#ولاد_تسعة "الفصل الاول/سميه تسعة"
#جمان_فريد
الجزء_العاشر"شبح الماضي"
⛔احداث هذه الروايه وشخصياتها من وحي الخيال بعض الاحداث غير واقعيه"فنتازيه" وبعضها بعيد عن واقعنا المعاش والبعض الاخر يلامس شيء من الواقع⛔
⚠️ملاحظه..
لما يبدا الكلام بهذه الرموز (♤ ♧) هذا يعني ان البطل/ة يسردوا في الأحداث..
اما لما يبدا بهذا (🌿) يعني الكاتبه هي اللي تسرد..
#الباقيات_الصالحات
قال ﷺ : (خُذُوا جُنَّتكُمْ منَ النارِ ؛ قولوا : سبحانَ اللهِ ، و الحمدُ للهِ ، ولَا إلهَ إلَّا اللهِ ، واللهُ أكبر ، فإِنَّهنَّ يأتينَ يومَ القيامةِ مُقَدِّمَاتٍ ومُعَقِّبَاتٍ وَمُجَنِّبَاتٍ ، وهُنَّ الباقِيَاتُ الصَّالِحاتُ) 📚 صحيح الجامع
■■■■■■■■■■■■■■■■■■■■■■■■■■■■■■■■■■■■■■
🌿هي إمرأة من ذلك النَوْع الفَرِيد ، شَغُوفة ، راقِيّة وَرَقِيقة كَزهرة الربيع كالزنبقة رائعة الجمال حسنها طاغي وَجَمَالها يَتَمَيَّزَ بالحياء ..
هي من النَوْع الذي تود لو تصغي له العمر كله بدون ملل ، النوع الذي يكفي كل احتياجاتك ويؤنس وحدتك ، طيبة القلب لا تحب النفاق والمصالح ولا الحقد هادئة وَنشيطة تُسْتَثْنَى بوجهها البشوش وَتَتمتع بذكاء كبير ، جل انشغالها بالكتابة وَأفضل هوايتها القراءة ..
إمرأة مُحبة للنجاح ، لديها إصرار وعزيمة قوية ، ذات عنفوان وكبرياء ، لا تُحب أن يسيطر عليها أحد ، معتزة بنفسها وَبكرامتها ، تُحب الصِدْق والصَرَاحة حتى وإن كانت صراحتها مؤلمة وأكثر ما يسعدها أن تقدم يد العون للجميع ، هي إمراة استثنائية تتسم بالعفة وَتتمتع بالوَفَاء والإخْلاص وإن كانت في نظرهم متخلفة لا تواكب تحضر بنات جيلها ، هي لا تهتم ولن تهتم🌿
••••••••••••••••••••••••••••••••••••••••••••••••••••••••••
وفي بلاد الغرب..
كان تسعه في حالة شغل مستمر اجتماعات ولقائات وزيارات رافقه فيهم محفوظ بإعتباره شريكه في شغله الخارجي ومعاهم حسنااللي تمثل الجهة القانونيه لأعمال زوجها..
حسناء ليها فترة ترافق في تسعه لما يشوف اشغاله في ليبيا نادرا ماتجمعه لقاءات بالنساء وكان تعامله معاهم باين فيه الحياء والاحترام الشديد لالاحظت عليه نظرة زايغه ولا طريقه ملتويه في الكلام معاهم..
بس اللي فاجئها وهي معاه في اوروبا انه رغم تعاملاته الكثيرة مع النساء وعاد وضع النساء معروف غادي زينه صارخه ومافيش احتشام وماعندهمش حدود لو الوحده فيهم اعجبت برجل عادي جدا تتقرب منها وتعبرله عن اعجابها والموضوع بعدين يصل لأبعد من ذلك.
وهالشي لاحظاته ع اغلب النساء اللي اجتمع معاهم تسعه اجتماعات عمل وهوعيونه مايغلطوش بالنظر ليهم نهائي والابتسامه نادرا ماترتسم ع وجهه ولو ابتسم تكون ابتسامه جاده ومايضحكش الا ع طرف محفوظ او غيره من الرجال اللي يكونوا حاضرين معاهم..
وهني زادت تأكدت ان الرجل اللي قدامها رجل حقيقي يستاهل يكون الرجل الوحيد اللي يتحركله قلبها وكذلك زادت فهمت ان مش كل رجل معدد لازم تكون عينه زايغه ويرعش عن النساوين زي مانقولوا..
🌿🌿🌿🌿
ليلا في الفندق اللي قاعدين فيه..
كان تسعه في غرفته يجري في مكالمه هاتفيه..
"والله قرايه ليه ليه عاد امتحانات في منهج تام تبي ثني ركاب"
ضحك وقال..
/بالتوفيق يالسرحانه لكن بنوصيك ماتجهديش نفسك خودي راحة بين فترة والتانيه..
"ايه مرة مرة نلعب مع البنات في نقيزة ويستيك"
قعد يضحك تسعه..
"ياربي محلا هالضحكه ربي مايحرمني منها"
ابتسم من قلبه وقال..
/ولايحرمني منك ومن كلامك الحلو اللي يخلي فيا واني راجل في الاربعين نتحشم "
سمع صوت ضحكتها اللي كان عالي..
قال بإبتسامه..
/والله مافي احلا ماضحكتك باهي..
هدت ضحك وقالت..
"جديات!؟"
قاللها:والله بصدق ياربيعه ضحكتك تطلع من وسط قلبك صادقه هلبه يعني ماتضحكيش الا لو كان اللي سمعتيه ولاشفتيه ضحكك حق..
"صح"
تنهد بعدين قال..
/مجبور نسكر بنمشي ندير طلة ع حسناء بعدين نولي نرقد..
"باهي سلملي عليها هلبه تصبحوا ع خير"
ابتسم بإستغراب لما جمعاته مع حسناء في الدعاء لأنها اول مرة ديرها..
/قدامك كل خير..
وماسكرش لين هي سكرت بعدين ناض ومشي طلع من غرفته بإتجاه غرفه حسناء..
🌸حسناء كانت مقعمزة ع سريرها قدام وراق تخص الشغل لكن ماكانتش تشوفلهم عيونها كانوايشوفوا في طيف تسعه وهي سرحانه بفكرها فيه..
ويدق الباب وتفيق من سرحانها،طول فزت ونزلت من السرير طلقت شعرها ووقفت قدام المرايه قعدت تسرح فيه بيدها بعدين خدت عطرها حطت منه..وتاخد نفس وتمشي للباب..
وصلت فيه وفتحاته..
هو قال بإبتسامه..
/كنتي راقده؟
ردت عليه وهي مبتسمه..
/لالا كنت مشغوله نقرا في العقود..خش..
خش وهي سكرت الباب وقالت..
/تعالى في حاجات نبي نحكي فيهم معاك..
هز راسه ومشي معاها وبعد خشوا خدت حسناء الوراق من ع السرير وقعمزت ع الكنبه وهو قعمز جنبها..
وبدت تحكي معاه في الشغل بعدين طلعت من الكلام عنه لمواضيع تانيه كانت مسليه وهو منسجم معاها ومرة مرة يضحكوا..
🍃تسعه بضحكه..
/طلع عندك في القرمه وخلتيني نقرم معاك الله يسامحك ويسامحني خلينا نولوا للخدمه..ولما جي بياخد منها الورقه هي شدت يده..
هو شاف ليده بعدين وجه نظره ليها..
