رواية ولاد تسعة

الجزء الرابع (عصر تسعة)2

#ولاد_تسعة "الفصل الاول/سميه تسعة"
#جمان_فريد
الجزء_الرابع "عصر تسعة1"
⛔احداث هذه الروايه وشخصياتها من وحي الخيال بعض الاحداث غير واقعيه"فنتازيه" وبعضها بعيد عن واقعنا المعاش والبعض الاخر يلامس شيء من الواقع⛔
⚠️ملاحظه..
لما يبدا الكلام بالرمز هدا (♤) هذا يعني ان البطل يسرد في الاحداث
اما لما يبدا بهذا (🌿) يعني الكاتبه هي اللي تسرد..
#ذكر_الله
‏قَال ٱلحبيّب عليّه الصَلاة السَلام ..أفضّل ماطلعت عليّه الشمّس🍃
‏سُبْحَانَ اللَّهِ
‏ والحمدلله
‏ وَلَا إلهَ إلَّا اللَّهُ
‏ وَاَللَّهُ أَكْبَرُ
■■■■■■■■■■■■■■
🌿«سَأظَلُ عَنْ تِلْكَ العُيُونِ أُقَاتلُ
أنا عَنْ هَواكِ وعَنْكِ لا أتَنَازَلُ!»🌿
••••••••••••••••••••••••••••••••••••••••••••••••••••••••
في مطار العاصمه..
كانوا واقفين سلامه وولده تسعه مع محفوظ لوداعه قبل السفر..
سلامه وهو حاط يده ع كتف ولد خوه قال..
/مش تنسانا وتنسى بلادك..!
محفوظ بإبتسامه..
/حتى انتم ماتنسونيش زوروني كل سنة مرة..
تسعه:معناها ماتعبوش عليا نروح بكل..
ضحك محفوظ..
سلامة وهو مبتسم قال..
/عنده امه هني لازم يجي يشوفها..
محفوظ ابتسم وقال..
/اكيد ياعمي من غير كلام..
حضنه سلامة وقال..
/رد بالك ع روحك..
ضمه محفوظ وقاله..
/حتى انت ياعمي..تباعد عنه وباس راسه بعدين كب ع يده وقاله..ربي يحفظك ويطول في عمرك..
سلامه قال وهو شاد دموعه بقوة..
/ويبارك فيك ويباركلك في رزقك ياولدي..
طبطب محفوظ ع يد عمه بعدين جي لولد عمه..
ضموا بعض بقوة ومحفوظ قال في وذن تسعة..
/عارف اللي فيك راهو فواحدة ياولد عمي خيرلك..
تباعد عنه تسعه وهو يشوفله بإبتسامة امتعاض بعدين قال..
/في امان الله..
ضحك محفوظ وقال..
/نشوفكم ع خير..السلام عليكم..
ومشي محفوظ في طريقه اللي اختاره وعيون عمه تلحق فيه لين اختفي من قدامهم..نزلوا دموعه ماحسش بيهم الا لما مسحهم ولده تسعة وهو يقول..
/بوي..
شافله سلامة بعدين ابتسم وقال..
/هيا..ومشي وولده مشي معاه وهو محاوط كتاف بوه بذراعه..
🌿وبعد ماحط تسعة بوه في القصر طلع بش يشوف اشغاله اللي يقعد لاهي بيها اغلب ساعات اليوم..
لكن الفترة الاخيره بدي ياخد من وقته ساعة بش يقضي مشوار ع قلبه احلى من العسل..
♤بما إني راجل وعرفت من الرجاله اشكال والوان نقدر نصنفلكم الرجاله في مسألة الحب اربعة تصنيفات..
الصنف الاول هدا السائد اللي مايحبش كان نفسه واولى اولياته راحته وبس ولو جاه يوم وحب،المراة اللي يحبها تجي عنده بعد كل شي..
الصنف التاني هدا حتى هو موجود بكثرة زي بوي توا..ممكن قلبه يعجب بوحدة ويميل لوحده تانيه لكن في الحب مايعرفش يحب الا مرة وحده ومراة وحده بس هي اللي يقدر يستغنى عن كل شي ماعداها هي..
الصنف الثالث مافيش منهم هلبه،هدا كان جي حب مراة يحبها بمعنى الكلمه وقلبه مايتحركش لغيرها لكن كان جاه يوم وفقدها ممكن مايقدرش يحب بعدها لكن يقدر يكمل حياته مع غيرها زي محفوظ..
اما الصنف الاخير هدا اللي قارب ع الانقراض زي مرعي يحب مراة وحده بس في حياته وكان فقدها لايمكن يتقبل وجود غيرها في حياته ويكمل عقاب عمره ع ذكراها...
🌿🌿🌿🌿
يمشي في كلية الآداب ويدور فيها لين لقاها لكن وين شافها مع مني واقفه تفاجئ..اخته هانيه..
لاحظ في بيناتهم انسجام في الهدرزة وكأنهم يعرفوا بعض من فترة طويله..
تشجع ومشي بإتجاههم بخطوات واثقه لين وصل فيهم وقال..
/السلام عليكم..
تفاجئت هانيه لما شافاته وهي تقول..
/وعليكم السلام..
اما هي بدون ماتشوفله ردت السلام..
هانيه بخوف..
/خير تسعه صايرة حاجه!؟
ابتسم وقال..
/مافي شي غير قلت نجيك نروح بيك كان كملتي..
هانيه وهي مستغربه قالت..
/ايه خلاص كملت..
فريحه:هي امالا نستأذن هانيه..
هو كان يسمع فيها كيف تتكلم وقلبه متفاعل معاها بقوة..
هانيه وهي مبتسمه قالت..
/غير راجي نعرفك..هدا خوي تسعة بيت المال اشهر من نار ع علم..تسعة هادي صاحبتي فريحة البندار جديده في الشله متاعنا..
الزوز مع بعض قالوا..
/فرصة سعيده..
قامت فريحة عيونها وشافتله لقاته يشوفلها بنظرة حلوة فيها شي من الغرور غيرت نظرها عنه لأخته وقالت..
/نتلاقوا هانيه..بالسلامه..
هانيه وهي مبتسمه قالت..
/بالسلامة..
ومشت فريحه وتسعه يلحق فيها بعيونه..
لاحظاته اخته اللي ابتسمت ع جنب وقالت..
/تسعة!
شافلها بعدين استاقظ عقد حواجبه وقال..
/بري قدامي..
