■■■■■■■■■■■■■■■■■■■■■
🌿 ومِن نَكَدِ الدنيا أنَّ مثلَ هذا القلبِ لا يُخلَقُ بفَضائلِهِ إلا ليُعاقَبَ على فضائلِه؛
فغِلظَةُ الناسِ عِقابٌ لرِقَّتِه، وغَدرُهُم نِكايَةٌ لوفائه، وتَهَوُّرُهُم رَدٌّ على أَنَاتِه، وحُمْقُهُم تَكديرٌ لسُكونِه، وكَذِبُهُم تَكذيبٌ للصِّدقِ فيه🌿
•••••••••••••••••••••••••••••••••••••••••••••••••••••••••••
في حوش مرعي..
زحمة رجاله في المربوعه من اهل العروس واهل العريس..
وداخل الحوش حاضرات نساوين عايلات مرعي وفاطمه زوز بس غابوا عن المناسبه هادي من النساوين بلقيس ومرت بوها زكيه..
زكيه ارادت تقعد جنب بلقيس لأنها لاحظت ان الحزن زاد في قلبها بعد اللي صار لخوها حست ان وجودها هي بالتحديد جنبها حيهون عليه هلبه خصوصا ان بلقيس تحبها..
🌿🌿🌿
في جنان حوش مرعي..
كان واقف تسعه ع جمال ويسمع منه..
..جمال:عنده حبايب ساعدوه يدس اللي صار حتى السكان المجاورينه قالوا لارينا لاسمعنا...
هز تسعه راسه وقال..
/متوقع متوقع..ضيق عيونه وقال..لكن اللي نبي نعرفه توا هل قتل شعبان العامري حق ولامجرد اشاعه؟
جمالالتزم الصمت وهو يفكر..
شافله تسعه بعدين قال..
/سيوره يبان..تعالى..
ومشي تسعه بإتجاه باب المربوعه وجمال وراه..
🌾واللي قاعدين يتسائلوا عن مصيره محبوس في مزرعة "التين" اللي يملكها كمال البندار..
بعد ماخدي نصيبه من الضرب والتعذيب جاه واحد من اذرعة كمال البندار..الزقطي..وقف قدامه وهو يشوفله كيف منهك من الضرب بعدين قال لرجاله..
/ديروله اللي قلت عليه..
وينفدوا رجاله الأوامر وياخدوا الراجل اللي كان فاقد وعيه طلعوه لوحده من السيارات وطلعوا بيه من المنطقه لعند ماوصلوا لمكان جبلي طلعوا من السيارة وشغلوها وخلوها تمشي بيه بروحها لعند ماوصلت لحافه وطاحت منها..
▪▪▪▪▪▪▪
"لحقتوه بخوته وبن عمينه كويس كويس"
الزقطي قال..
/قريب حتى هما يلقوهم متفحمين في حوشهم اللي في الغربيه..
كمال قال..
/زيد نبه ع جماعتنا يلموا الموضوع كويس بمعرفتهم..
قاله:طمن بالك ياحاج كل شي حيمشي زي ماتبي بالزبط..
ابتسم كمال تكبرا وقال..
/اهم شي تشيعوا اللي صار بين الناس نبيهم كلهم يعرفوا سلطان البندار من توا..نبي الرهبه تنزرع في قلوبهم زرع نبي اللي يسمع اسم سلطان افداه ترعش رعيش..
الزقطي قال..
/من غير ماتوصي ياحاج..
🌿🌿🌿🌿🌿
"شنو مالا ياوخيتي كنتك بتقعد ع هالوليد وهالبنيه؟"
السؤال هدا طرحاته اخت ام مرعي عليها وسمعوه الحاضرات منهم نساوين تسعه وهانيه ومرت محفوظ..
وهي جاوبت..
/ياوخيتي هادي حاجه تخصهم مادخليش بيها..
قالت اختها..
/كيف هكي معقوله وليدك الوحيد بيقعد ع هادم بس!؟
اختها التانيه..
/كان عندها مشكله في الجياب مفروض يتزوج..
هي قالت..
/لاياحنه مش فاطمه اللي تجي عليها ضرة..
نساوين تسعه كلهم وجوههم عبست وهانيه وعبير يوزعوا في نظراتهم عليهم..
ع جية فاطمه ومع خواتها وهما مبتسمات قالوا..
"هيا ياعويله..تفضلوا ع العشي..تفضلوا"
ام مرعي:هيا هي..نوضوا نوضوا..
ناضت وخواتها ناضوا معاها التفتت فاطمه ع زوجات تسعه واخته وعبير وهي تقول بإبتسامه استغراب..
/هيا نوضوا!..
ناضوا بالغصب وع وجوههم ابتسامه مجامله ومشوا معاها..
🌿وع العشي مابطلتش ام مرعي مدح في فاطمه وهي تضرب في المعاني ع نساوين ولد سلفها وبعدين بدت تشكر في نفسها وفي راجلها منصور اللي كان قريب يحلف براسها ولأخر يوم في عمره وهو حاطها تاج ع راسه وهانيه تسمع وهي تحرق من الغضب حتى العشي سيباته وناضت..
فاطمه:خيرك!؟
هانيه بإبتسامه مجامله قالت..
/تعرفيني مانثقلش ماكله في الليل كليت شويه ع خاطرك وخاطر غزوله..
غزلان وهي مبتسمه قالت..
/يسلم خاطرك هنو..
وفاطمه قالت..
/صحتين..
هانيه:سلمك خل نمشي نشرب ميه..
فاطمه:اقعدي تو نجيبلك..
هانيه:لاوالله العظيم مانك نايضه خيرك فطومه مش ضيفه اني راهو..
فاطمه وهي مبتسمه قالت..
/سلمها ياربي ونفرحوا بيها في القريب العاجل..
عبير ونساوين خوها ماعدا ربيعه قالوا..
/آمين..
وهانيه قالت بضحكه..
/تسلميلي ياذوق ياعسل انتي..
ضحكوا فاطمه وغزلان وهي مشت طول للكوجينه..
🌿لما وصلت فيها وخشتلها لقت فيها كريم مقعمز ورا الطاوله شاد شيشة مشروب غازي ويشرب منها..
ضحكت وقالت..
/كريم افندي عاش من شافك!
هو جمد في مكانه معاش قدر يتحرك ولايتكلم يشوف فيها وهي ماشيه لطرمس ميه كبير بتصب منه الميه ومازالت هانيه متهاونه قدامه في لبسها وزينتها لأنها تشوف فيه صغير وفي نظرها زيه زي صغار خوها وهو كمراهق مشاعره المنجرفه تزيد في الانجراف لما يشوفها هكي ووين يخطر ع باله انها حتتزوج يفقد السيطرة ع نفسه ويبدا يعبر عن مشاعره بدون مايفكر..
"هانيه"
حطت الطاسه بعد ماشربت بعدين التفتت تقول..
/نعم..بدت ع وجهها ملامح المفاجأه وهي تقول..خيرك تبكي!؟
كريم ودموعه ينزلوا زي السيل قال..
