رواية ولاد تسعة

الجزء الخامس (مال وبنون)

#ولاد_تسعة "الفصل الاول/سميه تسعة"
#جمان_فريد
الجزء_الخامس "مال وبنون"
⛔احداث هذه الروايه وشخصياتها من وحي الخيال بعض الاحداث غير واقعيه"فنتازيه" وبعضها بعيد عن واقعنا المعاش والبعض الاخر يلامس شيء من الواقع⛔
⚠️ملاحظه..
لما يبدا الكلام بالرمز هدا (♤) هذا يعني ان البطل يسرد في الاحداث
اما لما يبدا بهذا (🌿) يعني الكاتبه هي اللي تسرد
#الدعاء
‏ألَا إنَّه ما قُرعت أبواب السَّـماء بشيءٍ مثل الدُّعاء، وعلى المرء ألَّا يستكثرَ شيئًا في الدُّعاء، فإنَّ كل ما يظنُّـه كثيرًا فهوَ في مُلك اللَّه قلِيل، وكلّ ما يراهُ عسيرًا فهو في جَنب اللَّه يَسير.
- سعُود الشريم.
■■■■■■■■■■■■■■■■■■■■
🌿 ثروة الإنسان لا تكمن في المال الذي يحمله في كيس نقوده،بل تكمن في الدخل الذي يصنعه 🌿
••••••••••••••••••••••••••••••••••••••••••••••••••••••••••
واقف هو وزوز من رجاله واحد فيهم صديقه يدعى"الساعدي" والتاني من اهم رجاله يدعى "شلهوب الزقطي"
الثلاثه كانوا واقفين قدام مبني كبير واحد فيهم يتكلم واللي معاه يسمعوا فيه..
🌵كمال:كلمتوا قناة من قنوات التلفزيون تجي تصور الافتتاح غدوة؟
الساعدي:زوز..وحده تابعه للدوله والتانيه قناة خاصه..
هز راسه وقال:كويس..
الزقطي قال..
/تبينا نبعتوا من يعزم نساباتكم..
كمال رفع حاجبه وقال..
/لانساباتنا هدوكا نعزمهم بروحي..
ابتسم الساعدي ابتسامه خفيفه وهو يشوفله...
♤كمال البندار في هداكا الزمان فتح مصنع كبير للعصاير بش ينافس المصنع اللي داره بوي وفي نفس الوقت بوي وخالتي نزيهه كانوا ناويين يبدوا في تصنيع اللوقا مع العصاير والالبان تحت اسم البستان..
بوي دار دراسه مطوله للموضوع خدت منه وقت طويل..هكي بوي كان ماياخدش خطوة الا بعد مايدرسها كويس بش تكون ناجحه مية في الميه..لكن مع اللوقا لأول مرة الحكايه تجيه معاكسه..
🌿عزمه كمال ع الافتتاح وهو بكل اريحيه وافق يحضر ولما جي يوم الافتتاح كان اول الحاضرين..
في حفل الافتتاح عرضوا عينه من منتجات المصنع من بينهم عصير"لوقا" وهني يتلقى تسعة الصدمه لما يشوف تصميم شكل العلبه نسخة من الشكل اللي هو اعتمد يديره لعلب اللوقا اللي تخص مصنع نزيهه ومازاد صدمه الشعار المكتوب ع العلبه..
"تشربها..تروقها"
هو نفس الشعار والصادم اكثر بالنسبه ليه ان الشعار هدا كان فكرة صاحبة فكرة اللوقا..فريحة..
🌿🌿🌿🌿🌿🌿
"اكيده توارد افكار ياتسعة"
تسعة بغضب..
/توارد افكار حتي في شكل الحكه والشعار! قولي كلام يخش العقل يانزيهه..
نزيهه بخوف..
/باهي استهدا بالله وصل ع النبي..
هوقال بعصبيه..
/لاإله الا الله..اللهم صل ع محمد..
دق باب المكتب وانفتح وخشت فريحه..
تسعه قاللها بحدة..
/سكري الباب..
سكراته بخوف وهي تشوف لنزيهه لقتها تشوفلها بضيق ممزوج بالقلق..
تسعه قاللها بعصبيه..
/اشبحيلي هني
شافتله طول وهي مصدومه في اسلوبه..
بغضب قال..
/قولي الحق فكرة اللوقا فكرتك انتي ولا سامعتيها من حد تاني؟
فريحه وهي مصدومه..
/فكرتي والله العظيم..
حط ايديه ورا ظهره وقال بعصبيه وتهكم..
/ياابله فكرتك اليوم شفتها قدام عيوني في مصنع ولد عمك..
زادت انصدمت ونزيهه تشوفلها بتوتر..
اشر بسبابته عليها وقال..
/ياانتي سامعه بيها يااما هما سمعوا بفكرتك..
قعدت فريحة تفكر في كلامه فعلا هي حكت عن تفاصيل مشروع اللوقا لأهلها لكن اهلها ماعندهمش خلطه بالعيله..
عقدت حواجبها وقالت بحده..
/الفكرة فكرتي هدا اولا..تانيا اني حكيت عنها لماليا ومانعرفش هما لمني وصلوها بش وصلت لكمال..
بصوت عالي وغاضب قال..
/ماتقوليش اسمه..
انتفضوا نزيهه وفريحه من الفجعه..
هو بنفس الغضب اشر ع الباب وقال..
/اطلعوا..اطلعوا..
مشت نزيهه بسرعة خدت فريحه من يدها وفتحت الباب وطلعوا وسكراته وراها..
نزلوا دموع فريحه وهي تقول..
/حسبي الله ونعم الوكيل فيك ياكمال الكلب..
نزيهه بضيق:خلاص هدي روحك ماتنسيش انك ترضعي يافريحه..
فريحه وهي تبكي قالت..
/هادي تاني مرة يشك فيا تسعه تاني مرة يكذبني..
نزيهه قالت بإستغراب..
/تاني مرة!
قعدت تبكي فريحه ونزيهه حاوطتها وهي تقول..
/باهي تعالي معاي تعالي..
▪▪▪▪▪▪▪▪
"الجايف اللي اسمه كمال يبي يخرب عليك"
فريحه وهي تبكي..
/من الاول زبطه هو اللي اشبح شن قايل لتسعة ليلة الدخول..لكن اللي قاهرني ان تسعه في المرتين يشكك فيا..
نزيهه قالت..
/مش شك..لكن هكي البنادم لما يطلع عن طوره يفكر ويتصرف بطريقه غلط..المهم انتي في الجديد معاش تحكي اي شي يخص خدمه تسعه لأي حد مني كان يكون..
رشفت فريحه وهي تهز في راسها بإيجاب بعدين قالت..
/باهي وانتي مش مضايقه مني!؟
ضحكت وقالت..
/لاعلاش بنضايق بالعكس جت لصالحي خل ندير التصميم اللي اني نبيه ونألف الشعار بروحي..
