في صباح يوم الجمعه وكل العايله متجهه لبيـت الجـد عقـاب
وعند هنـاي الي تجهـز التشيز كيك الي تحب تسويه كل جـمعه
هنـاي : وسون ابلشتيني بالمطبخ اطلعي
وسن بصوت باكي وهي توريها الرضاعه فاضيه
شالتها هنـاي وحطتها بالطاوله وبدت تسوي لها رضاعتها واخذتها للصاله
هنـاي : جده امسكي وسن عبال ما اخلص التشيـز كيـك
الجده : هاتيها
مدت وسن للجده واخذتها الجده لحضنها وهي تشرب رضاعتها
هنـاي : انا بروح اكمل ماباقي شي واجي
الجده : تمام عجلي وبخري المجلس لان ماباقي شي ويجون
هنـاي : ابشري
الجده : وصحي فيصل تراه للحين نايم
هنـاي : تم
تقدمت هنـاي للمطبخ تكمل الحـلا وبعد ماخلصت اخذت مبخره وبخور وبدت تمشي حول البيت وتبخره وحطت المبخره بالصاله وطلعت تصحي فيصـل
هنـاي : فيصل ... فيصل
فيصل : هااا
هنـاي : قوم اعمامي وزوجاتهم بيجون
فيصل : طيب ادري خلاص اطلعي وسكري الباب
هنـاي : فيصل مو حاله كل شوي ادخل اصحيك خلاص اصحى
فيصل: هنـاي تدرين اني مواصل خلاص خليني اكمل نومي
هنـاي : انت ماينفع معك الا جدي
فيصل: اي زين واطلعي وسكري الباب
طلعت هنـاي من غرفة فيصـل ونزلـت الصاله
هنـاي : جده وين جدي ؟
الجـده : بالمجلس يقرأ سورة الكهف وش بغيتي
هنـاي : يصحي فيصل لاني تعبت اصحيه ولا قام
الجـده : خلاص انا ووسن بنروح نصحيه
هنـاي : تمام وانا بروح اتروش والبس
هزت راسها الجده وتقدمت هي و وسـن يروحـون يصحـون فيصل ، دخلت الجـده غرفة فيصل وطفت المكيف وشالت البطانيه عنه
الجـده : فيصل وليدي قوم الى متى بتقعد نايم ، اعمامك وزوجات اعمامك جايين خلصني قوم
صحى فيصل بعد عناء واخذ وسن يبوسها : لو انكم جايبين لي وسـن من اول كان قمت مو تجيبون لي هنـاي الدفشه
الجـده : حدك عاد عن بنيتي السنعه وقوم غسل وجهك وثوبك بالمجلس مكوي
فيصل : ابشري شيلي النتفه ذي وبدخل اتروش بسرعه
الجـده : زين عجل عشان مايعصب جـدك
هز فيصل راسه وتقدم يدخل الحمام يتروش ( الله يكرمكم )
وبعد مده طلع ولبس ونزل يلبس ثوبه وشاف جده
فيصل: تاخرت ياجدي ؟
الجـد : لا باقي كم دقيقه وياذن امشي نلحق
فيصل: يلا تمام
طلع فيصل والجـد لصلاة الجمعه
وعند هنـاي بعد ماتروشت وطلعت لبست مخـور وبدت تحط كريم وميكب خفيف وسوت شعرها ستريت وقامت تجلس ع السرير وتشوف القروب
فتحت جوالها على رسايل قروب بنات عمها
وتيـن : بنات سويت ترافل مانجو لذيذ
عنـود : منزماااان مشتهيته منك
وتيـن : سويته لعيونك بيبي
عنـود : احبك بيبي
غنـد : وعوه
وتيـن : اخرسي انتِ
هنـاي : منجد وعوه احد يتغزل من صباح ربي ؟
عنـود : كيفنا شعليكم تغارون ؟
ريـوف : عنـود يا الضفعه امي من اول تناديك ، وهنووي اشتقت لك يروحي
عنـود : اوريك يا ريوف
هنـاي : يابعد دنياااي اكثر لا تتاخرين تعالي بدري في شي ضروري اقوله لك
غنـد : وشهو علميني
هنـاي : تم بس تعالي انتِ وريوف بسرعه
عنـود : خير وانا
غنـد : انتِ طسي عند وتيـن
عنـود : الا الحب مالي لا تغلطون عليها
تـوق : شسالفه شصاير
هنـاي : مو صاير شي وشفيكم تاخرتوا خلصوني تعالوا جوعانه