شاف في عيونها نظرات تغزل في الحب غزل والدمعه كانت مغرقتهم ومن وسط قلبها طلع معاها اعتراف قالاته بنبرة حلوة..
"نحبك"
قعد يشوفلها شويه بعدين ابتسم..
🌿وهديكا الليله اصبح زواج حسناء من تسعه زواج حقيقي وولت زيها زي شريكاتها زوجه فعليا ليه..
🌿🌿🌿🌿🌿
وفي صباح يوم جديد في ليبيا..
كانت زكيه مجتمعه بنساوين العيله ع الفطور في حديقة القصر.
الصيف في بداياته واجوائه في الصبح كانت جميله..
وهما يفطروا في هدوء نزيهه قالت..
/امتى يبدا عرس ولد حماة هانيه؟
زكيه قالت..
/من غدوة..وجهت نظرها لربيعه وقالت..اكيد انتي مش ماشيه ع خاطر امتحاناتك عاد امتحانات في المنهج كله اقعدي اقري قرايتك خير..
بلقيس شافت لربيعه بضيق لكن ضرايرها مابوش يشوفولها نهائي..
وهي كالعاده رسمت ع وجهها ابتسامه مكابره وقالت..
/صح ماعنديش وقت نضيعه في العراس..
هني ضرايرها رفعوا عيونهم فيها اما بلقيس شافت لزكيه لقتها تشوف لربيعه بإبتسامه وهي مضيقه عيونها وهالنظرة تعرفها بلقيس كويس..
وربيعه خدت طاسه العصير شربت منها بعدين ناضت وقالت..
/نستأذن عمتي بنمشي نقرا..
هزت زكيه راسها بدون ماتتكلم وربيعه مشت طول..
رفعت زكيه حواجبها بعدين نزلتهم وولت تفطر واللي حواليها يسرقولها في النظر..
🌿🌿🌿🌿🌿
"البنيه ماشاء الله عليها متعلمه وفالحه وتهني"
وديعه وهي تسقي في الغرس قالت..
/ماعندنا مانديروا بعلمها المهم تجينا كنه صالحة تحط امي وبوي ع راسها وتقدرنا وتكون يد بيد معانا في كل شي يعني ترضى تعيش معانا ياعاتكه..
عاتكه قالت..
/وهدا اللي فهمته لأمها وهي قالت زي ماكنت مع ناسي بنتي بدير زيي وخير مني..
تنهدت وديعه وقالت..
/ان شاء الله..
عاتكه قالت..
/باهي امتى بيمشي بوعجيله يشوفها؟
وديعه حطت الطوبو تحت شجرة الليمون وقالت..
/بالك الاسبوع الجاي الاسبوع هدا عنده خدمه في المحلات هو والولاد..
عاتكه:خلاص تو نقوللها..
وديعه:هي نوضي نخشوا الجو بدي يسخن..
مدت عاتكه يدها وقالت..
/بالله ساعديني ياوديعه..
قدمتلها وساعدتها توقف وهي تقول..
/نخمم ع سريب جيابكم..
عاتكه بعد وقفت قالت..
/تفاهمنا نديروا لمتين وحده في حوش متاعينا ووحده في حوشنا..
هزت وديعه راسها وقالت..
/هو هدا..هي تعالي..
ومشت هي وياها وخشوا للحوش وهما مازال يهدرزوا...
🌾🌾🌾🌾🌾
"تي غير ليش مدايرة هالمناحه حرام عليك هادي نعمه من ربي غيرك مش لاقيها!"
فطيمه وهي تبكي قالت..
/عييت تحندبت في جرته وجرة عزايمه اللي ماتمش وطلباته اللي ماتخلصش وفوق هكي صغار صغيرين ع رووس بعض يبوا معاناه ريان مازال ماسكرش العام وعمران عمره عامين كيف بنعاني هدا كله واني حامل قوليلي!؟
اختها قالت..
/ماتت امي اللي جابتنا في جرة بعض وكانت دير زيك واكثر!
فطيمه قالت بألم..
/امي كانت تحصل في معامله باهيه من بوي كانت تسمع منه في الكلام الطيب عمره ماوجعها ولاكسر بخاطرها لكن اني..!
اختها قالت بحزن..
/جايبلك من يعاونك ياوخيتي مش مخلي كل شي عليك..
فطيمه ببكي قالت..
/تعرفي يومها هزبني قدامهم يالاش جاه الغدي صامت شويه قسما بالله مسح بيا الارض قدامهم يانجيه..
سكتت اختها وهي مضايقه ع الآخر..
وفطيمه مازال متابعه تقول..
/ومازال ياماشايله في قلبي ياوخيتي شي ينقال وشي ماينقال..
اختها قالت بضيق..
/قلتهالك قبل وبنرجع نقولهالك مرة تانيه هدا نصيبك وخيتي ارضي بيه وقولي الحمد لله..
هزت راسها وقالت بألم..
/الحمد لله ع كل حال الحمد لله..ورجعت انهارت بالبكاء واختها قربت منها وخدتها في حضنها وقعدت طبطب عليها وهي موجوعه ع حالها..
🌾ومن دار المعيشه للمربوعه..
وين ماكان سلطان مقعمز مع خوته ويلعب معاهم الزوز متعلقين بيه هلبه وغير يشوفوه يتلفهوا عليه..
🌱سلطان بضحكه بوجع..
/عنشكلك فرخ ريان خلعتلي رقبتي..
وخداه وضمه وقعد يحرك في وجهه ع بطن ريان وريان يضحك،وينقز ع ظهره عمران وهو يقول بلغه طفوله..
"حصان..حصان"
ضحك وقال..
/باهي ياودي باهي..
حط ريان وعطاه لعبه يلهى بيها بعدين حط ايديه ع ارض وقال..
/عمران هيا اركب..
وركب عمران ع ظهره وقعد سلطان يمشي بيه وريان يتفرج عليهم وهو يضحك ببراءة...🌾وبوهم في حوش امه اللي ناداته ع الغدي..
بعد تغدا معاها وشرب الشاهي وهدرز عليها هدرزة قنينه امه خلت ختامها مسك..!
.."تشكيلك مني !؟"
امه قالت..
/لاورب البيت عمرها من لما خدتها عمرها ماتكلمت عليك بسو لكن ياوليدي اني عندي عيون ونشوف في كل شي ساده غير هزبيتك ليها قدام خواتك وبناويتهم نهارتها..
بعصبيه مكتومه قال..
/وعلاش هزبتها يام مش ع خاطر اهمالها للصغار ريان قريب تبزع عليه براد الشاهي حرقه واللا مقعمزة دق في الحنك..
امه قالت..
/دق في حنك شني بس!؟ كانت تعاني في عمران اللي بل حوايجه بالميه..
اشر عليها وقال..
/هاه بروحك قلتيها..مراة مهملة ومرخيه وديما حاله ذقنها..والله لولا بوها ولولا الصغار ماخليتها تقعد معاي اكثر ماقعدت..
امه بإستياء قالت..
/ربي يهديك ياولدي ربي يهديك..
قدم باس راسها بعدين ناض وهو يقول بنرفزة..
/بالسلامه..ومشي طلع من حداها وهي تبع فيها بنظراتها المتأسفه وتقول..ماتتعاشرش ياولدي ماتتعاشر..
🌿🌿🌿🌿🌿
وبدي عرس ولد حماة هانيه..
