كسر التراَئب

الـكـسـر الـرابـع عَـشـر

#كـسـر الـتـرائـب

#الـكـاتبـة:هـبـه جـاسـم

لاتنسون التصويت+ التعليق بين الفقرات+ متابعة لحسابي

•=•=•=•=•=•=•=•=•=•=•=•=•=•=•=•=•

حوراء::-

طلع تلفونه يخابر وگال: تعالي.
سد التلفون، شوي ودخلت بنيه شابه حلوة تجي بنفس عمري، وبأيدهه طفله صغيرة.

اني عبالي اخته بس صدمني من گال: اعرفچ هاي زوجتي  نور وبنتي ليان.

احس الدنيا ضلمت بعيني، بس ما حچيت شي ولا انطيت اي ردة فعل.

سلمت عليهه والعبرة خانگتني، خليت الطفله بحضني.
جان ما يتجاوز عمرهه ثلاث سنوات.

حسن: ادري انصدمتي بس لازم تعرفين بما انو انت زوجتي.
حوراء: ليش ما كلتلي؟
_ها؟
_ليش ما كلتلي متزوج؟؟ وليش زوجتك ماخذة الوضع عادي عبالك عرس اخوهه مو زوجهه؟
_حوراء بعدين نحچي بالموضوع جاي اگلج، هسه خل نطلع نكمل المراسيم وهاهيه، اني اريد افرح بحياتي، اني تعبت الدنيا تعبتني، ما يوم ردت شي وصارلي، اريدج انت حب حياتي، فرحتي.

عفته يحچي وحدة، وانداريت امسح بعيوني، اجت البنيه تعدل بمكياجي لان حنطلع نسوي الدخوليه.

بدت دخوليه العرسان، واني احس الموسيقى تدك بكلبي.
المصورة گدامنه تمشي والناس تهلهل واغنيه هادئة، وعبرة بداخلي.

امي ما اجت ابد، ما شفتهه وي الحضور.
صعدنه ع الستيج، وبدت الاغاني والفقرات والتصوير.
والبنات ما قصرن لعبن جوله بالعرس.

زهراء تهلهل و نرجس تهز ورزان تدگ بالخرخاشه وتغني والباقيات يصورن ويضحكن وياهن.

خلص العرس مثل السم ابد ما فرحت گلبي جمرة صاير، جنت فرحانة راح اخلص من كل مشاكلي واتزوج حسن، الشخص الوحيد الي گلبي هواه.
وتالي هيج يسوي بيه، يطلع متزوج وعندة طفله، ليششش ضم عليه ووين جانت زوجته وبنته، ليش مو بيتهم عايشه.

الف سؤال اجة ببالي لحد ما حسن صاح: حور گومي يلا خل نرگص سلو.
_شني هاذ السلو نوب؟
_ما شايفه احد يرگص سلو من قبل؟
_لا والله مشايفه، شلون هسه؟
_باعي انت بي اوگفي گبالي ومعليج بالباقي.

وگفت وياه ونزلت من الستيج، جراني گدامه ولزمني من خصري گال لزمي اكتافي بثنين ايدج.
طبقت الي گاله بس مادة ايدي ومخليه مسافه عبالك اصطفاف اول ابتدائي.

المصورة اجت علمتني الحركة، بقيت اتمايل ومركزة بملامح حسن، نسيت كلشي، نسيت الدنيا كلهه.

ما نحس اله حجيه توگف بنصنه وتصيح:

اسمر ويخبل كل القوط تلوگ عليه.
ويأهل القوط ذبو القوط حسوني لبس قاطة.