دخلت تـوق الغرفه وقلبها يدق بقوه ، مسكت مكان قلبها وهي مو مستوعبه الي صار قبل شوي ، دخلت تتوضى وتصلي استخاره وبعد ماخلصت حست براحه ونطقت : يليل احس براحه بس لما اسمع سالفة الزواج احس بخوف بصلي مره ثانيه واخر مره ، صلت وخلصت وارتاحت وقامت من السجاده وفصخت روب الصلاة ونامت وهي طول الوقت تهوجس فيه وكذلك عند فيصل بغرفته فرش سجادته يصلي الوتر وبعد ماخلص دعى
" اللهم اني احببت عبداً من عبادك
حتى عجز لساني عن وصف حبها فأنت
من رزقتني حبها ف يارب اجعلها من نصيبي
واحفظها لي بقدر ما احببتها "
خلص صلاه ورمى نفسه على السرير ونام بعد يوم طويل
بالصباح صحت وسـن وهي تبكي وقامت تـوق وشافت وسـن ماسكه رضاعتها الفاضيه وتبكي
اخذت الرضاعه واخذت وسـن للمطبخ تسـوي لهـا حليب
دخل فيصـل وشاف تـوق ووسـن بالمطبخ تقدم يقبل خد وسـن ونطق : صباح الخير
لفت تـوق وشافت فيصل وبدا يدق قلبها بسرعه من تذكرت وش سوا بالليل
لفت على المغسل تغسل الرضاعه : بالنور
مسك تـوق بيدها ولفها لاتجاهه وناظر عيونها الهيمان فيها ونطق وهو مبتسم
" يا صباح الخير يالوجه الصبوح
يا صباح الفل ي أنسام الضحى
من تصبح بك لقى لـ الصبح روح
ومن فقد شوفتك كنه م صحى "
ابتسمت تـوق ونزلت راسها بخجل ومد يده فيصل يرفع راسها : لا تنزلين راسك وانتِ بتكونين حرم فيصل سامعه ؟ واليوم بجي اخطبك رسمي اتمنى ماتخذليني يا تـوق وانا اموت واحيا فيك لا تكسرين قلبي وانا احبك بالحيل
نطقت تـوق بصدمه : اليوم !
فيصل: اي اليوم شفيك انصدمتي
تـوق : وليه ماعلمتني قبلها بيوم يومين وشفيك مستعجل
تنهد فيصل ونطق : لا تخافين بنملك والزواج بخليه عقب ثلاث شهور
تـوق : وش ثلاث شهور خليه بعد سنه ازين
ضحك فيصل باستهزاء : تطقطقين ؟ وليه ناجل العرس وش عذرنا ؟ قلت لك عندك ثلاث شهور يمديك تتجهزين
اخذت تـوق وسـن ونطقت وهي تمشي : اكرهك
ابتسم فيصل على عصبية تـوق : وانا اهيم فيك
اخذت وسـن بعد ماسوت لها الرضاعه وراحوا الغرفه
حطت وسـن بالسرير وراحت تتروش
عنـد فيصل بالصاله جالس بالكنبه ويهوجس فيها ، لف على جـدته الي تطالع التلفزيون ونطق : جـده
الجـده : سم
فيصل: سم الله عدوك ابيك بموضوع
قفلت الجـده التلفزيون وقربت منه ونطقت : شبغيت
فيصل بتوتر : ا ابي اتزوج
ابتسمت الجـده بفرح : صدق ؟ ومن تبي ازوجك اشر بس !
