■■■■■■■■■■■■■■■■■■■■
🌿 "الإنسان هو مخلوق متعدد الأبعاد ؛ يتألف من جوانب متضادة ومتناقضة، فهو قادر على النبل والخسة في الوقت نفسه."
دوستويفسكي🌿
••••••••••••••••••••••••••••••••••••••••••••••••••••••••••••
في حجرتها في المشفى..
كانت مقعمزة تسمع من ضرتها عن اللي صار بالتفصيل،بعد ماكملت الضرة كلامها هي قالت..
🌱ربيعه:عمتي ماعليهاش لوم لادوا عليها وعبولها راسها نشوف ياحسناء وملاحظه كويس كيف تتعامل معاي مرة تولي باهيه ومرة تنقلب..
حسناء:مع هذا تتحمل جزء من الذنب معاهم..
ربيعه:هديكا هانيه شن صار فيها؟
حسناء:دارت حاله لما تسعه خدي منها فداء وروحت تاني يوم وهي تبكي وامها تبكي معاها..
ربيعه قالت بضيق..
/فداء حسيتها مهبيه لما نلاعب فيها ماتبيش تضحك ووين جي بوها بيطلع قعدت تبكي تبيه ياخدها..
حسناء قعدت تشوفلها بأسف وهي ساكته..
نزلت دمعه من عين ربيعه مسحتها بعدين حطت يدها ع بطنها وقالت بقلق..
/زعمه حتى هدا يكرهني زيها!؟
حسناء:كيف تكرهك بس البنت مازال بيبي ياربيعه!
ربيعه بحزن قالت..
/مش عارفه ياحسنا مش عارفه من لما جبتها واني هكي حاسه..تنهدت بألم وقالت..يقولوا الحاجه لما تتمنيها هلبه ماتحصليهاش واني تمنيت فداء تعوضني عن فقدي في الخوت والخوات وتعوضني عن فقد امي لكن شكلها هالحاجه مش حتصير..
شدت حسناء يدها وقالت..
/معاش تفكري هكي بإذن الله تكبر وتشوفيها كيف ماتبي..
ربيعه شافتلها بإبتسامه وقالت..
/ويعطيك حتى انتي كان خاطرك في الصغار..
حسناء احمر وجهها وضحكت بإرتباك..
ربيعه وهي مبتسمه..
/واضح عليك من اول مرة ريتك فيها بعد روحتوا عيونك فرحانات..
نزلت حسناء عيونها وهي مبتسمه بخجل..
وربيعه ضحكت بعدين قالت..
/ربي يهنيك معاه ويعطيك الذريه الصالحه..
حسناء شافتلها وقالت بضحكه استغراب..
/غريبه انتي بجديات!
ربيعه قالت بضحكه..
/ع خاطر دعيتلك بالهني !؟ راجلك قبل ليولي راجلي راهو..
ضحكت حسناء وهي تحرك في راسها يمين يسار..
وربيعه هدت ضحك بعدين تنهدت بضيق وقالت..
/منظر صاحبتي وهي طالعه من القصر هداكا اليوم الاغبر قاعد بين عيوني..عرسها الاسبوع الجاي مسكينه تنكدت في جرتي..
حسناء قالت..
/فعلا والله موقف صعب ومهين هلبه..
ربيعه قالت بضيق..
/لين خلاص..في بالي حاجة شن رايك نمشولها اني وياك وناخدوا معانا بلقيس نعتذرولها ونطيبوا بخاطرها هي وماليها،اكيد عرفوا باللي صار معاها ووجعهم زيهم زيها..
حسناء:مفروض عمتي تمشي تعتذر لكن لأن الحاجه مستحيله نمشوا حني وخلاص..
هزت ربيعه راسها وقالت..
/شوفي بلقيس كان قالت باهي قوليلها قالتلك ربيعه كان فيها كيف تطلع للسوق تشري حاجات نخشوا بيهم عليهم دبش وحاجات هكي..
حسناء قالت بإبتسامه..
/نطلع اني وياها غير اعطيني المقاسات كان تعرفيهم...
🌿وتاني يوم..
طلعوا بلقيس وحسناء للسوق وخدوا ملابس وحاجات تانيه لنوال وامها وخواتها وخدوا هدايا تانيه منهم هما..
🌿في الوقت اللي كان فيه تسعه مع جمال يتابع في اخر مستجدات الجريمه اللي صارت في حوش عصمت..
عصمت اللي كانت مرواحتها في نفس اليوم ولما وصلت في حوشها تلقتها جارتها وخبرتها عن اللي صار بالتفاصيل..
🍃عصمت بصدمه..
/ياربي ياربي! قولي تبصري بالله عليك!
جارتها قالت بقلق..
/فرقة بصارتي ياعصمت..
عصمت وهي مصدومه وخايفه قالت..
/باغبارتي غبارة..! غير راجي قلتي البي تسعه جي هني هديكا الليله!؟
قالتلها؛ايه وكان باين عليه خايف هلبه لدرجة عرى وجه البنت بش يشوفها لما طلعوها لسيارة الاسعاف..عصمت ناضت وهي تقول بخوف..
/بالله عليك خليني نستعمل الهاتف..
الجاره بقلق قالت..
/ايه ايه بري..
مشت بسرعه للمكان اللي فيه الهاتف وجارتها ناضت ولحقتها...
🍃"واضحه طليقها خش عليها وقتلها"
جمال:مانتأكدوش من الحاجه هادي الا بعد مايشدوه ويعترف..
تسعه بقلق قال..
/علاش مصر ان اللي دار هكي كان ناوي ربيعه!؟
جمال قال..
/مش مصر ع شي يابيي نبي نتأكد بس..
تنهد تسعه بقلق وهو يمرر في نظره ع الطريق..
جمال شافله شويه بعدين قال..
/ماتشغلش يابيي اني ورا الموضوع وشن مايصير نعطيك بيه علم..
تسعه وهو يشوفله قال..
/نبي نعرف كل شي بأدق التفاصيل مادرق عليا شي ياجمال..
هز جمال راسه وقال..
/حاضر..
🌿🌿🌿🌿
ع سريرها في دار النوم مقعمزة..
طارحه قدامها فساتين بنت خوها وشاده في يدها لعبه ليها بنت خوها تحب تلعب بيها هلبه..
كانت تتأمل فيها والدموع مابطلوش نزول من عيونها..
ليها يومين ع هالحاله حتى لخدمتها مابتش تمشي وحالها هدا واجع قلب زوجها ومخوفه عليها..
..وهو واقف قدام باب الدار كان يشوفلها بحزن وألم بعدين قدملها قعمز جنبها ع السرير وضمها لقلبه وقال..
/شن رايك نكفلوا يتيم ونديروه ولدنا..
وهي تبكي قالت..
/نبي فدو اني..
معمر قال بألم..
/باهي نجيبوا بنيه مش ولد..
بنبرة ألم قالت..
/يامعمر اني مش قادرة نعيش من غير فدو حاسه روحي راحت معاها..
زاد ضمها وباس راسها بعدين قعد يطبطب عليها بدون مايتكلم..
🍃قعد معاها لين رقدها بعدين من جنبها بش يدير اتصال بتسعه..
▪▪▪▪▪▪▪
"امها الفترة هادي تعبانه وتبي البنت تقعد معاها"
معمر:كيف بتعانيها وهي تعبانه!؟
رفع تسعه حواجبه وقال..