ضربتها فريحه ع يدها وهي عاقده حواجبها..
ونزيهه ضحكت وقالت..
/نضحك معاك ياهبله..تو بعدين نقعمزوا ع رواق ونفكروا شن نديروا..
رشفت فريحه وقالت..
/كان انتي صاحبة المصنع عندك عادي هو علاش حمق هكي يعني بيخاف ينافسه كمال!؟.
نزيهه:تعرفيه تسعه مايخافش من المنافسه ولايغلب في حاجه تافهة زي هادي..الحكايه كلها ع بعضها حكايه غيرة مش اكثر ريتيه كيف ولى لما قلتي اسم كمال هدا!
تنهدت فريحه بضيق وقالت..
/لكن شك فيا يانزيهه..وبحده كملت تقول..واني المرة هادي مش مفوتتها..
نزيهة رفعت حواجبها وقالت..
/شن بديري!!!؟
▪▪▪▪▪▪▪
"يامرحبتين مرحبا بعسول عمته"
فريحه:سامحينا بنستعمروا سريرك الايام هادي..
بلقيس قال بضحكه..
/ع حسابكم اهو بالمرة ناخد بروفا ع معاناة الصغويرة..
ضحكت فريحة..
عقدت بلقيس حواجبها وقالت..
/لكن الخوف كله من بوه ياكبدي مرات يدير ردة فعل لاتحمد عقباها..
فريحه بخوف..
/زي شني؟
رفعت بلقيس يدها وهي فارده تلاته من صوابعها..
فريحه قالت بخوف..
/زعما؟!.
بلقيس:وزعمات ياحنة هو من قبل قالك بنديرها لكن انتي شكلك تبيه يستعجل..
جت فريحه بتنوض من خوفها لكن لما تفكرت اسلوبه وكلامه معاها اليوم ولت قعمزت ورفعت حاجبها وهي تقول..
/يمشي ياخدهم زوز مع بعض كان يبي..
وتضحك بلقيس ضحكتها اللي فجعت سلامة الصغير وخلاته في عيطه وحده..
🌿اما بوه لأنه كان في حالة من الغضب الشديد تجنب زوجاته وقعد في حجرة مدايرها لنفسه في جنب مكتبه بالزبط..
وقعد غادي يقرا في القرآن لعند ماجاه النوم ورقد..
🌿ومع فجر تاني يوم يطلع من القصر بعد يعطي خبر لبوه انه مسافر لوحده من الدول العربيه بيقعد فيها اسبوعين وهالخبر ضايق زوجاته ودخل الحزن في قلوبهم..
وخلال هالاسبوعين تجتاح لوقا "الواحة"السوق وتحقق نسبة مبيعات عالية في البلاد كلها والشعب ولى مايشرب كان في لوقا كمال البندار وهو عاد مش عارف وين يحط فرحته بهالانجاز المشوه..
♤انجاز مشوه لأن اندار بطريقه غير شريفه..هلبه ناس في وقتنا الحالي يبنوا في امجادهم ع حطام امجاد منافسيهم والحاجه هادي صارت حتى ع مستوى دول..يعني بش يقعد مجدهم اللي بنوه عالي لازم يهدوا اللي الأعلى منه..
لكن لما يكون المنافس راجل زي بوي يكاد يكون من المستحيل انه ينهد ولايخسر لأنه واقف ع ارض ثابته ودماغه ديما يخدم صح وعنده من الحكمه مايخليه يعرف كيف يواجه هالأزمات..
🌿بعد اسبوعين روح تسعه واول حاجه دارها قعمز مع بوه وقعد يهدرز عليه لعند ماخشت امه بسلامة الصغير هو لما شافه ابتسم من قلبه وناض خداه من امه..
قعمزت زكيه جنب راجلها وقالت وهي مبتسمه..
/سبحان الله كل مايكبر يولي يشبه سميه..
ابتسم سلامه وقال لولده..
/جيبه جاي جيبه..
قدم تسعه لبوه وطبس عليه عطاه ولده وقعد يتأمل في بوه كيف يلاعب فيه ابتسم من قلبه بعدين..
/عطوني الاذن..
سلامه وهو يشوف لحفيده قال..
/اذنك معاك..
مشي تسعه خطوة للخلف وهو يشوف لبوه بإبتسامه بعدين لف وطلع من حداهم وهو متوجه للممر اللي يرفع لديار زوجاته..
طلع من الممر اللي كان يمشي فيه وخش للممر المقصود لقي فريحة جايه من بعيد رفع حاجبه وابتسم..
اما هي لما شافاته قلبها فر فران من الشوق لكن ظاهرها كان التجاهل..
لما قربت توصل فيه عرفها بتفوته خلاها تجي جنبه وع طول اعترض طريقها وقال..
/ماتشبحيش فيا!؟
وهي منزله عيونها رفعت حاجبها وقالت..
/ايه.
ضحك بتعجب وهو رافع حواجبه اما هي تخطاته ومشت بسرعه خافت لو قعدت اكثر هكي تضعف وترضى بسرعة..
كمل طريقه وهو يضحك ويحرك في راسه يمين ويسار وقعد يمشي لعند ماوصل لجناح نزيهة..
كيف جي بيفتح الباب سمع صوتها تنادي..
"تسعه"
التفت شافها جاياته وهي مبتسمه بفرح ابتسم..
لما وصلت فيه واخترقت ريحة عطره انفها جاها شعور مفاجئ بالغثيان ولما ضمها زاد هالشعور مع شعور نفور حتى هو جاها فجأه..
تباعدت عنه وهو يقوللها..
/شن حالك؟
حاولت تتهرب وهي تقول بإبتسامه مصطنعه..
/الحمد لله..
فاتت من جنبه وفتحت باب الجناح بعدين التفتت وقالت لاشعوريا..
/خليك هني نبدل ونطلع..
وتخش بسرعه وتسكر الباب بدت ع وجهه ملامح الاستغراب وهويشوف للباب اللي تسكر في وجهه..
اما هي حطت يدها ع فمها بعدين نزلتها وقالت..
/خيرني شن جاني اللطف!؟
🌿وقعدوا باقي اليوم الشيهانة والشادن بعاد عن تسعة وهو لاهي بولده عنهم مع استغرابه الكبير في حال نزيهه..
🌿🌿🌿🌿
تاني يوم..
في كوجينة القصر..
كانت بلقيس واقفه جنب فريحه تشوف فيها كيف ترتب في حافظة أكل صغيرة بعد كملت عطتها لبلقيس وقالت..
/خودي ياجبينه..
خدت بلقيس الحافظه وهي تقول بإبتسامه..
/زعمه يعجبه..
فريحه قالت..
/مدام دايرتيه بإيدياتك يعجبه ونص..
ع خشة نزيهه وهي تقول..
/قالك تسعه ساعتين مش اكثر..
بلقيس قالت بفرح..
/ييي سلمهم نساوين خوي..هيا توا خلوني نطلع عطلت..بااي..