ابتسم فيصل: تسلمين لي يا اجمل جـده ، ابي تـوق بنت عمي ناصر
استانست الجـده لانه اختار تـوق بنت عمه ناصر وكانت راضيه اشد الرضى : ابشر ابشر متى تبي نروح لهم
فيصل: الليل شرايك ؟
الجـده : تم ، اخيراً اول حفيد لي بيتزوج بشوف عيالك اخيراً
فيصل: تونا يا جـدتي وين تشوفين عيالي
الجـده : بيوافقون وين يلقون احسن منك
فيصل: يارب ، انا بمشي قولي لهنـاي تكوي ثوبي وغترتي ولا تنسين تقولين لجـدي
الجـده : ابشر استودعتك الله الذي لا تضيع ودائعه انتبه لنفسك
طلع فيصل لدوامه
وعنـد تـوق تتجهز لدوامها وتصحي هنـاي : هنـاي .... هنـاااااااي
هنـاي بعصبيه : ها ها
تـوق : انا بمشي ترا وسـن صاحيه انتبهي لها
صحت هنـاي بعد نومه طويله : اهه فيني نوم بس بكرا عندي فاينل بنام شوي واصحى اذاكر
ابتسمت تـوق : موفقه حبي انا بمشي
نزلت تـوق وشافت جدتها بالصاله وتقدمت تحب راسها : صباح الخير يا اجمل جده بالدنيا
ابتسمت الجده : ياهلا صباحك نور يابنيتي
تـوق : وين جـدي
الجـده : تعبان ونايم
تـوق : عسى ماشر وشفيه اوديه المستشفى ؟
الجـده : لا لا الحين اروح اشوفه
تـوق : بجي معك اصبح عليه مايصير امشي بدون ما اشوفه
صعدت الجـده وتـوق لغرفة الجـده وحست تـوق بشعور غريب ومُخيف نوعاً ما
فتحت الجـده الباب وانصدموا من شافوا جدهم طايح ع الارض ومغمى عليه
صرخت الجـده بصوت باكي : عقااااااب
تجمدت تـوق من شافت جـده ع الارض واسرعت تركض لغرفة هنـاي تصحيها : هناااااي قومي جـدي طايح ومغمى عليه قومييي
فزت هنـاي من صوت تـوق ومن الكلام الي سمعته وطلعت معها للغرفه يشيلونه للسياره
هنـاي : جده ماله داعي تجين اقعدي مع وسـن مايصير تقعد لحالها
الجـده بصوت باكي : زين طمنوني تكفون
طلعوا تـوق وهنـاي وكانت تـوق الي تسوق وهنـاي ورا وماسكه جدها
تـوق : بنوديه المستشفى الي فيه عمي محمد اقرب شي
كانت هنـاي تبكي بشكل هستيري لانها خايفه تفقد جدها زي مافقدت امها وابوها وكانت طول الطريق تدعي مايصير بجدها شي
وصلوا المستشفى ونزلت تـوق ودخلت المستشفى تقول لهم يجيبون سرير يشيلون جدها فيه
دخلوا المستشفى ومعهم جدهم بالسرير وشافه ابو عنود ولده وانصدم : وشفيه ابوي !
هنـاي بصوت باكي : مدري قمنا لقيناه طايح ع الارض تكفى شوفه ياعم ادري مافيه شي
دخل ابو عنود الغرفه وكانت هنـاي تبكي وماوقفت ، تقدمت تـوق تحضن هنـاي وتجلسها : هنـوي حبيبي اسمعيني ياعيوني جدي مافيه شي تطمني يقلبي ولو فيه شي هالشي مو بيدنا كل شي بيد ربي العالمين مانقدر نعترض امسحي دموعك
هنـاي وهي حاضنه تـوق وضامتها بقـوه : تـوق تكفين اخر شي باقي لي هو جـدي مابي يروح مني هو سندي من بعد فيصل مابي ياتـوق اخسر جـدي هو ابوي الثاني عوضني عن كل شي بالحياه صار لي السند وكل شي احس بموت ياتـوق لو اخسر جـدي ابي اروح معه ماعاد باقي لي شي بالحياه ،
مسحـت تـوق دموع هنـاي وجابت لها مويا تهديها : هنـاي حبيبي هدي خلاص كل شي بيكون تمام خلينا ننتظر عمي محمد يطلع وبكلم باقي اعمامي دقايق
بعدت تـوق عن هنـاي وكلمت ابوها واعمامها يجون المستشفى وبعد مده وصل واحد ورا الثاني
وطلع ابو عنـود وجهه مايطمن ان الجـد بخير
نطق ابو سعـود : محمد وشفيك ابوي فيه شي!