مشت هانيه وهي مبتسمه ورافعه حاجبها وهو لحقها ومازالوا عيونه يسرقوا في النظر للمكان اللي مشت منه فريحه..
🌿🌿🌿🌿🌿
"بري ياعمتي احضري مناسبتك وماتخممي في شي"
زكيه قالت وهي مبتسمه..
/عارفاتك تهني..بس نبي نوصيك ع هانيه بالذات يانزيهة انتي وخيتها الكبيرة..
نزيهة بإبتسامه وقالت..
/عارفه ياعمتي ماتخممي في شي..
ضمت زكيه كنتها وقالت..
/نشوفك ع خير..
نزيهه:امين..توصلوا بالسلامة ياعمتي في وديعة الرحمن..
تباعدت زكيه وهي تقول..
/الله يسلمك..بالسلامه..
نزيهه قالت..
/بالسلامة..
ومشت زكيه طلعت من القصر متوجهه للسيارة اللي بترفعهم هي وراجلها لطرابلس بش يحضروا مناسبه لأحد الأقارب..
بسبب ارتباطات تسعة ماقدرتش تمشي نزيهه وكذلك هانيه قعدت بسبب الامتحانات..
بعد طلعت سيارتهم بشويه خشت سيارة جايبه بلقيس..
خشت بلقيس للقصر وهي تقول بضحكه..
/مريت خوي الباهيه ان شاء الله ديما زاهيه..
ضحكت نزيهة وضمتها وهي تقول..
/استحشناك ياجبنه..
بلقيس قالت..
/قراية الهم هادي حبستني ماصدقت كملت امتحانات..
وينفتح باب القصر وتخش هانيه..
قدمتلهم وقالت لبلقيس برفعة حاجب..
/جيتي..
بلقيس وهي تقلد فيها قالت..
/لاقاعده في الطريق..
ضحكت نزيهه..
هانيه قالت..
/ياخفة دمك..شافت لنزيهه وقالت..ماما وبابا مشوا؟
نزيهه:توا كيف طلعوا..جابك تسعة؟
وهي مبتسمه بشي من المكر..
/ايه خشلي لقعر الكليه لداخل وهو عمره مادارها اشبح شن في وراه خوي هدا..
ومشت كملت طريقها وخلت نزيهه مضايقه ع الاخر من تلميحها..
شدت بلقيس يد نزيهه وقالت..
/تعالي معاي الكوجينه نوريك كيف تعلمت ندير سفنز..
نزيهة بضحكه..
/سفنز مرة وحده..
خدت بلقيس نزيهه من يدها وقعدت تجري بيها وهي تقول..
/هيا تعالي..
ونزيهه تقول بضحكه..
/غير بالشويه..
🌱وانشغلت نزيهه باقي اليوم مع بلقيس اللي ونستها وخلتها تضحك من قلبها اما هانيه قعدت شاده دارها مابتش تطلع منها لكن شن ماتبي كانت تطلب فيه من الخدم بالهاتف ويجيها لعندها..
وقعدت بلقيس هديكا الليله في القصر وباتت في دارها فيه..
وخلت نزيهه سهرانه في دارها تفكر في حالها...اهي سكرت عام متزوجة وماصارش حمل وهي اللي تعرف ان راجلها في كل الحالات حياخد عليها بش يكثر ذريه توا حيكون عنده سبب قوي يخليه ياخد عليها في اقرب وقت..
ولأنها انسانه صاحبة شخصية قويه ماكانتش تحب تبان ضعيفه ولامغلوبه ع امرها قررت بنفسها تفتح موضوع الزواج مع راجلها..
🌱وراجلها في هالوقت كان في نفس الحجره متاع محل الذهب اللي يملكه مرعي..
هالمرة كمل شهرين وهو يصنع في خاتم ذهب ابيض مزين بفص الماس كبير بريقه يوجع العين نقش عليه من داخل (فريحة تسعة)
وطول ماهو يشتغل عليه كان قلبه يرفرف بين ضلوعه..
ويقطع عليه خلوته مع الخاتم مرعي لما دق ع باب الحجره..
تسعه تنهد وقال..
/خش..
انفتح الباب وخش مرعي وهو يقول بإبتسامه..
/شني ياولد عمي شني..راك تقول نويت ثني..
ضحك تسعه وهو يشوف للخاتم..
قعمز مرعي مقابله وقال..
/جديات!؟
تنهد تسعه وقال..
/والله ماني عارف كيف صارلي ولا شن صارلي ياولد عمي هي نظره سهيت عنها لقيت روحي غارق..والله حاولت نقاوم ماقدرتش حسيت قلبي حاكم فيا بقوة ياولد عمي..
مرعي:حسيت بروحك كنت هكي مع زوجتك؟
حرك راسه بالنفي..
مرعي:خلاص مدام متمكنة منك لهالدرجة اخطبها شن تراجي..
تسعه وهو يشوف للخاتم قال..
/هدا اللي بيصير لكن في الاول لازم نفتح الموضوع مع زوجتي..
مرعي:مدام تعرف من البدايه انك حتاخد عليها ومتقبله حتتسهل معاك..
ابتسم تسعه وقال..
/ان شاء الله..
🌿🌿🌿🌿🌿
وفي صباح تاني يوم..
دارتلهم نزيهة فطور ملوكي يفتح النفس في حديقة القصر وسط الجو الربيعي الحلو..
ع الفطور كانوا منسجمين مع هدرزة بلقيس الحلوة وهانيه قعدت تفطر وهي ملتزمة الصمت وطبعا دماغها كانت شغاله في التفكير راجتهم لين سكتوا بعدين قالت..
/بعد اذنك خوي..نبي نعزم صاحباتي عندي غدوة..
تسعه شرب من فنجان الشاهي بعدين قال..
/اني شن قايل عليه سريب عزايم الصاحبات هدا!؟
هي قالت..
/بالله عليك المرة هادي بس،اني دايرتها ع خاطر صاحبتي الجديده اللي شفتها معاي امس..
ملامح وجهه تغيرت قعد مركز بنظره ع فنجان الشاهي ونزيهه مركزة عليه..
هانيه تابعت تقول..
/ع فكرة مالهمش اسبوع ساكنين في حوشهم الجديد في منطقتنا بالزبط في الشارع اللي ورانا..
رفع عيونه القدام وقال..
/هادي اخر مرة..
ابتسمت وقالت..
/نجيهولي ياربي..
هو ناض وقال..
/ماتبوا شي يا نزيهه..