ومشت بسرعه طلعت من حداهم وهما يلحقوا فيها بأنظارهم وع وجوههم ابتسامه حلوة بعدين التفتت نزيهه لفريحه وقالت بقلق..
/فيري..
فريحه:نعم..
قالتلها:مش عارفه خيرني يافريحه مش عارفه..ونزلوا دموعها..
فريحه بقلق قالت..
/خيرك تكلمي!؟
قالت نزيهه ودموعها تنزل..
/مش عارفه خيرني حاسه روحي مش طايقه تسعه ولاطايقه نشوف وجهه حتى امس لما شميت عطره حسيت روحي بنرجع..
بدت ع وجه فريحه ابتسامه دهشه وهي تقول..
/بالله!نزيهه قالت بضيق..
/نحكي حد يافريحه..
فريحه بضحكه قالت..
/حتى اني نحكي جد يامهبوله..انتي شكلك تتوحمي عليك..
بدت ع وجه نزيهه ملامح الصدمه..
فريحه جتها شدتها من يدها وقالت..
/اسمعي تمشي تقوليله بنطلعوا مشوار للخياطه فريده وبش ماتنحسبش علينا كذبه نمشولها ونشوفوا شن صار في قفاطينا لكن بعد مانطلعوا من المستشفى..
نزيهه قالت وهي مصدومه..
/زعمه حق نطلع حامل يافريحه؟
فريحه قالت بإبتسامه..
/قولي ان شاء الله..
🌿ودارت فريحه دبارتها ورفعهم السواق للمستشفى وغادي دارت نزيهه تحاليل الحمل وقعدوا مع بعض يستنوا في النتيجه..
وبعد طول انتظار مر وكأن ليه سنين جتهم نفس الطبيبه اللي بشرت فريحه قبل وهالمرة قالت لنزيهه..
"مبروك يااللا نزيهه انتي حامل"
الفرحه اللي فرحتها نزيهه وقتها ماكانتش اكبر من فرحة فريحه..ضمتها بقوة وهي تقول بفرح..
"مبروك حبيبتي مبروك"
ونزيهه ضم فيها وهي تضحك وتبكي..
🌹وبعد مادارت بعض الفحوصات وعطتها الطبيبه توصيات تمشي بيهم في اول شهور الحمل خدتها فريحه وطلعوا للسواق اللي رفعهم للخياطه "فريده"..
فريدة من اصول تركيه ارمله وعندها بنت اسمها عصمت معلمتها كار الخياطه..عصمت كانت هدرازة وضحاكه وهوايتها المفضله جمع اخبار الناس في الالف والخمسين بش تهدرز بيهم ع الزباين وتسليهم..
🌱"وياحنة طلعت مطربه في الافراح"
نزيهه بصدمه..
/ولد شيخ يحب مطربه!؟
عصمت وهي تساوي في فستان فريحه قالت..
/وراسه والف سيف ياخدها مشي خدي وجهه وقال ماني مروحها لين ترضوا نتزوجها..
فريحه:عليك حالة..
نزيهه:شكلها بلقيس معاش تندري عليهم..
فريحه:ايه قداش ليها معاش حكت عليهم..
عصمت قالت بضحكه..
/سلمها هالجبينه يومها شفت خطيبها جايها للمعهد الله يبارك عليك راجل..
🌹والجبينه هالوقت كانت واصله لمنتزه يطل ع البحر قعدت دور بعيونها لعند ماطاح نظرهم ع اللي يحبوه وهو مقعمز تحت شجره بزيه العسكري محول طاقيته وشادها بيده..
كان يشوفلها بإبتسامه حلوة هي بادلاته بأحلى منها ومشتله بسرعه..
وصلت فيه وقالت..
/محمد افندي ازيك يامحمد افندي وحشتني قوي..
ناض وقف وهو يضحك خدي منها الحافظه وقال..
/قعمزي ياحلوة الصوف..
ضحكت وقعمزت وهو قعمز مقابلها..
فتح الحافظه وقال..
/شنو هدى؟!.
قالتله:شوف وذوق واحكم..
ضحك وقال..
/صار درتيها..
قالت:اني بنت سلامه بيت المال وين نعطي كلمة نكون عندها..
تأملها بنظرات حلوة اخجلتها بعدين قال..
/تعرفي يابلقيس عمري ماحسيت حياتي حلوة الا بعد طلعتي فيها..
هي بخجل قالت..
/يووه ماتكسفنيش بقى..
بضحكه قالت..
/خيرك علقتي ع المصري؟
قالت بضحكه..
/الايام هادي ماما شادتها افلام ابيض واسود واني نساير فيها..
ضحك بعدين قال..
/خل نشوفوا شن يطلع منك يابنت بيت المال..
وخدي طرف مبطن كلي منه وهي تشوفله بترقب ابتسم بإعجاب وقال..
/لايطلع منك واجد..
قالتله:مازال لما تاخدني تو تشوف كيف نستتك ونهنيك..
ابتسم ابتسامه حلوة وقالت..
/غير امتى بس..
نزلت عيونها وهي مبتسمه بخجل وهو يتأمل فيها وقلبه ذايب من حبه ليها..
🌿🌿🌿🌿🌿
نزلوا الزوز من السيارة بعد ماحطهم السواق مشت نزيهة لفريحه شدت يدها وقالت..
/نبيك انتي تبشريهم..
ضحكت وقالت..
/باهي..
ومشوا مع بعض لجهة معينه في الحديقه كانوا مقعمزين فيها تسعه وامه ومرت بوه وبوه اللي كان شاد حفيده..
شافتهم من بعيد اسيا وهما جايات قالت..
/ربي يسلمهم كم هما حلوين..
التفت تسعه شافلهم وابتسم ..
زكيه وهي مبتسمه قالت..
/يبانوا فرحانات..
سلامه ركز بنظره عليهم..
وصلوا فيهم وفريحة تمرر في نظره ع الكل ماعدا تسعه وهي تقول ببهجه..
/جبتلكم بشاره..
ناضت وقفت زكيه وهي تضحك بحماس..
/قولي..
فريحه قالت بضحكه..
/نزيهه حامل..
وتزغرد زكيه واسيا ضمت ايديها لبعض وحطتهم تحت ذقنها وهي تقول بإبتسامه فرح..
/حمد لله..
اما سلامه قال بضحكه فرح..
/ماشاء الله ماشاء الله..
ونزيهه تشوف في فرحتهم بيها تزيد تفرح..
جتها عزوزتها وضمتها وهي تقول..
/الحمد لله الحمد لله..
ونزيهه ضم فيها ودموعها ينزلوا..
هدا كله كان يتفرج عليه تسعه وهو مبتسم بحب..
واللا فريحه انتهزت فرصه انه مشغول بنظره عنها قعدت تملي في عيونها منه..فجأه شافلها هي فنصت وهربت بعيونها عنه قعد يضحك..
شويه سلامة قاله..
/نوض بارك لمرتك؟.