وفي اليوم الأول داروا عزومه كبيرة للرجالة والنساوين..
🍃قدام جناح زكيه كانت ربيعه واقفه تستنى فيها ع جية نزيهه،كالعاده ربيعه متجاهلتها تماما ونزيهه ماتهنيش في روحها..
ابتسمت مكرا لما وقفت جنب الباب وقالت..
/جايتيها تحاولي معاها بش تخليك تمشي..
ربيعه قعدت تشوفلها وهي مبتسمه ببرود ومحتفظه بصمتها..
نزيهه:اكيد عارفه ان هانيه ماتبيكش تحضري وعمتي دارت قرايتك سبله بش تقعمزك يعني ماتبيش تحرجك..
وربيعه ع حالها مانطقتش بحرف..
نزيهه:بجديات مشفتش حد بليد زيك هكي..
رفعت ربيعه حواجبها ونزلتهم وهي مبتسمه ببرود مستفز..
وتفتح زكيه الباب شافتهم الزوز واقفات استغربت..
ربيعه قالت..
/عمتي بعد اذنك العشيه بتجيني صاحبتي تقريني..
زكيه:مش الولاد يقروا فيك؟
ربيعه قالت..
/حتى هما عندهم امتحانات ياعمتي مش فاضيين بيا..
تنهدت زكيه وهزت راسها بالموافقه وهي تقول..
/باهي..بعدين قالت..لكن ماتهمليش الصغار ماتعبيش ع الخدم..
ربيعه قالت..
/حاضر عمتي..قعد اخر طلب..
زكيه:اللي هو؟
تعبوا عيون ربيعه بالدموع وهي تقول..
/اكيد هانيه بتنشغل بالعرس ومش حتفضى لفداء نبيها تجي تقعد عندي لين يتم العرس..
♤قالت امي في حاجات هلبه صارتلي في حياتي ماتنتساش بس اكثر شي كل يوم يخطر عليا ويقهر فيا وين نتفكره لما كنت نطلب منهم يجيبولي اختك تقعد عندي وكأنها مش بنتي بكل..اني لما حكتلي الحاجه هادي انقهرت اكثر منها مافي شي يقهر البنادم غير انه يقعد يتوسل ويترجي بش ياخد حاجه هي من حقه اساسا..قهر مابعده قهر..
🌿"خل نشوف هانيه قبل"
هزت ربيعه راسها وملامح االحزن باديه ع وجهها..
غيرت زكيه نظرها عنها لنزيهه ومدتلها حاجه لما شافتها ربيعه انذهلت فيها هلبه..
بروش ع هيئه اجنحه طير مفروده كان من الذهب الابيض ومرصع بالألماس..
زكيه قالت..
/حطيهولي كويس ماعرفتش وين نحطه..
خدت نزيهة البروش وهي تشوف لجاكيت بدلة عزوزتها بعدين قدمت وحطتهولها..
ربيعه بفضول قالت..
/تسعه دارهولك؟
زكيه قالت..
/ايه من عشرة سنين..
ربيعه قالت بإبتسامه..
/ماشاء الله..قنين هلبه..
نزيهة وخرت وقالت..
/خلاص عمتي..
مشت زكيه وهي تقول..
/هيا تعالي معاش في وقت..
وهما ماشيات شافت ربيعه لبروش نزيهه الذهبي اللي كان ع هيئة شمس وقتها حست بغيره شديده منها وتمنت لو تسعه يديرلها واحد زيه لكن بعدين تسائلت في نفسها..
"علاش مش داير لفريحه زيها!؟"
وتستاقظ بفزع من سرحانها لما سمعت عزوزتها تقول..
/خيرك قاعده واقفه غادي!؟
ربيعه قالت بشي من الربكه..
/سهيت شويه..
ومشت بسرعه وهما قعدوا معاها بعيونهم لين اختفت..
نزيهه شافت لزكيه لاحظت ع وجهها ملامح عدم الارتياح بعدين هزت راسها ومشت ونزيهه لحقتها وهي مبتسمه بمكر..
🌿🌿🌿🌿🌿
وفي فيلا حماة هانيه..
في صاله كبيرة تعبت بالضيوف كانت زكيه متصدرة الجلسه هي وكنتها نزيهه الزوز يعتبروا اهم الشخصيات النسائيه في الالف والخمسين وناسها كلهم بأكابرهم وغلابتهم كانوا يتوددولهم ويتمنوا في رضاهم..
لهدا اغلب المعازيم واهمهم كانوا حواليهم يهدرزوا عليهم وهدا كله مخلي هانيه تزيد تشوف روحها اكثر واكثر قدام اهل زوجها بالذات سلفاتها وعاطفه اولهم..
عاطفه اللي كانت دور في الفرصه بش تحرجها وتقلل منها..
🍃"وين كنتك الرابعه ياخالتي زكيه؟"
هالسؤال طلع من عاطفه اللي كانت هانيه تشوفلها بغل..
زكيه قالت..
/والله عندها قرايه منعتها من الجيه..
ووحده من المعازيم قالت..
/تقرا في الجامعه؟
ضحكت عاطفه وقالت..
/لاجامعه شني كنتها هادي تقريبا واخدة الابتدائيه بس..
نزيهه وفريحه وبلقيس شافوا لهانيه امازكيه ونبيهه كانوا يشوفوا لعاطفه بإمتعاض..
وحده تانيه من المعازيم قالت..
/معناها تكمل في قرايتها؟
زكيه قالتلها..
/ايه..نظام منازل..
=حلو هلبه..هادي شكلها مراة طموحه..
وحده تانيه قالت..
/ايه سمعت عنها من صديقه ليا استاذه في الجامعه بنتها تكون صديقتها قالت زمان ظروفها منعتها تكمل قرايتها وتوا لما وضعها تحسن بعدزواجها من البي تسعه اول حاجة دارت تعلمت اللغه الانجليزيه بعدين ولت لقرايتها..
عاطفه قالت..
/لازم دير هكي بش تولي لايقه بعيلة بيت المال..
بلقيس بدت تعصب ونبيهه اللي معاش قدرت تسكت قالت..
/لاهي عندها طموح وحاطه في بالها هدف وتبي توصله بنت اختي قالت عندها خلفيه ثقافيه تحب تقرا من زمان..
المراة نفسها قالت..
/صح نفس الكلام اللي قالاته صديقتي قالت من صغرها كانت وين تجينا تاخد في كتب من مكتبة راجلي وقالت من حبها للقرايه مرة هديتها مجموعه كتب..
وحده من سلفات هانيه قالت..
/يعجبوا فيا النساوين اللي هكي بجد برافو عليها..
وبعض من النساوين وافقوها الرأي وابدوا اعجابهم بربيعه..
عاطفه قالت بإبتسامه..
/اذا عرف السبب بطل العجب مش بلاش خداها تسعه بيت المال..
زكيه قالت..
/عين ولدي ماتنزل كان ع الحاجه الباهيه..
ام معمر قالت..
/صح كناينك كلهم ماشاء الله عليهم..
زكيه وهي مبتسمه قالت..
/زي كناينك يامطيعه..
ابتسمت هانيه بمكر وهي تشوف لعاطفه وعاطفه قالت مع باقي سلفاتها..
"صحيتي خالتي زكيه..بارك الله فيك"
واستمرت الهدرزة في مواضيع تانيه لكن نزيهه وفريحه قعدوا ملتزمات الصمت ونار الغيره تاكل فيهم...
