#ولاد_تسعة "الفصل الاول/سميه تسعة"
#جمان_فريد
الجزء_الرابع "عصر تسعة3"
⛔احداث هذه الروايه وشخصياتها من وحي الخيال بعض الاحداث غير واقعيه"فنتازيه" وبعضها بعيد عن واقعنا المعاش والبعض الاخر يلامس شيء من الواقع⛔
⚠️ملاحظه..
لما يبدا الكلام بالرمز هدا (♤) هذا يعني ان البطل يسرد في الاحداث
اما لما يبدا بهذا (🌿) يعني الكاتبه هي اللي تسرد..
#ذكر_الله
قَال ٱلحبيّب عليّه الصَلاة السَلام ..أفضّل ماطلعت عليّه الشمّس🍃
سُبْحَانَ اللَّهِ
والحمدلله
وَلَا إلهَ إلَّا اللَّهُ
وَاَللَّهُ أَكْبَرُ
■■■■■■■■■■■■■■■■■■■■■■■■■■■
🌿"مَا ذكرْتُ الزَّوَاج لأيّ إنسَانٍ كَانَ كبيرًا أَوْ صَغيرًا
إِلاَّ اسْتأنَسَ وضحِكَ!"
- ابنُ بَاز.🌿
••••••••••••••••••••••••••••••••••••••••••••••••••••••••••••••••••••••••ومن تاني يوم يسافر تسعة بعروسته الجديده لمصر ماباش يرفعها لبلاد تانيه بش مايديرش الفرق بينها وبين مرته الاولى،وحتى مدة قعادهم فيها هي نفسها اسبوعين فقط..
🌱فهالاسبوعين..
مشت نزيهه لحوش اهلها بش تقعد عندهم لعند مايروح راجلها..
وفي حوش اهلها كانوا كلهم دايرين اللي يقدروا عليه بش يغيروا جوها وينسوها همها ماعدا وحده من خواتها..
اختها هادي كانت في ترتيب خواتها جايه بعدها ع طول..
♤اخت مرت بوي هادي كانت زي المراحيم قصدي خوت جدي مراة قلبها مريض بالحسد..بصدق من اللي سمعته عنها واللي داراته في اختها قلت ياريت خالتي نزيهه كانت زي شيبانيها مسحت الخوة متاعها من حياتها و تشت فيها النار وهي حية وافتكت منها..والله عداوة اللي ليك مافيش اخبث ولاأشد منها..مش يقولوا وين دمك وين سمك..فعلا عداوة اللي ليك سم زعاف يقتلك بالعرق...
🌿"بيقعدوا اسبوعين"
بدريه"اخت نزيهة" قالت..
/مظني بيكمله شهر معاها وهو ماصدق خداها..
نزيهة وهي تحاول تتمالك نفسها قالت..
/مايقدرش يعطل عن خدمته واعماله..
قالت اختها:باهي مافكرتيش كان حملت شن بيصير؟
نزيهه:مش صاير الا كل خير..
اختها رفعت حاجبها وقالت..
/ان شاء الله ان شاء الله..ويعطيك حتى انتي..
ابتسمت نزيهه وقالت..
/ان شاء الله..خليك مني توا وقوليلي شن حالك انتي وشن دايره..
بإبتسامة قالت..
/في خيار خيري..مدت يدها وهي توري فيها الانسيال متاعها قالت..جابهولي عبد الرزاق امس هدية الحمل..
نزيهه شدت يد اختها وهي تشوف للإنسيال قالت بإبتسامه..
/قنين قنين..
اختها شافت لخاتم الياقوت بغل وقالت..
/قولي ماشاء الله..
طلقت نزيهه يدها وقالت بإبتسامه..
/ماشاء الله ربي يزيدك ويهنيك..
قالتلها اختها وهي تشوف للإنسيال متاعها..
/ويعطيك ويفرج عليك..
نزيهة كانت ديما تغلب في حسن الظن في تعاملها مع الناس يابال خواتها لهذا مهما تسمع من اختها بدريه تشوف فيه طلع منها بحسن نيه..
"نزيهه..يانزيهه بوك يبيك في المربوعه"
ناضت نزيهه وقالت..
/ماشيتله يام..
ومشت طلعت من جنب اختها اللي كانت تشوفلها بنظرات كلها حسد..
🌿🌿🌿🌿
في حديقة القصر..
كانوا ملتمات الضراير مع بناويتهم يهدرزوا..
هدا اخر يوم يقعدوا فيه اسيا وبنتها في القصر تاني يوم بيروحوا لحوشهم..
🌱آسيا:يبانوا تقليديين من لبسهم..
زكيه:ايه قاعدين لتوا نساوينهم يلبسوا في الرداوات.
هانيه بإزدراء..
/مالا كان شفتوهم كيف ياكلوا شلافطيه وبربريين..