/ماتتزوجيش بالله عليك..
ضحكت بعدم فهم وقالت..
/شني!؟
ناض وهو شاد الشيشه يقول..
/قتلك ماتتزوجيش بالله عليك..بالله عليك راجيني لين نكبر ارجوك..
هانيه وهي تسمع فيه كانت مبتسمه بصدمه مش مستوعبه كلمه من اللي تسمع فيها..
وكريم مكمل تعبير عن شعوره..
/تو تشوفي كيف نخليك تعيشي سعيدة والله نخليك ديما تضحكي وفرحانه نرفعك وين ماتبي ونشريلك كل شي تبيه واي حاجه تبيها نديرهالك غير راجيني نكبر ارجوك..
هو يعبر من جده وبكل مشاعره وهانيه اللي تسمع فيه بصدمه ماقدرتش تتمالك نفسها انفجرت ضاحكه،تضحك من كل قلبها اول مرة تضحك هكي في حياتها..
وهو يشوفلها ودموعه مابطلوش نزول..
هدت هانيه ضحك وهي تمسح في دموعها وقالت.
/كريم..ياكريم..تعرف اني لو جبت صغار لما تزوجت راهو توا عندي بنيه ولاوليد من عمرك ولااكبر يخي ووليتوا انت وياه صحاب..
هو قال بألم..
/تتسهوكي!
بضحكه قالت..
/لاوالله،ياسيدي ماتزعلش وعد مني وعد مني كان ربي عطاني بنيه نخطبهالك باهي!؟
ماتحملش كريم استخفافها بمشاعره بغضب شديد قاللها..
/الراجل اللي بتاخديه ان شاء الله يموت وتولي زي اختك..
ومشي بسرعه طلع من الكوجينه من بابها الخلفي وهو يسمع في صوت ضحكها العالي..
هانيه بضحكه:ااه ياربي عطيك الهني ياكريم قداش ليا ماضحكت هكي
▪▪▪▪▪▪▪"حي ع الجو!"
هانيه وهي تضحك..
/ياريتك شفتي شكله وهو يتكلم كيف شاحط عروقه ويبكي ياربي شديت روحي بالسيف عن الضحك قدام النساوين كل مانتفكر شكله..
بلقيس بضحكه شفقه..
/مش عارفه علاش صخفني..
هانيه:يصخفك شني انتي التانيه! قاعد مراهق وين يكبر ويتفكر اللي داره يضحك ع روحه اكثر مني..
ضحكت بلقيس..
هانيه بضحكه مكر قالت..
/لكن تعرفي مش عارفه كيف حسيت روحي بردت ع قلبي زي مااخته رفضت خوي اني رفضت خوها..
خدت بلقيس مخده وضربتها بيها وهي تقول بضحكه..
/ضحكتيني وماخاطري في الضحك..
ضمتها هانيه وقالت..
/اضحكي ياعمري اضحكي استاحشت ضحكتك هديكا..
ضمتها بلقيس وهي مبتسمه بألم..
♤سن المراهقه..المرحلة اللي يبدا فيها بناء الشخصيه..زمان زمان هلبه قبل الاسلام وفي الاسلام ومابعده كان الولد اول مايوصل للسن هادي يعلموه كل أصول الفرسنه ويعلموه كيف يكون راجل يتحمل المسؤوليه ويوجهوا كل ماعنده من طاقه ومشاعر في امور تعلم الراجل كيف يولي راجل بمعنى الكلمه..تو مثلا زي اسامه بن زيد قداش كان عمره لما ولى قائد جيش فيه اكابر الصحابه ابوبكر وعمر وغيرهم؟..
كان عمره 16سنه..16..يعني هدا في اما سن بدوا يعلموا فيه يولي فارس ويولي قايد جيش كبير!..
السن هادي يوقف عليها كل شي سواء كان للولد ولاالبنت
هالسن غالبا هي اللي ترسم مستقبلك وتحدد مصيرك وحتى نهايتك..
🌿بعد صلاة الفجر من احد مساجد البنداريه طلع سلطان مع بوه وعيونه ع الشيخ صفي الدين كان يبي يمشيله يكلمه بس بعدين تراجع واختار يمشيله في وقت تاني..
استنى لعند ماجت الساعه العاشرة صباحا طلع من حوشهم ومشي بإتجاه الحوش اللي يسكن فيه صفي الدين..
لكن وهو ماشي..لاحظ شي من لما كان في الجامع انتبه عليه
الناس..نظرات الناس ليه كانت غريبه واللي يفوت جنبه لازم يلقي عليه السلام وهو اللي تعود يبدا بإلقاء السلام لأن اصغر من كل حد يقابله في الطريق..
قعد يفكر في هالوضع الغريب وسرعان ماوصل للتفسير البنداريه كلها سمعت باللي داره وهدا كان اثره في نفوسهم،لكن الشي هدا مافرحاش بل زاد من شعور الضيق والتوتر في نفسه.
واستمر في المشي لعند ماوصل لحوش صفي الدين..
🍃وصفي الدين في هالأثناء كان في الحمام يتوضا،وهو يغسل في ايديه للمرفقين وقف ورفع عيونه في المرايه لثواني بعدين غير نظره لباب الحمام ويسمع باب الحوش يدق..
ابتسم بعدين كمل الوضوء متاعه ولما انتهى منه مشي طلع من الحمام وتوجه لباب الحوش.
وصل فتحه وقال بإبتسامه..
/مرحبا بكبير البنداريه..
سلطان ضحك وهو محرج وقال..
/كبير شني ياشيخ البنداريه كبيرها كمال بس..
ضحك صفي وهو يهز في راسه بعدين قاله..
/تفضل تفضل..
خش سلطان وصفي الدين قاله..
/خش قعمز خش..
مشي سلطان قعمز ع فراش بسيط جدا كان جزء من فرش الحوش اللي يبين مدى زهد صاحبه..
صفي مشي قعمز مقابله ع حصيرة وهو يقول..
/والله كان بودي نضيفك شي لكن اليوم بالذات ماقعد عندي من تمر فطرت عليهم..
سلطان:اللي تبيه قولي عليه وتو نبعتهولك..
ضحك صفي وقال..
/ياكبير البنداريه اني نعرف منين نجيب رزقي ماعليكش فيه..
سلطان قال بضحكه وملامح الضيق باديه ع وجهه..
/بالله معاش تقولي كبير البنداريه..
شبك صفي الدين اصابعه في بعض وقال..
/هات السؤال اللي جبته وجيت بيه هات..
ابتسم بأسف بعدين قال..
/اكيد سمعت باللي درته ياشيخ ولا؟
هز صفي الدين راسه بإيجاب..
سلطان قال بضيق..
/تو اني هكي ربي بيحطني في النار؟
عقد صفي حواجبه وقال..
/علاش!؟ ع خاطر دافعت ع عرضك وحرمة بيتك!؟ يكون في علمك ياسلطان اللي درته يعتبر جهاد ولو كنت انت اللي ميت جراء اللي صار راك وليت شهيد..
