🍃 والنفسُ تبكي على نفسِهِا من نفسِها🍃
____________________________________
"اخذ المسكنات والمهدئات هاي مؤقته بس اذا تريد تاخذ نصيحتي لازم تشوفله طبيب نفسي" قال الطبيب وهو يكلم والد جبل و زوجته الي كانت واكفه جنبه
"شدتكول! نصير علج بحلوگ العالم هيج!" نطقت زوجة جمال
"مدام الولد صغير كلش! جسمه مراح يتحمل علاج هواي واذا تعرض لنوبه عصبيه مره ثانيه مااضمن الكم الي ممكن يصير بي"
"شكرا لوجودك دكتور تكدر تتفضل " نطق والد جبل بهدوء
بعد ماطلع الطبيب، تقدمت زوجته منه "هسه شنسوي؟" نطقت تمثل الأهتمام
"منسوي شي عينج تبقى عليه " قال كلامه وهو يقوم حتى يطلع
"لتخاف حبيبي بعيوني جبل" قالت مودعه زوجهه وراجعه تجلس بالصاله
حطت رجل على رجل وهي تشرب من قهوتهه برواق "ياريت لو يتخبل واخلص منه" همست بهدوء...
قامت والدة سنان من مكانها "مااكدر اضل كاعده هنا بعد لازم اروح لازم"
"وين ترحين" قالت انجي الي قامت وياهه
"اروح لبيت جبل مااكدر اضل كاعده اكثر ومااعرف ابني وينه!' نطقت والدة سنان بقلق
"اجي وياج انتظري دقيقة" نطقت انجي وهي تتوجه لغرفة سنان
دخلت لغرفته وضلت تدور بين اغراضه لحد مالكت دفتر على الميز، فتحته كان دفتر مذكرات
اخذته وياهه وراحت وي والدة سنان لبيت جبل
بعد فتره وصلن للبيت، "مااعتقد يخلونه ندخل" نطقت انجي وهي تباوع على البيت وشلون انه جبير كلش
" جبل ... جبل " ضلت والدة سنان تصيح بصوت عالي من حرگة گلبها
وجبل الي جانت غرفته تطل على الشارع سمعهه بوضوع وهي تنادي بأسمه
"اطلع اني ام سنان فدوه بس كلي ابني وينه!" صارت تبجي وهي تصيح بأسمه
انكمش جبل على روحه وحضن رجليه لصدره بقوه "اسف ... اسف ... اسف اسف اسف" ضل يهمس بهاي الكلمات وهو يحط ايديه على اذنه حتى ليسمع صوت والدة سنان
اما بالطابق الأرضي عند زوجة والده الي سمعت الأصوات "ناني " نادت على موظفة الخدمه الي عندها
"نعم مدام"
"روحي كولي للبهايم الي برا يشوفون شغلهم وي هاي الي دتصيح مو كافينه فضايح!" صاحت بيها والأخرى نفذت طلبهه على طول
الحراس الي جانوا واكفين على الباب تكلموا وي والدة سنان بهدوء بالبدايه بس الثانيه كان يعلى صوتهه كل ما تقربوا منها وبهاي الفوضى الي صارت كدرت انجي تدخل للبيت