نزيهه ناضت وهي تقول..
/نبيك تفضي روحك العشيه نبي نطلع اني وياك..
شافلها شويه بعدين قال..
/حاضر نصلي العصر في الجامع اللي هني ونجي ناخدك..السلام عليكم..
ومشي وهي ناضت وراه تسقد فيه لعند ماوصلاته للسيارة ولما ولت لحماواتها قالتلها هانيه..
/عزمتي حتى بالكذب..
بلقيس:طلعة ليها هي وراجلها انتي شن حشرك معاهم..
هانيه بحده..
/قصري لسانك احسنلك..
بلقيس:قصريه انتي اني نقصره..
نزيهه:بلقيس عيب هادي اختك الكبيره..
ناضت هانيه وهي تقول بحمقه..
/من وين بتعرفه العيب بنت الانجليزيه هادي..ومشت وخلتهم..
نزيهه قعدت تبع فيها بنظراتها المصدومه بعدين التفتت وشافت لبلقيس لقتها تاكل في عود "قرستيني" بكل برود بعدين قالت..
/طنشي..معاش بديت نعدل عليها..ابتسمت وهي تقول..نبيك تعلميني ندير فطيره ماما تحبها هلبه نبي نديرهالها..
ضحكت نزيهه وقالت..
/حاضر...
🌿🌿🌿🌿🌿
بعد العصر..
في احدى المنتزهات كانوا مقعمزين هي تحكي وهو منصت ليها انصات تام..
نزيهة:انت قبل لتاخدني قلت انك تبي تعدد واني رضيت بالحاجه هادي وتوا نبيك تنفدها..
قعد يشوفلها وهو ساكت..
هي شافتله وقالت..
/ليا معاك عام لتوا وماحملتش وعمي ربي يحفظه ملهوف ع شوفة صغارك واني مانبيش نخليه يراجي اكثر من هكي..تزوج ياتسعة بش تجيب الذريه اللي تفرحك وتفرحه..
شد يدها وشاف لخاتم الياقوت بعدين قال..
/كيف ماقتلك قبل قدرك عندي محفوظ ويخي توا زاد كبر اكثر واكثر..
ابتسمت وغيرت نظرها القدام وهو يشوفلها بإبتسامه ود..
🌿🌿🌿🌿
ويجي اليوم اللي بعده..
يوم عزومة هانيه لصاحباتها اللي كانت من ضمنهم فريحة..
🌱طلعت هانيه وهي تمشي بسرعة لباحة القصر..
شافت خوها تسعة واقف ع سيارته يكلم في الجنايني متاع القصر ابتسمت ابتسامه جانبيه بعدين غيرت نظرها عنه لبوابه القصر وهي تشوف للحارس كيف يفتح فيها..
التفت تسعة للبوابه شاف سيارة يعرفها كويس خاشه لباحة القصر..ويبدا نبض قلبه يسرع وهالنبضات كل مالها تزيد ارتباك وسرعه وهو في يشوف في الباب الخلفي للسيارة كيف ينفتح بعدين شاف فريحة نزلت منها..كعادتها كانت في قمة الأناقه والتألق والجاذبيه..
قدمت لهانيه وهي مبتسمه وسلموا ع بعض..
وهو كالعاده كان هايم فيها وناسي نفسه وحالته هادي شافتها نزيهه وهي واقفه ع واحد من شبابيك الدور التاني..
شدت دمعتها بقوة وابتسمت بأسف..
🌱"هيا تفضلي تفضلي"
مشت فريحة مع هانيه وهي تمرر في نظرها ع حديقة القصر وتقول..
/ماشاء الله الحديقه حلوة بالمرة..ويجوا عيونها ع تسعة وهو راكب سيارته ماكانش باين انه يشوفلها لأن عيونه مدرقتهم النظارات غيرت نظرها عنه بسرعه وهي مرتبكه..
وهانيه اللي لاحظتها قالت بإبتسامه..
/ايه المنسق متاعه بابا جابه من اوروبا...
🌿ورفعت هانيه فريحه وين مادايرة جلسة اللمة كانت في الجزء الخلفي لحديقة القصر هديكا الجهة كانت احلى جهة وتزهى في الربيع لأنها تولي كلها خضرة وورد وفيها ديكور مميز بالمرة..
بعد اجتمعوا كل صاحباتها طلعت نزيهة وسلمت عليهم ورحبت بيهم وسألت عن احوالهم بعدين خشت وعيون فريحة معاها بعدين غيرتهم لوحده من صاحباتها لما قالت..
/مرت خوك جميله جدا..
هانيه:لكن لتوا مادارتش صغار..
وحده تانيه قالت..
/علاش عندها مشكله؟
هانيه:لاعاينوا هي وخوي مافيهم شي بس مع هذا ماصارش حمل..
=ليهم عام مع بعض مازال قدامهم وقت..
هانيه:بابا مش قادر يصبر يبي يشوف صغاره..
=قصدك خوك بيديرها وياخد عليها؟
هانيه:الحاجه هادي معروفه من البدايه ليها هي قبل الكل وهي رضت بيها..
=بجديات شرط خوك هدا غريب هلبه مش عارفه كيف رضت بيه مرت خوك..
هانيه:وعلاش ماترضاش بيه وهي عايشه احلى عيشة..
فريحة هني تكلمت وقالت..
/مش كل شي فلوس ياهانيه..
ابتسمت هانيه وقالت..
/واني مانحكيش ع الفلوس يافيري..اني قصدي الاحترام والتقدير والمكانه اللي محصلتها بيناتنا خوي هدا زي بوي يقدر المراة هلبه وشن ماتبي يعطيها..عندك علم مرته هادي دخلها معاه شريكه في مشروع الالبان والعصاير ومرة مرة يرفع فيها معاه غادي ومش هكي بس يخلي فيها تمشي لمزرعتها اللي مشاركه فيها في المشروع بش تشرف ع كل شي غادي..هدا غير المكانه اللي دايرنهالها بوي وامي والله هدا كله ماهي محصلاته غير عندنا حني..
البنات كان يسمعوا وهما منذهلات ماعدا فريحة اللي كانت حاسه بشعور مزعج ضايقها...
=هو بصراحه خوك بروحه سادها..
=والله حق خوك حكايه ياهانيه راجل معبي مكانه وليه قدره في الالف والخمسين كلها لو كنت مكان مرت خوك راني قتلت روحي ولانخليه ياخد عليا..
هانيه بضحكه..
