنطق :عبد الرحيم ابغى اقرب محل ورد
عبد الرحيم:ابشري
ابتسمت ترجع ظهرها للخلف وناظرت رند الي مرسلة بشارة المولود لهم وابتسمت تعجبها اسمائهم وتناسقها سوا.
،
طلعت من الشور وهي تنشف شعرها بعد ما لبست وابتسمت تشوفه يسبح بالمسبح الي عندهم مشت تقرب له ومعها جوالها وجواله الي يرن وتناديه:نهار
قربت اكثر تناديه ولف عليها من سمعها :لبيك
المزن :جوالك
مدته له وطلع من المسبح ياخذه منها ومدت له المنشفه وابتسم يقبل خدها :نعيما
ضحكت له ترد عليه و رد على جواله وما طول سكر لان الاتصال من سلمان سكرتيره ،لف عليها وهو يمسك وجهه ويخلي المنشفه على شعره ينطق:خلصتي اغراضك
المزن:اي بنطلع الحين؟
قرب بعد ما نشف نفسه:اي بس بنمر مكان اول وبعدها نروح المطار
ناظرته يدخل يبدل ومشت تجلس تنتظره مر الشهر كامل عاشو فيها واستمتعو فيها وتقربو من بعضهم اكثر ،فتحت الباب ودخلو الموظفين ياخذون شناطهم وناظرته من خرج يلبس نظاراته الشمسيه ورفع كفه لشعره يبعثره ويبعده عن وجهه ويلبس كابه ،اخذت كابها تلبسه وتقدم لها يمسك كفها ويخرج معها من الغرفه وطلعو يركبون السيارة الي بتاخذهم للمكان الي يبيه نهار قبل ما يمشون ،وصلو منطقة سيميناك ابتسمت تشوف المنظر الخيالي امامها مد يده لها ومسكت كف يده تشابك اصابعها باصابعه تشوف البحر الصافي والخيول الموجودة ابتسمت تنطق:خيالي المكان
نهار:تعرفين تركبين خيل؟
ناظرت المزن يعبس وجهها وهزت راسها:لا بعدين اخاف
ابتسم يمشي معها جهة الخيول:انا معك لا تاخفين
سكت لثواني ثم لف عليها :نركب سوا انا وانتي
ابتسمت :حلو،بس لا تنسى اني حامل اخاف يضر البيبي
هز راسه بالنفي:بس نجرب ،مع بعض
هزت راسها وابتسم هو ينادي الموظف ويكلمه بلغة انجليزية علشان يفهمه وطلب منه خيل واحد ومشى معه نهار يختار الخيل وابتسم يمسح عليه ومسكه مع العنان يمشي لها وهو راكبه وابتسمت بخوف من قرب منها وضحك يوقف مكانه ومد يده يمسح على الخيل واسغلت الفرصه هي تصوره رغم خوفها من الخيل ولف لها نهار ينطق:تعالي
المزن:لا نهار
ابتسم يقرب لها:امشي ترا ما ياكل
مد يده ينتظرها وتقدمت رغم الخوف وانحنا يحاوط خصرها ويرفعها له وتصير قدامه وظهرها على صدره وهي مغمضة عيونها صرخت ،ضحك نهار يمسك العنان ويوجه الخيل يمشي بهم على البحر بخفيف ونطق :افتحي عيونك يا خوافه
هزت راسها بالنفي ،نهار:مزوني !