بلقيس:اهل فريحة يختلفوا عنهم هلبه..
هانيه:اهل فريحه ناس راقيه ومتعلمه عاشوا في مصر فترة..
زكيه:لاحظت خواتها امس زي اللي يتجنبوا يشوفوا لنساوين عيلتهم..
هانيه:ام فريحة ماطيقهمش وديما تتمنى ماتجمعهاش بيهم مناسبه من كثر مايحشموا..
بلقيس:توا هي هكي تحكي ع ماليها!؟
زكيه ضيقت عيونها وهي تشوف لبنتها وتراجي في اجابتها..
وكذلك اسيا كانت تشوفلها..
جاوبت هانيه تقول..
/لالانهائي مرة وحده بس جت سيرتهم قالت ماعندناش بيهم احتكاك امها هي اللي تدوي..
بلقيس:باهي طمنتيني..
هانيه بإبتسامه صفرا..
/اطمني حبيبتي مانجيبش لخوي كان المراة الصح..
اسيا شافت لبنتها بنظرة خلتها تسكت..
وزكيه غيرت الموضوع وهي تقول..
/قيس ماعنداش الروح مع القرايه..
كلهم وجهوا انظارهم لقيس اللي كان مقعمز بروحه بعيد عنهم ويقرا..
اسيا ابتسمت وقالت..
/هادي السنه شهادة قال يبي يجيب الاول زي تسعة..
ضحكت زكيه وقالت..
/وان شاء الله خير منه..ضيقت عيونها وقالت..وانتي ياجبينه..
ضحكت بلقيس بإنزعاج..
/فكيني من هالسيرة خالتي..
هانيه قالت بضحكه..
/شكله قيس شفط الذكاء كله لما كنتوا في بطن امكم..
زكيه رفعت حواجبها وهي تشوف لبنتها لكن اسيا شافت لبلقيس بضحكه لما ضحكت بصوت عالي..
ضحكة بلقيس كانت مميزة وضحك خلت حتى زكيه تضحك معاها لكن هانيه كانت تشوفلها برفعة حاجب..
شويه هدت بلقيس ضحك وقالت..
/هو بشكل عام الذكاء كله شفطوه الولاد في عيلتنا..
شدت اسيا ضحكتها وقالت..
/بلقيس..
بلقيس ببراءة مصطنعه قالت..
/نعم ماما!
وزكيه تشوف لبنتها كيف معصبه من بلقيس شدت يدها بقوة بش تسكتها..
وهانيه غمضت عيونها وفتحتهم بش تهدي نفسها..
ع جية قيس وفي يده كتاباته وصل في اخته ضربها ع راسها بيهم وقال..
/شن قلت عليها الضحكه هادي!؟
حطت بلقيس يدها ع راسها وهي تتوجع..
هانيه قالتله..
/مش عارفه كيف جيتوا توامه؟
قيس شافلها شويه بعدين طبس ع راس اخته وباسه وقال..
/احلى حاجة صارت في حياتي من قبل مانجيها..
وقفت بلقيس وحضناته بقوة وهي تقول..
/ييي نجيلي تومي ياربي..
ابتسموا زكيه واسيا وهانيه تشوفلهم بغيظ..
وخرت بلقيس وقالت..
/تولي احسن واحد في العالم كان قريتنا غدوة اني ووديعة..
عقد حواجبه وقال..
/انسي..ومشي بيخش القصر..
تأففت بلقيس بعصبيه وقعمزت..
آسيا:انت تعرفيه مايحبش هادي وديعة..
بلقيس بضيق:لكن مش عارفه علاش..
هانيه:هادي وديعة البدري؟
بلقيس هزت راسها بإيجاب..
زكية:قصدك بنت الشيخ البدري!؟
اسيا:ايه بنته..
بإستغراب قالت زكيه..
/وكيف بنت شيخ تبي شاب يقريها؟
هانيه بتهكم:شيخ شني ياماما بس..
اسيا؛ع قولة سلامة شيخ لزحة..
ضحكوا وبلقيس قالت..
/زلحة ماما زلحة..
آسيا:اللي هو..المهم مش شيخ..شافت لضرتها وقالت..بناته لايلبسوا في حجاب وزوجته مراة اعوذ بالله لاتشبع من القرمة والنميمه..وولاده ماينفعوا ابدا..
هانيه:عندهم الكبير بوعجيله يجي للجامعه بش يعاكس البنات..
زكيه وهي مصدومه قالت..
/لهالدرجة!..
اسيا:واكثر..قال سلامه الشيخ البدري وين يخطب في الجمعه يقول لناس ديروا ماديروا واللي يقول عليه مايدير منه في شي..باب النجار مخلع..
زكيه:وكيف مخليه بلقيس تصاحب بنتهم..
بلقيس:وديعه كويسة مش زيهم..
اسيا بتهكم:مش زيهم! انا مانخليش فيها تمشيلهم ابدا وانا اعرف بلقيس ماديرش حاجة تزعل..