قاله:لاياحاج خليها من بعيد خير لأن وحمها جاي عليا..
هي تفاجئت وتحشمت في نفس الوقت..
وفريحه حتى هي تفاجئت لكن خافت..
هو اشر بسبابته عليهم وقال..
/لو كنت مش عارف انكم حديروا مشوار تاني غير مشوار حوش فريده ماخليتكمش تطلعوا من اصله..
نزلوا عيونهم وهما محرجات..
زكيه:ايه صح غلطوا لكن قصدهم خير..
قال:في الجديد شن ماكان قصدهم مانعرفش وحده تطلع لمكان بدون علمي ولو كنت مش موجود اعطوا علم لبوي وامي..
الزوز قالوا..
/حاضر..
كلهم قعدوا يشوفوا لتسعه بإبتسامه وهو يشوف لنساوينه كيف منزلات عيونهم من الاحراج وع وجهه ابتسامه مع عقدة حواجب..
🌿وتستمر مقاطعة زوجاته ليه وحده جبرها الوحم ووحده قاعدة زعلانه او تتغلى..
🌱"ربييسلمه كيف يلعب محلاه"
تسعه وهو شاد ولده قال..
/اشبح توا يجيه اخ ولااخت..
بلقيس:ان شاء الله بنوته ياربي وتاخد جمال امها كله..
نزيهه اللي كانت مقعمزه بعيد عنهم شويه في حديقه القصر سمعت بلقيس شن قالت ردت عليها..
/سلمها الجبينه السمحه..
ابتسمتلها بلقيس..
ع جية فريحه بسفره فيها صحن فواكه لنزيهه فاتت من جنب تسعه وكأنها ماتشوفش فيه هو تبعها بعيونه وبدي يغني..
/خطم حفني شيع عيونه فيا..
سلمت مارد السلام عليا..
بلقيس قعدت تشوفله وهي شاده ضحكتها..
ونزيهه تسمع فيه وهي تشوف لفريحه بإبتسامه..
وفريحه مكملة في التجاهل..
حطت السفرة قدامها وقعمزت مقابلتها وهي تقول..
/كمليها كلها..
خدت نزيهه الصونيه وهي تضحك..
هو تنهد بعدين قال..
/قولي يابلقيس..ماعندكش صاحبه قنينه نقشها ع الحنطي..
شافوله نزيهه وفريحه وهما يفنصوا..
قالت بلقيس:في وخي في وكل وحده احلى من التانيه شن نويت الثلث!؟.
قاللها:والله قبل ماكان في بالي لكن هناك اللي خلوني نفكر وننوى وكان بيكثروا ع ماوصوهم نجيبهم عليها زوز في يوم واحد..
بلقيس بضحكه..
/خلاص نجيبهملك زوز وحده حنطيه والتانيه شقرا..
فريحه طلعت عن صمتها وقالت..
/تي باهي يابلقيس باهي..
قاللها:شن دخلها بلقيس كلميني اني هني اني راجلك اللي بياخد عليك..
ناضت بلقيس وهي تقول بضحكه..
/انسحاب..ومشت بسرعه بش تضحك ع راحتها بعيد عنهم..
فريحه قلبت وجهها عنه ونزيهه حطت الصونيه وناضت مشتله خدت منه سلامه ومشت وخلتهم..
هو ناض ومشي قعمز مقابلها وقال..
/علاش هدا كله!؟..
قالتله بزعل..
/تعرف علاش كويس..الشك وقلة الثقه مانقبلهمش في حقي بكل..
قاللها:والله لاشك ولاقلة ثقه..نعترف يومها اني لبزت في الدوة لكن مش مني طارتلي هلبه وقتها وانتي عارفة السبب..
بضيق قالت..
/امي حكت لوحده من صاحباتها وهي وصلت الدوة لوحده من خواته..
عقد حواجبه وقال..
/في الجديد اللي يصير هني يقعد هني يافريحه شن ماكان يكون خير ولاشر فاهمه..
هزت راسها بالموافقه بعدين قالت بضيق..
/ارجوك مرة تانيه معاش تكذبني ولاتشكك فيا راك هكي تهين فيا واني مش متعوده منك هالمعامله..
ناض من مكانه ومشالها طبس عليها وباس راسها بعدين قال..
/آسف..سامحيني..
قامت عيونها المليانات دموع فيه وقالت..
/استاحشتك..
هو مسح دمعتها اللي نزلت وقال بإبتسامه..
/اني اكثر...
🌿وتعدي الشهور وكل ماله وحم نزيهه يزيد لدرجة انها تعبت هلبه وقعدت في المستشفى شهر كامل..
وكانوا متشاركين زكيه وفريحه في معاناتها..
فريحه اللي ردتلها مادارت معاها وقت حملها بزايد،خواتها ماداروش معاها ربع اللي ديرلها فيه فريحه..
♤اني قلت قبل علاقتهم فريده من نوعها من حبهم لبعض صغارهم حبوهم زي بعض وكلهم ينادوا في الزوز امي..
خل نقوللكم ع حاجه..خوي سلامه كان يفضل في خالتي نزيهه ع امه وامه ماتحسستش نهائي من الحاجه هادي..بصدق علاقتهم ع قد ماهي حلوة كانت ديما محيرتني واكثر مامحيرني فيها هو قدرتهم ع التغلب ع مشاعر الغيرة والحسد اللي يكونوا بين الضراير بالعاده..
🌿"ارحمني ياربي ارحمني خفف عليا ياربي"
فريحه وهي شاده يدها وتمسح عليها قالت بقلق وتوتر..
/يفوت حبيبتي يفوت..قولي يارب..
بأعلى حسها من قوة الوجع صرخت نزيهه وهي تقول..
/يارب..
وصوت صرخاتها يسمع فيه تسعه وهو يسوق وقلبه موجوع عليها..
🌿وصلوا للمستشفى وغادي بعد دخلوها غرفه الولادة قعدوا فريحه وتسعه يستنوا ع نار..
فريحه كانت تدعي وتسعة يستغفر..
وبعد طول انتظار جتهم ممرضه تبشر فيهم بقدوم المولود التاني لتسعه..
♤هشام تسعه سلامه بيت المال..سماته جداي زكيه..هداكا اليوم خالتي نزيهة جابت لبوي أب تاني..حرفيا هشام كان اب تاني لبوي ولخوته كلهم..وممكن لولا وجوده جنب بوي في اصعب لحظات حياته ماكانش بوي قدر يتجاوزهم...
🌿ودارو لهشام ماداروا لخوه وفرحتهم بيه ما كانتش تقل عن فرحتهم بخوه الا ان هانيه هالمرة كانت تمثل في السعاده وهي تشوف في الصغار اللي يلعب واللي في حضن امه ودموعها في عيونها وامها لاحظتها..
▪▪▪▪▪▪
"قالولي عندك مشاكل لازم تعالجيها بش تحملي ياماما"
زكيه وهي ضامه بنتها قالت ودموعها ينزلوا...