🌿🌿🌿🌿
ومع العصريات جت نوال لربيعه وطول مشت بيها لحديقه القصر..
قعمزوا حوالين الطاوله الرئيسيه والصغار حواليهم بين اللي يلعبوا زي فاضل واروى وكريم وثريا ومتين..
وبين اللي يقروا زي هشام وسلامه ومعاذ واشرف وكريمة..
وهنادي شاده الحراسه ع الصغار مع زهره..
طلعت مجيده بسفرة الضيافه حطتها قدام ربيعه وضيفتها..
🌱"الله جاتوا ماناكل فيه كان لما نجيك"
ربيعه وهي مبتسمه قالت..
/قبل تروحي تو نعطيك سفره ترفعيها لامك وخواتك.
نوال قالت..
/ماتنسيش اللبسه ربوعه عابيه عليها.
ربيعه وهي مبتسمه قالت..
/بعد نكملوا نرفعك لجناحي وانتي اختاري بروحك..
🍃هدا كله سمعاته مجيده وهي تحط في السفره وهي تمشي من حداهم ع اقل من مهلها بش تسمع باقي حديثهم كويس،وهي ماشيه قامت عيونها لقت واحد من الحراسات يشوفلها بنظرات اعجاب غيرت عيونها عنه بغرور وكملت طريقها وهي تمشي بشي من المياعه وهنادي تشوفلها بإزداء وهي تقول..
/غير شن عاجبك في هالخلقه ياوخيي..
سمعت ضحكة زهرة شافتلها بعدين ضحكت معاها وتغير نظرها للصغار وتشوف مايخليها تشهق وهي تقول..
/تي وين ماشي ياكريم!!..واك هالولد قداش متعب سلامته..ومشتله تجري..
زهره بعد ماكانت تشوفلها وهي تضحك غيرت نظرها لربيعه وصاحبتها وقعدت تشوفلهم وهما يضحكوا...
▪▪▪▪▪▪▪▪▪▪▪
"قبل لتروح ماخلت مالمتلها من الكوجينه فواكه ومعلبات وسفرة باسطي وحتى من الشكلاطه حطتها بعدين ريتها وهي طالعه شاده في يدها كياس كبار متاع دبش وخلت السواق يروح بيها"
نزيهه وهي مضيقه عيونها قالت..
/اممم..
مجيده؛هدا غير الحركات البايخه اللي دير فيهم صاحبتها ضحك بصوت عالي وجو لفت نظر..
نزيهه بتركيز قالت..
/لفت نظر!
مجيده قالت..
/ايه ياللا صاحبتها هادي مش مزبوطه الحق..
هزت نزيهه راسها بعدين قالت..
/باهي غدوة الصبح نبيك تجي تعاودي الكلام هدا لللا الكبيره بعد مانسألك شن صار وحني مهناش فاهمه عليا؟!
مجيده هزت راسها وقالت..
/فهمت ياللا..
🌿وقدام جناح زكيه..
كانت واقفه ربيعه وهي تسمعلها وقلبها يتألم..
🍃زكيه:دارتلها مراة ترد بالها منها ماتخمميش عليها اقري قرايتك وماتشغلي بالك بشي تاني غيرها..
ربيعه وهي شاده دموعها قالت..
/تصبحي ع خير..بعدين لفت ومشت ودموعها يطيحوا وحدة ورا والتانيه..
وزكيه معاها بنظرها وهي تفكر بتساؤل كان يضيق في صدرها..
هل اللي دير فيه مع ربيعه صح او غلط؟
هل قاعده تظلم فيها ام انها قاعده تحطلها في حد من البدايه يمنعها من التحول لغول ياكل الجمل بما حمل ويسيطر ع كل شي!؟
الكلام اللي سمعاته عنها اليوم خلاها ترجع تحس بشعور الاعجاب اللي كانت حساته اتجاهها قبل..خلاها تميل بعض الشيء لعدم تصديق شكوكها اتجاهها لكن الركن المظلم في عقلها قعد يفكر فيها ببعض التصرفات اللي صدرت من ربيعه بينتلها انها انسانه مش ساهله وعندها جانب تاني مخيف مازال مدرق ويراجي في فرصة بش يطلع..
تأففت بضيق واستغفرت بعدين خشت لجناحها ومازالت عايشه في صراع داخلي مع افكارها ومشاعرها..
🍃اما ربيعه..
بعد ماخشت لجناحها توضت وصلت ركعتين ختمتهم بشكوى أوجاعها لله سبحانه وتعالى..
"ياربي اني ماليا حد غيرك مانيش منسنده ع حد غيرك انت بس ياربي..ياربي اعطيني الصبر والقوة بش نتحمل اللي اني فيه راهو واعر هلبه ياربي اوعر بهلبه من اللي عشته زمان..ارجوك ياربي ارجوك ياربي ماتمكنش ظالم مني ولاتخلي حد يخسرني في تسعه عارفني ياربي قداش نحبه ومانقدرش ع فراقه ارجوك ياربي كبر مكانتي في قلبه وماتخليني ننزل من عينه بكل ياربي..ياربي عزني ياربي عزني ياربي عزني ياربي مانبي العزه من حد غيرك يارب"
🍀من كان يريد العزة فلله العزة جميعا🍀
🌿🌿🌿🌿🌿
ويطلع صبح تاني يوم..
وفي مكان زكيه المفضل وبحضور كناينها الكبار وربيبتها نفدت مجيده اتفاقها مع نزيهه واللي سمعاتهزكيه خلا كفة الظن السيء في ربيعه ترجح ع كفة الظن الحسن وزاد القلق كبر في قلب زكيه..
لكن بلقيس الكلام اللي قالاته مجيده ماخشش راسها وحست ان نزيهه هي اللي خلتها تقوله..
🌿🌿🌿
ويجي اليوم الكسوة..
وهانيه اللي قررت تصدر اختارت امها بش تلبسها الصدرة..
🌱"الله يبارك ع بنيتي الله يبارك عيني ماضرك ياماما"
هانيه وهي مبتسمه بحب قالت..
/طالعتلك ياريلا انتي..
ضحكت زكيه ولمعة الدموع بانت في عيونها بعدين قالت..
/هي اطلعي ماما هي..
ومشت هانيه طلعت الاولى وزكيه قعدت في دارها في الجناح دور ع البروش تبي تلبسه مكان الخلال ع الحولي لأنها لابسه تركيبه..
🍃وهانيه لما طلعت من الجناح لقت ربيعه واقفه قدامها..
رفعت حاجبها وشافتلها من فوق لتحت..
ربيعه:علاش ماجبتيش فداء تقعد عندي اليوم؟
هانيه؛تو مش ماما قالتلك درتلها داده؟
ربيعه بضيق..
/ع الاقل جبتيها اليوم بس قعدت عندي..
بتهكم قالت هانيه..
/مش قالوا ماعندكش وقت غير للقرايه..
ع طلعة زكيه وهي متوتره فالت..
/ماما هانيه ماشفتيش البروش متاعي؟
ربيعه قالت..
/اهوا ياعمتي..ومدتهولها..
زكيه شافتلها بإستغراب وهانيه قالت..
/شن يدير عندك؟
تجاهلتها ربيعه وقالت لزكيه..
/لقيته ع طاولة صالون العيله..
هانيه:نعم! ماما ترمي بروشها هدا برا جناحها مستحيل!
زكيه قالت..