بلقيس:اكيد بس والله وديعة كويسه ماما..
اسيا:ايه كويس وفاتحه عيونها في خوك..
هانيه:والله لاحظتها لما جيناكم اني وماما اخر مرة شفتها كيف تشبحله وتتبسم..
زكيه:اني والله لتوا مش مصدقه اللي نسمع فيه،نشوف في مرته كيف تتكلم بالدين نقول عطاها ربي..
اسيا:منظر منظر بس يازكيه..
زكيه بأسف قالت..
/لاحول ولاقوة الا بالله...
♤منظر..اسوأ انواع الخداع في نظري هي الخداع بالدين..الناس اللي يلبسوا ثوب الدين بش يغطوا ع عيوبهم وسلبياتهم والخبث اللي عندهم هادوا اخطر بمراحل من الناس اللي ماتنفعش من داخل ومن برا..المشكلة الاكبر ان النوعيه هادي هي اكثر من يشوه في الدين وينفر الناس منه يعني اعداء حتى للدين بل اني نشوف انهم اخطر اعدائه..
🌿"ولد عمك اصغر منك بفوق عشر سنين خدي التانيه ع خاطر الصغار"
مرعي قال بضيق..
/تسعة ماعنداش ضغار لكن اني عندي..
قالتله:وشن عندك؟ بنت..كأنك ماجبتش بكل..
مرعي بألم قال..
/يام اتقي الله حرام عليك..
قالتله بغضب:وشن اللي طلبته اني! طلبت منكر! هدا حق عطهولك ربي حقك تتزوج بش تجيب الولاد..
قاللها:الحاجه هادي بيد ربي مرات ناخد اربعه وكلهم يجيبولي بنات..
امه قالت بعصبيه وازدراء..
/خايب ياولدي خايب من يومك..
ناض مرعي وهو يقول بنفاذ صبر..
/إنا لله وإنا إليه راجعون..
ومشي وخلاها وهي تشوفله بإزدراء وتقول..
/خايب زي بوك..
🌱خش مرعي لداره لقي مرته مقعمزه ع السرير جنب بنته اللي كانت راقده كانت تشوفله كيف معصب وهو يقول..
/والله لولا الخوف من ربي خديتكم وسيبتهولها..
فاطمة وهي تشوفله بحزن قالت..
/استغفر ربي يامرعي هادي امي..
خدي نفس وزفر بعدين قال..
/استغفر الله واتوب اليه..
تعبوا عيون فاطمه بالدموع وهي تقول..
/امك ماتبي كان مصلحتك يامرعي..
وجه نظره ليها بإستغراب..
هي نزلت عيونها وقالت بضيق..
/عندها الحق شوف حالك مع وحده تانيه تجيبلك الولاد..
هو قال بصدمه..
/فاطمه!معقوله انتي اللي تعرفي ربي كويس تقولي الدوة هادي!؟
نزلوا دموعها وقالت..
/خايفه امك تغضب عليك كان ماسمعتش كلامها..
قاللها:ماخالفتهاش في بر..مخالفتها في حاجه زي هادي مايركبنيش ذنب يافاطمه..بعدين اني راضي بقسمة ربي وحامده وشاكره..انسي اني نبدلك بوحدة تانيه ولاناخد غيرك حتقعدي مرتي الوحيده في الدنيا والآخره..
شافتله وهي مبتسمه من بين دموعها..
وهو ابتسم وقال..
/ربي مايحرمني من الوجه السمح..
🌿🌿🌿🌿🌿
"شن ذنبهم بوها وخوتها تحبس فيهم!؟"
كمال بغضب قال..
/غشوني يام غشوني عطوني وحده عقيمه..
امه قالت..
/وشن يديرهم هما الحاجات هادي الناس مايعرفوهاش الا بعد الزواج..
حط سبابته ع صدغه الايمن وقال..
/الكلام هدا مايخشش راسي..نزل يده وقال..بيقعدوا في حوازة التين لين ناخد وحده تانيه من بكرا ابدوا دورولي انتي وبناتك..
♤كمال قبل الحاجه فطيمه تزوج مرتين وطلق..الاولى طلعت عقيمه والتانيه ماتفاهمش هو وياها ماكملتش معاه شهرين وطلقها تقريبا في هديكا الفترة مازال ماقدرش يتخطى خالتي فريحه..
خالتي فريحة اللي خلت بوي يحبها بقوة وحبها ليها لو مهما يحاول يدرقه يبان في عيونه العيون ديما فضاحات..
وخالتي نزيهة كانت تشوف لعيون بوي وتعرف ان فريحة دارت فيه اللي هي ماقدرتش ديره..
جداي زكيه قالت بعد روحوا من مصر حط فريحة في حوش ماليها وروح للقصر...
