عنــد فهـد مشى بسيارته لمكـان بعيد نوعاً ما وفتح الشنطه وجلس فيها وفتح دخان واخذ له سجاره وولعها وجلس يهوجس مابين حزنه لان ماحضر ملكة اخوه الكبير ومابين قهره لما شاف المندوب قريب من ريـوف ماكان يعرف ليه انقهر وقتها بالرغم منها انها ريوف يعني بنت عمه لا اكثر بس مع كذا كان يحس حلال الي سواه بالمندوب والمفروض اكثر من كذا
، قاطعه تفكيره صوت جواله الي يرن دخل يده لجيبه يطلعه وشاف المتصل بـدر
ناظر فهد ثواني للاسم ورد عليه : هلا بدر
بـدر : بدون مقدمات ارسل لي اللوكيشن
فهد : ماراح ارسل بجلس لحالي
بدر بحده : فهد ارسله خلصني مابيك تقعد لحالك
تنهد فهد يفتح سبيكر ويدخل الواتس يرسل له
بـدر : هذا الي كان الليل مستانس لملكة اخوه واخر شي مايحضر ملكته !
فهد : بـدر لا تستهبل معي انت الثاني يقولي غلط الي تسويه وش اسوي يعني اصفق للمندوب يعني واقوله برافوا على الي سويته ؟
بـدر : ما اقصد كذا صحيح المندوب غلطان وانت بعد غلطت عليه كيف تقوله كذا شدخل زوجته الحين ؟
فهد بحده : عشان يحس بالي حسيته يقول الكلام كذا ويحسب الي سواه المندوب شي عادي خليه لين يعرف اني انا الصح
بـدر : اثنينكم غلطانين على بعض وفوق كذا هذا اخوك الكبير سندك بعد ابوك
فهد : سندي المفروض يكون فاهم احسن مني ، محامي ع الفاضي
بـدر : انا بالطريق جايك نكمل كلام اذا جيت
فهد : تمام
وقفل منه وحط الجوال بحضنه واخذ يفتح بكت الدخان ويطلع سيجاره ويولعها وتنهد يدخن وهو منكسر قلبه لانه ماحضر ملكة اخوه كان ينتظر هاللحظه لاخوه سيّاف بس ماتوقع بيصير الي صار ويعتبر سيّاف الغلطان ماله حق يصارخ عليه بهالشكل
- عند هنـاي وسيّاف -
خلصوا اكل وحرك سيّاف متوجه هو وهنـاي للبيت وبالطريق كان صمت وقاطع الصمت هنـاي الي تكلمت : سيّاف
لف سيّاف لها بابتسامه : سمي ابوي
هنـاي : تهاوشت مع فهد صح ؟
تنهد سيّاف يفتح ياقة ثوبه ويناظر بالطريق : قفلي الموضوع
هنـاي : سيّاف تكلم لا نخبي شي عن بعضنا ليه تهاوشت معه !
وقف سيّاف اشـاره ولف لها : قال كلام وتهاوشت معه وطلع ولا ندري وينه
توسعت عيونها هنـاي : ماحضر ملكتنا !
سيّاف : لا ولا ابيه يحضر
هنـاي : طيب مهما كان ذا اخوك من دمك ولحمك مايصير هالكلام زين ؟ ودق تطمن وينه
سيّاف : دق ماني داق عليه لين يجي ويعتذر وماني مطمن عليه بقلعته
فتحت الاشـاره وحرك سيّاف ونطقت هنـاي : سيّاف صاحي ؟ ذا اخوك كيف تزعلون من بعض !
سيّاف : هنـاي قفلي الموضوع
هنـاي : ماراح اقفل الموضوع ودق تطمن عليه او دق على بدر اكيد يعرف وينه
سكت سيّاف لثواني وتنهد يطلع جواله من جيبه ويدق على بـدر وسرعان ماوصله صوته ونطق : هلا سيّاف
سيّاف : هلا بـدر وينك؟
بـدر : تو طلعت من البيت بروح عند فهد
سيّاف : وفهد وينه؟
بـدر : مدري قاعد امشي على اللوكيشن
سيّاف : زين لا ترجع الا وهو معك لا تخليه لحاله
بـدر : اكيد رجله برجلي بنرجع سوا ماني تاركه لحاله
سيّاف : ماتقصر يبـدر
بـدر : اخوي ذا كيف اتركه لحاله وبعدين حتى لو مارحت له بيرجع من نفسه وين بيروح يعني
سيّـاف : زين انتبه له بالله
نطق بـدر بتمام وقفلـوا من بعض ووصل سيّـاف البيت ونزلـوا الاثنين ومسك سيّـاف بيد هنـاي يشبكها بيده ويدخـلون البيـت
دخلـوا وشافوا وسـن وترف وتوليب يلعبـون بالحوش ورفعت وسـن انظارها وشافت هنـاي وتركت كل شي بيـدها وركضت تحضن هنـاي
نزلت هنـاي ع الارض وفتحت يدينها وحضنت وسـن وقبّلتها بخـدها
بعدت وسـن واشرت ع الالعـاب
هنـاي : تبين العب معك !