/امس بعد ماروحت خشيت غادي بش نكلم خوك..شورني رميته ونسيته..
ابتسمت ربيعه وقدمتلها وهي تقول..
/خل نلبسهولك..
وكيف جت بتمد يدها اللي فيها البروش خداته منها هانيه بقوة وقالت..
/ترا قربي ماما..
زكيه شافت لبنتها وقالت..
/ساويه زين..
هانيه:حاضر..شن قاعده واقفه انتي بري شوفي شن في وراك..
ربيعه بلعت ريقها وقالت..
/نستأذن عمتي..
هزت زكيه راسها وربيعه مشت طول..
بعد ماتباعدت زكيه قالت لبنتها..
/مش هكي يا هانيه..
هانيه قالت..
/قصدك مش مساوي..
زكيه:قصدي ع اسلوبك مع مرت خوك خفي عليها شويه..
وقفت هانيه ع حيلها وهي تقول بعصبيه..
/عندك حق ماسمعتيهاش كيف تكلم فيا ع فداء علاش ماجبتيهاش؟ ومفروض جبتيها؟ تتكلم من فوق راس خشمها ناقص تقولي هادي بنتي مش بنتك..ودمعوا عيونها..
زكيه بغضب..
/خلاص ماما خلاص ماترعشيش روحك وكان قلتي من الاول راني وريتها..
هانيه:مابيتش نديرلها مشكله..
زكيه شدت يد بنتها وطبطبت عليها وهي تقول..
/خلاص ياماما خلاص..
رفعت هانيه يد امها وباستها بعدين قالت..
/خلاص حبيبتي خل نمشوا معاش في وقت..
زكيه قالت..
/كابك في الصاله؟
هانيه؛ايه..
ومشت زكيه وهي تمشي في بنتها معاها ومن داخل كانت تغلي من الغضب..
🌿🌿🌿🌿🌿
وتمر ايام الفرح وينتهي وفي اخر الاسبوع عزمت هانيه عيلتها ع مزرعة راجلها امها ونساوين خوتها المحببات واختها وكذلك طلبت من معمر يعزم مرعي..
🌱"معقوله ياأمي كلنا نمشوا ونخلوها بروحها!؟"
زكيه؛قدامك قالت غدوة يبدوا امتحاناتها تبي تقعد تقرا..
بلقيس:وخيره الصغار اللي عندهم امتحانات زيها بيمشوا؟!
زكيه ضيقت عيونها وقالت..
/شن تبي تقولي يابلقيس!؟
بلقيس قالت..
/نبي نقول انك ع خاطرهانيه ماتبيهاش تمشي ولا؟
عقدت زكيه حواجبها وقعدت ساكته..
بلقيس قالت..
/انتي امي التانيه وقدرك عندي كبير هلبه لكن معليشي وسامحيني تعاملك انتي بالذات مع ربيعه ماعجبنيش منك بكل..
رفعت زكيه حاجبها وقالت..
/والله كان واجعاتك هلبه اقعدي معاها..
ابتسمت بلقيس بأسف وقالت..
/حاضر اللي تبيه يصير..نستأذن..ومشت من قدامها وخلتها معصبة منها ع الآخر..
▪▪▪▪▪▪▪▪
"علاش هكي يابلقيس اني اللي مانبيش نمشي"
بلقيس:مانبي ندوي في شي ياربيعه خلينا من السير المنكده هادي وانسيها..ابتسمت بحماس بعدين قالت...خاطر ع بالي اليوم نقلبها فرفشه..
ضحكت ربيعه وقالت..
/ع شن ناويه؟
بلقيس قالت بضحكه..
/نوضي معاي للكوجينه..
🍀ونزلوا للكوجينه وبدت بلقيس تعطي في توجيهاتها للخدم..
طلبت منهم يطلعوا لحم ودجاج يتبلوهم وقالت..
"فيكم وحده تعرف ديرلنا مكرونه ع الحطب"
ربيعه تشهت عليها وقالت..
/جي خاطري فيها هلبه..
هنادي قالت..
/خوي يدير في خليقة مكرونه لاقبلها لابعدها..
بلقيس:خلاص وتي بضاعتها واطلعيله بيها..
🌸ولأن الجو كان لطيف قعمزوا برا..
برنيه وهنادي ومجيده وزهره ومعاهم بلقيس وربيعه وبعيد عليهم شويه بلعيد يطيب في المكرونه ويشوي..
بلقيس كانت ديما محسسه الخدم انها وحده منهم وفيهم لهدا كانوا منطلقين معاها كلهم ماعدا مجيده ديما تحس ان بلقيس مش عاطيتها وجه..
🍀ع الغدي..
بلقيس؛خوي تسعه زي بابا الله يرحمه في كل شي تعرفي ماما الله يرحمها قالت الوحيد اللي كان متقبلني بعد خداني بوك وهو اللي شجعني نخش الاسلام وقالت بعد اسلمت عطاني هديه حلوه قاعده عندي..هكي زي االتعليقه ناقش عليها اسم اسيا وقتها كان يقرا في الابتدائي تصدقي..
وربيعه تسمع وقلبها يرفرف بين ضلوعها..
وبلقيس متابعه تقول..
/ع قد مايبان توا واعر شويه وبعيد بسبب خدمته لكن قاعده نشوف فيه خوي اللطيف الحنين اللي عمره ماوجعني بنظرة عين ربي مايحرمني منه .
ربيعه قالت بإبتسامه..
/آمين..تنهدت بلقيس وقالت..
/استاحشت قيس هلبه ليا قريب عام ماريتاش..
ربيعه:كان تقدري تقنعيه بالزواج خودوله وحده من هني..
ابتسمت بلقيس بأسف وقعدت ساكته..
ربيعه:لازم ينسى ويعيش حياته..
بلقيس قالت..
/هو يحاول ينسى وان شاء الله يقدر ينسى ويتخطى..
ربيعه قالت..
/ان شاء الله..
بلقيس شافت للصونيه وقالت..
/كولي..
ربيعه قالت بضحكه .
/لاخلاص معاش نقدر عبيتها شوا..
بلقيس ضحكت وقالت..
/حتى اني..غيرت نظرها لولدها لقاته في حجر زهره توكل فيه قالت..تحب الصغار هلبه زهره..
ربيعه قالت بأسف..
/يفكروا فيها بخوتها..
بلقيس؛تعرفي قصتها؟
ربيعه قالت..
/ظروفها تعبانه مسكينه هدا علاش سيبت ماليها وجت هني بش تخدم عليهم..
بلقيس شافت لزهره بشفقه وقالت..
/ياروحي..
🌿🌿🌿🌿🌿🌿
"من يومها هبله وعبيطه اختي هادي"
نزيهه:صح ع نياتها بلقيس وقلبها رقيق..
هانيه:ايه حقه في حاجه بنقولك عليها ونسيت..يوم الكسوة..
🍃وحكت لنزيهه الموقف اللي صار قدام جناح امها برؤيتها الخاصه طبعا🍃
نزيهه:ويوم العزومه لقيتها واقفه في باب جناح عمتي ع اساس تراجي فيها بش تاخد اذنها في جية صاحبتها بعد مشينا اني وعمتي قعدت واقفه قدام الباب لعند مااستاقظت بيها عمتي وقالتلها شن ديري واقفه غادي قالت سهيت وهربت تجري..
هانيه حطت يدها ع خدها وقالت..
/يانهاري! وفوقها الجرابيع صاحباتها يجوها في القصر!..