فتحت عيونها بشويش وناظرت الخيل تبلع ريقها ومسك كفها يخليها تمسك العنان "الحبل "معه ويمشي فيهم ابتسمت ترفع يدينها وضحك ينطق:ها الحين يخوف ولا لا
هزت راسها بالنفي:شوي بس
رفعت جوالها تصور سلفي معه للذكرا وبعدها تصور الخيل مع المنظر  والبحر والشمس،رجع نهار لمكان الخيول ووقف ينزل وينزلها بعده ورجع الخيل ونطقت المزن:ليه؟
نهار:خلاص لازم نروح المطار قبل نفوت الرحلة
ميلت شفتها تنطق:ما شبعت منها طيب
تقدم يقرص خشمها ويمشي وهو ماسك كفها:نرجع لها بعدين وتشبعين منها
حضنت ذراعه من ركبو السيارة ومشو مبتعدين عن المكان متوجهين للمطار لوجهتهم الأخرى
،
اخذته بحضنها اول ما وصل واخذ عبدالرحمن البنت وابتسمت ثريا تمسح على راسه:بسم الله ماشاءالله
ابتسم ثابت يشوف امه وابوه واديب الي يناظرهم مستغرب ونطقت ثريا:الحمدلله على سلامتك يا امي وسلامة عيالك
ابتسمت حور :الله يسلمك خالتي
عبدالرحمن:الحمدلله على السلامة ومبروك ما جبتي
ابتسمت حور ولفو من دخلت هديل بباقتين ورد مختلفات :اهلاً اهلاً
تقدمت هديل تنزل باقات الورد على الطاولة ومشت بعدها لحور تسلم عليها وتحضنها:مبروك ما جبتي
حور:حبيبتي
عبدالرحمن اخذ هديل بحضنه من جات عنده وابتسمت ثريا الي بحضنها الولد:بوبي تعال شوف البيبي اخوك
ثابت:هالكبر يمه وتقولين بوبي
ضحكت هديل ونطقت ثريا:شتبي حفيدي وبدلعه لا تكون بتغار انت بعد
ضحك ثابت وناظرت ثريا حور:وش قررتو تسمونهم؟
ناظرت ولدها الي بحضن جدته ونطقت:الولد عبدالرحمن
ثابت :البنت رازان
ابتسمت هديل تشوف عبدالرحمن الصغير الي بحضن امها:وزينو وزين من تسما عليه
رفعت راسها من نطق ثابت:كنا نبي البنت على امي بس هي رفضت
ثريا:ايه اكيد برفض وشو له تسمي علي
حور :وزين اسمك خالتي وياحظهم لا تسمو عليك
ابتسمت ثريا وتقدم عبدالرحمن يمد البنت لابوها واخذها ثابت منه وجلس بجانب ثريا:يبشر بالسماوه سميي ،عساه يا ربي يتربي بعز والدينه ،اذنت باذنه؟
هز راسه ثابت:لا ااذن الحين
،
«اليوم المنتظر ٣/٦، زواج الترف بالفارس»
طلعت من ربع ساعة مع وهج بيتجهون للقاعة خواتها سبقوها هناك يتجهزون وهي توها تخرج بعد ما وصلت مسكتها الي طلبتها وتوها تجيها ،رفعت يدها تشوف الوقت من ساعة يدها :تأخرنا مرره
وهج:وين تاخرنا ترف الحين الساعة بتصير ٤قدامك ساعتين تتجهزين وتخلصين وبعدها بتصورين محد جاي الا الساعة ٩نفس الي كتبنا بالدعوة
خذت نفس عميق تحاول تخفف توترها وزفرت تناظر الطريق وما طولو ووصلو القاعة تنزل وتاخذ اغراضها وتتجه للداخل تاركه وهج ،دخلت مسرعة بتتجه لغرفة العروس وتنهدت براحة من شافت الكل متواجد وفسخت عبايتها تنطق:بسم الله نبداء
جلست على الكرسي ونطقت الميكب ارتست:حابه تبدين بالميكب اول ولا شعرك
ناظرتها بتوتر ونطقت:كلهم
نطقت وهج الي دخلت وسمعتهم:وش كلهم ،أبدي بالشعر اول وبعدها الميك اب
تقدمت الهير ستايل تجهز اغراضها وتبدتدي بشغلها .
