🌿 نكبر وننسى
وكبرنه ومانسينه
تالي حتى اهل المثل ضحكو علينه... 🌿
__________________________________
"اوكف دا اكلك اوكف" امسكه من ايده وداره عليه
باوع جوان بصدمه من الي لازم ايده وهو يباوعله بشيئ من الألفه والحنيه
"ش شدسوي! هد ايدي" قالها الأصغر وهو يحاول يسحب ايده من ايد الي واقف امامه يباوعله بصدمه!
"جبل شدتسوي عوف الولد!" نطق ادهم وهو يتقرب منهم
عافه جبل وهو بداخله ميريد هلشي، يحس انه يعرفه بس ميدري اذا كان هو او لا ! الشخص الي علق حياته كلها حتى يدور عليه ...!
"اسفين عيني هذا شويه لاگف" قالها ادهم بضحك وهو يسحب جبل ويبعده عن هذا الولد
ضل جوان يباوع بصدمه مستحيل هذا جبل هو نفسه جبل الي يعرفه، دموعه صارت تنزل واختلطت بغزارة المطر
مشى بأكتاف منحنيه وكأنه يحمل هم الدنيا عليها وتوجه لداخل البيت من الجهه الأخرى حتى ليتصادم مع هذا الشخص الي اوهم داخله انه مو هو ومستحيل انه يكون نفس الأنسان الي كان يعرفه قبل...
جر نفس عميق قبل لا يدخل للبيت وهو يمسح اثار الدموع من عيونه ويحاول يبتسم
"تراااا سبراييز" قالها بصوت عالي اول ما دخل للصاله
الثاني الي كان جالس على الأريكه ومسترخي، فتح عيونه بخوف على الصوت وبسبب ردة فعله صار جوان يضحك بصوت عالي
قام هدير من مكانه وتقدم ناحية الأكبر "ه هاي شدسوي هنا! شلون اجيت!!" قالها بصدمه وعصبيه بنفس الوقت! شلون يتصرف بكيفه!
"مفاجئه مو؟ بعدين اني مو صغير حجزت واجيت عادي!" رفع اكتافه بلامبالاة وهو يخلع معطفه وحقيبته
التقطهن هدير وخلاهن بسلة الغسيل "ادخل غير هدومك لتتمرض بعدين نحجي" قالها ورجع لمكانه جلس وهو يحس بالتعب بعده بجسمه
اما الثاني ف دخل للحمام اخذ شاور سريع دفئ بي جسمه، هو لاحظ امور غريبه هنا بس ميدري اذا يسأل هدير او لا وليش الشرطه جانت موجوده؟!
ابعد الأفكار هذي عن باله وهو يسد حنفية الماء وينشف جسمه
ضرب جبينه بخفه بعد ان تذكر انه مجاب ويا ملابس للحمام لذا لبس البرنص وطلع
شاف هدير بعده على نفس جلسته لذا تقدم وجلس يمه "انت زين؟" قالها وهو يشوف ان وجه الأصغر شاحب ومبين عليه التعب
لف الأصغر وجهه وهو ميريد يكلمه، اما الأخر ف قام وجلس بالجهه الثانيه حتى يصير مقابل اله "ادري بيك زعلان لأن اجيت بدون ما انطيك خبر بس صدكني ضل بالي يمك!" قالها وهو يمسك وجه الأصغر ويخليه يباوع عليه
