عند العايله وصلـت البيت ووقف سيّاف سيارته ونزل ونزلت هنـاي وكانت وسـن بحضنها نايمه وماقدرت هنـاي تمشي من الكعب العالي
ناظرها سيّاف لثواني وتقدم يمد يده ياخذ وسـن : عطيني ماراح تقدرين تطلعين الغرفه وانتِ لابسه كعب
لفت هنـاي على البنات الي دخلوا ورجعت انظارها لسيّاف ونطق لها : كلهم لابسين كعب ولا وحده بتقدر تشيلها
مدت له وسـن ودخل ودخلت وراه وصعد للغرفه وفتحت له هنـاي وتقدم يدخل وحطها بالسرير
دخلت هنـاي وشغلت المكيف وكان معها الريموت حق المكيف وتناظر بالمكيف الي تعدل درجته
ناظر سيّاف بشماغه الي بالطاوله وابتسم وتقدم يشمه ويتاكد انه حقه
ناظرت فيه هنـاي وعضت شفتها ونست تحط الشماغ بالدرج ونطقت : ترا كنت بعطيك ياه بس نسيت
ناظر فيها سيّاف وابتسم : خليه عندك كل ما اشتقتي لي احضنيه
قربت هنـاي وجلست على طرف السرير ونطقت بتقزز : يع اخر عمري اشتاق لك
ضحك سيّاف : اي كابري
هنـاي : تخسي وتعقب اشتاق لك والله لو انك اقرب شخص لي
قرب سيّاف وصغر عيونه : وبكون اقرب شخص لك وبتقولينها بالحرف الواحد قريب
توترت هنـاي من قربه وقامت وتقدمت للتسريحه تطلع قطن تمسح فيه المكياج :وانا اقولك تخسي اقولها
سيّاف : قدها يابنت سلطان ؟
لفت له هنـاي وتكتفت : قدها وانا بنت سلطان
ابتسم سيّاف : وانا ولد ناصر وبتقولينها وبنشوف
هنـاي : تبيها تحدي يعني ؟
سيّاف : الي تشوفينه !
صغرت عيونها هنـاي وابتسمت بخفه : زين تجهز للخساره
ضحك سيّاف وتقدم يقبّل خد وسـن ويتقدم للباب : نشوف من الي بيخسر
وطلع وقفل الباب وعضت هنـاي شفتها وتوترت اكثر من كلامه ولفت للمرايا تمسح مكياجها : حيوان صدق ويهدد بعد نشوف ياولد ناصر من الي بيخسر
خلصت من مسح مكياجها وتقدمت تفتح الدولاب وتطلع لها بجامه خفيفه ودخلت الحمام ( يُكرم القارئ ) تتروش وبعدت ماخلصت طلعت ونشفت شعرها وحطت كريماتها وتقدمت للسرير تعلـن نومهـا
- بالصبـاح -
الكـل صحى ويجهزون البيت وينظفونه يستقبلون فيه المعاريس
، دق سيّاف على فيصل وسرعان ماوصله صوته : هلا سيّاف
سيّاف : هلا والله بالمعاريس متى بتجون ؟
فيصل : ساعه واحنا عنـدكم انتظرونا
سيّاف : زين لا تتاخرون جدتي وكلنا نحتريكم
فيصل : اي اي زين
قفل سيّاف من فيصل وتقدم يدخل المطبخ وكـانوا فيه امه وام نـواف وام عنـود وهنـاي ووسـن
سيّاف : يمه فيصل يقول ساعه وهم عندنا
لفت له ام سيّاف : زين ان شاء الله روح جيب صواني حلا
سيّاف : طيب عطيني صور للحلا عشان اجيب لك مقدر اختار من كيفي وبعدين مايعجبكم
ام سيّاف : هنـوي حبيبتي ارسلي له انا والله معرف وش الحلا الحلو وانتِ ذويقه اختـاري وارسلي له
لفت له هنـاي الي كانت تأكل وسـن سيريلاك ونطقت : ابشري يعمه
ابتسم سيّاف وتقدم يجلس ويقبّل وسـن : لا تختارين كثير وتفلسيني
ضحكت هنـاي باستهزاء : وعناد عليك بختار اغلى شي ويويلك من عمتي لو ماجبت
سيّاف بحده : هنـاي !
ضحكت هنـاي : نعم !
سيّاف : شرايك اختار معك ؟
ضحكت هنـاي : طير بس بختار انا عمتي قالت لي اختار انا مب انت
سيّاف : عادي كلنا واحد انا بعد ذوقي بالحلا حلو اسالي امي
لفت هنـاي لام سيّاف : صحيح يعمه ؟
ام سيّاف : لا مب صحيح مره جاب لنا حلا منتهي صلاحيته ماقصر وليدي
ضحكت هنـاي بقوه وكانت ضحكتها طالعه من كل قلبها وعيونها تلمع من دموع الضحك وناظر سيّاف بابتسامتها ودموع الضحك ونطق لامه : يمه ماله داعي الفضايح
هنـاي : واضح عمتي ماسكه عليك اشياء كثيره
ام سيّاف : اي والله لا سلمت من سيّاف ولا من فهد
ام نـواف : ياحلوه مشعل الوحيد الهادي
ام عنـود : اي والله ومايقصر يذاكر لسجى بعد
ام سيّاف : رافع راسنا الله يحفظه
هنـاي : ارسلت لك الحلا جيبهم كلهم
فتح سيّاف جواله وشهق بخفه : الله ومن هالمحل !
ضحكت هنـاي : اي لذيذ الحلى حقهم جيبهم ولا يويلك من عمتي بتنجلد
ضحكوا الامهات ونطقت ام سيّاف : زي ماقالت هنـوي يويلك لو ماجيت
ضحك سيّاف وتقدم يقبّل وسـن ويطلع وفتح جواله يرجع يشوف المحل ويتوجه له