🌿يمشي في ممر من ممرات القصر كان طويله ومفرش بسجاده حمراء طويله فيها خطوط ذهبيه من الجناب..
وع طول حيوط هالممر كان في مرايه اطاراتها من جبس مزخرفه ولونها ذهبي..
وقف ع المرايه دار نظره ع طلة بعدين كمل طريقه لحجرة المكتب متاعه..
وصل فيها لقي بابها مفتوح..وقف قدامه وبدت ع وجهه ابتسامة وهو يشوف في نزيهه كيف منهمكه وهي تشوف لحسابات المصنع..
قعد واقف يتأمل فيها لحظات وهي في عز انشغالها بالحسابات رفعت عيونه عنهم وشافت القدام لثواني بعدين وجهت نظرها للباب..
قاللها بإبتسامه..
/ربي يعاون..
هي سيبت اللي في يدها وناضت مشتله بسرعه ووين وصلت فيه ضماته..
وهو ضمها وقعد يضحك..
🌿🌿🌿🌿"زدتي جمال ع جمالك يافيري"
فريحة وهي مبتسمة بخجل قالت..
/حق!
اختها التانيه قالت بضحكه..
/ايه حق مزيانه بزايد..
اختها الصغيره قالت..
/حتى هو البي تسعة اللي تاخده يولي فيها الزايد..
ضحكت فريحه بخجل..
ع جية امها قعمزت جنبها وقالت بإبتسامه..
/شن امي حالك باهي مرتاحه مع راجلك؟
فريحة بإحراج..
/الحمد لله ماما..
اختها قالت..
/تي كله باين ياماما شوفي الالماس اللي يبرق في يدها..
خدت امها يدها وشافت للخاتم وهي تقول..
/ماشاء الله ماشاء الله ذوقه هو؟
فريحة بضحكة خجل قالت..
/هو اللي صنعه بإيديه..
كلهم اندهشوا وامها قالت..
/ماشاء الله!
اختها الصغيره قالت..
/لامادخليكش فيهم توا تجيبولي راجل زيه ولا والله نقعدلكم في الرقبه..
ضحكوا عليها وامها قالت بضحكة..
/ياللي ماتتحشمي..
🌿🌿🌿🌿🌿
"حالك باهي ياشيهانه"
قالت وهي تتأمل فيه..
/ماولى باهي كان لما ريتك..
ابتسم وطلع من جيب جاكيته مشبك شعر من الذهب الخالص وحطه ع شعرها وقال..
/ماولى غالي كان ع هالغثيث الاسود اللي ماريتله زي..
ابتسمت بخجل بعدين قالت..
/سلمك جياب...
ابتسم وقال..
/ويسلمك ليا..
ضحكت بخجل بعدين قال..
/وين فريحة؟
قاللها:حطيتها في حوش اهلها قالت استاحشتهم وتبي تقعد عندهم اليوم،انتي شن حال اهلك؟
نزيهة قالت بإبتسامه..
/الحمد لله كلهم في خيار الخير..
قاللها:الحمد لله..شكله مافي حد؟
نزيهة:عمتي وعمي مشوا يحضروا مناسبه لمعارفهم في مصراته..
تسعة قال:ماتعرفيش مني؟
نزيهة قالت..
/قالوا عيلة الأمين..
عقد حواجبه وقال..
/ايه زبطتهم هادم عندهم واحد ضابط عنده رتبه كبيرة في الجيش..
نزيهة ضيقت عيونها وقالت..
/ايه صح سمعت عمي يحكي عليه..
هز راسه بعدين قال..
/وهانيه وين؟
نزيهة قالت..
/في دارها..جعان نديرلك حاجه تاكلها؟
اتكا بظهره ع الكنبه وحط ذراعه ورا راسه وقال..
/لالا غاليتي مانبي شي..عقد حواجبه وقال..ترا وريني..ومد يده يأشر ع الوراق..
قالت بضحكه:غير تريح قبل..
قاللها بجديه..
/تريحت اسبوعين سادني..
هي ضحكت وخدت الوراق ومدتهمله خداهم منها وبدي يشوف فيها بعدين قعد يناقش فيها على محتواهم وخدتهم الدوة عن المصنع ومايتبعه وكانوا منسجمين انسجام تام...
🌿ويرجع تسعة لعالم المال والاعمال ولإدراة رزقهم من شرق البلاد لغربها ومايجاورها قريب وبعيد..
زي مارجعت فريحة لدراستها في الجامعه وبدت تستعد للإمتحانات مع هانيه..
الامتحانات اللي كانوا يراجوا في نتيجتهم قيس وبلقيس او بالأحرى قيس بس بلقيس كانت ضاربتها في الحيط..
اما سلامه بعد ماسلم لولده دفة القياده تفرغ تماما للعبادة مع رفيقات دربه زكيه وآسيا اللي قاعده قلوبهم تتعلق بيه كل لحظه اكثر من اللي قبلها..
