رواية ولاد تسعة

الجزء السادس (رحيل)1

#ولاد_تسعة "الفصل الاول/سميه تسعة"
#جمان_فريد
الجزء_السادس "رحيل"
⛔احداث هذه الروايه وشخصياتها من وحي الخيال بعض الاحداث غير واقعيه"فنتازيه" وبعضها بعيد عن واقعنا المعاش والبعض الاخر يلامس شيء من الواقع⛔
⚠️ملاحظه..
لما يبدا الكلام بالرمز هدا (♤) هذا يعني ان البطل يسرد في الاحداث
اما لما يبدا بهذا (🌿) يعني الكاتبه هي اللي تسرد
#الدعاء
‏ألَا إنَّه ما قُرعت أبواب السَّـماء بشيءٍ مثل الدُّعاء، وعلى المرء ألَّا يستكثرَ شيئًا في الدُّعاء، فإنَّ كل ما يظنُّـه كثيرًا فهوَ في مُلك اللَّه قلِيل، وكلّ ما يراهُ عسيرًا فهو في جَنب اللَّه يَسير.
- سعُود الشريم.
■■■■■■■■■■■■■■■■■■■■
🌿لن انسى ضجيج بيتنا فى تلك الليله،
هيبة العزاء
ألم الفقد،
نظرة الشتات،
ارتعاش النبض،
إرتجاف الايدي.
فقدنا وافتقدنا والله🌿
••••••••••••••••••••••••••••••••••••••••••••••••••••••••••••
"وهادي الكوجينه ياتعويضة"
تعويضه وهي تمرر في نظرها ع الكوجينه قالت بذهول..
/هذى كله مطبخ!
رئيسه الخدم "برنيه" قالت..
/ايه ياتعويضه..في الايام العاديه نشدوها اني وياك ووحده من اللات تشرف علينا اما في المناسبات الكوجينه هادي تتسكر وتنفتح الخارجيه اللي يجيبلوها طباخين ووقفات من برا واني وياك نكونوا مشرفات عليهم..
تعويضه شافتلها وقالت..
/كم لك تشتغلي هنا!؟
برنيه:امي الله يرحمها كانت تخدم في اللا الكبيره ذهيبه رحمة الله عليها واني قعدت نخدم هني من بعدها..
تعويضه:نحنا ان شاء الله بنكملوا حياتنا هنا..
برنيه:عندك صغار؟
قالتلها: لامازال..مالش واجد مزوجه..
هزت برنيه راسها بصمت بعدين قال..
/تعالي وراي..
ومشت برنيه طلعت من الكوجينه وتعويضه لحقتها..
🌿في الوقت اللي فيه نساوين العيله مجتمعات في الصالون الكبير ومحور حديثهم حفلة دخول محفوظ..
🌱نزيهه:كوني هانيه ياخالتي بإذن الله كل شي حيمشي ع الكيف..
ام محفوظ قالت بإبتسامه..
/متهنيه بيك وبالجميع..
كلهم بأصوات متقطعه ردوا عليها..
"سلمك"
بعدين زكيه قالت..
/مازال مسكر راسه ع العيشه في بريطانيا؟
ردت عليها ام محفوظ تقول..
/ايه ياحنة لكن قالي كل عام بنجي نقعد شهر في الصيف وشهر في الشتي اشبح حق ولايمشي فيا..
زكيه:لامدام دار حوش هني معناها حق..
♤ايه حق نسيت نقول..محفوظ ومرعي بنوا حياش في نفس الارض الموجود فيها قصر ذهيبه والجهة هديكا كلها ولت معروفه عند ناس الألف وخمسين بجهة "بيت المال"..
🌿ام محفوظ قالت..
/ان شاء الله ياوخيتي ان شاء الله..
ع جية وحده من الخدم قالت لبلقيس..
/للا بلقيس ولدك يبكي..
ناضت بلقيس وطلعت تجري وامها ناضت وراها ولحقتها..
فريحه قالت بضحكه..
/من لما جاباته وهي تفرفش هكي..
نزيهه قالت بإبتسامه..
/هي اصلا تحب الصغار هلبه وتفرفش عليهم..
زكيه وهي تسمع فيهم قعدت تشوف لبنتها كيف تحاول دير روحها عاديه رغم الدمعه الباينه في عيونها..
ويخشوا في هاللحظه صغار خوها ولاد وبنات ومعاهم صغار مرعي ولد عمها..
سلامة مشي طول لنزيهه وقال..
/امي..
قعمز جنبها وهي خداته في حضنها وقالت..
/نعم امي؟
قاللها:قولي لبوي يخلينا نمشوا للملعب..
فريحه:مش وقته بكل..
