في كوجينة القصر الكبيرة والواسعة...
كانوا الزوز مقعمزات ع الطاوله وعيونهم ع الشاشه يتفرجوا ع برنامج طبخ ووحده فيهم شاده كراسه وتكتب فيها الوصفات والطريقه..
ويقطع عليهم انسجامهم واحد خش عليهم وهو يقول بإبتسامه..
/يعطيكم الصحة..
شافوله بإبتسامه وقالوا مع بعض..
"الله يسلمك"
بإبتسامه قال..
/بالله هنادي ديري قهوة وجيبيها لمكتبة هشام.
قالتله بإبتسامه:حاضر سيدي..
قال:يحضرلك الخير..ومشي طلع..
كيف جت هنادي بتنوض خش واحد تاني وهو يقول..
/ربي يعاون..
ردوا عليه..
"تسلم"
قال بإبتسامه:تعويضه جايين جماعتي يتغدوا هني..
قالتله:دايرين بزايد..
قاللها:طالبين مترودة راهو..
بضحكه قالت..
/احلى مثرودة للحكومه وجماعة حكومه..
ضحكت هنادي وهو قال بإبتسامه..
/علميها لبشرى..
قالتله بإبتسامه:حاضر..
مشي طلع من حداهم وهو يقول..
/يحضرلك الخير..
تعويضه:ربي يعطيهم ع قيس نيتهم هو وابله بشرى..
هنادي وهي طيب في القهوة قالت..
/آمين..
ويخش عليهم واحد لما شافوه تفاجئوا وهو قال بضحكه..
/شن جو..
هنادي بضحكه:عاش من شافك سيدي وسام..
تعويضة:وينك وين هالغيبه؟
خدي تفاحه واتكا ع الدولاب وهو يقول..
/شن اخباركم..
ردوا عليه بأصوات متقطعة..
"الحمد لله..لاجديد"
كلي من التفاحه بعدين قال..
/مافي حد؟
تعويضه:اللات والكناين عدوا مع سيدي تسعة لسرت بيش يحضروا فرح غادي..
قال:امم...
هنادي:والابلات اللي في القرايه واللي في الخدمه ماعدا ابله هدى مشت لحوش سيدي مرعي..
تعويضه:ياريتك خبرت قبل لتجي..
ابتسم بأسف وقال..قبل نبي نفاجئ امي..لكن سيدكم تسعة زي عادته خربها..
شافوا تعويضه وهنادي لبعض وهو قال..
/هنادي ديريلي شاهي اعشاب وبعد توتيه رني تو ننزل ناخده ومشي طلع من حداهم..
هنادي:باينه كان ناوي يدير دعكه..
تعويضه:يدير مايدير اللي يبيه سيدي تسعة هو اللي ماشي..
هنادي:هو كويس لولا هالبلي اللي ربي بلاه بيه..
تعويضه:كلهم كويسين لكن خيرتهم اشرف وهشام..
هنادي:صدقتي وهما دون خوتهم بختهم بالهون..
"خيرات ياحلوات"
ضحكوا وهما يشوفولها كيف خاشه وردوا عليها..
"خيرات"
قعمزت ورا الطاوله وقالت..
/الله ع الروايح الله..مش عارفه كيف بيكون شكل حياتنا من غيركم ياغزالاتي..
ضحكوا وهي قالت بضحكه..
/هنوده احسبي قيسوا في القهوة..
بلهفه قالت..
/قيس روح؟
تعويضه فنصت فيها..
وبلقيس قالت وهي رافعة حواجبها..
/ايه روح ياحنة روح وقال يبي قهوة..
هنادي بضحكه فرح..
/من عيوني..
وتعويضه عيونها قريب طلعوا من التفنيص وهنادي ولامعبرتها وبلقيس تمرر في نظرها بيناتهم وهي تضحك بصمت..