🌱وفي يوم..
هاليوم كان موعد اعلان نتيجة الشهادة الثانويه وكان فيه اخر امتحان لفريحة..
من اول هاليوم كانت فريحة حاسه بوهن وتعب حتى امتحانها قدماته بالغصب ومجرد ماسلمت ورقتها ظلمت الدنيا في عيونها وطاحت من طولها..
🌿"ها شني فيري كويسة توا؟"
فريحه بشي من التعب قالت ردت ع صاحبتها تقول..
/ايه هيا روحي بيا..
قالتلها:راجي تطلع تحاليلك قبل..
فريحة:لالامانقدرش نعطل راجلي بيروح اليوم مانبيشي يروح ومايلقنيش..
ع خشة طبيبة عليهم وفي يدها ورقة التحليل قالت لفريحة..
/متزوجه؟.
فريحة:ايه..
ابتسمت الطبيبه وقالت..
/مبروك يافريحه تحليلك انتي حامل..
▪▪▪▪▪
تمشي بسرعه في ممر من ممرات القصر لعند ماوصلت لدروج
نزلت منهم ع مهلها وين ماوصلت في اخرهم قدمت لباب الكوجينه..كوجينة القصر اللي كانت بكبر حجم شقة صغيرة
وقفت في الباب وهي تشوف لنزيهه كيف تجهز مع الشغالات في الغدي..
"نزيهه"
التفتت نزيهة للباب شافت ضرتها مشتلها بسرعة وقفت قدامها وقالت..
/وينك لتوا تسعة ليه نص ساعة واصل..
خدتها فريحة من يدها وتباعدوا عن الباب..
نزيهة بإستغراب..
/خيرك
فريحة قالت بفرح ودموعها..
/اليوم دخت في القاعة بعد ماكملت الامتحان رفعتني وحده من صاحباتي للمستشفى وغادي عرفت اني حامل..
ضحكت نزيهة بفرح بعدين ضمتها وقالت..
/مبارك مبارك..
فريحة ضمتها وقالت..
/الله يبارك فيك والفال ليك ان شاء الله تلحقيني عن قريب ياربي
تباعدت عنها نزيهه ومسحت دموعها وهي تقول..
/آمين..شدت يد فريحة وقالت..بري بشريهم شن تراجي!
شدت فريحه ع يدها وقالت..
/نبيك انتي تبشريهم..
قعدت نزيهه تشوفلها بصمت ودموعها ينزلوا..
فريحه قالت..
/نبيهم يعرفوها منك..
ابتسمت نزيهه ومسحت دموعها بعدين قالت..
/باهي..تعالي..
ومشوا الزوز بسرعة للدروج وصلوا فيه وركبوا..
نزيهة:بالشويه شن هكي..
ضحكت فريحة وقالت..
/ايه صح نسيت..
ضحكت نزيهة وفريحة ضحكت معاها..
♤تعرفوا شن معنى قوة الشخصيه..ان الانسان يقدر يتغلب ع نفسه الأمارة بالسوء ع مشاعره السلبيه ع انانيته ع اي صفة يتصف بيها تخليه انسان سيء وضعيف..وهكي كانت خالتي نزيهه هداكا الوقت..اكيد وقتها شعورها كان زي اي مراة تكون في مكانها..غيرة وقهرة لكن هي غلبتهم وكانت اكبر منهم..بجديات اني معجب هلبة بشخصية المراة هادي في نظري هي احسنمراة خداها بوي..
🌿وصلوا الزوز للصالون اللي كانوا ملتمين فيه العيله..
سلامة وزكيه واسيا وهانيه وقيس وبلقيس ومعاهم تسعة اللي لما شافاته فريحة قلبها رفرف من الفرحة والشوق وهو نفس الشعور حس بيه لما شافها وكان باين في عيونه..
"السلام عليكم"
كلهم ردوا السلام ونزيهه قالت وهي مبتسمه ابتسامه حلوة..
/عمي عمتي تسعة جايبتلكم بشارة..
كلهم توقعوا البشارة ومع هذا كانوا يبوا يسمعوها..
زكيه قالت بإبتسامه فرح..
/بشري بنتي..
نزيهه شافت لفريحه بعدين شافتلهم وقالت..
/فريحة حامل..
بدت ع وجوههم ملامح البهجة وزكيه من فرحتها زغردت..
سلامه بضحكه فرح قال..
/ماشاء الله ماشاء الله..
شافتله اسيا وقالت بإبتسامه..
/مبروك..
بادلها سلامة الابتسامه وهو يقول..
/مبروك علينا كلنا..بعدين غير نظره لزكيه لما شافها ضم في كنتها وهي تهني فيها بعدين وجه نظره لولده لقاه يمرر في نظره بين زوجاته وهو مبتسم..ابتسم..
بلقيس:واخيرا بنولي عمة..