/والله البنت بنتها تعانيها شن ماكانت حالتها..
غمض معمر عيونه وفتحهم ومسح ع لحيته وهو يقول..
/اسف..لكن وضع هانيه صعب هلبه ياتسعه لاتاكل لاتشرب لاتبي تطلع من الحوش ماغير راقده وهي تضبط في حوايج فداء وتبكي عليها..حتى حاولت نقنعها بحكاية كفالة اليتيم رفضت تبي فداء بس..
تسعه قال..
/لازم ديروا حل للوضع هدا البنت عندها أم وليها كل الحق فيها..
معمر شاف لتسعه شويه بعدين قال..
/عندك حق عندك حق..آسف اللي خديت من وقتك..
تسعه هز راسه بعدين ناض وهو يقول..
/تو نقول لأمي تجي تقعد معاها يومين تلاته طبعا من بعد اذنك..
معمر وهو نايض معاه قاله..
/ياريت والله..
🍃ومشي سقد تسعه بعدين رجع يشوف مرته لقاها قاعده راقده طبع قبله ع جبينها وولى طلع من الدار وهو يفكر في سؤال يدور في عقله..
شن اللي صار بين هانيه وخوها مخليه واخد منها هالموقف!؟
🌿🌿🌿🌿🌿
"ياريت ماتجيبلهاش سيرة الجريمه تعرفي هي حامل والرعاش مرات يديرلها شي لاقدر الله"
عصمت قالت بضيق..
/باهي ياللا بلقيس باهي..بالسلامه توا..
"بالسلامه"
نزلت عصمت السماعه وهي تفكر بضيق ممزوج بالغضب بعدين التفتت ع جارتها وقالت..
/بنخلي حاجاتي عندك، عندي مشوار بنديره..
جارتها قالت..
/حتى كان تبي تباتي عندي الليله مش مشكله..
هزت عصمت راسها وقالت..
/بارك الله فيك..
🌿وطلعت عصمت من حوش جارتها ومشت طول للمشفى..
🌱"مافي شي صدقيني انتي عارفتيني لما نحمل نتعب هلبه"
عصمت وهي رافعه حاجبها قالت..
/باهي باهي زي ماتبي..المهم توا امتى تطلعي؟
ربيعه قالت..
/غدوة ان شاء الله..ايه بنقولك عرس نوال الاسبوع الجاي خاطرها تحضريه لكن قالت مرات بسبب حالة الوفاة ماتقدرش تجي..
عصمت ضيقت عيونها وقالت..
/الراجل عمره فوق الميه مانعرف عنه شي غير انه عم بوي الله يرحمه وخلاص ماعندي علاش نحزن..
ضحكت ربيعه..
🌿وتطلع ربيعه تاني من المشفى برفقة ضرتها وحماتها ومعاهم عصمت وع طول خدتهم بلقيس وتوجهت بيهم لحوش نوال وسيارة حمايه مرافقتهم..
🌳في حوش نوال..
في وحده من الديار كان في بنيه عمرها 17عام مقعمزة ع الارض طارحه كتاباتها وشاده في يدها كراسه تكتب فيها وهي تقرا بصوت عالي..
سمعت باب الحوش يدق قالت بإستغراب..
/مسرع!!
حطت الكراسه والقلم وناضت خدت شاربتها من ع العلاقه لبستها ومشت طلعت من الدار..
🌿وصلت في باب الحوش الخارجي وقالت..
/شكون..
"افتحي اني ربيعه يافدوى"
ابتسمت فدوى وفتحت الباب طول وتتفاجئ بالناس اللي جايه مع ربيعه..
كلهم قالوا..
"السلام عليكم"
هي ردت:وعليكم السلام..تفضلوا تفضلوا..
خشوا كلهم وربيعه تقول..
/يزيد فضلك..شن مالا مافي حد فالحوش؟
سكرت فدوى الباب وهي تقول..
/كلهم مشوا بياخدوا دبش للبنات ع خاطر العرس..تفضلوا تفضلوا علاش واقفين..
حولوا من رجليهم وخشوا معاها داخل الحوش..
ربيعه:وانتي خديتي ولامازال؟
فدوى قالت بضحكه..
/خديت خديت لكن والله ماوقته عرسها اختي هادي
ربيعه ضحكت وقالت..
/جاك مع امتحانات الشهاده..
فدوى:متاعينها ناس مزبكه هما اللي حددوا الموعد وسكروا رووسهم عليه..
عصمت قالت .
/نعرفهم ناس متحكمين وواعرين..
فدوى:قلنالها لكن هي تبيه وشاده فيه ماعندنا مانديرولها..
ربيعه:هو كويس راهو..
فدوى:ان شاء الله يقعد هكي ومايغيروشي عليها..شافت لحسناء وبلقيس وهي تقول بإبتسامه..ماعرفتيناش؟
ابتسموا وربيعه قالت بإبتسامه وهي تأشر عليهم..
/هادي بلقيس حماتي..واللي جنبها حسناء وحده من زوجات البي تسعه..
ابتسمت حسناء وهي تشوف لربيعه وفدوى قالت بإبتسامه..
/آنستوا..
ردوا عليها يقولوا..
"الله يآنسك"
عصمت قالت..
/امتى يروحوا؟
فدوى قالت..
/والله مانعرف ان شاء الله مايطولوش..نستأذن شويه وجايه..
ومشت فدوى من حداهم ربيعة شافت لعصمت وقالت..
/ان شاء الله مايعطلوش..
عصمت:ان شاء الله..
بلقيس:امورة اختها هادي..
ربيعه قالت بإبتسامه..
/ومحترمه ومؤدبه العيله كلها ماشاء الله عليهم..
هزت بلقيس راسها وهي مبتسمه..
🌿وضيفتهم فدوى وقعمزت هدرزت معاهم وبعد عشرة دقايق خشوا امها وخواتها وتفاجئوا بيهم لماشافوهم..
▪▪▪▪▪▪▪▪▪
"والله من هديكا الليله معاد عرفت نرقد زي الناس"
حسناء:عندك حق الموقف صعب هلبه ومهما اعتذرنا مانقدروش نسوك فيه لكن نبوك تتجاوزي اللي صار وتفرحي بعرسك وصاحبتك معاك..
ابتسمت نوال وقالت..
/مش غير هي بس والله نفرح بجيتكم حتى انتم..
بلقيس قالت بضحكه..
/مش حنقول لا خاطري في عرس الحق..
ضحكوا وقالت حسناء بإبتسامه..
/ان شاء الله..
ابتسمت نوال بإمتنان وربيعه تشوفلها بإبتسامه بعدين غيرت عيونها عنها لما قالتلها ام نوال..
/والله ماليه لزوم اللي جبتوه معاكم..
ربيعه:ماديرنيش برانيه ياخالتي،نوال وخيتي ونبي نفرح بيها زيها زيك انتي والبنات دايرتكم ماليا اني..
ام نوال قالت وهي مبتسمه..
/ربي يعطيك ع قيس نيتك يابنتي ويفرحك بضناك..
ربيعه من وسط قلبها قالت..
/آمين..
🌿ويروحوا وربيعه نفسيتها مرتاحه ع الآخر..
حطتها بلقيس في حوش الحاجه ذهيبه وين ماكان تسعه قاعد يراجي فيها...