دخلت معاه فستانها توها جايه من الصالون مع نهار ومسكت ظهرها بتعب تنطق وهي تناظر ترف:ابفهم توته كيف بتنزلين من الدرج بغيت اتشقلب انا وكرشتي
ضحكت ترف تشوف المزن من المرايا الي قدامها تعكسها:احلا كرشه بالدنياء تعالي
ابتسمت المزن تجي وتجلس على الكنبه قبالها :ما اشوف احد تحت وين خواتك؟
ترف:وهج تتجز داخل والبنات مادري بس هم واصلين قبلي هنا
سندت ظهرها على الكنبه :وتقدمت ترف تمسح على بطن المزن :اي شهر صرتي؟
ابتسمت المزن تناظر بطنها:بدخل السادس نهايه الشهر
ترف :احس ثلاث اشهر مرت بسرعه
المزن :مرت بسرعه بس فيها اشياء مره حلوه
ابتسمت ترف تناظر للفراغ:صادقة
لفو من انفتح الباب و دخلت وهج الي وقفت امامهم تنطق:كيف حلو شكلي؟
المزن:الحين مين العروس انتي ولا توته
ناظرت ترف اختها وهي مبتسمه ونطقت وهج تزفر بتوتر:اخت العروس
ضحكت المزن تهز راسها:تأخذين العقل ومع صبغة شعرك طالعه بيرفكت
غمزت لها ترف :بيجونك خطاب اليوم
ضحكت بسخريه و مشت مبتعدة عنهم تخرج من الغرفه وقامت المزن تاخذ اغراضها ودخلت غرفة تبدل وتلبس فستانها..
دخل شايل بشته بيده و ناظر المصورات الموجودين وزفر يدور اخته وما حصلها:اف ازهار وينك
مشى يتقدم اكثر وطلع جواله يرسل لترف الي توها طلبت منه يجي علشان يصورون الفيرست لوك "وصلت وينك انتي"
اخذت جوالها تشوف رسالته و ردت"بغرفة العروس "
فارس"انزلي ضيعت وش وضع التصوير الحين"
ترف"فارس ،مو وقتك بعدين كيف انزل لك وحنا بنسوي فيرست لوك؟؟!"
فارس"مادري عنك مافيه الا انا لحالي ارسلي لي احد طيب"
سكرت جوالها ونادت على اصغر خواتها :شروق
تأففت تغمض عيونها وترجع تنادي اختها :يـا شروق
دخلت شروق عليها :هلا خلصتي؟
هزت راسها:لا خليك مني و روحي لفارس تحت ازهار شكلها ما بعد وصلت
شروق:زين ،تبغين اقول لوهج تجي تساعدك؟
هزت راسها:لا بس روحي له وخليهم يشرحون له كيف الفيرست لوك
خرجت شروق وتنهدت ترف تناظر شكلها بالمرايه الطويلة وتحاول تسكر السحاب :اوف ،وهــج..