سلامه قال بإنزعاج..
/ملينا نبوا نمشوا نلعبوا كورة..
فريحه:راجي لين يتم العرس بش يلهى بيكم بوكم ويرفعكم
سلامه رفع عيونه في نزيهه..
مسحت ع شعره وقالت..
/معليشي حبيبي تحمل اليومين هادم بس..
هز راسه وهو مضايق بعدين خش لحضنها..
وولدها هشام كان هو واشرف مقعمزين حوالين جداهم زكيه اللي كانت تنشد فيهم كان تغدوا كويس ولالا..
اشرف:الحمد لله ياحناي كلنا تغدينا كويس..
سلامه قال بضحكه..
/هشام قعد ياكل زي العصافير من الحشم..
ضحكوا وهشام قعد يشوفله بإمتعاض..
ناضت فريحه وهي تقول..
/تو نوض نديرله احلى غدي..
هشام: مانبيش ياامي قعمزي
فاضل قال..
/اني نبي جعان..
شافتله فريحه وقالت..
/ديما جعان انت..
زكيه:معاش تعيطي ع الولد..
نزيهه وهي تشوف لفاضل قالت بإبتسامه..
/خله ياكل صحتين
فاضل قال..
/انتي وجداي احسن من امي
ضحكوا وفريحه وهي طالعه من حداهم قالت..
/تو نوريك يافكرونه..
ضحكوا عليها بعدين نزيهه شافت لكريم وقالت..
/شني كريم القرايه ماشيه تمام؟
قاللها:الحمد لله..العام هدا بناخده اني الاول .
سلامه ابتسم بغرور وقال..
/تو نشوفوا..
كريمه اللي كانت حاطه راسها ع كتف عمتها هانيه قالت..
/ماتقدرش سلامه ياكريم
كريم قاللها بتهكم..
/انتي اخر من يتكلم في الحاجه هادي دماغك والحيط سوا
امه ضرباته ع يده واخته فنصت فيه..
اما الباقي كانوا يشوفوا لكريمه اللي كانت تشوف لأمها..
نظره عيون نزيهه ليها كانت جدا قاسيه ومخيفه بالنسبه ليها..نزلت عيونها وهي مضايقه وعمتها هانيه ضمتها وهي تقول..
/ياريت تتكلم بأدب مرة تانيه..
كريم:هي اللي بدت..
فاطمه:نوض اطلع..
هو بنرفزة ناض ومشي طلع من حداهم..
شافت فاطمه لنزيهه وقالت..
/بالله سامحيني ياوخيتي..
زكيه:اللطف ع عراك صغويرة!
نزيهه:ماصار شي يزعل يافاطمه..شافت لبنتها بحده وقالت..عنده حق..
ناضت كريمه وقالت وعيونها في الارض..
/بنمشي للدار..
نزيهه وهي تشوفلها بإمتعاض قالت..
/بري..
🌿ومشت كريمه طلعت من حداهم وهي تبكي،بين عيونها نظرات امها ليها وفي مسامعها يتردد كلامها القاسي..
كريمه زي اي ابن سوا كان ولد ولابنت تهمها هلبه نظرة امها ليها ولأن دماغها كان بالهون واستيعابها بطيء امها مضايقه منها هلبه كانت تبي بنتها تكون خير منها في كل شيء لكن للاسف الباين ان امكانيات كريمه الضعيفه متأهلهاش تكون خير من امها ولاحتى شبيهه بيها..
"كربمة"
وقفت في مكانها وهي تقول ببكاء..
/ماقدرتش ياهشام قريت هلبه وماقدرتش نولي شاطرة زيكم..
هشام قال..
/مش لازم تولي زينا خليك زي ماانتي المهم تنجحي..
بنبرة باكيه قالت..
/لكن ماما ماتبيش هكي تبيني نجيب الترتيب الاول..
قاللها:ماتفكريش في امي فكري في روحك بس..
شافتله شويه بعدين قالت..
/باهي انت ساعدني بش نولي شاطرة زيك..
ابتسم وقال..
/حاضر..
ع جية معاذ شاف كريمه تبكي قال..
/خيرك؟
قالتله:من كريم هدا قالي دماغك زي الحيط..
ضحك معاذ وقال
/صح..
ضربه هشام ع قفاه...
اما كريمه مشت تجري وهي تبكي وهشام لحقها بش يرضيها..
معاذ وهو يتحسس في قفاه قال..
/قلت الحق هي غبيه مش زينا..
"من هي"
شاف فريحه واقفه وشادة سفرة اكل قال بإبتسامه عريضه..
/شن هدا!؟
قالت بضحكه:برا نادي هشام وجيب في طريقك هداكا الفكرونه وتعالوا لدار المعيشه..