/معليشي ياماما معليشي اصبري ع العلاج لين تبري راك لااول ولاأخر وحده هكي يصير فيها هلبه قعدوا يعالجوا بعدين حملوا..
هانيه وهي ترشف قالت..
/يارب..يارب..
ودرقت زكيه عن سلامه وضع هانيه مابتش تكدره خصوصا وانها الفترة الاخيره بدت تلاحظ عليه التعب وهالشي مخلي القلق ياكل في قلبها..
🌿🌿🌿🌿🌿
وفي يوم ربيعي جميل في مدينة القاره بولي...
في مزرعة سلامه كانت زكيه متعنقه ذراعه وتتمشى هي وياه..
سلامه بضحكه..
/والله حالي باهي ومافيا حاجه لكن العمر ليه دور ياريلتي.
زكية:اكيد ياسي سلامه..
طبطب ع يدها المتعنقه ذراعه وقال..
/اكيد ياريلة سلامه اكيد..
حطت راسها ع كتفها بعدين تنهدت وقالت..
/غنيلي..
وجه نظره القدام وهو مبتسم بعدين بدي يغني بصوت هادي وحلو..
نقشه حلو..عجبتني اوصافه..
بان الزين كيف ساوى لحافه
بان الزين كيف ساوى لحافه.نقشه حلو..الحلو حلو...
♤ويفوت عام كامل فهالعام حملت خالتي نزيهه وجابت اختي الكبيره كريمه وبعدها بثلاثه شهور حملت خالتي نزيهه تاني الله يبارك..ومع ان خالتي فريحه قعدت ع سلامه بس لهداكا الوقت لكن في كل حمل لخالتي نزيهه كانت تفرحلها وكأن هي اللي حملت..
وحتى مرت مرعي قعدت ع غزلان وكريم ومع هذا عزوزتها قعدت تعامل فيها كويس لأنها زي ماقلتلكم قبل حبتها ولقتها خير من بناتها..
لكن عمتي هانيه هي اللي مامشاش حالها..
بعد العلاج ماقدرتش تحمل لهذا قرر راجلها ياخد عليها ولما فتح معاها الموضوع رفضت رفض قاطع وطلبت الطلاق وهو لأن مايبيش يفارقها روح بيها بش يفتح الموضوع مع بوي وجدي ويطلب منهم يحاولوا فيها بش تقتنع وترضى..
🌿"مستحيل مستحيل..ماتجيش ع راسي مراة مانعيشش مع ضرة"
زكيه وهي تبكي قالت..
/باهي ياامي باهي اللي تبيه يصير..
هانيه وهي تبكي قالت بعصبيه..
/نبي نطلق ياماما نبي نطلق..
▪▪▪▪▪▪▪
"للأسف يامحمود مصرة ع الطلاق ومتمسكه بيه"
راجلها قال بضيق..
/واني مازال نبيها ياتسعه ومتمسك بيها..
تسعه:صدقني كلنا حاولنا معاها حتى بوي مابتش تسمع من حد..
♤وع قد ماحاول الراجل عمتي قعدت متمسكه بموقفها وهو مالقاش قدامه غير انه يلبيلها طلبها ويطلقها..واطلقت عمتي هانيه وخشت في حالة كآبة خلتها تعامل نساوين خوها اسوأ معاملة وماطيقش تشوف لصغارهم ونهار جابت خالتي نزيهه خوي"معاذ" مابتش تشوفها ولاتشوفه..
ويجي بعدين موعد عرس عمتي بلقيس واختها الوحيده هانيه مابتش تشاركهم في شي ولابت تحضره..ايه والله هكي قالت جداي قعدت شاده دارها طول اسبوع العرس وللأسف حالها هدا خلا فرحة عمتي بلقيس ناقصه..
وهدا كله كان يتفرج عليه جدي سلامه من بعيد لبعد ماتم عرس عمتي بلقيس وبعد ماتم العرس خدي عمتي هانيه لمزرعة القاره بولي وقعدوا غادي مع بعض اسبوع كامل..
▪▪▪▪▪▪▪
هانيه وهي تبكي في حضن بوها كانت تقول..
/حاسه روحي ماعنديش حظ يابابا وبنكمل عمري تعيسة..
سلامة:ماتقوليش هكي يابابا وعسى ان تكرهوا شيئا وهو خير لكم ماتندريش ع الوقت شن داس مرات ربي يبيك تعيش حياة احلا من اللي تتمنيها..
هانيه وهي ترشف قالت..
/زعمه يابابا!؟
طبطب ع ظهرها وهو يقول..
/قولي ان شاء الله بنتي قولي ان شاء الله..
بنبرة باكيه قالت..
/ان شاء الله..
زاد ضمها وباس راسها بعدين قال..
/ربي يحفظك يابنتي..
قالت:ويحفظك بابا ومايحرمني منك..
🌿وروحت هانيه ونفسيتها مرتاحه ع الآخر ومعاملتها مع الجميع تغيرت 180درجة وخدت قرار انها تخدم بالشهادة متاعها وخوها تسعة خلاها تتعين في وزارة الثقافه وبعد بدت خدمة زادت تحسنت حالتها النفسيه وشبه تجاوزت اللي صار معاها...
🌿🌿🌿🌿🌿
"اخر مرة نحمل خلاص معاش نبي معاش نبي الباقي جيبيهم انتي يانزيهه"
نزيهه وهي شادة فريحه وماشيه بيها للسيارة قالت بضحكه..
/حاضر..
ويتلقاهم تسعة ويركبها للسيارة وهو يسمع فيها شن تقول ويضحك عليها...
♤ويشرف اشرف أفندي..وهالمرة جابت خالتي فريحه صديق لبوي وللعيلة كلها..صديق خوته وخواته صديق عماته حتى نساوين بوه كان ليهم ولد وصديق..الوحيد هداكا الوقت اللي جي اشقر وعيونه خضر..
▪▪▪▪▪▪▪
"كانت تتوحم عليا ديما قعمز معايا وشوفلي"
سلامه وهو يتمشى مع اسيا اللي كانت متعنقه ذراعه في مزرعة القاره بولي ابتسم لكلامها وقال..
/معناها هدا بيقلب البلاد ع راسه..
ضحكت آسيا بعدين قالت..
/سلامه في بالي سؤال نبي عليه اجابه..
وقف بيها وقال..
/اسألي..
رفعت حواجبها وقالت..
/قول صراحة ارجوك..انت تحبني اكثر ولاتحب زكيه اكثر؟
ضحك بعدين قال..
/نحبكم الزوز اكثر من بعض..
قالتله:غير قول قول مش حنزعل..
قاللها:واني قتلك ياقنينه..
شافتله بطرف عينها وقالت..
/تحب زكيه اكثر..
ابتسم وقال..
/نحبكم الزوز اكثر من بعض ومانقدرش نعيش من غيركم..