اخذ نفس ونزل بشته يحطه على يدينه ينتظر عروسته تنزل له ،لف من جاته المصورة تنطق:يا عريس بشتك وينه؟
رفع ذراعه ينطق:بيدي
المصورة:ليه البسه يلا علشان نبدأ بالتصوير
وقف واخذ بشته يلبسه ومشى يوقف مكانه الي طلبت منه المصوره وابتسم من اشتغلت الموسيقى تعلن بدايه دخولها ،مشت بهدوء خارجي عكس توترها الي تعيشه وتصارعه بداخلها ،مشت تتقدم له ومع كل خطوه تزيد دقات قلبها وقلبه وقفت من طلبت منها المصوره ورفعت يدها اليمين تلمسك كتفه الايمن تنتظره يلف عليها وما لف وابتسمت تبعد توترها الي زاد ونطقت:فـارس ،لف
سمع همسها بس ما فهم وش تقول من صوت الموسيقى العاليه ونطقت المصوره تنقذ الوضع بصوت عالي:لف يا عريس
لف من سمع صوت المصوره واستوعب انهم يبغونه يلف ويشوف عروسته ،لف ووقف يشوفها لثواني يتأملها كلها وفتح ذراعينه وبشته يحضنها فيه ابتسمت ترف ترفع يدينها وتبادله الحضن، ورفعها يلف فيها وصرخت ترف من لف فيها وقف ينزلها ويمسك وجهها بكفوفه يقبل جبينها ،غمضت عيونها تشعر فيه بحضنه بقبلاته وكل الي يصير استغلته المصوره تصور اجمل لحظاتهم مع بعض
،
جلست بجانب امها واختها تنتظر زفة ترف الي بتدخل عليهم بعد دقايق،لطيفة:مزون امي ريحي شوي
المزن:سمي
لطيفة ابتسمت تمد يدها وتمسح على بطن بنتها:الله يهون عليك يمه
ابتسمت المزن ولفت من تسكرت الانوار واشتغلت الزفة وانفتح الباب تطلع لهم ترف بطلتها ،ابتسمت المزن تشوف صحبتها تنزف ورفعت راسها ورفعت كفوفها تهف على وجهها تحاول ما تبكي ،وقفت دلال مع خالات ترف و مرام بالكوشة ابتسمت مرام تشوف اختها ومسكت خالتها تحضنها من بكت :خالتي لا تبكين الحين تشوفك تروف وتبكي وتهون
ابتسمت وهج الي واقفه قريب لهم ونطقت:خالتي ترا تسويها ترف لا تشوفك تكفين ما صدقنا على الله توافق على الولد
-هزت راسها خالتها وضحكت من كلام وهج تمسح دموعها ،دموع الفرح وابتسمت مرام تشوف دلال وتقدمت لاختها من وصلت ومسكت كفها تساعدها بفستانها ترقى الكوشه ومن رقت سلمت على خالاتها و دلال ووقفت وجو بعدها ازهار وصحباتها وبنات خالاتها والي يعرفونها يباركون لها و يهنونها بزواجها ،تقدمت المزن بجانبها تاخذ صورة معها وكل البنات معها
ابتسمت ازهار تناظر ترف:مبرووك يا عيني،يا حظ اخوي فيك
رنا ضحكت من استحت اختها :يلا يلا العروس لازم ترقص معنا
هزت راسها ترف بالرفض:لا لا
ناظرتها ازهار تقوم وتمسك يدها:اقول بس لازم ترقصين شوي
ناظرتهم بترجي وقامت بعدها من اشتغلت الاغنيه يصفون البنات قبالها وناظرت المزن ومدت يدها لها :قومي معي ولا ما برقص
ضحكت المزن:وش دخلني انتي العروس
هزت راسها ترف :زيتونه ترا بسحب عليهم قومي
قامت المزن تمسك كفها وترقص معها شوي وبعدها جلست بسبب ثقلها وتعبها وصارت ترقص مع خواتها وخالاتها ورقصت مع دلال و ازهار .