بلهفه قال..
/حاضر..وانطلق يجري للصالون...
🌿🌿🌿🌿🌿🌿
"نور الدين الزواري توفى؟"
تسعه قال هالكلام بصدمه لواحد من اصدقائه وهالصديق قاله..
/ليه اسبوعين لتوا..
تسعه قال بأسف..
/إنا لله وإنا إليه راجعون..
محفوظ قال..
/تلاقيت اني وياه مرتين في مصر العام اللي فات..
تسعه قال..
/حتى اني اخر مرة ريته فيها العام اللي فات في طرابلس..
صديقه قال..
/مات من القهرة مسكين..
سلامه قعد يسمعله بتركيز..
ومحفوظ قال بإستغراب..
/من القهرة!؟
قاله:ايه مقهور من ولاده وعملهم الاسود..طلعوا بوهم فاقد للأهليه بش يحجروا ع املاكه..
تسعه بصدمه..
/كيف!؟
قاله:والله زي مانحكيلك لكن هو لعبها صح..كتب كل مايملك بإسم مرته اللي خداها من عامين وماخلاش كان حوشه في زواره وحتى هدا ماخلاهمش يطولوه..خدي قرض كبير هلبه وقعد مديون والبنك حجز عليه..
سلامه ابتسم بأسف وعيونه ع ولده تسعه اللي كان يسمع وهو مصدوم..
ضيق محفوظ عيونه وقال..
/مرات داروا هكي مجبورين..مرات مرته وحده لفعه دبرت دبارتها وخلت بوهم يحرمهم من حقهم..
هني سلامة تكلم وقال..
/لاياولدي يامحفوظ لا..هدا كيد رجاله مش كيد نساوين واني اللي نعرف كيد الرجاله كويس..
عقد تسعة حواجبه وهو يشوف لبوه بإستغراب حسه قال كلامه الاخير بنبره فيها شي من الألم..
وسلامه مكمل يقول..
/وكيف ماقال الصديق الراجل مقهور منهم واللي داره ردة فعل ع افعالهم..
محفوظ وهو يفكر في كلام عمه قال..
/كان هكي فعلا معناها مش حيخلوا المراة في حالها..
الراجل قال..
/ميه في ميه..هما توا يراجو ينحط الحوش في المزاد بش ياخدوه..
محفوظ:مش حوش هو تحفة فنيه ماصارتش والموقع متاعه مش عادي..
تسعه قاله:شايفه؟
قال محفوظ:شفت صور ليه في مجله اقتصاديه مصنفينه من ضمن اجمل المنازل في شمال افريقيا..
رفع تسعه حاجبه وضيق عيون وهو يفكر..
وصديقه قال..
/لكن لتوا صايرة عليه مشاكل المصرف مازال ماحطاش في المزاد وع حسب ماسمعت ان ارملة نور الدين ناوية تاخده..
رفع تسعه حواجبه اما محفوظ قال بضحكة..
/شكله ياعمي نظرتي فيها نظره..
ابتسم سلامه وقال..
/واني قاعد عند كلامي واكيد حتى هي ملسوعه بنارهم..
محفوظ:باهي علاش تشري في المشاكل معاهم!؟
قاله الراجل:هي محاميه معروفه اسمها "حسناء تاشفين" متخصصه في القضايا الماليه وفوق هكي زواريه..
محفوظ قال بضحكه..
/معناها نار جهنم من يقربها..
ضحكوا غصب عنهم ومحفوظ قال..
/الحمد لله اللي خلا نصيبي خارج ارض الوطن..
تسعه:محروم ياولدي عمي والله محروم..
محفوظ قال..
/ايه محروم من النكد وحرق الدم والنقيق اربعه وعشرين ساعه ربي يزيدني منه هالحرمان هدا..
ضحكوا وهما يسمعوا فيه وتسعه قال بضحكه..
/ربي يهدي من خلق..
🌿🌿🌿🌿🌿
الساعة الحادية عشر ليلا..
في حوش مرعي..
🌱"اني شن قايل ع طول اللسان وقلة ادب"
كريم بضيق:هي اللي بدت يابوي..
فاطمه:لاانت اللي بديت ولدي ونعرفك تحب المشاكل..
كريم سكت وهو منزعج وبوه قال..
/تعرف يشكولي منك مرة تانيه تشوف مني شي عمرك ماشفته وتوا تحرك لدارك..
لف ومشي وهو معصب وامه تلحق فيه بعيونها وهي تضحك بعدين قالت..
/سلامته وخلاص..
ابتسم مرعي وهو يشوفلها بعدين قال..