/يابنتي..مش مهم ياخد عليها ولالا المهم شن شكل حياتها معاه واني متأكده ان خوي حيكون زي بوي في الحاجه هادي كان مش خير منه..والمحظوظه هي اللي تقدر تملك قلبه وتكون فيه الاولى والاخيرة..
قالت كلامها الاخير وهي تشوف لفريحة اللي حست ان هانيه تلمح لشي...
=في حاجه من زمان نبي نسألك عليها غير متحشمه..عقدت حواجبها وقالت بضحكه..من سمى خوك؟
ضحكت وقالت..
/بابا..
=علاش سماه الاسم الغريب هدا؟
تنهدت وقالت..
/زي ماتعرفوا بابا قبل ماما تزوج ثلاته مرات والمراة اللي ياخدها لما تحمل عيلها يايموت في بطنها ياتجهض من البدايه وفي اللي ماحملتش بكل وماما حتى هي جابت وليد ومات وعمره عام وبعدين حملت واجهضت..المهم مجموع الصغار هادم كلهم ثمانيه وقبل ليجي خوي هدا بوي حلم حلم فسرهوله شيخ وقال بيجيك ولد حيعيش ويولي حاجه كبيره لكن كان جيت تسميه سميه تسعه..
=اها فهمت اللي يسمع اسمه وين يسأل عن السبب يعرف القصه هادي ويتفكر ان عنده قبل تمانيه خوت وماتوا..
=قصدك طير العين..
هانيه بضحكه:ايوه غالبا هكي..
=الحق حتى اني بعد اللي سمعته منك وجعني خوك مش عارفه علاش ربي يحفظه ويطول في عمره..
هانيه:آمين يارب العالمين ونشوفوا صغاره عاجلا غير آجل..
كلهم آمنوا ورا دعائها حتى فريحه اللي كانت سرحانه بالتفكير في اللي سمعاته...
🌿🌿🌿🌿🌿
"تاعب تاعب وكان نلقى نرقد سبوع"
نزيهه وهي تحط في مالقي الميه مع طاسه ع الكامدينو قالت..
/ربي يعطيك الصحة ويعاونك..
وهو واقف قدام الكامدينو يعدل في ساعة المنبه ع وقت صلاة الفجر قال..
/آمين..
قعمزت نزيهه ع السرير وقالت..
/تسعة
شافلها وهو مبتسم..
وخرت شعرها ورا وذنها وقالت..
/لقيتلك بنيه فيها كل المواصفات اللي تخليها مناسبه ليك..
قعمز ع السرير وهو يشوفلها بصمت..
هي بلعت ريقها وقالت..
/تقريبا تعرفها..بنت البندار صاحبة هانيه..
رفع حواجبه وهو يشوفلها ومازال محتفظ بصمته..
وهي ابتسمت وقالت..
/بنت عيله وجميله ومتعلمه ومحترمه اليوم قعدت طول الوقت نراقب فيها عجبتني هلبه..
هو ابتسم ع جنب وقال..
"شيهانة"
عقدت حواجبها بإستغراب..
قال بإبتسامه..
/تعرفيها الشيهانه..
قالتله:انثى الصقر..
قاللها بنفس الابتسامه..
/انتي زيها..
ابتسمت ونزلت نظرها لخاتم الياقوت..
قرب منها وحط يده ع شعرها وطبع قبله ع جبينها بعدين شافلها وقال..
/ارقدي وارتاحي..
هزت راسها وقالت..
/تصبح ع خير.. هو قال بإبتسامه..
/قدامك كل خير..
ساعدها ترقد وغطاها بعدين تمدد حتى هو وتغطى شافلها لقاها مغمضه عيونها ابتسم وغمض عيونه وماهي الا لحظات وراح في النوم من التعب اما هي قعدت سهرانه تذرف في الدموع من عيونها اللي كانوا يتأملوا فيه..
♤قالت جداي زكيه بعد ماروحنا من طرابلس فتح معانا الموضوع طول،قالت وين سمعته شن يبي حسيت بنفس اللي حسيته لما فتح معاي سلامة نفس الموضوع..
🌿"علاش ياولدي حرام عليك"
سلامة:تدوي وكأنك مش عارفه ان الحاجه هادي حتصير من البدايه..
زكيه بضيق..
/واعرة ياسي سلامه واعره ساهله عليكم انتم بس..
رفع سلامة حواجبه تعجبا..
اما تسعة قال بإبتسامه..
/بإذن الله بندير زي مادار بوي مش حنخليها تحس بالفرق ..
شافت زكيه لسلامة بطرف عينها لقاته يشوفلها بإمتعاض غيرت عيونها لولدها طول..
تسعه شد ضحكته وقال..
/نبيك تمشي انتي ومرت بوي ونزيهة وهانيه تخطبولي بنت البندار اللي ساكنين هني..
بوه شافله وهو متفاجئ..
وامه قالت بدهشه..
/بنداريه؟
تسعة:فريحة بنت ابو بكر البندار تعرفه يابوي كويس وانتي يام تعرفيها صاحبة هانيه..
قعدوا بوه وامه ساكتين وهو يشوفلهم..
شويه بوه تنهد وقال..
/كان انت راغبها ماعنديش مشكله..شاف لمرته وقال..كلموهم وخودوا منهم موعد..
♤قالت جداي زكيه خدينا منهم موعد ومشينا تكلمنا فيها وهما قالوا نردوا الشيرة ع البنت ونردوا عليكم وبعد فوتوا نهارين ردوا علينا بالرفض..
وعاد مانحكيلمكش ع حال الراجل لما ترفضه المراة اللي يحبها شن يصير فيه..
ردة الفعل في الحاله هادي ينقسموا فيها الرجاله لثلاثه..
في اللي يشد تركينه ويكملها بكي ع انغام الاغاني المغربيه..
وفي اللي يكره شبح وجهها ويفوتها مرة وحده..
وفي اللي زي بوي وراجل تاني نعرفه هادم من كثر مايكونوا رجاله معتزين بأنفسهم وواثقين انهم ماينرفضوش لما يجيهم الرفض من المراة اللي يحبها القلب يفرضوا في ارواحهم فرض عليها ويخلوها تمشي تمشي وترضى بيهم وهي فرحانة...
🌿🌿🌿🌿🌿
مقعمزه في باحة الكليه شاده في يدها لوح شكولاته تاكل منه وهي تقرا في كتاب دراسي..