،
قاعة الرجال
زفر يعدل بشته ويسلم على الرجال الي جايين وحاضرين له ،لف على راكان الواقف بجانبه وعليه بشته :خالي وين اختفى ؟
ابتسم راكان وهو يسلم على الضيف ونطق بهمس لفارس بعد ما راح:تحصله عند الباب يستقبل الضيوف
ابتسم يسلم على الضيف الي يبارك له ويرد عليه
وقف فيصل وبجانبه هشام ونهار والباقين من أصحابهم ومعارفهم يشكلون صفهم وتبدا عرضتهم واستعراضهم هالليله
ابتسم فارس يرفع بشته ويتقدم لهم واخذ السيف من مده له فيصل رفعه على كتوفه يلعب به ويتمايل ودخل سعود معه ،صفر نهار ونطق بعالي صوته:عاش بو عزيز
ابتسم فارس له و مشى سعود ل سيف يمد له السيف :لأعب ولد الثالث
ابتسم سيف ياخذ السيف من سعود ويمشي للنص عند فارس وبدا يتمايل بالسيف ويلعب فيه ويلاعب ولد اخته ،دخل عصام بين صفوفهم وابتسم يبتدي يلعب معاهم ويرقص وما خلصت سمرتهم لين طلع العريس والعيال خلف يغنون له و يرقصون
ضحك من تلثم فيصل يرقص:انهبل ،لهدرجه مثقل عليك اخوي
فيصل عقد حجاجه:افاا بس انا!،عيب عليك
نهار:اطلق عريس واحلا عريس،الله يبارك لك يا اخوي ويبني بيتك ومنك المال ومنها العيال
ضحك فارس يحتضنه ويشد عليه :الله يبارك بعمرك
مشى لسيارته بعد ما ودعهم وركبها وطلع من حوش الرجال يتجه لقاعة النساء ويوقف عن باب غرفة العروس ،نزل ووقف عند الباب ينتظرها وارسل لاخته انه عند الباب
تقدمت ازهار لترف الي جالسه وتناظر الناس :ترف
ناظرتها وهي مبتسمه ونطقت أزهار بعد ما ناظرت امها لثواني:فارس ينتظرك ،تخرجين؟
هزت راسها ترف ونطقت:نادي لي مرام تكفين تساعدني
ناظرتها المزن الي جلست بجانبها:بتخرجين؟
هزت راسها ترف :طولت جالسه هنا وفارس عند الباب وودي اروح لغرفتي بعد علشان اشوف ابوي واسلم عليه ما شفته ابد اليوم
المزن:تمام ،قومي اساعدك
ترف:مو تعب عليك، ماودي أتعبك ترا
ابتسمت المزن تقوم معها وتساعدها وناظرت قدوم خواتها ومشت معهم راجعه لغرفتها تستعد للخروج مع زوجها لبيتهم ،لبيت العُمر
دخلت وابتسمت من شافت ابوها موجود وتقدمت له تحضنه :سعود القلب
ابتسم سعود يبعد عنها شوي ويرفع طرف شماغه يمسح دموعه:ترف العمر ،ابوي انتي
ابتسمت تمد كفها وتمسح دموعه بأصابعها ابتسم سعود يمسك راسها ويقبل جبينها : متى كبرتي متى كبرتو كلكم وتزوجتو
ميلت فمها تنزل دموعها وتقدمت تحضنه وجو خواتها معها يحضنونه وابتسم هو :يا زين البنات يا كبر حضي فيكم
ابتسمت مرام تقبل راس ابوها ونطقت:نتصور سوا قبل تروح ترف
ناظر سعود ترف لثواني ونطق:ايه زوجك ينتظرك برا
،
خرجت المزن لنهار بعد ما ودعت امها وعمتها رغم اصرارهم انها تبقى وتتعشي بس ما قدرت من الارهاق والتعب الي تحس فيه ،طلعت تشوف سيارته موقفها عند الباب ومشت تركب وهي تشوفه بعيد يتكلم مع شخص ما عرفته ،سندت راسها وغمضت عيونها بنص اليوم جاها وجع ببطنها بس ما علمت احد فيه وجلست معهم علشان ما يحسون ان فيها شي وهي تحاول تتجاهل وجعها ،اخذت نفس ومدت يدها تضغط على البوري علشان ينتبه لها نهار وبالفعل انتبه لها وماهي الا دقايق وجاها للسياره يركب بمقعده وهو مبتسم ومبسوط جداً بهاليوم :هلا بمزون عمري