ومشي وهي معاه..حطت راسها ع ذراعه وقالت بإبتسامة حب..
/غنيلي...
ضحك بعدين بدي يغني بنفس نبرة الصوت الهاديه..
/نقشه حلو..عجبتني اوصافه...
♤وتتوالى نجاحات بوي زي ماتوالوا صغاره..خلال هالسنوات افتتح مركز كبير للمجوهرات تحت اسم "مجوهرات بيت المال" وهالمركز كان في العاصمه..وبعدين أسس شركة قابضة للإستثمارات الماليه وحتى هي كان مركزها العاصمه..هالشركه قعد سنين يخططلها في تخطيط دقيق وواسع وزي ماقلت قبل بوي يخطط مليح وخططه في الغالب ناجحه ميه في الميه..وهكي زاد كبر اسم بيت المال وعلا شانهم اكثر في البلاد وبرا منها وحتى نفوذهم بدي يتوسع في الألف وخمسين وبرا منها..
في الوقت اللي قعد فيه كمال البندار يحاول ينافس ويدير لروحه مقام يفوت مقام بوي لكن لأن ماعنداش دماغ زي اللي عند بوي قعد ينجح في نجاحات ع قده..
وخلال هالسنوات ايضا..تزوج بنت واحد من اكبر التجار في البلاد"فطيمه" ومشت اموره معاها وجاه منها ولده البكر..
"سلطان البندار"..العراب والأب الروحي لمحسوبكم..ااه مغلاك عليا ياسلطان..
🌿ويتوالوا صغار تسعة ع قولة الخضر وتجيب فريحه "فاضل وبعد فاضل جت أروى وحتى هي جابتها فريحه..
وبهكي يكون مجموعالصغار اللي جو لتسعه 7صغار..
خمسة ولاد وبنتين...
♤بوي قال بعد ماجتني أروى طلب مني بوي نرافقه في مشيته الشهريه لمزرعة القاره بولي..قال طلبه هدا خلاني نحس بشعور ماريحنيش..
🌿"عطاك ربي من الولاد خمسه زي ماعطي بوي رحمة الله عليه..وجدك ياتسعة ربانا احسن تربيه ووزع بينا محبته ومايملك من المال بالعدل ع حياة عينه وهدفه من الحاجه هادي يخلي قلوبنا ديما ع بعض ويبعد علينا الحساسيات والحسد..تنهد بألم بعدين شافله وقال..اللي نبي نقولهولك ياولدي ربي صغارك بعدل وفي نفس الوقت خليهم يحبوا بعض اكثر مايحبوك انت خليهم ديما في حاجه لبعض مايقدروش يستغنوا عن بعض..خلي كبيرهم يربي صغيرهم وصغيرهم يتعلق بكبيرهم ولما يجي الوقت المناسب للزواج خليهم يقعدوا معاك في نفس القصر...وبالنسبه لعلاقتهم بيك خليها تكون علاقه حب ورهبه وتعلق في نفس الوقت بش تقعد طول ماانت حي كبيرهم اللي مايقدروش يطلعوا من تحت جناحه..فهمت عليا ياولدي..
تسعه وهو يشوفله بعيون عبتهم الدموع قال بإبتسامه..
/فهمت ياحاج فهمت..
تنهد سلامه ووجه نظره القدام وهو يقول..
/ربي يباركلك فيهم وتشوفهم خير منك..
خدي تسعه يد بوه باسها بعدين قال..
/ويطول في عمرك..
ابتسم سلامه بصمت..
♤واخيرا قرر محفوظ يتزوج..خدي وحده اردنيه دارلها عرس في بريطانيا وقرر يجيبها لليبيا ويديرلها عرس تاني ويفرح بيه اهله واحبابه..
🌿🌿🌿🌿🌿
درست حافلة في بداية الطريق..
نزلوا منها مبروكه ومنوبيه وهما يتناقشوا..
مبروكه:والله اني كلمتها عليك يامنوبيه قالت مايطلب فيها حد..
منوبيه:ماهو كل شي خديتيه انتي لروحك يامبروكه..
مبروكه بضيق..
/الله يسامحك وخلاص..
ضحكت منوبيه وقالت..
/نبصر عليك..اصلا اني الخدمه هادي زايد ناقص عندي التطييب في المناسبات غناني والحمد لله..
مبروكه قالت..
/ربي يزيدك..
منوبيه قالت..
/المهم توا شن صار في موضوع ولدي وبنتك..
مبروكه قالت بملل..
/ماتبيش يامنوبيه ماتبيش مانقدرش نغصب عليها..
شافت منوبيه لولدها اللي كان واقف بعيد يراجي فيهم وقالت..
/والله مالاقيه راجل يحبها زي ولدي..
مبروكه قالت..
/ربي يعطيه خير منها..
وصلوا في صلاح اللي قال لمبروكه وهو مبتسم ابتسامه عريضه..
/كيف حالك خالتي مبروكه..
قالتله:الحمد لله..
وقعد يمشي وراهم لعند ماوصلوا لحوش مبروكه وبعد ماخشت مبروكه قال صلاح لأمه..
/شن صار يما؟
امه قالت بنرفزة:انساها ولدي طلعها من راسك هادي وحده رافعه خشمها ع مافيش تحساب روحها السفيرة عزيزة..
سكت صلاح وهو معصب وعيونه ع حوش ربيعه..
قالتله امه..
/هيا برا..
قاللها:كملي طريقك يام بري..
شافتله بإستياء بعدين مشت وهو قعد واقف قدام حوش ربيعه..
وتطلع ربيعه بنت 22عام وهي لابسه تنورة طويله وبلوزه طولها للفخد..وع راسها شاربه لافه اطرافها حوالين رقبتها..
وقلب صلاح وين شافها طار وسط ضلوعه..
قعدت تمشي مشيتها اللي مخلياته يهيم فيها..مشيه كلها اعتزاز وكأنها سلطانة زمانها..
قعد يمشي وهو يشوف للعيون اللي تلاحق فيها وكان يتمنى لو يقدر يعميهم عنها..
وقعد وراها لعند ماوصلت لحوش الخياطه فريده اللي ورثاته منها بعد وفاتها بنتها عصمت..
كانت ربيعه تخدم مساعده لعصمت ليها شهور باديه شغل معاها بعد ماخدمت عند خياطات غيرها السنين اللي فاتت..
🌱"ابله عصمت"
"تعالي ياربيعه"
رمت ربيعه كندرتها وخشت لداخل الحوش..
وصلت في المكان اللي تخدم فيه عصمت لقتها تجري وتحوس قالتلها..
/ربي يعاون..
عصمت قالتلها..
/تعالي عاونيني بسرعه..للات عيلة بيت المال جايات بعد شويه..
ربيعه:حاضر..
وقعدت يد بيد مع عصمت لعند ماكملوا حوستهم ع جية زوجات تسعه وخواته بلقيس وهانيه..
طلعت عصمت ترحب وتأهل وتسهل بعدين دخلتهم داخل وهي مازال ترحب..
