🍃 راجع بطرگ الحزن
خسران مدري انبعت
بس الجرح تذكار
راجع وطن من حرب
حزني إعلى گد الجثث
ميت وادور ثار...🍃
كانو سنان وجبل راجعين من المدرسة
"باوع حاول تقره جدول الضرب بالعكس وهيج مراح تحس ان المسافه بين بيتك الجديد والمدرسة بعيده" نطق جبل وهو يعلم سنان على طريقته
"شيحسبليا كله!" اعترض الأصغر
"شيحسبليا كله اننننن شكد عجوزي!" قلب عيونه وهو يقلده
باوعله سنان بطرف عينه وضربه على ضهره وركض وضل جبل يركض وراه حتى يردله الضربه
غافلين عن الي كان يتابعهم من بعيد...
وصلوا لمكان يصعدون بي كيه (سيارة اجره كبيره) بس جبل گلبه منطاه يخلي سنان يروح وحده لذا صعد ويا
"الفتره الجايه اكو امطار غزيره" حاول جبل يفتح موضوع بما انو الطريق راح يطول شويه
"لا ماكو امطار كالو الجو صحو" رد سنان عليه
"زين نتراهن؟" نطق جبل بحماس
"على شنو؟" رد الأصغر وهو ينتبه عليه
"باوع منتقابل لحد ما تمطر و اول متمطر نتقابل؟"
"بس ترا ماكو مطر الفتره الجايه" انتحب الاصغر بعبوس
ضحك جبل على تعابير سنان المضحكه
تقريباً عشر دقائق و وقفت الكيه بالمكان المخصص ونزلوا الأثنين يتمشون للبيت الي صار قريب كلش
"لتجي وياي بعد توصلني طريقك طويل يصير" نطق سنان كون جبل ميعوفه لحد باب البيت
"عادي اصلا اني احب اتمشى واطوّل يلا ارجع للبيت يعني لتخاف مو علمودك" طلع لسانه بالنهايه حتى يغيض الأخر الي قلب عيونه على تصرفاته الطفوليه
ركض سنان تجاه عامود الضوء الي نهاية الشارع وكان يلمض "شوف" نادى على الأخر وهو يأشر ع الضوء
"خربان" نطق وهو يباوع على الضوء يطفى ويرجع يشتغل مره بعد اخرى
ضرب جبل العامود برجله ضناً منه ان راح يشتغل الضوء عدل بعدها لكن فقط رجله هي الي تأذت وخلت سنان يضحك عليه بقوه
شافهم الضابط هشام وهو رجع من شغله "ولكم شدتسوون شنو هل تخريب هذا" نطق بمزاح وهو يجر اذاناتهم ويسحبهم للبيت
والي كان يتابعهم من الصبح بعده كان وراهم منتضر جبل يصير لوحده حتى ينفذ الخطه الي اوكلت اله...
"تفضل ابني تفضل لازم تتغده ويانه " قالت ام سنان وهي تسحب جبل حتى يكعد على السفره وياهم
"لا والله خاله شبعان اني" قالها الصبي بخجل
"ابد والله شو دتعال اكعد تعال" جرته وخلته يكعد وياهم