🌱"والله هدا وين تريحت"
تسعه وهو مبتسم قال..
/شن ماتبي صاحبتك لعرسها قوليلي بس..
بضحكه قالت..
/ربي مايحرمني منه اللي ديما رافع شاني ومعلي قدري..
باس ع راسها وقال..
/ولامنك ياغاليتي..
🍃وفي مكان تاني بعيد عنهم..
وين ماقاعده شريكتها الكبيره نزيهه...
كانت مقعمزه في جنان فيلا اهلها وهي سرحانه بتفكيرها وامها تراقب فيها..
من اول ماجت قالتلهم ان جيتها تغييرة جو مش اكثر وامها وخواتها سايروها ومابوش يضعطوا عليها بالأسئله لأنهم شافوا الحزن في عيونها..
لكن اليوم امها قررت تحكي معاها بعد ماشافت انها من الضروري تعرف حقيقه اللي صاير مع بنتها بش تساعدها..
...مشتلها وقعمزت حداها وهي تقول..
/نزوهه بنيتي..
شافت نزيهه لأمها وقالت..
/نعم يام..
قالتلها:احكي بنتي احكي قولي شن صاير معاك..
تنهدت نزيهه بضيق وقعدت ساكته..
امها شافتلها شويه بعدين قالت..
/شن صاير بينك وبين راجلك؟
نزلت دمعه من عين نزيهه مسحتها بسرعه..
امها قالت بحزن..
/بنيتي قولي الحق..
"نادمه اللي خديتي تسعه؟"
قلبها دق بقوة لما سمعت اسمه والسؤال متاع امهاقبضه واللي حساته خلاها بتلقائيه ترد عليها..
/بكل والله عمري ماندمت ولاحنندم..
امها قالت..
/باهي اني مانبيكش تحكي اللي صار لإني شبه عارفه الاسباب وهدا المهم عندي..شوفي بنتي انتي مراة مليون راجل يتمناك ومليون راجل يحسد في راجلك عليك اذا بوك رحمة الله عليه واني حاسدينا اللي عندنا بنيه زيك انتي مراة حقانيه متعلمه وناجحه وليها قدرها وقيمتها وراجلك عارف هدا كله كويس هدا علاش قاعد يدعم فيك ويكبر فيك وزادك قيمة ع قيمتك..سلم بنتي حكمي عقلك وخليك مراة رزينه وديما متعليه ع الحاجات الصغيره حركات النساوين الفارغات مش ليك بنتي انتي اكبر من هكي..ماتنزلي نفسك لحد ولاتحطي راسك براسه بش ماتوليش زيه..حافظي ع مكانتك وخليك عمود لعيلتك وخليهم يحطوك في مكانه بروحك ماتتساوي فيها مع حد..بالذات راجلك يابنتي..
ابتسمت نزيهه من بين دموعها بعدين ضمت امها وامها حضنتها وهي تقول..
/ربي يرضى عليك ويهدي سرك ياوديدتي..
🌿واللي داراته ام نزيهه دارت زيه ام فريحه بعد ماعرفت بتفاصيل اللي صار من بنتها..
🌱"فكك من الغيرة الغبيه هادي ماتكسبي من وراها شي بالعكس تخسرك اهم شي محبة راجلك ليك..حطي عقلك في راسك سلم بنتي وعيشي زي قبل مراة راده بالها من راجلها وصغويرتها خلي علاقتك مع الكل كويسه واللي بيجيك من وراه المشاكل تجنبيه..ردي بالك مادام راجلك دار هكي المرة هادي معناها كان عاودتي صنعتك هادي يطلقك طول..
حطت فريحه يدها ع قلبها ودموعها ينزلوا..
امها تابعت تقول..
/خليك فالحه كبري عقلك وارزني واقعدي مسيطره ع قلب راجلك صدقيني مافي وحده من ضرايرك تقدر تولي خير منك مدام قلب تسعه معاك..
تنهدت فريحه وهي تهز في راسها بالموافقه ع كلام امها وتمسح في دموعها..
🌿🌿🌿🌿🌿🌿
"سعدودك بصاحبتك هادي يانوال"
نوال وهي تشوف في الحاجات اللي خدتهم ربيعه قالت بإبتسامه..
/ايه والله ماكنتش غالطه لما تعاركت مع بوي ع خاطرها..
امها قالت بضحكه..
/من بكري وهو يشكر فيها ويدعيلها..
ضحكت نوال..
فدوى وهي شاده كتابها قالت..
/وحده تانيه مكانها راهو اول حاجه دارتها بعد تزوجت مسحت ماضيها كله بمساحه ونست الناس اللي كانت تعرفهم ولاكأنها عرفتهم..
نوال:ديما نقوللكم فيها ربيعه بنت أصل..لكن مسكينه حظها بالهون..
امها قالت..
/والله بعد اللي حكتيلي عليه سخفتني هلبه وقلت ياريتها خدت واحد من ثوبها خيرلها..
فدوى:صح حتى اني هكي فكرت التكافؤ الاجتماعي لازم منه في الزواج بش ينجح..
امها قالت:شن هو؟
نوال بضحكه:زي الكلام اللي قلتيه يام قبل شويه غير بنتك تعرفيها تحب تتفزلك..
ضحكت فدوى ورجعت شافت لكتابها...
🌿🌿🌿🌿🌿
مقعمز في حديقة القصر شاد كتاب يقرا فيه بإنسجام لكن هالانسجام انقطع لما سمع صوت بكاء اخته..
التفت شافها جاياته تجري..
وصلت فيه وقفت قدامه وقالت ببكاء..
/معاذ قالي بابا لز ماما من تحت راسك..
هشام غمض عيونه بنفاد صبر بعدين فتحهم وقال..
/قعمزي..
قعمزت كريمه وهي تقول..
/حقه ماما تو بتبدا تكرهني ومعاش تحبني بكل!؟ بألم قالت..اصلا هي ماتحبنيش من قبل..
هشام قال..
/ماتقوليش هكي حناي تقول مافيش ام تكره صغارها..
كريمه:باهي علاش ماديرش معاي زي مادير معاكم تقوللكم في كلام حلو وتضبط فيكم،ع خاطر اني مش شاطرة زيكم ولا فاشله زي ماهي تقول؟
هشام قعد يشوفلها وهو يفكر في الاجابه بعدين قال..
/شن رايك نمشولها كلنا غدوة؟
كريمه قعدت ساكته وهي دمع..
هشام ابتسم وقال..
/نمشوا الصبح نشرولها هدايا بعدين نمشولها واني نقول هادي فكرة كريمه..
كريمه بدهشه:حي! اول مرة تكذب!؟
ضحك هشام وقال..
/هادي كذبه حلوة فيها خير الكذب الحلو هدا عادي..
ابتسمت وقال..
/باهي..
ويسموا خطوات رجلين تجري التفتوا وشافوا اروى جايه مع فاضل واشرف..
وقفوا قدامهم واشرف قال..
/حقه امي معاش تروح بكل؟
بإمتعاض قال..
/معاذ قالها؟
اروى وهي تبكي قالت..
/ايه..وقال معاش بنشوفوها بكل من تحت كريمه..
كريمه ولت تبكي مرة تانيه..
هشام قال بشي من الغضب..