ابتسمت له ولف عليها وهو يشغل السيارة وبيطلع من المكان:عساك انبسطتي؟
هزت راسها بالايجاب:مره الصدق ،صراحة كل شي كان حلو و مرتب
نهار هز راسه وهو مبتسم:اليوم طلعت كل الطاقه الي فيني من رقص مع العيال حتى فارس العريس ما خليناه
ناظرته وهو يسولف لها عن يومه ومبسوط يشرح لها مسكت كفه وهي مبتسمه وتتامله وهو يسولف لين سكت لثواني ولف عليها :بس غريبه طلعتي بدري خابر عرس الحريم ما يخلص الا الفجر
ضحكت تناظره وهي مصغره عيونها:ماشاءالله وانت وش علمك ان عرس الحريم ما يخلص الا الفجر
رفع يده يمسح دقنه وشنبه ويضحك:هاه ، وش يعرفني انا الا من امي وهديل
صدت تخفي ابتسامتها :ايه اشوى
نهار:صدق ليه خرجتي بدري تعبانه؟
سندت راسها على كتفه :حاسه بأرهاق شوي وصدعت من الاغاني والعروس راحت خلاص مع زوجها
نهار:طيب تعشيتي؟
ناظرته لثواني وناظرها وهز راسه:غريبه اذا تعشيتي انتي ، ليه ماصبرتي العشاء تاكلين لك شي على الاقل بعدين اخرجي
المزن:عمتي قالت لي بس انا ما ابي وما اشتهي اكل شي وبعدين يكفيني الحلا والمعجنات الي دارو علينا اكثر من مره
قرص خشمها ونطق:يعني كذا بتشبعين مزون ترا انتي بتاكلين علشان صحتك حتى لو ما تشتهين
ناظرته ورفعت نفسها تقبل خده : من عيوني اذا وصلنا البيت سويت لي شي اكله ،كذا يرضيك
ابتسم لها :اي ،بس خلي ساندي تسوي لك انتي لا تدخلين المطبخ لين لما تولدين بالسلامه
هزت راسها ورجع يناظر طريقه متجه لبيتهم
،
وقف يفتح لها الباب وتنزل مسك كفها بعد ما نزلت وسكر باب السيارة وقفلها ومشى معها وهو ماسك كفها لباب بيتهم الداخلي ابتسم ينطق:برجلك اليمين
ابتسمت تخطي خطواتها برجلها اليمين معه لداخل بيتهم بعد ما فتح الباب ابتسمت تناظر البيت الي يناسبها ويرضيها ويرضي غرورها ،مشى معها لغرفتهم :هاذي الغرفه لنا سويت نصها والباقي عليك
ترف:فارس اول مره اعرف ان ذوقك حلو كذا
ابتسم من مدحته وتنحنح :من يومي بس محد مقدرني
ضحكت من اغتر بنفسه ومشت تدخل الغرفه وتشوف اغراضها موجوده ولفت عليه وهي تأشر على الأغراض:متى جابوها؟
تقدم يشوف اغراضها ونطق:اليوم خواتك جو ورتبوها
ابتسمت تتقدم لدولاب تفتحه وشافت ملابسها مع ملابسه واتسع ثغرها تبتسم وناظرت البجامة الحرير الي مجهزه لها وتدري ان هاذي سوالف مرام اخذتها ولفت بتتجه للحمام وما حصلت فارس موجود ونطقت :بسم الله وين اختفى
نزلت بجامتها على السرير وتنهدت تنطق:الحين كيف بفك السحاب وانا بالقوه سكرته
وقفت أمام المرآة تشوف شكلها ورفعت يدها تلمس السحاب وتحاول تفكه وما قدرت غمضت عيونها بتعب ورجعت تحاول مره ثانية وبرضو ما قدرت تأففت تنطق:انفتح ولا بشقك
رفعت يدها للمره الثالثه تحاول وزفرت بغضب وكانت بتشتم بس سكت من شافته خلفها وانماله على ظهرها يفتح السحاب لها غمضت عيونها لانها تحس وجهها احترق من الخجل ناظرته من المرايا من خلص ومسكت فستانها عليها ومشت تاخذ بجامتها وتسرع للحمام ..
-

لا تنسون النجمه لا هنتو⭐️