هانيه بضحكه:مبارك وخيي..
قيس شافله بإبتسامه وقال..
/مبارك تسعة..
مرر نظره ع خوته وقال..
/الله يبارك فيكم..
بعدين ناض ومشي قدم لزوجاته..
جي لنزيهة حط يدها ورا راسها وطبع قبله ع جبينها..
الكل ابتسموا للحركة اللي دارها..
تباعد عن نزيهة اللي كانت تتأمل في الفرحة اللي في عيونه وتمنت من قلبها ربي يزرقها وتفرحه حتى هي..
وهو جي لفريحه طبع قبله ع جبينها بعدين قال..
/مبارك..
هي بخجل قالت..
/الله يبارك فيك..
عقد حواجبه وقال..
/لكن كيف عرفتي..
○حكتله فريحة اللي صار معاها شد يدها بقوة من خوفه عليها ونزيهه شافت الحركه هادي غيرت نظرها بسرعه وقلبها موجوع..
زكيه بقلق:نهار ابيض..
سلامه قال:قعمزي بنتي قعمزي قعمزيها يازكيه..
زكيه خدت فريحه ومشت بيها للكنبه وقعمزتها وقعمزت جنبها..
سلامه:بنتي نزيهه سقدوا بالغدي..
قالتله:حاضر عمي..ومشت طلعت من حداهم وبلقيس ناضت وطلعت وراها وخلتهم كلهم مشغولين بفريحة ماعدا توأمها اللي تبعها بنظره وهي طالعه بعدين ابتسم..
🌱"نوزي"
مسحت نزيهه دموعها بسرعه بعدين التفتت وقالت..
/نعم ياجبنه..
بلقيس قالت بضحكه..
/نبي نعاونكم..
شدت نزيهة يدها وقالت بضحكه..
/تحبي خشة الكوجينه اكثر من القرايه..
بلقيس:مخططه نتزوج بعد ناخد الشهاده الثانويه هدا اذا خديتها طبعا..
ضحكت فريحة وقالت..
/تاخديها ان شاء الله..
بلقيس:وناخد الراجل بعدها على طول..
قعدت تضحك نزيهه..
وبلقيس قعدت تغني..
/خودي الراجل خيرلك الشهاده شن بنديرلك..
ونزيهة تسمع فيها وتضحك من قلبها...
🌿🌿🌿🌿🌿
خش لداره لقي امه ترتبله في شنطة السفر..
قاللها:غير ليش متعبه روحك يمي..
امه قالت..
/تعبك راحة وليدي..
ابتسم وحط ايديه في جيوبه وهو يقول..
/مش مطول اسبوع لاأكثر..
سكرت امه الشنطه بعدين قالت..
/وليدي بنقولك ع شي..
عقد حواجبه وهو يراجي فيها تكمل كلامها..
شافتله بإبتسامه وقالت..
/تو مش مهمتك في الالف وخمسين ولا؟
قاللها:لا في المدينه المجاورتها يمي..
قالت:ايه يعني اكيد بتخطم عليهم..
حك لحيته وقال..
/الحق الحاج سلامه عزمني وشد فيا واجد بالك بالك نخطم عليهم..
بإبتسامة حماس قالت..
/ايه اخطم عليهم وقبل لتمشي للحوش دير دورة في الجامعه غادي وانشد ع بنيتهم هانيه وبالمرة شوفها..
قلب عيونه بملل وقال..
/يمي ربي يهديك..
جاته شدت ذراعه وقالت..
/غير اسمع كلامي المرة هادي والله مانك نادم البنيه ماشاء الله عليها وبنت عيلة متسميه والله مانك لاقي خير منها..
قعد موجه نظره القدام وع وجهه ملامح الامتعاض..
زادت شدت امه ع ذراعه وقال..
/ع خاطري حميده نبي نفرح بيك..
شافلها شويه بعدين هز راسه بالموافقه وهو يساير فيها مسايرة..
🌿🌿🌿🌿
اصوات الزغاريد تصدح في اروقة قصر ذهيبه ابتهاجا بنجاح تؤام سلامة بيت المال..
اللي كانوا يزغردوا زكيه ونزيهه ومعاهم بلقيس فرحة لخوها اللي جاب الاول ع البلاد زي خوهم وفرحة ليها اللي مش مصدقه انها نجحت بتقدير جيد.
وقيس قاعد يتنقل من حضن بوه لحضن خوه لحضن امه اللي من فرحتها بيه نزلوا دموعها..
هدا كله كانوا يتفرجوا عليه فريحه وهانيه وهما يضحكوا بفرح..
🌱وفرح سلامه فقراء اهل الالف والخمسين معاه واجزل عليهم بالعطايا..
وتاني يوم خلاهم يبدوا التجهيزات للحفل اللي بيديروه ابتهاجا بالنجاح الباهر لقيس..