/الكلام اللي قاله معاذ كله كذب معاش تصدقوه امي فريحه وامي نزيهه ماشيين زياره وتو يروحوا..
فاضل قال..
/وامي ربيعه؟
هشام قال..
/ايه حتى هي..
اشرف قال..
/معاذ قال معاش بتعيش هني..
هشام بإمتعاض قال..
/نقوللكم حاجه بروا حرشوا فيه سلامه بروا..
انطلق فاضل يجري وهما لحقوه وقعدت كريمه بس مع هشام..
هشام مسح دموعها وقال..
/تي خلاص معاش تبكي يابكايه فكري في مفاجأه غدوة بس..
كريمه قالت بنبرة بكاء..
/بابا يخلينا؟
هز راسه وقال..
/ايه يخلينا..
🍃ويعلق سلامه ع معاذ ويعطيه طريحه خلاه يبكي بدموعه وهو يقول "والله معاش نعاودها"..
اما هشام اتصل بهاتف حوش ذهيبه وردت عليه ربيعه هدرزوا ع بعض شويه بعدين خلت بوه يكلمه وتسعه بعد سمع منه طلبه وافق فورا وقال..
"قول لخوتك يمشوا لأمك فريحه"
🍃وأمه كانت مع ربيبتها في فيلا اخته هانيه..
زكيه قلبها تقطع من البكي ع حال بنتها وكذلك بلقيس اشفق قلبها هلبه ع اختها ووجعها حالها..
قعدت عندها لقبل المغرب بعدين روحت القصر واختها قاعده بين عيونها..
لهذا قبل لترقد اتصلت بالحوش اللي قاعدين فيها خوها وربيعه وعزمت نفسها ع الفطور عندهم تاني يوم..
🌿🌿🌿🌿
الساعه العاشرة صباحا..
فتح البواب باب الحوش وخشت سيارة بلقيس..
جمال اللي كان مقعمز بروحه في جنان الحوش وهو يقرا لما شاف سيارتها خاشه قعد يراقب فيها لعند مانزلت منها ونزلت ولدها معاها وهي حاملاته مشت للباب الخلفي فتحاته وطلعت منه كيسه بعدين سكراته بذراعها وهي تسكر فيه عيونها جو ع جمال هو فيسع غير عيونه..
ابتسمت وقالت بصوت عالي..
/صباح الخير..
هو شافلها بعدين هز راسه ردا عليها..
هي ضحكت ومشت وهو قعد يتبع فيها بعيونه لين خشت..
🍃داخل..
استقبلتها مرت خوها ودخلتها للصالون اللي كان مقعمز فيه تسعه يلاعب في بنته..
نزلت ولدها مشي يجري لفداء وهي مشت لخوها سلمت عليه..
🍃وبعد ماتبادلوا الاحاديث الممتعه اللطيفه وفطروا فطورهم فتحت بلقيس الموضوع اللي جايه ع خاطره..
🌱بلقيس:والله مقدرة موقفك هلبه وعاذراتك لكن لو تشوفي للوضع بنظرة تانيه..هانيه انحرمت من نعمة الذريه بالمرة عمرها ماحتولي ام وراهو الحاجه هادي واعرة هلبه هلبه ياربيعه جربي تحطي روحك في مكانها شن تحسي؟
تسعه قال..
/ماهو من البدايه عطتها البنت مرة وحده وبدت تشوف فيها ع فضوة هانيه ومزاجها احيانا قريب عام كامل يابلقيس عام كامل وحده تانيه غيرها كانت حطت مرت خوها هادي ع راسها من فوق لكن اختك شن دارتلها في المقابل!؟ راهو كله وصلني يابلقيس كله وردي بالك تفكري ان ربيعه عاودتلي حاجه ياما صار سكتت عنه ربيعه ويخي حتى بعد اللي داروه معاها اخر مرة مازال دورلهم في اعذار..بعد هدا كله ياريتهم يقدروا شويه للأسف شافوا اللي هي دير فيه ضعف وتنازل وعفسوا عليها وحال زي هدا لايمكن نرضاه لمرتي يابلقيس..
ربيعه وهي تسمع فيه كان حاسه بضيق شديد وعيونها المدمعه يشوفوا لبنتها بحزن وهي تلعب مع ولد عمتها..
بلقيس:معاك وعندك حق في كل كلمه قلتها لكن علاش ماتقولش انها بعد العقوبه هادي عرفت غلطها واكيد حتحصلحه وبعدين ديروا بيناتكم اتفاق..قسموا بينكم ايام الاسبوع نص الاسبوع تقعد عند ربيعه ونص الاسبوع عند هانيه ونهار الجمعه هانيه تجينا وهكي تقعد مع الزوز يوم زياده..
تسعه غير نظره لبنته وهو متجهم بدون ماينطق بكلمه بعدين غير نظره لربيعه لما سمعها تقول..
"اقتراحك كويس.."
وتابعت تقول وهي شاده دموعها..
/مع انها واعرة هلبه يابلقيس راهو..ومع ان هانيه وماتواخدونيش في هالكلمه ماتستاهلش لكن اني بندير هكي لله بنجبر بخاطرها للمرة التانيه ومانيش قاهرتها بش مايقهرنيش ربي في باقي صغاري..غير نبيك تفهميهم يابلقيس ان فداء بنتي اني يعني ليا فيها الحق كله..
بلقيس هزت راسها وقالت..
/عندك حق في كل كلمة قلتيها وحاضر تو نوصل كلامك بالحرف..
تنهدت ربيعه بضيق وهي تشوف لبنتها بعدين قالت..
/تو بيبدا عرس نوال طول اسبوع العرس بنخليها عندها..
تسعه قال..
/ربيعه ماتحمليش نفسك فوق طاقتها لو ماتبيش قولي مانبيش ومافيش عليك لاذنب ولالوم..
هي قالت..
/زي ماقلت ياتسعه اني مانبيش نقهرها في حاجه زي هادي بس زي ماقلت الحال اللي كانت دير فيه معاي قبل مانبيشي يتكرر..
قعد يشوفلها وهو ساكت..
وهي هزت راسها تأكيدا عن ان القرار هدا خداته بكل ارادتها..
غير نظره لبلقيس وقال..
/ غدوة بإذن الله نرفع ربيعه لحوش صاحبتها ونمشي معاك..
بلقيس وهي مبتسمه قالت..
/حاضر..وانتي ربيعه ربي يجبر بخاطرك ويفرحك بالبوبو اللي جاي..
ابتسمت ربيعه مجامله وهي تقول..
/آمين..
وحتى تسعه آمن معاها وهو مركز بنظره ع بطنها وع وجهه ابتسامه أمل وشوق..
🌿🌿🌿🌿🌿
ويوصلوا هشام ومعاذ وكريمه ومعاهم ثريا اللي شادتها مجيده لحوش اهل امهم..
حناهم وخالاتهم فرحوا بيهم هلبه بس مش زي فرحة امهم نزيهه اللي ضمتهم واحد واحد وغرقتهم بالقبل وياقداش كانت كريمه فرحانه وامها تحضن وتبوس فيها وخوها هشام يشوف لفرحتها وهو مبتسم..
نزيهه وقتها تجردت من كل المشاعر ماعدا شعور الامومه كانت ماتفكر ولاتحس كان بصغارها..
لكن كان في من يبي يجردها من هالشعور اتجاه احدهم..
