D-Day [Complete]

Part 23

U+Z

မနက်စောစောစီးစီးခေါင်းကိုက်နေတဲ့ ဓိရာဇ်။ သူ့အတွက် အရက်သောက်ခြင်းက ပထမဆုံးဖြစ်တာကြောင့် ခေါင်းကိုက်တာမစမ်း။ ဖေဖေရှိတုန်းက ရှိန်ပိန်လောက်စမ်းဖူးတဲ့သူက အရက်‌တော့ တစ်ခါမှစမ်းမကြည့်ဘူးပေ။ ဒါကိုသောက်လိုက်တာ မနည်း။ အခုတော့ သူအရက်နာကျနေ၏။

"သား ခေါင်းကိုက်နေတာလား"

အရက်သောက်လိုက်ပေမယ့် မနေ့က သူ့မွေးအမေနဲ့စကားပြောဖြစ်တာကို မှတ်မိသည်။ သူ့အိမ်ကိုလာလို့ရကြောင်းပြောလိုက်တာကိုလည်း သေချာမှတ်မိနေ၏။ ထို့ကြောင့် သူ့ကိုမေးလာတဲ့အမေကို မျက်ခုံးတွေကျုတ်ထားတဲ့ကြားက ခေါင်းငြိမ့်ပြလိုက်၏။

"သခင်လေးအတွက် ခေါင်းကိုက်သက်သာစေမယ့် ဟင်းရည်ချက်ပေးထားပါတယ်"

စားဖိုမှူးက ထိုသို့ပြောရင်း ဓိရာဇ်ရှေ့ကို သူချက်ပေးထားတဲ့ ဟင်းရည်ပန်းကန်ကိုချပေး၏။ ဒေါ်သီသီအောင်ကတော့ သားကို ဒီအိမ်ကလူတွေရဲ့အသုံးအနှုန်းက သခင်လေးဆိုတာကြောင့် နည်းနည်းတော့ အံ့ဩသွားသည်။ ဒီအခေါ်အဝေါ်ကို ကိုအောင်မြင့်ကပဲခေါ်ခိုင်းသလား သားကပဲခေါ်ခိုင်းသလား။ တစ်ဆက်ထဲ မနက်စာပြင်ထားတာကို သူ(မ)ရှေ့ချပေးလာ၏။

"မသောက်နိုင်ပဲ မသောက်ကဘူး ဒီယော။ နောက်တစ်ခါသောက်မယ်ဆို ကိုယ့်ကိုပြောနော်။ ကိုယ်အဖော်လိုက်ပေးမယ်"

ဒီလူကိုဘာမှမပြောချင်တော့ပေ။ ဒီလူ သူ့မွေးမေမေနဲ့ပါလာတာကို ဓိရာဇ်သိသည်။ မွေးအမေကို အိမ်ကိုလာလို့ရတယ်ပြောထားတော့ မွေးအမေနဲ့ပတ်သက်နေတဲ့ ဒီလူပါလာတာမစမ်း။ ဓိရာဇ် စားဖိုမှူးကြီးချက်ပေးတဲ့ အမူးပြေဟင်းရည်ကိုသောက်လိုက်မှ ပွင့်ထွက်ကာအဆင်ပြေလာတော့၏။ 

"အလုပ်သွားမလို့လား"

"ခင်များ အလုပ်မရှိဘူးလား"

"မရှိပဲတော့ နေမလားကွာ။ အန်တီဒီကိုလာမယ်ဆိုလို့ ကိုယ်လဲ အလုပ်ပါးလို့လိုက်လာတာပေါ့"

အန်တီနဲ့ဓိရာဇ်နဲ့နည်းနည်းအဆင်ပြေလာပြီဆိုတာသိရ‌တော့ သူလိုက်လာတာဖြစ်သည်။ သူ့အနေနဲ့ ဒီယောဘေးမှာနေရရင်ကိုကျေနပ်နေတာဆိုတော့လဲ မတတ်နိုင်။ ကိုယ့်ဘက်ပါလာအောင်တော့ ဆွဲဆောင်ရမှာပေါ့။ ဦးသတိုးက ဒီနေ့မင်းလွင်ကို ပိုင်နိုင်တယ်ဆိုရင် ဒီယောဆိုတာ သူ့အတွက်ပဲမဟုတ်လား။