واليوم اللي بعده كان الحفل اللي حضروه وجهاء الالف وخمسين ومعارف تسعة وسلامه مع الأقارب..اب آسيا حتى هو حضر وكان فرحان جدا لحفيده..
🌿"سلمها ياربي تجنن تجنن"
فاطمه وهي تشوف لبلقيس كيف تلاعب في بنتها قالت..
/نشوفوها عندك ان شاء الله
بلقيس بإبتسامة:تسلمي..
نزيهه وهي تشوف لصحن فاطمه من الحلو قاعد زي ماهو قالت..
/خيرك يافاطمه ماكليتي شي..
ابتسمت فاطمه وقالت..
/كارهه الحلويات ومايجي منهم..
هانيه قالت..
/تتوحمي شكلك..
نزلت فاطمه عيونها وهي محرجه..
وفريحة اللي كانت مقعمزة معاهم شافت لنزيهه ولاحظت نظره الحزن في عيونها برغم ابتسامتها وهي تسأل في فاطمه..
/حامل..
هزت فاطمه راسها بإيجاب وقالت..
/الفال ليك..نزيهة بإبتسامه تخفي غصة ألم قالت..
/تسلمي..
هانيه:تحلي عويناتك على خير..
فاطمه:تسلمي..
فريحة:مبارك عليك وتحلي عويناتك ع خير..
فاطمه ابتسمت وقالت..
/اني وياك ان شاء الله..
ابتسمت فريحه..
وبلقيس ناضت وهي تقول..
/مبروك عليك طمطومه وبالله خليني نطلع نلعب مع العسوله برا الجو يهبل عكس هني زحمة وضغط..
فاطمه وهي مبتسمه قالت..
/اطلعي..
نزيهه:ردي بالك جبينه..
بلقيس:حاضر..
ومشت بلقيس طلعت بغزلان من قاعة الاحتفالات وقعدت تمشي بإتجاه الباب اللي يطلع لحديقة القصر..
وصلت فيه وطلعت وهي تقول..
/الله واخيرا تنفست هوا نظيف..
غزلان لما شافت الطبيعه قعدت تفك في روحها من بلقيس تبيها تنزلها..
بلقيس:تبي تنزلي ياكلبوزة..باهي نزلك لكن اقعدي عاقله..
نزلت بلقيس غزلان وغزلان ماصدقت انطلقت تجري وقعدت بلقيس تجري وراها وهي تضحك وتقول..
/تعالي هني..
🌱وفي جهة تانيه من الباحة..
كان خوها تسعه واقف قريب ع البوابه يراجي في واحد من ضيوفهم شويه ناداه واحد من امن القصر بيقوله ع شي وهو مشاله طول..
في هاللحظه انفتحت البوابه وخش ضابط من هيئته وشكل لبسه يبان ضابط في الجيش..
كلمه واحد من الحراسات وهو يأشرله ع جهة معينه يقوله..
/تفضل..
هز الضابط راسه ومشي بيكمل طريقه..
وهو ماشي لفت انتباهه صوت حلو صاحبته تقول..
"هيا دوري دوري دوري"
طول شاف جهة الصوت ويجوا عيونه ع بنيه جميله بكل مافيها بالذات ضحكتها..
كانت دور حوالين نفسها وفستانها يلف معاها وشعرها يطاير حواليها..
لاعاد حس بشي ولاشاف شي غيرها كان زي المسحور متأخد بيها وخلاص..
هي وقفت لف ومدت ايديها لغزلان وقالت بضحكه..
/دختي ياحلوة..
وغزلان مشتلها وهي ضمتها ورفعتها بعدين لفت بتكمل طريقها شافت الضابط شهقت بفجعة وهربت تجري بغزلان..
هو بعد مااختفت من قدام عيونه رجعت ملامح المكان بانت عليه واستاقظ لما سمع صوت تسعة يرحب بيه شافله بعدين ابتسم بشي من الربكه وقلبه كان مرتبك بزياده...
🌿اما بلقيس قعدت مفجوعه من الموقف بالذات وان الراجل شافها من غير حجاب وفستانها اللي لابساته نوع ما مش مستور..
قعدت مقعمزة بغزلان ع وحده من المقاعد الخشبيه الطويله وهي تقول..
/الحمد لله اللي ماشافونيش تسعة ولاقيس راهم علقوا مشنقتي..نزلت عيونها لغزلان لقتها تلعب بوردة هي قطفتهالها ضحكت وقالت..سلمها ياربي..
"شن ديري هني!؟"
انفجعت وشافت لمصدر الصوت لقت توأمها جاي ناحيتها قالتله..
/انت اللي شن دير مسيب ضيوفك وجاي هني!
قعمز جنبها وهو يشوف لغزلان بإبتسامه بعدين قال..
/انخنقت من الزحمة والمجاملات الزايده..
ضحكت وهو قال بإبتسامه..
