🌿 لا تهدني ...
الوطن حيطانه بعيده
وما يلّم الينتچي
آنه من تغيب ...
يستفحل على عيوني البچي
يا حبيبي ...
شلون لو شحّت مكاتيبك؟
الغيم ميّودي حچي ... 🌿
______________________________________
"شوف ابو علي خلينا نكون واضحين بهذي القضية بالذات احنه محتاجين مساعدته لجبل! وانت تعرف كلش زين ليش!" تكلم ادهم وهو من ساعه تقريباً موجود عند العقيد ابو علي الي مستلم هذي القضية ويحاول يقنع بي ان يدخل جبل بالتحقيقات وياهم مره اخرى
"اني كان بودي ان اخليه هو يستلمها اصلاً بس انت تعرف ان جبل مشكوك بأمره ومااقدر ادخل واحد ممكن يكون هو القاتل! وين المصداقية بالموضوع!" نطق ابوعلي بواقعية
"يا مصداقية متكلي! هي بقت مصداقية اشو كلها شي داخل بشي بقت على هذا المسكين!" نطق ادهم وهو فعلاً كره ان يتوسل بس ماكو اي طريقة غير هذي خصوصاً ان جبل فعلاً ديحقق بمفرده واذا اكتشفت الشرطه هلشي ممكن ينفصل من الوظيفة!! لذا كان لازم عليه ان يساعده ويرجعه للمجموعه حتى يكون تحقيقة بصوره علنيه وتحت ظوابط مدروسه بالنهاية هو صديقة وميريدله الأذى
رجع ادهم تكلم مره اخرى من شاف الأخر ساكت " ومن التحقيقات الأولية قدرنه نعرف ان جبل ماله اي علاقة بالموضوع وانت تعرف هلشي! خلي يرجع واني اوعدك ان ميتصرف اي تصرف من نفسه !"
تنهد ابوعلي وهو فعلاً مقهور على الأخر بس الي اعلى منه والناس الكبار همه الي طلبوا ابعاده عن القضية وهو ميقدر يفصح عن هلشي! "زين خلي يرجع بس كله تحت نظري مااريده حتى يشرب ماء اذا ميستشيرني!!"
بفرح ادهم شكر الي امامه وقدرله هلشي كلش، "متقصر ابو علي نردهه الك بالأفراح"
باوع عليه الأخر وهو يقلب عيونه "انتو بس استچنوا ولتسوولنه سالفه وهاهيه رحم الله والديكم!"
ضحك الأخر واخرج فونه وارسل رساله ل صديقة يبشره بالخبر، بعدها تكلم بجديه "يعني نقدر نبلش من هسه مو؟"
اومئ الأخر وتكلم "اي قول له خلي يجي وشاركه كل التحديثات على القضية ولو اقص ايدي منا حتى تروح وياهه رقبتي اذا مو قايله على الأحداثيات انته!" اشر على بداية كتفه بأيده الثانيه وكأنه يقطعها
ضحك الأخر بقوه وهو فعلاً قايل ل جبل على كلشي لذا ارسل له رساله اخرى ان يجي لمكتب ابو علي
وماهي الا دقائق واجه الأخر والقى السلام بوجه بارد
"اليوم مغيّم" همس ابوعلي ل ادهم الي ضحك بصوت عالي اثار انتباه جبل الي نطق بخفه "ضحكنه وياك!"
"لا هيج تذكرت سالفه ء ءيلا ابوعلي خلينا نبلش " تكلم ادهم بتوتر ، هو دائما هيج ميقدر ان يلزم ضحكته
تكلموا حول اهم الأحداثيات الي حصلت خلال الكم يوم والي اكتشفوها همه وطبعاً جبل كان عنده علم ويشارك بالحديث بشكل طبيعي ويعطي رأيه تاره ويسكت تاره اخرى كان كل همه ان يبعد الشكوك عن جوان