تـوق : والله حتى انا احسني صايمه
عنـود : احنا بنمشي الحين
وتيـن : حتى احنا بنمشي الحين
هنـاي : يلا احتريكم
قفلت هنـاي من جوالها ونزلت تحـت عنـد جـدتها شافتها تقرأ قران وتقدمت تحب راسها
خلصت الجـده من القران وقفلته : وش هالزين وش هالحلا يابخت الي بياخذ حفيدتي الحلوه
هنـاي : ويابختي دامك جدتي وامي وكل شي
الجـده : جعلني ما افقدك ياحلوتي
هنـاي : ولا انا
شمت هناي ريحه مو حلوه : جده لا تقولين وسـن سوتها
ضحكت الجـده : اي والله سوتها هاتي اغير لها
هنـاي : لالا انا باخذها ومنها البسها زين شوفي وصخت لبسها من الكورنفلكس
اخذت هنـاي وسـن وطلعت فوق غرفتها وطلعت لها مخور نفس الي لابسه هنـاي ولبستها : باقي بس امشط شعرك تعالي
وسن وهي تبكي وماتبي تسوي شعرها ، فتحت لها هنـاي جوالها واعطتها عشان تسكت وتبدا تسوي شعرها
دق الباب وتقدمت الجـده تفتح
الجـده : مين
عنـود : احنا يا جده
فتحت الجـده الباب وابتسمت اول ماشافت حفيداتها
الجـده : ياهلا بحفيداتي ياهلا حياكم ادخلوا
دخلوا وبدو يسلمون على الجـده
ريـوف : جـده وين هنـاي ؟
الجـده : فـوق تغـير لوسـن
عنـود : اي جاهزين للحش ترا اليوم جمعه كفروا ذنوبكم
ريـوف : سدي حلقك انتِ
سجـى : بالبيت وهنا مشاكل سدوا حلقكم شوي
تقدمت ريـوف تطلع فوق ودقت الباب
هنـاي : تعالي
ريـوف : هااااي
تقدمت هنـاي تحضن ريوف : ريوفيييي اشتقت لك ياكلبه
ريوف : اكثر بيبي وحشتيني ووحشتني النتفه ذي
هنـاي : احد من اعمامي وصل معكم ولا بس انتم ؟
ريـوف : لا بس احنا يلا انزلي
هنـاي : تمام لحظه اعطر وسـن
عطرتها وطلعت هنـاي هي ووسـن وريـوف ونزلـوا تحت ابتمست هنـاي اول ماشافت زوجة عمها وتقدمت تسلم عليها
هنـاي : كيفك ياعمه اشتقت لك اكثر من البنات
ام عنود : ياقلبي انتِ والله كل مالك تحلوين
ريـوف بصدمه : يا الخاينه اشتقتي لامي اكثر مني ؟
هنـاي وهي جالسه جنب ام عنود : زوجة عمي شلون ما اشتاق لها !
ام عنود : وشفيها وسـن زعلانه !
هنـاي وهي حاضنه وسـن : اخذت الجوال منها
ام عنود : مالك داعي تزعلينها هاتيها
هنـاي : هاك والله تعبتني خذيها حلالك
غارت توليب من وسـن لانها قاعده بحضن امها
توليب : وخري امي ذي انقلعي عند امك هنـاي
حزت بخاطرها هنـاي الكلمه بس مشتها لان توليب طفله ومو مستوعبه الكلام الي تقوله
ام عنود : توليب عيب هالكلام !!
توليب ببكي : ليه تقعد بحضنك !
ام عنـود : مو قلنا وسـن زي اختـك !
هنـاي : افا ياتوليب تـدرين ان وسـن جايبه لك لعـبه لانها تحبك !
توليب بفرح : صدق ؟ وينها !!
هنـاي : كنسلت مابعطيك لانك تكرهين وسـن بعطيها ترف
نزلت توليب راسها بحزن : انا اسفه بصير احب وسـن واخليها تقعد بحضن ماما
اخذت هنـاي توليب : ايوا كذا حلوين امشي معي اعطيك اللعبه
ضحكوا كلهم وصعدت هنـاي وتوليب ودق الباب
ريـوف : انا بفتح
تقدمت ريـوف تطلع تفتح الباب : مين ؟
غنـد : انا غنـد خلصيني افتح الكيس ثقيل
ريـوف : قولي مياو وافتح لك
غنـد بعصبيه : ريـوف افتحي قبل لا ارتكب فيك جرىٍمه !