سلطان بلهفة قال..
/حق ياشيخ؟!
صفي ضحك وقال وهو يهز في راسه بإيجاب..
/حق حق..الرسول قال مازال المؤمن في فسحة من دينه مالم يصب دما حراما...والدم اللي انت سيحته حلال عليك لأن امثال هؤلاء المعتدين ع الحرمات هدا اللي يستاهلوه..
سلطان وهو مبتسم قال..
/ريحني شويه كلامك..لكن اللي درته في القانون جريمه..
صفي الدين قاله..
/خلي عنك قوانين البشر..رفع سبابته فوق وقال..خل همك قوانين الخالق وبس..
ابتسم سلطان براحه وهز راسه بإيجاب..
🌿بس قوانين الخالق ماتتنفذش بعبثيه لو كل حد فينا نفذها بروحه وع مزاجه الدنيا تولي غابه وحني بشر وارد جدا نتلاعبوا بالاسباب بش نبرروا لأنفسنا تنفيد هالقوانين في غير محلها..لهدا انوجدت المحاكم وكانوا القضاء واندارت الشرطه بش تتنفد هالقوانين بالعدل زي مايبي الله سبحانه وتعالى...
🌿🌿🌿🌿🌿🌿
📆وتمر الأيام متواليه وتولي شهور فاتت وعدت..
كانت عايشه فيهم ربيعه حالة من الهدوء والسلام مهتمه بحملها وكذلك دراستها للغة الانجليزيه اللي بدت تتقدم فيها سريعا بمساعدة حسناء،هما الزوز تقاربوا من بعض جدا وتعاملهم مع بعض اكثر من تعاملهم مع اي حد تاني من اهل القصر وهالحال كانت تراقب فيه زكيه بقلق لأن اللي قاعده تشوف فيه حاليا عبارة عن تحزبات تشكلت بين نساوين ولدها ومعروفه تحزبات النساء شن تجيب وراها من خراب لكن هي مابتش تتصرف تصرفاتعشوائيه دير مشاكل تانيه بينها وبين ولدها وتخليه ينفر منها بالمرة..
🍃من جهة تانيه علاقة حسناء بتسعه بدت تاخد منحى تاني بعد ماولت ترافق فيه وين مايمشي بسبب خدمتها معاه وهي استغلت الفرصه وبدت تعرف في تسعه ع جزء جديد من شخصيتها تبيه يشوفها انثى تستاهل منه الاهتمام والموده..
وهو بدي يلاحظ ان حسناء تكنله مشاعر لكن مازال مش متأكد منها لهدا ماكانش يبي يبادر بشي الا لما يشوف منها الرضا والرغبه التامه في انها تكون زوجته فعلا..
كل اللي يبيه انه يعطيها حقها زيها زي شريكاتها إرضاء لله تعالى مش اكثر لأن ماعنداش اي مشاعر تحركت اتجاهها نهائي مع ان حسناء جدا جميله وصاحبة شخصيه مميزة لكن ماقدرتش تلفت فيه أي شي ليها..
🍃ومع كل الحب والاهتمام اللي حاوط بلقيس بدت تطلع من حزنها شيئا فشيئا والفراغ اللي كانت تحس بيه بعد فقدانها لأمها وزوجها عباه ولدها عبد المتين اللي رجع الألوان الزاهيه لدنيتها ودارلها سبب جديد خلاها تتمسك بالحياة وترجع تحبها..
وبعد ماانقضت عدتها بدت الاستعدادات ع قدم وساق لعرس هانيه..هانيه اللي كانت كلها سعاده ولهفه لحياتها الجديده مع معمر الهاشمي..
وتزيد نكهة الفرح عند فاطمه اللي طلعت حامل بعد صبر سنين وتطلع فريحة حتى هي حامل معاها ويرجعوا يعيشوا نفس الاجواء اللي عاشوها لما حملوا بسلامه وكريم..
♧ كانوا حوامل بألطف واحلى بنتين في عيلة بيت المال كلها..هدهد وبابوشا..قصدي هدى ومحبوبه..هدى هادي كانت الطيبه وصفاء النيه ع هيئة انسان عمري ماريت حد بطيبة قلب الانسانه هادي ولابياض نيتها قداش نحبها..
وفي نفس الوقت اللي طلعوا فيه خالتي فريحه وخالتي فاطمه حوامل عرفت عمتي ربيعه جنس اول مولود حملت بيه..بنيه..حماتي العزيزة فداء اللي كانت النقيض لحماتي هدى في كل شي..
🌿بناءا ع تفسير الحلم تسعه توقع يكون جنس المولود ذكر لكن لما طلعت أنثى ماحسش بضيق ولاخيبة امل ولاشكك في تفسير الشيخ نور الدين لسببين..
اولهم ان نور الدين وراث علم تفسير من بوه العربي اللي سبق فسر حلم سلامه بتسعه وتحقق زي مافسره تماما..
تاني سبب انه حتما حيجيه من ربيعه صغار غير هالبنت ومن بينهم حيكون الولد هدا اللي يراجي فيه بفارغ الصبر..
لهذا فرح بهالبنيه زي مافرح بخوتها وحب فرحة ربيعه اللي كانت عارمه لما عرفت ان بكرتها حتكون بنيه..
ومش غير هما اللي فرحوا حتى نزيهه فرحت وتمنت ماتجيب ربيعه كان البنات..
🍃غيرة نزيهه من ربيعه تقابلها غيرة بدريه من نزيهه..لامش غيره بل حسد..حسد حيتطور لحقد في قلبها من بعد اليوم..
...كانت في حوش اهل زوجها زيارة..زيارة كل جمعه المتعارف عليها..
وهي في الكوجينه تشرف ع الشغاله اللي كانت تجهز في سفرة الشاهي والمعجنات كان راجلها مع امه وخواته في الصالون يحكوا عن..
🌱وحده من خواته وهي شاده جريده تقرا فيها بعيونها قالت..
/ماشاء الله ع نزيهه ماشاء الله وصلت مواصيل ماسبقتهاش ليها مراة في البلاد..
عبد الرزاق ابتسم بحسرة وقال..
/ريتيها؟...وقعت عقد شراكه مع شركه عالميه بيتعاونوا بش يديروا منتج مشترك..
اخته التانيه قالت..
/صحة ليها وياسعدها بالراجل اللي كاسباته لولاه ماوصلتش لهالمواصيل..
🍃هني بدريه كانت جايه من الكوجينه لما قربت توصل للباب سمعت عزوزتها تقول..
=حتى نزيهه فالحه ودماغها ماشاء الله من يوم يومها..
تنهد عبد الرزاق بحسرة وقال..
/الله يسامحك يام كان سمعتي مني وخطيبتهالي لما قتلك عليها راهو هي مرتي توا..
خواته فنصوا فيه وقعدوا يسكتوا فيه وامه قالت..
/خلاص انهي..
رجع تنهد بحسرة وقال..
/هدا قسمك يابلقاسم خود ولاخلي..