ويخشوا للصالون اللي كانت وافقه فيه ربيعه،هادي اول مرة تشوف فيها نساوين من عيلة بيت المال..
ع قد ماشافت نساء من الطبقه الغنيه ماشافتش زيهم العز باين في وجوههم في اسلوبهم في تصرفاتهم وهادم الناس اللي في العز من يوم يومهم يولي يجري في دمهم ويبان عليهم في كل شي..عكس محدثين النعمة..
غيرت نظرها عنهم لما سمعت عصمت تقوللها..
"جيبي الضيافه ياربيعه.."
ربيعه قالت..
/حاضر..
ومشت طلعت من حداهم..
عصمت شافت لبلقيس وقالت بإبتسامه..
/الجياب يزيد يحلي ياللا بلقيس..
بلقيس ابتسمت وهي تقول..
/من يوم يومي غزاله..
ضحكوا..
عصمت قالت بضحكه ..
/ربي يبارك..شافت لنزيهه وقالت..كلا انتي ياللا نزيهه كل ماتكبري تصغري الله يبارك..
نزيهه قالت بإبتسامه..
/تسلمي هدا من ذوقك..
عصمت قالت..
/ماقلت الا الحق..وجهت نظرها لهانيه وفريحه وهي تقول..الله يبارك القصه والصبغه طالعات عليكم طلعة ماصارتش..
الزوز قالوا مع بعض..
"تسلمي..ميرسي"
عصمت قالت بضحكه..
/اهم شي البي تسعه مادارلكش مشكلة يالللا فريحه؟
وتخش ربيعه بالضيافه وهي تسمع في رد فريحه..
/لا تسعة عنده عادي يقول ديروا ماتبوا لكن ماتغيروش خلقة ربي..
عصمت قالت..
/صدق صدق..
وبدت ربيعه باليمين وضيفت بلقيس هي الاولى..
بلقيس خدت منها وقالت..
/شكرا ياحلوة..
ربيعه بإبتسامه قالت..
/العفو..
بعدين جت لهانيه اللي رفعت يدها بدون ماتشوفلها..
عقدت ربيعه حواجبها وجت لفريحه اللي خدت منها وهي تقول بإبتسامه..
/صحيتي حبيبتي..
ابتسمت ربيعه وقالت..
/سلمك..
وختمت بنزيهه اللي خدت منها فنجان قهوة بس بدون ماتعبرها وقالت لعصمت..
/القفاطين واتيات ياعصمت..
حطت ربيعه السفرة ع الطاوله وهي مضايقه بعدين رجعت وقفت في مكانها..
عصمت؛ايه واتيات بعدين ديروا بروفا ونشوفوا كان في شي يبي تعديل..
بلقيس قالت..
/ع قد ماتعاملت مع خياطات في مصراته مافيش وحده فيهم وصلت مستواك..
هانيه:اني فصلت عند احسن المصممين في اوروبا بس بصدق وصراحه شغلك ماريتش زيه..
نزيهه قالت..
/عصمت تحب طور من روحها خدت من خبرة امها وتعلمت من خبرات غيرها واشتغلت ع اللي تعلماته لعند ماوصلت لهالمستوى..
عصمت وهي تضحك بإحراج قالت..
/تشكرات تشكرات..والله حرجتوني..
نزيهه بإبتسامة قالت..
/ماقلنا الا الحق..
عصمت:ربي يحفظك ياللا..للا هانيه تبي نجيبلك حاجه تانيه..
ربيعه قعدت تشوف لهانيه كيف حطت رجل ع رجل وقالت..
/لالا الحلو هدا مقاطعه والقهوة مانشربش منها الا فنجان واحد في اليوم..
بلقيس قالت..
/الروجيم اللي مانطيقه بكل..
فريحه بضحكه قالت..
/ولا اني..
نزيهه قالت..
/اني نحبه موت..
هانيه قالت..
/مافي حد جوه يمشي مع جوي زي نوزي..
ابتسمت نزيهه..
بلقيس:يدومها عليك ويدوم عليا فيري اللي دق وماشيه زيي ..
ضحكوا ..
وربيعه قعدت تشوف لبلقيس بإبتسامة بعدين غيرت نظرها لنزيهه لما سمعتها تقول..
/بالله ياعصمت ماتعرفيش خديمات امينات وفالحات زي ماتعرفي العيله كبرت والخدم اللي عندنا شويه..
عصمت شافت لربيعه وقالت..
/ام ربيعه ماشاء الله عليها مراة فالحه وامينه..
ربيعه قالت..
/امي تخدم بحريتها ابله عصمت..
رفعت نزيهه حاجبها وهي تشوفلها وهانيه قالت..
/تخدم بحريتها!؟
شافتلها ربيعه وقالت..
/قصدي مش متقيده بعيلة يعني كل مرة تخدم في مكان..
هانيه:الخدمه عندنا يحلموا بيها حلم..
نزيهه:مش حتلقى خير منها لو دارت البلاد بطولها بعرضها..
ربيعه شافت لعصمت وقالت..
/امي تخدم في فترة محدده ماتقدرش تقعد نهار كامل..
عصمت وهي تشوف لربيعه قالت..
/ايه صح نسيت..بوها طريح الفراش وهما يتناوبوا عليه..
فريحه:ربي يعاونكم..
ربيعه قالتلها بإبتسامه..
/تسلمي يااللا..
نزيهة وهي رافعه حاجبها قالت..
/شن رايك تخدمي انتي عندنا وتخلي امك تعاني بوك..حنعطوك مرتب يسدكم بزايد..
ابتسمت هانيه بمكر وهي تشوف لربيعه..
والباقي كانوا يراجوا في ردها واكثرهم عصمت..
ابتسمت ربيعه لنزيهه وقالت..
/سامحيني ياللا اني مانفهمش غير في الخياطه والتفصيل..
قعدت نزيهه تشوفلها بصمت..
وفريحه بعد شافت لنزيهه قالت لعصمت..
/المهم شوفيلنا نساوين كويسات..
شافت عصمت لفريحه وقالت..
/ان شاء الله..
نزيهه وهي تشوف لربيعه قالت..
/قهوتي بردت نبي غيرها..
هانيه كان عاجبها الجو اللي دير فيه نزيهه عكس فريحه وبلقيس اللي كانوا مضايقات..
قعدت ربيعه تشوف لنزيهه بدون ماتتحرك خطوه ولاتقول كلمة..
نزيهه شافت لعصمت وهي رافعه حواجبها وعصمت لما شافت لنظرتها قالت..
/ربيعه..
ربيعه شافتلها وقالت..
/نعم..
فنصت فيها وقالت..
/ديري قهوة تانيه للا..
ربيعة قالت..
/حاضر ابله عصمت..ومشت طلعت من حداهم ونظرات نزيهه المتسخطه تلحق فيها..