فتحت ريـوف الباب : شفيك معصبه حبي
دخلت غنـد وميلاف وميهاف
ميلاف بضحك : امي صحتها تقوم تجيب حلا من محل بعيد
رفعت ريـوف حواجبها: عشان كذااا زين ادخلوا
دخلوا البنات وام سعود للصاله الي مجتمعين فيها
رحبت فيهم الجده بفرح : ياهلا بحفيداتي وزوجة وليدي
قبلة ام سعـود راس الجـده : ياهلا فيك ياعمتي سامحينا طولنا كله من البنات
الجـده : معذوره يبنيتي اهم شي جيتو
تقدمت غنـد تحضن جدتها : والله ياجده وحشتينا قد البحر
ميـلاف : وخري بس لا تخلصين علينا حنان جـدتي
غنـد : ميـلاف انا من الصباح ساكته ومتحمله ازعـاجك لا تخليني اكفر فيك واليوم جمـعه
ضحكت الجده على هواشهم ونطقت : ياحبيبات قلبي حناني مايخلص ولا عمره بيخلص كله لكم اذا ماعطيتكم انتم اعطيه لمن
حضنت ميـلاف جدتها : ياجعلني ما انحرم منك
تقدمت ميـهاف تحضن جدتها وتبعدهم : خلصتوا ؟ دوري وخروا
غنـد : يليل النشبه ، الا جده وين هنـاي ما اشوفها !
الجـده : فوق هي وتوليب
غنـد : انا بروح اتهاوش معها
مشت معها ريـوف : الا الحب حقي يويلك تتهاوشين معها
شافوا الباب مفتوح ودقو
شافتهم هنـاي ابتسمت وتقدمت تحضنهم: غنددد ريووووف وحشتوني مره
غنـد : انا جايه اتهاوش معك بس على حضنك ذا كنسلت
هنـاي بضحك : احسن
ريـوف : اشتقت لك يا الغلا
هنـاي : اكثر بيب امشو ننزل ... توليب تعالي بننزل
نزلوا البنات وتقدمت هنـاي تسلم على زوجة عمها : هلا والله بعمتي موضي وحشتينا
ام سعود : ياهلا فيك يابنيتي انتِ الي وحشتينا كيفك وكيف الدراسه معك
هنـاي : الحمدلله كل شي تمام
صارا يسولفون ويضحكون وبعد كم دقيقه دق الباب
هنـاي : انا بفتح
طلعت هنـاي تفتح الباب : مين ؟
وتيـن : انا وتيـن افتحي
فتحت هنـاي الباب : وتينـي وحشتيني يا حيوانه
وتيـن : اكثر يروحي
تقدت هنـاي تسلم على ام نواف : كيفك ياعمه
ام نواف : بخير ياقلبي انتِ كيفك
هنـاي : بخير ادخلوا الكل بالصاله
وتيـن : كلهم وصلوا ؟
هنـاي : الا بس باقي عمي ابو سيّاف
تقدموا يدخلون الصاله الي مجتمعين الكل فيها وبدو يسلمون على بعض
ريـوف : هنـاي
هنـاي : هقلبي
اشرت ريـوف تجي هنـاي تجلس جنبها : تعالي
تقدمت هنـاي تجلس جنبها : سمي
ريـوف : وش الشي الي ضروري تقولينه لي
همست لها هنـاي : بعدين اذا خلصنا اكل نطلع فوق غرفتي واوريك
هزت ريـوف بالموافقه
غنـد : على وش تتهامسون ؟
هنـاي : اسرار عائليه
ريـوف : صحيح وليتك تدرين وش قلنا شي يخصك
غنـد: حشو فيني احتاج حسنات
وتيـن : هنوي تدرين توني استوعب انك مطقمه انتِ و وسون !