🍃اي مراة تسمع الكلام اللي سمعاته بدريه تدمر تماما..هي من البدايه كانت حاسه ان راجلها مايكنلهاش مشاعر وان الدلال اللي شافاته منه كان لغرض التقرب من بوها وعائلتها مع هدا مااهتمتش المهم راجل ولد عيلة متسميه لكن ماخطرش في بالها حتى في الكوابيس انه قلبه كان مايل لأختها ومش اي اخت نزيهه اللي كانت ديما تاخد منها في كل شي حسب ماكانت تشوف..
صدمتها الكبيرة باللي سمعاته خلا قلبها الملوث يتحول لكتله لهب من الحقد اتجاه اختها الكبيره حقد نساها الاخوه اللي بيناتهم بالمرة...
🌳🌳🌳🌳🌳
ومن عيلة بيت المال ومن جاورهم..
لعيلة الشيخ البدري اللي خلال هالشهور تغيرت فيه هلبه حاجات تغيير جذري..
وديعه التزمت دينيا ونظام حياتها كله تغير وهالتغيير فرح بوها وخوها عبد الحافظ اللي لقي حد في عيلته يشاركه عالمه واهتمامته..
ولى هو ووديعه راسين في شاشيه زي مانقولوا وحالهم هدا اللي مفرح بوهم خلا نظرته ليهم تتغير وبدي يعطي فيهم قيمة كبيره..
اما اللي فرح مرته هو تحسن حال بنتها خصوصا بعد رجعت لخدمتها..
ووديعه بعد ولت للخدمه بدت تخدم بجد واجتهاد ملحوظ من قبل زملائها ورؤوسائها في الشركه وكانت النتيجه ترقيه تعينت بيها رئيسة قسم وهالنجاح خلاا مجموعه جديده من المشاعر تكبر في نفس وديعه زي حب الرياسه والقياده..
خواتها وخوتها اللي كان يراقبوا في الوضع بدت تتحرك في داخلهم رغبة للتقليد،تقليد مايديروا عبد الحافظ ووديعه لعل وعسى يصير منهم زيهم..
وبطلب من وديعه بدي عبد الحافظ يعزم في اصدقائه المقربين للحوش بش يجهزوا مع بعض لمشروع تخرجهم وهكي كانوا عبد الباسط وبو عجيله يتعرفوا عليهم ويختلطوا بيهم ويتاثروا بطريقتهم واسلوبهم في الحياة..
وعدوى التغيير هادي انتشرت في حوش البدري وبدلت حالهم تماما وبدي كل من يشوفهم حاليا يقول..
"ولوا حق صغار شيخ"..
🌱"لالا حفلات معازف وغناء مستحيل نخشها مرة تانيه"
عاتكه وهي تحاول تخفي ارتباكها قالت..
/حتى اني مانبيش نمشي معاش نتحمل في جو الغني والموسيقى كرهتهم..
🍃هي كرهت تمشي لأي مناسبة فرح هروبا من اسئلة الناس عن النصيب والزواج🍃
رقيه:اني خاطري نمشي الحق نبي نشوف شن دايرين قالوا فرحها هدا بديره اكبر من فرحها الأول تتفكروه فرحها الاول كيف كان؟
عاتكه ابتسمت تهكما وهي تقول..
/وشن صار بعدين ماسكرتش عامين واطلقت..
رقيه:مادخليش بيها اني المهم نبي نمشي ونشوف..
وديعه قالت..
/انك لاتهدي من احببت مانقدرش نخليك تقعمزي بالسيف..
ويدق باب الدار وبعده يسمعوا صوت عبد الحافظ وهو ينادي..
"وديعه"
نزلت وديعه من سريرها وهي تقول..
/جايه خوي..ومشت للباب فتحاته وطلعت..
رقيه:ياغبيه انتي علاش ماتبيش تمشي؟
عاتكه بإنزعاج:قلت علاش..
رقيه:ياحمارة بري معانا ماتندريش مرات المرة هادي تحصلي حاجه..
عاتكه بضيق..
/خلاص معاش نبيه الموضوع الزفت هدا تعبت منه هلبه..
رقيه قعدت تشوفلها بحزن وهي حاسه ان حالهم واحد حتى هي تعبت من الجري ورا النصيب وياريتها كانت تفهم ان النصيب زي الموت هو اللي يجي لصاحبه بروحه بروحه..
🌳"رقية؟!"
عبد الحافظ قال..
/ايه رقيه..
وديعه بإستغراب قالت..
/وعلاش رقيه تحديدا؟ شايفها هو؟
قاللها:ايه اخر مرة جاني فيها خوه هو اللي وصله وقال شافها وهي مروحه للحوش..
وديعه وهي تفكر قالت..
/شوره شافها وهي مروحة من المدرسه..
عبد الحافظ قال..
/اكيد..
وديعه:باهي شن تعرف عنه وعن ماليه؟
عبد الحافظ قال..
/هو راجل ملتزم زي خوه وحوشهم خشيته وعرفتهم زين ناس الله يبارك عليهم..
رفعت حاجبها وهي تهز في راسها بإيجاب بعدين قالت..
/ماتقول لبوي وامي شي لين نفتح معاها الموضوع ونشوف رايها..
عبد الحافظ قال..
/خلاص الموضوع عندك..ولف ومشي لداره وهي طول خشت للدار وسكرت الباب..
▪▪▪▪▪▪▪▪
"كذابة!"
ضربتها وديعه ع ركبتها وهي تقول بضحكه وحواجبها معقوده..
/وعلاش بنكذب يابنت..
ضحكت رقيه وهي تشوف لعاتكه اللي كانت مبتسمه بدهشه..
وديعه تابعت تقول..
/الراجل شايفك بروحه وعاجبتيه وخوك شكره وشكر ماليه انتي صلي استخاره وشوفي روحك..
رقيه وهي مبتسمه بفرح قالت..
/باهي..
عاتكه رفعت ايديها وقالت برجاء..
/الفال لينا يارب..
رقيه قالت بضحكه..
/آمين..
لكن وديعه قعدت مبتسمه بصمت وورا ابتسامتها كانت تخفي في وجع وغصه..
🌾🌾🌾🌾🌾
"لاالمرة هادي ماعزموناش"
هادي فطيمه تتكلم مع اختها هاتفيا عن فرح هانيه بيت المال..
"تعرفي شكله حق صايرة مشكله بين راجلك وتسعة بيت المال"
فطيمه بضيق..
/وهو امتى بطل مشاكل وبلي!؟..المصيبه انه قاعد يخلي في سلطان يمشي في طريقه الولد بيولي نسخة تانيه من بوه..
"سلطان بكر سيد البنداريه لازم يخليه زيه يافطيمه بش يخلفه بعد عمر طويل"
نزلوا دموع فطيمه وهي تقول..
/خلفه سودا مغبرة..سمعت باب الحوش انفتح قالت..شكله سلطان روح من المدرسه سكري سكري خل نوض نحطله غداه..
"باهي بالسلامه"
فطيمه قالت..
/بالسلامه..سكرت السماعه وناضت ع خشة سلطان عليها وهو يقول..