/ايه بكري قلتيلي غزلان طاحت ع رجليها..
قالتله:ايه جتها الطيحه ع ركبيها نبيك غدوة الصبح ترفعها تعاينها..
قاللها بقلق..
/علاش شن صارلها بالزبط؟
قالتله:ركبتها اليمين انتفخت قالت وين نجي نركع ولانسجد توجعني هلبه..
هو قال..
/كيف طاحت هي؟
فاطمه:قالت كان تجري في جرة اروى عترت طاحت..
ناض من حداها وهو يقول..
/خل نمشي نشوفها..
🌿"ايه باهي شن تبي جعان ولاشني!؟"
قيس وهو حاط يده في جيبه والتانيه يحك بيها اسفل وذنه قال..
/لالاجعان لاشي..حمحم بعدين عقد حواجبه وقال..ايه حقه شن صار فيها البنيه اللي بكري؟
بلقيس وهي مركزه ع لون وجهه كيف تغير للأحمر قالت بإبتسامه وهي عاقده حواجبها..
/قصدك غزلان؟
رفع حواجبه بدهشه وقال..
/ غزلان!؟ قصدك نفسها هديكا البطشه الصغيره!
بلقيس بضحكه..
/ايه هي ياسيدي اللي عطاتك وردة في اول لقاء..
ضحك و يحك في ذقنه بعدين قال..
/قداش عمرها هي توا؟
رفعت حاجبها وقالت..
/15 علاش تسأل..
رجع عقد حواجبه وقال..
/هكي وخلاص..تمام..تصبحي ع خير..
ولف ومشي وهي تبع في بعيونها وتضحك..
🌿🌿🌿🌿
حطت ولدها في سريره بعد مارقد وخرت عنه ودارت طلة ع خوته بعدين مشت طلعت وسكرت الباب وتوجهت لدار البنات لما قربت توصلها لقت ضرتها طالعه منها..
فريحه:ان شاء الله غير ماتعباتكش اروى؟
نزيهه وهي تسكر في الباب قالت..
/وخيتي سلمها رقدت قبل كريمه..
ابتسمت فريحه بعدين قالت..
/بنقولك حاجه
نزيهه بضحكه:حتى اني بنقولك حاجه..
فريحه:قولي انتي قبل..
نزيهه وهي تضحك قالت..
/حاسه روحي حامل..
فريحه ضحكت بعدين قالت..
/حتى اني..
نزيهه بدهشه قالت..
/اول مرة نحملوا مع بعض..
فريحه قالت بضحكه..
/ياناري ع تسعة..
ضحكت نزيهه بعدين قالت..
/شن رايك نديروا مغامرة من مغامرات ايام زمان..
فريحه بخوف..
/لالافكينا ياوخيتي..
نزيهه بضحكه:خلاص الصبح نكلموه..
▪▪▪▪▪▪▪▪
"خيركم"
نزيهه شافت لفريحه وفريحه خدت نفس وقالت..
/شاكات في رواحنا حوامل..
قعد يضحك..
نزيهه بضحكه:نبوا نمشوا للمستشفى بش نتأكدوا..
قال بضحكه..
/بروا وتوا ارواحكم نراجي فيكم فالسيارة.
ضحكوا الزوز ولفوا ومشوا بسرعه وعيونه معاهم وهو يضحك..
🌿ورفعهم للمستشفى وبعد التحاليل والفحوصات طلعوا الزوز حوامل فعلا...
🌱"انا ليا شهر ونص وفريحه ليها شهرين الااسبوع"
تسعه قال بإبتسامه..
/ماشاء الله ماشاء الله..معناها بتجيبوا مع بعض.
فريحه قالت..
/احلى حاجه بش يجوا زي التوامه..
تسعه شاف لفريحه من المرايه بنظره حلوة كلها حب وهي ردتله نفس النظره..
اما نزيهه وهي تشوف للطريق قالت بإبتسامه..
/ان شاء الله يجوا صحيحين وع خير..
تسعه وفريحه قالوا وهما مبتسمين..
/آمين..
🌿ويوصل العلم لزكيه اللي فرحت من قلبها لكن طلبت من كناينها مايطلعوش الخبر خوف من عيون الناس اللي بدت مفتوحه فيهم ع وسعها..
وكملوا باقي اليوم وهما يتجهزوا لحفلة دخول محفوظ..
🌿"اللهم صل ع النبي اللهم ع النبي"
قالت هالكلام زكيه وهي تشوف لأحفادها الولاد كيف طالعين بالعربي بعدين قالتلهم..
/ماتطلعوش مع بعض وين تجوا تخشوا للخيمه كل واحد يخش بروحه..
هشام:حاضر حناي..