/من هي الحلوة هادي..
بلقيس:هادي غزلان بنت مرعي..
مسح ع شعر غزلان وقال..
/ماشاء الله ماشاء الله..
ابتسمت بلقيس..
غزلان شافتله شويه بعدين مدتله الورده ضحكوا الزوز...
وهو خداها منها وخدي يدها باسها وقال..
/شكرا ياحلوة..
بلقيس بضحكه..
/حتى هالفكرونه ماقدرتش تقاوم جاذبيتك..
ضحك بعدين قال..
/مش مصدق امتى نسافر..
بدت ع وجه بلقيس ملامح الضيق..
شافلها وقال..
/هيي انتي فكينا عاد..
بحزن قالت..
/مش عارفه كيف بنقدر نعيش من غيرك..
ضحك وقال..
/اسكتي ياحمارة بتخليني نبكي..
ضحكت بتهكم وقالت..
/انت تبكي! ع اساس عندك احساس..
ريشها من غرتها "جمتها" بعدين قال..
/خودي البنت وخشي داخل نوضي..
تنهدت بعدين ناضت بغزلان ومشت بسرعه ودموعها ينزلوا وهو تبعها بنظراته الحزينه...
🌿🌿🌿
وعدت الايام ومنها عدت شهور وسافر قيس لبريطانيا في بعثه ع حساب الدوله وتسعه وسلامة كانوا متهنيين عليه لأنه حيقعد مع محفوظ لكن امه واخته فقدوه بقوة وقعدوا ايام يبكوا علي فراقه من شوقهم ليه..
وسلامة كان متشوق لجية اول حفيد ليه طول الوقت ياخد ويوصي في زكيه ع فريحه وهي كانت متقاسمه الاهتمام بيها مع نزيهه..
نزيهه اللي كانت تعامل في فريحة معامله ماتلقهاش الاخت من اختها خلت فريحه تنسى انها ضرتها لدرجة انها حبتها هلبه..
🌿"الحمد لله الارباح كل مالها في الزايد"
نزيهة بإبتسامه:الحمد لله..
فريحة اللي كانت مقعمزة معاهم وهي تقرا في مذكرة دراسيه قالت..
/عندي ليكم اقتراح..
شافولها الزوز وتسعة قال بإبتسامه..
/وشن هو اقتراح الشادن؟
ابتسمت بخجل بعدين قالت..
/شن رايكم ديروا "اللوقا" سوقها ماشي..
هو غير نظره عنها لنزيهه وقال..
/شن رايك ياشيهانه؟
قالتله:الحق فكرت فيه..
مرر نظره بيناتهم وقال..
/خلاص تو نديرله دراسة ونشوف شن يصير..
قعدوا الزوز يشوفوله بحب وهو موجه نظره القدام شويه تنهد وقال..
/نبي ناخد مزرعة في القاره بولي اكبر من مزرعة بوي وكل اخر شهر ناخد وحده فيكم نقعد اني وياها اسبوع غادي..
شافوا لبعض بإبتسامه..
مرر نظره بيناتهم وقال..
/هاه شن رايكم..
نزيهه:اللي ديره باهي..
فريحة:مافيش حاجه تفكر فيها الا وتكون حلوة..
شافلها وابتسم بعدين غير نظره لنزيهه وابتسملها وقال..
/محلاكم..
ضحكوا الزوز بخجل وهو يوزع في نظره بيناتهم وابتسامته ع وجهه..
🌿🌿🌿🌿🌿
"معاش كلكم خوك"
بلقيس:لاامس كلمنا جوه مليح..وديعه البدري قالت..
/ربي يحفظه من الفتن قبل كل شي..
ابتسمت بلقيس مجامله وهي تقول..
/آمين..
وديعة قالت..
/بلقوسة..خوي يبي يخطبك..
وتضحك بلقيس ضحكتها المشهورة ووديعة برغم تعجبها ضحكت معاها غصب عنها..
بلقيس قالت بضحكه..
/تبصري ولا!؟
وديعه:لاوالله نحكي جد..
بلقيس ابتسمت وقالت..
/اسفه لا..
وديعة:علاش؟
بلقيس قالت..
/مانبيش نتزوج..
وديعة بإستغراب..
/مش قلتي قبل تبي تخشي معهد وتكملي فيسع بش تتزوجي..
بلقيس:ايه لكن مش خوك..اسفه وديعه بس اني مش عاجبني خوك بكل الحق..
وديعة بضيق..
/لكن هو يحبك يابلقيس..
رفعت بلقيس حواجبها وقالت..
/اسفه..القلب ومايريد..
سكتت وديعه وهي مضايقه..كانت متأمله بلقيس ترتبط بخوها بش تكبر فرصتها مع قيس اللي كانت تحبه وتتمناه لكن بلقيس برفضها لخوها ضيعت عليها هالفرصه...
يتبع.....