نزيهه:ويروحوا حاملات ومحملات شي من الكوجينه وشي دبش..
هانيه بصدمه..
/ياغبارة كان ماتخنب هي وياهم..!
نزيهه:كله متوقع ياهنو..
هانيه بخوف..
/لالاوضع زي هدا ماينسكتش عليه..
نزيهه قالت..
/لابتسكتي لان عمتي ماتبي تسمع ولاتشوف شي مهما نقول ومهما نوري تقولي فكيني من جو الضراير..
هانيه بنرفزة..
/بكل ماما هادي..خبطت كفوفها ببعض بعدين قالت..ااه وكان تنكشف قدام تسعه بس..
نزيهه:حتنكشف حتنكشف غير نخلوها تاخد راحتها بش طيح في شر اعمالها..
هانيه فكرت في كلامهاشويه بعدين هزت راسها موافقة عليه..
🌿وبعيد عنهم شويه في نفس المكان..
فاطمه:مايكلمش فيك؟
فريحه بضيق:قريب تلاته مرات في اليوم يكلم فيا..
ضحكت فاطمه وقالت..
/ونظني ضرايرك مسكينات مايحصلوش منه كان في مكالمه وحده..
فريحه بضيق..
/مش قادرة تفهميني يافاطمه اني بديت نحس ان قلبه معاش ولى ليا بروحي المراة تحس يافاطمه تحس..
فاطمه:اني ماعندي مانقولك كان شي واحد بس كانك بتخلي الغيره تسيطر عليك حتخسري قلبه كله يافريحه،صدقيني حالكم انتي ونزيهه مع ربيعه عواقبه وخيمه اني لو نعرف نزيهه تسمع مني راني نصحتها النصيحه اللي بنقولهالك توا خلوا المراة في حالها مدام ماريتوا منها شر..والله العظيم لو كانت وحده شيطانه راهو من زمان قالبه تسعه عليكم وخلاته يطلقكم حتى الطلاق ع اللي ديروا فيه معاها..
فريحه بنرفزة قالت..
/مادرتلها شي..
فاطمه:لكن مطاوعه نزيهه ع اللي دير فيه الحاجه هادي بروحها تخليك شريكتها في كل افعالها يافريحه..ارجعي لعقلك وخليك صاحبتي اللي نعرفها ام قلب طيب ونيه صافيه..
التزمت فريحه الصمت وهي مضايفه وفاطمه تشوفلها بأسف لانها تعرفها مااقتنعتش بكلامها بسبب سيطرة الغيرة عليها..
🌿الغيره اللي خلت كريم يدير سالطوا من الجهة المقعمزين فيها بوه ومعمر وهالسالطو خلا الميه تتناثر وتجي ع معمر..
🌱مرعي:معاش لقيت وين خلاص!؟
كريم وهو في المسبح قالت..
/اووه..اسف يامعمر سامحنا..
مرعي؛قول عمي معمر ياقفل..
ضحك معمر وقال..
/حصل خير حصل خير تو نمشي نغير ونجي..
ومشي معمر وكريم يلحق فيه بنظراته الحاقده..
مرعي:خير بلاك انت من لما جينا وقلة الادب نازله عليك..
كريم:دير سالطو ياحاج الميه مش عاديه..
وقعد يعوم..
مرعي قال بإزدراء..
/خزي منظر مقلب..
والولاد حواليهم يسمعوا ويضحكوا...
🌿🌿🌿🌿🌿
"قال مش خاطيه عجباته يعني"
رقيه وهي تاكل في الكعك قالت..
/كويس..باهي ع شن اتفقتوا؟
عاتكه قالت..
/العرس ان شاء الله قبل رمضان بشهر..
رقيه:باهي مازال الوقت..
تنهدت عاتكه بضيق وقالت..
/واجعتني وديعه هلبه..
رقيه قالت بحزن..
/بختها بالهون وخيتي..
عاتكه:امي تخمم فيها هلبه..
رقيه:ربي يديرلها طريق ويجيها راجل يستاهلها..
عاتكه قالت..
/آمين..
ويسمعوا جرس شقة عاتكه يرن قالت..
/اكيد البنات.."حمواتها"..وناضت مشت بش تفتحلهم..
🍃وفي حوش اهلهم..
كانت وديعه مقعمزه عند رجلين بوها دلك فيهم وامها حداهم دير في العاله وخوتها مقعمزين..
بوعجيله:سمعت بالنعاجي قال بيبيع كل شي عنده هني وبيسافر لمصر..
البدري قال..
/ايه وعاد هو هني ياما عنده اراضي وحياش ومحلات في السوق الكبير..
عبد الباسط:بتصير دعكه بين الحيتان الكبار..
وديعه قالت..
/تسعه وكمال..
البدري:يستر الله الفتره الاخيره هما الزوز العلاقات بينهم انقطعت بكل كم مناسبه في مناسبه داروها عيلة بيت المال ماحضرهاش كمال..
ام بوعجيله قالت..
/راهم يشبعوا..
عبد الحافظ قال..
/كل واحد فيهم يبي يملك الالف وخميسين كلها حيقعدوا يتعاركوا ع الحاجه هادي لين واحد فيهم ياخدها كلها..
بوعجيله:غير من حرب وسلاح..
وديعهقالت..
/اجارنا الله..
البدري:لالا ماتصيرش الزوز مايديروهاش الحاج الخضر رحمة الله عليه قال اللي يخون العهد ويطلع عن الصلح لازم ناس الالف والخمسين كلهم يحاربوهم لأنهم ولوا في حكم الفئه الباغيه والناس لليوم متفكره كلامه هدا..
مرته قالت..
/الله يرحمه قدر كلمته زي قدره قاعد حي بين الناس..
وديعه قالت لبوها..
/حق يابوي لما وقف الحروب ودار الصلح عمره مافاتش 30عام؟
البدري قال..
/كان عمره 25سنه..
كلهم بدت ع وجوههم ملامح الدهشه ماعدا مرته..
عبد الحافظ قال..
/معقوله!؟
البدري قال..
/من صغره راجل تربي ع ايدين عمه "يوسف" كان فارس وصنديد وعنده حكمه ياما جدكم حكالي عليه..
وديعه:رباه عمه!؟ اول مرة نسمع بيها..
امها قالت..
/بوه توفى وهو صغير هلبه..
وديعه هزت راسها وهي تفكر في الكلام اللي سمعاته..
عبد الحافظ قال..
/معروفين عيت بيت المال بالتاريخ المشرف والسمعه الباهيه امثالهم مايخونوش العهود ولايطيحوا كلمه قالها كبيرهم..
البدري:الخوف كله من البنداريه..
وديعه:لكن توا ربي هاديهم..
البدري:ياودي..استغفر الله في حقهم لكن مهئه..
♤مع ان البنداريه كانوا مكشوفين للكل لكن مافي حد قطع تعامله معاهم يقولك مالينا منهم الا الظاهر..ايه الفلوس والخوف ع المصالح يخلوا ناس دير مايعاكس مبادئها ع مر العصور مش غير في وقتنا هدا بس..
🌿🌿🌿🌿🌿
وبدت الامتحانات..
وربيعه كانت تمشي يوميا للمدرسة يش دير امتحاناتها ولما تروح تراجع هي وهشام وتفرح معاه لما يعرفوا الزوز انهم أبلوا بلاء حسن..