زكيه قالت بإبتسامه..
/يحضرلك وجه محمد ياغالي انت..
سلامه وقال..
/وحني يازيكو قداش حقنا!
ضحك اشرف وزكيه قالت..
/انت بالذات ماتبي كان الكوي في راسك..
سلامه:تموني ياجداي تموني..شاف لخوته وقال..هيا تعالوا وراي..
زكيه:اشي!!
هشام وهو يضحك قال..
/ماتعدليش عليه..
ومشي سلامه وهويضحك ومعاذ تبعه بعدين طلع اشرف بروحه وفي الاخير طلع هشام وفاضل شاد في يده...
🌹اما البنات لبستهم عمتهم هانيه وخلتهم زي الوردات بعدين مشت بيهم لقاعة الاحتفالات الخاصه بالنساء..
🌿من جهة تانيه..
خش تسعه من باب خلفي يرفع لدروج يوصلوا للدور التاني..
ركبهم..وين وصل للدور التاني توجه للممر اللي يرفع لديار زوجاته..
قعد يمشي لعند ماوصل لجناح نزيهه..
فتح الباب وخش وسكره وراه وكمل طريقه للباب الدخلاني..
وصل فيه ودق عليه..
"تفضل"
لما سمع اذنها بالدخول فتح الباب وخش وقعد يمشي لعند ماخش لدار النوم وتبان عليه وهي لابسه فستان اسود في الذهبي مع تسريحة شعر حلوه ومكياج حلو..
ابتسم وقال..
/ماشاء الله تبارك الرحمن..
هي مررت نظرها عليه تتأمل فيه كيف طالع في العربي قالت ..
/ماشاء الله عليك انت..
قدملها وهو مبتسم لعند ماوقف قدامها طلع من جيب الكاط الطويل حاجه لما شافتها نزيهه انبهرت..
بروش ذهبي ع هيئه شمس مرصع بالياقوت..حطه اعلى الصدر في الجهة اليمين وهو يقول..
/ماندارش لغيرك..صممته وخدمته بإيديا..
وهي تسمع فيه وتشوفله بنظرات كلها حب يلمعوا بالدموع..
بعد ماحط البروش وخر خطوة ومرر نظره عليها بعدين قال..
/ماولى غالي كان توا بس..
ضحكت بخجل..
ابتسم بعدين قدملها وباس راسها وقال..
/ربي يحفظك ومايحرمني منك..
قالتله بحب والدموع في عيونها..
/ولامنك ياغالي..
تباعد عنها وقال..
/بتطلعي.؟
قالت:ايه توا تبي حاجه؟
قال بإبتسامه..
/لا سلامتك بري..
ابتسمت بعدين رفعت فستانها ومشت طلعت من الجناح..
وهو قدم للهاتف اللي في الدار دار بيه مكالمه تخص شغله بعدين طلع من الجناح..
كيف جي بيمشي لجناح فريحه شافها جايه من بعيد..
قعد متسمر في مكانه وهو يشوف فيها كيف طالعه لون فستانها كان فضي عاكس ع لون عيونها هدا غير تسريحه شعرها ومكياجها زادوها جمال ع جمالها..
وصلت فيه وقالت بإبتسامه..
/تسعه..
قاللها وهو هايم فيها.
/ياروح تسعه..ياقلبه..يادمه اللي يجري في عروقه..كان نعرف شن دايره فيا يامراة انتي كل مرة نشوفك فيها كأنها اول مرة..
هي كانت تسمع فيه وقلبها يرفرف وسط ضلوعها وابتسامه الخجل غالبه ع ملامح وجهها..
حط يده ع راسها وقال..
/ربي يحفظك لتسعه ومايحرمه منك..وبدي يقرا عليها وهي تسمع فيه وتسمع في دقات قلبه وع وجهها ابتسامة حب حلوة..
بعد كمل قرايه عليها طبع قبلة ع راسها بعدين جي جنبها مدلها ذراعه هي ضحكت وتعنقتها ومشوا مع بعض وطول الطريق وهو يتغزل فيها لعند ماوصلها للممر اللي يرفع لقاعة الاحتفالات وماسيبها الا بالسيف..
♤حفلة دخول محفوظ حضروها البنداريه قال بوي الجو بينهم كان يبان عادي لكن اني متأكد ان كمال البندار كان يقطع في بوي بنظراته..
المهم قالوا حفله دخول محفوظ كانت ليله من العمر جابوا فرقه شعبيه ونوبه قلبت الدنيا قلب ومحفوظ رقص عليها لين عيي..محفوظ في شبابه كان جوه مليح مش زي بوي ومرعي كانوا راكزين ورزان..