/الغدي يام..
قالتله:لبين مادوشت يكون واتي..
هز راسه بصمت ومشي لداره وهو ماشي شاف عمران يمرد "يزحف"
ضحك وهو يقول..
/فكرون..
ومشاله رفعه وكمل بيه طريقه للدار..
🌾وتجهز فطيمه الغدي وترفعه للمربوعه..
اول ماحطاته خش عليها سلطان وهو رافع خوه ع كتافه..
هي قالت بإبتسامه..
/جيبه جيبه..
نزله وهو يضحك وعطاه لامه بعدين قعمز لغداه،لما شافه تنهد بملل وقال..
/ميه مرة يام نقولك معاش تصبيلي في صونيه..
ويحول صحون السلاطه والمسير ومعاهم الكشيك يحطهم ع جهه بعدين ياخد صونيه الكسكسي ويكفيها في السفره مدلها الصونيه خدتها وهي تضحك بقلة حيله بعدين طلعت من حداه وخلاته يحط في السلاطه والمسير حتى هما في السفرة ويبدا يخلط وياكل..
🌿🌿🌿🌿🌿
وبدوا عراس عيلة الهاشمي وبيت المال وكل فرح يقول الفخامه والبهرجه عندي..
هانيه كانت وكأنها اول مرة تتزوج حتى فرحها هدا كامل سبعة ايام وسبعه ليالي ومش هكي بس امها بتجيب مغنيه عربيه تحيي حفلة ليلة الدخول كانت تبي بنتها تطلع من حوشها للمرة التانيه وكأنها بنيه ماخاضتش تجربه زواج قبل هادي..
🌸يوم الحمام..
موكب كبير دار بهانيه اهم مناطق الألف والخمسين مافيش حوش ماسمعش مظاهر الفرح اللي يعبر عنها هالموكب وهي كانت في قمة الفرح..
اللي رافقوها في الموكب اختها بلقيس وغزلان وباقي السيارات كانوا رافعين باقي بنات عيلة بيت المال..
اما في القصر..
تحديدا في الصالون الضيوف اللي كانت مساحته تعادل نص مساحة قاعةالاحتفالات كانوا ملتمات نساوين العيله الكبار والمتزوجات ع راسهم زكيه وكناينها ومعاهم ضيوف من عايلات الكناين..اهل نزيهه واهل فريحه..
🌱"ماشاء الله ع غزاله حناها ماشاء الله"
هادي ام نزيهه شاده ثريا وتلاعب فيها..
ام فريحه قالت..
/تبارك الله عليها،زينها بروحها البنيه هادي..
زكيه وهي تشوف لثريا قالت بإبتسامه..
/ايه ماشاء الله عليها..
حداهم كريمه كانت واقفه مع غادة واروى وبشرى تسمع فيهم كيف يمدحوا في جمال اختها..
ثريا كل ماتكبر تزيد في الجمال بالذات عيونها كانوا جميلات جدا وكل من يشوفها يمدح في زينها وجمالها ولازم يقارن بينها وبين اختها زي مادارت بدريه توا لكن هالمرة ونزيهه مش حاضره لأنها لاهيه بالاشراف ع تفاصيل ليله السهريه..
🍃بدريه وهي مبتسمه بشفقه مصطنعه قالت..
/ناري ع كريمه بنيتي الشوينه الوحيده في خواتها..
زكيه شافت لأم نزيهه تراجي فيها ترد ع بنتها اما الباقي نظراتهم ليها نظرات استياء..
ربيعه شافتلهم وراجت حد يرد بعدين نزلت نظرها لكريمه لقتها تشوف لخالتها والدمعه في عينها رفعت حاجبها وردت نظرها لبدريه وقالت..
/اختك ماتجيب كان الزين والبهي والزين كله عند كريمه..
زكيه شافت لربيعه وهي مبتسمه نفس الابتسامه اللي شافولها بيها حسناء وعبير وفاطمه ومعاهم ام نزيهه وخواتها اما فريحه كانت متفاجئه..
زي ماتفاجئت بدريه اللي ضحكت بعدين قالت..
/صدقتي غير نبصر عليها..نزلت نظرها لبطن ربيعه بعدين قالت..مازال نشوفوا انتاجك انتي قالوا حامل ببنت ولا؟
ربيعه وهي مبتسمه قالت..
/ايه وان شاء الله تجيني زي كريمه..شافت لكريمه لقتها تشوفلها بإبتسامه حب..
شويه قالت اروى بغيره..
/واني!؟
ضحكوا اللي يسمعوا في حديثهم بعدين قالت ربيعه..
/ان شاء الله تجيني حلوة زيكم كلكم انتي وكريمه وثريا..
ام نزيهه قالت..
/امين تحلي عويناتك ع خير..
ربيعه قالت بإبتسامه..
/سلمك..
وعيون بدريه عليها وهي تشوفلها بغيظ مخفي..
🌿🌿🌿🌿🌿
وروحت هانيه للقصر وفرقة النوبه قايمتها بيها..
قعدت الفرقه في حديقة القصر من الامام ومعاها شباب العيله وهي مشت مع بنات العيله لجهة تانيه من الحديقة وين ماكانوا النساوين يراجوا فيها..
امها اول ماشافتها زغردت والنساوين زغردوا معاها..
مشت هانيه بسرعه لأمها ضمتها بقوة وامها تحضن فيها ومازال تزغرد..
من بعيد شويه كانوا ولاد خوها يرقصوا ع النوبه مع الشباب النساوين انتبهوا معاهم وقعدوا يتفرجوا عليهم وهما يصفقوا..
وقيس كان من بين هالشباب حضر ع خاطر اخته وفي نفس الوقت كان يبي يتعايش مع جرح قلبه معاش يبي يهرب منه ع خاطر توأمته مايبيش يزيدها ع همومها...
وهو يتفرج ع الجو اللي دايرينه الشباب جو عيونه ع عامر اللي هدا وين جي..
ومجرد ماشافه ركبه مية جن وعفريت وقلبه ولعت فيه نار حرقاته حرق..
شعور الغيره هدا كان يبي يتجاهله لكن مش عارف كيف ولأن عقله وقف عن العمل تصرف تصرف بعيد كل البعد عن شخصيته..
خش وسطهم وقعد يرقص بحماس زايد كان يبي يفش غله وخلاص وكل مايشوفله كان يضحك ع طريقته في الرقيص لأنه مايعرفش يرقص..
محفوظ اللي كان عارف مافيه حب ينقذه من هالموقف خش وهو يرقص ويقول..
"هاه هاه هاه"
شد ايدين قيس ومشي بيه وقفه جنب واحد من ولاد العيله وكمل رقيص وعاد معروف محفوظ مجنون وكان حصل النوبه معاش يهدا بكل..
عبير كانت ميته عليه بالضحك والنساوين يضحكوا معاها ماعدا بلقيس اللي كانت تشوف بنظرات ألم لخوها وهو واقف يضحك من ورا قلبه عكس ضحكة غزلان اللي كانت في قمة السعاده وهي تتبادل في نظرات الحب مع خطيبها..