▪▪▪▪▪▪▪▪
"بنتك كريمه يااللا مش عارفه كيف شافتنا ومشت طول عاودت لللا حسنا"
نزيهه بصدمه..
/كريمه!
هما كانوا يتكلموا في ممر يرفع للصاله المجتمعين فيها عيلتها مع صغارها..وواحد من صغارها طلع وسمع كلام مجيده ومع الأسف اكد عليه..
"ايه يما اني سمعت سلامه وهشام يحكوا عليها قالوا كريمه شافاتك مع هادي.."
واشر بسبابته ع مجيده..
مجيده:هاه ريتي ياللا واللا حسناء قعدت تهدد فيا ياتقولي يانخلي كريمه تقول للبي..
نزيهه وع وجهها ملامح الغضب قالت لولدها..
/ولي قعمز مع خوتك..
معاذ قال..
/حاضر..ومشي ولى للصاله..
نزيهه شافت لمجيده وقالت..
/وكيف مازال قاعده في القصر انتي؟!
مجيده قالت بربكه..
/البي سامحني..
هزت نزيهه راسها وقالت..
/من اللحظه هادي معاش ليا علاقه بيك وردي بالك بعد نروح للقصر تجي تكلميني..
وخلتها ومشت للصاله..
مجيده بكره قالت..
/ان شاء الله يطلقك يالفعه سحقيتكم كلكم مع بعضكم..
🍃في الصاله..
قعمزت نزيهه وهي تشوف لكريمه بغل..
"مش جايه خالتي بدريه؟"
السؤال هدا سأله معاذ وحناه جاوبت عليه..
/خالتك بدريه مسافره هي وصغارها لدبي..
كريمه قالت..
/علاش حنينه؟
خالتها قالت..
/بيصيفوا غادي..
معاذ:حتى حني بنسافروا في الصيف قال بوي..
نزيهه شافت لهشام وهو شافلها وقال..
/الشهر الجاي..
نزيهه هزت راسها بصمت وامها وخواتها يشوفولها..
هشام :ايه حقه جيتنا هادي فكرة كريمه وحتى الهدايا فكرتها..
حناها وخالاتها قالوا..
"سلمها..نجيها ياربي"
كريمه ضحكت بفرح وخجل بعدين شافت لأمها لقتها تشوفلها بنظره اخفت الضحكه اللي ع وجهها وهالنظرة شافها هشام بعدين غير نظره لمعاذ لقاه يشوف لكريمه بمكر وفهم ان معاذ ماضيعش الفرصه كعادته...
🌿وعند فريحه كانت فرحتها ناقصه بجية صغرها لأن كبيرهم غايب..
🌱اشرف:عنده مباراة كرة سلة مهمه يما ماقدرش يجي ع خاطرها..
فريحه قالت بزعل..
/المباراة اهم من امه؟
ضحكت امها وقالت..
/تعرفيه سلومه مايفوتش حاجه فيها ربح وخسارة..
ابتسمت امه وقالت..
/سلامته..
🌿وفي ملعب كرة السله لأحد النوادي..
خشوا الفرق اللي بتتواجه في المباراه الفريق اللي يلعب فيه سلامه ومعاه كريم وفريق تابع لنادي تاني..
وعاد سلامه هو القائد للفريق متاعه بعض ماعطاهم توجيهاته وشجعهم استعدوا كلهم للمباراة بحماس..
🌸وفي صفوف المتفرجين كانت زميلته مقعمزه تتفرج عليه وخالتها معاها..
..عزة:هداكا اللي لابس زي الربطه ع جبهته وقصته نازله ع عيونه..
خالتها قالت بضحكه..
/ايه ريته ريته..واخيرا شفته سلامه اللي واكل ع كبدك وشارب..
عزة قالت بإمتعاض..
/لتوا مش ناسيه شن دار لما جبت الترتيب التاني في الفترة التانيه..
🍀جابت التاني مكرر مع كريم وسلامه شبع فيها شماته🍀
رفعت ايديها وقالت..
/ياربي خليه يخسر ياربي..
وخالتها جنبها تشوفلها وهي تضحك عليها..
🍀وبدت المباراة وكانت المنافسه فيها قويه كل فريق قاعد يعطي اقصى ماعنده والنتيجه كانت متقاربه..
وفي كل شوط كان يتقدم فريق يابنقطه يانقطتين..
بعد نهايه احد الاشواط اللي تقدم فيهم الفريق التاني بنقطه جي كريم لسلامه وقاله...
/خليلي الحشاني تو نعرف كيف نكتفه انت خليك قريب ع السله لين نوصلولك للكورة. سلامه قال..
/تمام..بعدين جمع زملائه وقعد يشرحلهم في خطة اللعب الجديده ومدربهم يسمع فيهم ويعطي في بعض التوجيهات..
وقبل ليولوا لللعب كريم قال لسلامه وهو يضحك..
/قول من في هني!؟ يزة..
سلامه وهو يمرر في نظره ع الملعب قال..
/شفتها..
كريم قال بضحكه..
/جايه ترد الشماته..
سلامه ابتسم بغرور وقال..
/ياقعادها تراجي..
🍀ويرجعوا للعب اخر شوط..
كان اللعب عبارة عن قتال بكرة السله كل فريق يقاتل بش يفوز وفريق سلامه اللي مشوا ع خطة القائد متاعهم ونفذوها بحذافيرها في اخر المباراة بعد ماوصلوا الكرة لسلامه وخداها وحطها في السله صفر الحكم وانتهت المباراة بفوزهم..
اعضاء الفريق انطلقوا جري لسلامه هجموا عليه وهو يضحك..
🌸وعزه في صفوف المتفرجين بتنفجر من الغيظ..
خالتها وهي تضحك قالت..
/افرحيله ولد صفكم هدا..
عزة بغيظ..
/علاش ديما هو احسن واحد علاش!؟ ياربي نشوفه خاسر في حاجه يارب..
خالتها قالت وهي تضحك..
/ياشريرة..
ناضت وقالت..
/هي نروحوا قبل ليشوفني هيا..
ناضت خالتها وقالت بضحكه..
/باهي باهي..
وكيف جايين بيمشوا..
"وزة"
غمضت عيونها بشده وخالتها التفتت شافت للملعب ضحكت بعدين قالت..
/شافك ياعزة..
فتحت عيونها والتفتت شافتله برفعة حاجب..
وهو رفع سبابته فوق وع وجهه ابتسامه استفزاز ويرقص في حواجبه..
قلبت عيونها ومشت وخالتها لحقتها وهي تضحك..
وسلامه بعد مامشت قال بضحكه..
"مختشه"
🌿🌿🌿🌿🌿
تاني يوم بعد العصر...
حلوا تسعه وبلقيس ضيوف ع فيلا معمر الهاشمي وهما جايبين معاهم فداء..
معمر فرح من قلبه لما شافها خداها من بوها ضمها وقبلها من خدها بعدين نادى ع مرته..
شويه وجاته هانيه تجري ووراها زكيه..
صاحت هانيه من الفرحه لما شافت فداء قدمتلها تجري خدتها من معمر وضمتها بقوة وغرقتها في القبل..
وكلهم يشوفولها وهما مبتسمين بتعاطف مع عدا خوها اللي قعد محافظ ع ملامح الجديه..