♤خالتي نزيهه معدنها كويس وزي ماقلت قبل احسن زوجات بوي لكن هي زي هلبه ناس لما يولوا في الرياسه ويمسكوا دفة القياده وتزيد مع الحاجه هادي فلوسهم يصيبهم شي من الكبر والغطرسه..المكانه اللي عطوهالها بوي وجدي وحناي زايد الثروة اللي حصلتها من المصنع وورثها من بوها بعد وفاته خلوها للا بمعنى الكلمه وعند ناس الالف وخمسين ولت في مكانه وحده هي وجداي زكيه..وللاسف مع الوقت تغيرت فيها بعض الطباع للأسوأ...
🌿طيبت ربيعة القهوة وجابتها لنزيهه اللي ردتها وقالت "معاش عندي فيها نيه"
وربيعه حاولت تتمالك نفسها وتتجاهل تصرفاتها ..
ويقيسوا فساتينهم اللي كان كل شي فيهم مزبوط من جميع النواحي خدوهم وروحوا..
🌱عصمت:خليك مرنه يابنتي وتعلمي تسايري..
ربيعه هزت راسها وقالت مسايرة...
/ان شاء الله..
عطتها عصمت اجرتها وقالت..
/خودي..
خدت ظرف الفلوس وقالت..
/بالسلامه توا..
عصمت:بالسلامه..
لبست ربيعه كندرتها ومشت طلعت من حوش عصمت..
وتلقى صلاح يراجي فيها تجاهلت وجوده كالعاده وكملت طريقها وهو وراها وفي نص الطريق تلاقت مع "نوال" اقرب صديقاتها ليها..
"ربوعه"
ربيعه ابتسمت وقالت..
/شن مطلعك توا؟
نوال جت جنبها وقالت..
/كنت نقرا في حوش امال..
ربيعه:عندكم امتحانات؟
نوال قالت..
/ايه..سعدودك افتكيني من هالهم..
ابتسمت ربيعه بتهكم وعيونها تعبوا دموع...
🌿🌿🌿🌿🌿
"وهذى ياتعويضه قصر ذهيبه"
قعدت تمرر في نظرها ع القصر من برا وهي في قمة الانبهار تقول..
/ع قد ماسمعت عنه ماتخيلته يكون كبير وفخم هك!!
راجلها قال..
/مازال وين تحقيه من داخل ايش تقولي!؟
تعويضه قعدت تمرر في نظرها ع الحديقه وهي تقول..
/ماشاء الله لاقوة الا بالله..
فجأه شافت زوز ولاد صغار يجروا ورا بعض..
كانوا سلامه وكريم ولد مرعي..
سلامه وهو يجري لف ع تعويضه وراجلها وقعد يدير في حركات استفزازيه لكريم وكريم يقوله..
/تو تحصل تو نوريك..ولحقه وسلامه هرب يجري وهو في جرته..
ضحكوا تعويضه وراجلها بعدين وجهوا نظرهم لواحد سمعوه يقول..
"تعالى هني يامعاذ ماتلحقهمش"
كان هشام لقوه رافع خوه فاضل في حضنه واشرف ومعاذ يمشوا جنبه وهما يضحكوا ع كريم اللي شد سلامة وطاح فيه ضرب..
ع جية كبير الخدم في القصر قاللهم..
/تفضلوا..
ابتسموا ومشوا وراه...
🌿وفي الجهة التانيه من باحة القصر..
"كريمه اروى هيا خشوا"
كريمه:مازال نبي نلعب..
اروى:واني..
غزلان قالت..
/بعدين نطلعوا نلعبوا توا خشوا وقت غدي..
تأففت كريمه ومشت اما غزلان رفعت اروى في حضنها ومشت ورا كريمه..
لما وصلوا في الباب نزلت اروى اللي تفقدت حديدتها مالقتهاش حطت يدها ع مكان الحديده وقالت بزعل..
"ديده"..الحديده..
كريمه:حي شكلها طاحت منها برا..
غزلان تنهدت وقالت..
/باهي خليكم هني تو نطلع ندورها..
وطلعت تجري للمكان اللي كانوا يلعبوا فيه البنات..
🌹في اللحظه اللي جي فيها قيس بش يشوف اخته بلقيس اللي بعتتله مع واحد الصغار يراجيها في الحديقه..
♤عمي قيس غرق في بحر الكيمياء،بعد تخرج من الكليه بدي يقرا في دراسات عليا وماشاء الله نبغ فيها..عالم الكيمياء كان آسر عمي لسنين طويله قبل ليصيبه مرض "اللي جاه جاه" ويدخله لعالم تاني معاش قدر يطلع منه..
المهم في عرس محفوظ كانت هالجيه اول جيه ليه من بعد اخر جيه ليه في عرس بنات عمامه..
🌿وهو ماشي بإتجاه الطاوله والكراسي..
شاف بنيه عمرها مايفوتش 15سنه كانت لابسه فستان مستور فيه حزام من النص وظافره شعرها الاسود الطويل
ضيق عيونه بإستغراب وهو يشوفلها.
اما هي بعد مالقت انسيال اروى خداته ولفت بتمشي جو عيونها في عيون قيس انصدمت وانحرجت ع الاخر لأنها قاعده من غير حجاب..
طول فاتت تجري وهي في قمة الارتباك وتتعثر وتجي طايحه ع ركابها قدملها يجري وهو يقول..
/ياساتر..
هي حاولت تنوض ماقدرتش..
قعمز قدامها ع رووس اصابعه وقال..
/شن صارلك..
رفعت عيونها المدمعات فيه جو في عيونه..
هو لما شافهم حس الدنيا لفت بيه اما هي نزلت عيونها وقالت..
/برا بالله عليك..
ع طلعة بلقيس شافتها طايحه قدمتلهم بسرعه وقالت..
/خيرك غزوله..
غزلان حاولت تنوض وعيون قيس معاها..
وقفت بصعوبه وحاولت تمشي ماقدرتش طلعت منها آهة وجع خلت قيس بدون مايفكر ينوض ويرفعها بين ايديه ويمشي بيها لواحد من الكراسي يقعمزها عليه وهي بتموت من الخجل..
بلقيس بقلق..
/غزوله شن تحسي حبيبتي..
غزلان وعيونها في الارض قالت..
/قوليله يمشي..
ركزت بلقيس ع شعر غزلان بعدين شافت لخوها وقالت..
/برا قيس..
قيس وعيونه علي غزلان قال..
/باهي ماشي لكن شوفي ركابها مرات ينزفوا..
بلقيس قالت..
/باهي باهي غير برا البنت ماتقعدش من غير حجاب قدام الاجانب..
هو طول لف وجهه عنها بعدين لف ومشي..
قعمزت بلقيس جنب غزلان وقالت..
/ترا وريني ركابك غزولي..
🌱في هاللحظه التفت قيس بش يشوفلها لقاها بترفع فستانها رد نظره القدام بعدين تنهد وكمل طريقه ووجهه محمر اللون...

...يتبع...