🌿وتم عقد قران معمر الهاشمي وهانيه بيت المال بعد العصر وعقب وصول خبر اتمام عقد القران صارت احتفالات عارمه عند اهل العريس واهل العروس ومافيش حد سعيد زي العرسان في هاليوم..
🌿🌿🌿
اليوم اللي بعده كان يوم الكسوة..
زوجات تسعه ماعدا ربيعه حيصدروا ومعاهم عبير مرت محفوظ وكذلك بعض نساوين العيله منهم بنات عمام العروس ع راسهم خوات محفوظ..
🌱"ماشاء الله تبارك الرحمن كل وحدة احلى من التانيه"
عبير بإبتسامه..
/تسلميلي ياقلبي..
حسناء وهي مبتسمه قالت..
/تسلمي ربوعه..
قعمزت ربيعه ع كرسي حداهم وهي تقول..
/والله حتى خاطري فيها لكن عارفه روحي مش حنتحملها مع الحمل..
عبير:صح صعبه شويه عليكي..شافت للمرايه اللي كانت مقابلتها بعدين قالت..
/بس عن جد زيكم كتير حلو ومميز..
ربيعه وهي مبتسمه بفخر قالت..
/زي مهيوب زي صحابه..
ضحكوا الزوز بعدين قالت حسناء..
/اول مرة نلبسه..
عبير:مبين عليكي حايصه ولايصه متلي..
وتخش عليهم فاطمه لما شافتهم ابتسمت وقالت..
/ماشاء الله ماشاء الله..
الزوز مع بعض قالوا..
"سلمك تسلمي فطوم"
قربلتهم وهي تقول..
/هي نوضوا الكسوة بتجي بعد ربع ساعه..
ناضوا الزوز..
فاطمه ساعدت عبير في المشي وربيعه ساعدت حسناء..
طلعوا عبير وفاطمه الاولات وبعدهم طلعوا ربيعه وحسناء..
حسناء بصوت منخفض قالت..
/هاتي وذنك ربيعه..
ربيعه قربت منها وحسناء قالت..
/نبي تسعه يشوفني..
ابتسمت ربيعه ووخرت بعدين وقفت وخلتهاتوقف معاها بعدين قالت..
/فاطمه اسبقونا انتم تو نلحقوكم..
فاطمة قالت..
/ماتعطلوش..وكملوا طريقهم لعند ماطلعوا من الممر..
ربيعه شافت لحسناء وقالت..
/استني..
ومشت وعيون حسناء تلحق فيها لعند مااختفت من قدامهم غابت ربيعه قريب خمسة دقايق وحسناء استغربت طول غيابها فجأة شافت تسعه جاي من بعيد قلبها من قوة الدق قريب طلع من مكانه..
وصل فيها وهو مبتسم وحواجبه معقودة بعدين قال..
/ماشاء الله...ماشاء الله..ماشاء الله..
حسناء نزلت عيونها وهي مبتسمه بخجل..
ضحك وقدملها حط يده ع راسها وبدي يقرا عليها وهي غارقه في شعور حلو من قربه ليها..
بعد كمل قرايه قال..
/ربي يحفظك ياست الحسن..
بدهشه قالت..
/ست الحسن؟
بضحكه قال..
/ايه مش غير حسناء بس..
ضحكت بخجل وقلبها طاير بمشاعره الحلوة..
هو جي جنبها مد يده شافتلها شويه بعدين شدتها وهي بطير من الفرح ومشي بيها لعند ماوصلها للباب دق عليه وقعد يستنى لعند ماطلعتله هنادي..
تسعه:وصلي اللا للقاعه وردي بالك عليها..
هنادي قالت بإبتسامه..
/حاضر سيدي..هي تعالي ياللا..
مشت حسناء مع هنادي وهي مبتسمه بسعاده وهو قعد واقف يشوفلها لعند ماطلعت وهنادي سكرت الباب بعدين رجع لقاعة الاحتفالات الخاصه بالرجال..
🌿🌿🌿
وفي قاعة الاحتفالات النسائيه صفة طويله تعبت بالصدارات ابرزهم نساوين تسعه..
نزيهه وفريحه بالبدلة الصغيره وحسناء بالبدله كبيره..
وكذلك عبير كانت لابسة البدله الكبيرة..
كانوا محط انظار الحاضرات واكيد انحطوا في مقارنات ودخلوا في هالمقارنات ربيعه اللي ماكانتش لابسه زيهم ومقعمزة بعيد عنهم..
وللأسف في عيون الناس كانت تبان ربيعه اقل وحده حتى في جمال الشكل..
حسناء وهي تشوفلها كيف تهدرز مع عصمت قعدت تراجي فيها تشبحلها وجت عين ربيعه عليها رفعت حسناء يدها وهر تأشرلها تجيها استأذنت ربيعه من عصمت وناضت مشت لحسناء..
وصلت فيها وطبست عليها وهي تقول..
/هاه شن صار معاك؟
حسناء قالت بضحكه..
/انتي قولي شن درتي بش جي؟
ضحكت ربيعه وقالت..
/طلعت دورت ع الولاد قابلني فاضل ناديته وقتله برا قول لبابا امي حسناء تبيك تجيها للممر الرئيسي وخليته يمشيله واني مشيت للقاعه..هو هدا...
ضحكت حسناء وهي تهز في راسها بإيجاب..
وربيعه وقفت ع حيلها وهي مبتسمه لكن هالابتسامه تعكرت لما جت بدريه لأختها وقفت حداها وهي تقول بضحكه ود مصطنع..
/ماشاء الله عليكم ماشاء الله..
كلهم شكروها وهي بعدين قالت بضحكه..
/سلمهم ياربي..لكن الصراحه الصراحه طلع ع الاردنيه اكثر شي ممكن لأنها اصغركم بان فيها..
ربيعه قعدت تشوف لنزيهه كيف تبان متوترة بعدين غيرت نظرها لعبير اللي قالت..
/تسلمي بس انا شايفه ان كل وحده فينا طلعت احلى من التانيه..
ضحكت بدريه وقالت..
/ياوخيتي اني هكي شفت وقلتي رأيي بصراحه تقولك نزيهه اني صريحة هلبه مانعرفش نجامل..
عبير ابتسمت ابتسامه صفراء وقعدت ساكته..
غيرت بدريه نظرها عنها وشافت لربيعه لقتها تشوفلها بإمتعاض ابتسمت بإستفزاز وقالت..
/علاش مالبستيش حتى انتي ولامايطلعش عليك!؟
كلهم شافوا لربيعه وربيعه شافت لنزيهه بعدين ردت نظرها لبدريه وقالت بإبتسامه..
/مانقدرش عليه لإني حامل ماحلك نسيتي..
بدريه قالت بضحكه..
/وكان حامل هلبه حوامل يلبسوا فيه..
ربيعه بضحكه قالت..
/اني غير عنهم مانحبش نتعب روحي..شافت لحسناء وقالت..بنولي لمكاني تعبتني الوقفه..ومشت بإتجاه الطاوله اللي كانت مقعمزة وراها..