▪▪▪▪▪▪▪▪
"طيب اصل ربيعه وكرم اخلاقها ونيتها الصافيه عمركم ماحتلقوهم عند حد..ووالله ثم والله لو ماكانتش راضيه ماخليتك مازال تشوفيها الا لما تجي زيارات"
هانيه قالت بضيق..
/علاش الكلام هدا كله شن درتلها اني!؟
زكيه شدت مرفق ربيعه وقالت..
/خلاص ماما خلاص..خوك عنده حق في كل كلمه قالها..
تسعه ابتسم وقال..
/اكيد عندي حق يام اكيد عندي حق..
شافتله امه شويه بعدين ابتسمت..
▪▪▪▪▪▪▪▪
"تبي تركبنا جميله الهانم اذلنا بيها"
زكيه قالت..
/هانيه اشري رضا خوك سلم بنتي مش قادرة تحبيها خلي علاقتك بيها سطحيه..
ضيقت هانيه عيونها وقالت..
/ملاحظاتك ماما غيرتي موقفك من ناحيتها..
زكيه قالت..
/لأن كان غلط يابنتي..الحق اني توقعتها تخلي خوك يطلق نساوينه وتوقعتها تحصلها فيك فرصه ومعاش تخليك تشوفي فداء كان في الزيارات زي ماقال خوك لكن هالمراة زي ماقال هو اصلها طيب يابنتي..
هانيه شافت لفداء وهي تلعب وع وجهها باديه ملامح عدم الرضا..
امها شافتلها شويه بعدين قالت..
/انتي عليك في خوك بس ياماما ..
هزت هانيه راسها بالموافقه ع مضض وامها غيرت نظرها عنها بعدين شافت لفداء وابتسمت..
🌿🌿🌿🌿
وبدي عرس نوال اللي ماغابتش عنه ربيعه..
وطول ايام العرس وهي تعول وتحوس معاهم ع قد ماتقدر بسبب حملها وع قد مادارت فيها ام نوال بش تخليها تقعمز مابتش تسمع منه..
ووسط هالطبقه من مجتمع الالف وخمسين كانت ربيعه معروفه اللا مرت بيي يعني هلبه من ناس من ابناء هالطبقه حيشوفوا فيها فرصه للوصول لبعض متطلباتهم وتسهيل امورهم..
وقعدت كل شويه تشدها وحده اللي تكلم ع فرصة عمل لولدها اللي تطلب منها مساعده ماليه اللي دور ع فرصة عمل ليها هي وربيعه تسمع فيهم وحده وحده وهي تفكر كيف تقدر تساعدهم..
لكن..خلال ايام الفرح سمعت بالجريمه اللي صارت في حوش عصمت..
🍃"كيف ماتحكليش كيف!!؟'
عصمت: تبيني نحكيلك وانتي حامل!؟
ربيعه بقلق وخوف قالت..
/باهي انتي وين قاعده راك تقولي قاعده فيه!!؟
ابتسمت وقالت..
/البي ربي يطول في عمره خدالي حوش في حي اشبيليا وجابلي بنيه جديده تساعدني ودارلي حتى الحراسات..قداش يحبك الراجل يادعوة..
ابتسمت ربيعه بخجل وقلبها يدق بقوة بعدين قالت..
/في الجديد شن مايصير معاك خبريني بالله عليك..
عصمت قالت بإبتسامه انزعاج..
/باهي ياودي باهي..
🌸واستمرت ايام الفرح كل يوم احلى من التاني ونوال فرحت من وسط قلبها بالذات في ليله الحفله اللي حضرت فيها صاحبتهم امال وخبرتهم انها انخطبت وفرحها بعد رمضان..
وعصمت بعد ماسمعت بالخبر غنتلهم..
"ان شاء الله ديما افراح وقليبي مرتاح"..
🌿🌿🌿🌿🌿
"والله عراسهم احلى من عراسنا بهلبه"
هادي بلقيس تكلم في خوها قيس هاتفيا..
"باهي المهم غيرتي جو وفرهدتي ع روحك"
قالت بإبتسامه..
/ايه..عقبال نفرح بيك ياربي..
التزم قيس الصمت..
بلقيس قالت..
/صاحبة ربيعه هادي عندها اخت تجنن مش عاديه ياقيس..
"بلقيس سكري ع الموضوع ارجوك ارجوك كان تبيني تقعد نكلم فيك معاش تفتحيه معاي"
تنهدت بلقيس بضيق وقالت..
/حاضر حبيبي حاضر...
تنهد قيس بعدين قال..
"كان فيها كيف قولي لتسعه يجيبك هني عمة امي مستاحشاتك هلبه وديما تسأل عليك"
قالت والدمعه عبت عينها..
/اصلا تسعه قال بيرفعني غادي الشهر الجاي..
"باهي كويس لكن هاه طولي باهي مستاحشتكم انتي والدعبول"
ابتسمت وقالت..
/ان شاء الله..
🌿🌿🌿🌿🌿🌿
وتمر الايام وتنتهي فترة عقوبه نزيهه وفريحه..
ويمشي تسعه لمدينة اهل نزيهه وين وصل للحوش استقبلاته ام نزيهه احسن استقبال وقعمزت هدرزت معاه بدون ماتسأله عن أي شي صاير بينه وبين بنتها وهو كذلك ماباش يجيب سيره..
شويه وخشت عليها نزيهه بسفرة الضيافه..
وهي خاشه لما شافاته قلبها طار بمشاعر الشوق بس حاولت تخفيها..
ابتسمت في وجهه وهي ضيف وقعمزت جنبه وبعدين امها استأذنت وطلعت..
🌿"ايه..فكرتي كويس؟"
نزيهه وهي منزله عيونها قالت..
/سامحني..
قاللها:نسامحك لما نتأكد انك حطيتي عقلك في راسك ووليتي نزيهه الاولى..
هزت راسها بصمت وهي تحاول دير روحها عاديه اخفاءا لضيقها..
ناض وقال..
/نراجي فيك برا..
ناضت ومشت طلعت وهي شاده دموعها وبعدين امها خشتله تسلم عليه..
🌿وبعد ماخداها توجه للألف والخمسين وطول الطريق قعد مشغل قرآن لعند ماوصل لحوش اهل فريحه..
نزلوا هو ونزيهه واستقبلوهم اب وام فريحه بعدين ام فريحه خدت نزيهه وخشت بيها للحوش..
واول مانزيهه وفريحه تلاقوا خدوا بعض بالأحضان وهما يدمعوا وكل وحده فيهم ياما شايله في قلبها وتبي تشكيه للثانيه...
🌿وبعد ماضيفوا تسعه اب فريحه بعتلها واحد من خوتها يناديها تجي للمربوعه..
وهي بلهفه الدنيا اللي كانت درق فيها عن خوها مشت معاه للمربوعه..
اول ماخشت وين شافها تسعه قلبه فزلها عكس مابينت ملامح وجهه وهي مارفعتش عيونها فيه لين طلعوا بوها وخوها..
شافتله بنظره عتب وهو قعد ع حاله متجهم..
مشت قعمزت حداه وقالت..
/شن حالك؟
قاللها:يولي باهي لما تعقلي وترجعي فريحه اللي نعرفها..
فريحه قالت بحزن..
/سامحني بالله عليك واعذرني تعرف قداش نحبك ونغير عليك الله غالب مشاعري حكمت فيا..