وعدت هديكا الحفله ودخل محفوظ بمرته في حوشه الجديد هداكا الوقت المجاور لقصر ذهيبه،وبعد يومين بالزبط ولى بمرته وماليها ومعاهم عمي قيس لبريطانيا..
ويعدي بعد هداكا اليوم سبوع في اخر هالسبوع طلب جدي من بوي يرفعه يزور قبر بوه وامه..قال بوي اول مرة يطلب مني نرفعه قبل كان يمشي بروحه ولايخلي في سواقه الخاص يرفعه..
في المشيه هديكا لاحظ بوي ان جدي ماباش يخطم حتى الخطوم من جنب قبور خوته قال استغربت ونشدته قتله علاش مازرتش عمامي ماباش يرد عليا واني معاش قدرت نعاود نسأله مدام ماردش لكن قعدت الحركة هادي قعدت في عقلي..
🌿🌿🌿🌿🌿
قبيل فجر تاني يوم..
في مكتب سلامه في القصر..
كان مقعمز ع الصلايه وهو رافع ايديه ويدعي..
"اللهم انك تعلم اني ماظلمت حد ولاطغيت ع حد واني درت اللي درته بش ناخد حقي وندفع الشر عني..ياربي لو كان اللي درته فيه ذنب عليا طامع في عفوك وغفرانك ياالله وطامع في رحمتك ماتخليش ذنبي هدا يلحق صغاري وذريتهم يارب العالمين.."
▪▪▪▪▪▪▪
طلعت آسيا من دارها وهي مستغربه في غياب راجلها قبل لترقد كان راقد حداها وبعد ما تأكدت انه مش في الحمام مشت طول لمكتبه لأنها توقعت تلقاه فيه..
وصلت فيه ودقت الباب ماجاهاش رد..
فتحت الباب وخشت ويجو عيونها ع سلامه وهو طايح ع الصلايه وتطلع منها صرخه فيقت اهل القصر كلهم..
♤بوي قال اللي صارهديكا الليله كان زي الزلزال زعزع الارض من تحت رجلينا وخلانا ننهاروا كلنا..واكثر من انهار جداي زكيه وضرتها آسيا..
وفاة جدي سلامه كانت صدمه كبيره لبعض اهل الالف وخمسين وبعضهم الاخرحزن عليه غنيهم وفقيرهم..راجل صالح ويده ديما طايله بالخير زرع الحب في قلوب كل من يعرفه من قريب او من بعيد بأعماله الصالحه..
🍃"وك عليا راح رفيق عمري وك عليا راحت روحي معاه كيف مازال بنعيش ياناس كيف بنعيش من غيرك ياسلامة"
هادي زكيه اللي انفجع قلبها فجعة قاتله ع فراق رفيق عمرها اللي ياما تمنت تموت قلبه..من النار اللي راكبتها كانت تخبط وتعيط ع طول حسها وهانيه كانت في حال يشبه حالها وفريحه ونزيهه اللي كانوا يبكوا بألم ع شيبانهم حاولوا يهدوهم ويواسوهم لكن عبث هالقلوب اللي فجعها فقد غالي شن يواسيها..
آسيا من فجعتها فقدت وعيها ورفعوها للمستشفى ولما قافت صابتها حاله هيستيريا قعدت تصرخ وتبكي وماسكتتش الا بإبرة منومه..
ومحمد راجل بنتها لما وصله الخبر كذب علي بقليس وقال عنده مأموريه بيقعد فيها اسبوع لهدا قرر يرفعها لأهلها تقعد عندهم طول فترة غيابه وهي مسكينه صدقت طول وجهزت حوايجها وحوايج ولدها"عبد المتين" وبعدين طلع بيهم محمد للألف وخمسين وبعد ماقطعوا مسافه طويله وصلوا غادي..
🍃"حبيبتي"
شافتله بلقيس وقالت بإبتسامه..
/عيوني..
هو ابتسم بألم بعدين خدي نفس وقال..
"عظم الله اجرك في بوك"
▪▪▪▪▪▪
"وين ماما وين"
فاطمه اللي كانت مقعمزه قدام حجرة اسيا وهي تقرا في القرآن وتبكي لما شافت بلقيس ناضت وقفت بعدين مشتلها وضمتها وهي تقول..
/راقده داخل..عظم الله اجرك..
بلقيس ضمتها بقوة وانهارت بالبكاء..
♤ويوصل الخبر لمحفوظ وعمي قيس وروحوا للبلاد قبل الجنازة اللي داروها العصر..
بوي قال محفوظ ومرعي كانوا يبكوا عليه بالصوت لحظه دفنه بالذات مرعي كان منهار بمعنى الكلمه عكسنا اني وقيس اللي كنا نبكوا بصمت ونحاولوا نتماسكوا قدام الناس..