بدريه وهي تشوفلها بإزدراء قالت..
/شلافطيه..
شافتلها حسناء بحدة وعبير كانت تشوف لنزيهه وهي معصبه تبيها تسكت اختها قبل ماتنفجر فيها..
لكن ماسكت حد بدريه كان صوت منبهات سيارات عيلة الهاشمي ابتسمت وقالت..
/عرب الكسوة جو..نستأذن..ومشت ولت لمكانها والكل يشوفولها بإمتعاض ماعدا نزيهه اللي كانت نظراتها ليها نظرات ضيق..
🌿وجت كسوة اسطوريه لهانيه اذهلت كل الحضور وبينت قداش معمر واهله فرحانين بنسبهم لعيلة بيت المال..
وغنوا ع هالكسوة الزمزامات وبعد دخلوها داروا لهانيه الاسبار المعروفه...
🌿وفي اخر ليلة هاليوم اجتمعوا عبير وحسناء وربيعه في غرفة المعيشه وداروا سهريه هدرزة عن احداث اليوم وضمن حديثهم كان الكلام عن بدريه اخت نزيهه..
🌱عبير:خلتني شك انها اختها عن جد..
حسناء قالت..
/ماتستغربيش في خوت يكرهوا بعض ويحقدوا ع بعض والله مرات تلقي العدو ارحم من الأخ..
ربيعه:اني قعدت مركزه ع شبحاتها لنزيهه تخوف..
عبير:انا كمان لاحظت نظراتها مشان هيك قولتلكم شكيت انها اختها..
ربيعه:اللي تفرسك سكات نزيهه الشنعب عليها تتهزا ع صغارها قدامها ماتفتحش فمها بكلمه تقول شاده عليها حاجه.
حسناء:نزيهه من النوعيه اللي ماتحبش تبين ضعفها لحد ولاتحب تخلي حد عارفه انه قاصد يضايقها يوصل لمراده هدا علاش تتجاهل في كلامها وتغير في الموضوع..
عبير:انا بحبها كثير لنزيهه بس شخصيتها كتير غريبه وصعبه..
حسناء:صعبه ومتسلطه وتحب البروز تحب تكون هي الأولى والأهم طول الوقت..
ربيعه وهي تفكر قالت...
/صح..
ثاوبت عبير وقالت..
/انا خلص ماعاد فينيرايحة نام..ناضت وهي تقول..تصبحوا على خير..
الزوز قالوا..
"وانتي من اهله..قدامك كل خير"
ومشت طلعت وخلتهم في حالة صمت دامت للحظات بعدين قطعتها حسناء لما قالت..
/ربيعه عندي سؤال؟
ابتسمت ربيعه وقالت..
/قوليه..
حسناء قالت..
/تو انتي ماتغاريش ع تسعه؟
بضحكه قالت..
/مانغارش!؟ اني كان نلقى ندسه في قلبي ومعاش نطلعه بكل ..
حسناء قالت بضحكه..
/لكن تصرفاتك غير هكي..قصدي كيف تحاولي تقربي بيني وبينه مالحظتش انك مضايقه نهائي..
ربيعه:اللي في القلب في القلب ياحسناء بعدين اني واخده راجل عارفه ان عنده قبلي تلاته معناها مفروض نتقبل ونحاول نتعايش مع الوضع..
حسناء:معقوله مافكرتيش تخليه ليك بروحك خصوصا وان مكانتك عنده غير..لو كنت مكانك نستغل الوضع اللي اني فيه ونقعد اني بس ع ذمته..
ضحكت ربيعه وقالت..
/تعرفي شن اكثر نعمه نحمد ربي ونشكر فيه عليها..القناعه..اني ماكنتش نحلم حتى الحلم اني في يوم من الايام بنولي مرت راجل زي تسعه وبنعيش العيشه هادي كنت ديما نقول ياربي عوضني خير ع اللي شفته في حياتي وصدقيني ماتخيلتش العوض اللي بيجيني من ربي كبير هكي..اني شايفه ان ربي عطاني فوق ماتمنيت والحمد لله راضيه باللي عندي وقانعه بيه شن نبي اكثر من هكي..
ابتسمت حسناء وقالت..
/تصدقي عمري في حياتي ماحبيت ولاتحرك قلبي لراجل طموحي في مجال دراستي وشغلي كان مسيطر عليا حتى اني كنت من ضمن الناشطات في الدفاع عن حقوق المراة..يعني كنت نشوف لتعدد الزوجات ع انه اهانه في حق المرأه وظلم ليها كنت نشوف فيه فكرة ذكوريه الغرض منها اشباع نزوات الراجل وزياده في التسلط الذكوري ع المجتمع..قعد هالفكر مسيطر عليا لدرجة خلتني نكره الارتباط والزواج..تنهدت وقالت..وطبعا تعرفي ظروف زواجي من زوجي الاول اللي كان بالاجبار مع ان كان راجل محترم وحبني هلبه واني قدرته لكن ماقدرتش نحبه..بعد موته قلت بنعيش لنفسي وشغلي وفكرة الزواج هادي بنلغيها من عقلي..ابتسمت وكملت تقول..لعند ماخش في حياتي تسعه..ضحكت وقالت..بصراحه ماكنتش طايقاته لأني سامعه انه معدد وكنت نقول عليه المزواج..بس هو..تنهدت وقالت..هو مش عارفه شن دارلي غيرني لخبطلي كياني كله،من غير مانحس ع روحي طحت في حبه،تعرفي شن زاد حببني فيه..اسلوب حياته مع زوجاته القيمه اللي عاطيها لزوجاته ماعطهاش قانون حقوق المراة للمراة في العالم كله وبعدين عرفت اسلوبه في التعامل معاهم من وين واخده، واخده من الدين ومن حياة الرسول عليه الصلاة والسلام مع زوجاته..يااه ياربيعه لو تعرفي توا شن ولى كل اللي نتمناه في الدنيا..نكمل عمري معاه وجنبه وندير منه صغار يحملوا اسمه وصفاته..
تنهدت ربيعه وقالت بإبتسامه هويام..
/زدتي ذوبتيني فيه يعطيك الهني..
حسناء ضربتها ع كتفها وقالت..
/اسكتي نغار..
ربيعه قالت..
/حتى انتي اسكتي خلاص راهو من بكري شاده روحي عليك بالسيف..
حسناء قالت بضحكه..
/مش بيدي غصب عني والله..
ربيعه قالت تنهدت بإبتسامه وقالت..
/حتى اني..غطت وجهها بيدها وقالت..ياحليلي استاحشته..
حسناء قالت..
/حتى اني..
نزلت ربيعه يدها وشافتلها وهي تضحك وحسناء ضحكت معاها..
🌸وكملوا هدرزتهم لعند ماغلبهم النوم ورقدوا في غرفة المعيشه بدون مايحسوا..
🌸🌸🌸🌸🌸
تاني يوم اخر يوم في عرس هانيه..
الحفله..
مع الساعه التاسعه مساءا..