في عز انسجامها تطلع في وجهها شيشة عصير قعدت تشوفلها وهي مفجوعه بعدين شافت لليد شادتها رفعت نظرها لصاحبها بدت ع وجهها ملامح المفاجأة واحمر لونه..
هو قال بإبتسامه ثقه..
/عصير طبيعي ميه في الميه مش حتلقي زيه لافي البلاد ولابرا منها..
نزلت عيونها للكتاب..
وهو مشي قعمز جنبها بمسافه وحط جنبها شيشة العصير بعدين قال..
/علاش رفضتيني؟
ضحكت بتعجب وقالت..
/علاش!!؟
هو قال...
/ايه علاش نبي سبب مقنع..
شافتله وقالت..
/انك متزوج قبل ومازال تبي تتزوج بعدين مش سبب مقنع!؟
قاللها:مش سبب اصلا..
رفعت حواجبها تعجبا..
ابتسم ع جنب وقال..
/تعرفي شن اهم حاجتين بالنسبه للمراة بعد الزواج هالحاجتين هما اكثر ماتبيهم المراة من الراجل..الأمان والاحترام واني فوق هادم الزوز عاطيك قلبي..
غيرت عيونها للكتاب وهي متوترة وقلبها يدق بقوة..
هو لما لاحظ توترها ابتسم وقال..
/متزوج قبلك ولاتزوجت بعدك مدام قلبي عندك ماتفرقش معاك صدقيني..اني فوق هكي راجل نقدر قيمة الحاجه الغاليه وانتي غاليه هلبه مش حتلقي راجل يعرف قيمتك زيي اني..
فريحة قالت..
/اكيد قلت هالكلام لمرتك قبل لتاخدها..
ضحك وقال..
/نهائيا وربي شاهد..لكن هدا مايعنيش ان ماعندهاش مكانه في نفسي بالعكس قدرها كبير وعالي وكل ماله يزيد يكبر ويعلى..
فريحة بضيق..
/صعب صعب هلبه..
قال بإبتسامه..
/لا والله ماهو صعب يافريحه انتي وياها مش حتحسوا بالفرق نهائي حنقعد عادل بيناتكم حتى لو كان قلبي عند وحده فيكم..
قعدت ساكته وملامح الضيق مازال باديه ع وجهها..
هو قال:صدقيني يافريحة لو رضيتي مش حتندمي بكل حتندمي لو قعدتي مسكرة راسك وضيعتيني من بين ايديك..
شافتله وهي مبتسمه بتعجب..
ضحك وغير نظره القدام وقال..
/خودي اسبوعين فكري فيهم ع راحتك فكري بعقلك وماتكابريش ع اللي يحسه قلبك..ناض وهو يقول..حنجيك بعد اسبوعين في نفس اليوم ونفس المكان بش ناخد الرد اللي يفرحني..في امان الله..
لبس نظاراته ومشي وهي بعيونها معاه وقلبها كان يلقى يلحقه..
بعد مااختفي عن عيونها التفتت وشافت لشيشة العصير وابتسمت..
🌿وقعدت باقي يومها وهي شادة شيشة العصير تتأمل فيها وتفكر فيه وفي كلامه..
"اشربيها ولاعطيهالي اني نشربها"
قالت الكلام هدا اختها الصغيره االلي كانت تشوفلها وهي حاطه شيشة العصير ع الطاوله قدامها وتتأمل فيها..
شافت فريحه لأختها وضحكت ضحكه خفيفه..
قدمتلها اختها وقعمزت ع كنبه قريبه عليها وقالت..
/احكي قولي خيرك من لما روحتي وانتي اشبح كيف موليه..
رجعت فريحة شافت لشيشة العصير وهي ملتزمه الصمت..
واختها شافت للشيشه بعدين قالت بضحكه..
/عصير البستان..متاع تسعة بيت المال..
تنهدت فريحة من قلبها..
اختها قالت بضحكه..
/كانك تحبيه علاش تقولي لا وتخلي في امي تغز عليك في الملح..
فريحة قالت بإبتسامة..
/اليوم جاني للكليه وجابلي معاه العصير
اختها ضحكت بفضول وقالت..
/ايه!
تنهدت فريحه وقالت. /مش قادرة نقاومه ياحلومة مش قادرة وفي نفس الوقت مش قادرة نتحمل تشاركني فيه وحده تانيه..
قالت اختها..
/يابنتي ديري زي ماقالت امي حوزي قلبه تولي الاولى والاخيره..
بضيق قالت..
/لالا مانقدرش نخرب حياة مراة تانيه شن ذنبها هي..
قالتلها:من قالك خربي عليها! قصدي خليه يحبك انتي بس ومايقدرش يعيش من غيرك صدقيني هدا سادك..
ابتسمت فريحه وقالت..
/تعرفي قبل ليخطبني قعد قريب تلاته شهور يجي للكليه يشوفني من بعيد ويمشي..
اختها قالت بدهشه..
/هدا وين تقولي يادعوة!تي هدا طايح فيك..
ضحكت فريحه وخدودها احمروا خجل..
اختها قالت..
/باهي هو شن قالك بالزبط؟
قالت:خودي اسبوعين وفكري بعقلك ومعاش تكابري ع قلبك.. حطت ايديها ع خدودها وقالت..ياحشمتي طلع زابطني..
اختها قالت بضحكه..
/ياوخيتي سلمها والله تهبلي يافيري وتنحبي..
ضحكت فريحة بخجل وقرصت خد اختها..
ابتسمت اختها وقالت..
/زيدي فكري وصلي استخارة..
هزت فريحه راسها بإيجاب وقالت..
/إن شاء الله..
🌿🌿🌿🌿🌿
ويفوتوا اسبوعين ويجي تسعة ع الموعد وقعمز في نفس المكان اللي تقعمز فيه فريحة وقعد يراجي فيها..
شويه وجاته فريحه وقفت ع بعد مسافة بسيطه قدامه وقالت وهي منزله عيونها للأرض..
/موافقه..
ولفت ومشت بسرعه وخلاته يضحك من الفرح..
♤جداي قالت لما ولينا خطبناها مرة تانيه طلبت منها نزيهة يتكلموا ع انفراد...
🌿"عارفة الوضع حيكون صعب عليك وعليا لكن نبيك من توا تعرفي اني حنديرك اختي مش ضرتي وبإذن الله مش حتشوفي مني شي يوجعك"
فريحة قعدت تشوفلها بإبتسامه مجامله وفي عيونها نظرة ريبة..