لفت هنـاي تنتظر رد من عمها ابو عنـود ، تقدمت تمسك يده : مافيه شي ياعم صح قول مافيه شي
ابو نـواف بعصبيه : محمد تكلم شفيك ساكت ابوي فيه شي !!!
ابو عنـود : ابوي فيه سرطان بالرئة وهذا اخطر انواع السرطان
انصدمت هنـاي من الخبر وطاحت مغمى عليها
وصل سيّاف وابوه وشاف بنت طايحه واعمامه ماسكينها واستغرب من تكون ! لف على ابوه وساله : يبه من ذي ؟
ابو سيّاف : بنت عمك سلطان
دخلوها الغرفه وكانت تـوق معها ودخل معها عمها ابو عنود يفحصها وطلع من الغرفه بعد مافحصها
ابو سيّاف بصدمه : لا حول ولا قوة الا بالله اكيد بنعالجه متى يبدا مرحلة العلاج !
ابو عنـود : حتى لو تعالج ابوي مايقدر يتحمل لانه كبير بالعمر
بس بنحاول نبدا مرحلة العلاج مانقدر نقعد كذا ونشوفه يتعب كل يوم ومانسوي شي
ابو سعـود : وبنقوله ؟
ابو عنـود : اي اكيد اجل كيف بيتعالج وهو مايدري ؟
ابو نـواف : طيب نقدر نشوفه الحين
ابو عنـود : اي دقايق ننقله للغرفه وبيقعد ثلاث ايام لانه يحتاج رعايه هالفتره كثير وضروري مايقوم من مكانه وماياكل سكريات كثير
دخلوا الجـد الغرفه ودخلـوا عياله وكان لسه نايم ، جلسوا كلهم ونطـق ابو نـواف : الفتره الي كلنا كنا خايفين نعيشها جالسين نعيشها
ابـو سيّاف : ان شاء الله بيتشافى وبيكون افضل
فتح الجـد عيونه بمحاولة انه يصحى ونطق بتعب : انا وين
تقدم ابو نـواف : استريح يبه لا تقوم انت تعبان
الجـد : ليه انا بالمستشفى
سيّاف : ياجـدي ارتاح بعدين نعلمك لا تقوم الحين لانك تعبان
نطق الجـد بتعب : بما انكم كلكم هنا يعيالي واحفادي ابي اقولكم وصيتي قبل لا اروح لربي وابيكم تنفذونها
ابو سيّاف : بسم الله عليك يبه ليه تقول كذا
ابو سعـود : الله يطول بعمرك
الجـد : اسمعوا وصيتي [ ابيكم بعد ما اموت تعيشون كلكم ببيتي وتهتمون بامكم الهنـوف وحفيداتي هنـاي ووسـن ابيكم تكونون يد وحده ماتفترقون ابيكم حوالين امكم وهنـاي ووسـن ماتبتعدون عنهم ومصروفهم عندي مبلغ كبير حق هنـاي ووسـن ابيكم تحافظون عليه وتعطونها وماتخلون عليهم قاصر لا تزعلونهم وتخلونهم يحتاجون لي وانا مو موجود بناتي وزوجتي امانه عندكم ]
لف عليهم وشاف كل واحد مغطي على عيونه يبكي ولف على فيصل الي كان يبكي بشكل هستيري من كلام جـده وكان حاس بيفقده زي مافقد امه وابوه وبيرجع يعيش نفس الشعور ، مسح دموعه وطلع يشوف هنـاي ودخل الغرفه وشاف تـوق تشرب هنـاي مويا
لفت تـوق من شافت فيصل يتقدم ونزلت نقابها ونطقت هنـاي : فيصل ابي اشوف جـدي الله يخليك
مسح فيصل دموعه ونطق : تمام تعالي
دخلوا هنـاي وتـوق الغرفه الي فيها جـدهم وركضت هنـاي تضم جـده وهي تبكي
حاول الجـد يقاوم ومايبكي عشان ماتشوفه هنـاي لكن دمـوع هنـاي كانت بحد ذاتها تبكي وتعور القلب