قاللها:في الجديد احكمي فيها وسيطري عليها زين راهو معاش فرص بعد هادي خلاص..
هي خافت وقالت..
/صدقني خلاص هادي اخر مرة..
رفع حواجبه بعدين عقدهم وقال..
/ان شاء الله..
🌿ويكمل نفس السيناريو وهو مروح بيهم للقصر شغل القرآن بش مايدويش مع وحده فيهم وهما هني فهموا ان العقاب مازال ماتمش..
🍃ولما خشوا للقصر مااستقبلهم حد بلقيس مسافرة واكيد حسناء مش حتعبرهم لكن زكيه اختارت تقعد في جناحها وماتحتك بحد هالفترة..
🌿ويعدي اسبوع تاني..
كانت الحياه فالقصر ماشيه بروتينيه وهدوء الا ان في شي قاعد يصير في وحده من الجهات في الدور الثاني اثار فضول الجميع..
اعمال صيانه تمت في فترة غياب فريحه ونزيهه وربيعه عن القصر وتوا اثاث جديد قاعد يخش للقصر..
دار نوم جديده..صالون..مكتب..ومكتبه..
نزيهه وفريحه توقعوا انه جناح جديد بيديره لنفسه وحتى حسناء مشت للتوقع هدا لكن امه فكرت في شي تاني..
واللي فكرت فيه كان الصح...
🌿اليوم اللي روحوا فيه من المزرعه كان يوم النتيجه..
صغاره كلهم نجحوا نجاح باهر وكالعاده من الأوائل وع راسهم سلامه اللي تميز ع طلاب المدينه كامله..
وهالتميز كان لربيعه فيه نصيب نجاحها كان مذهل وكذلك الطريقه اللي عرفت بيها النتيجه مذهله..
🌸العاب ناريه زينت سماء الألف والخمسين شبه اهل المدينه كلهم كانوا يشوفوا فيها..
🌾فوق سطوح حوش كمال البندار كانت فطيمه ومعاها خديجه مرت الساعدي واقفات يتفرجوا
🌱فطيمه:حدا قصر ذهيبه واضح اشبح شن عندهم..
خديجه:ماسمعتش ان عندهم من بيعرس
فطيمه مطت شفايفها للأسفل باستغراب..
فجأه حست بفستانها تحرك من تحت نزلت عيونها لوطا وشهقت بصدمه لما شافت ريان واقف يقول..
"ابي بوا"..نبي ميه
فطيمه بصدمه:كيف ركبت!؟
خديجه قالت بصدمه..
/خطر عليا محرز زمان في عمره كان يركب الدروج بإيديه ورجليه
رفعاته فطيمه وهي تقول بخوف..
/كان شافه بوه لوحني من فوق
ضحكت خديجه وهو رجع طلب ميه مرة تانيه..
فطيمه قالت..
/ديما يبي ميه مايرواش منها ستيكه الشمالات متاعه تم في نهارين..
خديجه قالت..
/الصغار اللي في عمره كلهم هكي..
ومشوا مع بعض نزلوا من الدروج وكملوا هدرزتهم..
🌿وفي مكان تاني اقرب لقصر ذهيبه..
من ورا شبابيك الدور الثالث..
كانوا هانيه وتيسر وعاطفه واقفات يتفرجوا ع الالعاب الناريه..
هانيه قالت بضحكه..
/اول مرة يديرها ع نجاح الصغار..
عاطفه قالت..
/اكيد دايرلهم زرده غريبه مانكش غادي..
تيسير شافت لهانيه اللي قالت..
/زي ماتعرفي حبيبتي اليوم عندي تصوير وهادي مرواحتي منه ومعمر اليوم يروح من السفر هني يعني لازم نستقبله..
ضحكت عاطفه وقالت..
/خيرك حمقتي سؤال عادي ره..
كيف جت هانيه بترد قالت تيسير..
/تعالي هنو ننزلوا لوطا اكيد معمر ع جيه...التفتت لعاطفه وقالت..هيا فيفي..
ومشت هي وهانيه وعاطفه لحقتهم وهي مبتسمه بتهكم...
🌿ومنهم لحوش في الشارع اللي جنبهم..
كانوا مرت البدري وبنته الوسطانيه راكبات فوق السطوح يتفرجوا ع الالعاب الناريه..
وديعه:ماسمعنا بحد منهم بيتزوج
امها قالت؛بالك خوه ولد الانجليزيه دار زي ولد عمه خدي وحده من غادي وروح بيها..
بدت ع وجه وديعه ملامح الضيق وين جت سيرة قيس فكرتها بماضي بعيد جر معاه باقي الذكريات السيئه تنهدت بضيق بعدين قالت..
/هيا يما ننزلوا هيا..
وخدت يد امها ومشوا مع بعض بإتجاه الدروج...
🌿🌿🌿🌿🌿🌿
وفي حديقه قصر ذهيبه الكل كانوا يتفرجوا ع الألعاب الناريه..
الصغار كانوا مبتهجين والكبار اغلبهم مستغربين عمره تسعه مادار حاجه زي هادي ع نجاح الصغار..
شويه وشافوه جاي ناحيتهم..
سلامه قال بضحكه..
/شني ياكينج جو جديد هدا!؟
تسعه قال..
/قصدك ماسمعتش بنجاح امك ربيعه جابت الاولى ع جماعتها حتى هي..
بلقيس وحسناء شافولها بإبتسامه فرح وهي طلعت عن شعورها وقالت بدهشه..
/احلف!
ضحكوا الصغار وهو قاللها..
/متعلمه بيا نكذب عليك!
ضحكت بفرح ورمت الكندرة اللي كانت لابستها ومشتله تجري وين وصلت فيه ضماته وهي تضحك وتبكي بفرح..
هو تخزرط "ارتبك" قدام امه وصغاره..
صغاره الصغار منهم ماعدلوش لكن الكبار غمضوا عيونهم وسلامه قال..
"اوبس" والكلمه سمعها هشام وقعد يضحك..
لكن امهاتهم خدوا بعضهم وخشوا..
"مبارك ياربيعه"
تباعدت ربيعه عن تسعه والتفتت لزكيه..
قدمتلها زكيه وهي تقول بإبتسامه..
/بروا عليك..وخدتها في حضنها وربيعه ضمتها وهي ادمع في بفرح واللي حواليهم يشوفولهم بإبتسامه حب..
🌿وتتلقى ربيعه مفاجأه تانيه بعد ماركبت مع راجلها للدور التاني..
رفعها لجهة غير اللي فيها اجنحة زوجاته..
🌳ربيعه قالت..
/وين رافعني؟!
هو قال..
/ماهو قلنا ماتسألي عن شي..
سكتت وهي مبتسمه بفضول لعند ماوصلت لمكان فيه باب من فردتين شكل الباب كان فخم جدا..
هو طلق يدها وقال..
/بري افتحيه وخشي..
شافتله بإبتسامه عدم فهم بعدين ردت نظرها للباب ومشتله فتحاته..
وتبدوا ع وجهها ملامح الذهول من اللي شافاته..
جناح لكن كان وكأنه ملكي ع كبره ع الاثاث الفخم اللي فيه هي توا ماشافتش منه كان الصالون بس..
"بري افتحي الباب اللي غادي وشوفي شن في وراه.."
شافتله شويه بعدين نفدت اللي قال عليه..