فهمت نزيهه نظرتها وقالت..
/همي كله نعيشوا في جو هادي مستقر بعيد عن المشاكل تسعة توا قاعد يبني في شغله بروحه بعيد عن بوه يبي يدير لنفسه اسم يبي يكبر بإسم تسعة مش بإسم عمي وياما من حاجات حاط في باله يوصلهم نبيك تعاونيني بش نوصلوه للي يبيه..
فريحة:تحبيه؟
نزيهه ابتسمت وقالت..
/هلبه..هدا علاش نبي نريحه ونهنيه..
تعبوا عيون فريحة بالدموع وقالت..
/واني هدا مانبي..
نزيهه:متفاهمين معناها..
هزت فريحه راسها بإيجاب وهي مبتسمه..
♤هداكا اليوم نزيهة كسبت اخت تانيه لابل أعز من الاخت وفريحة نفس الشي..هادم الزوز بالذات اكثر نعمه انحسد عليها بوي هو الرسول قال خير متاع الدنيا زوجة صالحة يابال اللي يبدا عنده زوز..!
المهم..بعدماخطب بوي فريحة مرة تانيه ووافقت عليه انتشر الخبر في الالف وخمسين ووصل للبنداريه تحديدا لكمال اللي انصدم صدمه كبيرة وطارتله هلبه ومن غيظه قال لأمه تخطبله وحدد موعد فرحه قبل موعد فرح بوي وفريحه بشهر...
وبعده بشهر تزوج بوي فريحة ودار فرح ماخلاش جدي يصرف فيه قرش واحد..
لكن الفرح هدا ماعداش عادي زي غيره من افراح عيت بيت المال لأنه صارت فيه حاجه نغصت ع بوي فرحته..
🌿ليلة حفلة الدخول دار تسعة عرض خيول كانوا هو وبوه وولاد عمه واقاربهم وباقي الحضور اللي من ضمنهم رجالة البندار مستمتعين بالعرض الاشخص واحد كانوا عيونه طول الوقت ع تسعة بنظراته الحاسدة..كمال البندار...
بعد تم عرض الخيول واحد من الحضور قال..
/عاد من بين الوجوه الحاضرة عندنا فرسان مايفوتهم حد خيالة من الطراز الرفيع زي مايقولوا..الحاج سلامة والحاج عبد العزيز..
الزوز شافوا للمتحدث بإبتسامه وتسعة شاف لبوه وابتسم بفخر لكن عيون كمال كانوا عليه..
والمتحدث مازال متابع يقول..
/شن رايكم ياكبار الألف والخمسين تتسابقوا توا وتخلونا نعرفوا من هو الفارس الاول للألف والخمسين..
ضحكوا الزوز وسلامة قال..
/اعفيني الليله اني نبي نفرح لولدي بس..
قاله عبد العزيز:قول كبرت وراحت عليك ياسلامه..
ضحكوا الحضور ومن ضمنهم سلامه اللي قال بعدين..
/انت تبي تسابق منك جد ياحاج عبد العزيز؟
ابتسم تسعة ع جنب وهو يشوف لعبدالعزيز اللي قال..
/وجد الجد ياحاج سلامه..
هز سلامة راسه وناض وقف ووجه كلامه للفرسان الموجودين لما قال..
/جيبولنا خيرة خيولكم..
ناض عبد العزيز وهو مبتسم ومشي قدم مع سلامه لساحة السباق وعيون الحاضرين بحماس معاهم..
محفوظ قرب من وذن تسعة وقال..
/مغلا عليهم يحطوا ارواحهم في مواقف بايخه البنداريه..
ضحك تسعة ضحكه خفيفه ومازالوا عيون كمال عليه..
🌱جابوا الفرسان افضل الخيول وعطوها لسلامه وعبد العزيز وكل واحد فيهم ركب ع ظهر حصان..
ولحظات وضرب واحد من الموجودين طلقه في الهواء معلن بداية السباق..
وبدوا كبار الالف والخمسين يجروا بحصناهم والحضور معاهم بحماس كبير وترقب..وكذلك كانت تصور فيهم كاميرات فيديو جابوها بش تصور الفرح ومظاهره..
تسعة كان يراقب في بوه بكل فرح وفخر برغم ان سلامه كبر في العمر لكن قاعد محافظ ع صحته ولياقته والاهم من هدا كله هيبته الطاغيه..
قعد معاه بعيونه وهو يشوف فيه كيف مركز ع خط النهايه ومعاش شاف معاه حد لعند ماوصل في خط النهايه وتعداه وكالعاده فاز سلامه مع ان خصمه ماكانش هين لكن هو مايعرفش يكون غير الأول..
الحضور كلهم صفقوا بحرارة وفي من رجالة عيلة بيت المال قعد يضرب الرصاص في الهواء من ابتهاجهم..
هدا فخر جديد جابهولهم سلامه ينحط مع قائمة طويله من الانجازات اللي خلتهم ديما مرفوعين الراس..
ترجلوا الفرسان عن الخيول وجوا لبعض وضموا بعض وعبدالعزيز برغم انزعاجه المكتوم خدي الموضوع بروح رياضية لكن ولده ماقبلهاش ولاقدر يتحملها..
استنى لين وصلوا فيهم وقعمزوا حداهم وهو يسمع في كلمات الاطراء والتمجيد تهطل ع غريمهم التقليدي وهالشي كان يزيد يضغط ع اعصابه..
خدي نفس عميق بعدين ناض وقف وهو يقول..
/ربي يعطيكم الصحه ياكبارنا..
الحضور وجهوا انظارهم ليه وبوه وسلامه ردوا عليه..
"الله يسلمك"
هو ابتسم وقال..
/الحق الحق..مسح ع صدره بإيديه الزوز وهو يقول..كبارنا ولعوا فيا النار واني راجل ماعنديش عزم مع التحديات..وجه نظره لتسعة وقال..ونبي نتحدا العريس ونشوفوا من هو الفارس الاول من الجيل الجديد..
وجهوا الحضور الانظار لتسعة بما فيهم بوه..
وهو ابتسم وقال..
/حني مش كبار المدينه ياكمال خلي الالقاب لكبارها بس..
ابتسم سلامة..
شويه قال واحد من عيلة البندار..
/اني سامع بيك خيال ويقولوا تسابقت مع فرسان في بريطانيا وفزت عليهم نبي نعرف الكلام هدا حق ولاكذب..
محفوظ قال لتسعة بصوت مسموع ليه..