هو بوي شخصيته فيها شوية جفاف وعزمه قوي هلبه في مواقف زي هادي يقعد متماسك وعمي قيس يشابهه في الحاجه هادي..
🌿والحزن ماكانش محصور بالكبار حتى الاحفاد حزنوا ع جدهم بالذات سلامة وهشام هما الأقرب ليه من احفاده وكانوا متعلقين بيه هلبه وموته فجعهم ووجعهم بقوة..
وتعدي الايام وتطلع آسيا من المستشفى للقصر..
لما خشتله وشافاته مظاهر العزاء رجعت انهارت مرة تانيه وولدها قيس رفعها بين ايديه ودخلها داخل..
وقعد آسيا طول ايام العزاء وبنتها مافارقتهاش وكذلك نساوين تسعه برغم زحمة العزاء كانوا لازم يمشولها يطمنوا عليها ويساعدوا في بلقيس في معاناتها ومعاناة ولدها..
زكيه في اول الايام ماكانش حالها خير من حال آسيا لكن ماإن انقضى شهر ع موت سلامه الا وهي شاده حيلها مع ان الحزن في قلبها كان كبير بوسع الدنيا..
🍃"كولي ياماما بالله عليك بالله كولي"
آسيا وهي تبكي قالت..
/لااريد لااريد..خليني..اطلعوا وخلوني..
قيس قال بألم..
/ياامي ربي يهديك تبي تموتي!
آسيا وهي تبكي قالت..
/ياريت نموت ونروح عند سلامه..
بلقيس حطت الكاشيك وانهارت بالبكي وقيس يشوفلها بحزن وهو يمسح في دموعه...
ع خشة زكيه شافت حالتهم وقالت..
/ترا اطلعوا..
شافولها شويه بعدين مشي قيس وبلقيس رفعت السفرة وجت بتلحقه قالتلها زكيه..
/خلي السفره..
رشفت بلقيس وقالت..
/حاضر..
حطت السفرة في مكانها ومشت طلعت وسكرت الباب..
قعمزت زكيه مقابله لآسيا وقالت..
/يرضي ربي اللي ديري فيه ياآسيا..
ردت عليها وهي تقول بألم..
/مش قادرة يازكيه..قلبي مش متحمل حياة من غيره..حطت يدها ع صدرها وقالت..هنا في فراغ في غمه..نار مش قادرة اتحملها..رشفت وقالت..زكيه انت كيف متحمله قوليلي!؟
زكيه مسحت دموعها وقالت..
/متحمله ع خاطري عيلتي..صغاري وصغارهم وحتى انتي لازم تتحملي ع خاطر صغارك بلقيس ياروحي حالها بالويل حتى ولدها معاش قادرة تعانيه وقيس مسيب قرايته وخدمته وقعد هني من خوفه عليك..شدت يدها وقالت..صغارك توا يبوك اكثر من قبل ياآسيا..وسلامه..قالت اسمه بنبرة مخنوقه..سلامه عند اللي خير مني ومنك ادعيله صدقي عليه حبيه بالاعمال الصالحه اللي توصله منك في القبر وتونسه..
حطت اسيا يدها ع قلبها وقالت بألم..
/حبيبي كيف داير في القبر ظلام وضيق..
حاولت زكيه تتمالك نفسها وهي تقول..
/ادعي ربي يوسعه عليه ويخليه روضه من رياض الجنة..
غمضت آسيا عيونها اللي دموعهم تنزل وهي تقول..
/يارب يارب..
🌿وقعدت زكيه تعاني في آسيا ورادة بالها منها وبعد ماخلت قيس بلقيس يطمنوا ع امهم معاها كل حد رجع لحياته..
بلقيس روحت لمصراته وقيس رجع لبريطانيا...
🌿🌿🌿🌿🌿
"نفكر غدوة نخليها تمشي معاي تعاوني في غسيل البساطات"
ربيعه وهي طيب في العشي ردت ع كلام امها بإنزعاج..
/وكان تفكي روحك من خلطتها يام خيرلك..
مبروكه قالت..
/ربيعه..
قالتلها:يام راهو المراة هادي طالعه عليها دوة قالوا معاش حد يبيها يجي تخدم في حوشه لإنها خنابة..
مبروكه؛فكك من الكذب والدوة الفاضيه منوبيه صاحبتي عمر عمري ماريتها مدت يدها ع حاجه مش ليها..
ربيعة:سامحيني يام لكن انتي ديما ع نياتك وماتشبحيش في صاحبتك هادي كيف حاسداتك ع كل شي يجيك وكل قرش يخش عليك..