فتحت الباب وخشت وتشوف قدامها ماخلاها تحط يدها ع فمها من الدهشه..
مكتب وجنبه مكتبه كبيره لكن مافيهاش الا الكتب اللي قرتهم وقاعده تقرا فيهم..
قدم تسعه للمكتبه وقال..
/ديري زي مادرت بعد ماشريت المكتبه اللي عندي لوطا عبيتها بكل كتاب بعد ما نقرا كله..
شافتله وقالت بعدم استيعاب..
/غير راجي فهمني..قصدك الجناح هدا ليا اني!؟
هز راسه بإيجاب وهو مبتسم..
هي بدهشه قالت..
/منك جد ياتسعه!؟
ضحك وقال..
/خيرك اليوم ماغير تكذبي فيا وخلاص..
هي من قوة المشاعر اللي كانت تحس بيها ماقدرتش تعبر كان بالبكاء حطت ايديها ع وجهها وقعدت تبكي..
فهمت علاش دار هكي واللي فهماته خلا حبها ليه يتحول لعشق هو قدملها وضمها لقلبه وقال..
/اني نبي نفرحك مش نبكيك..
هي ببكاء قالت..
/واني فرحانه بيك وحنقعد فرحانه بيك انت وبس لأخر يوم في عمري..
ضحك وطبع قبله ع راسها وعيونه يلمعوا بالدموع..
♧هلبه اسباب خلت عمي يدير هكي..الموقف اللي صار لعمتي مهين لدرجة كبيره هدا غير المحاولات المستمرة للطعن في اخلاقها وتشويه سمعتها وهو دار اللي داره بش يردلها اعتبارها قدام اهل القصر ويخليهم يعرفوا مكانتها الحقيقيه في القصر وفي حياته..
والسبب التاني..هو ان عمتي حتكون ام المولود المنتظر اللي زي ماقال مفسر الحلم انه حيولي سيد ع المدينه كلها والسيد هدا لازم تكون مكانة امه عاليه في عيون الجميع القريب والبعيد..
♤لكن ياقرة قلبي مش الكل فهم اللي انتي فهمتيه الناس ديما تقدم في النوايا السيئة وحيكون ليهم الف تفسير وتفسير سيء عن اللي داره بوي لأمي...
🌿وليلتها بات في هالجناح مع ربيعه..
واول ليله في الجناح هدا يجيه منام لكن هالمرة كان مختلف عن اللي سبقوه..فاق منه وهو خايف وقلق جدا وعقد العزم يمشي في نفس اليوم لطرابلس بش يعرف تفسيره من الشيخ نور الدين..
▪▪▪▪▪▪▪▪▪
"خير يابيي تسعه شن شفت؟"
خدي نفس وقال..
/حلمت بروحي واقف في مكان مازبطتاش كويس ماكانش واضح المهم كنت واقف واني شاد نفس حبة اللولو اللي حلمت بيها قبل فجأة هكي..كأن في حد ضربني ع يدي خلا حبة اللولو طيح مني وتباعدت عني جيت بنلحق عليها بش ناخدها مرة تانيه قعدت نمشي بسرعه وهي تزيد تباعد لعند فجأه هكي خشيت لمكان وكانت الدنيا الليل والناس تجري هني وهني يعني صاير هرج ومرج بعدين شفت للوطى لقيت عليها دم خيوط خيوط...شويه وريت صغاري مرميين ع الوطى ويبانوا تعبانين مرضى ماعرفتش..كانوا ينادوا فيا اني نبي نمشيلهم لكن رجليا جمدوا معاش قدرت نتحرك..
شويه ريت من بعيد حبة اللولو مرة تانيه وقفت في مكان وغاصت فيه وبعدين تطلع من نفس لمكان نخله طويله ماريتش اطول منها في حياتي..
سعفها كبير وعراجينها كبار معبيات تمر صغاري قعدوا يزحفولها لين جو تحتها كلهم ظللتهم ونزلت عليهم التمر وقعدوا ياكلوا منه بعدين ياشيخ كل شي تبدل الليل ولى نهار والدم اختفي والدنيا كلها ولت خضرا..
وهدا هو ياشيخ...
الشيخ قعد ساكت شويه بعدين قال..
/صل ع النبي..
تسعه قال بقلق..
/اللهم صل وسلم وبارك على نبينا محمد..
تنهد الشيخ وقال..
/في شي بيصير للألف وخمسين بدير فيها هرج ومرج وهالشي بيخلف بعض الخراب وسفك الدماء..هالحلم يابيي تسعه يكمل الاحلام اللي ريتها قبل،عن قريب ان شاء الله بيجيك الولد اللي قتلك عليه والحلم هدا يأكد ان ولدك هدا حيتولى السياده ع المدينه متاعكم لكن شكله في هداكا الوقت الصعب وهالفتره حتكون جدا صعبه بالذات عليكم انتم يابيي تسعه..وولدك هدا مسخره الله بش ينهي هالفترة ويرجع الحال لأحسن ماكان عليه..والله تعالى اعلم..
تسعه وهو قلق قال..
/باهي شن تفسير ضياعها مني!؟
عقد الشيخ حواجبه وقال..
/الحلم اللي قبل هدا حكيته لحد؟
تسعه هز راسه وقال..
/لأمي بس ياشيخ ونبهت عليها ماتعاوده لحد..
الشيخ قال..
/واني نبه عليك معاش تعاوده لحد يابيي تسعه راهو الاحلام الكويسه زي السيئه مفروض ماتعاودهم لحد..
تسعه هز راسه وقال..
/ان شاء الله ياشيخ ان شاء الله...
🍃ويروح تسعه من طرابلس وعقله مشغول بالحلم وتفسيره وقلبه كان مقبوض..
🌿وفي مكان تاني كانت حسناء في المشفى دير في فحص دوري تعودت ديره بين فترة وفتره..
لكن هالمرة الفحص جاها بمفاجأة كبيره..
"مدام حسناء انتي حامل"
حسناء بصدمه:شني!؟
الطبيبه قالت بإبتسامه..
/حامل..
بدت ع وجهها ابتسامه فرح ممزوجه بالدهشه وقلبها يدق بقوة..
▪▪▪▪▪▪▪▪▪
"مبارك مبارك ياحبيبتي مبارك"
حسناء وهي ضامه ربيعه قالت بفرحه..
/والله لتوا مامصدقه ياربيعه..
ربيعه بعدت عنها وهي شادتها قالت..
/والله العظيم فرحتلك من وسط قلبي..ان شاء الله يجوا بنيات بش يولوا زي التواما وصاحبات..
حسناء قالت بإبتسامه والدموع في عيونها..
/حتى اني خاطري في بنيه واسمها في بالي من توا..
ربيعه وهي مبتسمه قالت..
/شن هو..
حسناء قالت..
/جيانا..
ربيعه:حلو هلبه واني خاطري في ماريه فداء قبل خاطري نسميها ماريه..
حسناء:ان شاء الله تجيك بنت وتسميها باللي في خاطرك..
♤ماجتهاش بنت ياخالتي حسنا جاها ولد كانت بنتك ليه توأم روحه وامه وبوه وعيلته ياخالتي حسناء..الدنيا كلها عندي في كفه واختي هادي في كفه بروحها امي نفسها ماقدرتش توصل لمكانتها عندي...جيانا...
...يتبع....