/بالله نوض وريه الحق من الكذب وعرفهم حجمهم..
ضحك مرعي اللي كان مقعمز جنبهم لما سمعه شن قال..
تسعه شاف شويه لكمال بعدين ناض وهو يقول..
/انتم اللي طلبتوها..
ابتسم كمال ابتسامه جانبيه وقدموا هو وتسعه لمكان السباق..
عيلة بيت المال كانوا واثقين ومتأكدين من فوز تسعه لأنهم يعرفوه خيال خير من بوه..
لكن عيلة البندار وع راسهم كبيرهم عبد العزيز كانوا متمنيين من كمال ياخد بثارهم من عيلة بيت المال اللي من يوم يومهم واكلين ع كبدهم وشاربين..
وانضربت طلقة في الهواء معلنة بداية السباق..
وكالعاده من شابه اباه ماظلم كان تسعة يجري بالخيل وهو واثق من نفسه ومرتاح ع الاخر..
وجنبه كمال كان يسابق فيه بكل جهده وهو يسرقله في النظر..
مرة تسعة يفوت كمال شويه ومرة كمال يفوته شويه خلوا اعصاب الحضور تنشد وحماسهم يزيد..
فات تسعه كمال لما قربوا يوصلوا لخط النهايه لكن كمال لحق عليه وجي جنبه وقرب منه وقال بصوت عالي..
/حط بنت العم في عيونك ياتسعة قبل كان بيصير بينا نصيب لكن ربي مارادش وعطاها للي خير مني..
الكلام اللي سمعه تسعه حس فيه تلميح مبطن من كمال عن علاقه كانت تربطه بفريحة..
ولعت في قلبه النار وانذهبت شيرته وكمال لما شاف حالته ابتسم بنصر ورد نظره لخط النهايه وزاد السرعه وتجاوزه وفاز ع تسعة..
عيلة بيت المال كانوا بين المتفاجئ والمصدوم واكثرهم سلامة ومرعي ومحفوظ..
اما البنداريه من الفرحه صاحوا كلهم وصفقوا ومنهم اللي قعد يضرب رصاص في الهواء..
كمال وهو يشوف لفرحتهم ضحك وخلا حصانه يوقف رجليه الزوز بعدين نزله ونزل منه ومشي طول لجماعتهم بدون مايعبر تسعه..
تسعة اللي مش قادر يهتم لشي غير للكلام اللي سمعه من كمال وخلاه يكمل باقي ليله فرحه وهو معصب ع الآخر..
لاحظوه بوه وولاد عمامه وفي بالهم السبب خسارته في السباق لكن هو ماكانش مهتم لهالخسارة نهائي...
🌱🌱🌱🌱
في القصر..
تحديدا جناح تسعة وزوجته التانيه..
كانت العروس الجميله فريحة مقعمزة ع السرير تسمع في المولد وقلبها يدق بقوة من التوتر والخوف.
وزادوا هالشعورين بعد ماتم المولد وقعدت تراجي في خشة تسعة عليها..
وبعد لحظات من الانتظار سمعت الباب الخارجي للجناح انفتح وتسكر..
حطت يدها ع قلبها وقالت بإبتسامه توتر..
/ياربي..
وشويه وخش عليها تسعه وهو يقول..
/السلام عليكم..
ناضت وقفت والتفتت عليه..ويذوب قلبها لما شافاته كيف طالع بالعربي..
زي ماذاب قلبه وهو يشوف في جمالها اللي زاد بريقه بفستان الزفاف..
بس المشكله ان الكلام ولد البندار اللي قاعد في عقله كدر فرحته بيها..
حاول يكون هادي ع قد مايقدر..قدملها لين وصل فيها..
حط يده ع خدها وقرب وطبع قبله ع جبينها بعدين قال..
/نخليك تغيري بش نصلوا..
ومشي طول طلع من الدار وسكر الباب وخلاها وهي حاسه ان في شي مش طبيعي..
🌱بدلت ولبست جلباب وشاربه وشخشير "جورب" ومشت لباب الدار فتحاته بدون ماتتكلم..
شويه وهو جاها وكان لابس سوريه عربيه لونها ابيض وشاد في يده صلايه..ابتسملها بعدين خش وهي وراه..
صلوا ركعتين بعدين التفت عليها وقربلها..حط يده ع جبهتها وبدي يقول في الدعاء وبعد كمل خدي يدها وقعد يتأمل في الحنه وهي تتأمل فيه هو..
رفع عيونه فيها وقال بإبتسامه..
/بنسألك سؤال ونبي اجابه صادقه..
هي بإستغراب قالت..
/اسأل..
عقد حواجبه وضيق عيونه وهو يقول..
/في حد من بن عمينك كان حاط عينه عليك!؟
رفعت حواجبها بعدين نزلتهم وقالت..
/ولد عبد العزيز البندار خطبني اكثر من مرة واني رديته..
قعد يشوفلها وهو ساكت..
هي عقدت حواجبها بإنزعاج لما شافت نظرات الشك في عيونه فكت يدها منه وقالت بجديه..
/تقدر تسأل من تبي بش تتأكد اني صادقه في اجابتي..
خدي ايديها الزوز بيشدهم هي جت بتجبدهم وهو شدهم بقوة وقال بضحكه..
/خيرك حمقتي!
بضيق وازعل قالت..
/انت في من مسمعك كلام خلاك تشك فيا حتى كلامي ماصدقتاش..
ضحك وقال..
/لاشاك فيك ولامكذبك اني سألت بش يطمن قلبي..زي مادار سيدنا ابراهيم وين قال لربي ارني كيف تحيي الموتى ماكانش شاك في قدرة الله سبحانه وتعالى ع حاجه زي هادي بس كان يبي يشوف بعيونه بش يطمن قلبه..
كانت تسمعله وهي مسحورة بيه بأسلوبه بنبرته الواثقه الهاديه بنظراته الحلوة الراكزة..ابتسمت وقالت..
/باهي قولي شن سمعت ومن مني!؟
قاللها:مش مهم خلاص انسي..وتوا خليك معاي بس..حط يده في جيب السوريه العربيه وطلع الخاتم..مدهولها وقال..شوفيه..
خدت الخاتم وهي تشوفله بإنبهار..
بإبتسامه قال:شوفيه من داخل..
شافت للخاتم من داخل ضحكت وقالت..
/فريحة تسعة..
قاللها:اول مرة شفتك فيها اظني انتي ماتتفكريهاش كانت في الجامعة جيتي لمحفوظ ولد عمي وعطتيه كتاب..