وكذلك كانت تسعه يتصل يوميا يسأل عنها ويشجع فيها وحتى حسناء وعبير كانوا يكلموا فيها ويرفعوا معنوياتها..
وقعدت عايشه حالة الحماس والانطلاق هادي لليوم ماقبل الاخير..
هداكا اليوم كان يوم اربعاء..
هانيه جت فيه للقصر بش تتفرج ع حلقة برنامجها مع العيله..
في نفس الوقت كانت نوال صاحبة ربيعه موجوده تقري فيها للإمتحان الأخير...
🌱"ماشاء الله عليها ماشاء الله عليها زي العسل"
ربيعه وهي مقعمزه بنتها في حجرها قالت بضحكه..
/نشوفوها عندك يارب..
نوال قالت بضحكه..
/قريبا ان شاء الله عاد هاه زي ماتفاهمنا من اول زغرودة بتجي..
ربيعه قالت بضحكه..
/ان شاء الله..
ناضت نوال وهي تقول..
/خلاص هداكاهو لازم نروح توا..
ناضت ربيعه وهي ضامه بنتها قالت..
/راجي نجيبلك حاجات ترفعيهم معاك للبنات..
نوال؛تي ساد ياربيعه راهو ياخدوا ع الدلع مش باهي ليهم..
ربيعه وهي تضحك قالت..
/خل ياخدوا عليه باك تحسابي بعد تتزوجي بننساهم..
ومشت بتطلع من دار الدراسه ونوال وراها..
وصلوا الزوز في حجرة تانيه كانت حاطه فيها ربيعه كياس الحاجات اللي جهزتهم لنوال..
خشولها وخدتهم نوال بعدين مشت مع ربيعه اللي كانت تبي تسقدها...
وقبل ليوصلوا للباب الرئيسي وقفتهم برنيه..
"معليشي ياللا شويه"
ربيعه وصاحبتها استغربوا بعدين قالت ربيعه..
/خيرك برنيه؟
ع جية زكيه قالت لبرنيه..
/خوديهم منها..
نوال شافت لربيعه وربيعة قالت بقلق..
/شن في ياعمتي!؟
زكيه قالت بحزم..
/برنيه خودي الكياس وفتشيهم..
ربيعه بصدمه قالت..
/عمتي!
خدت برنيه الكياس من نوال اللي كانت ترعش مع بعضها وبدت تفتش فيهم..
ربيعه بصوت صارخ..
/شن هدا شني!؟
زكيه شافتلها بحده..
وبرنيه اللي تفتش طلعت كيسه سودا ملفوفه فتحتها ولقت فيها حاجات كادوا يشلوا ربيعة وصاحبتها من الصدمه..
بروش زكيه..قلم حبر من الذهب الخالص تملكه زكيه واسوارة الماس وكذلك حتى هي كانت لزكيه..
زكيه قالت..
/شن يديروا الحاجات هادم هني يامحترمه انتي!؟
ربيعه من قوة الصدمه ماقدرتش تنطق بحرف قعدت جامده ماتحرك فيها شي..
زكيه قالت..
/باهي نسألوا صاحبتك باك خدتهم وانتي ماتعرفيش!
نوال وهي مرعوبه قالت..
/لالا والله لا..اقسم بالله ياللا اول مرة في حياتهم نشوفهم..قدمتلها وجت بتشد يدها وهي تقول..والله ياللا والله نقول في الحق..اني مش خنابه مش خنابه..
جبدت زكيه يدها وقالت بغضب..
/ بري عليا غادي..ردت نظرها لربيعه بعدين رفعت سبابتها وقالت..لولا خوفي من الفضيحه كنت درت زي مادارت هديكا المراة في امك لكن لأنك كنتنا للأسف مجبورة نفوت اللي درتيه..شافت لنوال..امشي اطلعي اقلبي وجهك..
نوال وهي منهارة بالبكي ومفجوعه طلعت تجري وربيعه معاها بنظراتها المصدومه..
زكيه وهي تشوفلها قدمتلها وجبدت منها فداء..
شافتلها ربيعه طول وزكيه قالت بكره..
/معاش نبي نشبحلك وجه شدي جناحك لين يروح ولدي ويديرلك حل..
ولفت ومشت بفداء اللي كانت تشوف لأمها وبرنيه وراهم..
وعيون ربيعه وهما يشوفوا لبنتها كيف تتباعد لين اختفت ردها للخلف اكثر من سنتين..
الفضيحة اللي صارت لأمها جراء افتراء منوبيه عليها وماعقباته هالفضيحه من مآسي لتوا مش عارفه كيف قدرت تعيش بعدهم..
موت بوها بقهرته..وانتحار امها من قهرتها..
القهر..وآاه يالقهر موعره بالذات لما يصيب النفس البريئه والعزيزه..يكون قاتل..
وربيعه ع قد ماشافت من قهاير اللي صار توا كان بردعهم كلهم بالنسبه ليها..
وان فوتت وعدت قبل مواقف جرحت كبريائها مرات ومراتالموقف هدا لايمكن تعديه ولو خسرت روحها..
بغضب شديد تملكها اندفعت ماشيه بإتجاه الجهة اللي ترفع للصالون ودار المعيشه وين ماكلهم مجتمعين..
كانت تمشي وهي تسمع في كلمات زكيه قاعده تتردد في عقلها ماتسمع في شي غيرها..
وصلت في الباب لقت قدامها برنيه دفتها وخشت وكملت طريقها لدار المعيشه..
وتخشلها وتلقى زكيه واقفه توري في الحاجات لبنتها وكناينها وربيبتها وهي تقول..
"شكله اللي تخنب فيه من هني تبيع فيه برا ودس في فلوسه"
انفجرت ربيعه غاضبه وهي تقول..
/لعند هني والزمي حدك..
التفتت زكيه وكلهم شافولها..
ربيعه بغضب شديد ودموعها ينزلوا تابعت تقول..
/كلكم الزموا حدكم ياسر!ياسركم ظلم وغطرسه وتكبر باك تحسابوني كنت ساكته ع فعايلكم لإني مانقدرش نرد عليكم لانقدر نرد ونرد..لكن مانبيش نكون متاع مشاكل وشر لأني مش هكي ولاتربيت عليه..ايه امي خدامه ايه مانيش بنت حسب ونسب زيكم لكن عندي اللي مستحيل يكون عندكم "الخوف من ربي"
هانيه ردت عليها بغضب..
/سكري فمك ياواطيه ياحقيره..
ربيعه قالت..
/انتي اللي تسكري فمك وتسكتي..تي والله لو كان عندك شويه دم واحساس راهو وحده زيي اني حطيتيها ع راسك اللي خلاتك تاخدي منها كبدها وديريها بنتك لكن وحده لئيمه زيك من وين بيكون عندها دم ولاتحس..
هانيه بعياط قالت..
/حي ياماما..سمعتيها..سمعتيها ياماما شن تقول سمعتيها..خبطت بإيديها ع رجليها بقوة وقالت..سمعتوها..!
هسترت هانيه وهي تعيط وتبكي جوها فريحه وبلقيس وقعدوا يهدوا فيها وهي منهاره..
وحالها هدا خلا امها يجن جنونها قدمت بإندفاع لربيعه ونزلت ع خدها بصفعة صوتها صدح في المكان كله بعدين دفتها بقوة وطلعتها وهي تقول لبرنيه بغضب شديد..
/ارفعيها لجناحها وماتخليهاش تطلع منه تطلع منه نلزك يابرنيه..