شاف تـوق بعيـده واشر بيده تقرب وتقدمت تضمه وتبكي
نطق الجـد بصوت باكي : ليه ليه البكي يابناتي ما احب اشوفكم تبكون وانا جـدكم لا تبكون وتبكوني معكم
نطقت هنـاي وهي تمسح دموعها : مابي افقدك نفس مافقدت امي وابوي مابي ارجع اعيش نفس شعور للحين ماتخطيت موتهم لا تخليني وتروح خذني معك مابي اكون لحالي
شافها سيّاف وهي تبكي وكان قلبه متقطع عليها وكأنها فقدت الدنيا من بعد موت امها وابوها اجل لو فقدت جـدها وش بيصير لها ؟ من بيعوضها ويسندها ؟ بيكون صعب عليها تتخطى موته وهو كان العوض لها والحين من بيعوضها وينسيها الالم ؟ ،
دخل ابو عنـود وشاف الكل متواجد بالغرفه ونطـق : ابـوي بيبدا مرحلة العلاج بعد اسبوع وبيقعد بالمستشفى ثلاث ايام لين نتاكد انه بخير وجاهز للعلاج ومايصير كلكم تجون خلوا بينكم دور كل يوم واحد بيجي مع ابوي وينتظر لين يخلص العلاج ويرجعه للبيت وعلى هالموال لين ينتهي مرحلة العلاج وحتى انت يافيصل وسيّاف ونـواف بيكون لكم دور تروحون مع جـدي تمام ؟
نطقوا الكل: تم
ابو عنـود : هنـاي وتـوق وجودكم مايغير شي ارجعوا البيت
هنـاي : لا ابي اجلس مع جدي تكفون
تقدم ابو عنـود وجلس جنبها : هنـوي حبيبتي مايصير عندك جامعه بكرا ضروري ترجعين البيت ووسـن تبغاك لا تخلينها لحالها
هزت راسها بالموافقه وطلعت هي وتـوق
لف ابو عنـود : وانتم مايصير كلكم موجودين ضروري ابوي يرتاح ارجعوا وبقعد معه واطمنكم
ابو سيّاف : زين احنا بنرجع بس علمنا اول باول والصباح بنجيك
هز بالموافقه وطلعوا كلهم من المستشفى وتوجهوا لبيوتهم
وصلت هنـاي البيت ولفت من شافت وسـن تركض وتضمها
اخذت هنـاي وسـن لحضنها وجلست ، شافت الجـده هنـاي وجلست جنبها : بشري شفيه جـدك !
نزلت راسها هنـاي وخايفه تعلمها ويصير فيها شي : مدري ماعلموني
بكت الجـده وحسـت ان عقاب فيه شي ومحد راضي يتكلم ونطقت بعصبيه : هنـاي جـدك شفيه !!!!!!
نزلت دموع هنـاي : سرطان بالرئه
انصدمت الجـده وكان الخبر لها مثل الصاعقه نطقت وهي ترجف : ك ككيف سرطانن بالرئهه!!!!
ضمت هنـاي جدتها : لا تخافين يا جده بيبدا مرحلة العلاج بعد اسبوع لا تخافين جدي ماراح يتركنا وعدني هو
دخل فيصل البيت وشاف الجـده وهنـاي ووسـن بالصاله وتقدم يجلس جنبهم ونطقت الجـده لفيصل: فيصل ودني لجدك
نطق فيصل وهو ضايق صدره وعيونه حمراء من كثر مابكى : مايصير ياجده انتهى موعد الزياره وعمي محمد معه وبكرا بنروح له
هزت الجده راسها وتقدمت تمشي بخطواتها للغرفه
عند هنـاي ووسن : انا باخذ وسـن وانام اذا صحيت الصباح صحيني اروح معك انا ووجدتي
هز فيصل راسه وكل واحد راح غرفته ينام بعد يوم كله حزن ودموع على جدهم