بضحكه اندهاش قالت..
/قول والله!
ضحك وقال..
/كنت واقف معاه انتي ماشفتنيش بكل وقتها..
بضحكه قالت..
/ماركزتش ومانذكرش ان في حد كان واقف عليه..
ابتسم وقال..
/اني يومها ركزت ومن بعده ماقدرتش ننسى..
بدت ع وجهها ملامح الهويام وهي تشوفله وتسمعله..
وهو مكمل يقول..
/حاولت نتخطى ماقدرتش قلبي اللي راح مني هداكا اليوم لقيته عندك..لقيت روحي نمشي للجامعه كل يوم بش نشوفك..في عقلي في كل وقت نفكر فيك..قلت ياتسعة مافيهاش كيف البنت هادي زي ماملكاتك لازم تملكها وبديت نخدم ع الخاتم هدا اللي نويت بعد نكمله نخطبك طول..
بضحكه وعيونها يلمعوا بالدموع قالت..
/كنت واثق هلبه انك حتاخدني..
قاللها:لإني عارف روحي مافيش حاجه سعيتلها الا وصلتها وهدا من فضل الله عليا..
ابتسمت وقالت..
/حتى اني ربي فضل عليا هلبه لما خلاني نصيبك..
ابتسم وهو يتنهد من قلبه..بعدين خدي منها الخاتم بلطف وخدي يدها اليمين ولبسهولها..رفع يدها طبع عليها قبله بعدين قال..
/ردي بالك تحوليه...
🌿في نفس الوقت اللي صار فيه هدا كله..
كانت زكيه ماشيه مع نزيهة وهانيه واسيا وبلقيس لديارهم بش يرقدوا..
هانيه:اليوم كلهم هبلوا في قفطاني..
زكيه قالت بإبتسامه..
/انتي حلتيه بنيتي..
هانيه بضحكه:طالعتلك ياريلة سلامة..
ضحكت زكيه ونزيهه يدوب ابتسمت..
اما آسيا وبنتها كانوا يراجوا امتى يوصلوا لجناحهم واخيرا وصلوله..قالوا..
"تصبحوا ع خير"
ردوا عليهم نزيهه وزكيه لكن هانيه قعدت ساكته..
وكملوا الثلاثه طريقهم لعند ماوصلت هانيه لدارها قالتلهم..
/تصبحوا ع خير..
ومشت خشت دارها وهي تسمع فيهم يردوا عليها بعدين كملوا طريقهم لين وصلوا لجناح نزيهه..
زكيه قالت لنزيهه..
/باتي عندي..
نزيهه:مانبيش نضايقك عمتي..
وقفت زكيه ونزيهه وقفت قدامها..
حطت زكيه يدها ع ذراع نزيهه وقالت..
/خشي لجناحك بدلي وتوضي واستقبلي القبله وصلي وادعي وفضفضي لربي..بعدين خودي المصحف واقري منه لين ترتاحي بعدين تعالي باتي حداي..
شدت نزيهه دموعها بقوة وهي تقول بإبتسامه..
/حاضر عمتي..
قدمت زكيه لكنتها وباست راسها..
نزيهه تأثرت هلبه ودموعها نزلوا غصب عنها وحتى هي كبت ع راس عزوزتها بعدين مشت بسرعه خشت لجناحها..
تنهدت زكيه بألم وقالت..
/ربي يبرد قلبك..
🌱ونزيهة اول ماسكرت الباب انهارت بالبكي،اللي كمداته كله طول ايام العرس طلعاته توا..
قلبها كان محروق بنار الغيره هالنار اللي شعلت في كل جزء فيها لما شافاته لابس العربي كانت تموت عليه بزياده وين تشوفه لابسه وتقعد تتملى منه بنظرها.
راجلها اللي تحبه حب كبير الليله ولى راجل وحدة تانيه غيرها ومرات تولي ام صغاره والحب والتقدير كله يولي ليها هي بس..
اكثر شي كان كاسر نزيهه هو انها ماجابتش صغار لتسعة حتى وان كان مافيهاش عيب لكن تأخير الانجاب يخليها معيوبه في نظرها هي قبل الناس..
وصعب هلبه ع المراة تشوف روحها ناقصه قدام راجلها يابالك لو كانت تحبه بشده زي نزيهة..
وتوا جتها ضرة تشاركها فيه والمؤلم لحد الموت ان قلب راجلها عند ضرتها هادي..
وهي تبكي بألم حولت خاتم الياقوت وشافاته من داخل شافت اسمها المربوط بإسمه وتفكرت كلامه يوم هداهولها..
ضمت الخاتم لقلبها وغمضت عيونها بشده وقالت بنبرة ألم..
/ياربي برد ع قلبي يارب..
🌱ونفذت نزيهه نصيحة عزوزتها وارتاحت نفسها،وقلبها هدي شويه..بعدين طلعت من جناحها وتوجهت لجناح عزوزتها
▪▪▪▪▪
"ياريته حالي من حالك ياعمتي ع الاقل عمي يحبك انتي والحاجه هادي باينه في عيونه زي ماباين في عيون تسعة حبه لفريحه"
زكيه كانت تسمعلها بحزن ودموعها في عيونها..
نزيهه وهي تشوف للفراغ قالت..
/ماعندي مانقول ولافي يدي شي نديره..من الاول كنت عارفه ان الشي هدا بيصير وتسعة ليه عذره لأمتى بيقعد يراجيني لين ندير صغار! ولاعمي اللي ملهوف يشوف حفيده لعند امتى بيقعد يتلهف ويراجي حتى هو!؟..ان شاء الله عن قريب تحمل فريحة وتفرحهم وتريح بالهم..
زكيه فتحت ايديها وقالت..
/تعالي بنتي تعالي..
خشت نزيهه في حضن عزوزتها وزكيه ضمتها وهي تقول..
/كان قعدتي تفكري هكي حتقعدي عند ولدي صاحبة قدر كبير وعالي والكل في الكل..انتي الاولى يانزيهه خليك ديما الاولى في كل شي في حوشك وبين ناس الالف والخمسين انتي المراة الاولى لتسعة سلامة اللي ان شاء الله بعد عمر طويل يخلف بوه في كل شي لازم تكوني كبيره زيه..المراة اللي تناسبه واللي من غيرها ينقصه هلبه..
ابتسمت نزيهه براحه وقالت..
/حاضر عمتي..

يتبع....