وولت خشت لدار المعيشه وسكرت الباب بقوة ..
وهانيه داخل قالباتها عياط ونواح وتخبيط وصوتها تخلط مع صوت بكاء فداء اللي كانت تسمع فيه امها وبرنيه واخدتها من ذراعها وماشيه بيها للجناح..
ربيعه توا حست ان كل شي انتهي وانها من بعد اليوم خلاص هي نفسها انتهت..
وصلتها برنيه لجناحها دخلتها وقالت بضيق..
/سامحيني ياللا..وسكرت الباب..
🌿وحالها هدا اللي كان غايب عن حبيب قلبها جاه شي منه في عالم المنام..
شافها في نومه مرميه ع ارض معبيه نمل ملابسها ممزقه وحالها يرثى له وملامح وجهها كئيبه وحواليها افاعي تحوم ووحده منهم لذغتها..
فتح عيونه وهو حاس بصدره مطبق وقلبه مغموم..ناض بالشويه قعمز بعدين شاف للهاتف فكر يتصل بعدين تراجع لأن الوقت متأخر جدا وخاف يفجعهم ع الفاضي..
ولى تمدد ع السرير وشاف جنبه لقي حسناء راقده فكر يفيقها لكن حتى عن هادي تراجع وقعد طول الليل وهو يخمم في ربيعه..
🍃وربيعه تبكي في نومها من الكوابيس اللي تشوف فيها..
مرة تشوف في حالة بوها وهو ميت ومرة تشوف في حالة امها وهي منتحره ومرة تشوف في بنتها فداء لما خدتها منها زكيه ومرة تشوف فيها لما ضربتها..وتقعد تمتم وتبكي وهي راقده...
🍃🍃
ويطلع الفجر وتسمع نداء رب العالمين للفلاح..
فاقت وقعدت تسمع فيه لعند ماتم بعدين ناضت ونزلت من السرير ومشت بش تتوضا وهي تبكي بصمت..
..........
بعد الصلاة اللي مادعتش فيها غير بجملة وحده..
"حسبي الله ونعم الوكيل"
طلعت كتاب ومذكرة التلخيص للماده الاخيره اللي حتمتحن فيها اليوم..
ماكانتش عارفه علاش دارت هكي..
علاش مازال تقرا وعلاش مازال تبي تخش للإمتحان!..
ممكن لأنها تبي تكمل امر بدت بيه..
او انها تبي تقاوم لأخر لحظه...
مش عارفه شن كانت تحس وقتها بالزبط المهم انها كانت تبي تقرا وتخش الامتحان..
.........
بعد كملت مراجعه بدلت حوايجها بعدين خدت شنطتها ومشت طلعت من الجناح..
ومنه طلعت من القصر كله وهي تمشي ع رجليها..
رجليها اللي رفعوها لموقف الحافلات قعدت وافقه تراجي لعند ماوقفت حافله ركبت فيها مع مجموعه وطلبت من السواق يرفعها للمدرسه..
وحطها السواق في المدرسه وهي خشتلها بش دير امتحانها وبعدين تروح لمكان تاني غير القصر..
🍃واهل القصر في هالوقت قالبين الدنيا عليها.
زكيه لاول مرة تهزب برنيه بشده وبرنيه مسكينه خوفها الاكبر كان من تسعه..
مش غيرهي اللي كانت خايفه منه حتى امه خايفه منه..
🍃"حركتها تجي ضدها هي مش ضدنا حني واضح انها هربت بعد ماانفضحت"
زكيه وهي عاقده حواجبها بخوف قالت..
/هربت!؟
نزيهه:مال شني تفسري تصرفها هدا ياعمتي مافي حد لزها..
فريحه:صح..هي طلعت منها ليها كان ماعندها شي تخاف منه ليش تهرب!
بلقيس قالت بتهكم..
/ماهو الموقف اللي صار شويه عندكم الحق!
زكيه:انتي مازال مش مصدقه فيها!؟
بلقيس قالت بقوة..
/ومش حنصدق لأن نشوف في كل شي ياامي مش مغمضه عيوني وياريت حتى انتي تفتحي عيونك..
ومشت طلعت من حداهم..
نزيهه قالت..
/شن قصدها!؟
زكيه شافتلها بصمت..
نزيهه ضحكت بصدمه قالت..
/لاجديات هدا اللي ينقال عليه حظ يفلق الصخر..
خبطت زكيه بإيديها وقالت..
/ياحليلي ياحليلي كيف ندير..
فريحه:مرات مشت دير في امتحانها وتروح..
نزيهه قالت بتهكم..
/ضحكي.🌿🌿🌿🌿
وتعدي الساعات متواليه لبعد العصر ومش باين لربيعه اثر..
"شن درتولها قولوا!؟"
نزيهه بصدمه قالت..
/نعم نعم!
هشام وهو معصب قال..
/ايه انتم درتولها حاجه خلتها تهرب تو تشوفوا شن يدير بوي لما يروح..
هانيه اللي قعدت بايته عندهم بعد اللي صار فيها قالت بعصبيه..
/سكر فمك من غير قلة ادب..
سلامه قال..
/ماقالش غلط ياعمتي هادي امنا حتى هي راهو مرت بوي المراة اللي طلعت من الصبح ومعاش روحت!
نزيهه:المراة اللي دير هكي اكيد تعرف شن ينقال عليها ياسلامه ولا..
هشام قال بغضب..
/عيب يما عيب وحرام..
سلامه:اني نعرف لما يروح بوي والله ماني ساكت ع حاجه من اللي كنت نشوف فيه..ومشي طلع حداهم..
نزيهه وهي مصدومه..
/ريتي ولدك يافريحه!؟
فريحه وهي خايفه..
/عنده حق يانزيهه تسعه لما يقربعها ع رووسنا..
هشام شاف لامه بأسف بعدين مشي طلع..
خبطت نزيهه بإيديها ع رجليها وقالت وهي مصدومه..
/وكان نعرف شن هو اللي ديرلهم فيه بس!
🍃وهدا كله وزكيه تتصل بصديقات ربيعه وجارات عصمت وتنشد فيهم عليها وكلهم يقولوا ماشفنهاش مانندروش عليها..
🌿🌿🌿🌿
"خيرك ياتسعه!؟"
تسعه وهو مضايق..
/كمل عني يامحفوظ خلاص لازم نروح..
محفوظ قاله..
/شن في!؟
حط تسعه يده ع صدره وقال..
/مش مرتاح..مش مرتاح..
ماقالش غير هالجمله بعدين مشي وحسناء لحقاته وخلا محفوظ في حالة قلق..
🍃ويطلب تسعه من جمال يحجزله في اقرب رحله لليبيا وحجزله في رحله موعدها بعد ساعتين..
وفي هالساعتين لموا حاجاتهم هو وحسناء بعدين توجهوا طول للمطار وركبوا طيارة رحلتهم اللي بترجعهم لأرض الوطن..
▪▪▪▪▪▪▪▪▪
=هما مش عارفين هي وين لكن اني نعرف عصمت قبل لتسافر عطتها مفتاح الحوش..
"معناها في حوش عصمت"
=ايه ياعمتي ميتين في الميه..
"خلاص خلاص سكري"
=ع شن ناويه عمتي!
"سكري خلاص"
سكرت السماعه بعدين مشت وهي تتسحب بهدوء لعند ماطلعت من المكان اللي كانت فيه...
...يتبع....