ضحكت هنـاي : بدري حبي ؟
رفعت حواجبها عنـود : اح حتى انا وربي تو انتبه
غنـد : شفيكم وين عيونكم ما تنتبهون
ميهـاف : متى استوعبتي انتِ انهم مطقمين ؟
غنـد : الحين
ضحكوا البنات على غنـد
هنـاي : مب صاحيات المهم انا جعت شفيه عمي ناصر تاخر
وتيـن : دقيت على توق تقول بالطريق
هنـاي : كويس والرجال الحين بيجون خل نحط السفره والمويا والببسي والمناديل والصابون بالمغاسل
غنـد : تم نحط سفرتين صح ؟
هنـاي : اي وحده بمجلس الرجال ووحده بمجلس الحريم
انا بروح المطبخ اجيب الببسي والمويا وحده تجي معي
ريـوف : انا بجي
عنـود : زين وانا ووتين بنحط السفره وينها ؟
هنـاي : يلا امشو
تقدموا البنات للمطبخ يساعدون بعض
هنـاي : هاك السفره حطوها كبيره لا تنسون
عنـود : تم
طلعت عنـود ووتيـن للمجلس يحطون السفره
عنـود : وتيـن افتحي الستاير
وتيـن : تمام وافتح باب المجلس ؟
عنـود : اذا خلصنا عشان مايدخلون علينا واحنا موجودين
هزت وتيـن بالموافقه
وعند هنـاي وهي تجمع الببسي والمويا
ريـوف بضيق : هنوي
هنـاي : سمي
حاولت ريـوف تمسك دموعها وتحاول ماتبكي بس ماقدرت وانهارت
انصدمت هنـاي من بكاء ريـوف المفاجئ وحست ان فيه شي : بسم الله عليك شفيك يقلبي !
ريـوف : حلمت فيه حلم مو حلو ويخوف
هنـاي : حلمتي بفهد ؟
ريـوف : ايوا هنوي الحلم يخوف اخاف يتحقق احبه مابي افقده مقدر ما اتخيل من يوم حلمت فيه لين الحين وانا ابكي ماقدرت انسى الحلم
هنـاي : تعوذي من ابليس وهذا مجرد حلم يقلبي لا تخافين اقري اذكارك ولا تقولين الحلم ابداً
ريـوف : ابي افسره
هنـاي وهي تمسح دموع ريـوف بيدها : ولا تفسرينه خلاص هو حلم يروحي لا تبكين انا معك
حضنت ريـوف هنـاي بقوه : هنوي احبك احبك من يوم الثلاثاء احتري اجي اقولك
هنوي بضحك : يروحي ليتك دقيتي علي كان جيتك ركض
ريـوف : كان فترة اختبارات
هنـاي : اها ، قومي يلا بنكمل نجهز شكلهم وصلوا
دخلت عنـود المطبخ هي و وتيـن
عنـود : هنـاي مافي صابون بالمغسله
هنـاي : موجود بالدرج الي فوق المغسله خذي
تقدمت عنـود تاخذ الصابون وطلعت عشان تحطهم بالمغسله
وتيـن وهي تاكل كرز وقاعده ع الجوال : بنات نبي ناخذ شاليه
هنـاي بدهشه : اي والله نبي !!!
دخلت غنـد وسجى على اصواتهم
غنـد : وش تبون
ريـوف : ناخذ شاليه
سجـى : الله صدق نبي يبنات
هنـاي : اذا جاء جدي واعمامي نقولهم
جت عنـود وهي تلهث : بنات جو اعمامي وعيالهم وجيت بطلع وطحت
غنـد وهي تضرب فخذها من الضحك : احسن تستاهلين
عنـود : سكتوها لا اتغدى فيها
هنـاي : عسى بس محد شافك
عنـود : لا بس سمعت اصواتهم تكفون رجلي تعورني اخ من اليوم لشهر ماعاد بساعدكم رجلي تعورني
غنـد : تساعدينا طرق عن خشمك يا الدلوعه
عنـود : يارب عطني صبر ايوب
وتيـن : بنات امي تنادينا امشو يلا
هنـاي : زين اطلعوا كلكم عشان فيصل بيجي ياخذ الببسي والمويا
طلعوا كل البنات لمجلس الحريم واخذت هنـاي جوالها تدق على فيصل عشان يجي ياخذ الببسي والمويا
دقت هنـاي ووصلها صوته على طول : هلا هنوي
هنـاي : فيصل تعال خذ الببسي والمويا
فيصل زين انا برا الحين دقايق بس واجيك
هنـاي : تمام لا تتاخر