هزت وسن راسها بفرح ونـزل سيّاف للارض ومسك وسـن : وانا العب !
هزت وسـن راسها ومسكها سيّاف وقام يتقدم عند العـابها وجلس ونطقت ترف : عمو سيّاف شوف لعبتي
ابتسم سيّاف : انتِ احلى من اللعبه
قربت توليب لسيّاف : وانا !!!
ضحك سيّاف : كل العابكم حلوه
مـدت وسـن مكعب حق لعبـة التركيب واخـذ سيّـاف يركب اللعبة معها
وهي بحضنه وبعد ماخلصوا صرخت وسـن بفرح وضمت سيّـاف
، ابتسمت هنـاي من فرحة وسـن وتكتفت تناظرهم وناظرت فيها وسـن وتقدمت تمسكها من يدها وتجلسها جنب سيّاف وتمد لها مكعب
اخذت هنـاي المكعب وصارت تسوي مع سيّاف ، ونطقت : الظاهر بنجلس نلعب لين ربي يفرجها
ضحك سيّاف وهو يركب المكعبات الباقيه : عـادي دامني العب مع وسون
،سوت هنـاي مع سيّـاف بيت بالمكعبات وشهقت وسن بفرح وقامت بحركه سريعه تحضن سيّاف
هنـاي : بنتي ذي اخذتها صارت بس تحضنك
ضحك سيّاف وقبّل وسن بخدها : عجبتني وصارت بنتي
تخصرت هنـاي : على كيفك هو
ضحك سيّاف : هي الي حبتني بدون اي مجهود
هنـاي : وسن مشكله تحب الرايح والجاي ترتاح للكل
ضحك سيّاف : تعجبني ماتعبتني
واخذها لحضنه وقامت هنـاي يدخلون المجلس وسلموا
ام سيّاف : وين كنتو
هنـاي : بالبحر وركبنا بارشوت
ضحك فيصل: شكلك ماتدري ياسيّـاف ان هنو عندها فوبيا من البحر
لف سيّاف يناظرها لثواني ورجع انظاره لفيصل : والحين ماعاد تخاف من البحر
تـوق : كيف تغلبتي على خوفك من البحر واحنا لنا سنين نحاول نخليك تتغلبين عليه
ضحكت هنـاي : ماتغلبت للحين اخاف شوي
عنـود : مع الوقت بتتعودين عليه
ضحك سعود: وتغرقين بالمويا
ضحكت هنـاي بسخريه : سخيف
ابو سيّاف : ماتخاف من شي بنيتي كفو
ابتسمت هنـاي تعطيه بوسه ع الهوى
عقدت الجـده حواجبها : وش هذي الي قلتوها ووش فيها بنتيني من البحر
ضحكوا الكـل ونطقت ميـلاف : يعني ياجده هنـوي تخاف من البحر
هزت الجـده راسها بالفهم
ناظرها سيّـاف لثواني وهمس : عقبال مانسبح واغرقك !
توسعت عيون هنـاي : وصخ عيب ومسوي تخوفني ؟ طيب ياشاطر تراني شاطره بالسباحه
ضحك سيّاف من تذكر انها تعرف تسبح ونطق : اجل ضروري تعلميني
عقدت هنـاي حواجبها : رجال وماتعرف تسبح!
سيّاف: اعرف بس علميني اكثر
ابتسمت هنـاي : بس تم بغرقك واكرهك بالسباحه
ضحك سيّاف : ماتقدري
هنـاي : لا تخليها تحدي !
سيّـاف : وليه مانخليها ؟
هنـاي : تم ياولد ناصر اوريك ان ماغرقتك
ضحك سيّـاف : منتي بهينه وتهددين بعد
ناظرت هنـاي بغرور : اكيد حبي..
ماكملت كلمتها الا واستوعبتها وعضت شفتها وهي تضحك لان طلعت الكلمه بالغلط ما استوعبتها الا لما نطقتها
ضحك سيّـاف وناظر بوسـن الي بحضنه وتلعب بجواله وهمس لها : عيدي الي قلتيه
هنـاي : ماقلت شي
وقامت ومدت يدينها تاخذ وسـن : عطيني ياها بروح انام
مد لها وسـن واخذ جواله
واخذتها هنـاي لحضنها ومشت بخطواتها بتطلع من المجلس واستوقفتها الجـده : على وين هنوي
هنـوي : بروح انام يجده
الجـده: زين تصبحين على خير
هنـاي : انتِ الخير
طلعت هنـاي لغرفتها