امها قالتلها بعصبيه..
/ترا اسكتي وضمي فمك اللي مايطلع كان في السم ..
غمضت ربيعه عيونها وهي تحاول تتمالك نفسها بعدين فتحتهم وقالت..
/ربي يسامحك يام..
مبروكه قالت بغضب..
/نسمعك توصلي فيها مرة تانيه تشوفي حسابك..
ومشت طلعت وخلتها تتنهد بألم وتفكر في حال امها اللي فاقده العيله وماعندها حد كيف معتبره منوبيه اختها وماقعد من ريحة عيلتها وهالشي مخليها متعلقه بيها ومش راضيه فيها شي ع قد ماشافت..وقعد قلبها خايفه من نتيجة هالتعلق وين بتوصل امها..
🌿تاني يوم..
من لما صبح الصبح طلعت مبروكه لحوش منوبيه اللي كان موجود في اطراف المدينه تحديدا في غابة اسمها غابة "الهاشمية" لأنها كانت ملك لعائله الهاشمي قبل لتشريها منهم الدوله..
وصلت مبروكه في الحوش وكلمت صاحبتها ع الخدمه ومنوبيه ماصدقت مشت معاها طول..
وخدوا حافله رفعتهم لحوش الناس اللي بيخدموا عندهم..
ومن اول ماحطوا رجليهم بدت منوبيه تخطط للتمشيط..
🌱"هادم البساطات يامبروكه مش هلبه اربعه بس.."
مبروكه قالت..
/حاضر يامدام..
صاحبه الحوش قالت..
/اهم المواد حداكم كان تبو حاجه نادوني..
مبروكه قالت..
/باهي..
ومشت المراة خشت وعيون منوبيه معاها..
..ويبدوا بشغلهم ومبروكه كانت اكثر من يخدم اما منوبيه كانت ممشيتها هدرزة وعقلها داخل الحوش..
شويه قالت لمبروكه..
/بنخش الحمام خلاص مش قادرة..
مبروكه قالت..
/باهي خشيلها كلميها ولاتبي نخش معاك؟
مبروكه قالت..
/لالا خليك انتي تو نخش بروحي..
ومشت منوبيه خدت شنطتها وخشت للحوش ورجعت مبروكه لشغلها..
🍃خشت منوبيه للحوش بهدوء وحذر وهي دور بعيونها..
وماخف وزنه وغلا ثمنه من تحف قعدت تلم فيه وتحط في الشنطه لعند ماطاحوا عيونها ع المدخل شافت عليه ساعة ذهب تبرق شافتها في يد صاحبة الحوش قعدت تتمعن فيها بالنظر للحظات بعدين رفعت حاجبها وخدتها ومشت بسرعه طلعت من الحوش..
بعد لحظات جت صاحبة الحوش بتطلع تشوفهم..
وهي ماشيه شافت ليدها مالقتش ساعتها بعدين تفكرت انها رمتها وحطتها ع المدخل بش تغسل ايديها..
لفت وولت للمدخل لقت مكان ساعتها فاضي استغربت وقالت.
/كيف هكي متأكده اني حطيتها هني..
ومشت ولت لدارها بش دور فيها..
وبعدت عمليه بحث مالقتش فيها اي اثر للساعه تأكدت انها كانت حاطتها ع المدخل واستنتجت ان وحده منهم يامبروكه يامنوبيه خشت وخدتها وبغضب طلعتلهم بسرعه..
🍃وهما في هالوقت كملوا شغلهم او بالأحرى كملت مبروكه شغلها بعد ماسيقت الجنان وقالت..
/خل نخش نادي المدام..
وتطلع المدام وفي عيونها يبان الشر منوبيه شافاته كويس.. مبروكه قالت..
/كملنا يامدام..
المراة قالت بحده..
/خشيتوا داخل؟
مبروكه شافت لمنوبيه اللي قالت..
/اني خشيت للحمام..
قدمتلها بغضب وخدت الشنطه اللي كانت حاطتها جنبها..
مبروكه قعدت تشوفلها بخوف..
ومنوبيه تقول بفجعه مصطنعه..
/خيرك شن في!!؟
وقعدت المراة دور في الشنطه بعدين نفضتها مالقت فيها شي..رمتها والتفتت ع مبروكه اللي كانت ترعش وهي تقول..
/خيرك يامدام شن صاير..
قالتلها بحده:شنطتك وين؟
مبروكه وهي ترعش اشرت عليها وقالت..
/اهيا..
كانت الشنطه محطوطه تحت شجرة مشت طول المراة خدتها فتحتها ونفضتها طول..
ويطيحوا منها قطع من التحف وساعة الذهب..

...يتبع....