تأففت وقالت بتذمر..
/تي وينها بدور هادي مازال ساعة ع الامتحان امتى بنلحقوا مراجعة!؟..
=اهي جت تجري المدوشنة هادي..
وصلت فيهم وهي داهشه قعمزت وحطت شيتاتها ع رجليها وهي تسمع في وحدة منهم تقول..
/واخيرا شرفتي ياهانم..
قالتلها:مش مني ياللا..رتل سيارات ياللا رتل مدجج مسكر الطريق..
=حي رتل!..
هزت راسها وهي تضحك وترقص في حواجبها وقالت هي واللي قدامها بصوت واحد..
"السلطان جايك ياللا"
وهي تسمع فيهم وتظاهر باللامبالاة وقلبها يرعد ويقصف بعدين قالت..
/هيا انتي وياها خل نراجعوا وفكوني من الدوة الفاضيه..
=مكملة في مسلسل الاستكراد..
=كبدي علينا اللي مالقينا حد يسكر علينا بسيارته مش يسكر علي خاطرنا طريق..
هي فتحت الشيت وقالت..
/اهو كتبت الحاجات المهمه هني شوفوا معاي..
=شوفي معانا انتي ياكبدي..
رفعت عيونها وهي تشوفلهم كيف يشبحوا لجهة معينه بإرتباك وتوتر قالت..
/تي هيا انتي وياها..
الزوز شافولها وقالوا بضحكه..
"جاك السلطان ياللا"