كان تسعه واقف في اخر الدروج وهو يشوف لساعته سمع صوت دقة كعب رفع عيونه شاف فريحه نازله وهي قمة الجمال..
قاللها:قلبي..قلبي..قلبي..
ضحكت فريحة بخجل لين وصلت فيه..
مدلها ذراعه وقال..
/هيا يامهجة الروح..
تعنقت ذراعه ومشت معاه وهي تسمع منه كلمات الغزل لعند ماوصلها للباب وخلاها تخش..
رجع وقف في الدروج ع نزلت حسناء ابتسم وقال..
/ست الحسن..
ابتسمت بخجل..
قاللها:الله يبارك عليك..
وصلت فيه وقالتله..
/حتى انت طالع فضيع في البدله..
ضحك وقال..
/مشكورة ياست الحسن..مد ذراعه وقال..هيا..
تعنقتها ومشت معاه وهو يهدرز عليها لعند ماوصلها للباب ورجع وقف عند الدروج مرة تانيه..
استنى للحظات بعدين نزلت نزيهه..
ابتسم وقالت..
/الشيهانه
ابتسمت بحب وقالت..
/شفت البدله كيف طلعت عليك بش تعرف ذوقي بس..
مدلها ذراعه وقال..
/ياودي عارفه من لما اخترتيني واني عارفه..
تعنقت ذراعه وضرباته عليها وهي تضحك وحتى هي رفعها للباب بعدين رجع للدروج وقال..
/وينك ياالسرحانه هدا كله ان شاء الله مش تاعبه ولاصايرلها شي..وكيف جي بيركب يسمع صوتها ينادي فيه..
"تسعه"
شاف يساره لقاها جايه من جنب الدروج قدملها وقال بضحكه..
/نزلتي في الاصنصير..
قالتله:متوقع ننزل من الدروج في حالتي هادي!؟
خبط جبهته وقال..
/راحت عن بالي
ضحكت وقالت..
/هي هات ذراعك هات..
مد ذراعه وهو يقول بضحكه..
/طالعه طيري العقل..
تعنقت ذراعه وقالت بإبتسامه..
/مشكور..ومشوا وهو يقول
/العفو يااللا..رفع حاجبه وقال..ماقلتيش شن رايك في البدله..
قالتله:شن اول مرة تلبس بدله لبسك كله بدالي..
قال بضحكه..
/هادي موديلها جديد
مررت نظرها عليها بعدين قالت..
/انت اللي محليهاالصراحه..
ضحك وقال..
/شكلك عارفه من واخدهالي..
رمشت عيونها وقالت..
/مني !؟
ريشها من غرتها وقال بضحكه..
/بطلي خيرلك..
ضحكت وهي رافعه حاجبها..
وصلوا في الباب جت بترخي ذراعه شدها وقال..
/اقري الكرسي والمعوذتين قبل لتخشي..
هزت راسها بالموافقه وهي مبتسمه..
قدم فتحلها الباب شافتله بإبتسامه بعدين خشت وهو سكر وراها الباب وبعد تنهد بإبتسامه مشي متوجه لقاعة الاحتفالات الرجاليه...
🌿وطلعت هانيه بطلة اجمل من طلتها في فرحها الاول جتى انها بانت ع الناس اصغر من قبل..
وحفتلها كانت جدا فخمه بحضور المغنيه العربيه وعاشت هانيه ليلة عمر تانيه مازال احلى من الأولى بمراحل..
وعند نهاية الحفله جو اهل العريس روحوا بيها للفندق اللي دار معمر في قاعته حفلة الدخول..
وحتى هي كانت حفله جدا فخمه بحضور ناس مهمه وانزفت فيها هانيه مع معمر وسط عيلته وجزء من عيلتها نزيهه مرت خوها وفاطمه مرت مرعي وزوز من بنات عمامها...
معمر كان طالع قمه في الوسامه والجاذبيه وهانيه اعجبت بطلته هلبه لكن هو كان طاير بيها ومش مصدق انها واخيرا ولت مرته..
🍀وفي الحديقه الخلفيه لقصر ذهيبه كان كريم مقعمز يبكي بروحه وهو يقول..
"ان شاء الله تموت يامعمر ان شاء الله تموت"
🌿وسافرت هانيه تاني يوم مع راجلها لشهر عسل حتلف فيه اغلب دول اوروبا..سافرت وخلت قلب امها وراها يدعيلها في كل الوقت بالهني والراحة والذريه الصالحه...
🌿🌿🌿🌿
وحتى مرت الشيخ البدري كانت تدعي من قلبها يصير من موضوع الخطوبه اللي جي لبنتهم رقيه..
جوهم اليوم اهل الشاب بش يتكلموا فيها وطبعا تعرفوا ع خواتها في هالجيه وهي طلعت بعدين ولما شافوها عجبتهم...
🌿ويفوتوا يومين ويتصلوا اهل العريس لكن مش بش ياخدوا رأيهم في الموضوع بس بل كانوا يبوا يفتحوا معاهم موضوع تاني..
🌱"عاتكه بنتي الكبيره؟"
"ايه ياوخيتي الكبيره اللي عيونها شهب نبيها لولدي الكبير هو تزوج قبل وماكملش مع مرته ع خاطر طلعت ماتجيبش في الصغار ومستعده نعطيك عنوان مالي البنت تمشوا تتأكدوا منهم بأرواحكم"
ام وديعه قالت وهي تحاول تخفي فرحتها..
/صادقه ياوخيتي صادقه غير عطيني وقت نشوف البنت ونرد عليك..
"باهي..المهم رقيه موافقه"
قالت بإبتسامه..
/ايه من ناحية المبدأ قعدت بس النظرة الشرعيه..
"ايه ايه حقها وحقه"
🌿وتفتح مرت البدري الموضوع مع عاتكه وعاد فرحة عاتكه كانت لاتوصف وافقت ع طول بدون تردد وخواتها فرحولها هلبه بالذات رقيه اللي قاعده تدعي تولي هي وياها سلايف..
ويعدوا يومين تانيات ويجوا العرسان الزوز بش يديروا المقابله..
وطبعا كل واحد فيهم شاف خطيبته ع حده وصار القبول بين كل الاطراف..
وهكي واخيرا جي لبنات البدري نصيبهم وفرحوا قلوب بوهم وامهم وهما يتمنوا وديعه تلحقهم، وديعه اللي برغم فرحتها لخواتها كانت حابسه في داخله حسرة كبيرة ع نفسها..
🌿🌿🌿🌿🌿
طرابلس..
الساعه الثالثه ظهرا..
من باب مبنى الشركه القابضة اللي يملكها تسعه..
طلع ومساعده جمال معاه متوجهين لسيارته ركبوا وتحرك بيهم السواق طالع من الشركه..
اول ماطلعت السيارة من الشركه جتهم سيارة مسرعه لما خطمت من جنبهم نزل مرش بابها الخلفي وطلع منها واحد بسلاحه اطلق عليها الرصاص بعدين هربت السيارة بأقصى سرعه...
...يتبع...
